Skip to content

AJUDA BA FAMÍLIA

Oinsá atu kontrola hirus

Oinsá atu kontrola hirus

Ita-nia pár koʼalia ka halo buat ruma neʼebé halo Ita hirus no Ita koko atu tahan deʼit. Maibé Ita-nia pár haree katak Ita la kontente hela no komesa koʼalia barak liután. Ida-neʼe aumenta Ita-nia hirus. Oinsá mak Ita bele kontrola Ita-nia an iha situasaun hanesan neʼe?

 Buat neʼebé Ita presiza hatene

  • La kontrola hirus bele estraga ita-nia saúde. Peskiza hatudu katak, kuandu la kontrola hirus, neʼe bele hamosu tensaun, moras-fuan, depresaun, no problema ho estómagu. Hirus mós bele halo ita toba la dukur, laran-taridu, moras kulit, no estrok. Bíblia hatete: “Husik tiha hirus . . . , tanba neʼe sei lori susar ba ó.”​—Salmo 37:8, nota-rodapé.

  • Rai hirus mós bele perigu. Kuandu ita kontinua hirus, neʼe bele sai hanesan moras ida neʼebé estraga ita-nia laran. Porezemplu, ita bele komesa hanoin atu kritika deʼit ema seluk. Se Ita hatudu hahalok hanesan neʼe, susar ba ema atu hela hamutuk ho Ita no bele estraga Ita-nia moris kaben nian.

 Buat neʼebé Ita bele halo

  • Hanoin kona-ba Ita-nia pár nia hahalok diʼak sira. Hakerek buat tolu neʼebé Ita gosta kona-ba Ita-nia pár nia hahalok. Se aban bainrua Ita sai hirus kona-ba buat neʼebé nia hatete ka halo, hanoin fali kona-ba lista neʼe. Ida-neʼe bele ajuda Ita kontrola Ita-nia hirus.

    Bíblia nia matadalan: “Sempre hatudu agradese bá.”​—Koloso 3:15.

  •  Haburas hahalok perdua malu. Ulukliu, koko atu komprende Ita-nia pár nia hanoin. Ida-neʼe bele ajuda Ita atu haburas hahalok “hanoin malu”. (1 Pedro 3:8) Tuirmai, husu Ita-nia an, ‘Razaun neʼebé halo haʼu hirus mak boot liu hodi haʼu labele fó perdua ka lae?’

    Bíblia nia matadalan: “Buat furak . . . mak nia la hanoin fali kona-ba ema nia sala.”​—Provérbios 19:11.

  •  Koʼalia kona-ba Ita-nia sentimentu ho laran-diʼak no matenek. Hili liafuan neʼebé laʼós atu fó sala. Porezemplu, duké dehan: “Ó la hanoin haʼu, ó la fó-hatene haʼu ó iha neʼebé,” diʼak liu dehan: “Haʼu hanoin barak kona-ba ó, neʼe kalan ona, haʼu taʼuk buat ruma akontese ba ó.” Kuandu Ita fó sai Ita-nia sentimentu ho laran-diʼak ida-neʼe bele ajuda Ita atu kontrola hirus.

    Bíblia nia matadalan: “Sempre koʼalia ho laran-diʼak hodi tau masin uitoan.”​—Koloso 4:6.

  •  Rona ho didiʼak. Depois fó sai Ita-nia sentimentu, fó tempu ba Ita-nia pár atu fó resposta no la korta ninia liafuan. Kuandu Ita-nia pár remata koʼalia, repete fali ninia liafuan balu hodi haree se Ita komprende buat neʼebé nia hatete ka lae. Hodi rona didiʼak mak bele ajuda Ita kontrola Ita-nia hirus.

    Bíblia nia matadalan: “Lalais atu rona, la ansi atu koʼalia.”​—Tiago 1:19.