Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo  |  Octubre tsiguʼ 2015

Lá natayáá ikháánʼ xú káʼnii Dios xtáa rambáyaʼ ráʼ.

Lá natayáá ikháánʼ xú káʼnii Dios xtáa rambáyaʼ ráʼ.

“Ñawúunʼ Jeobá makujmaa náa xa̱bi̱i̱.” (ISAÍAS 66:14)

AJMÚÚ 65 GA̱JMA̱A̱ 26

1, 2. Ndiéjunʼ endxaʼwamíjna̱ ga̱jma̱a̱ numuu Dios tikhun xa̱bu̱ rá.

RÍ MBIʼI xúgi̱, mbaʼin xa̱bu̱ nundxa̱ʼwa̱míjna̱ rí Dios tsixmiéjunʼ rí kuwáanʼ ruʼni ga̱jma̱a̱ rí nagíʼnulú. Mbá xkri̱da, nákha gu̱nʼ noviembre tsiguʼ 2013, iyaʼ lamáa niʼni gámbóo mbaʼa mbaaʼ dí rígá náa tapo̱o̱ iyaʼ Filipinas. Nda̱wa̱á rí nirígá gamiéjunʼ, presidente ndrígóo mbá xuajen niʼthí rí Dios mbáa tambáñun numuu rí xtáa i̱mba̱ níʼkhá.

2 Eʼwíínʼ xa̱bu̱ nundxa̱ʼwa̱míjna̱ rí Dios na̱nguá eʼyoo rí kuwa runi (Is. 26:10, 11; 3 Juan 11). Apóstol Pablo niʼthí rí nákha nixtáa ikhaa nikuwa xa̱bu̱ bi̱ táʼnduun makuwá xóo eyoo Dios. Ninindxu̱ún xa̱bu̱ ra̱míjínʼ, bi̱ nundrigú mbújkha̱a̱ mu muni mbá dí ra̱májánʼ ga̱jma̱a̱ bi̱ nandún maguaʼdáá itháan (Rom. 1:28, 29).

3. a) Ndiéjunʼ gíʼmaa muraximíjna̱ rá. b) Ndiéjunʼ eyoo gáʼthún náa Biblia índo̱ naʼthí “ñawúunʼ” Dios rá.

3 Ikháanʼ nduʼyáá rí Jeobá ndaʼyoo xúgíʼ rí nuʼni. Mú gíʼmaa muraximíjna̱: “Lá nda̱yo̱o̱ gajkhun rí Dios naxmiéjunʼ kaʼyoʼ ráʼ. Lá nda̱yo̱o̱ xú káʼnii xtáa rambáyuʼ xáʼ.” Náa Biblia naʼthí mbaʼa nuthu ga̱jma̱a̱ numuu “ñawúunʼ” Dios. Ndiéjunʼ eyoo gáʼthúu̱n rá. Nguáná nandoo gáʼthúu̱n xú káʼnii Jeobá nambáñun xa̱bi̱i̱ (atraxnuu Deuteronomio  26:8). * (Atayáá náa kúgumaʼá “Ndiéjunʼ eyoo gáʼthúu̱n”.) Ga̱jma̱a̱ Jesús niʼthí rí tikhun xa̱bu̱ “mbuyáá” Dios, xóo muʼthá, mbuyáá rí Dios xtáa rambáñun (Mat. 5:8). Lá nandoo natayáá ikháánʼ “ñawúunʼ” Dios ráʼ. Xóo muʼthá, lá nandoo natayáá ikháánʼ xú káʼnii embáyaʼ Dios ráʼ. Náa Biblia naʼthí ga̱jma̱a̱ numún xa̱bu̱ bi̱ túyáá “ñawúunʼ” Dios ga̱jma̱a̱ xa̱bu̱ bi̱ ndiyáá. Náa artículo rígi̱ mbuʼyáá tikhuu xkri̱da rúʼko̱. Ga̱jma̱a̱ náa i̱mba̱ artículo majmañulúʼ xú káʼnii fe nambáyulúʼ mbuʼyáá rí Dios xtáa rambáyulú.

TÚYÁÁ RÍ DIOS XTÁA RAMBÁYUU XUAJÑU

4. Náa numuu rí xa̱bu̱ bi̱ guáʼdiin sia̱nʼ israelitas na̱nguá nindúún mbuyáá rí Jeobá xtáa rambáyúu xuajñu rá.

4 Nákha wajyúúʼ, mbaʼin xa̱bu̱ ndiyáá xú káʼnii Dios nimbáyúu xuajen Israel.Mbá xkri̱da, Jeobá niʼni milagros mu mambáyúu xuajñu magajnúu náa Egipto ga̱jma̱a̱ maʼngu̱u̱n mbaʼa guerra náa Ku̱ba̱ʼ rí niʼthí maxnún (Jos. 9:3, 9, 10). Mbaʼin reyes ndiyáá rí niʼni Jeobá. Maski ajndu xúʼko̱, nigimbíin mu muxmijná “gajmiún Josué ga̱jma̱a̱ Israel” (Jos. 9:1, 2). Índo̱ nixmijná gajmiún Israel, reyes bugi̱ ma̱ngaa ndiyáá xú káʼnii Dios nimbáyúu xuajñu. Mbá xkri̱da, ndiyáá xú káʼnii Jeobá niʼni rí A̱jkha̱ʼ ga̱jma̱a̱ Gu̱nʼ maguajún wíí “asndu índo̱ xuajin niʼngu̱u̱n nixmijná gajmiún xa̱bu̱ bi̱ sia̱nʼ” (Jos. 10:13). Mú nini gujkhuʼ a̱jkiu̱ún ga̱jma̱a̱ taʼndun mbuyáá rí Jeobá xtáa rambáyúu xuajñu. Ikha jngó táʼngu̱u̱n náa nixmijná (Jos. 11:20).

5. Ndiéjunʼ na̱nguá nindoo mbaʼyoo rey Acab rá.

5 Mba̱yu̱ʼ tsiguʼ nda̱wa̱á, mbáa rey ndiʼyoo mbaʼa ikhoo xú káʼnii Dios nimbáyúu xuajñu. Nigumbiʼyuu Acab ga̱jma̱a̱ ninindxu̱u̱ mbáa rey bi̱ ra̱májánʼ wéñuʼ. Gaʼyee Elías niʼthúu̱n rí xáxnúu ruʼwa asndu índo̱ ikhaa gáʼthi (1 Rey. 17:1). Xúʼko̱ káʼnii, i̱ndó Dios ma̱ndoo maxnúu tsiakii Elías mu maʼthí nguáná gátanga̱a̱ maxnúu ruʼwa. Mú Acab tándoo mbaʼyoo. Nda̱wa̱á, Elías nindo̱ʼo̱o̱ Jeobá rí makuʼma aguʼ asndu mekhuíí ga̱jma̱a̱ Jeobá niriʼña̱a̱ rí niʼtájkháan. Elías ma̱ngaa niʼthúu̱n Acab rí Jeobá maʼni rí maxnuu wéñuʼ ruʼwa. Ga̱jma̱a̱ xúʼko̱ má nirígá (1 Rey. 18:22-45). Mú Acab na̱nguá nindoo mbaʼyoo rí Jeobá niʼni xúgíʼ milagro rúʼko̱. Ndiéjunʼ eʼsngúlúʼ rí ndiʼyáá náa xúgíʼ kutriga̱ rígi̱ rá. Á mu nandulúʼ mbuʼyáá xú káʼnii embáyuluʼ Dios, gíʼmaa makuwáanʼ xawii.

BI̱ NDIYÁÁ RÍ DIOS XTÁA RAMBÁYÚU XUAJÑU

6, 7. Ndiéjunʼ niguánu ndiyáá gabaonitas ga̱jma̱a̱ Rahab rá.

6 Nákha mbiʼi ndrígu̱ún israelitas, nirígá mbá xuajen rí nigumbiʼyuu Gabaón. Bi̱ gabaonitas ninindxu̱ún mixtiʼkuiin náa i̱ʼwáʼ xuajen. Náa numuu rá. Numuu rí nidxawíín xúgíʼ rí niʼni Jeobá náa Israel ga̱jma̱a̱ ndiyáá rí Dios xtáa rambáyúu xuajñu. Ikha jngó, bi̱ gabaonitas taʼndun muxmijná gajmiún israelitas, ikhiin ndiyáaʼ xú káʼnii makuwa tsímáá gajmiún isrelitas (Jos. 9:3, 9, 10). Májánʼ wéñuʼ dí niraʼwíí muni, numuu rí ndiyáá dí Jeobá xtáa raxmínaʼ ga̱jma̱a̱ numún xa̱bu̱ Israel.

7 Mbáa a̱ʼgu̱ bi̱ nigumbiʼyuu Rahab ma̱ngaa ndiʼyoo rí Jeobá xtáa rambáyúu xuajñu. Ikhaa na̱nguá ninindxu̱u̱ isrelita, mú niʼdxuun rí Jeobá niguwíin israelitas náa Egipto. Índo̱ a̱jmi̱i̱n xa̱bu̱ israelitas bi̱ nuñama niguwaʼ náa goʼwóo, ikhaa niʼthún rí gíʼdoo fe rí Jeobá mambáñún mu maguaʼdáá ku̱ba̱ʼ náa xtáa ikhaa. Maski ajndu ikhaa ndiʼyoo rí fe rúʼko̱ gamíi maʼni rí makhañúu ga̱jma̱a̱ bi̱ kuwa náa guʼwóo, mu ikhaa nikumu̱u̱ rí Dios má gáʼni kríyaaʼ (Jos. 2:9-13; 4:23, 24).

8. Ndiéjunʼ rí niguáʼnu ndiyáá tikhun israelitas rá.

8 Guʼtá mbu̱júu̱ ga̱jma̱a̱ numuu Acab. Índo̱ ndiʼyoo aguʼ rí nagajtaa asndu mekhuíí, Acab táʼndoo mbaʼyoo rí Dios niriʼña rí niʼtájkáan Elías. Mú tikhun israelitas niguáʼnu ndiyáá rí Dios niʼni milagro rúʼko̱. Ikha jngó nindxa̱ʼwá: “¡Jeobá nindxu̱u̱ Dios gajkhun!” (1 Rey. 18:39).

9. Xú káʼnii gándoo gúʼyáá “ñawúunʼ” Jeobá rí mbiʼi xúgi̱ rá.

 9 Ndiʼyáá má mbaʼa xkri̱da ndrígu̱ún xa̱bu̱ bi̱ táʼnduun mbuyáá rí Dios nambáñun xa̱bi̱i̱ mú eʼwíínʼ ndiyáá. Ma̱ngaa rí mbiʼi xúgi̱ kuwa mbaʼin xa̱bi̱i̱ Dios bi̱ naguáʼnu nduyáá rí ikhaa nambáyulúʼ. Ikháanʼ nandulúʼ manindxu̱lúʼ xóo ikhiin. Xú káʼnii gándoo gúʼyáá “ñawúunʼ” Jeobá rí mbiʼi xúgi̱ rá. Ma̱ndoo mbuʼyáá ga̱jma̱a̱ ‹iduu› a̱jkiu̱lúʼ (Efes. 1:18). (Atayáá kúgumaʼá “Ndiéjunʼ eyoo gáʼthúu̱n”.) Mú muʼni rúʼko̱ ndayóoʼ muniʼnííʼ itháan Jeobá ga̱jma̱a̱ xú káʼnii nindxu̱u̱. Ndiéjunʼ esngájma rí Jeobá xtáa rambáñun bi̱ nandún muni rí naniguʼ rí mbiʼi xúgi̱ rá.

RÍ NASNGÁJMA RÍ JEOBÁ NAMBÁYULÚʼ MBIʼI XÚGI̱

10. Ndiéjunʼ esngájma rí Jeobá xóó nambáñun bi̱ nandún muni rí nandoo xá. (Atayáá timbá xtiʼkhu.)

10 Rígá mbaʼa rí nasngájma rí Jeobá xóó nambáñun bi̱ nandún muni rí nandoo. Mbaʼa nuthu eʼdxawíín xú káʼnii Jeobá nariʼña̱a̱ índo̱ xa̱bu̱ nunda̱ʼa̱a̱ rí mambáñun (Sal. 53:2). Mbá xkri̱da, mbáa xa̱bi̱i̱ Jeobá bi̱ nagumbiʼyuu Allan xtáa raʼtáraʼa náa mbaaʼ rí gíwanʼ náa tapo̱o̱ iyaʼ náa Filipinas. Índo̱ ikhaa xtáa raʼtároʼoo mbáa a̱ʼgu̱, a̱ʼgu̱ nigíʼdu̱u̱ nimbiyaʼ. Náa numuu rá. Allan eʼthí rí miʼcha̱ rúʼko̱ a̱ʼgu̱ nindo̱ʼo̱o̱ Dios rí magún gúyáá xa̱bi̱i̱ Jeobá. Nákha dxáʼgú nindxu̱u̱ niʼnigajmaa̱ gajmíi̱n xa̱bi̱i̱ Jeobá. Mú nda̱wa̱á ninújunʼ, ni̱jkha̱ gáxtáa i̱mba̱ níʼkhá ga̱jma̱a̱ niniñuʼ raʼnigajmaa. Ikha jngó nixnáa wéñuʼ núma̱aʼ Jeobá numuu rí Dios niriʼña̱a̱ nacha̱ wéñuʼ rí nindo̱ʼo̱o̱. Asndu táʼni mbá tsiguʼ índo̱ ikhaa nijngúun iyááʼ.

Gíʼmaa makuwáanʼ xawii mu mbuʼyáá xú káʼnii Jeobá nambáyulúʼ (Atayáá kutriga̱ 11 asndu 13)

11, 12. a) Xú káʼnii embáñun Jeobá xa̱bi̱i̱ rá. b) Arathá xú káʼnii Jeobá nimbáyúu mbáa ndxájulú.

11 Rí mbiʼi xúgi̱, Jeobá nambáñun mbaʼin xa̱bi̱i̱. Mbá xkri̱da, nákha xóó tsénindxu̱ún xa̱bi̱i̱ Jeobá, tikhun nitsikha ndíí o drogas ga̱jma̱a̱ ndiyáá pornografía. Mbaʼin nuthi rí nigíʼ muniñaʼ runi rúʼko̱ dí ra̱májánʼ, mu na̱nguá nindoo. Mú índo̱  ninda̱ʼa̱a̱ Jeobá rí mambáñun, ikhaa nixnúún “tsiakii rí itháan mba̱a̱”. Ikhú niʼngu̱u̱n niniñaʼ runi rúʼko̱ (2 Cor. 4:7; Sal. 37:23, 24).

12 Jeobá ma̱ngaa nambáñun xa̱bi̱i̱ muraʼníí xkujndu rí guáʼdáá. Guʼyáá káʼnii nigíʼnuu mbáa ndxájulú bi̱ nagumbiʼyuu Amy. Ikhaa nitháán rí maʼga̱ náa mbaaʼ rí gíwanʼ náa tapo̱o̱ iyaʼ náa Pacífico mu mayambáá náa maguma mbá Guʼwá nagimbáanʼ ga̱jma̱a̱ mbá guʼwá náa makuwá misioneros. Mu mixtiʼkhu wéñuʼ xóo kuwa xa̱bu̱ ikhí. Mbaʼa nuthu na̱nguá nigiʼdoo iyaʼ ga̱jma̱a̱ aguʼ rí mambiʼyuu, ma̱ngaa náa calle najníʼ wéñuʼ iyaʼ. Ikhaa xtáa náa mbá cuarto chíʼgíʼ náa mbá hotel ma̱ngaa ra̱ʼkhá tháán eñínʼ bi̱ kuwa náa goʼwóo. Mbá mbiʼi nindxaʼwájmaa mbáa ndxájulú bi̱ xtáa rañajunʼ ga̱jma̱a̱. Índo̱ ni̱ʼkha̱a̱ náa xtáa, nixtáa gíná wéñuʼ. Mbiʼi rúʼko̱ nda̱a̱ aguʼ mambiʼyuu, mikína mbá xúgíʼ. Ikhú niʼthá kháñuu Jeobá. Índo̱ ni̱ʼkha̱a̱ aguʼ, nixkamaa mbá artículo náa revista Bi̱ Nayejngoo náa na̱ʼkha̱ xtágabu dí mambáñún misioneros. Náa artículo rígi̱ naʼthí xú káʼnii gúraʼní xkujndu xóo índo̱ nakuwa gíná o ga̱jma̱a̱ numuu xóo mixtiʼkhu kuwa xa̱bu̱. Amy nikumu̱u̱ rí asndu xóo ikhaa xtáa raʼthúu̱n. Rúʼko̱ nixnúu tsiakii mu mañajunʼ má xúʼko̱ (Sal. 44:25, 26; Is. 41:10, 13).

13. Ndiéjunʼ esngájma kaʼwu rí Jeobá nambáñun xa̱bi̱i̱ mu mumbayúmi̱jna̱ náa ñajunʼ rí miʼtáraʼa rá.

13 Jeobá ma̱ngaa nambáñun xa̱bi̱i̱ mu mumbayúmi̱jna̱ náa ñajunʼ rí miʼtáraʼa (Filip. 1:7). Mbá xkri̱da, índo̱ tikhun Xa̱bu̱ Ñajunʼ murikhulú rí ní xuʼtáraʼa itháan, na̱jkua̱ asndu náa tribunal mu mumbayúmi̱jna̱. Niʼngulú má mbá 268 nuthu náa tribunales rí gíʼdoo itháan numuu náa xúgíʼ numbaaʼ. Mbá xkri̱da, asndu nákha tsiguʼ 2000 niʼngulú má mbá 24 nuthu náa Tribunal Europeo de Derechos Humanos. Nakujmaa kaʼwu rí nimbáa xáʼngo̱o̱ gáʼni rí Jeobá mambáñun xa̱bi̱i̱ (Is. 54:17; atraxnuu Isaías 59:1). *

14. Ndiéjunʼ i̱ʼwáʼ esngájma rí Dios xtáa rambáyulúʼ rá.

14 Ndiéjunʼ i̱ʼwáʼ nasngájma rí Dios xtáa rambáyulúʼ rá. Mbá rí nasngájma rí kuwáanʼ ruʼtáraʼa náa xúgíʼ numbaaʼ (Mat. 24:14; Hech. 1:8). Imbo̱o̱ rí nasngájma rí xúgínʼ xa̱bi̱i̱ Dios kuwáanʼ mbá kambáxulú, tséʼniuu má náa eguwaʼ. Nda̱a̱ imbo̱o̱ grupo bi̱ kambáxu̱u̱n wéñuʼ xóo rígi̱. Asndu tikhun xa̱bu̱ bi̱ tseni ñajunʼ Jeobá nuthi rígi̱: “Dios xtáa náa ikháanʼla” (1 Cor. 14:25). Xó má eʼyáá, rígá mbaʼa rí nasngájma rí Dios nambáyulúʼ (atraxnuu Isaías 66:14). * Ikháánʼ rá. Lá nandoo natayáá xú káʼnii Jeobá nambáyaʼ ráʼ.

LÁ NATAYÁÁ IKHÁÁNʼ XÚ KÁʼNII XTÁA RAMBÁYAʼ DIOS RÁʼ.

15. Náa numuu rí nguáná tséʼyáá rí Jeobá xtáa rambáyulúʼ rá.

15 Mbáa nguáná tséʼyáá rí Jeobá xtáa rambáyulúʼ. Náa numuu rá. Mbáa naxmiéjunlú wéñuʼ ga̱jma̱a̱ numuu xkujndu rí kuaʼdáá rí asndu nagumulúʼ rí Jeobá nimbáyulúʼ mbaʼa nuthu nákha  ginii. Rúʼko̱ nindxu̱u̱ rí nigíʼnuu Elías. Ikhaa ninindxu̱u̱ mbáa xa̱bu̱ bi̱ tsemiñuu kayuʼ. Mú índo̱ reina Jezabel nindoo maxíyáa, Elías nigumuu xú káʼnii Jeobá nimbáyúu nákha ginii. Náa Biblia naʼthí dí ra̱ʼkhá tháán nimíñuu rí asndu nindoo makhañúu (1 Rey. 19:1-4). Xú káʼnii gándoo gixtambáyii ga̱jma̱a̱ mixnáá tsiakii xá. Mbayáaʼ rí Jeobá mambáyúu (1 Rey. 19:14-18).

16. Índo̱ kuaʼdáá xkujndu, ndiéjunʼ gámbáyulúʼ mbuʼyáá rí Jeobá xtáa rambáyulúʼ rá.

16 Xúʼko̱ má nigíʼnuu Job. Ra̱ʼkhá tháán nixmiéjunʼ ga̱jma̱a̱ numuu xkujndu rí nigiʼdoo rí táʼyoo xóo Jeobá (Job 42:3-6). Ikháanʼlu rá. Índo̱ kuaʼdáá xkujndu, mbáa asndu tséʼyáá rí Jeobá xtáa rambáyulúʼ. Ndiéjunʼ gámbáyulúʼ mbuʼyáá rá. Rí muraxnuu Biblia ga̱jma̱a̱ mundxaʼwamíjna̱ rí naʼthí ikhí ma̱ngaa xtágabu rí eraxnuu. Índo̱ nduʼyáá xú káʼnii embáyulú náa xkujndu ndrígúlú, mani̱ndxu̱u̱ xóo rí Dios xtáa ráʼtuluʼ. Ikhú, mbuʼyáá rí Jeobá gajkhun xtáa ga̱jma̱a̱ ma̱ndoo muʼthá xóo Job: “Rí xúgi̱ iduʼ ndaʼyaʼ”.

Jeobá ma̱ndoo maʼni rí mumbañún eʼwíínʼ (Atayáá kutriga̱ 17 ga̱jma̱a̱ 18)

17, 18. a) Xú káʼnii nimbáyulúʼ Jeobá rá. b) Xú káʼnii embáñun Jeobá tikhun xa̱bi̱i̱ rí mbiʼi xúgi̱ rá.

17 Lá nandoo natayáá xú káʼnii Jeobá nambáyaʼ ráʼ. Mbá xkri̱da, tikhun a̱ngiu̱lú nakumu̱ún rí ikhaa nambáñun mu muxkamaa religión rí gajkhun. Eʼwíínʼ nundxa̱ʼwa̱míjna̱ rí Jeobá nimbáñun ga̱jma̱a̱ numuu rí niʼthí mbáa ndxájulú náa reunión. O mbáa muthi rí Dios nimbáñun índo̱ niriʼña̱a̱ rí nitajkháan. Mbáa eʼwíínʼ nakumu̱ún rí Dios nimbáñun munimbánii mbá meta rí niguáʼdáá mu muni itháan ñajunʼ. Ga̱jma̱a̱ eʼwíínʼ muthi rí Jeobá nixnúún rí ndiñúnʼ índo̱ niniñaʼ mbá ñajunʼ rí tséniñuʼ magún reunión o mutaraʼa (Heb. 13:5). Á mu nambáxulúʼ májánʼ gajmiúlú Jeobá, mbuʼyáá rí ikhaa xtáa rambáyulúʼ wéñuʼ.

18 Náa xuajin Kenia, mbáa ndxájulú bi̱ nagumbiʼyuu Sarah, ikhaa niʼsngóo mbáa ga̱jma̱a̱ numuu Biblia bi̱ nakujmaa rí tseʼyamajkhu rí xtáa rajmañuu. Sarah niʼthá kháñuu Jeobá ga̱jma̱a̱ niraxu̱u̱ á mu maniñuʼ raʼsngóo. Mú índo̱ niguámbóo niʼtájkháan, bi̱ naʼsngóo niʼtároʼoo ga̱jma̱a̱ teléfono mu maraxu̱u̱ á mu ma̱ndoo maʼga̱ ga̱jma̱a̱ náa reunión. ¡Phú nidxuu wéñuʼ Sarah! Á mu mangáanʼ kuwáanʼ xawii, mbuʼyáá rí Jeobá xtáa rambáyulú. Náa Asia, mbáa ndxájulú bi̱ mbiʼyuu Rhonna naʼthí rí ndayóoʼ mba̱yu̱ʼ mbiʼi mu majmañulúʼ mbuʼyáá xú káʼnii embáyuluʼ Jeobá. Ga̱jma̱a̱ naʼthí rí índo̱ nduʼyáá, ra̱ʼkhá tháán májánʼ índo̱ nakru̱ʼu̱lú rí naxmiéjunʼ kaʼyulúʼ wéñuʼ.

19. Á mu nandulúʼ mbuʼyáá xú káʼnii Dios nambáyulúʼ, ndiéjunʼ imbo̱o̱ gíʼmaa muʼni rá.

19 Á mu nandulúʼ mbuʼyáá xú káʼnii Dios nambáyulúʼ, ma̱ngaa ndayóoʼ muguaʼdáá mbá ‹a̱jkiu̱lú kaʼwu› (Mat. 5:8). Rígi̱ nandoo gáʼthi rí gíʼmaa mundxaʼwáá edxu̱lúʼ rí nindxu̱u̱ májánʼ ga̱jma̱a̱ muniʼñáaʼ ruʼni rí ra̱májánʼ (atraxnuu 2 Corintios 4:2). * Náa artículo rígi̱ ndiʼyáá rí á mu nandulúʼ mbuʼyáá xú káʼnii embáyuluʼ Jeobá, gíʼmaa mambaxúlúʼ májánʼ gajmiúlú. Náa imbo̱o̱ artículo gájmañulú xú káʼnii fe naniñulú mbuʼyáá rí Jeobá nambáyulúʼ.

[Mbaʼa nota]

^ párr. 3 Deuteronomio 26:8: “Nda̱wa̱á kayuʼ Jeobá niguwa̱ánʼ náa egipto ga̱jma̱a̱ ñawúunʼ gujkhuʼ ma̱ngaa nikruiyaʼ ñawúunʼ, ga̱jma̱a̱ niʼni mbaʼa dí migamíi wéñuʼ, ma̱ngaa tsinaʼ ga̱jma̱a̱ milagros”.

^ párr. 13 Isaías 59:1: “¡Gu̱ya̱a̱! Ñawúunʼ Jeobá tseʼni̱i̱ chíʼmbaʼ, mu xándoo maʼni káwáanʼ, ni tagugo cháʼun rí xándoo maʼdxun”.

^ párr. 14 Isaías 66:14: “Ikháanʼ mbu̱ya̱a̱ rígi̱, ga̱jma̱a̱ a̱jkia̱la ra̱ʼkhá tháán gáʼdxuu, ga̱jma̱a̱ itsala makráʼáan xóo inaʼ maxaʼ. Ga̱jma̱a̱ ñawúunʼ Jeobá makujmaa náa xa̱bi̱i̱, mú ikhaa makruigi̱i̱n xa̱bu̱ bi̱ sia̱nʼ náa ikhaa”.

^ párr. 19 2 Corintios 4:2: “Mú niniʼñáʼlu dí nindxu̱u̱ ma̱jti̱ʼ, rí mitsaga, ga̱jma̱a̱ tséʼni nduwaʼ o tsíriʼkui̱i̱lú ajngá rawunʼ Dios, índo̱ nuʼthá rí gajkhun, xúgínʼ nduyáá rí nindxulú májáánʼ xa̱bu̱ náa inuu Dios”.