Atambaʼtaa mu matraxnuu

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

Atraʼwíí ajngáa me̱ʼpha̱a̱

 RÍ KAYÁ EDXU̱U̱ NÁA INUU I̱YI̱I̱ʼ | BI̱ NUTARAʼA NUMUU JEOBÁ. TSÍIN NI̱NDXU̱ÚN

Tsíin ni̱ndxu̱ún bi̱ nutaraʼa numuu Jeobá rá.

Tsíin ni̱ndxu̱ún bi̱ nutaraʼa numuu Jeobá rá.

“Naʼni tsiguʼ rí naniʼnííʼ Mike. Ikhaa nindxu̱u̱ bi̱ naʼtáraʼa numuu Jeobá ga̱jma̱a̱ religión ndrígóo naʼni maxkájkiunʼ. Tsáa nindxu̱u̱ Jeobá rá. Náa numuu rí ikhiin tseni ndxa̱a̱ xá. Naxmiéjunʼ rí Mike xtáa náa mbá secta.” (Becky, náa California, Estados Unidos)

“Xa̱bu̱ bi̱ kuwa mijngii náa xtáá nigi̱ʼdi̱i̱ ninigajmaa Biblia gajmiún bi̱ nutaraʼa numuu Jeobá ga̱jma̱a̱ nindxa̱ʼwa̱mínáʼ: ¡Tséʼgui̱i̱ mbiʼyuu religión rúʼko̱! Ndiéjunʼ eyoo gáʼthúu̱n rá.” (Zenon, náa Ontario, Canadá)

“Ikhúúnʼ ga̱jmu̱ʼ a̱ʼgiu̱ʼ nikumuxu rí bi̱ nutaraʼa numuu Jeobá naguwáʼ gúyuxu numuu rí kuaʼdáá aʼkhúxu rí tséjkua̱xu náa mbá guʼwá ndxajkun. Mú nindxa̱ʼwa̱míjna̱xu rí á mu tséxkamaaxu rí eʼyááʼ náa religión rí phú ikhaa, xuxkamaaxu náa secta rí tséʼgui̱i̱ ndrígu̱ún bi̱ nutaraʼa numuu Jeobá.” (Kent, náa Washington, Estados Unidos)

“Rí phú gajkhun, na̱nguá e̱yo̱o̱ tsíin ni̱ndxu̱ún o dí enimbu̱ún.” (Cecilie, náa Esbjerg, Dinamarca)

Mbáa natañún rí nutaraʼa náa mámbá guʼwá, náa kamba̱a̱, nuxnaraʼa i̱yi̱i̱ʼ rí nagájnuu náa Biblia ga̱jma̱a̱ rí nusngáa ga̱jma̱a̱ numuu Biblia rí asndu tsíruma. Mbáa revista rí jchá nixnáʼ mbáa rí ikhiin. Mbáa ikháá má tatsaʼwá edxa̱ʼ mangáán xó má xa̱bu̱ bi̱ niʼthá nákha ginii ga̱jma̱a̱ natraximínáʼ tsíin phú ni̱ndxu̱ún bi̱ nutaraʼa numuu Jeobá.

Á mu xtaʼdáá graxe̱ o naxmiéjuanʼ ga̱jma̱a̱ numún bi̱ nutaraʼa numuu Jeobá, ndiéjunʼ gándoo gátani rá. Náa gándoo gáta̱ya̱a̱ rí enimbu̱ún, xú káʼnii eni numáá ñajunʼ ndrígu̱ún o náa nagimbíi̱n xá. Ga̱jma̱a̱ náa numuu rí nagún guʼwáaʼ o nutha̱nʼ náa kamba̱a̱ xá.

Cecilie, bi̱ niʼthá ga̱jma̱a̱ numuu, naʼthí: “Mbaʼa rí nigúxnuu náa Internet ga̱jma̱a̱ numún bi̱ nutaraʼa numuu Jeobá. Nidxawun rí tikhun xa̱bu̱ nuta numún ga̱jma̱a̱ nidxuun mbaʼa ku̱ma̱ rí niʼniuʼ mandxa̱ʼwa̱mínáʼ raʼkhí ga̱jma̱a̱ numún”. Mú índo̱ niʼtamíjná gajmíi̱n bi̱ nutaraʼa numuu Jeobá, ikhú nijuixtiʼña̱a̱ graxe̱ ndrígóo.

Á mu nandaʼ ma̱ta̱ya̱a̱ itháan ga̱jma̱a̱ numún bi̱ nutaraʼa numuu Jeobá, náa numuu rí tsétraxu̱u̱n ikhiin xá. Ikhiin nuni revista rígi̱ ga̱jma̱a̱ ma̱ndoo muriʼña̱a̱ májánʼ graxe̱ ndrígáʼ (Proverbios 14:15). Muguaʼthi̱i̱nxu rí artículo rí na̱ʼkha̱ nda̱wa̱á mambáyaʼ ma̱ta̱ya̱a̱ tsíin ni̱ndxu̱ún, ndiéjunʼ enimbu̱ún ga̱jma̱a̱ káʼnii enii.