Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo  |  Octubre tsiguʼ 2015

Nimbá xáʼnijngáanʼ rí muʼni ñajunʼ Jeobá

Nimbá xáʼnijngáanʼ rí muʼni ñajunʼ Jeobá

“María [...] nigi̱ʼi̱ náa inuu rajkúu Señor ga̱jma̱a̱ niʼdxuun rí niʼthí. Marta [...] naʼnijngamínaʼ ga̱jma̱a̱ mbaʼa ñajunʼ dí rígá guʼwáá.” (LUCAS 10:39, 40)

AJMÚÚ 94 GA̱JMA̱A̱ 134

1, 2. a) Náa numuu rí Jesús nindoo kaʼyoo Marta rá. b) Ndiéjunʼ rí nijngawa̱a̱n Marta rá.

XÚ KÁʼNII xa̱bu̱ ninindxu̱u̱ Marta, ndxájuu Lázaro rá. Náa Biblia naʼthí rí Jesús ndiʼyoo xóo mbáa bi̱ nambáxu̱u̱ ga̱jma̱a̱ ma̱ngaa nindoo kaʼyoo wéñuʼ. Ga̱jma̱a̱ nindoo kaʼñún ma̱ngaa ndiʼyamajkhún eʼwíínʼ gu̱ʼu̱. Mbá xkri̱da, ikhaa nindoo kaʼyoo María imba̱a̱ ndxájuu Lázaro. Ga̱jma̱a̱ nindoo kaʼyoo wéñuʼ ru̱dúu̱, María (Juan 11:5; 19:25-27). Mú náa numuu rí Jesús nindoo kaʼyoo Marta rá.

2 Jesús nindoo kaʼyoo Marta numuu rí ninindxu̱u̱ mbáa a̱ʼgu̱ bi̱ naxná rí gíʼdoo ga̱jma̱a̱ nañajunʼ wéñuʼ, mú itháan numuu rí nigiʼdoo wéñuʼ fe. Ikhaa ndiʼyoo májánʼ rí Jesús ninindxu̱u̱ Mesías bi̱ nijuiʼthá ma̱ʼkha̱ ga̱jma̱a̱ niʼnimbo̱o̱ xúgíʼ rí ikhaa niʼsngáa (Juan 11:21-27). Maski ajndu xúʼko̱, ikhaa ninindxu̱u̱ mbáa xa̱bu̱ aʼkhá ga̱jma̱a̱ nguáná nijngawa̱a̱n. Mbá xkri̱da, mbá mbiʼi Jesús ni̱jkha̱ náa goʼwóo Marta. Mú Marta nikiʼnáa kaʼyoo María ga̱jma̱a̱ niʼthúu̱n Jesús: “Señor, lá tsixmiéjuanʼ rí ndxájuʼ niniñuʼ mbáwun mu mani xúgíʼ ñajunʼ ráʼ. Aratháán rí ma̱ʼkha̱ gambáyuʼ” (atraxnuu Lucas  10:38-42). * Náa numuu nikiʼnáa Marta rá. Ga̱jma̱a̱ ndiéjunʼ ejmañuluʼ rí xú káʼnii niriʼña̱a̱ Jesús rá.

MARTA NIʼNIJNGAMÍNAʼ

3, 4. a) Náa numuu rí Jesús niʼthúu̱n María rí májánʼ niʼni xá. b) Xú káʼnii nigruigú xtágabu Marta rá. (Atayáá timbá xtiʼkhu.)

3 Jesús nixnáa wéñuʼ núma̱aʼ numuu rí Marta ga̱jma̱a̱ María nitháán rí maʼga̱ náa guʼwún, ikha jngó nigi̱ʼdu̱u̱ niʼsngúún mbaʼa rí gíʼdoo wéñuʼ numuu. María nindoo majmañuu xúgíʼ rí gáʼsngáa bi̱ Naʼsngáa májánʼ wéñuʼ, ikha jngó nigi̱ʼi̱ mbá nacha̱ mu maʼdxaun. Mú ndiéjunʼ niʼni Marta rá. Ma̱ngaa ma̱ndoo maniñuʼ rí xtáa raʼni mu magíʼ edxu̱u̱. Ga̱jma̱a̱ Jesús maʼthúu̱n dí ra̱ʼkhá tháán májánʼ rí xtáa raʼni.

4 Mú Marta tágíʼ edxu̱u̱ ga̱jma̱a̱ niʼnijngamínaʼ. Ikhaa xtáa raʼni mújúnʼ ganitsu ga̱jma̱a̱ i̱ʼwáʼ mu Jesús maxtáa tsímáá. Índo̱ ikhaa ndiʼyoo rí ndxájuu na̱nguá embáyúu, nikiʼnáa ga̱jma̱a̱ niʼthúu̱n Jesús. Ikhaa ndiʼyoo rí Marta xtáa raʼni mbaʼa ñajunʼ. Ikha jngó niʼthúu̱n: “Marta, Marta, naxmiéjuanʼ ga̱jma̱a̱ naraxnáminaʼ gaʼkhu ga̱jma̱a̱ numuu mbaʼa dí rígá”. Ma̱ngaa niʼthúu̱n rí májánʼ maʼni mbá ganitsu dí ra̱mingíjyúuʼ. Nda̱wa̱á niʼthúu̱n rí májánʼ niʼni María numuu rí nigíʼ edxu̱u̱ maʼdxuun. Niʼthúu̱n rí ikhaa niraʼwíí rí itháan májánʼ ga̱jma̱a̱ nimbáa xarikaʼyúuʼ. Nda̱wa̱á María, mbáa nigumuu rí ni̱ʼkhu̱ mbiʼi rúʼko̱, mu támbumuu xúgíʼ rí niʼthúu̱n Jesús. Itháan rí 60 tsiguʼ nda̱wa̱á, apóstol Juan niʼthí rí Jesús ‹nindoo kaʼyoo Marta ga̱jma̱a̱ ndxájuu› (Juan 11:5). Ikha jngó nduʼyáá rí Marta nigruigú májánʼ wéñuʼ xtágabu ndrígóo Jesús ga̱jma̱a̱ niʼni ñajunʼ Jeobá xúgíʼ mbiʼi rí nixtáa.

5. a) Náa numuu dí ra̱ʼkhá tháán mingíjyúuʼ muʼni ñajunʼ Jeobá rí mbiʼi xúgi̱ rí nimbá xaʼnijngáanʼ rá. b) Ndiéjunʼ graxe̱ gúriʼña̱a̱ náa artículo rígi̱ rá.

5 Xó má eʼyáá, nákha wajyúúʼ nirígá mbaʼa rí maʼnijngi̱i̱n xa̱bi̱i̱ Jeobá. Mú rí mbiʼi xúgi̱ rígá itháan rí ma̱ndoo maʼnijngáanʼ náa ñajunʼ rí nuʼni náa Dios. La Atalaya 1 ñajunʼ gu̱nʼ abril tsiguʼ 1959 niʼthí rí cristianos gíʼmaa muñeumíjna̱ mu ajua̱nʼ rí itháan nuxi̱ʼ xáʼnijngi̱i̱n. Asndu má nákhi ikhú najkumaa rí mámbá mbiʼi nagájnuu rí nuxi̱ʼ. Xóo revistas, radio, cine ga̱jma̱a̱ televisión rí itháan nirígá. Náa revista má rúʼko̱ niʼthí rí índo̱ gártumuu mbiʼi, mbáa magajnúu i̱ʼwáʼ rí maʼnijngáanʼ. Ga̱jma̱a̱ xúʼko̱ má nirígá. Rí mbiʼi xúgi̱ rígá mbaʼa wéñuʼ rí ma̱ndoo maʼnijngáanʼ. Ndiéjunʼ gándoo muʼni mu mbuʼyaridáá María ga̱jma̱a̱ muʼni ñajunʼ Jeobá rí nimbá xaʼnijngáanʼ rá.

XÁJMULÚ “KÁXI̱ KAYUʼ” NUMBAAʼ RÍGI̱

6. Xú káʼnii ejmulú ajua̱nʼ rí itháan nuxi̱ʼ bi̱ ni̱ndxu̱lú xa̱bi̱i̱ Jeobá rá.

6 Xa̱bi̱i̱ Jeobá najmulú má xúʼko̱ ajua̱nʼ rí itháan nuxi̱ʼ mu muʼtáraʼa. Mbá xkri̱da, nákha xóó tsígi̱ʼdu̱u̱ ga̱jma̱a̱ índo̱ nirígá Timbá Guerra náa xúgíʼ Numbaaʼ nitaráʼalu ga̱jma̱a̱ mbá programa náa na̱ʼkha̱ xtiʼkhuu rí gíʼdoo color, rí nawáán ga̱jma̱a̱ video. Nigumbiʼyuu “Foto-Drama de la Creación”. Ga̱jma̱a̱ numuu programa rígi̱ mbaʼin wéñuʼ xa̱bu̱ náa mbaʼa xuajin mba̱ʼu̱ nijmañún rí Jesús nacha̱ má ma̱ʼkha̱ kayóo rí tsímáá náa xúgíʼ tsu̱du̱u̱ Ku̱ba̱ʼ. Nda̱wa̱á nijmulu radio mu mutaruʼunlu ajngáa ndrígóo Reino náa mbaʼin wéñuʼ xa̱bu̱ náa xúgíʼ numbaaʼ. Ga̱jma̱a̱ rí mbiʼi xúgi̱ najmulu Internet mu muʼtáruʼun xúgínʼ xa̱bu̱, asndu xa̱bu̱ bi̱ kuwa itháan mitsínguánʼ.

Xúniʼñáʼ dí ragíʼdoo numuu maʼnijngáanʼ muʼni ñajunʼ Jeobá (Atayáá kutriga̱ 7)

7. a) Náa numuu dí ragíʼmaa majmulúʼ “káxi̱ kayuʼ” numbaaʼ rá. b) Ndiéjunʼ nindxu̱u̱ tikhuu rí gíʼmaa muñeumíjna̱ rá.

 7 Apóstol Pablo niʼthí rí xájmulú “káxi̱ kayuʼ” numbaaʼ (atraxnuu 1 Corintios 7:29-31). * Ikha jngó gíʼmaa muñeumíjna̱ mu xájmulú mba̱yu̱ʼ mbiʼi náa rí naxnáraʼa numbaaʼ. Gajkhun má dí raʼkháa xúgíʼ nindxu̱u̱ ra̱májánʼ. Mú, á mu na̱nguá eʼnimbánii xtágabu ndrígóo Pablo, xúgíʼ rí naxnáraʼa numbaaʼ rígi̱ maʼni rí muʼnimbáti̱ga̱ wéñuʼ mbiʼi. Ga̱jma̱a̱ ikhú, muniʼñáaʼ ruʼni rí itháan gíʼdoo numuu, xóo rí muʼni ñajunʼ Jeobá (atraxnuu Efesios 5:15-17). * Tikhuu rí tima gi̱jyooʼ raʼkháa má ra̱májánʼ, mu ma̱ndoo maʼni rí muʼnimbáti̱ga̱ mbiʼi. Xóo rí muraxnuu libro, mbuʼyáá televisión, mu̱ʼgua̱ guniʼnuʼ i̱mba̱ níʼkhá, mu̱ʼgua̱ gúʼtsi, muxuʼmá mensajes, mbuʼyáá noticia, mbuʼyáá xú niguanún náa nitsíin o rí mbuʼyáaʼ ajua̱nʼ rí itháan nuxi̱ʼ ga̱jma̱a̱ i̱ʼwáʼ rí minumuu. Tikhun nánguá eñún guniñaʼ rígi̱ (Ecl. 3:1, 6). *

8. Ndíjkha rí gíʼdoo wéñuʼ numuu rí maʼndulúʼ kuʼyáá Jeobá raʼkháa dí rígá náa numbaaʼ rá.

8 Satanás nagíʼ maʼnijngáanʼ ga̱jma̱a̱ dí rígá náa numbaaʼ ga̱jma̱a̱ rí muniʼñáaʼ ruʼni ñajunʼ Jeobá. Nigíʼ niʼni gajmíi̱n timbíi̱n cristianos, ma̱ngaa nagíʼ naʼni ga̱jma̱á ni̱ndxu̱lú rí mbiʼi xúgi̱ (2 Tim. 4:10). Mú náa Biblia naʼthí rí gíʼmaa maʼndulú kuʼyáá Jeobá ki xóo dí rígá náa numbaaʼ. Náa numuu rá. Numuu rí i̱ndó xúʼko̱ muʼnimbulúʼ ga̱jma̱a̱ mambáxulúʼ májánʼ gajmiúlú (1 Juan 2:15-17). Ikha jngó gíʼmaa muñeumíjna̱ mu mbuʼyáá á mu na̱jkha̱ ranigulúʼ dí rígá náa numbaaʼ. Á mu xúʼko̱ kaʼnii, muʼni xóo eʼngo̱o̱ mu muriʼkhumijnáa.

GUʼGÍʼ MUʼNI RÍ ITHÁAN GÍʼDOO NUMUU

9. a) Ndiéjunʼ rí ndiyóoʼ muni itháan xa̱bi̱i̱ Jesús rá. b) Ndiéjunʼ xkri̱da nixnúún Jesús xá.

9 Xó má ndiʼyáá, Jesús niʼsngóo Marta rí xaʼnijngamínaʼ ga̱jma̱a̱ mbóo dí ragíʼdoo wéñuʼ numuu. Ga̱jma̱a̱ ikháá má niʼsngúún xa̱bi̱i̱. Nixkaxi̱i̱n rí muni itháan ñajunʼ Reino ga̱jma̱a̱ ñajunʼ Jeobá (atraxnuu Mateo 6:22, 33). Ga̱jma̱a̱ nixnúún mbá xkri̱da májánʼ, numuu rí ikhaa na̱nguá nigiʼdoo wéñuʼ. Asndu tágiʼdoo mbá guʼwá ga̱jma̱a̱ mbaaʼ (Luc. 9:58; 19:33-35).

10. Xú káʼnii nixnúlú xkri̱da májánʼ Jesús rá.

10 Jesús tániñuʼ rí nimbá maʼnijnga̱a̱ mu maʼtáraʼa. Mbá xkri̱da, mbá miʼtsú niʼtáraʼa náa  xuajen Capernaum. Índo̱ niguámbóo, mbaʼin nigíʼ muthán rí maguanúu itháan ga̱jma̱á ni̱ndxu̱ún. Mú ndiéjunʼ niʼni Jesús rá. Ikhaa niʼthún rí ndayóoʼ maʼga̱ náa i̱ʼwáʼ xuajen mu maʼtáraʼa ajngáa ndrígóo Reino (Luc. 4:42-44). Ga̱jma̱a̱ xúʼko̱ má niʼni. Ikhaa ni̱jkha̱ mitsínguánʼ wéñuʼ mu maʼsngúún xó má eʼngo̱o̱ mbaʼin xa̱bu̱. Maski ajndu ninindxu̱u̱ xa̱bu̱ jmbii, índo̱ niñajunʼ wéñuʼ ndiyóoʼ mbayáa xuʼ (Luc. 8:23; Juan 4:6).

11. a) Ndiéjunʼ niʼni Jesús índo̱ mbáa xa̱bu̱ ni̱ʼkha̱ gándo̱ʼo̱o̱ mambáyúu xáʼ. b) Ndiéjunʼ niʼsngúún Jesús xa̱bi̱i̱ rá.

11 Mbá mbiʼi, Jesús xtáa raʼsngúún mbá rí gíʼdoo wéñuʼ numuu xa̱bi̱i̱. Ikhú ni̱ʼkha̱ mbáa xa̱bu̱ ga̱jma̱a̱ nindo̱ʼo̱o̱ rí mambáyúu ga̱jma̱a̱ numuu mbá xkujndu rí gíʼdoo. Niʼthúu̱n: “Maestro, aratan dxiyoʼ ri maxpiʼta ri jaʼyoʼ magu gajmeʼ”. Mú Jesús tambáyúu xa̱bu̱ bugi̱. Náa numuu rá. Numuu rí xtáa raʼsngúún xa̱bi̱i̱ ga̱jma̱a̱ táʼndoo rí nimbá maʼnijnga̱a̱. Rí phú niʼni, niʼsngúún xa̱bi̱i̱ rí á mu naxmiéjunʼ wéñuʼ ga̱jma̱a̱ numuu rí maguaʼdáá ma̱ndoo maʼnijngarígi̱i̱n ma̱ngaa muniñaʼ runi ñajunʼ Jeobá (Luc. 12:13-15).

12, 13. a) Ndiéjunʼ niʼni Jesús náa templo ndrígóo Jerusalén rá. b) Xú káʼnii niʼni Jesús índo̱ Felipe niʼthúu̱n rí tikhun xa̱bu̱ nandún muniʼniiʼ rá.

12 Iwáá mbiʼi rí nixtáa Jesús náa tsu̱du̱u̱ Ku̱ba̱ʼ ninindxu̱u̱ mingíjyúuʼ wéñuʼ (Mat. 26:38; Juan 12:27). Ikhaa ndiʼyoo rí mamínuʼ wéñuʼ ga̱jma̱a̱ makhañúu. Mú ma̱ngaa ndiʼyoo dí rígá mbaʼa rí maʼni nákha xóó tsixiyáa. Mbá xkri̱da, witsu mbiʼi nákha xóó tsikháñuu nito̱ʼo̱o̱ náa Jerusalén karíguii mbáa burru. Mbaʼin xa̱bu̱ niriguíi xóo rey ndrígu̱ún (Luc. 19:38). I̱mba̱ néjtsuu, Jesús támiñuu índo̱ nixkawíin xa̱bu̱ bi̱ nugujua̱ ga̱jma̱a̱ nuni nduwiinʼ náa templo mu makhánun itháan mbújkha̱a̱ (Luc. 19:45, 46).

13 Tikhun griegos nigún Jerusalén mu muni ndxa̱a̱ pascua gajmiún judíos. Índo̱ ndiyáá rí niʼni Jesús náa templo, niguanún tsiánguá. Ikha jngó niraxi̱i̱ apóstol Felipe á mu ma̱ndoo mbuyáá Jesús ma̱ngaa mutamijná gajmiún. Mú Jesús táʼndoo. Ikhaa tsixmiéjunʼ maninúnʼ xa̱bu̱ bi̱ mumbayíí. Ikhaa ndiʼyoo rí itháan gíʼdoo numuu maʼni rí Jeobá eʼtháñajunʼ. Ikhú niʼni marmáʼáan a̱jkiu̱ún xa̱bi̱i̱ rí ikhaa makhañúu nacha̱ ga̱jma̱a̱ rí mangiin makhañún. Ga̱jma̱a̱ niʼthún rí á mu ikhiin nuxnaxi̱ vida ndrígu̱ún, Jeobá mbaʼyamajkún ga̱jma̱a̱ maʼni rí makuwá kámuu. Felipe niʼthún ajngáa rígi̱ rí nixnúún tsiakii xa̱bu̱ griegos (Juan 12:20-26).

14. Maski ajndu Jesús nigíminaʼ maʼtáraʼa, ndiéjunʼ i̱ʼwáʼ niʼni xá.

14 Nákha Jesús nixtáa náa tsu̱du̱u̱ Ku̱ba̱ nigíminaʼ maʼtáraʼa. Maski ajndu xúʼko̱ niríyaʼ mbiʼi mu maʼni i̱ʼwáʼ. Mbá xkri̱da, nduʼyáá rí ni̱jkha̱ náa mbá gatsigúnʼ, ga̱jma̱a̱ ikhú niʼni̱i̱ rí iyaʼ magutaxi̱i̱ vino rí itháan májánʼ (Juan 2:2, 6-10). Ma̱ngaa ni̱jkha̱ gakuiʼtsu guʼwún bi̱ nambáxu̱u̱ gajmíi̱n mangiin náa eʼwíínʼ xa̱bu̱ bi̱ nanigu̱nʼ mudxawíín rí ikhaa niʼsngáa (Luc. 5:29; Juan 12:2). Mú rí itháan gíʼdoo numuu rí ikhaa niríyaʼ mbiʼi mu maʼtájkáan, mandxa̱ʼóo edxu̱u̱ ga̱jma̱a̱ mbayáa xu̱ʼ (Mat. 14:23; Mar. 1:35; 6:31, 32).

XÚNIʼÑÁʼ RÍ NIMBÁ MAʼNIJNGÁANʼ

15. a) Xó má niʼthí apóstol Pablo, ndiéjunʼ rí gíʼmaa muʼni bi̱ ni̱ndxu̱lú cristianos rá. b) Xú káʼnii xkri̱da májánʼ nixná Pablo rá.

15 Apóstol Pablo niʼthí rí bi̱ ni̱ndxu̱lú cristianos nugayúlú náa mbá carrera rí mbaʼ. Á mu nandulúʼ mu̱ʼgua̱nú náa eyulú, gíʼmaa muniʼñáaʼ xúgíʼ rí narikhulú ga̱jma̱a̱ naʼni gajyúlú (atraxnuu Hebreos 12:1). * Ga̱jma̱a̱ Pablo nixnúlú mbá xkri̱da májánʼ. Ikhaa ma̱ndoo mani̱ndxu̱u̱ mbáa bi̱ kayá edxu̱u̱ náa ndxajkun bi̱ magiʼdoo  wéñuʼ ga̱jma̱a̱ majmaʼniiʼ wéñuʼ. Mú ikhaa niniñuʼ xúgíʼ rúʼko̱ ga̱jma̱a̱ nigíminaʼ maʼni “rí itháan gíʼdoo numuu”. Nixnáximinaʼ káxi̱ mu maʼtáraʼa ga̱jma̱a̱ ni̱jkha̱ náa mbaʼa xuajen, xóo Siria, Asia Menor, Macedonia ga̱jma̱a̱ Judea. Ra̱ʼkhá tháán nindoo magruigú rí maxtáa kámuu mbiʼi mekhuíí. Ikha jngó niʼthún: “Nambumuʼ rí naguanúu kidíiʼ ga̱jma̱a̱ nani mbá tsiakii mu mba̱yo̱o̱ dí gárígá nda̱wa̱á, nani tsiakimínáʼ maxkamaa rí maxnúʼ Dios” (Filip. 1:10; 3:8, 13, 14). Ga̱jma̱a̱ rí tanigúnʼ, nigiʼdoo itháan mbiʼi mu maʼni ñajunʼ Dios rí nimbá xáʼnijnga̱a̱ (1 Cor. 7:32-35).

16, 17. a) Tséʼniuu á mu ndajkuáanʼ o gajmáanʼ, xú káʼnii gándoo guʼyaridáá Pablo rá. b) Xú káʼnii eyaridáá xkridoo Pablo xa̱bu̱ gajmii bi̱ kuwa naa Gales rá.

16 Rí mbiʼi xúgi̱, tikhun xa̱bi̱i̱ Jeobá niraʼwíí makuwá ndajkuíin xóó mu ma̱ndoo muni itháan ñajunʼ Jeobá (Mat. 19:11, 12). Bi̱ xóó ndajkuíin, na̱nguá guáʼdáá wéñuʼ ñajunʼ ki xóo bi̱ ninigu̱nʼ. Mú tséʼniuu á mu kuwáanʼ ndajkuáanʼ o gajmáanʼ, xúgiáanʼ gíʼmaa mbuʼyáá rí nimbá xaʼnijngáanʼ rí muʼni ñajunʼ Jeobá. Mbá xkri̱da, mbáa tikuáanʼ mbaʼyóoʼ muriʼkhu̱u̱ tikhuu rí nuʼni mu xúʼnimbáti̱ga̱ mbiʼi ga̱jma̱a̱ muʼni itháan ñajunʼ Jeobá.

17 Guʼyáá xkri̱da ndrígóo Mark ga̱jma̱a̱ Claire, bi̱ kuwa náa xuajen mba̱a̱ ndrígóo Gales (Reino Unido). Ikhiin ninindxu̱ún precursor índo̱ niguámbu̱u̱n ninigajmaa náa guʼwá nisngáá, nákha ikhiin kuwa ndajkuíin. Índo̱ nidamijná ninindxu̱ún xóó precursor. Mu nindúún muni itháan, ikha jngó niraʼwíí rí xuguaʼdáá wéñuʼ. Mark naʼthí rí niniñaʼ guʼwún rí gíʼdoo ajtsú cuarto ga̱jma̱a̱ ñajunʼ rí nigiʼdoo náa rí tsíñajunʼ xúgíʼ mbiʼi. Rúʼko̱ nimbáyúu mu mañajunʼ náa construcción dí narígá náa xúgíʼ numbaaʼ. Náa mbá 20 tsiguʼ rí ninújngoo niyambáá muni Guʼwá náa nagimbáanʼ náa mbaʼa xuajen mba̱ʼu̱ náa África. Nguáná ichíʼgíʼ mbújkha̱a̱ guáʼdáá, mu Jeobá nañewu̱u̱n má xúʼko̱. Claire naʼthí rí nda̱a̱ imbo̱o̱ rí naʼni makuwá gagi xóo rí muni ñajunʼ Jeobá mámbá mbiʼi. Xúgíʼ tsiguʼ rígi̱ guáʼdiin bi̱ nambáxu̱u̱n májánʼ gajmiún ga̱jma̱a̱ xúgíʼ mbiʼi guáʼdáá rí nda̱ñúnʼ. Ma̱ngaa naʼthí rí xúgíʼ rí niniñaʼ kidíiʼ tsimbriguii nditháan ga̱jma̱a̱ gagi dí na̱ʼkha̱ rí matani ñajunʼ Dios káxi̱. Mbaʼin xa̱bi̱i̱ Dios nakumu̱ún ikhaa má kayuʼ xó má ikhiin. *

18. Ndiéjunʼ gíʼmaa muraximíjna̱ rá.

18 Xúgiáanʼ gíʼmaa muraximíjna̱: “Lá gíʼmaa mani ñajunʼ Jeobá ga̱jma̱a̱ xúgíʼ a̱jkiu̱nʼ ráʼ. Lá naniʼñúʼ rí tikhuu maʼnijngu̱u̱n náa ñajunʼ rí itháan gíʼdoo numuu ráʼ. Á mu xúʼko̱, ndiéjunʼ gándoo gáriʼkhu̱u̱ rá.” Mbáa mbaʼyóoʼ muraxnuu itháan májánʼ ga̱jma̱a̱ muʼnigajmaa májánʼ Biblia. Náa imbo̱o̱ artículo gúʼyáá xú káʼnii gúʼni.

^ párr. 2 Lucas 10:38-42: “Rí xúgi̱ rí kuwa ragún náa kamba̱a̱, ikhaa nito̱ʼo̱o̱ náa xuajen chíʼgíʼ. Ikhí mbáa a̱ʼgu̱ bi̱ nagumbiʼyuu Marta, nigriguíi Jesús náa goʼwóo. Ikhaa gíʼdaa mbáa ndxájuu bi̱ nagumbiʼyuu María, bi̱ nigi̱ʼi̱ náa inuu rajkúu Señor ga̱jma̱a̱ niʼdxuun rí niʼthí. Marta, naʼnijngamínaʼ ga̱jma̱a̱ mbaʼa ñajunʼ dí rígá guʼwáá. Ikha jngó nikuʼmaminaʼ ga̱jma̱a̱ niʼthúu̱n: “Señor, lá tsixmiéjuanʼ rí ndxájuʼ niniñuʼ mbáwun mu mani xúgíʼ ñajunʼ ráʼ. Aratháán rí ma̱ʼkha̱ gambáyuʼ”. Ikhú Señor niriʼñuu: “Marta, Marta, naxmiéjuanʼ ga̱jma̱a̱ naraxnáminaʼ gaʼkhu ga̱jma̱a̱ numuu mbaʼa dí rígá. Tséyóoʼ má mbaʼa, o káaʼ mbóó rí ndayóoʼ. María niraʼwíí rí itháan májánʼ ga̱jma̱a̱ nimbáa xariya kaʼyúʼ”.”

^ párr. 7 1 Corintios 7:29-31: “Ma̱ngaa nathala rígi̱ a̱ngui̱nʼ, nánguá eguanúu mba̱yu̱ʼ mbiʼi. Rí xúgi̱, bi̱ guáʼdiin guʼñún guni xóo nda̱wi̱i̱n, ga̱jma̱a̱ bi̱ numbiyaʼ guni xóo bi̱ na̱nguá mbiyaʼ, ga̱jma̱a̱ bi̱ nadxún guni xóo bi̱ tsédxúún, ga̱jma̱a̱ bi̱ nutsi, xóo bi̱ raguáʼdáá, ga̱jma̱a̱ bi̱ najmún numbaaʼ, xóo bi̱ tséjmún káxi̱ kayuʼ; numuu dí narígá náa numbaaʼ rígi̱ na̱jkha̱ raxtiʼkhuu”.

^ párr. 7 Efesios 5:15-17: “Tsumáá gúya̱a̱ xú káʼnii majngruigalá xaʼni xóo xa̱bu̱ bi̱ tséyáá, gíʼmaa muni xóo xa̱bu̱ bi̱ nduyáá wéñuʼ, gutsila xúgíʼ mbiʼi dí naguánúu, numuu dí mingíjyúuʼ wéñuʼ mbiʼi rí kuwáanʼlu. Numuu rúʼko̱ xánindxala xóo mbáa bi̱ tsindxa̱ʼóo edxu̱u̱, gíʼmaa muʼgua̱ ruya̱a̱ má xúʼko̱ ndiéjunʼ eyoo Jeobá muʼnilú”.

^ párr. 7 Atayáá artículo “Bi̱ tsíjma̱ñuu naʼnimbo̱o̱ xúgíʼ rí nutháán”, rí kaʼyoo má gu̱nʼ rígi̱.

^ párr. 15 Hebreos 12:1: “Numuu rí kuwa mbájndi náa ikháanʼ mbaʼin bi̱ nutaraʼa, gurígúu náa ikháanʼ xúgíʼ rí mikiwu̱n ga̱jma̱a̱ aʼkhá dí ra̱mingíjyúuʼ maʼnijngawáanʼ ga̱jma̱a̱ gugayúlú ga̱jma̱a̱ xúgíʼ tsiakii náa kamba̱a̱ dí rígá náa inulú”.

^ párr. 17 Mbá xkri̱da, Hadyn ga̱jma̱a̱ Melody Sanderson nigiʼdoo mbá ñajunʼ májánʼ náa Australia, mu niniñaʼ mu muni káxi̱ ñajunʼ Jeobá. Índo̱ kuwa xóo misioneros náa India, niguámbu̱u̱n mbújkha̱a̱. Lá nandaʼ ma̱ta̱ya̱a̱ ndiéjunʼ nini xáʼ. Atraxnuu historia ndrígu̱ún náa La Atalaya 1 ñajunʼ gu̱nʼ marzo tsiguʼ 2006.