Skip to content

PERGUNTA HUSI JOVEN SIRA

Tanbasá mak tenke hili didiʼak múzika?

Tanbasá mak tenke hili didiʼak múzika?

“Buat primeiru neʼebé haʼu halo iha dadeer mak rona múzika. Iha karreta laran, haʼu rona múzika. Bainhira deskansa iha uma, hamoos uma, no lee, haʼu mós rona múzika. Haʼu sempre rona múzika.”​—Carla.

Ó mós gosta tebes atu rona múzika hanesan Carla ka lae? Se ó-nia resposta mak sin, informasaun neʼe bele ajuda ó atu buka-hatene benefísiu no perigu husi múzika, no oinsá hili múzika ho matenek.

 Benefísiu sira

Rona múzika mak atu hanesan ho han hahán. Hahán neʼebé diʼak no natoon bele lori buat diʼak ba ó, nuneʼe mós ho múzika. Hanoin toʼok:

  • Múzika bele halo ó sente kalma.

    “Bainhira haʼu ladún sente kontente, haʼu sei rona haʼu-nia múzika favoritu no sente diʼak fali.”​—Mark.

  • Múzika bele halo ó hanoin kona-ba tempu uluk.

    “Dala barak, múzika ida bele halo haʼu hanoin fali kona-ba memória furak sira, tan neʼe haʼu sempre kontente bainhira rona múzika neʼe.”​—Sheila.

  • Múzika bele hametin unidade.

    “Haʼu tuir Reuniaun Boot Internasionál husi Testemuña ba Jeová, no bainhira ema hotu kanta knananuk ikus, haʼu-nia matan-been nakonu. Maski ami koʼalia língua neʼebé la hanesan, maibé múzika neʼe halo ami iha unidade.”​—Tammy.

  • Múzika bele ajuda ó haburas hahalok diʼak.

    “Hodi aprende oinsá atu toka instrumentu múzika, ajuda ita atu iha pasiénsia no kontrola an. Aprende toka la fasil no presiza tempu. Atu ita bele toka ho didiʼak ita presiza treinu beibeik.”​—Anna.

Hatene ka lae? Livru Salmo mak livru naruk liu hotu iha Bíblia, knananuk hamutuk 150.

Hanesan hahán, ó mós presiza hili múzika ho matenek

 Perigu sira

Hahán balu neʼebé dodok ona mak perigu, nuneʼe mós ho múzika balu. Haree toʼok razaun balu.

  • Múzika barak nia liafuan koʼalia nakloke kona-ba hahalok seksuál.

    “Múzika neʼebé ema barak gosta atu rona mak koʼalia deʼit kona-ba hahalok seksuál. Liafuan iha múzika sira-neʼe hatudu momoos kona-ba neʼe.”​—Hannah.

    Bíblia hatete: “Iha imi-nia leet keta temi hahalok sala-foʼer, hahalok la moos hotu, ka hahalok kaan-teen.” (Éfeso 5:3) Husu ba ó-nia an: ‘Múzika neʼebé haʼu rona ajuda haʼu atu halo tuir matadalan neʼe ka lae?’

  • Múzika balu bele halo ó triste demais.

    “Dala ruma, iha kalan haʼu rona múzika neʼebé halo haʼu hanoin kona-ba buat sira neʼebé halo haʼu estrese. Múzika neʼebé triste halo haʼu hanoin kona-ba buat oioin neʼebé negativu.”​—Tammy.

    Bíblia hatete: “Proteje bá ó-nia laran, neʼe mak buat importante liu hotu neʼebé ó tenke proteje.” (Provérbios [Amsal] 4:​23) Husu ba ó-nia an: ‘Múzika neʼebé haʼu rona halo haʼu fokus ba hanoin negativu ka lae?’

  • Múzika balu bele halo ó hirus lalais.

    “Múzika neʼebé koʼalia kona-ba sentimentu hirus, ka odi ita-nia an rasik mak perigu mai haʼu. Haʼu nota katak haʼu-nia hahalok troka depois rona tiha múzika hanesan neʼe. Haʼu-nia família mós nota ida-neʼe.”​—John.

    Bíblia hatete: “Soe tiha buat sira-neʼe hotu, katak laran-nakali, hirus, hahalok aat, koʼalia aat, no keta husik liafuan aat ida sai husi imi-nia ibun.” (Koloso 3:8) Husu ba ó-nia an: ‘Múzika neʼebé haʼu rona, halo haʼu sai ema neʼebé hirus no la hanoin ema seluk?’

Lisaun importante mak ó presiza hili didiʼak múzika. Joven ida naran Julie mós hakaʼas-an atu halo hanesan neʼe. “Haʼu sempre revista fali haʼu-nia múzika sira, no haʼu sei apaga múzika neʼebé haʼu sente ladún diʼak, maski neʼe la fasil, maibé haʼu hatene haʼu presiza halo ida-neʼe duni.”

Feto ida naran Tara aprende lisaun ida. Nia hatete: “Dala ruma rádiu fó sai múzika balu neʼebé iha melodia diʼak, maibé tuirmai haʼu sei rona didiʼak liafuan sira iha múzika neʼe no haʼu hatene katak haʼu presiza troka. Ba haʼu neʼe hanesan tata uitoan bolu gostu ida no bá kedas! Se haʼu lakohi rona múzika kona-ba hahalok seksuál, haʼu mós sei lakohi halo hahalok seksuál antes kaben. Tuir loloos, múzika iha kbiit duni atu book ita-nia hanoin no sentimentu.”