Skip to content

PERGUNTA HUSI JOVEN SIRA

Oinsá mak haʼu bele tahan laran-triste bainhira hasoru situasaun susar?

Oinsá mak haʼu bele tahan laran-triste bainhira hasoru situasaun susar?

Situasaun susar bele kona ema naran deʼit. Bíblia hatete: “Laʼós ema neʼebé halai lalais mak sempre manán halai-taru, no laʼós asuwaʼin mak sempre manán funu, . . . Situasaun neʼebé mosu derrepente deʼit kona sira hotu.” (Eclesiastes 9:11) Neʼe inklui mós joven sira neʼebé hasoru susar. Oinsá mak sira bele tahan hasoru situasaun susar neʼe? Haree toʼok ezemplu rua tuirmai.

 REBEKAH

Haʼu-nia inan-aman divórsiu kuandu haʼu tinan 14.

Haʼu hatete ba haʼu-nia an, haʼu-nia inan-aman la halo divórsiu, haʼu-nia apá presiza tempu uitoan atu mesak deʼit. Haʼu hanoin, ‘Nia hadomi amá, tanbasá mak nia hakarak husik amá? Tanbasá mak nia hakarak husik haʼu?’

Neʼe susar tebes ba haʼu atu koʼalia ba ema seluk kona-ba buat neʼebé akontese. Haʼu lakohi hanoin tan kona-ba neʼe. Iha tempu neʼebá haʼu la sente katak haʼu hirus hela. Haʼu komesa hanoin barak no susar tebes atu toba.

Haʼu-nia amá mak haʼu-nia belun diʼak liu hotu. Maibé bainhira haʼu tinan 19, nia mate tanba kankru.

Haʼu-nia inan-aman nia divórsiu hakanek tebes haʼu, maibé haʼu-nia amá mate neʼe halo haʼu rahun tebetebes. Haʼu seidauk bele simu neʼe. Haʼu susar tebes atu toba, no toʼo agora haʼu nafatin hanoin barak.

Maibé, iha buat balu neʼebé ajuda tebes haʼu. Porezemplu, Provérbios 18:1 fó-hanoin ita atu la mesamesak. Entaun, haʼu halo tuir matadalan neʼe.

No mós nuʼudar Testemuña ba Jeová, haʼu lee publikasaun sira husi Bíblia neʼebé bele fó laran-manas. Bainhira amá-apá divórsiu, haʼu hetan ajuda hodi lee livru Pertanyaan Kaum Muda—Jawaban yang Praktis, Jilid 2 neʼebé ho títulu “Haʼu bele kontente ho família neʼebé iha inan ka aman deʼit ka lae?”

Haʼu-nia eskritura favoritu ida neʼebé ajuda haʼu atu la hanoin barak mak iha Mateus 6:​25-34. Iha versíkulu 27, Jesus hatete: “Imi ida-neʼebé mak hodi hanoin resin bele hanaruk ninia moris ba tempu uitoan tan?”

Situasaun aat bele kona ema hotu. Maibé haʼu aprende husi haʼu-nia amá, oinsá atu tahan hasoru susar mak importante. Amá hasoru situasaun susar barak, divórsiu no moras todan. Maibé nia sempre iha hanoin neʼebé pozitivu. No nia laran-metin nafatin ba Maromak toʼo nia mate. Haʼu nunka haluha buat neʼebé amá hanorin mai haʼu kona-ba Jeová.

Hanoin toʼok: Tanbasá mak lee Bíblia no livru sira kona-ba Bíblia bele ajuda Ita tahan hasoru susar?​—Salmo 94:19.

 CORDELL

Bainhira haʼu tinan 17, haʼu haree haʼu-nia apá iis kotu. Neʼe mak esperiénsia neʼebé aat liu iha haʼu-nia moris. Neʼe halo haʼu rahun tebes.

Haʼu la fiar katak nia mate. Haʼu sente katak ema neʼebé sira falun ho hena neʼe laʼós haʼu-nia apá. Haʼu dehan ba haʼu-nia an ‘Aban nia sei hadeer fali.’ Haʼu sente neon mamuk no bilán.

Ami-nia família hotu Testemuña ba Jeová. Maluk sira iha kongregasaun ajuda tebes ami kuandu apá mate. Sira prepara hahán, hamaluk ami, no sempre hamutuk ho ami ba tempu barak. Sira-nia ajuda halo haʼu fiar katak Testemuña ba Jeová mak halo tuir duni buat neʼebé Jesus hatete.​—João 13:35.

Liafuan sira iha 2 Korinto 4:17, 18, fó laran-manas tebes mai haʼu. Liafuan sira-neʼe mak: “Terus sira neʼebé ita hasoru daudaun mak ba tempu uitoan deʼit no kmaan, maibé ida-neʼe lori glória ba ita, no glória neʼe mak boot liu no ba nafatin. Ita la hateke ba buat neʼebé matan bele haree, maibé ba buat neʼebé matan labele haree. Tanba buat neʼebé matan bele haree mak ba tempu uitoan deʼit, maibé buat neʼebé matan labele haree mak ba nafatin.”

Versíkulu ikus fó forsa tebes mai haʼu. Buat neʼebé akontese ba apá mak temporáriu deʼit, maibé Maromak nia promesa ba futuru mak rohan-laek. Apá nia mate halo haʼu hanoin fali kona-ba haʼu-nia futuru no saida mak haʼu sei halo iha futuru.

Hanoin toʼok: Oinsá mak situasaun susar ruma neʼebé akontese bele ajuda Ita atu hanoin kona-ba Ita-nia futuru?​—1 João 2:17.