Skip to content

AJUDA BA FAMÍLIA | HABOOT OAN

Hanorin Ita-nia oan atu hatudu agradese

Hanorin Ita-nia oan atu hatudu agradese

 Peskiza hatudu katak ema neʼebé toman atu hatudu agradese bele iha moris neʼebé kontente, saúde diʼak, tahan susar, no iha relasaun diʼak ho kolega sira. Peskizadór ida naran Robert A. Emmons dehan katak ema neʼebé hatudu agradese bele “proteje ninia an husi sentimentu negativu, hanesan laran-moras, nervozu, kaan-teen, no hanoin aat”. *

 Kuandu labarik sira toman atu hatudu agradese, neʼe lori benefísiu saida? Ema halaʼo peskiza ba labarik naʼin-700 durante tinan haat, no rezultadu hatudu katak labarik neʼebé toman hatudu agradese, hamenus posibilidade atu hatudu hahalok la laran-moos kuandu tuir ezame, problema ho tua ka droga, no hahalok seluk tan.

  •   Ajuda oan atu la fokus ba sira-nia direitu. Labarik barak sente katak sira iha direitu atu hetan buat diʼak. Se sira haree bensaun nuʼudar buat neʼebé sira merese simu, laʼós nuʼudar prezente, neʼe sei hamenus sira-nia sentimentu agradese.

     Ohin loron labarik barak iha atitude hanesan neʼe. Inan ida naran Katherine dehan: “Média sira sempre fó sai buat oioin neʼebé ita ‘merese’ simu, no anima ita atu sai ema primeiru neʼebé hetan buat sira-neʼe.”

  •   Hanorin labarik husi kiʼik kedas atu haburas sentimentu agradese. Inan ida naran Kaye dehan: “Labarik sira ulun-mamar. Se ita hanorin sira toman diʼak oioin kuandu sira sei kiʼik, neʼe hanesan ita uza ai loos atu halo ai-hun neʼebé sei kiʼik sai loos kuandu boot.”

Oinsá atu hanorin sira hatudu agradese

  •   Hanorin liafuan atu fó agradese. Labarik kiʼik mós bele aprende atu dehan obrigadu bainhira ema fó buat ruma ka hatudu laran-diʼak ba sira. Nuʼudar sira sai boot, sira sei hafolin liután buat neʼebé ema halo ho laran-luak.

     Bíblia nia prinsípiu: “Sempre hatudu agradese bá.”—Koloso 3:15.

     “Ami-nia bei-oan neʼebé tinan tolu toman ona atu hatete ‘obrigadu’, no kuandu husu buat ruma, nia dehan ‘favór’. Nia aprende ida-neʼe husi inan-aman. Inan-aman nia liafuan no ezemplu mak hanorin nia atu hatudu agradese.”—Jeffrey.

  •   Hanorin buat neʼebé sira bele halo atu fó agradese. Kuandu ema fó prezente ba Ita-nia oan, ajuda nia atu hakerek karta hodi fó agradese. No mós, se Ita fó knaar ba Ita-nia oan atu halo serbisu oioin iha uma, neʼe sei ajuda sira atu hafolin serbisu neʼebé ema seluk halo.

     Bíblia nia prinsípiu: “Kontente liu atu fó duké simu.”—Apóstolu 20:35.

     “Ami-nia oan-mane no oan-feto neʼebé joven ona halo planu kona-ba teʼin, sira mós teʼin, no halo serbisu oioin iha uma. Neʼe ajuda sira komprende no hafolin inan-aman nia serbisu.”—Beverly.

  •   Hanorin atitude neʼebé sira presiza hatudu. Hahalok agradese bele kompara ho ai-horis, no haraik an bele kompara ho rai neʼebé bokur. Ema neʼebé haraik an rekoñese katak sira presiza ema seluk nia ajuda atu bele hetan susesu, neʼe halo sira haburas sentimentu agradese ba ema seluk neʼebé apoia sira.

     Bíblia nia prinsípiu: “Haraik an hodi haree ema seluk boot liu fali imi. Keta buka diʼak deʼit ba imi-nia an rasik, maibé buka mós ema seluk nia diʼak.”—Filipe 2:3, 4.

     “Dala ruma ami halo jogu ida durante tempu han-kalan, iha jogu neʼe ema ida-idak tenke koʼalia sai kona-ba buat neʼebé sira hafolin. Neʼe halo ami hotu kontente, agradese ba buat oioin duké hanoin negativu, no la hanoin an deʼit.”—Tamara.

 Sujestaun: Hatudu ezemplu. Se Ita iha toman atu hatoʼo agradese ba ema seluk no mós ba Ita-nia oan, neʼe ajuda duni oan sira atu haburas sentimentu agradese.

^ par. 1 Husi livru Thanks! How Practicing Gratitude Can Make You Happier.