Skip to content

ESPLIKASAUN KONA-BA ESKRITURA

Josué 1:9​—“Sai aten-brani no sai forte bá”

Josué 1:9​—“Sai aten-brani no sai forte bá”

 “Haʼu fó ona mandamentu ba ó, loos ka lae? Sai aten-brani no sai forte bá. Keta nakdedar ka taʼuk, tanba Jeová, ó-nia Maromak, mak hamutuk ho ó iha fatin hotu neʼebé ó sei bá.”—Josué 1:9, Tradusaun Mundu Foun.

 “Laos katak Hau manda ona o? O tenki forti no brani ba! O la bele tauk ka hakfodak, tanba Hau mak NAI, o nia Maromak, nebee hamutuk ho o iha fatin nebee deit mak o baa.”—Josue 1:9, Bíblia Kadi Kapasidade.

Signifikadu husi Josué 1:9

 Ho liafuan sira-neʼe, Maromak Jeová * anima ninia atan Josué atu “sai aten-brani no sai forte” maski hasoru situasaun susar oioin no dezafiu barak. Josué la presiza sente taʼuk ba futuru se nia halo tuir Maromak nia mandamentu sira, tanba Jeová mak sei hamutuk ho nia no ajuda nia atu hetan susesu. Maromak hamutuk ho Josué hodi fó matadalan no ajuda nia atu manán inimigu sira.

 Oinsá mak Josué bele “sai aten-brani no sai forte”? Nia bele hetan aten-brani no forsa liuhusi eskritura sira neʼebé Jeová fó sai ona. Neʼe inklui ‘Ukun-Fuan hotu neʼebé Jeová nia atan Moisés fó sai ona ba Josué’. * (Josué 1:7) Jeová haruka Josué atu “lee no medita loron no kalan”. (Josué 1:8) Lee no medita Maromak nia Liafuan hametin Josué nia neon no laran atu halo tuir Maromak nia hakarak. Tuirmai Josué presiza aplika buat neʼebé nia aprende husi Maromak nia Liafuan hodi “halo tuir ho didiʼak liafuan hotu neʼebé hakerek iha laran”. Se nia halo nuneʼe, nia bele hatudu hahalok neʼebé matenek no hetan susesu. No neʼe mak buat neʼebé akontese duni. Maski Josué hasoru susar oioin, nia moris ho kontente nuʼudar ema neʼebé adora Jeová ho laran-metin.—Josué 23:14; 24:15.

 Jeová nia liafuan ba Josué anima ita ohin loron. Neʼe hatudu katak Jeová hanoin tebes ema hotu neʼebé adora nia, liuliu bainhira hasoru susar oioin. Jeová hakarak ita atu hetan susesu hanesan Josué! Ita mós bele “sai aten-brani no sai forte” hanesan Josué kuandu ita lee no medita beibeik Maromak nia Liafuan Bíblia, no moris tuir ninia matadalan sira.

Kontestu husi Josué 1:9

 Depois Moisés mate, Jeová hatete katak Josué mak dirije nasaun Izraél. (Josué 1:1, 2) Iha tempu neʼebá, ema Izraél prepara daudauk atu tama rai-Kanaan, neʼebé Maromak promete atu fó ba sira. Maibé sira iha inimigu barak neʼebé forte. Porezemplu, Josué tenke funu hasoru ema Kanaan neʼebé aat tebes. * (Deuteronómio 9:5; 20:17,18) Laʼós neʼe deʼit, ema Kanaan mak barak liu fali ema Izraél no sira iha ekipamentu funu nian neʼebé diʼak liu. (Josué 9:1, 2; 17:18) Maibé Josué ho aten-brani halo tuir Jeová nia matadalan. No Jeová hamutuk duni ho Josué, tan neʼe iha tinan neen deʼit nia laran ema Izraél besik manán sira-nia inimigu hotu.—Josué 21:43, 44.

^ par. 3 Jeová mak Maromak nia naran iha lian Tetun neʼebé tradús husi letra haat יהוה (YHWH) iha lian Ebraiku. Letra haat neʼe ema hanaran Tetragrama. Naran neʼe temi nuʼudar “NAI” iha tradusaun Bíblia Kadi Kapasidade. Atu hetan informasaun liután kona-ba Jeová no tanbasá tradusaun balu la uza naran neʼe, haree informasaun “Sé mak Jeová?

^ par. 4 Josué bele lee livru balu, neʼebé ohin loron ita hotu bele lee nuʼudar parte husi Bíblia, neʼe inklui livru lima neʼebé Moisés hakerek (Génesis, Éxodo, Levítico, Números, no Deuteronómio), livru Job, no parte balu husi Salmo.

^ par. 6 Atu buka-hatene tanbasá mak presiza funu hanesan neʼe, haree informasaun “Mengapa Allah Memerangi Orang Kanaan?” iha Menara Pengawal 1 Janeiru 2010.