Skip to content

Oinsá Ita bele hakbesik ba Maromak?

Oinsá Ita bele hakbesik ba Maromak?

Bíblia nia resposta

 Ita bele hakbesik ba Maromak liuhusi aprende kona-ba nia no halo buat neʼebé halo nia kontente. Tuirmai, Maromak ‘sei hakbesik ba Ita’. (Tiago 4:8) Bíblia hatete katak Maromak “la dook husi ita ida-idak”.—Apóstolu 17:27.

 Hakat sira atu bele hakbesik ba Maromak

 Lee Bíblia

  •  Bíblia hatete: “Eskritura hotu mai husi Maromak.”—2 Timóteo 3:16.

  •  Signifikadu: Maromak mak dirije ema atu hakerek Bíblia. Nia tau ninia hanoin iha ema nia hanoin no tuirmai sira hakerek Bíblia. Maromak fó sai ninia hakarak ba ita liuhusi Bíblia. Nia mós fó sai ninia hahalok liuhusi Bíblia. Ninia hahalok sira mak inklui domin, justisa no laran-sadiʼa.—Éxodo 34:6; Deuteronómio 32:4.

  •  Buat neʼebé Ita bele halo: Lee Bíblia loroloron. (Josué 1:8) Hanoin kleʼan kona-ba buat neʼebé Ita lee no husu ba Ita-nia an: ‘Saida mak eskritura neʼe hanorin haʼu kona-ba Maromak?’—Salmo 77:12.

     Porezemplu lee toʼok Jeremias 29:11, no tuirmai husu ba Ita-nia an: ‘Maromak hakarak fó saida mai haʼu, dame ka terus? Maromak mak laran-aat ka nia hakarak haʼu atu iha futuru neʼebé diʼak?’

 Haree didiʼak ba kriasaun

  •  Bíblia hatete: “Maski ema labele haree Maromak ho matan, maibé sira bele haree ninia hahalok sira ho klaru hahú husi tempu neʼebé nia kria mundu.”—Roma 1:20.

  •  Signifikadu: Bainhira ita haree didiʼak ba dezeñu ida, neʼe bele hatudu sai buat barak kona-ba ema neʼebé pinta dezeñu neʼe. No mákina neʼebé komplikadu bele hatudu sai buat barak kona-ba ema neʼebé inventa mákina neʼe. Nuneʼe mós ho Maromak nia kriasaun, neʼe bele hatudu sai kona-ba Maromak nia hahalok furak sira. Porezemplu, ema nia kakutak mak komplikadu tebes no bele rai informasaun barak, ida-neʼe hatudu sai Maromak nia matenek. No loro-matan no fitun sira mak forsa boot tebes, ida-neʼe hatudu sai Maromak nia kbiit.—Salmo 104:24; Isaias 40:26.

  •  Buat neʼebé Ita bele halo: Uza tempu atu haree no aprende kona-ba kriasaun. Bainhira Ita halo nuneʼe, husu ba Ita-nia an: ‘Ida-neʼe hanorin saida mai haʼu kona-ba Maromak?’ * Maibé klaru katak iha buat barak neʼebé ita labele aprende kona-ba Maromak liuhusi kriasaun. Tan neʼe, nia fó mai ita Bíblia.

 Uza Maromak nia naran

  •  Bíblia hatete: “Haʼu sei proteje nia tanba nia hatene haʼu-nia naran. Nia sei bolu haʼu, no haʼu sei hatán ba nia.”—Salmo 91:14, 15.

  •  Signifikadu: Maromak nia naran mak Jeová no nia hatudu interese ba ema neʼebé hatene no uza ninia naran ho respeitu. * (Salmo 83:18; Malaquias 3:16) Maromak fó koñese ninia an ba ita liuhusi fó sai ninia naran ba ita. Nia hatete: “Haʼu mak Jeová. Neʼe mak haʼu-nia naran.”—Isaias 42:8.

  •  Buat neʼebé Ita bele halo: Uza Jeová nia naran bainhira koʼalia kona-ba nia.

 Koʼalia ba Jeová liuhusi orasaun

  •  Bíblia hatete: “Jeová besik ba ema hotu neʼebé bolu nia.”—Salmo 145:18.

  •  Signifikadu: Jeová hakbesik ba ema neʼebé halo orasaun ba nia ho fiar. Orasaun mak parte ba ita-nia adorasaun no neʼe hatudu katak ita respeitu tebes Maromak.

  •  Buat neʼebé Ita bele halo: Halo beibeik orasaun ba Maromak. (1 Tesalónika 5:17) Fó sai ba nia buat neʼebé halo Ita hanoin barak no mós fó sai Ita-nia sentimentu.—Salmo 62:8. *

 Hametin Ita-nia fiar ba Maromak

  •  Bíblia hatete: “Se ita la iha fiar, ita labele halo Maromak kontente.”—Ebreu 11:6.

  •  Signifikadu: Atu bele hakbesik ba Maromak, ita presiza tau fiar ba nia. Bíblia esplika katak bainhira ita tau fiar ba Maromak la toʼo atu fiar deʼit katak nia iha. Ita mós presiza tau fiar tomak ba nia, no mós fiar metin katak ninia promesa sira sei sai loos no ninia matadalan sira mak diʼak. Atu bele iha relasaun diʼak ho ema ruma, importante tebes atu fiar malu.

  •  Buat neʼebé Ita bele halo: Fiar neʼebé loos bazeia ba koñesimentu. (Roma 10:17) Tan neʼe estuda Bíblia no prova ba Ita-nia an rasik katak Ita bele tau fiar ba Maromak no ba ninia matadalan sira. Testemuña ba Jeová sei kontente atu estuda Bíblia ho Ita. *

 Halo buat neʼebé lori kontente ba Maromak

  •  Bíblia hatete: “Domin ba Maromak signifika katak ita halo tuir ninia ukun-fuan sira.”—1 João 5:3.

  •  Signifikadu: Jeová hakbesik ba ema neʼebé hatudu sai sira-nia domin ba nia liuhusi halo tuir ninia mandamentu sira.

  •  Buat neʼebé Ita bele halo: Bainhira Ita estuda Bíblia haree didiʼak ba buat neʼebé Maromak gosta no la gosta. Husu ba Ita-nia an: ‘Haʼu bele halo mudansa saida deʼit atu halo Maromak kontente?’—1 Tesalónika 4:1.

 Sente Maromak nia domin hodi halo tuir ninia matadalan

  •  Bíblia hatete: “Koko no haree katak Jeová mak diʼak.”—Salmo 34:8.

  •  Signifikadu: Maromak konvida Ita atu haree rasik katak nia mak diʼak. Bainhira Ita sente rasik ninia domin no apoiu, neʼe sei book Ita atu hakbesik liután ba nia.

  •  Buat neʼebé Ita bele halo: Bainhira lee tiha Bíblia, halo tuir Maromak nia matadalan no sente rasik benefísiu sira. (Isaias 48:17, 18) Ita mós bele buka-hatene kona-ba ema sira neʼebé ho Maromak nia ajuda konsege manán hasoru susar sira, halo sira-nia moris sai diʼak liu, no hetan moris kontente hamutuk ho sira-nia família. *

 Hanoin neʼebé sala kona-ba hakbesik ba Maromak

 Hanoin neʼebé sala: Maromak mak kbiit boot no importante liu, tan neʼe nia lakohi hakbesik ba ita.

 Hanoin neʼebé loos: Maski Maromak mak importante liu hotu no iha kbiit boot tebes iha universu maibé nia konvida ita atu hakbesik ba nia. Bíblia temi ezemplu barak kona-ba mane no feto neʼebé sai belun diʼak ho Maromak.​—Apóstolu 13:22; Tiago 2:23.

 Hanoin neʼebé sala: Ita labele koñese Maromak tanba nia mak mistériu.

 Hanoin neʼebé loos: Buat balu kona-ba Maromak mak susar atu komprende, hanesan nia mak Espíritu neʼebé ita labele haree ho matan. Maski nuneʼe, ita bele koñese Maromak. Tuir loloos, Bíblia hatete katak ita presiza koñese Maromak atu bele hetan moris ba nafatin. (João 17:3) Bíblia uza liafuan sira neʼebé ita bele komprende bainhira koʼalia kona-ba Kriadór, ninia hahalok furak sira, ninia hakarak ba ema no mundu no mós ninia matadalan sira. (Isaias 45:18, 19; 1 Timóteo 2:4) No hanesan temi ona, Bíblia mós fó sai Maromak nia naran. (Salmo 83:18) Entaun ita bele koñese Maromak no mós hakbesik ba nia.—Tiago 4:8.

^ par. 10 Atu hetan ezemplu sira kona-ba Maromak nia matenek neʼebé hatudu sai liuhusi natureza, haree série “Maromak mak kria ka lae?

^ par. 13 Ema barak komprende katak Jeová nia naran signifika “Nia mak halo sai”. Bainhira Maromak fó sai ninia naran ba ita, neʼe hanesan nia hatete: ‘Haʼu sei halo haʼu nia hakarak sai loos. Haʼu sempre kumpre haʼu-nia promesa sira.’

^ par. 22 Atu hetan informasaun liután haree vídeo Oinsá ami halaʼo estuda Bíblia ho ema?