Skip to content

Ita bele halo orasaun ba santu-santa sira ka lae?

Ita bele halo orasaun ba santu-santa sira ka lae?

Bíblia nia resposta

Labele. Bíblia hatudu katak ita tenke halo deʼit orasaun ba Maromak, liuhusi Jesus nia naran. Jesus hatete ba ninia dixípulu sira: “Neʼe duni, harohan nuneʼe bá: ‘Ami Aman iha lalehan, halo Ita naran sai santu.’” (Mateus 6:9, Liafuan diak ba imi segunda edisaun) Jesus nunka haruka ninia dixípulu sira atu halo orasaun ba santu-santa sira, anju sira, ka buat seluk, maibé halo deʼit orasaun ba Maromak.

Jesus mós hatete ba ema sira neʼebé tuir nia: “Haʼu neʼe dalan, lia-loos no moris. Ema ida la liu karik husi ha’u, nia la bele hakbesik ha’u Aman.” (João 14:6, Liafuan diak ba imi segunda edisaun) Maromak fó knaar ba Jesus deʼit atu sai Mediadór ba ita-nia diʼak.—Ebreu 7:25.

Haʼu bele halo orasaun ba Maromak no mós ba santu-santa sira ka lae?

Iha Ukun-Fuan Sanulu, Maromak hatete: “Haʼu, Jeová, imi-nia Maromak, mak Maromak neʼebé hakarak ema atu adora haʼu mesak deʼit”. (Éxodo 20:5) Iha dalan saida mak Maromak hakarak ema atu adora nia “mesak deʼit”? Maromak hakarak ita atu laran-metin ka adora nia deʼit, neʼe inklui mós ita-nia orasaun.—Isaias 48:11.

Ita halo Jeová laran-kanek se ita halo orasaun ba buat seluk, maski neʼe mak ba santu-santa ka anju sira. Bainhira apóstolu João koko atu adora anju ida, anju neʼe hapara nia hodi hatete: “Keta halo ida-neʼe! Haʼu mak atan deʼit hanesan ó no ó-nia maun-alin sira neʼebé halaʼo serbisu atu fó sasin kona-ba Jesus. Adora Maromak bá!”—Apokalipse 19:10.