Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo  |  Septiembre tsiguʼ 2015

“Gakuwa jmbu má xúʼko̱ náa fe”

“Gakuwa jmbu má xúʼko̱ náa fe”

“Gakuwa jmbu má xúʼko̱ náa fe.” (1 CORINTIOS 16:13)

AJMÚÚ 60 GA̱JMA̱A̱ 64

1. a) Ndiéjunʼ nigíʼnuu Pedro índo̱ niʼni ruʼwa mbiiʼ náa lamáa ndrígóo Galilea rá. (Atayáá timbá xtiʼkhu.) b) Náa numuu rí nirmáʼáan náa iyaʼ Pedro rá.

MBÁ mbruʼun, Pedro gajmíi̱n xa̱bi̱i̱ kuwa rakidiin náa lamáa ndrígóo Galilea náa mbá barca índo̱ niʼni ruʼwa mbiiʼ. Nda̱a̱ tsu̱ma̱, ndiyáá Jesús rí na̱jkha̱ kruámuʼ náa inuu iyaʼ. Pedro niraxu̱u̱ Jesús á mu ma̱ndoo maʼga̱ náa inuu iyaʼ xóo ikhaa. Jesús niʼthún rí ma̱ndoo. Ikha jngó Pedro nigájnuu náa barca ga̱jma̱a̱ nigi̱ʼdu̱u̱ ra̱jkha̱ náa Jesús. Mú nda̱wa̱á rí ni̱jkha̱ má mbá chíʼmbaaʼ, nigíʼdu̱u̱ nirmáʼáan náa iyaʼ. Náa numuu rá. Numuu rí ndiʼyoo ruʼwa mbiiʼ ga̱jma̱a̱ nimíñuu. Ikhú, Pedro niʼthúu̱n Jesús rí mambáyúu. Jesús nigujtun ñawúunʼ ga̱jma̱a̱ niʼthúu̱n: “¡Xabo, pu-lajuin fe xtaʼda! ¿Narijngo nitane ajma akianʼ-roʼ?” (Mat. 14:24-32.)

2. Ndiéjunʼ gúʼyáá náa artículo rígi̱ rá.

2 Náa artículo rígi̱ gúʼyáá ajtsú enii rí ma̱ndoo majmañulúʼ rí nigíʼnuu Pedro. Timbá, xú káʼnii nisngájma ginii rí nigiʼdoo fe rí Jeobá gámbáyúu xá. Raga̱jma̱, náa numuu rí ni̱jkha̱ randáti̱ga̱a̱ fe ndrígóo xá. Ga̱jma̱a̱ ragajtsú, xú káʼnii nigiʼdoo mbu̱júu̱ fe xá. Rí mbuʼyáá ajtsú enii rígi̱ mambáyulúʼ muguaʼdáá mbá fe gujkhuʼ (1 Cor. 16:13).

 GAGUAʼDÁÁ FE NÁA JEOBÁ

3. a) Ndíjkha rí Pedro nigájnuu náa barca ga̱jma̱a̱ ni̱jkha̱ kruámuʼ náa iyaʼ rá. b) Ndiéjunʼ ni̱ʼni̱ bi̱ ni̱ndxu̱lú cristianos rá.

3 Índo̱ Jesús nindxa̱ʼóo Pedro, ikhaa nigájnuu náa barca ga̱jma̱a̱ ni̱jkha̱ kruámuʼ náa inuu iyaʼ. Náa numuu niʼni xúʼko̱ xá. Numuu rí nigiʼdoo fe rí Jeobá má gámbáyúu xó má nimbáyúu Jesús. Xúʼko̱ má ni̱ʼni̱ mangáanʼ bi̱ ni̱ndxu̱lú cristianos. Índo̱ nijmañulúʼ náa Biblia rí Jesús naʼthúlúʼ manindxu̱lúʼ xa̱bi̱i̱, ikhú nixnaxímíjná náa Jeobá ga̱jma̱a̱ nijngúlú iyááʼ. Náa numuu rá. Numuu rí kuaʼdáá wéñuʼ fe rí Jeobá ga̱jma̱a̱ Jesús mumbayulúʼ (Juan 14:1; atraxnuu 1 Pedro 2:21).

4, 5. Ndíjkha rí gíʼdoo wéñuʼ numuu fe rá.

4 Gíʼdoo wéñuʼ numuu fe, numuu rí nambáyulúʼ muʼni asndu dí rakáʼnii maguma (Mat. 21:21, 22). Mbá xkri̱da, Pedro ningoo ni̱jkha̱ kruámuʼ náa inuu iyaʼ numuu fe rí nigiʼdoo. Ikháanʼ mangáanʼ niʼni rí mingíjyúuʼ wéñuʼ numuu rí kuaʼdáá fe. Mbá xkri̱da, mbaʼáanʼ niriʼkhu̱u̱ mbá kayuʼ xú káʼnii ni̱ndxu̱lú. Ga̱jma̱a̱ xa̱bu̱ bi̱ nuniʼniáanʼ nduyáá rí xúgi̱ ni̱ndxu̱lú mixtiʼkuáanʼ wéñuʼ. Ni̱ʼni̱ xúgíʼ rígi̱ numuu rí nandulúʼ kuʼyáá Jeobá ga̱jma̱a̱ rí ikhaa nimbáyulúʼ (atraxnuu Colosenses 3:5-10). * Ma̱ngaa, ga̱jma̱a̱ numuu fe nixnaxímíjná náa Jeobá ga̱jma̱a̱ nambáxulúʼ májánʼ gajmiúlú. Xándoo muʼni xúgíʼ rígi̱ á mu Dios tsimbáyulú (Efes. 2:8).

5 Ma̱ngaa gíʼdoo wéñuʼ numuu fe, numuu rí naxnúlú tsiakii mu muʼnimi̱jna̱ gajmiúlú rí naʼni Satanás, bi̱ gíʼdoo wéñuʼ tsiakii (Efes. 6:16). Ma̱ngaa, fe nambáyulúʼ mu muraʼníí xkujndu. Jeobá naʼthúlúʼ rí á mu kuaʼdáá fe náa ikhaa ga̱jma̱a̱ nuʼni ñajunʼ, ikhaa má gáxnúlúʼ xúgíʼ rí nda̱yúlúʼ (Mat. 6:30-34). Ga̱jma̱a̱ á mu kuaʼdáá fe, mambáyulúʼ makuwáanʼ kámuu mbiʼi náa Ku̱ba̱ʼ mitsaan (Juan 3:16).

XÚʼNIMBÁTI̱GA̱ FE

6, 7. a) Ndiéjunʼ gándoo gambriguii giñánʼ ga̱jma̱a̱ iyaʼ rí naʼbaxu̱u̱ rí niʼni mamiñúu Pedro rá. b) Xóo eʼyáá rí asndu tsáa rí ikháanʼ ma̱ndoo maʼnimbáti̱ga̱a̱ fe rá.

6 Guʼtá mbu̱júu̱ ga̱jma̱a̱ numuu Pedro. Náa numuu rí nimiñuu índo̱ ni̱jkha̱ kruámuʼ náa inuu iyaʼ xá. Náa Biblia naʼthí rí niniñuʼ raʼyoo Jesús ga̱jma̱a̱ niyexi náa ruʼwa mbiiʼ (Mat. 14:30). Ikhú nigíʼdu̱u̱ niʼnimbáti̱ga̱a̱ fe ga̱jma̱a̱ nirmáʼáan náa iyaʼ. Giñánʼ ga̱jma̱a̱ iyaʼ rí naʼbaxu̱u̱ náa ruʼwa mbiiʼ ma̱ndoo muʼthá rí nambriguii ga̱jma̱a̱ xkujndu ma̱ngaa rí naʼni mumiʼnííʼ mámbá mbiʼi. Maski ajndu xkujndu nindxu̱u̱ mingíjyúuʼ wéñuʼ, Jeobá ma̱ndoo maxnúlúʼ tsiakii mu muraʼníí. Mú á mu i̱ndó nundxa̱ʼwa̱míjna̱ náa xkujndu, ma̱ndoo muʼnimbáti̱ga̱ fe rí Jeobá má gambáyuluʼ.

7 Asndu tsáa rí ikháanʼ ma̱ndoo maʼnimbáti̱ga̱a̱ fe. Xóo eʼyáá rá. Numuu rí náa Biblia naʼthí “ri aʼcan ri naʼni maʼgaracanlu” (Heb. 12:1). Á mu i̱ndó nundxa̱ʼwa̱míjna̱ ga̱jma̱a̱ numuu xkujndu ndrígúlú xóo niʼni Pedro, ma̱ndoo muʼnimbáti̱ga̱ fe. Xú káʼnii gándoo gúʼyáá á mu fe ndrígúlú na̱jkha̱ randáti̱ga̱a̱ rá. Guʼyáá mbaʼa graxe̱ rí mambáyulúʼ mbuʼyáá.

8. Ndiéjunʼ gándoo gaʼniulúʼ rí muʼnimbáti̱ga̱a̱ fe náa rí Jeobá nikudaminaʼ maʼni rá.

8 Lá kuaʼdáá xóó fe náa rí Jeobá nikudaminaʼ maʼni ráʼ. Mbá xkri̱da, Jeobá nikudaminaʼ rí inuu maʼni gámbáa numbaaʼ ndrígóo Satanás. Mú á mu nuʼniñámi̱jna̱ rí maʼni jngarígáanʼ gitsíin dí rígá náa numbaaʼ rígi̱, ma̱ndoo muʼnimbáti̱ga̱a̱ fe rí fin inuu ma̱ʼkha̱ (Hab. 2:3). Guʼyáá imbo̱o̱ xkri̱da. Jeobá ma̱ngaa nikudaminaʼ maʼni mba̱a̱ a̱jkiu̱u̱n kaʼyulúʼ ga̱jma̱a̱ numuu rí nixnáximinaʼ Jesús. Mú, á mu nundxa̱ʼwa̱míjna̱ má xúʼko̱ ga̱jma̱a̱ numuu aʼkhá rí ni̱ʼni̱  nákha wajyúúʼ, mbáa mundxa̱ʼwa̱míjna̱ rí Jeobá tséʼni mba̱a̱ a̱jkiu̱u̱n kaʼyulúʼ (Hech. 3:19). Ikhú ma̱ndoo muʼnimbáti̱ga̱a̱ gagi rí kuaʼdáá índo̱ nuʼni ñajunʼ Jeobá ga̱jma̱a̱ muniʼñáaʼ ruʼtáraʼa.

9. Ndiéjunʼ garigá á mu nánguá gíʼdoo numuu Jeobá náa ikháanʼ rá.

9 Lá nuʼni má xúʼko̱ ñajunʼ Jeobá ga̱jma̱a̱ xúgíʼ a̱jkiu̱lúʼ ráʼ. Rí muñajunʼ wéñuʼ náa Jeobá mambáyulúʼ muguaʼthi̱i̱n rí makuwaanʼ kámuu mbiʼi. Mú, ndiéjunʼ gárígá á mu nuniʼñáaʼ rí i̱ʼwáʼ magiʼdoo itháan numuu náa ikháanʼ rá. Mbá xkri̱da, mbáa mundrígúlú mbá ñajunʼ náa muʼdaʼ májánʼ mú xaniñúlú muʼni ñajunʼ Jeobá xóo nákha ginii. Rígi̱ gáʼni makágua̱ba̱ʼ fe ndrígúlú ga̱jma̱a̱ maʼni rí muniʼñáaʼ ruʼni ñajunʼ Jeobá ga̱jma̱a̱ xúgíʼ a̱jkiu̱lú (Heb. 6:10-12).

10. Ndíjkha rí nuʼthá rí índo̱ nuʼni mba̱a̱ a̱jkiu̱lú kuʼñúún eʼwíínʼ nusngajmá rí kuaʼdáá fe náa Jeobá rá.

10 Lá naʼni mingíjyúuʼ muʼni mba̱a̱ a̱jkiu̱lú ráʼ. Índo̱ eʼwíínʼ nuniulú dí raʼkhí, lá nakiʼnáanʼ ga̱jma̱a̱ nuniʼñúnʼ ruʼthúún xáʼ. Á mu xúʼko̱ eʼni, mbáa nundxa̱ʼwa̱míjna̱ i̱ndó rí nakumulú ikháanʼ. Mú, á mu nuʼni mba̱a̱ a̱jkiu̱lúʼ kuʼñúún bi̱ nuni gawúnlú nusngájma rí kuaʼdáá fe náa Jeobá. Náa numuu rí nuʼthá rúʼko̱ rá. Nduʼyáá rí á mu nandulúʼ rí Jeobá maʼni mba̱a̱ a̱jkiu̱u̱n kaʼyulúʼ ga̱jma̱a̱ numuu aʼkhá rí ni̱ʼni̱, gíʼmaa muʼni mba̱a̱ a̱jkiu̱lú kuʼñúún eʼwíínʼ (Luc. 11:4). Índo̱ nuʼni mba̱a̱ a̱jkiu̱lú kuʼñúún, nusngajmá rí kuaʼdáá fe rí Jeobá maʼdxuu ga̱jma̱á ni̱ndxu̱lú ma̱ngaa rí maʼni mba̱a̱ a̱jkiu̱u̱n kaʼyulúʼ. Ga̱jma̱a̱ rúʼko̱ gíʼdoo itháan numuu ki xóo muʼni rí eʼwíínʼ muni numa̱a̱ rí niniulú. Ma̱ngaa, xa̱bi̱i̱ Jesús ndiyáá rí ndiyóoʼ fe mu muni mba̱a̱ a̱jkiu̱ún kuñún eʼwíínʼ. Ikha jngó índo̱ Jesús niʼthún rí muni mba̱a̱ a̱jkiu̱ún kuñún bi̱ niniu̱u̱n dí raʼkhí mbaʼa nuthu, ikhiin nitháán: “Atane ri maguaʼ-daxoʼ xo fe” (Luc. 17:1-5).

11. Ndiéjunʼ dí ragíʼmaa muʼni índo̱ mbáa naxprígúlúʼ rá.

11 Lá nakiʼnáanʼ índo̱ nuxprigulú xáʼ. Índo̱ mbáa naxprígúlúʼ, gíʼmaa mbuʼyáá xú káʼnii gambáyulú xtágabu ndrígóo. Mú, á mu nduʼyáá wéñuʼ rí ikhaa nakiéʼkúun o rí naʼthúlúʼ, xajmañulú nditháan (Prov. 19:20). Itháan májánʼ muguaʼdáá fe ga̱jma̱a̱ mbuʼyáá dí rúʼko̱ mambáyulúʼ mu majmañulúʼ mundxaʼwáá edxu̱lúʼ xóo Jeobá.

12. Ndiéjunʼ esngajmá á mu nuxieʼkhá má xúʼko̱ ga̱jma̱a̱ numún xa̱bu̱ bi̱ nuxna ikha náa congregación rá.

12 Lá nuxieʼkhá ga̱jma̱a̱ numún bi̱ kuya̱ edxu̱u̱ náa congregación ráʼ. Índo̱ israelitas nidxawíín ajngáa rí minduwaʼ rí nithi gu̱wi̱nʼ xa̱bu̱ bi̱ niñama, ikhú nixieʼkhá ga̱jma̱a̱ numuu Moisés ga̱jma̱a̱ Aarón. Ikha jngó Jeobá niraxu̱u̱ Moisés: “Asndu nguáná xuyamajkhuʼ xuajin rígi̱, ga̱jma̱a̱ asndu nguáná ní xúguaʼdáá fe náa ikhúúnʼ ga̱jma̱a̱ xúgíʼ rí ni̱ni̱ náa ikhiin xá.” (Núm. 14:2-4, 11.) Índo̱ israelitas nixieʼkhá náa xa̱bu̱ bi̱ Jeobá niraʼwíin mu muxnún ikha, nisngajma rí na̱nguá guaʼdáá fe náa ikhaa. Xúʼko̱ má kaʼnii, á mu nuxieʼkhálu má xúʼko̱ náa xa̱bu̱ bi̱ Jeobá najmiuu mu muxna ikha náa congregación, nusngajmá rí nuʼnimbáti̱ga̱a̱ fe náa ikhaa.

13. Náa numuu dí ragíʼmaa makanájkulú á mu nduʼyáá rí fe ndrígúlú nikágua̱ba̱ʼ rá.

13 Nda̱wa̱á rí ndiʼyáá graxe̱ rígi̱, mbáa ndiʼyáá rí fe ndrígúlú nikágua̱ba̱ʼ. Mú ragíʼmaa makanájkulú. Garmáʼáan a̱jkiu̱lú rí asndu apóstol Pedro nimíñuu ga̱jma̱a̱ niʼnimbáti̱ga̱ fe. Ga̱jma̱a̱ nguáná Jesús ndiyóoʼ maxprígún xúgínʼ xa̱bi̱i̱ numuu rí guáʼdáá lájuíin fe (Mat. 16:8). Maski ajndu xúʼko̱ ma̱ndoo majmañulúʼ mbá ikha rí gíʼdoo wéñuʼ numuu rí niʼni Pedro nda̱wa̱á rí ni̱jkha̱ ratígo̱o̱ fe ga̱jma̱a̱ nirmáʼáan náa lamáa.

XÚ KÁʼNII GUGUAʼDÁÁ MBU̱JÚU̱ FE RÁ.

14, 15. a) Ndiéjunʼ niʼni Pedro índo̱ ni̱jkha̱ rarmáʼáan náa iyaʼ rá. b) Xú káʼnii gándoo gúʼyáá tsumáá Jesús rá.

14 Ndiéjunʼ niʼni Pedro índo̱ nirmáʼáan náa iyaʼ rá. Ikhaa najmañuu najnguʼúun náa iyaʼ, ikha jngó ikhaa ma̱ndoo mata̱nga̱a̱ náa barca (Juan 21:7). Mú táʼni rúʼko̱, náa numuu rá. Numuu rí tágíʼ maʼnikriaminaʼ, rí niʼni, ndiʼyoo Jesús ga̱jma̱a̱ nindo̱ʼo̱o̱ rí mambáyúu. Á mu nduʼyáá rí fe ndrígúlú nikágua̱ba̱ʼ, gíʼmaa mbuʼyaridáá Pedro. Xú káʼnii rá.

 15 Pedro ndiʼyoo Jesús. Ikháanʼ mangáanʼ gíʼmaa mbuʼyáá tsumáá Jesús, xó má eʼthí náa Biblia (Heb. 12:2, 3). (Atayáá kúgumaʼá “Ndiéjunʼ eyoo gáʼthúu̱n”.) Mú ikháanʼ xándoo mbuʼyáá Jesús ga̱jma̱a̱ idulú, xóo ndiʼyoo Pedro. Mú, xú káʼnii gándoo gúʼyáá tsumáá Jesús rá. Rí muʼnigajmaa rí niʼni, rí niʼsngáa ga̱jma̱a̱ rí mbuʼyaridáá xkri̱da ndrígóo. Rí muʼni rígi̱ mambáyulúʼ muguaʼdáá mbu̱júu̱ fe. Guʼyáá tikhuu xú káʼnii gándoo guʼyaridáá Jesús.

Índo̱ nduʼyáá xkri̱da ndrígóo Jesús ga̱jma̱a̱ nuʼgíʼ nuʼni, naʼni itháan gujkhuʼ fe ndrígúlú (Atayáá kutriga̱ 15)

16. Xú káʼnii gándoo gúʼni itháan gujkhuʼ fe ndrígúlú ga̱jma̱a̱ Biblia rá.

16 Guʼni itháan gujkhuʼ fe ndrígúlú ga̱jma̱a̱ Biblia. Jesús ndiʼyoo májánʼ rí Biblia na̱ʼkha̱ náa Dios ga̱jma̱a̱ rí ikhí na̱ʼkha̱ xtágabu rí itháan májánʼ (Juan 17:17). Á mu nandulúʼ mbuʼyaridáá Jesús ga̱jma̱a̱ rí muguaʼdáá mbá fe gujkhuʼ, gíʼmaa muraxnuu Biblia xúgíʼ mbiʼi, muʼnigajmaa ga̱jma̱a̱ mundxaʼwamíjna̱ rí kuwáanʼ rajmañulú. Ma̱ngaa gíʼmaa mbuʼyáaʼ rí maxtiʼña̱a̱ graxe̱ rí kuaʼdáá. Mbá xkri̱da, lá natayáá gajkhun ikháánʼ rí kuwáanʼ náa iwáá mbiʼi ráʼ. Atanigajmaa̱ rí kiʼtáriyaʼ náa Biblia ga̱jma̱a̱ numuu iwáá mbiʼi, xúʼko̱ maʼni itháan gujkhuʼ fe ndrígáʼ. Lá natayáá gajkhun rí Jeobá maʼnimbánuu xúgíʼ rí nikudaminaʼ maʼni nda̱wa̱á ráʼ. Atanigajmaa̱ kiʼtáriyaʼ rí nimbánuu má, xúʼko̱ maʼni itháan gujkhuʼ fe ndrígáʼ. Lá natayáá gajkhun rí xtágabu rí na̱ʼkha̱ náa Biblia nambáyulúʼ rí mbiʼi xúgi̱ ráʼ. Atraxnuu ga̱jma̱a̱ numún a̱ngiu̱lú bi̱ nakuwa itháan májánʼ numuu rí nunimbánii xtágabu rí na̱ʼkha̱ náa Biblia, xúʼko̱ maʼni itháan gujkhuʼ fe ndrígáʼ (1 Tes. 2:13). *

17. a) Ndiéjunʼ nimbáyúu Jesús mu maʼngo̱o̱ maraʼnuu tsáʼkhá rí itháan mingíjyúuʼ rá. b) Xú káʼnii gándoo guʼyaridáá Jesús rá.

17 Gundxaʼwamíjna̱ rí Jeobá nikudaminaʼ maxnúlúʼ. Jesús nindxa̱ʼwáminaʼ rí nikudaminaʼ maxnúu Jeobá. Rúʼko̱ nimbáyúu maʼngo̱o̱ maraʼnuu tsáʼkhá rí itháan mingíjyúuʼ (Heb. 12:2). Ikhaa taniñaminaʼ majngaríga̱a̱ ga̱jma̱a̱ rí nixnároʼoo numbaaʼ (Mat. 4:8-10). Xú káʼnii  gándoo guʼyaridáá Jesús rá. Rí mundxaʼwamíjna̱ náa rí Jeobá nikudaminaʼ maxnúlúʼ. Ndiéjunʼ gándoo gambáyulú rá. Gundxaʼwamíjna̱ xú káʼnii gáʼni rí makuwáanʼ náa Ku̱ba̱ʼ mitsaan. Ma̱ndoo muʼniraʼmáʼ ga̱jma̱a̱ muʼnííʼ rí manigulúʼ muʼni ikhí. O ma̱ndoo muʼni mbá lista ndrígu̱ún xa̱bu̱ bi̱ magabiín bi̱ manigulúʼ muʼtámíjná gajmiúlú ga̱jma̱a̱ muʼnirámáʼ rí gáʼndulúʼ muʼthúún. Gundxaʼwamíjna̱ rí nikudaminaʼ maʼni Dios ma̱ngaa rí maʼnimbánuu náa ikháánʼ.

18. Ndiéjunʼ gándoo gambáyuluʼ mu muguaʼdáá itháan fe rá.

18 Gunda̱ʼa̱a̱ Jeobá rí maxnúlúʼ itháan fe. Jesús niʼsngúún xa̱bi̱i̱ rí munda̱ʼa̱a̱ Jeobá rí maxnún xi̱ʼ kaʼwu (Luc. 11:9, 13). Xi̱ʼ kaʼwu mambáyulúʼ muguaʼdáá itháan fe, numuu rí fe na̱ʼkha̱ náa xi̱ʼ kaʼwu. Ma̱ngaa ma̱ndoo munda̱ʼa̱a̱ Jeobá rí mambáyulúʼ muʼnimi̱jna̱ gajmiúlú rí naʼni makágua̱ba̱ʼ fe ndrígúlú. Mbá xkri̱da, á mu nduʼyáá rí naʼniulú mingíjyúuʼ muʼni mba̱a̱ a̱jkiu̱lú kuʼñúún eʼwíínʼ ma̱ndoo munda̱ʼa̱a̱ Jeobá rí maxnúlúʼ mbá fe gujkhuʼ ga̱jma̱a̱ rí mambáyulúʼ mu muʼni mba̱a̱ a̱jkiu̱lú.

19. Tsíin gúraʼwíin mu mambaxúlúʼ gajmiúlú rá.

19 Gambáxulúʼ gajmiúlú bi̱ guaʼdáá mbá fe gujkhuʼ. Jesús niraʼwíin ga̱jma̱a̱ tsu̱ma̱ bi̱ nimbáxu̱u̱ gajmíi̱n. Bi̱ itháan nimbáxu̱u̱ gajmíi̱n ninindxu̱ún apóstoles ndrígio̱o̱ numuu rí ninindxu̱ún jmbiin ga̱jma̱a̱ ninimbu̱ún kuyáá ikhaa (atraxnuu Juan 15:14, 15). Mangáanʼ gíʼmaa muraʼwíin bi̱ guaʼdáá mbá fe gujkhuʼ ga̱jma̱a̱ bi̱ nunimbu̱ún kuyáá Jesús mu mambaxúlú gajmiúlú. Bi̱ nambáxu̱u̱n májánʼ nutamijná mbájmbu. Á mu ndayóoʼ muxnulu mbá xtágabu, nuxnulu. Ga̱jma̱a̱ á mu ndayóoʼ muxnún xtágabu, nundrigú (Prov. 27:9).

20. Náa numuu gíʼmaa mumbañún eʼwíínʼ xa̱bu̱ mu muguaʼdáá mbá fe gujkhuʼ rá.

20 Gumbáñuun eʼwíínʼ xa̱bu̱ mu muguaʼdáá mbá fe gujkhuʼ. Jesús niʼni ma̱ngaa niʼthí mbaʼa dí maʼni itháan gujkhuʼ fe ndrígu̱ún xa̱bi̱i̱ (Mar. 11:20-24). Mangáanʼ gíʼmaa mumbañún eʼwíínʼ xa̱bu̱ mu muni itháan gujkhuʼ fe ndrígu̱ún. Xúʼko̱ ma̱ngaa maʼni itháan gujkhuʼ fe ndrígúlú (Prov. 11:25). Xú káʼnii gándoo gumbañúún eʼwíínʼ mu muguaʼdáá mbá fe gujkhuʼ rá. Índo̱ nuʼtáraʼa, ma̱ndoo muʼthúún xa̱bu̱ náa numuu eʼnimbulúʼ rí Dios xtáa, rí naxmiéjunʼ kaʼyulúʼ ga̱jma̱a̱ rí náa ikhaa e̱ʼkha̱ Biblia. Ma̱ngaa ma̱ndoo mumbáñuun a̱ngiu̱lú muguaʼdáá mbá fe gujkhuʼ. Mbá xkri̱da, á mu nuʼdxawíín rí mbáa ndxájulú naxiéʼkhá ga̱jma̱a̱ numún bi̱ kuya̱ edxu̱u̱ náa congregación, ragíʼmaa mundxaʼwamíjna̱ dí raʼkhí ga̱jma̱a̱ numuu, ma̱ngaa xúniʼñáanʼ ruʼtháán. Gíʼmaa mumbayíí mu magiʼdoo itháan fe náa Jeobá ga̱jma̱a̱ mambaxúu májánʼ gajmíi̱n a̱ngiu̱lú (Jud. 22, 23). Lá ni̱ndxa̱ʼ mbáa dxámá o dxáʼgú bi̱ najkha̱a̱ naa escuela ráʼ. Á mu bi̱ naʼsngáaʼ naʼthí ga̱jma̱a̱ numuu evolución, xámiñaʼ, atasngájma fe ndrígáʼ índo̱ gáratha rí nijmañaʼ ga̱jma̱a̱ numuu bi̱ niʼniáanʼ. Bi̱ nusngáaʼ ga̱jma̱a̱ bi̱ natanigajmaa gajmiáanʼ mbáa mudxawíín májánʼ rí gárathu̱u̱n.

21. Ndiéjunʼ gambáyulú Jeobá mámbáa rí ikháanʼ rá.

21 Xó má ndiʼyáá, Jeobá ga̱jma̱a̱ Jesús nimbayíí Pedro mu ní xámiñuu ga̱jma̱a̱ magiʼdoo mbá fe gujkhuʼ. Ga̱jma̱a̱ nda̱wa̱á, Pedro nigíʼ mbá xkri̱da májánʼ náa ikháanʼ numuu rí nigiʼdoo fe. Jeobá ma̱ngaa mambáyulúʼ mámbáa rí ikháanʼ mu muguaʼdáá mbá fe gujkhuʼ (atraxnuu 1 Pedro 5:9, 10). Maski ajndu ndayóoʼ muʼni mbá tsiakii mu muguaʼdáá mbá fe gujkhuʼ, xánindxu̱u̱ ndíí.

^ párr. 4 Colosenses 3:5-10: “Guxruigu dí na̱nda̱ʼa̱ xuyala dí rígá náa tsu̱du̱u̱ ku̱ba̱ʼ xóo rí mataba̱ʼ ga̱jma̱ʼ mbáa bi̱ xóó tséyáa, dí mitsaga wéñuʼ, dí nagua̱ʼa̱ mataba̱ʼ ga̱jma̱ʼ mbáa, dí nandaʼ matani mbá rí maʼni gawáanʼ o maʼni gawúunʼ eʼwíínʼ ga̱jma̱a̱ dí maʼndaʼ maraʼdáá wéñuʼ, xúgíʼ rúʼko̱ nindxu̱u̱ xóo matiamajkún xándú. Ga̱jma̱a̱ numuu rígi̱ Dios ma̱ʼkha̱ kayóo rí maʼnimbáti̱gi̱i̱n. Xúgi̱ kaʼnii ninila nákha ginii índo̱ kuwáanʼ ikhí. Mú rí xúgi̱ gíʼmaa matani tsíngunʼ xúgíʼ rígi̱ náa ikháánʼ: Rí nakiʼnán, rí najmanguaʼ wéñuʼ, rí matani dí ra̱májánʼ wéñuʼ, rí marata̱ wéñiʼ xa̱bu̱ ga̱jma̱a̱ marata̱ ajngáa tsaga. Xúninduwamijnála. Guniʼñáaʼ ranindxala ga̱jma̱a̱ rí enila nákha ginii, ga̱jma̱a̱ guʼgíʼ guriʼkumijná rí xú káʼnii nindxala, ga̱jma̱a̱ ku̱ma̱ nuxi̱ʼ maʼga̱ raʼni nuxi̱ʼ xó má kaʼnii nindxu̱u̱ Bi̱ phú niʼni”.

^ párr. 16 Mbá xkri̱da, atayáá sección “Biblia niriʼkhu̱u̱ rí xóo makuwá” rí na̱ʼkha̱ náa revista Bi̱ Nayejngoo.