Skip to content

Jesus nia oin no isin haree oinsá?

Jesus nia oin no isin haree oinsá?

Bíblia nia resposta

La iha ema ida mak hatene ho loloos Jesus nia oin no isin haree oinsá, tanba Bíblia la fó-hatene kona-ba neʼe. Neʼe hatudu katak buat sira-neʼe ladún importante. Maski nuneʼe, Bíblia hakerek buat neʼebé jerál kona-ba Jesus nia oin no isin.

  • Oin: Tanba Jesus nia inan mak ema Judeu ida, karik nia oin mós tuir ema Judeu nian. (Ebreu 7:​14) Maibé karik ema labele nota kedas ida-neʼe. Loron ida, kuandu nia halaʼo viajen husi Galileia ba Jeruzalein, ema la hatene katak nia mak ema Judeu ida. (João 7:​10, 11) No iha ninia dixípulu sira-nia leet, ema haree nia mak oin-seluk uitoan. Hanoin-hetan katak Judas Iscariotes presiza hatudu Jesus mak ida-neʼebé ba ema-lubun neʼebé atu kaer Jesus.​—Mateus 26:47-​49.

  • Fuuk naruk: Jesus sei la husik fuuk naruk, tanba Bíblia dehan katak “se mane ida nia fuuk naruk, ida-neʼe hamoe nia”.​—1 Korinto 11:14.

  • Hasarahun: Jesus iha hasarahun. Nia halo tuir lei ema Judeu neʼebé bandu mane joven sira atu ‘la tesi aat sira-nia hasarahun ninin’. (Levítico 19:27; Galásia 4:4) No mós Bíblia temi Jesus nia hasarahun iha profesia kona-ba ninia terus.​—Isaias 50:6.

  • Isin: Buat barak hatudu katak Jesus iha fíziku neʼebé forte. Durante ninia serbisu haklaken, nia halaʼo viajen ba fatin sira neʼebé dook tebes. (Mateus 9:​35) Nia hamoos templu ba dala rua, baku fila meza neʼebé uza hodi troka osan, no duni sai animál sira uza xikote. (Lucas 19:45, 46; João 2:​14, 15) Livru ida (McClintock and Strong’s Cyclopedia) hatete: “Evanjellu hotu hakerek katak Jesus forte no iha saúde diʼak.”​—Volume IV, pájina 884.

  • Espresaun oin: Jesus laran-maus no hadomi ema, no ita bele fiar katak nia espresaun oin hatudu sai sentimentu neʼe. (Mateus 11:28, 29) Ema oioin buka nia atu bele hetan kmaan no ajuda. (Lucas 5:​12, 13; 7:​37, 38) Labarik kiʼik sira mós sente hakmatek kuandu besik ho nia.​—Mateus 19:13-​15; Marcos 9:35-​37.

Hanoin neʼebé sala kona-ba Jesus nia oin no isin

Hanoin neʼebé sala: Ema balu hanoin katak Jesus mai husi rai-Áfrika tanba livru Apokalipse kompara ninia fuuk hanesan bibi-malae fulun no ninia ain hanesan “riti diʼak”.​—Apokalipse 1:​14, 15.

Hanoin neʼebé loos: Livru Apokalipse nakonu ho “sinál oioin”. (Apokalipse 1:1) Liafuan sira kona-ba Jesus nia fuuk no ain mak simbóliku deʼit, atu hatudu sai kona-ba Jesus nia hahalok sira bainhira nia iha lalehan ona, laʼós kona-ba ninia fíziku bainhira nia sei iha rai. Apokalipse 1:​14 hatete katak Jesus nia “fuuk mutin hanesan bibi-malae fulun neʼebé muntin”. Eskritura neʼe uza kór atu halo komparasaun. Kor-mutin reprezenta ninia matenek tanba idade.​—Apokalipse 3:​14.

Jesus nia ain “nabilan hanesan riti diʼak neʼebé nabeen iha ahi-matan”. (Apokalipse 1:​15) No mós, ninia oin haree “hanesan loro-matan kuandu fó naroman boot”. (Apokalipse 1:​16) Tanba la iha ema ida mak iha isin ho kór hanesan neʼe, klaru katak vizaun neʼe mak simbóliku deʼit, no hatudu Jesus neʼebé hetan ona moris-hiʼas no hela iha “fatin neʼebé naroman tebes toʼo ema ida mós labele hakbesik”.​—1 Timóteo 6:​16.

Hanoin neʼebé sala: Jesus mak fraku no la iha forsa.

Hanoin neʼebé loos: Jesus hatudu nia mane duni liuhusi buat neʼebé nia halo. Porezemplu, ho brani nia fó sai kona-ba ninia an ba ema sira neʼebé mai buka atu kaer nia. (João 18:​4-8) Klaru Jesus mós iha forsa iha dalan fíziku atu bele halo serbisu nuʼudar badain.​—Marcos 6:3.

Maibé, tanbasá Jesus presiza ajuda atu lori ninia ai-riin terus nian? No tanbasá nia mak mate uluk, kompara ho sira neʼebé hetan kastigu hamutuk ho nia? (Lucas 23:26; João 19:31-​33) Antes nia hetan kastigu, ninia isin sai fraku ona. Nia hadeer ba kalan tomak, tanba sente laran-susar tebetebes. (Lucas 22:42-​44) Durante kalan neʼe ema Judeu sira trata aat nia, no iha dadeer tuirmai, ema Roma fó terus nia. (Mateus 26:67, 68; João 19:​1-3) Tanba razaun sira-neʼe mak Jesus mate lalais liu fali ema sira neʼebé hetan kastigu hamutuk ho nia.

Hanoin neʼebé sala: Jesus sempre murón, sériu.

Hanoin neʼebé loos: Jesus ho perfeitu haleno ninia aman Jeová iha lalehan, neʼebé Bíblia temi nuʼudar “Maromak neʼebé kontente”. (1 Timóteo 1:​11; João 14:9) Tuir loloos, Jesus hanorin ema oinsá atu bele sai kontente. (Mateus 5:​3-9; Lucas 11:28) Buat sira-neʼe hatudu katak Jesus sempre hatudu hahalok kontente liuhusi ninia espresaun oin.