Skip to content

BANATI-TUIR SIRA-NIA FIAR | ELIAS

Nia tahan toʼo rohan

Nia tahan toʼo rohan

 Profeta Elias rona notísias katak liurai Acab foin mate. Ita bele imajina profeta neʼebé idade ona kaer ninia hasarahun no hanoin fali akontesimentu barak entre nia ho liurai aat neʼe. Elias hasoru susar barak tebes. Liurai Acab ho liurai-feto Jezabel ameasa beibeik Elias, duni tuir nia no koko atu oho nia. Bainhira Jezabel haruka ema atu oho Jeová nia profeta sira, liurai Acab la hapara ida-neʼe. Sira naʼin-rua mós halo planu hamutuk atu oho ema laran-loos naran Nabot hamutuk ho ninia oan-mane sira, tanba Acab no Jezabel mak ema kaan-teen. Tan neʼe, Elias hatoʼo Jeová nia mensajen tesi-lia nian ba Acab no ninia umakain. No agora Maromak nia liafuan sira-neʼe komesa sai loos. Acab mate iha dalan neʼebé hanesan Jeová fó-hatene nanis.​—1 Reis 18:4; 21:1-26; 22:37, 38; 2 Reis 9:26.

 Maibé, Elias hatene katak nia presiza kontinua atu tahan. Jezabel moris hela no nia nafatin uza ninia kbiit ba ninia família no mós ba nasaun. Elias sei hasoru tan susar oioin, no mós nia presiza hanorin buat barak ba ninia ajudante Eliseu. Mai ita hanoin kona-ba knaar tolu neʼebé Elias halo iha ninia tempu ikus. Bainhira ita komprende oinsá Elias nia fiar ajuda nia atu kontinua tahan, neʼe sei ajuda ita atu komprende oinsá mak ita bele hametin ita rasik nia fiar iha tempu susar agora.

Tesi-lia ba Acazias

 Acab no Jezabel nia oan-mane Acazias mak sai liurai tuirmai iha Izraél. Duké aprende lisaun husi ninia inan-aman nia hahalok aat, Acazias halo tuir sira-nia ezemplu la diʼak. (1 Reis 22:52) Nia mós adora Baal hanesan ninia inan-aman. Adorasaun ba Baal mak envolve hahalok foʼer hanesan relasaun seksuál ho feto-aat iha templu, no mós hasaʼe bebé nuʼudar sakrifísiu. Iha ka lae buat ruma neʼebé bele book Acazias atu troka ninia hahalok no halo povu laran-metin fali ba Jeová?

 Derrepente deʼit, liurai joven neʼe hasoru dezastre. Nia monu husi kuak neʼebé taka ho ai iha kuartu ida iha uma-leten no hetan kanek todan. Maski Acazias besik atu mate, nia la husu ajuda husi Jeová, maibé haruka ninia atan sira bá ema Filístia nia sidade Ekron hodi husu maromak Baal-Zebub se ninia kanek bele sai diʼak fali ka lae. Jeová la kontente duni ho ida-neʼe, entaun nia haruka anju ida ba Elias hodi haruka Elias atu hanetik ema sira neʼebé lori liurai nia lia-menon. Elias mós hatoʼo mensajen makaʼas ba sira atu lori ba liurai. Acazias halo sala boot tanba ninia hahalok hatudu hanesan la iha Maromak iha Izraél. Tan neʼe, Jeová hatete katak Acazias sei la sai diʼak fali husi ninia kanek.​—2 Reis 1:2-4.

 Ho ulun-toos Acazias husu: “Mane neʼebé hasoru imi no koʼalia liafuan sira neʼe ba imi, nia hanesan saida?” Bainhira sira esplika katak profeta neʼe hatais roupa simples deʼit, Acazias hatete kedas: “Nia mak Elias.” (2 Reis 1:7, 8) Buat neʼebé interese mak Acazias bele hatene kedas katak nia mak Elias bainhira nia rona deʼit kona-ba ninia hatais, tanba Elias halaʼo moris neʼebé simples atu serbí Maromak. Neʼe la hanesan duni ho Acazias ka ninia inan-aman, tanba sira buka uluk rikusoin. Ohin loron, ita bele aprende husi Elias nia ezemplu atu moris simples no fokus ba buat neʼebé importante liu hodi tuir Jesus nia konsellu.​—Mateus 6:22-24.

 Acazias hakarak atu vinga fali Elias, tan neʼe nia haruka tropa naʼin-50 hamutuk ho sira-nia xefe atu kaer Elias. Bainhira sira hetan Elias neʼebé “tuur hela iha foho leten”, * xefe neʼe obriga Elias hodi dehan: “Tun mai.” Karik nia hanoin atu fó kastigu-mate ba Elias. Imajina toʼok! Maski soldadu sira hatene katak Elias mak “Maromak loos nia atan”, sira la sente sala atu ameasa Elias. Tuir loloos sira-nia hanoin mak sala duni! Elias hatán ba xefe: “Se haʼu mak Maromak nia atan, entaun ahi sei tun husi lalehan hodi han ó no ó-nia tropa naʼin-50.” Maromak rona ba nia. “Ahi tun husi lalehan hodi han xefe neʼe no ninia tropa naʼin-50.” (2 Reis 1:9, 10) Buat sira neʼebé akontese ba tropa sira hatudu katak Jeová la kontente duni bainhira ema hatún ka la respeitu ninia atan sira.​—1 Krónikas 16:21, 22.

 Acazias haruka fali tropa naʼin-50 seluk ho sira-nia xefe. Xefe segundu neʼe aat liu fali xefe primeiru. Hanoin toʼok, nia la aprende buat ida maski karik haree ahi-kadesan balu husi ema naʼin-51 neʼebé mate tanba ahi han sira. Xefe neʼe laʼós deʼit koʼalia repete buat neʼebé xefe primeiru hatete ba Elias, maibé nia aumenta tan liafuan “lalais” hodi dehan: “Tun mai lalais.” Xefe neʼe beik duni. Nia no ninia tropa naʼin-50 mós ahi han kedas sira hanesan ho tropa sira primeiru. Maibé ida neʼebé beik liután mak sira-nia liurai. Ho ulun-toos, nia haruka tropa sira ba dala terseiru. Maibé xefe terseiru mak ema neʼebé matenek. Nia ho haraik an hakbesik ba Elias no husu didiʼak ba Elias hodi sira la hetan kastigu-mate. Elias neʼebé reprezenta Maromak haleno Jeová nia laran-sadiʼa bainhira koʼalia ho xefe neʼe. Jeová nia anju haruka Elias atu bá hamutuk ho tropa sira-neʼe. Elias bá hasoru liurai no hatoʼo fali Jeová nia liafuan ba liurai aat neʼe. Ikusmai Acazias mate iha dalan neʼebé Maromak fó sai nanis. Acazias ukun ba tinan rua deʼit.​—2 Reis 1:11-17.

Elias haleno Jeová nia laran-sadiʼa bainhira koʼalia ho xefe neʼebé haraik an

 Oinsá mak Elias bele kontinua tahan maski ema barak neʼebé haleʼu nia mak ulun-toos? Pergunta neʼe importante ba ita ohin loron. Bainhira ema neʼebé ita hadomi mak sai ulun-toos no foti desizaun neʼebé la matenek, neʼe halo ita triste. Oinsá mak ita bele tahan situasaun hanesan neʼe? Tropa sira hetan Elias tuur hela iha “foho leten”. Bíblia la fó sai tanbasá mak Elias iha foho leten, maibé tanba Elias mak ema neʼebé gosta halo orasaun, karik nia halo orasaun ba Maromak Jeová iha fatin hakmatek hanesan neʼe. (Tiago 5:16-18) Ita mós bele fahe tempu hodi halo orasaun beibeik ba Jeová iha fatin hakmatek hodi fó sai ita-nia laran-susar no problema neʼebé ita hasoru. Neʼe sei ajuda ita atu tahan susar iha dalan neʼebé diʼak liután maski ema neʼebé haleʼu ita hatudu hahalok aat.

Entrega knaar ba Eliseu

 Tempu mai ona atu Elias remata ninia knaar nuʼudar profeta. Haree toʼok saida mak nia halo. Bainhira Elias no Eliseu atu sai husi sidade Gilgal, Elias hatete ba Eliseu atu hela deʼit iha sidade neʼe no nia mesak mak bá Betel, neʼebé dook maizumenus kilómetru 11. Maibé Eliseu dehan: “Haʼu jura hodi Jeová, Maromak neʼebé moris, no jura hodi Ita-nia moris, katak haʼu sei la husik Ita.” Bainhira sira naʼin-rua toʼo iha Betel, Elias dehan ba Eliseu katak nia sei bá mesak toʼo Jerikó, neʼebé maizumenus dook kilómetru 22. Eliseu hatete buat neʼebé hanesan uluk. Depois iha Jerikó mós sira koʼalia ba malu hanesan neʼe, tuirmai sira bá Mota Jordaun, neʼebé maizumenus kilómetru 8 husi neʼebá. Dala ida tan, Eliseu lakohi atu fahe malu ho Elias.​—2 Reis 2:1-6.

 Eliseu hatudu hahalok neʼebé importante tebes, neʼe mak domin neʼebé laran-metin. Neʼe mak domin ho integridade, relasaun neʼebé metin no nunka husik ka rende an. Domin hanesan neʼe mak Rute hatudu ba Noemi. (Rute 1:15, 16) Maromak nia atan hotu presiza domin hanesan neʼe, liuliu tempu agora. Hanesan Eliseu, ita hatudu hahalok neʼe ka lae?

 Klaru katak Eliseu nia domin no laran-metin anima tebes Elias. Tan neʼe, Eliseu hetan priviléjiu atu haree Elias nia milagre ikus iha Mota Jordaun. Neʼe mak mota neʼebé bee tun lalais no fatin balu kleʼan. Iha mota ibun neʼe mak Elias baku bee ho ninia roupa profeta nian, no mota neʼe fahe ba parte rua! “Profeta sira-nia oan-mane sira naʼin-50” mós haree milagre neʼe. Sira mak grupu ida neʼebé simu treinu atu bele dirije adorasaun loos iha rai neʼe. (2 Reis 2:7, 8) Parese Elias mak fó treinu ba sira. Tinan balu liubá, Elias sente katak nia mesak deʼit mak laran-metin ba Jeová iha nasaun neʼe. Maibé Jeová fó bensaun ba Elias neʼebé tahan susar hodi hatudu katak ema neʼebé adora Maromak loos mak aumenta.​—1 Reis 19:10.

 Depois sira hakur tiha Mota Jordaun, Elias dehan ba Eliseu: “Husu bá saida mak ó hakarak haʼu halo ba ó antes Maromak foti haʼu husi ó.” Elias hatene katak ninia tempu atu fahe malu ho Eliseu besik ona. Nia la laran-moras ba ninia belun neʼebé sei hetan priviléjiu no naran-boot iha futuru. Maibé, Elias kontente atu ajuda nia. Eliseu husu deʼit buat ida: “Favór ida, haʼu bele simu espíritu neʼebé Ita iha ba dala rua ka lae?” (2 Reis 2:9) Neʼe laʼós katak Eliseu hakarak espíritu santu barak liu fali Elias. Buat neʼebé Eliseu husu mak liman-rohan neʼebé baibain oan-mane primeiru mak simu. Tuir Moisés nia Ukun-Fuan, oan-mane primeiru iha direitu atu simu liman-rohan barak dala rua liu fali oan sira seluk, tanba nia sei kaer ninia responsabilidade nuʼudar família nia ulun. (Deuteronómio 21:17) Atu kumpre didiʼak knaar nuʼudar ema neʼebé troka Elias, Eliseu hatene nia presiza hatudu aten-brani hanesan Elias.

 Ho haraik an, Elias husik Jeová mak fó resposta ba buat neʼebé Eliseu husu. Se Jeová husik Eliseu atu haree Elias bainhira Maromak foti Elias, neʼe katak Maromak fó buat neʼebé Eliseu husu. Lakleur, bainhira sira naʼin-rua “koʼalia daudaun no laʼo hamutuk hela”, buat espesiál ida akontese!​—2 Reis 2:10, 11.

Elias ho Eliseu nia relasaun belun ajuda duni sira naʼin-rua atu tahan hasoru susar oioin

 Naroman neʼebé oin-seluk mosu iha lalehan no sai besik no besik liután. No derrepente deʼit anin boot huu ho lian makaʼas hamutuk ho naroman nabilan neʼebé hakbesik ba sira, no haketak sira naʼin-rua no halo sira taʼuk. Sira haree kuda-karreta funu nian neʼebé nabilan hanesan ahi. Elias hatene katak tempu toʼo ona atu husik Eliseu. Elias saʼe kuda-karreta neʼe ka lae? Bíblia la esplika kona-ba neʼe. Maibé Elias sente katak nia saʼe ba fatin aas tebes iha anin-fuik laran!

 Eliseu hakfodak ho buat neʼebé nia haree, no neʼe halo nia hatene katak Jeová sei fó ba nia aten-brani neʼebé boot liu fali Elias “dala rua”. Maibé Eliseu sente triste tebes tanba nia la hatene ninia belun neʼe bá neʼebé. Karik nia labele hasoru malu fali ho Elias. Eliseu hakilar dehan: “Haʼu-nia aman, haʼu-nia aman! Izraél nia kuda-karreta no ninia ema neʼebé saʼe kuda!” Eliseu kontinua haree ninia mestre neʼe saʼe ba dook toʼo lakon. Tuirmai nia lees ninia roupa tanba triste tebes.​—2 Reis 2:12.

 Kuandu Elias saʼe ba leten, nia rona ninia belun Eliseu nia lian hakilar no nia mós tanis tanba hanoin ninia belun neʼe ka lae? Ita la hatene, maibé nia sente duni katak belun diʼak hanesan Eliseu ajuda ona nia atu tahan hasoru susar oioin. Hanesan Elias, ita mós hakarak haburas relasaun nuʼudar belun ho ema neʼebé hadomi Maromak no prontu atu halo tuir ninia hakarak!

Jeová muda Elias ba fatin seluk atu halo knaar foun

Knaar ikus

 Elias bá neʼebé? Relijiaun balu hanorin katak nia saʼe ba lalehan no hela hamutuk ho Maromak. Maibé neʼe la loos. Tinan barak liutiha, Jesus Kristu dehan katak la iha ema ida mak saʼe ona ba lalehan. (João 3:13) Entaun kuandu ita lee “Elias saʼe ba lalehan iha anin-fuik laran”, ita presiza buka-hatene “lalehan” neʼe refere ba saida. (2 Reis 2:11) Bainhira Bíblia uza liafuan “lalehan”, neʼe laʼós refere deʼit ba fatin neʼebé Jeová hela, maibé mós kona-ba fatin aas neʼebé iha kalohan no manu sira semo. (Salmo 147:8) Entaun Elias saʼe toʼo lalehan hanesan neʼe.

 Tuir loloos Jeová muda deʼit Elias ba fatin seluk atu halaʼo ninia knaar foun iha Judá. Bíblia konta katak liutiha tinan hitu husi tempu neʼebé Elias saʼe ba lalehan, nia kontinua serbí nuʼudar profeta iha Judá. Iha tempu neʼebá, liurai aat Jeorão mak ukun Judá. Nia kaben ho Acab no Jezabel nia oan-feto, entaun Acab no Jezabel nia influénsia neʼebé aat seidauk lakon husi Judá. Jeová haruka Elias atu hakerek karta neʼebé fó sai mensajen tesi-lia nian ba Jeorão, no ikusmai Jeorão mate ho kondisaun neʼebé aat tebes hanesan Maromak fó sai nanis. Aat liután mak “bainhira nia mate, la iha ema ida mak hanoin nia”.​—2 Krónikas 21:12-20.

 Jeorão ho Elias la hanesan duni. Ita la hatene oinsá ka bainhira mak Elias mate. Maibé ita hatene katak bainhira Elias mate, ema hanoin tebes nia. Eliseu hanoin tebes Elias. Profeta seluk neʼebé laran-metin mós hanoin Elias. Jeová mós hafolin Elias, tan neʼe maizumenus tinan 1.000 liutiha, Jeová halo Elias mosu iha vizaun kuandu Jesus nakfila an. (Mateus 17:1-9) Ita hakarak ka lae aprende husi Elias hodi haburas Ita-nia fiar atu bele tahan hasoru susar oioin? Se nuneʼe, fokus ba buat espirituál iha Ita-nia moris, halo orasaun beibeik ho laran, no haburas relasaun metin ho maluk sira neʼebé hadomi Maromak. Hodi halo nuneʼe, Ita sei hela nafatin iha Maromak Jeová nia domin!

^ par. 6 Matenek-naʼin balu hanoin katak foho neʼe mak Foho Karmel neʼebé tinan balu liubá Jeová uza Elias atu manán hasoru Baal nia profeta sira. Maibé Bíblia la fó sai neʼe mak foho saida.