Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo  |  Septiembre tsiguʼ 2015

Xú káʼnii esngájma rí nandulúʼ kuʼyáá Jeobá rá.

Xú káʼnii esngájma rí nandulúʼ kuʼyáá Jeobá rá.

“Ikháanʼ nandulúʼ kuʼyáá, numuu rí ikhaa nindoo kaʼyulúʼ ginii.” (1 JUAN 4:19)

AJMÚÚ 56 GA̱JMA̱A̱ 138

1, 2. Xú kaʼnii eʼsngúlúʼ Jeobá mu maʼndulú kuʼyáá xá.

MBÁA xa̱bu̱ bi̱ májánʼ a̱jkiu̱u̱n naʼsngúún e̱ji̱i̱n ga̱jma̱a̱ xkri̱da ndrígóo. Índo̱ nasngájma rí nandoo kaʼñúún, naʼsngúún rí maʼndún kuñún eʼwíínʼ. Rúʼko̱ rí naʼni Jeobá ga̱jma̱á ni̱ndxu̱lú. Nimbáa na̱nguá eyoo kaʼyulúʼ xóo ikhaa. Náa Biblia naʼthí rí “ikhaa nindoo kaʼyulúʼ ginii” (1 Juan 4:19). Índo̱ Jeobá nasngájma rí nandoo kaʼyulúʼ, naʼsngúlúʼ rí maʼndulú kuʼyáá.

2 Náa numuu rí naʼthí náa Biblia rí Jeobá nindoo kaʼyulúʼ ginii rá. Numuu rí nikuʼmaa A̱ʼdióo mu makhañúu ga̱jma̱á numulúʼ “naca xoʼ ñajunʼlu xabu” aʼkhá (Rom. 5:8). Jeobá nixnáxi̱ tsigijñaʼ rígi̱ mu maʼni káwáanʼ náa aʼkhá ga̱jma̱a̱ rí nakháñulú. Xúʼko̱ nigíʼ mbá májánʼ xkri̱da ga̱jma̱a̱ niʼsngúlúʼ maʼndulú kuʼyáá ga̱jma̱a̱ muxná rí kuaʼdáá (1 Juan 4:10). Ma̱ngaa ga̱jma̱a̱ numuu tsigijñaʼ rígi̱ ma̱ndoo musngajmáálú rí ma̱ndoo mambáxulúʼ gajmiúlú ga̱jma̱a̱ musngajmáálú rí nandulúʼ kuʼyáá.

3, 4. Xú káʼnii esngajmá rí nandulúʼ kuʼyáá Jeobá rá.

3 Rí Jeobá nandoo kaʼyulúʼ nindxu̱u̱ rí itháan gíʼdoo numuu náa ikhaa. Ikha jngó Jesús niʼthí rí xtángoo rí itháan gíʼdoo numuu nindxu̱u̱: “Gaʼne mba jañi-jayu akianʼ-xtaya Señor Diaʼ, mba  jañi-jayu nimiaʼ, mba jañi-jayu jumaʼ, jame gajma mba xugui tsiake ri xtaʼda” (Mar. 12:30). Jeobá nandoo rí maʼndulú kuʼyáá ga̱jma̱a̱ xúgíʼ a̱jkiu̱lúʼ. Ikhaa magawúunʼ á mu nandulúʼ kuʼyáá itháan imba̱a̱ á mu dí raʼkháa ikhaa. Mú, rí maʼndulú kuʼyáá Jeobá ragíʼmaa índo̱ makumulúʼ. Ikhaa nandoo rí maʼndulú kuʼyáá ga̱jma̱a̱ xúgíʼ ku̱ma̱ ndrígúlú ga̱jma̱a̱ ma̱ngaa xúgíʼ tsiakiyulú xóo muʼthá, ga̱jma̱a̱ rí nundxa̱ʼwáá edxu̱lúʼ ma̱ngaa rí nuʼnilú (atraxnuu Miqueas 6:8). *

4 Ikha jngó, gíʼmáanʼ maʼndulú kuʼyáá Jeobá ga̱jma̱a̱ xúgíʼ xóo ni̱ndxu̱lú ga̱jma̱a̱ xúgíʼ rí kuaʼdáá. Á mu gajkhun nandulúʼ kuʼyáá, ikhaa magiʼdoo itháan numuu náa vida ndrígúlú. Náa artículo rí nijngoo ndiʼyáá a̱jkhu̱ enii xú káʼnii Jeobá nasngájma rí nandoo kaʼyulúʼ. Náa artículo rígi̱ gúʼyáá xú káʼnii gaʼndulúʼ kuʼyáá itháan Jeobá ga̱jma̱a̱ xú káʼnii gándoo gusngajmáálú.

GUXNÁA NÚMA̱Aʼ

5. Índo̱ nundxa̱ʼwa̱míjna̱ náa xúgíʼ rí naxnúlú Jeobá, ndiéjunʼ eyulú muʼni rá.

5 Índo̱ mbáa naxnúlú mbá regalo, nuʼgíʼ musngajmáá rí nuxnáa núma̱aʼ. Mbá rí xóo ma̱ndoo musngajmá nindxu̱u̱ índo̱ najmulú rí nimínaʼlu. Apóstol Santiago niʼthí rí Jeobá naxnúlú mbaʼa rí májánʼ (Sant. 1:17). Jeobá naxnúlú xúgíʼ rí nda̱yúlúʼ mu makuwáanʼ ga̱jma̱a̱ gagi. Nuxnáa wéñuʼ núma̱aʼ ga̱jma̱a̱ numuu rúʼko̱. Nduʼyáá rí Jeobá ra̱ʼkhá tháán eyoo kaʼyulúʼ ga̱jma̱a̱ nandulúʼ musngajmáá rí mangáanʼ nandulúʼ kuʼyáá. Lá xúʼko̱ ku̱ma̱ʼ mangáán ráʼ.

6. Ndiéjunʼ gíʼmaa muni israelitas mu Jeobá maxnún xóó rí májánʼ rá.

6 Jeobá nixnúún mbaʼa rí májánʼ israelitas. Mba̱yu̱ʼ tsiguʼ nixnúún xúgíʼ rí nda̱ñúnʼ mu makuwá. Ma̱ngaa nixnúún xtángoo mu mbuyáá ndiéjunʼ rí gúni (Deut. 4:7, 8). Mbá xkri̱da, náa Xtángoo naʼthí rí ikhiin gíʼmaa muxnaxi̱ náa Dios mbá tsigijñaʼ “xndú rí niʼgo̱o̱ rí phú itháan májánʼ” dí rígá náa ku̱ba̱ʼ (Éx. 23:19). Á mu nandún rí Jeobá maxnún xóó rí májánʼ, gíʼdoo rí munimbu̱ún kuyáá ga̱jma̱a̱ muxnáá rí itháan májánʼ. Xúʼko̱ gusngajmáá rí nuxna̱a̱ núma̱aʼ Jeobá (atraxnuu Deuteronomio 8:10, 11). *

7. Xú káʼnii gándoo gájmulúʼ “xúgíʼ rí phú itháan májánʼ” mu musngajmáá Jeobá rí nandulúʼ kuʼyáá rá.

7 Xúgiáanʼ ma̱ndoo musngajmáá Jeobá rí nandulúʼ kuʼyáá índo̱ nuxnáá “xúgíʼ rí phú itháan májánʼ” (Prov. 3:9). Xú káʼnii gándoo gúʼni rúʼko̱ rá. Ma̱ndoo muxná mbújkha̱a̱ mu mumbañún a̱ngiu̱lú bi̱ kuwa náa nagimbáanʼ ga̱jma̱a̱ bi̱ kuwa náa xúgíʼ numbaaʼ. Maski ajndu mbaʼáanʼ rí ikháanʼ na̱nguá kuaʼdáá wéñuʼ, xúgiáanʼ ma̱ndoo majmulúʼ rí kuaʼdáá mu musngajmáá rí nandulúʼ kuʼyáá Jeobá (2 Cor. 8:12). Mú raʼkháa i̱ndió rígi̱ xóo ma̱ndoo musngajmáá. Gu’yáá i̱’wáʼ.

8, 9. a) Xú káʼnii nindxu̱u̱ imbo̱o̱ xú káʼnii gusngajmáá Jeobá rí nandulúʼ kuʼyáá xá. b) Ndiéjunʼ niʼni Mike ga̱jma̱a̱ bi̱ kuwa náa goʼwóo rá.

8 Imbo̱o̱ xóo ma̱ndoo musngajmáá Jeobá rí nandulúʼ kuʼyáá nindxu̱u̱ rí makumulúʼ kuʼyáá. Náa numuu rí nuʼthá rígi̱ rá. Garmáʼáan a̱jkiu̱lú rí Jesús niʼsngúlúʼ rí xaxmiéjunʼlú wéñuʼ rí xú káʼnii gúʼyáaʼ rí nda̱yúlúʼ, Jeobá nakudaminaʼ maxnúlúʼ rúʼko̱ á mu nuxnaxímíjná muʼni ñajunʼ (Mat. 6:31-33). Ikháanʼ nduʼyáá rí gajkhun maʼnimbánuu rí niʼthí. Gajkhun nindxu̱u̱ rígi̱, numuu rí índo̱  nandulúʼ kuʼyáá mbáa xa̱bu̱, nuʼnimbulúʼ rí naʼthí. Á mu naku̱mu̱lú kuʼyáá itháan Jeobá, itháan esngajmáá rí nandulúʼ kuʼyáá (Sal. 143:8). Ikha jngó gíʼmaa muraximíjna̱: “Lá nasngajmúu Jeobá rí nandoʼ ka̱yo̱o̱ rí xóo ejmuʼ mbiʼi ga̱jma̱a̱ tsiakii ndrígóʼ ráʼ. Lá nasngajmúu xúgíʼ mbiʼi rí nanimboʼ rí ikhaa maxnúʼ rí ndayóoʼ mu maxtáá ga̱jma̱a̱ ráʼ.”

9 Guʼyáá rí niʼni mbáa ndxájulú bi̱ nagumbiʼyuu Mike gajmíi̱n bi̱ kuwa náa goʼwóo. Asndu nákha ninindxu̱u̱ dxámá, Mike nindoo maʼga̱ i̱mba̱ xuajin mba̱a̱ mu mambáñun a̱ngiu̱lú maʼtáraʼa. Nda̱wa̱á rí ninigúnʼ ga̱jma̱a̱ nigiʼdiin a̱jmi̱i̱n e̱ji̱i̱n, ikhaa xóó nandoo maʼga̱. Mike gajmíi̱n bi̱ kuwa náa goʼwóo niraxnuu mbaʼa i̱yi̱i̱ʼ náa naʼthí ga̱jma̱a̱ numún a̱ngiu̱lú bi̱ nigún gúyambáá mutaraʼa i̱mba̱ níʼkhá. Ikha jngó niraʼwíí rí ní xáguaʼdáá wéñuʼ. Rí mbiʼi xúgi̱ ikhaa gajmíi̱n bi̱ kuwa náa goʼwóo nuni ñajunʼ Jeobá ga̱jma̱a̱ gagi náa i̱mba̱ xuajin mba̱a̱. Mike naʼthí rí nduyáá xú káʼnii embánuu ajngáa rí nikudaminaʼ Jesús rí na̱ʼkha̱ náa Mateo 6:33.

GUNDXAʼWAMÍJNA̱ GA̱JMA̱A̱ NUMUU RÍ NAʼSNGÚLÚʼ JEOBÁ

10. Náa numuu rí gíʼmaa mbuʼyaridáá David ga̱jma̱a̱ mundxaʼwami̱jna̱ rí Jeobá naʼsngúlúʼ rá.

10 Rey David naríyaʼ mbiʼi mu mandxaʼwáminaʼ ga̱jma̱a̱ numuu xtángoo ga̱jma̱a̱ xúgíʼ rí niʼni Jeobá. Ikha jngó niʼthí: “Mekhu xtáa raʼtíriyaʼ gloria ndrígóo Dios”. Ma̱ngaa, niʼthí rí “Xtángoo ndrígóo Jeobá” nindxu̱u̱ jmbu ga̱jma̱a̱ gajkhun, naxnúlú tsiakii ma̱ngaa nambáyulúʼ mu majmañulúʼ wéñuʼ. Rí mandxaʼwáminaʼ rígi̱ David niʼni masngájmuu Dios rí nandoo kaʼyoo. Ikha jngó niʼthí rí nandoo manigu̱ʼ Jeobá rí nandxa̱ʼwáminaʼ ga̱jma̱a̱ rí naʼni (Sal. 19:1, 7, 14). Xó má David, mangáanʼ gíʼmáanʼ mundxaʼwami̱jna̱ náa xúgíʼ rí niguma ga̱jma̱a̱ xúgíʼ rí Jeobá naʼsngulú náa Biblia. Xúʼko̱ gambáxulúʼ májánʼ gajmiúlú Dios ga̱jma̱a̱ musngajmáá rí nandulúʼ kuʼyáá.

11. Xú káʼnii gándoo gájmulúʼ rí niʼsngúlúʼ Jeobá mu musngajmá rí nandulúʼ kuʼyáá rá. (Atayáá timbá xtiʼkhu.)

11 Rí mbiʼi xúgi̱, Jeobá naʼsngúlúʼ mbaʼa wéñuʼ ga̱jma̱a̱ numuu, rí niʼni, rí nakudaminaʼ maʼni ga̱jma̱a̱ Biblia. Náa numbaaʼ rígi̱ naʼniún xa̱bu̱ majmañún rí nusngáa náa universidad, mú rúʼko̱ naʼni rí ní xáʼndun kuyáá Dios. Jeobá raʼkháa i̱ndó nandoo rí majmañún wéñuʼ ma̱ngaa nandoo rí muraʼwíí rí májánʼ muni. Ikhaa nandoo majmulúʼ rí naʼsngúlúʼ mu makuwáanʼ májánʼ ma̱ngaa ga̱jma̱a̱ numún eʼwíínʼ (Prov. 4:5-7). Xú káʼnii gándoo guʼni rá. Mbá nindxu̱u̱ rí mumbáñuun xa̱bu̱ “maguaʼdáá ku̱ma̱ rí gajkhun” mu ma̱ndoo makáwíin (1 Tim. 2:4). Á mu nuʼsngúún mbaʼin xa̱bu̱ xó má eʼngulú rí maʼni Xa̱bu̱ Ñajunʼ ndrígóo Dios ga̱jma̱a̱ numulúʼ,  musngajmá rí nandulúʼ kuʼyáá Jeobá ga̱jma̱a̱ xa̱bu̱ (atraxnuu Salmo 66:16, 17). *

12. Ndiéjunʼ niʼthí mbáa dxáʼgú ga̱jma̱a̱ numuu mbá regalo rí nixnúu Jeobá rá.

12 Jiáma ga̱jma̱a̱ wa̱ʼxa̱ʼ mangiin ma̱ndoo mundxaʼwamíjna̱ náa xúgíʼ rí Jeobá naxnún ga̱jma̱a̱ naʼsngúún. Mbá xkri̱da, mbáa ndxájulú bi̱ nagumbiʼyuu Shannon narmáʼáan a̱jkiu̱u̱n xú káʼnii nikumu̱u̱ náa Asamblea rí ajtsú mbiʼi “Devoción piadosa”. Ikhaa gíʼdoo 11 tsiguʼ ga̱jma̱a̱ gíʼtio̱o̱ 10. Náa asamblea nindu̱ʼu̱u̱n xúgínʼ jiáma ga̱jma̱a̱ wa̱ʼxa̱ʼ rí magún náa xílí kiejunʼ mu mutrigi̱i̱n ikhiin. Shannon nigi̱ʼi̱ ikhí. Nákha ginii namíñuu, mu nidxuu wéñuʼ índo̱ nixnúún mámbáa mbá libro Los jóvenes preguntan. Ikhaa naʼthí rí regalo rúʼko̱ niʼni mbaʼyoo rí Jeobá xtáa gajkhun, bi̱ nandoo kaʼyoo wéñuʼ. Ga̱jma̱a̱ naxnáa núma̱aʼ Dios numuu rí naxnúlú dí ra̱ʼkhá tháán mitsaan.

GUNDRÍGÚ XTÁGABU GA̱JMA̱A̱ RÍ NAXPRÍGULÚ JEOBÁ

13, 14. Xú káʼnii gíʼmaa muʼni índo̱ naxprígúlúʼ Jeobá rá.

13 Náa Biblia naʼthí rí Jeobá naxprígún xa̱bu̱ bi̱ nandoo kaʼñúún, “xóo eʼni mbáa xa̱bu̱ bi̱ nandoo kaʼyoo a̱ʼdióo” (Prov. 3:12). Xú káʼnii gíʼmaa muʼni índo̱ naxprígúlúʼ xá. Mbáa makuwáanʼ gíná ga̱jma̱a̱ makiʼnáanʼ kuʼyamijná. Mú gíʼmaa mundrígúlú má xúʼko̱ rí naxprígúlúʼ Jeobá. Xúʼko̱ gájmañulú muʼni rí májánʼ ga̱jma̱a̱ makuwáanʼ tsímáá (Heb. 12:11). Xúʼni̱ gaʼduunʼ nditháan índo̱ nuxprigúlú ga̱jma̱a̱ xakiʼnáanʼ á mu tsínigulú rí nuthulú. Á mu nuʼdxawíín Jeobá ga̱jma̱a̱ nuʼgíʼ nuriʼkhumijná, nusngajmáá rí nandulúʼ kuʼyáá.

14 Nákha nixtáa gaʼyee Malaquías, judíos kuwa ruxnaxi̱ tsigijñaʼ rí na̱nguá péñu náa Jeobá. Ikha jngó ikhaa nixprígún gakhi̱i̱ wéñuʼ (atraxnuu Malaquías 1:12, 13). * Nixprígún mbaʼa nuthu mú ikhiin túdxawíín. Nda̱wa̱á Jeobá nixnúún castigo (Mal. 2:1, 2). Ndiéjunʼ eʼsngúlúʼ rígi̱ rá. Rí á mu tseʼnimbulúʼ índo̱ naxprígúlúʼ Jeobá o nakumulúʼ dí ragíʼdoo numuu, ikhaa ní xambáxu̱u̱ ga̱jma̱á ni̱ndxu̱lú.

Gíʼmaa muʼnimbulúʼ kuʼyáá Jeobá raʼkháa xa̱bu̱ numbaaʼ(Atayáá kutriga̱ 15)

15. Ndiéjunʼ dí ragíʼmaa muʼni rá.

15 Mbaʼin wéñuʼ xa̱bu̱ náa numbaaʼ rígi̱  nunimbaʼumi̱jna̱ ga̱jma̱a̱ nundxa̱ʼwa̱míjna̱ i̱ndó ga̱jma̱a̱ numún ikhiin. Mbaʼin xa̱bu̱ tsínigu̱nʼ rí muxprigún o rí mutún ndiéjunʼ rí gíʼmaa muni. Ga̱jma̱a̱ índo̱ tikhun nundrigú xtágabu na̱nguá endrigú ga̱jma̱a̱ xúgíʼ a̱jkiu̱ún. Mú náa Biblia naʼthí rí ikháanʼ ragíʼmaa muʼni rúʼko̱. Gíʼmaa majmañulúʼ muʼni rí Jeobá eyoo ga̱jma̱a̱ muʼnimbulúʼ kuʼyáá (Rom. 12:2). Ikhaa najmuu xuajñu mu maxnúlúʼ xtágabu índo̱ ndayúlú. Mbá xkri̱da, naʼthí xú káʼnii gúʼni gajmiúlú bi̱ ni̱ndxu̱ún gu̱ʼu̱ o xa̱bekha, xú káʼnii guraʼwíin bi̱ mambáxulúʼ gajmiúlú ga̱jma̱a̱ xú káʼnii guraʼwíí májánʼ rí muʼni gagimijnáa. Índo̱ nundrígúlúʼ rí naxprígúlúʼ Jeobá ga̱jma̱a̱ nuriʼkhumijná mu xúʼko̱ maʼdxuu, nusngajmáá rí nuxnáa núma̱aʼ ga̱jma̱a̱ xtágabu ndrígóo ma̱ngaa rí nandulúʼ kuʼyáá (Juan 14:31; Rom. 6:17).

GUNDA̱ʼA̱A̱ JEOBÁ RÍ MAMBÁYULÚʼ GA̱JMA̱A̱ MAÑEUNLÚ

16, 17. a) Nákha xóó tsíraʼwíí rí muʼni, náa numuu rí gíʼmaa muʼnimi̱jna̱ mbuʼyáá rí endxa̱ʼóo edxu̱u̱ Jeobá rá. b) Ndiéjunʼ dí raʼkhí nini israelitas rá.

16 E̱ji̱n nduyáaʼ anu̱ún mu munda̱ʼa̱a̱ rí mambáñun ga̱jma̱a̱ muñewu̱u̱n. Asndu bi̱ wanuu nundu̱ʼu̱u̱n rí anu̱ún mumbañún. Náa numuu rá. Numuu rí maski ajndu ma̱ndoo muraʼwíí rí muni nduyáá rí anu̱ún ma̱ndoo maxnún májánʼ xtágabu. Ga̱jma̱a̱ xúʼko̱ má eʼni gajmiúlú Jeobá. Ikhaa naniñulú muraʼwíí rí muʼni. Mú numuu rí naku̱mu̱lú kuʼyáá ikhaa ga̱jma̱a̱ nandulúʼ kuʼyáá, nunda̱ʼa̱a̱ má xúʼko̱ rí mambáyulúʼ. Ga̱jma̱a̱ nákha xóó tsíraʼwíí rí muʼni, nuʼnimi̱jna̱ mbuʼyáá xóo endxa̱ʼóo edxu̱u̱ ikhaa. Índo̱ nunda̱ʼa̱a̱ Jeobá rí mambáyulúʼ, ikhaa naxnúlú xi̱ʼ ndrígóo mu mambáyulúʼ muʼni rí nindxu̱u̱ májánʼ (Filip. 2:13).

17 Nákha mbiʼi rí nixtáa Samuel, israelitas nánguá eʼngu̱u̱n guxmijná gajmiún filisteos. Ikhiin takumu̱ún kuyáá Jeobá ga̱jma̱a̱ túraxi̱i̱ ndiéjunʼ gándoo muni, ikhiin nigún ku̱ñu̱u̱n e̱jna̱ rí nimbánuu náa nuxmijná. Nindxa̱ʼwa̱míjna̱ rí xúʼko̱ Jeobá mambáñun mu maʼngu̱u̱n. Mú na̱nguá ninimi̱jna̱ mbuyáá xú káʼnii nindxa̱ʼóo edxu̱u̱ ikhaa. I̱ndó nini rí ikhiin nikumu̱ún rí nindxu̱u̱ májánʼ. Ndiéjunʼ niguaʼnii xá. Nikháñun mbá 30,000 soldados israelitas. Rí itháan raʼkhí rí filisteos niguanún ga̱jma̱a̱ e̱jna̱ (1 Sam. 4:2-4, 10, 11; atraxnuu Proverbios 14:12). *

18. Xó má e̱ʼkha̱ raʼthí náa Salmo 42:5, 6 ga̱jma̱a̱ Proverbios 3:5, 6, ndiéjunʼ gíʼmaa muʼni rá.

18 Mbáa xa̱bu̱ bi̱ nindoo kaʼyoo Jeobá niʼnirámáʼ rí índo̱ gíʼdoo mbá xkujndu rí mingíjyúuʼ, ndaʼyoo rí Dios mambáyúu ga̱jma̱a̱ maʼnikríyaʼ (Sal. 42:5, 6). Lá xúʼko̱ ku̱ma̱ʼ mangáán ráʼ. Mbáa ikháánʼ naku̱ma̱ʼ má xtayáá Jeobá. Maski ajndu xúʼko̱, xúgiáanʼ ma̱ndoo majmañulúʼ makumulúʼ kuʼyáá itháan ikhaa. Náa Biblia naʼthí: “Ga̱ku̱ma̱ʼ xtayáá Jeobá ga̱jma̱a̱ xúgíʼ a̱jkia̱nʼ, xáku̱ma̱ʼ i̱ndó dí na̱ʼkha̱ náa edxa̱ʼ ikháánʼ. Xúgíʼ dí gátani garmáʼáan a̱jkia̱nʼ gáʼni Jeobá, ikhaa má gáʼni jmbu ka̱mba̱a̱ʼ” (Prov. 3:5, 6).

19. Xú káʼnii gátasngajmáá Jeobá rí nandaʼ xtayáá rá.

19 Xó má ndiʼyáá Jeobá nindoo kaʼyulúʼ ginii. Xúʼko̱ niʼsngúlúʼ maʼndulú kuʼyáá ikhaa. Gíʼmaa mundxaʼwamíjna̱ má xúʼko̱ náa xúgíʼ rí niʼni ga̱jma̱a̱ numulúʼ ga̱jma̱a̱ dí ra̱ʼkhá tháán eyoo kaʼyulúʼ. Gusngajmáálu rí nandulúʼ kuʼyáá ga̱jma̱a̱ xúgíʼ a̱jkiu̱lú, edxu̱lúʼ ga̱jma̱a̱ tsiakii ndrígúlú (Mar. 12:30).

[Mbaʼa nota]

^ párr. 3 Miqueas 6:8: “Ikhaa niʼtháanʼ, oh xa̱biya̱, rí ñajunʼ májánʼ. Ndiéjunʼ enda̱ʼa̱ʼ Jeobá rí matani ikháánʼ rá. ¡I̱ndó matani rí jmbu, rí nditháan xátatsiʼñáʼ ga̱jma̱a̱ gani̱ndxa̱ʼ xa̱bu̱ gua̱ba̱ʼ índo̱ gajngruigaʼ ga̱jma̱ʼ Dios!”

^ párr. 6 Deuteronomio 8:10, 11: “Índo̱ gámbáʼ ratatsiʼtsu ga̱jma̱a̱ índo̱ nigiʼmaʼ, gíʼmaa matani mba̱a̱ Jeobá Dios ndrígáʼ ga̱jma̱a̱ numuu rí nixnáʼ mbá ku̱ba̱ʼ májánʼ. Atiewumínaʼ rí xágumaaʼ xtayáá Jeobá Dios ndrígáʼ índo̱ xátanimbánii rí niʼtáñajunʼ, ga̱jma̱a̱ rí naʼthí marigá ga̱jma̱a̱ xtángoo rí ikhúúnʼ naxnaʼ xúgi̱”.

^ párr. 11 Salmo 66:16, 17: “Gaguwaʼ, gudxawíín, xúgiáanʼ ikháanʼ bi̱ namíñalaʼ ku̱ya̱a̱ Dios, ga̱jma̱a̱ ikhúúnʼ matala rí niʼni ga̱jma̱á ni̱ndxu̱ʼ. Ikhúúnʼ nindxa̱ʼo̱o̱ ga̱jma̱a̱ rawunʼ, ma̱ngaa nini mba̱a̱ ga̱jma̱a̱ rajunʼ”.

^ párr. 14 Malaquías 1:12, 13: “Mú ikháanʼ tséyamajkuʼ índo̱ nutala: ‹Mesa ndrígóo Jeobá nindxu̱u̱ mbá rí nichúu, ga̱jma̱a̱ xndú taun ma̱ngaa ganitsu nindxu̱u̱ mbá rí maguiyaaʼ xtayáá›. Ga̱jma̱a̱ nithi: ‹¡Atayáá! ¡phú neʼngulú!›, ga̱jma̱a̱ tséyamajkuíí,” niʼthí Jeobá bi̱ gíʼdiin mbaʼin ejército. “Ga̱jma̱a̱ naguwáʼ kudiin xujkhúʼ bi̱ niguma kuʼwíinʼ, gúʼxúʼ ga̱jma̱a̱ bi̱ guáʼdáá nandii; xúʼko̱, ¡ikháanʼ niguwáʼ kudiin mu muxnuʼ xóo regalo! Lá maʼdxuʼ rí magruígú náa ñawánla ráʼ.” Niʼthí Jeobá”.

^ párr. 17 Proverbios 14:12: “Rígá mbá kamba̱a̱ rí xa̱bu̱ ndaʼyoo rí nindxu̱u̱ jmbu, mú nda̱wa̱á na̱jkha̱ kayáa makhañúu”.