Skip to content

PERGUNTA HUSI JOVEN SIRA

Oinsá mak haʼu bele tahan hasoru depresaun?

Oinsá mak haʼu bele tahan hasoru depresaun?

Se Ita planu ho didiʼak atu manán hasoru depresaun, ida-neʼe bele halo Ita sente kmaan!

 Ita sei halo saida?

Imajina toʼok situasaun sira-neʼe:

Jennifer lakon ninia kontente. Loron-loron nia tanis la para, maibé la hatene tanbasá. Nia lakohi ransu no mós la iha vontade atu han. Nia labele toba-dukur ka tau atensaun ba buat ruma. Jennifer hanoin: ‘Tanbasá mak haʼu sente hanesan neʼe? Haʼu bele sente kontente fali hanesan uluk ka lae?’

Mark mak alunu neʼebé uluk iha hahalok diʼak. Maibé agora nia lakohi atu bá eskola, no ninia valór komesa tun. Mark la iha tan forsa atu halimar desportu neʼebé uluk nia goza. Ninia kolega sira mós konfuzaun. Ninia inan-aman hanoin barak kona-ba nia. Mudansa neʼe temporáriu deʼit ka sei ba nafatin?

Dala ruma Ita mós sente hanesan Jennifer no Mark ka lae? Se nuneʼe, Ita bele halo saida? Ita bele koko halo tuir opsaun rua neʼe:

  1. Tahan hasoru problema mesak

  2. Koʼalia ho ema maduru ida neʼebé Ita bele tau fiar

Karik opsaun A fasil, liuliu se Ita lakohi atu koʼalia ho ema seluk. Maibé neʼe matenek ka lae? Bíblia dehan: “Ema naʼin-rua diʼak liu fali naʼin-ida . . . tanba se sira ida monu, ida seluk bele ajuda ninia pár atu hamriik. Maibé saida mak sei akontese ba ema neʼebé mesak deʼit bainhira nia monu no la iha ema ida atu ajuda nia hamriik?”​—Eclesiastes 4:9, 10.

Imajina toʼok: Ita laʼo no lakon dalan iha área neʼebé perigozu tanba krime barak. Kalan-boot ona, no Ita la koñese ema ida. Ita sei halo saida? Karik Ita bele koko rasik hodi buka dalan seluk atu sai husi fatin neʼe. Maibé karik matenek liu se Ita husu ema neʼebé Ita tau fiar atu ajuda Ita, loos ka lae?

Sente depresaun mak hanesan área neʼebé perigozu. Dala ruma Ita sente laran-triste no lalais deʼit Ita sente diʼak fali. Maibé se Ita sente depresaun ba tempu naruk, diʼak liu Ita husu ajuda.

MATADALAN HUSI BÍBLIA: “Ema neʼebé gosta atu mesamesak . . . la hafolin matenek hotu.”​—Provérbios 18:1.

Se Ita hili opsaun B no koʼalia ho inan-aman ka ema maduru ida neʼebé Ita bele tau fiar, Ita sei hetan benefísiu husi sira-nia esperiénsia tanba sira hatene ona oinsá atu kontrola sira-nia emosaun.

Maibé karik Ita dehan: ‘Haʼu-nia inan-aman la komprende haʼu-nia sentimentu!’ Neʼe loos ka? Maski situasaun neʼebé sira hasoru kuandu sira sei joven la hanesan ho Ita-nian agora, maibé sira mós iha sentimentu neʼebé hanesan Ita-nian. No karik sira hatene dalan seluk atu hasoru situasaun neʼe!

MATADALAN HUSI BÍBLIA: “Matenek mak iha ferik-katuas sira-nia leet, no ema neʼebé moris naruk mak iha kbiit atu komprende, loos ka lae?”​—Job 12:12.

Pontu importante: Se Ita koʼalia ho inan-aman ka ema maduru ida neʼebé Ita tau fiar, Ita bele hetan matadalan neʼebé ajuda duni Ita.

Sente depresaun mak hanesan laʼo lakon dalan iha área neʼebé perigozu. Hodi bele buka dalan seluk atu sai, importante mak husu ajuda.

 Oinsá se ida-neʼe mak problema médiku?

Se Ita sente depresaun loron-loron, karik Ita iha problema médiku hanesan moras depresaun neʼebé presiza duni tratamentu.

Bainhira joven, Ita-nia emosaun dala ruma tun-saʼe no sinál moras depresaun mós atu hanesan neʼe. Maibé sinál moras depresaun sai makaʼas no ba tempu kleur. Tan neʼe, se Ita sente laran-triste tebes ba tempu kleur, karik diʼak atu koʼalia ho Ita-nia inan-aman atu bá konsulta.

MATADALAN HUSI BÍBLIA: “Ema neʼebé isin-diʼak la presiza doutór, maibé ema moras presiza.”​—Mateus 9:12.

Se doutór dehan Ita iha moras depresaun, lalika sente moe kona-ba neʼe. Neʼe akontese ba joven barak, no iha duni tratamentu atu ajuda Ita! Ita-nia belun diʼak sei la tesi-lia ba Ita.

Sujestaun: Hatudu pasiénsia. Tanba presiza tempu atu sente diʼak fali husi moras depresaun, no keta hakfodak se loron balu Ita sente diʼak no loron seluk sente depresaun fali. *

 Planu sira atu sente diʼak fali

Maski Ita atu simu tratamentu ka lae, maibé iha buat ruma neʼebé Ita rasik bele halo atu tahan hasoru sentimentu triste. Porezemplu, atu bele kontrola Ita-nia emosaun, diʼak atu halo ezersísiu beibeik, han ai-han neʼebé iha vitamina, no toba diʼak. (Eclesiastes 4:6; 1 Timóteo 4:8, nota-rodapé) Se hakarak, Ita bele hakerek kona-ba Ita-nia emosaun, planu sira atu sente diʼak fali, tempu neʼebé Ita sente depresaun fali, no tempu neʼebé Ita manán hasoru depresaun.

Maski Ita iha moras depresaun ka sente laran-triste ba tempu uitoan, hanoin hetan ida-neʼe: Hodi husu ajuda husi ema seluk no hakaʼas an halo buat ruma atu sente diʼak fali, Ita bele manán hasoru depresaun.

 Eskritura sira neʼebé bele ajuda Ita

  • “Jeová besik ema sira neʼebé laran-kanek; nia salva sira neʼebé laran-triste.”​—Salmo 34:18.

  • “Entrega ó-nia laran-susar ba Jeová, no nia sei apoia ó. Nia sei nunka husik ema laran-loos atu monu.”—Salmo 55:22.

  • “Haʼu, Jeová, ó-nia Maromak, mak kaer ó-nia liman-loos, Haʼu dehan ba ó: ‘Keta taʼuk. Haʼu sei ajuda ó.’”—Isaias 41:13.

  • “Keta hanoin resin kona-ba loron aban.”​—Mateus 6:34.

  • “Husu ajuda husi Maromak liuhusi orasaun no harohan no mós fó agradese, no Maromak nia dame neʼebé aas liu ema nia hanoin hotu sei proteje imi-nia laran.”​—Filipe 4:6, 7.

^ par. 28 Se Ita hanoin atu oho an, buka ajuda kedas husi ema maduru ida neʼebé Ita bele tau fiar. Atu hetan informasaun liután, haree lisaun iha Sedarlah! fulan Abríl 2014 ho títulu “Buat Apa Hidup?”