Skip go po Content

Go po neks menu

Ol Witnis blo Zeoba

Tores Streit Kriol

Yu tingk wan dei yumpla nomo go sapa?

Yu tingk wan dei yumpla nomo go sapa?

Wiskain yu go spik . . .

  • wa?

  • no?

  • o i mait?

 WANEM BAIBOL I SPIK

“. . . dempla ebribodi no go ded o wori o krai o pile pein nomo. Bikoz ebridem nugudting. . . . Ol i go pinis pogud.”—Rebaleisan 21:4, Baibol – Tores Streit Yumplatok.

WANEM I MIN PO YU

Yumpla ken prapa tras i no God uda meke adlaip po mipla.—Leta prom Zemes 1:13.

Yumpla ken pilgud dat God lugaut mipla ane sabe wiskain mipla i sapa.—Leta 1 prom Pita 5:7.

Yumpla i gad prapa oup wea ol trabol go pinis pogud.—Matiu 5:5; Rebaleisan 7:16, 17.

 KEN YUMPLA PRAPA BILIB WANEM BAIBOL I SPIK?

Wa, i gad tu gud rizen:

  • God mina eit po luk pipol uda sapa ane no trite wananada peawei. Tingbaut wiskain Zeoba God bin pil wen em pipol blo Baibol taim bin sapa nugud tritment. Baibol i spik em bin pil nadakain sore. Em luk dempla “nadakain sapa wea Izipt” ane em “bin lisen dempla krai”.—Pas misnare wok [Acts] 7:34.

    God gad strong piling baut enibodi uda i erte nada pipol. Wase diskain ya, Baibol spik dat demwan uda kile wananada, God mina no laik dempla.—Proverbs 6:16, 17, New World Translation.

  • God lugaut yumi. Yumi sabe wanem pein ane atso wi gad lo laip, bat Zeoba i prapa sabe tu!—Leta po Pilipi 4:19; Leta 1 prom Zon 5:14, 15.

    Zeoba go yuze Kingdom blo em po kamaut ebri nugudting ya lo ert. (Matiu 6:9, 10) Po nau, em mina lab po lugaut dempla uda i lukraun po em.—Pas Misnare Wok [Acts] 17:27; Leta 2 po Korint 1:3, 4.

 SAMTING PO TINGBAUT

Wai God lau dis wold po sapa?

Baibol gibe yumpla da ansa ya lo LETA PO ROM 2:4 ane LETA PO ROM 5:12.