Skip to content

Saida mak Bíblia hanorin kona-ba dinosauru?

Saida mak Bíblia hanorin kona-ba dinosauru?

Bíblia nia resposta

 Iha Bíblia, la iha informasaun klaru kona-ba dinosauru. Maibé Bíblia hatete katak Maromak “kria ona buat hotu”, tan neʼe klaru katak Maromak mós kria dinosauru. * (Apokalipse 4:11) Maski Bíblia la temi ho klaru kona-ba dinosauru, maibé Bíblia temi grupu animál balu neʼebé karik inklui dinosauru:

Dinosauru evolui husi animál seluk ka lae?

 La iha evidénsia neʼebé bele prova katak dinosauru evolui ka mosu neineik husi animál seluk, maibé fosil neʼebé matenek-naʼin sira deskobre hatudu katak dinosauru mosu derrepente deʼit. Ida-neʼe apoia malu ho Bíblia nia liafuan neʼebé hatudu katak Maromak mak kria animál hotu. Porezemplu, Salmo 146:6 hatete katak Maromak mak “Kriadór ba lalehan, rai, tasi no buat hotu neʼebé iha laran”.

Horibainhira mak dinosauru moris?

 Bíblia esplika katak Maromak kria animál neʼebé moris iha tasi no rai iha loron ka períodu lima no neen iha tempu kriasaun nian. * (Génesis 1:20-25, 31) Entaun, Bíblia hatudu katak dinosauru karik moris iha mundu ba tempu neʼebé kleur uitoan.

Behemot no Leviatan mak dinosauru ka lae?

 Lae. Maski ita la hatene ho loloos animál rua neʼe, neʼebé temi iha livru Job mak saida, maibé karik Behemot mak ipopótamu no Leviatan mak lafaek. Ida-neʼe tuir Bíblia nia esplikasaun kona-ba Behemot no Leviatan. (Job 40:15-23; 41:1, 14-17, 31) Klaru katak “Behemot” no “Leviatan” laʼós dinosauru. Maromak haruka Job atu haree ba animál sira-neʼe, no Job moris iha tempu neʼebé dinosauru sira mate ona.​—Job 40:16; 41:8.

Tanbasá dinosauru la iha ona?

 Bíblia la esplika tanbasá dinosauru la iha ona. Maibé Bíblia hatete katak buat hotu kria tiha “tanba [Maromak] nia hakarak”, entaun klaru katak Maromak iha objetivu ruma bainhira nia kria dinosauru. (Apokalipse 4:11) No bainhira Maromak nia objetivu kumpre ona, nia husik dinosauru mate no lakon mohu.

^ par. 1 Fosil neʼebé matenek-naʼin sira deskobre prova katak dinosauru moris duni iha tempu uluk. Fosil sira-neʼe mós hatudu katak iha tempu uluk, iha dinosauru ho modelu oioin mak moris.

^ par. 6 Iha Bíblia, liafuan “loron” bele refere ba períodu ka tempu neʼebé kleur ka bele mós tinan rihun ba rihun.​—Génesis 1:31; 2:1-4; Ebreu 4:4, 11.