Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo  |  Noviembre tsiguʼ 2015

“Gíʼmaa maʼnda̱ʼ xtayáá xa̱bu̱ numbaaʼ ga̱jma̱ʼ xó má eyaʼ xtayaminaʼ ikháánʼ”

“Gíʼmaa maʼnda̱ʼ xtayáá xa̱bu̱ numbaaʼ ga̱jma̱ʼ xó má eyaʼ xtayaminaʼ ikháánʼ”

“Gíʼmaa maʼnda̱ʼ xtayáá xa̱bu̱ numbaaʼ ga̱jma̱ʼ xó má eyaʼ xtayaminaʼ ikháánʼ.” (MATEO 22:39)

AJMÚÚ 73 GA̱JMA̱A̱ 36

1, 2. Ndiéjunʼ eʼsngúlúʼ náa Biblia ga̱jma̱a̱ numuu ngajua rá.

JEOBÁ nindxu̱u̱ mbáa Dios bi̱ nandoo kaʼyulúʼ wéñuʼ (1 Juan 4:16). Ga̱jma̱a̱ Jesucristo kayííʼ xóo Anu̱u̱. Jesús nigumaa ginii nákha xóó tsíguma i̱ʼwáʼ, ga̱jma̱a̱ nixtáa mekhuíí mba̱yu̱ʼ tsiguʼ ga̱jma̱a̱ Dios. Rúʼko̱ nimbáyúu majmañuu rí Jeobá gíʼdoo wéñuʼ ngajua (Col. 1:15). Jesús nisngájma ngajua rúʼko̱ xúgíʼ tsiguʼ rí nixtáa náa mekhu ga̱jma̱a̱ náa Ku̱ba̱ʼ. Ikha jngó nduʼyáá májánʼ rí Jeobá ga̱jma̱a̱ Jesús mutañajunʼ ga̱jma̱a̱ ngajua.

2 Mbá miʼtsú, mbáa xa̱bu̱ niraxu̱u̱ Jesús náa biʼyaa nindxu̱u̱ kiʼtáñajunʼ rí itháan gíʼdoo numuu. Jesús niriʼñuu: “‹Gíʼmaa maʼnda̱ʼ xtayáá Jeobá Dios ndrígia̱ʼ ga̱jma̱a̱ xúgíʼ a̱jkia̱nʼ, ga̱jma̱a̱ xúgíʼ nímia̱nʼ ga̱jma̱a̱ xúgíʼ ku̱ma̱ ndrígáʼ›. Rígi̱ nindxu̱u̱ rí itháan mba̱a̱ ga̱jma̱a̱ timbá kiʼtáñajunʼ. Raga̱jma̱, ikhaa má kayúʼ xóo rígi̱: ‹Gíʼmaa maʼnda̱ʼ xtayáá xa̱bu̱ numbaaʼ ga̱jma̱ʼ xó má eyaʼ xtayaminaʼ ikháánʼ›” (Mat. 22:37-39).

3. Tsíin ni̱ndxu̱ún xa̱bu̱ numbaaʼ gajmiúlú rá.

 3 Ra̱ʼkhá tháán gíʼdoo numuu maʼndulú kuʼñúún xúgínʼ xa̱bu̱. Jesús niʼthí rí gíʼmáanʼ maʼndulú kuʼyáá Jeobá ma̱ngaa xa̱bu̱ numbaaʼ gajmiúlú. Mú tsáa nindxu̱u̱ xa̱bu̱ numbaaʼ gajmiúlú rá. Nindxu̱u̱ asndu tsáa xa̱bíi bi̱ xtáa mijngii náa ikháanʼ. Mbá xkri̱da, á mu ndiʼyáa má xa̱bu̱, xa̱bu̱ numbaaʼ gajmiúlú bi̱ gíʼdoo itháan numuu nindxu̱u̱ ajmbiu̱lú o a̱ʼgiu̱lú. Ma̱ngaa ni̱ndxu̱ún a̱ngiu̱lú bi̱ kuwa náa congregación ga̱jma̱a̱ xa̱bu̱ bi̱ nuʼtáruʼun. Náa artículo rígi̱ gúʼyáá xú káʼnii gusngajmá rí nandulúʼ kuʼñúún xúgínʼ ikhiin.

ATASNGÁJMA RÍ NANDAʼ XTAYÁÁ A̱JMBIA̱ʼ O A̱ʼGIA̱ʼ

4. Xú káʼnii eʼyáá rí xa̱bu̱ gajmii ma̱ndoo makuwá tsímáá maski ajndu guáʼdáá aʼkhá rá.

4 Jeobá niʼni rí mudamijná timbíi̱n xa̱bu̱ numbaaʼ. Ikha jngó nuʼthá rí ikhaa niʼnikuma̱a̱ rí xa̱bu̱ munigu̱nʼ. Dios nindoo rí Adán ga̱jma̱a̱ Eva makuwá tsímáá ma̱ngaa munimajtíin xa̱bu̱ náa tsu̱du̱u̱ Ku̱ba̱ʼ (Gén. 1:27, 28). Mú índo̱ ikhiin túnimbu̱ún kuyáá Jeobá nindáti̱gu̱u̱n rí tsímáá. Ma̱ngaa nini rí ikháanʼ muguaʼdáá aʼkhá ga̱jma̱a̱ rí nakháñulú (Rom. 5:12). Numuu rí xúgínʼ xa̱bu̱ guáʼdáá aʼkhá, lá nandoo gáʼthi rúʼko̱ rí xándoo gakuwá tsímáá xáʼ. Na̱nguá. Xa̱bu̱ gajmii ma̱ndoo makuwá tsímáá. Xú káʼnii eʼyáá rá. Numuu rí Jeobá naxnún xtágabu rí itháan májánʼ náa Biblia (atraxnuu 2 Timoteo 3:16, 17). *

5. Ndíjkha rí gíʼdoo wéñuʼ numuu rí maʼndún kuyamijná xa̱bu̱ gajmii rá.

5 Náa Biblia naʼsngáa rí xa̱bu̱ gajmii makuwá májánʼ á mu nandún kuyamijná. Apóstol Pablo niʼthí xú káʼnii nindxu̱u̱ rí phú maʼndulú kuʼyamijná: “Rí maʼndulúʼ kuʼñúún eʼwíínʼ gáʼni rí maʼngulúʼ xúgíʼ ga̱jma̱a̱ muʼni rí májánʼ. Rí maʼndulúʼ kuʼñúún eʼwíínʼ maʼni rí xaxígulúʼ, xúʼnimba̱mi̱jna̱, xúxuximíjna, xúʼni nditháan dí raʼkhí, na̱nguá eʼyáaʼ i̱ndó rí nda̱yúlúʼ ikháanʼ, tsikiʼnáanʼlu nacha̱. Tsejkua kuʼyulú sia̱nʼ. Tsédxuu ga̱jma̱a̱ numuu dí ra̱májánʼ rí narígá, nadxuu ga̱jma̱a̱ numuu rí gajkhun. Xúgíʼ naʼngo̱o̱ a̱jkiu̱u̱n, xúgíʼ naniʼmbo̱o̱, xúgíʼ nagiʼtu̱u̱n ga̱jma̱a̱ xúgíʼ naʼngo̱o̱ naraʼnuu. Ngajua nimbá miʼtsú xámbáa” (1 Cor. 13:4-8). Á mu nundxaʼwamíjná ga̱jma̱a̱ numuu ajngáa rí niʼthí Pablo ma̱ngaa nuʼnimbaníí xtágabu rúʼko̱, ma̱ndoo makuwáanʼ tsímáá gajmiúlú bi̱ ndiʼyáa.

Náa Biblia naxnúlú xtágabu mu makuwáanʼ tsímáá gajmiúlú bi̱ ndiʼyáa (Atayáá kutriga̱ 6 ga̱jma̱a̱ 7)

6, 7. a) Ndiéjunʼ eʼthí náa 1 Corintios 11:3 ga̱jma̱a̱ numuu bi̱ kayá edxu̱u̱ rá. b) Xú gíʼmaa maʼniuu mbáa cristiano a̱ʼgiu̱u̱ rá.

6 Jeobá niʼthí tsáa kayá edxu̱u̱ náa mbá guʼwíin. Pablo niʼthí: “Cristo kayá edxu̱u̱ náa xa̱biya̱; xa̱biya̱ kayá edxu̱u̱ náa a̱ʼgu̱; xó má Dios kayá edxu̱u̱ náa Cristo” (1 Cor. 11:3). Xó má eʼyáá, xa̱biya̱ kayá edxu̱u̱ náa mbá guʼwíin. Mú rúʼko̱ tsíyoo gáʼthi rí ikhaa ma̱ndoo maʼni gíníi. Rí phú gíʼthu̱u̱n Jeobá rí maʼndoo kaʼñún. Ga̱jma̱a̱ Dios nagíʼ mbá májánʼ xkri̱da maʼni xa̱biya̱ numuu rí nandoo kaʼyoo má xúʼko̱ Jesús ga̱jma̱a̱ tséyaaʼ i̱ndó rí mambáyúu ikhaa. Rígi̱ naʼni rí Jesús xáʼniuu mingíjyúuʼ mbaʼyamajkuu Jeobá. Mínaʼ má ikhaa niʼthí: “Ikhúúnʼ nandoʼ ka̱yo̱o̱ Anu̱ʼ” (Juan 14:31). Á mu Jeobá niʼni gínáa Jesús, ikhaa xáʼthi ajngáa rígi̱.

7 Gajkhun má rí náa Biblia naʼthí rí xa̱biya̱ maʼtáñajunʼ a̱ʼgiu̱u̱. Mú ma̱ngaa naʼthí rí gíʼmaa mbaʼyamajkuu (1 Ped. 3:7). Xú káʼnii gándoo xa̱biya̱ mbaʼyamajkuu a̱ʼgiu̱u̱ rá. Mbaʼyoo rí ndayóoʼ ga̱jma̱a̱ mbaʼyamajkuu rí ikhaa eniguʼ. Náa Biblia naʼthí: “Xa̱bu̱ bi̱ ninigu̱nʼ má, gaʼndala ku̱ñu̱u̱n má xúʼko̱ guʼyalaʼ, xó má Cristo nindoo kaʼyoo congregación rí asndu nixnáximinaʼ ga̱jma̱a̱ numuu” (Efes. 5:25). Xó má eʼyáá, Jesús nindoo kaʼñún wéñuʼ xa̱bi̱i̱ rí asndu nixnáximinaʼ makhañúu ga̱jma̱a̱ numún. Á mu xa̱biya̱ ndaʼyáridoo Jesús ga̱jma̱a̱ nasngájma rí nandoo kaʼyoo a̱ʼgiu̱u̱, a̱ʼgu̱ xáʼniuu mingíjyúuʼ ma̱ndoo kaʼyoo, mbaʼyamajkuu ga̱jma̱a̱ mambáyúu rí garaʼwíí maʼni (atraxnuu Tito 2:3-5). *

 ATASNGÁJMA RÍ NANDAʼ XTAÑÚN A̱NGIA̱Nʼ

8. Xú káʼnii gíʼmaa muʼniu̱u̱n a̱ngiu̱lú rá.

8 Náa xúgíʼ numbaaʼ kuwa mbaʼin wéñuʼ xa̱bu̱ bi̱ nuni ñajunʼ Jeobá. Xú káʼnii gíʼmaa muʼniu̱u̱n xá. Náa Biblia naʼthí rí gíʼmaa muʼniu̱u̱n rí májánʼ xúgínʼ xa̱bu̱, mú itháan náa a̱ngiu̱lú (Gál. 6:10; atraxnuu Romanos 12:10). * Apóstol Pedro niʼnirámáʼ rí á mu nuʼnimbulúʼ kuʼyáá Dios, maʼndulú kuʼñúún a̱ngiu̱lú ga̱jma̱a̱ xúgíʼ a̱jkiu̱lú. Ma̱ngaa niʼthí rí gíʼdoo wéñuʼ numuu rí cristianos musngajmá rí nandulúʼ kuʼyamijná wéñuʼ (1 Ped. 1:22; 4:8).

9, 10. Náa numuu rí kuwáanʼ mbá kambáxulú bi̱ ni̱ndxu̱lú xa̱bi̱i̱ Dios rá.

9 Xa̱bi̱i̱ Jeobá ni̱ndxu̱lú mbá xuajen kiejunʼ wéñuʼ. Náa numuu rá. Numuu rí nandulúʼ kuʼñúún wéñuʼ a̱ngiu̱lú. Ma̱ngaa, nandulúʼ kuʼyáá Jeobá ga̱jma̱a̱ nuʼnimbulúʼ xtángoo ndrígóo. Ikha jngó ikhaa naxnúlú xi̱ʼ kaʼwu ndrígóo. Xi̱ʼ rígi̱ nindxu̱u̱ tsiakii rí itháan mba̱a̱ náa xúgíʼ numbaaʼ ga̱jma̱a̱ nambáyulúʼ makuwáanʼ mbá kambáxulú gajmiúlú a̱ngiu̱lú náa mbájndi numbaaʼ (atraxnuu 1 Juan 4:20, 21). *

10 Pablo niʼthí rí gíʼdoo wéñuʼ numuu rí bi̱ ni̱ndxu̱lú cristianos musngajmá rí nandulú kuʼyamíjna̱. Ikhaa niʼnirámáʼ: “Aguaʼdáá rí nandala kuyamíjna̱ numuu rí nagáwiinʼ a̱jkia̱la gani̱ndxa̱la xa̱bu̱ bi̱ májánʼ a̱jkiu̱u̱n, xunimbami̱jna̱, gani̱ndxa̱la xa̱bu̱ guabáanʼ wéñuʼ ga̱jma̱a̱ gaʼngo̱o̱ a̱jkia̱la. Gaʼngo̱o̱ a̱jkia̱la kuyamíjna̱ ga̱jma̱a̱ guni mba̱a̱ a̱jkia̱la kuyamíjna̱ má xúʼko̱ á mu mbáa naxiéʼkhá ga̱jma̱a̱ numuu imba̱a̱. Xó má Jeobá niʼni mba̱a̱ a̱jkiu̱u̱n kaʼyalá má xúʼko̱, xúʼko̱ má gúni mangáanʼ. Mú, ga̱jma̱a̱ xúgíʼ dí i̱ʼwáʼ, gíʼmaa maʼndala ku̱ñu̱u̱n xúgínʼ, numuu dí rúʼko̱ naruwáanʼla májánʼ wéñuʼ” (Col. 3:12-14). Cristianos kuwáanʼ mbá kambáxulú numuu rí nandulúʼ kuʼyamíjna̱ tséʼniuu má náa eguwaʼ.  Nuxnáa wéñuʼ núma̱aʼ numuu rí nusngajmulú ngajua rígi̱ rí kiejunʼ wéñuʼ.

11. Ndiéjunʼ esngájma rí kuaʼdáá religión rí gajkhun rá.

11 Bi̱ phú ni̱ndxu̱lú xa̱bi̱i̱ Jeobá nandulúʼ kuyamíjna̱ wéñuʼ ga̱jma̱a̱ kuwáanʼlu mbá kambáxulú. Rígi̱ nasngájma rí kuaʼdáá religión rí gajkhun. Jesús niʼthí: “Xúʼko̱ xúgínʼ gúyáá dí ikháanʼla nindxalá xa̱bi̱ʼ, á mu nandala kuyamíjna̱” (Juan 13:34, 35). Ga̱jma̱a̱ apóstol Juan niʼnirámáʼ rí á mu nandulúʼ musngajmá rí ni̱ndxu̱lú ‹e̱ji̱i̱n Dios›, gíʼmaa muʼnimbulúʼ xtángoo ndrígóo ga̱jma̱a̱ maʼndulú kuʼñúún a̱ngiu̱lú. Ga̱jma̱a̱ nda̱wa̱á niʼthí: “Numuu dí rígi̱ nindxu̱u̱ ajngáa rí nidxawíín asndu nákha ginii, rí gíʼmaa maʼndulú kuyamíjna̱” (1 Juan 3:10, 11). Ngajua ga̱jma̱a̱ rí nambáxulúʼ rí nakujmaa náa xa̱bi̱i̱ Jeobá nasngájma rí phú gajkhun ni̱ndxu̱lú xa̱bi̱i̱ Cristo. Ma̱ngaa nasngájma rí Dios nandoo rí muʼtáraʼa ajngáa ndrígóo Reino náa xúgíʼ tsu̱du̱u̱ Ku̱ba̱ʼ (Mat. 24:14).

“RA̱ʼKHÁ THÁÁN MBAʼIN XA̱BU̱” EGIMBÍIN

12, 13. a) Ndiéjunʼ rí kuwa runi xúgi̱ bi̱ ni̱ndxu̱ún “mbaʼin xa̱bu̱” rá. b) Xú káʼnii gakuwa “mbaʼin xa̱bu̱” rá.

12 Rí mbiʼi xúgi̱, mbaʼin xa̱bi̱i̱ Jeobá naguwáʼ náa bi̱ ni̱ndxu̱ún “mbaʼin xa̱bu̱”. Ikhiin kuwa náa xúgíʼ numbaaʼ bi̱ numbayíí Reino ndrígóo Dios. Náa Biblia naʼthí rí ikhiin “nagájnún náa majphú mba̱a̱ ga̱ʼkhu̱, ga̱jma̱a̱ nijña̱a̱ xtíñún rí mbi̱jua̱ ma̱ngaa nuni kaʼwi̱i̱ ga̱jma̱a̱ eʼdiuu Aʼdá Múgú”. Rígi̱ nandoo gaʼthúun rí nusngajma fe náa tsigijñaʼ ndrígóo Jesús. Nandún kuyáá Jeobá ga̱jma̱a̱ nduyamajkuíí ‹mbiʼí mbruʼun›, ma̱ngaa nandún kuyáá Jesucristo (Rev. 7:9, 14, 15).

13 Mbá nacha̱ Dios maʼni gámbáa numbaaʼ xkawiʼ rígi̱ índo̱ marigá “mapu-mba ga’ko” (Mat. 24:21; atraxnuu Jeremías 25:32, 33). * Mú Jeobá nandoo kaʼñún wéñuʼ xa̱bi̱i̱, ikha jngó mañewu̱u̱n ma̱ngaa maniñúʼ makuwá náa Ku̱ba̱ʼ mitsaan. Xó má niʼthí maʼni nákha itháan maʼni 2,000 tsiguʼ, “maʼni kaʼwi̱i̱ xúgíʼ iyoʼ idún, ní xákhañun itháan, ní xárígá xtambiyaʼ, gitsawaʼskha asndu má gaʼkhu”. Lá natatsaʼwáminaʼ xú káʼnii gakuwáanʼ índo̱ mambáa rí xkawiʼ, tsingíná ga̱jma̱a̱ rí nakháñulú ráʼ. (Rev. 21:4.)

14. Nguáthi̱i̱n ni̱ndxu̱ún bi̱ “mbaʼin xa̱bu̱” rí mbiʼi xúgi̱ rá.

14 Nákha tsiguʼ 1914, índo̱ nigi̱ʼdu̱u̱ iwáá mbiʼi, kuwa mbá 5,000 xa̱bi̱i̱ Dios. Maski ajndu niraʼníí xkujndu, bi̱ kaxtaʼwíin tuniñaʼ rutaraʼa numuu rí nindúún kuñún xa̱bu̱ numbaaʼ gajmiún ma̱ngaa nimbáñun xi̱ʼ kaʼwu. Ikha jngó xúgi̱ nagimbíi̱n “ra̱ʼkhá tháán mbaʼin xa̱bu̱” bi̱ guáʼthi̱i̱n makuwá kámuu mbiʼi náa tsu̱du̱u̱ Ku̱ba̱ʼ. Rí mbiʼi xúgi̱ naʼni mbá migiñuʼ millón xa̱bi̱i̱ Jeobá. Xúgínʼ ikhiin nagimbíi̱n náa itháan rí 115,400 congregaciones náa xúgíʼ tsu̱du̱u̱ numbaaʼ. ¡Ga̱jma̱a̱ na̱jkha̱ raʼni itháan mbaʼin! Mbá xkri̱da, gu̱nʼ septiembre tsiguʼ 2013 asndu gu̱nʼ agosto tsiguʼ 2014 nijngún iyááʼ itháan rí mbá 275,500 xa̱bu̱. Rígi̱ nandoo gáʼthi rí mámbá xmáná nijngún iyááʼ mbá 5,300 xa̱bu̱.

15. Ndiéjunʼ embáyuluʼ mu muʼthúún xa̱bu̱ ajngáa ndrígóo Reino rá.

15 Asndu tsiánguá eʼniulú índo̱ nduʼyáá rí mbaʼin wéñuʼ xa̱bu̱ edxawíín ajngáa ndrígóo Reino. I̱yu̱lúʼ dí rígá náa itháan rí mbá 700 ajngáa nambáyulúʼ mu muʼguá kuʼyúlú ajngáa rígi̱. Mbá xkri̱da, revista Bi̱ Nayejngoo nindxu̱u̱ rí itháan exnálu náa numbaaʼ. Mámbá gu̱nʼ naguma imprimir itháan rí 52 millones revistas Bi̱ Nayejngoo náa 247 ajngáa. Imbo̱o̱ xkri̱da nindxu̱u̱ libro Ndiéjunʼ phú eʼsngáa náa Biblia rá. Asndu xúgi̱ naguma imprimir itháan rí mbá 200 millones libro rígi náa itháan rí mbá 250 ajngáa.

16. Náa numuu rí na̱jkha̱ raʼni itháan mbaʼin xa̱bi̱i̱ Jeobá rá.

16 Na̱jkha̱ raʼni itháan mbaʼánʼ xa̱bi̱i̱ Jeobá numuu rí kuaʼdáá fe náa Dios ga̱jma̱a̱ nduʼyáá rí ikhaa nindxu̱u̱ bi̱ niʼni Biblia (1 Tes. 2:13). Maski ajndu Satanás naguiyuʼ kaʼyulúʼ ga̱jma̱a̱ naʼniginanʼlú, ikháanʼlu nambáxulúʼ má xúʼko̱ májánʼ gajmiúlú Jeobá (2 Cor. 4:4).

 ATASNGÁJMA RÍ NANDAʼ XTAYÁÁ XA̱BU̱ NUMBAAʼ GA̱JMA̱ʼ

17, 18. Xú káʼnii gíʼthu̱u̱n Jeobá muʼni índo̱ mbáa tsíyoo gáʼdxuun ajngáa rí na̱jkua̱ kuʼyúlú rá.

17 Índo̱ nuʼtáraʼa, xa̱bu̱ nuriʼña mixtiʼkhu. Tikhun nudxaunlú, mú eʼwíínʼ tsiñun gudxawíín ajngáa rí najkua kuʼyulú. Xú káʼnii gíʼthu̱u̱n Jeobá rí muʼnilú rá. Tséʼniuu má rí gúni xa̱bu̱, ikhaa gíʼthu̱u̱n muʼni rí naʼthí náa Biblia. Mbá xkri̱da, Colosenses 4:6 naʼthí rí gíʼmaa muʼthúún ga̱jma̱a̱ gamajkhu xúgínʼ xa̱bu̱. Ma̱ngaa numuu rí nandulúʼ kuʼñúún xa̱bu̱, índo̱ guriʼñún xa̱bu̱ rí eʼnimbulúʼ gíʼmaa ‹muʼthún májánʼ ma̱ngaa ga̱jma̱a̱ wéñuʼ gamajkhu› (1 Ped. 3:15).

18 Ma̱ngaa má asndu índo̱ xa̱bu̱ nakiʼníin kuyulúʼ o tsiñun gudxawíín ajngáa rí nuʼthúún, nusngájma rí nandulúʼ kuʼñúún ma̱ngaa nduʼyaridáá má xúʼko̱ rí niʼni Jesús. Náa Biblia naʼthí rí índo̱ xa̱bu̱ bi̱ guaʼdáá sia̱nʼ náa Jesús nitha wéñiʼ ikhaa taʼta wéñunʼ. Ga̱jma̱a̱ índo̱ xtáa ramínuʼ, ikhaa taʼti guguaʼthi̱i̱n niʼchala, rí phú niʼni ikhaa, niniñuʼ xúgíʼ náa ñawúunʼ Jeobá (1 Ped. 2:23). Ikha jngó índo̱ xa̱bu̱ nuniulú dí raʼkhí, nani̱ndxu̱lú xa̱bu̱ guabáanʼ ga̱jma̱a̱ tséʼniún xó má eniulú. Tsegutangaánʼ “muniu̱u̱ dí ra̱májánʼ xa̱bu̱”, rí phú nuʼni, nuʼgími̱jna̱ muʼniu̱u̱n rí májánʼ (1 Ped. 3:8, 9).

19. Xú káʼnii gíʼmaa muʼniu̱u̱n xa̱bu̱ bi̱ nakiʼníin kuyulúʼ rá.

19 Á mu ni̱ndxu̱lú xa̱bu̱ guabáanʼ, muʼnimbulúʼ xtángoo ndrígóo Jesús: “Ka-nidxahuin ri huaʼtan: Gaʼne akianʼ-xtaya xabo numbagajmaʼ, maxaxaʼ gataya tsi xtadaminaʼ gajmaʼ sianʼ. Indo Ikun natanʼla: Gaʼne akianʼla-juñu tsi najiʼni-juyaʼla, gunitsakuramila tsi nutan xkahuiyaʼla, guñula ri majan tsi tsiñu guyaʼla. Gunila tsakun numu tsi nutan xkahuiyaʼla jame nuxkahuiñaʼla, ikajngo manindxaʼla ijin Anaʼla tsi xta mikui. Tsi naʼne ri mayaxirami akaʼ xabo tsi ramajin gajma tsi majin, naʼni ri maxnu ruʼhua naʼ juhua xabo tsi nuni ri jmbu gajma naʼ juhua tsi tsini ri jmbu” (Mat. 5:43-45). Bi̱ nuʼni ñajunʼ Dios gíʼmaa maʼndulú kuʼñúún xa̱bu̱ bi̱ nakiʼníin kuyulúʼ, tséʼniuu má xú káʼnii gúniulú ikhiin.

20. Nguánáa gáʼndun kuyáá Jeobá ga̱jma̱a̱ xa̱bu̱ numbaaʼ gajmiún, xúgínʼ náa tsu̱du̱u̱ Ku̱ba̱ʼ rá. (Atayáá timbá xtiʼkhu.)

20 Xúgíʼ mbiʼi gíʼmaa musngajmá rí nandulúʼ kuʼyáá Jeobá ma̱ngaa xa̱bu̱ numbaaʼ gajmiúlú. Ma̱ngaa mumbáñun índo̱ rí gáʼñúnʼ xa̱bu̱ bi̱ naguiñunʼ kuyulúʼ o tsíñún gudxuun ajngáa rí nuʼthúún. Apóstol Pablo niʼnirámáʼ: “Xagiʼmáanʼla nditháan náa inu nimbáa, i̱ndó gáʼndalá ku̱ya̱mi̱jna̱ kanikháanʼ; numuu rí bi̱ nandoo kaʼyoo imba̱a̱ xa̱bu̱ naʼnimbánuu xtángoo. Numuu dí náa xtángoo naʼthí: Xátaba̱ʼ ga̱jma̱a̱ imba̱a̱ xa̱bu̱ kaníí á mu nitatsigúnʼ má, ragíʼmaa mataxíyáa xa̱bu̱, ragíʼmaa matani kuʼwáʼ, ragíʼmaa magua̱ʼa̱ maraʼdáá rí gíʼdoo imba̱a̱ xa̱bu̱, asndu xú káʼnii má imbo̱o̱ xtángoo dí rígá, naʼni̱i̱la mbóó ajngáa, ikhaa rígi̱: “Gíʼmaa rí maʼndaʼ xtayáá xa̱bu̱ numbaaʼ ga̱jma̱ʼ xó má eyaʼ xtayaminaʼ ikháánʼ”. Á mu nandaʼ xtayáá xa̱bu̱ numbaaʼ ga̱jma̱ʼ xátani̱i̱ nimbá dí raʼkhí; ikha jngó, índo̱ nandulú kuʼñúún eʼwíínʼ nindxu̱u̱ rí matanimbaníí xtángoo” (Rom. 13:8-10). Satanás naʼni rí xa̱bu̱ bi̱ kuwa náa numbaaʼ rígi̱ maguiñunʼ kuyamijná, mu ikháanʼ nandulúʼ kuʼñúún gajkhun xa̱bu̱ numbaaʼ gajmiúlú (1 Juan 5:19). Índo̱ Jeobá gáʼni gámbáa Satanás, xa̱bu̱ wéñiʼ ga̱jma̱a̱ numbaaʼ xkawiʼ rígi̱, ikhú xúgínʼ náa tsu̱du̱u̱ Ku̱ba̱ʼ maʼndún kuyáá Jeobá ga̱jma̱a̱ xa̱bu̱ numbaaʼ gajmiún. ¡Ra̱ʼkhá tháán gaʼni tsajkurámáánʼ Jeobá!

^ párr. 4 2 Timoteo 3:16, 17: “Xúgíʼ Escritura na̱ʼkha̱ náa Dios ga̱jma̱a̱ nayambáá mu miʼsngáa, mu maxprígulú, mu maʼni̱i̱ jmbi̱i̱ rí e̱ʼni̱, mu maxnúlúʼ ikha náa rí jmbu, mu xa̱bi̱i̱ Dios majmañuu wéñuʼ ga̱jma̱a̱ maxtáa xawii mu maʼni xúgíʼ enii rí májánʼ”.

^ párr. 7 Tito 2:3-5: “Xúʼko̱ má gu̱ʼu̱ bi̱ guanuu, gaguaʼdáá gamajkualá náa xúgíʼ rí nunila, xúni̱ tsu̱du̱ún eʼwíínʼ, ni xúwáanla wéñuʼ vino, gusngáa rí májánʼ; mu munila rí mundxa̱ʼwa̱a̱ májánʼ edxu̱ún gu̱ʼu̱ bi̱ tikhu xa̱bu̱ mu maʼndún kuñún ajmbiu̱ún, maʼndún kuñún e̱jñún, mundxa̱ʼwa̱a̱ májánʼ edxu̱ún, mani̱ndxu̱ún mikaʼwiin, muñajunʼ náa guʼwún, mani̱ndxu̱ún májánʼ a̱jkiu̱ún ga̱jma̱a̱ munimbu̱ún kuñún ajmbiu̱ún, mu xuti dí ra̱májánʼ ga̱jma̱a̱ numuu ajngá rawunʼ Dios”.

^ párr. 8 Romanos 12:10: “Gaʼndala kuyamíjna̱ xóo bi̱ kaníkháanʼ. Ikháanʼ guya edxu̱u̱ rí mbuyamajkumijnála”.

^ párr. 9 1 Juan 4:20, 21: “Á mu mbáa naʼthí: “Ikhúúnʼ nandoʼ ka̱yo̱o̱ Dios”, mú naguiyuʼ kaʼyoo ndxájuu, minduwaʼ nindxu̱u̱. Numuu bi̱ tsíyoo kaʼyoo ndxájuu bi̱ xtáa raʼyoo, xándoo kaʼyoo Dios bi̱ tseʼyoo. Kiʼtáñajunʼ rígi̱ na̱ʼkha̱ náa ikhaa, rí bi̱ nandoo kaʼyoo Dios gaʼndoo kaʼyoo ndxájuu”.

^ párr. 13 Jeremías 25:32, 33: “Rígi̱ rí niʼthí Jeobá bi̱ gíʼdiin mbaʼin ejército: ¡Gu̱ya̱a̱! Mbá gamiéjunʼ gágajnúu náa mámbá xuajen mba̱ʼu̱, ga̱jma̱a̱ mbá giñá mbiiʼ gagixi asndu rí itháan mitsínguánʼ náa tsu̱du̱u̱ ku̱ba̱ʼ. Ga̱jma̱a̱ bi̱ gagudíin Jeobá mbiʼi rúʼko̱ majngutigi̱i̱n náa xúgíʼ tsu̱du̱u̱ ku̱ba̱ʼ. Nimbáa xámbiyaʼ ga̱jma̱a̱ numún, ní xáʼga̱ gíʼdiin mu majuiʼdiín. Maguanún xóo yuskha náa tsu̱du̱u̱ ku̱ba̱ʼ”.