Skip to content

ESPLIKASAUN KONA-BA ESKRITURA

Roma 10:13—“Bolu Naʼi nia naran”

Roma 10:13—“Bolu Naʼi nia naran”

 “Ema hotu neʼebé bolu Jeová nia naran sei hetan salvasaun.”—Roma 10:13, Tradusaun Mundu Foun.

 “Ema hotu-hotu neʼebé bolu Naʼi nia naran sei hetan maksoin.”—Roma 10:13, Liafuan diak ba imi, segunda edisaun.

Signifikadu husi Roma 10:13

 Maromak la todan ba sorin, no nia fó oportunidade ba ema hotu atu hetan salvasaun no hetan moris ba nafatin, la depende ba sira-nia nasionalidade, rasa ka pozisaun. Atu bele hetan benefísiu husi ida-neʼe, ita tenke bolu Maromak Aas Liu Hotu nia naran, neʼe mak Jeová. *Salmo 83:18.

 Iha Bíblia laran, fraze “bolu Jeová nia naran” la signifika deʼit katak hatene Maromak nia naran no uza ida-neʼe iha adorasaun. (Salmo 116:12-14) Maibé neʼe inklui mós tau fiar ba Maromak no sadere ba ninia ajuda.—Salmo 20:7; 99:6.

 Jesus Kristu haree Maromak nia naran nuʼudar buat neʼebé importante. Fraze primeiru iha ninia orasaun neʼebé nia hanorin mak: “Ami Aman iha lalehan, halo Ita-nia naran sai santu.” (Mateus 6:9) Jesus mós hatudu katak ita tenke hatene, halo tuir no hadomi Jeová, se ita hakarak hetan moris ba nafatin.—João 17:3, 6, 26.

 Tanbasá ita bele hatene katak Jeová mak “Naʼi” neʼebé temi iha Roma 10:13 iha Bíblia tradusaun Liafuan diak ba imi, segunda edisaun? Tanba versíkulu neʼe mak liafuan husi Joel 2:32, neʼebé temi duni Maromak nia naran iha lian orijinál Ebraiku, laʼós temi deʼit títulu “Naʼi”. *

Kontestu husi Roma 10:13

 Roma kapítulu 10 hatudu katak atu Maromak bele simu ita, ita tenke tau fiar ba Jesus Kristu. (Roma 10:9) Parte husi Bíblia neʼebé ema bolu nuʼudar Testamentu Tuan mós apoia ida-neʼe. Ita hatudu sai ita-nia fiar liuhusi “fó sai iha ema barak nia oin”, neʼe inklui haklaken liafuan diʼak kona-ba salvasaun ba ema seluk. Rezultadu mak ema seluk bele hetan oportunidade atu haburas fiar neʼebé lori ba moris.—Roma 10:10, 14, 15, 17.

Lee Roma kapítulu 10 hamutuk ho ninia nota-rodapé no referénsia marjinál.

^ par. 3 Maromak nia naran mosu besik dala 7.000 iha manuskritu antigu husi Bíblia. Iha eskritura lian Ebraiku, naran neʼe mosu ho letra haat, neʼebé bolu nuʼudar Tetragrama. Iha lian Inglés, Tradusaun Bíblia barak liu mak tradús naran neʼe nuʼudar “Jehovah”, maibé iha mós matenek-naʼin balu neʼebé gosta atu tradús nuʼudar “Yahweh”.

^ par. 6 Ita bele fiar katak ema Kristaun neʼebé hakerek Bíblia uza Maromak nia naran kuandu sira temi liafuan sira husi “Testamentu Tuan” neʼebé hakerek naran neʼe. The Anchor Bible Dictionary hatete: “Iha evidénsia neʼebé hatudu katak bainhira ema neʼebé hakerek Testamentu Foun temi fali liafuan husi Testamentu Tuan neʼebé inklui tetragrama, ka Maromak nia naran Yahweh, sira hakerek duni tetragrama iha Testamentu Foun.” (Volume 6, pájina 392) Atu hetan informasaun liután, haree “Maromak nia naran iha Eskritura Lian Gregu” iha Apéndise A5 iha Bíblia Sagrada Tradusaun Mundu Foun.