Skip to content

AJUDA BA FAMÍLIA | MORIS KABEN NIAN

Oinsá mak atu haburas hahalok pasiénsia

Oinsá mak atu haburas hahalok pasiénsia

“Feen-laʼen nia pasiénsia hetan koko loroloron. Kuandu klosan hela karik ita hanoin hahalok pasiénsia ladún importante, maibé ida-neʼe importante tebes atu ita-nia moris kaben nian bele hetan susesu.”—John.

 Tanbasá ita presiza pasiénsia?

  • Moris kaben nian bele halo ita tau fokus ba ita-nia kaben nia sala.

    “Kuandu kaben tinan balu ona, fasil atu tau fokus ba buat la diʼak oioin neʼebé ita-nia kaben halo. Bainhira ita hahú hanoin negativu, sai fasil liu atu lakon pasiénsia.”—Jessena.

  • Se lakon pasiénsia, fasil atu koʼalia uluk antes hanoin.

    “Haʼu iha toman atu koʼalia kedas, dala ruma koʼalia buat neʼebé la diʼak. Se haʼu bele hatudu pasiénsia liután, haʼu bele hanoin uluk antes koʼalia no deside se haʼu presiza koʼalia ka lae.”—Carmen.

    Bíblia dehan: “Domin mak pasiénsia no laran-diʼak.” (1 Korinto 13:4) Klaru katak ema naʼin-rua neʼebé dehan sira hadomi malu mós tenke hatudu pasiénsia ba malu. Maibé realidade mak laʼós sempre akontese hanesan neʼe. John dehan: “Fasil liu atu lakon pasiénsia duké haburas pasiénsia. Ita presiza hakaʼas an.”

 Oinsá mak ita bele hatudu pasiénsia?

  • Kuandu situasaun ida mosu derrepente no koko ita-nia pasiénsia.

    Ezemplu: Ita-nia kaben koʼalia liafuan kroʼat ba ita. Ita sente susar atu hatudu pasiénsia no hakarak hatán kedas.

    Bíblia nia prinsípiu: “Keta sente an lalais, tanba hahalok sente an lalais mak hela iha ema beik nia hahalok.”—Eclesiastes 7:9, nota-rodapé.

    Oinsá atu hatudu pasiénsia: Para lai. Antes hatán, hanoin uluk katak loloos ita-nia kaben lakohi hakanek ka koʼalia aat ita. Livru Fighting for Your Marriage hatete: “Baibain ema hatudu reasaun neʼebé demais liu ba liafuan neʼebé ninia pár koʼalia maski tuir loloos, ninia pár la iha intensaun atu hakanek nia.”

    Maski ita-nia kaben koko duni atu provoka ita, ita bele halo situasaun sai diʼak liu se ita hatudu pasiénsia no la selu aat fali. Bíblia dehan: “Ahi sei mate kuandu la iha ai.”—Provérbios 26:20.

    “Se ita hahú hanoin katak ita-nia feen mak ita-nia inimigu, para lai no hanoin kona-ba tanbasá ita hadomi nia no lalais kedas koko halo buat diʼak ruma ba nia.”—Ethan.

    Hanoin kona-ba neʼe:

    • Ita hatán oinsá kuandu ita-nia kaben halo ka koʼalia buat neʼebé ladún diʼak?

    • Oinsá mak ita bele hatudu pasiénsia bainhira neʼe akontese fali?

  • Kuandu situasaun ida mosu beibeik no koko ita-nia pasiénsia.

    Ezemplu: Ita-nia kaben sempre tarde, no halo ita hein no sai hirus.

    Bíblia nia prinsípiu: “Kontinua hatudu pasiénsia ba malu no prontu atu fó perdua ba malu ho laran tomak.”—Koloso 3:13.

    Oinsá atu hatudu pasiénsia: Tau fokus ba ita-nia moris kaben nian duké ita-nia an. Husu ita-nia an, ‘Se haʼu sai hirus tanba buat neʼebé akontese ka diskute malu ho haʼu-nia kaben, neʼe hametin ka estraga ami-nia relasaun?’ Hanoin-hetan katak “Ita hotu halo sala dala barak”. (Tiago 3:2) Neʼe katak ita mós presiza hakaʼas an atu haburas hahalok diʼak oioin.

    “Dala ruma haʼu hatudu pasiénsia liu ba belun ida duké ba haʼu-nia laʼen. Haʼu hanoin neʼe tanba haʼu gasta tempu barak ho nia no hatene ninia sala. Maibé se haʼu hatudu pasiénsia ba nia, neʼe katak respeitu no hadomi nia. Neʼe mak buat neʼebé importante iha haʼu-nia moris kaben nian.”—Nia.

    Hanoin kona-ba neʼe:

    • Ita hatudu pasiénsia kuandu ita-nia kaben halo sala ka lae?

    • Aban-bainrua, oinsá mak ita bele hatudu pasiénsia boot liu?