Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo  |  Noviembre tsiguʼ 2015

 RÍ KAYÁ EDXU̱U̱ NÁA INUU I̱YI̱I̱ʼ | XÚ KÁʼNII EʼYOO DIOS GUERRA RÁ.

Dios ga̱jma̱a̱ guerras rí mbiʼi xúgi̱

Dios ga̱jma̱a̱ guerras rí mbiʼi xúgi̱

Rí mbiʼi xúgi̱ mbaʼin xa̱bu̱ najma gíníi. Asndu nundxaʼwaskháá mu Dios mambáñun; mú nuraximíjna̱ á mu maʼgánú mbiʼi rí Dios maʼdxun rí nutajkháan. Ga̱jma̱a̱ ndiéjunʼ gaguaʼniin xa̱bu̱ bi̱ nagún náa guerra mu muni gámbáa rí naʼni gíníi. Lá Dios ndaʼyoo rí májánʼ eni ga̱jma̱a̱ nambáñun xáʼ.

Armagedón ganindxu̱u̱ guerra rí maʼni gámbóo xúgíʼ guerras

Xaxmiéjuanʼ: Dios ndaʼyoo tsingíná dí rígá náa numbaaʼ ga̱jma̱a̱ ikhaa rígá rí maʼni (Salmo 72:13, 14). Náa Biblia, Dios nakudaminaʼ mambáñun xa̱bu̱ bi̱ “nuraʼníí gaʼkhu”. Nguánáa gáʼni xá. “Índo̱ gákujmaa Señor Jesús náa mekhuíí gajmíi̱n ángeles bi̱ guáʼdáá tsiakii [...] índo̱ ikhaa gaxnúu castigo bi̱ tseniʼniiʼ Dios ga̱jma̱a̱ bi̱ tsénimbu̱ún ajngáa rí májánʼ ndrígóo Jesús” (2 Tesalonicenses 1:7, 8). Jesús makujmaa nda̱wa̱á, “náa Guerra rí nigíʼ Dios bi̱ gíʼdoo xúgíʼ tsiakii”, ma̱ngaa nagumbiʼyuu Armagedón (Revelación [Apocalipsis] 16:14, 16).

Índo̱ gáʼganúu mbiʼi rúʼko̱, Dios xákuʼmii xa̱bu̱ numbaaʼ, makuʼmaa A̱ʼdióo Jesucristo ga̱jma̱a̱ eʼwíínʼ e̱ji̱i̱n bi̱ tsékujmiin mu muni guerra gajmiún xa̱bu̱ xkawiinʼ. Ikhiin bi̱ kuwa mekhuíí muni gámbáa dí ra̱májánʼ wéñuʼ (Isaías 11:4; Revelación 19:11-16).

Ikha jngó Dios tsériʼkhuu rí nandxa̱ʼwáminaʼ ga̱jma̱a̱ numuu guerras. Ikhaa ndaʼyoo xóo mbá rí ma̱ndoo majmuu mu maʼni gámbáa rí xkawiʼ ga̱jma̱a̱ dí naguma gínáanʼ. Ga̱jma̱a̱ xó má nákha wajyúúʼ, i̱ndó Dios kaʼyoo maʼthí nguánáa gági̱ʼdu̱u̱ mbá guerra ga̱jma̱a̱ tsáa gáʼga. Ndiʼyáá má rí Dios niʼthí rí nda̱wa̱á maʼni gámbáa rí tséjmaa ga̱jma̱a̱ mambáñún bi̱ nuni giníi, ma̱ngaa rí A̱ʼdióo Jesucristo maʼga̱ ginii náa guerra rúʼko̱. Rígi̱ eyoo gáʼthi  rí Dios na̱nguá embáyúu nimbá guerra rí mbiʼi xúgi̱, maski ajndu nakujmaa rí nindxu̱u̱ májánʼ.

Gúʼgíʼ mbá xkri̱da: Atatsaʼwáminaʼ rí a̱jmi̱i̱n e̱ji̱n bi̱ kanikhiin nugíʼdi̱i̱

nuxmijná índo̱ na̱nguá xtáa anu̱ún náa guʼwá. Nuniñaʼ ruxmijná mbégu̱ʼ ga̱jma̱a̱ nutháán anu̱ún ga̱jma̱a̱ teléfono. Mbáa rí ikhiin naʼthí rí ndxájuu nigíʼdu̱u̱ xkujndu, ga̱jma̱a̱ imba̱a̱ naxiéʼkhá rí ndxájuu niʼni gínáa. Nájmi̱i̱n eñún rí anu̱ún mambáñun, mú nda̱wa̱á rí niʼdxuun rí nithi nájmi̱i̱n, naʼthúún rí guniñaʼ ruxmijná ga̱jma̱a̱ muguaʼthi̱i̱n asndu índo̱ ikhaa gáʼkha̱a̱, nunimbu̱ún mbá xngaa, mú nda̱wa̱á nugi̱ʼdi̱i̱ nuxmijná mbu̱júu̱. Índo̱ naʼkhanúu anu̱ún nakiʼnáa kaʼñún nájmi̱i̱n ga̱jma̱a̱ naxnún castigo numuu rí túnimbu̱ún.

Rí mbiʼi xúgi̱, xuajen bi̱ nagiʼdu̱u̱n mbaʼa nuthu nunda̱ʼa̱a̱ Dios mambáñun. Mú ikhaa tsiyambáá náa nimbá guerra. Asndu náa Biblia naʼthí: “Xurtanga̱a̱ muniu̱u̱n dí ra̱májánʼ bi̱ niniala dí raʼkhí”, rúʼko̱ nandoo gáʼthi dí xúʼniuu xó má niniulúʼ (Romanos 12:17, 19). Ikhaa naʼthúún xa̱bu̱ numbaaʼ rí gíʼmaa muguaʼthi̱i̱n asndu índo̱ ikhaa gáʼni guerra, ga̱jma̱a̱ rúʼko̱ garigá náa Armagedón (Salmo 37:7). Ikhaa tsínigu̱ʼ kayuʼ rí xuajen mugi̱ʼdu̱u̱n kanikhiin; ndaʼyoo xóo nda̱a̱ gamajkhún. Ikha jngó, náa Armagedón gasngájma rí nakiʼnáa wéñuʼ ga̱jma̱a̱ maʼni gámbóo guerras náa xúgíʼ numbaaʼ (Salmo 46:9; Isaías 34:2). Xúʼko̱ kaʼnii, Armagedón mani̱ndxu̱u̱ mbá guerra rí maʼni gámbáa xúgíʼ guerras.

Rí mambáa guerras mani̱ndxu̱u̱ mbá rí májánʼ rí ma̱ʼkha̱ náa Reino ndrígóo Dios. Jesús niʼthí ga̱jma̱a̱ numuu reino rúʼko̱ náa tsajkhun rí najmaʼnuʼ wéñuʼ: “Ga̱ʼkha̱ reino ndrígáʼ. Gambanúu xóo rí nandaʼ ikháánʼ, xóo má rí nambánuu mekhuíí, xúʼkhue̱ má gámbanuu mbayííʼ gi̱jyooʼ ma̱ngaa” (Mateo 6:10). Raʼkháa i̱ndó maʼni gámbáa guerras, ma̱ngaa maʼni gámbáa náa phú naku̱mu̱u̱: Náa dí ra̱májánʼ (Salmo 37:9, 10, 14, 15). * Tseʼniulú tsiánguá rí bi̱ ni̱ndxu̱lú cristianos ra̱ʼkhá tháán nandulúʼ mbuʼyáá xúgíʼ rí májánʼ rí maʼni Reino ndrígóo Dios (2 Pedro 3:13).

Lá ndayóoʼ mba̱yu̱ʼ rí Reino ndrígóo Dios maʼni gámbáa xúgíʼ rí xkawiʼ wéñuʼ, rí tsingíná ga̱jma̱a̱ rí naʼni mumíniiʼ wéñuʼ ráʼ. Rí kiʼtáriyaʼ náa Biblia rí nduʼyáá nambánuu mbiʼi xúgi̱ nasngájma rí kuwáanʼ “iwáá mbiʼi” náa numbaaʼ (2 Timoteo 3:1-5). * Xájyúuʼ má dí Reino ndrígóo Dios maʼtáñajunʼ náa tsu̱du̱u̱ ku̱ba̱ʼ nda̱wa̱á rí garigá Armagedón.

Ndiʼyáá má rí bi̱ gakhañun náa guerra rígi̱ mani̱ndxu̱ún xa̱bu̱ bi̱ xúnimbu̱ún “ajngáa rí májánʼ ga̱jma̱a̱ numuu Señor Jesús” (2 Tesalonicenses 1:8). Mú garmáʼáan a̱jkia̱nʼ rí Dios tsínigu̱ʼ rí nimbá makhañún, asndu má bi̱ ra̱míjínʼ wéñuʼ (Ezequiel 33:11). Numuu rí ikhaa tsíyoo “numuu rí nimbáa tsíyoo mandáti̱ga̱a̱” náa iwáá guerra rígi̱, rí phú nandoo rí miʼtáraʼa ajngáa rí májánʼ mu mudxawíín xúgínʼ xa̱bu̱ numbaaʼ nákha xóó tséʼkha̱nú fin (2 Pedro 3:8, 9; Mateo 24:14; 1 Timoteo 2:3, 4). Xúʼko̱, ga̱jma̱a̱ numuu rí xa̱bi̱i̱ Jeobá nutaraʼa náa xúgíʼ numbaaʼ, xa̱bu̱ ma̱ndoo muniʼniiʼ Dios, ma̱ndoo munimbu̱ún ajngáa rí májánʼ ndrígóo Jesús ga̱jma̱a̱ rí makuwá náa numbaaʼ náa ní xárígá guerra.

^ párr. 10 Reino ndrígóo Dios ma̱ngaa maʼni gámbáa imba̱a̱ bi̱ gíʼdoo sia̱nʼ náa xa̱bu̱ numbaaʼ, ikhaa má nindxu̱u̱ rí nakháñulú. Xó má rí gátra̱xnuu náa artículo “Graxe̱ rí naxtiʼña̱a̱ náa Biblia” náa revista rígi̱, Dios makuxiín mbaʼin wéñuʼ xa̱bu̱, asndu bi̱ nikháñun náa guerra xúgíʼ tsiguʼ rí ni̱jkha̱ ranújngoo.

^ párr. 11 Á mu nandaʼ ma̱ta̱ya̱a̱ itháan ga̱jma̱a̱ numuu iwáá mbiʼi, atayáá rí eʼthí kíxnuu 9 náa libro Ndiéjunʼ phú eʼsngáa náa Biblia rá. Rí nini bi̱ nutaraʼa numuu Jeobá.