Skip to content

Maromak uza evolusaun atu kria kriatura oioin ka lae?

Maromak uza evolusaun atu kria kriatura oioin ka lae?

Bíblia nia resposta

 Lae. Bíblia fó sai ho klaru katak Maromak kria ema no mós animál no ai-horis ho “modelu” oioin. * (Génesis 1:12, 21, 25, 27; Apokalipse 4:11) Bíblia hatete katak ema hotu mai husi Adão no Eva, ita-nia inan-aman primeiru. (Génesis 3:20; 4:1) Bíblia la apoia teoria kona-ba Maromak uza evolusaun atu kria kriatura ho modelu oioin. Maibé Bíblia la kontra malu ho sientista sira neʼebé dehan katak iha espésie oioin husi animál no ai-horis sira.

 Maromak uza evolusaun ka lae?

 Ema sira neʼebé fiar katak Maromak uza evolusaun atu kria moris, sira iha ideia oioin kona-ba oinsá Maromak halo ida-neʼe. Ema balu fiar katak dalan ida Maromak kontrola natureza mak liuhusi prosesu selesaun naturál, katak kriatura neʼebé forsa kontinua moris no kriatura neʼebé fraku ikusmai lakon mohu.

 Neʼe mós inklui ideia sira tuirmai:

  •   Kriasaun hotu mai husi kriatura ida deʼit neʼebé moris iha tempu kleur liubá.

  •   Kriatura moris ida bele troka sai fali kriatura seluk.

  •   Maromak mak hola parte iha prosesu sira-neʼe, maibé ema la hatene oinsá.

 Evolusaun no Bíblia apoia malu ka lae?

 Se Maromak uza evolusaun atu kria moris, ida-neʼe katak Bíblia nia istória kona-ba kriasaun iha livru Génesis mak la loos. Maibé Jesus temi kona-ba istória iha livru Génesis hanesan neʼe mak faktu duni. (Génesis 1:26, 27; 2:18-24; Mateus 19:4-6) Bíblia hatete katak antes Jesus mai mundu, nia hela iha lalehan hamutuk ho Maromak no ajuda Maromak kria “buat hotu”. (João 1:3) Tan neʼe ideia katak Maromak uza evolusaun atu kria kriatura oioin kontra malu ho Bíblia nia hanorin.

 Oinsá ho animál no ai-horis nia kbiit atu adapta ho situasaun foun?

 Bíblia la esplika kona-ba animál no ai-horis ho modelu ida-idak iha espésie hira. Bíblia mós la kontra malu ho faktu katak animál no ai-horis neʼebé Maromak kria bele dezenvolve nuʼudar sira iha oan ka adapta ho ambiente foun. Maski ema hanoin katak kuandu animál ka ai-horis adapta ho situasaun foun, neʼe mak evolusaun, maibé tuir loloos ida-neʼe la kria animál ka ai-horis ho modelu foun.

^ par. 1 Liafuan “modelu” neʼebé temi iha Bíblia iha signifikadu neʼebé la hanesan ho liafuan “espésie” neʼebé sientista sira uza. Dala ruma, sientista sira dehan katak espésie foun mosu husi espésie seluk, maibé tuir loloos neʼe la mai husi evolusaun. Tuir loloos neʼe mak kriatura ida tan neʼebé sai parte ba animál ka ai-horis modelu ida neʼebé temi iha livru Génesis.