Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo  |  Septiembre tsiguʼ 2015

Gundxaʼwamíjna̱ májánʼ xóo Cristo

Gundxaʼwamíjna̱ májánʼ xóo Cristo

“Manindxulú mbáa xa̱bu̱ bi̱ nandxaʼóo májánʼ edxu̱u̱, mu xúʼko̱ manindxulú xóo Cristo.” (EFESIOS 4:13)

AJMÚÚ 69 GA̱JMA̱A̱ 70

1, 2. Ndiéjunʼ eyulú xúgiáanʼ bi̱ nuʼni ñajunʼ Jeobá rá. Atagíʼ mbá xkri̱da.

ÍNDO̱ na̱jkua̱ xuá gúʼtsi xndú taun, ndiéjunʼ eʼyáá rá. Nduʼyáá á mu na̱nguá minumuu wéñuʼ. Mú ma̱ngaa nduʼyáá á mu májánʼ mu̱ʼphu̱. Nduʼyáá rí itháan májánʼ mu̱ʼphu̱lúʼ rí niʼgo̱o̱.

2 Índo̱ najmañulúʼ ga̱jma̱a̱ numuu Jeobá ga̱jma̱a̱ najngúlú iyááʼ, mangáanʼ nandulúʼ manindxu̱lúʼ cristiano bi̱ nandxa̱ʼóo májánʼ edxu̱u̱. Nandoo gáʼthúu̱n rí manindxu̱lúʼ xa̱bu̱ májáánʼ ga̱jma̱a̱ mambaxúlúʼ itháan májánʼ gajmiúlú Jeobá. Apóstol Pablo niʼthún cristianos náa xuajen Éfeso rí á mu nandún makuwá kambáxu̱u̱n ga̱jma̱a̱ najmañún má xúʼko̱ ga̱jma̱a̱ numuu Jesús, mani̱ndxu̱ún cristianos bi̱ nundxa̱ʼwa̱a̱ májánʼ edxu̱ún xóo Cristo (Efes. 4:13).

3. Xú káʼnii embánii congregación ndrígóo Éfeso náa mbaʼa congregación rí mbiʼi xúgi̱ rá.

3 Índo̱ Pablo niʼnirámáʼ náa congregación ndrígóo Éfeso, ikhí kuwa mbaʼin cristianos bi̱ nundxa̱ʼwa̱a̱ májánʼ edxu̱ún ga̱jma̱a̱ najmañún wéñuʼ. Mú ma̱ngaa nikuwa cristianos bi̱ ndiyóoʼ xóó mambaxúún májánʼ gajmiún Dios. Rúʼko̱ erígá náa mbaʼa congregación rí mbiʼi xúgi̱. Mbaʼin a̱ngiu̱lú nuni ñajunʼ Jeobá mba̱yu̱ʼ tsiguʼ.  Mú eʼwíínʼ xóó na̱nguá endxa̱ʼwa̱a̱ májánʼ edxu̱ún. Náa rí ikhiin kandawinʼ mbaʼin wéñuʼ a̱ngiu̱lú bi̱ najngún iyááʼ mámbá tsiguʼ. Xúgínʼ ikhiin nda̱ñúnʼ munimi̱jna̱ mani̱ndxu̱ún cristianos bi̱ nundxa̱ʼwa̱míjna̱ májánʼ. Ikháánʼ rá. Lá ni̱ndxa̱ʼ mbáa cristiano bi̱ nandxa̱ʼóo májánʼ edxu̱u̱ ráʼ. (Col. 2:6, 7.)

XÚ KÁʼNII ESNGAJMÁ RÍ NINDXULÚ CRISTIANO BI̱ NANDXA̱ʼÓO MÁJÁNʼ EDXU̱U̱ RÁ.

4, 5. a) Lá mbeʼthín ni̱ndxu̱ún xúgínʼ cristianos bi̱ nundxa̱ʼwa̱a̱ májánʼ edxu̱ún rá. b) Ndiéjunʼ rí nasngájma náa xúgínʼ cristianos rí nundxa̱ʼwa̱a̱ májánʼ edxu̱ún rá. (Atayáá timbá xtiʼkhu.)

4 Raʼkháa xúgíʼ xndú taun rí niʼgo̱o̱ mbeʼthín. Ma̱ndoo maʼni mixtiʼkhu rí mba̱ʼu̱ ga̱jma̱a̱ xú káʼnii jnii, mú nakujmaa rí niʼgo̱o̱ numuu dí rígá rí nambánii ga̱jma̱a̱. Xúʼko̱ má ma̱ngaa erígá náa cristianos bi̱ nundxa̱ʼwa̱a̱ májánʼ edxu̱ún. Raʼkháa xúgínʼ mbeʼthín. Ma̱ndoo maʼni mixtiʼkhu tsiguúnʼ, xú káʼnii kuwa ga̱jma̱a̱ rí nanigu̱nʼ muni, mú nakujmaa rí xúgínʼ ñajúnʼ cristianos bi̱ nundxa̱ʼwa̱a̱ májánʼ edxu̱ún numuu dí rígá rí nasngájma rí xúʼko̱ ni̱ndxu̱ún. Xú káʼnii nindxu̱u̱ tikhuu rá.

5 Cristianos bi̱ nundxa̱ʼwa̱a̱ májánʼ edxu̱ún nduyaridáá tsu̱ma̱ xkri̱da ndrígóo Jesús (1 Ped. 2:21). Ikhaa niʼthí rí gíʼmaa maʼndulú kuʼyáá Jeobá ga̱jma̱a̱ xúgíʼ a̱jkiu̱lú, xúgíʼ nimiulú ga̱jma̱a̱ xúgíʼ ku̱ma̱ ndrígúlú. Ma̱ngaa niʼthí rí gíʼmaa maʼndulú kuʼñúún eʼwíínʼ xó má eyulú kuʼyamijná ikháanʼ (Mat. 22:37-39). Cristianos bi̱ nundxa̱ʼwa̱a̱ májánʼ edxu̱ún nunimi̱jna̱ mu munimbu̱ún rí kiʼtáñajunʼ. Nusngajma xóo ekuwa rí itháan gíʼdoo numuu náa ikhiin rí mambaxúún gajmiún Jeobá ga̱jma̱a̱ maʼndún kuñún eʼwíínʼ.

A̱ngiu̱lú wanii ma̱ndoo musngajma rí ni̱ndxu̱ún xa̱bu̱ gua̱bi̱nʼ xóo Jesús índo̱ numbañún a̱ngiu̱lú bi̱ xóó jiáma bi̱ xúgi̱ guáʼdáá itháan ñajunʼ náa congregación (Atayáá kutriga̱ 6)

6, 7. a) Cristianos bi̱ nundxa̱ʼwa̱a̱ májánʼ edxu̱ún nandún kuyamijná, mú ndiéjunʼ i̱ʼwáʼ rí nusngajma xá. b) Ndiéjunʼ gíʼmaa muraximíjna̱lú rá.

6 Cristianos bi̱ nundxa̱ʼwa̱a̱ májánʼ edxu̱ún nandún kuyamijná, mú ndiéjunʼ i̱ʼwáʼ rí nusngajma xá. (Gál. 5:22, 23.) Míjínʼ xa̱bu̱ ni̱ndxu̱ún, tséyáaʼ xkujndu ga̱jma̱a̱ naʼngo̱o̱ a̱jkiu̱ún. Naʼngu̱u̱n nuraʼníí xkujndu ga̱jma̱a̱ índo̱ mbáa naʼni nduwiinʼ tsekuwa gíná wéñuʼ. Índo̱ nunigajmaa Biblia, nduyáaʼ xtágabu rí ma̱ndoo mambáñun mbuyáá rí májánʼ ga̱jma̱a̱ dí ra̱májánʼ, ga̱jma̱a̱ nda̱wa̱á nugími̱jna̱ muraʼwíí muni rí májánʼ. Ni̱ndxu̱ún xa̱bu̱ gua̱bi̱nʼ ga̱jma̱a̱ nduyáá rí itháan májánʼ munimbaníí xtágabu ga̱jma̱a̱ xtángoo ndrígóo Jeobá. * Ma̱ngaa nutaraʼa ga̱jma̱a̱ gagi ma̱ngaa nuni xúgíʼ xó má eʼngu̱u̱n mu makuwá mbá kambáxu̱u̱n náa congregación.

7 Tséʼniuu má nguáthá tsiguʼ e̱ʼni̱ ñajunʼ Jeobá, xúgiáanʼ ndayóoʼ muraximijnalú: “Ndiéjunʼ gíʼmaa mani mu mani̱ndxu̱ʼ xóo Jesús rá.” Guʼyáá ajtsú enii rí mambáyulúʼ mundxa̱ʼwa̱a̱ májánʼ edxu̱lúʼ xó má Cristo.

GUʼNIGAJMAA MÁJÁNʼ BIBLIA

8. Xú eʼyáá rí Jesús naninuʼ ga̱jma̱a̱ nakro̱ʼo̱o̱ májánʼ rí naʼthí náa Escrituras rá.

8 Jesucristo nininuʼ ga̱jma̱a̱ nikro̱ʼo̱o̱ májánʼ Escrituras. Mbá xkri̱da, índo̱ gíʼdoo 12 tsiguʼ ikhaa niguanúu náa templo mu maʼtamíjná gajmíi̱n bi̱ nusngáa rí naʼthí náa Escrituras. Xúgínʼ bi̱ nidxawíín niguanún tsiánguá (Luc. 2:46, 47). Ga̱jma̱a̱ tsiguʼ nda̱wa̱á ra̱ʼkhá tháán májánʼ nijmuu Escrituras rí asndu bi̱ tsíñún gúyáá nánguá ndiyáá rí muriʼña̱a̱ (Mat. 22:41-46).

9. a) Á mu nandulúʼ manindxu̱lúʼ cristiano bi̱ nandxa̱ʼóo májánʼ edxu̱u̱, xú káʼnii awan gíʼmaa muríyaʼ mu muʼnigajmaa rá. b) Índo̱ nuʼnigajmaa Biblia ndiéjunʼ gíʼmaa muʼni rá.

9 Á mu nandulúʼ manindxu̱lúʼ cristianos bi̱ nandxa̱ʼóo májánʼ edxu̱u̱ ndayóoʼ muʼni xó má niʼni Jesús. Ragíʼmaa muniʼnuʼ wáa kayuʼ rí naʼsngáa náa Biblia. Ndayóoʼ rí muʼnigajmaa itháan kudun Biblia, numuu rí nduʼyáá rí  “ganitsu gujkhuʼ kaʼñúún xa̱bu̱ wanuu” (Heb. 5:14). Ndayóoʼ mbá ‹ku̱ma̱ káxi̱› ndrígóo Biblia (Efes. 4:13). Mu maʼngo̱o̱ muʼni rígi̱, gíʼmaa muríyaʼ májánʼ awan mu muʼnigajmaa. Nandoo gáʼthúu̱n rí muʼnigajmaa Biblia xúgíʼ mbiʼi ga̱jma̱a̱ muʼnigajmaa ndajkuáanʼ ma̱ngaa mbá guʼwáanʼ mámbá xmáná. Índo̱ nuʼnigajmaa Biblia, gíʼmaa muʼgíʼ majmañulúʼ xú káʼnii endxa̱ʼwáminaʼ Jeobá ga̱jma̱a̱ ndiéjunʼ rí naku̱mu̱u̱, ga̱jma̱a̱ nda̱wa̱á majmulúʼ rígi̱ mu muraʼwíí májánʼ rí muʼni. Á mu nuʼni xúʼko̱, mambaxúlúʼ itháan májánʼ gajmiúlú Jeobá.

10. Xú káʼnii esngajma cristianos bi̱ nundxa̱ʼwa̱a̱ májánʼ edxu̱ún rí nandún kuyáá wéñuʼ rí naʼtáñajunʼ ga̱jma̱a̱ xtágabu ndrígóo Dios rá.

10 Raʼkháa i̱ndó nduyáá rí naʼthí naa Biblia, cristianos bi̱ nundxa̱ʼwa̱a̱ májánʼ edxu̱ún ma̱ngaa nandún kuyáá wéñuʼ rí naʼtáñajunʼ ga̱jma̱a̱ xtágabu ndrígóo Dios. Xú káʼnii esngajma xá. Nuxnaximi̱jna̱ muni rí nandoo Dios, maski ajndu mbaʼyóoʼ makuwíin i̱mba̱ núthu xóo eguʼún ekúwi̱i̱n, rí nundxa̱ʼwa̱míjna̱ ga̱jma̱a̱ rí nuni. Ikhiin nduyaridáá xkri̱da ndrígóo Jesús ga̱jma̱a̱ nuriʼkhu̱u̱ xóo ni̱ndxu̱ún mu muni rí jmbu (atraxnuu Efesios 4:22-24). * Garmáʼáan a̱jkiu̱lú rí Dios nijmuu xi̱ʼ kaʼwu ndrígóo mu maxná ikhúún xa̱bu̱ bi̱ niniraʼmáʼ Biblia. Ikha jngó índo̱ mbáa cristiano naʼnigajmaa Biblia, xi̱ʼ kaʼwu nambáyúu mu magiʼdoo itháan ku̱ma̱  ga̱jma̱a̱ rí maʼndoo kaʼñúún itháan eʼwíínʼ, ma̱ngaa rí mambaxúu itháan májánʼ ga̱jma̱a̱ Jeobá.

GUYAMBÁÁ MU MAMBÁXULÚʼ XÚGIÁANʼ NÁA CONGREGACIÓN

11. Índo̱ Jesús nixtáa náa tsu̱du̱u̱ Ku̱ba̱ʼ, xú káʼniún xa̱bu̱ rá.

11 Índo̱ Jesús nixtáa náa tsu̱du̱u̱ Ku̱ba̱ʼ ninindxu̱u̱ mbáa xa̱bu̱ jmbii. Mú anu̱u̱ ga̱jma̱a̱ ru̱dúu̱, a̱ngui̱i̱n ga̱jma̱a̱ eʼwíínʼ xa̱bu̱ ninindxu̱ún xa̱bu̱ aʼkhá. Asndu xa̱bi̱i̱ nguáná ninimbaʼumíjna̱ ga̱jma̱a̱ nindxa̱ʼwa̱míjna̱ i̱ndó ga̱jma̱a̱ numún ikhiin. Mbá xkri̱da, mbruʼun rí makhañúu Jesús nigiʼdu̱u̱n mu mbuyáá tsáa gíʼdoo itháan numuu (Luc. 22:24). Maski ajndu xúʼko̱, Jesús ndiʼyoo rí ikhiin mundxaʼwamíjna̱ májánʼ ga̱jma̱a̱ makuwá mbá kambáxu̱u̱n náa congregación. Ikha jngó, mbruʼun má rúʼko̱ nindo̱ʼo̱o̱ Jeobá rí mambáñún xa̱bi̱i̱ mu makuwá mbá kambáxu̱u̱n xó má ikhiin. Niʼthúu̱n: “Ikajngo mbo ri ganindxun, xoma ri mbo ri ñajuanʼloʼ manganlo” (Juan 17:21, 22).

12, 13. a) Ndiéjunʼ rí gíʼmaa muʼgíʼ muʼni xúgiáanʼ rá. b) Xú káʼnii nijmañuu mbáa ndxájulú mayambáá náa congregación mu makuwá mbá kambáxu̱u̱n xá.

12 Cristianos bi̱ nundxa̱ʼwa̱a̱ májánʼ edxu̱ún nunimi̱jna̱ mu makuwíin mbá kambáxu̱u̱n náa congregación (atraxnuu Efesios 4:1-6, 15, 16). Xúgiáanʼ gíʼmaa muʼgíʼ muñajunʼ gajmiúlú a̱ngiu̱lú mbá kambáxulú ga̱jma̱a̱ tsímáá. Mu maʼngulú muʼni rígi̱, ndayóoʼ manindxu̱lúʼ xa̱bu̱ gua̱ba̱ʼ. Mbá xkri̱da, á mu mbáa ndxájulú nakiéʼkúun o naʼni gawúnlú, xóo gundxaʼwamíjna̱ rá. Lá nuniʼñáanʼ ruʼtháán xáʼ. O nuʼnimi̱jna̱ muʼni mba̱a̱ a̱jkiu̱lú dxe̱ʼ. Á mu ni̱ndxu̱lú mbáa cristiano bi̱ nandxa̱ʼwáminaʼ májánʼ, muʼgíʼ muʼnimbánii xkujndu ki xóo rí muʼni̱i̱ itháan mba̱a̱.

13 Atatsaʼwáminaʼ náa xkri̱da ndrígóo mbáa ndxájulú bi̱ nagumbiʼyuu Uwe. Ikhaa nakiʼnáa wéñuʼ índo̱ a̱ngiu̱lú nakiéʼkhún. Mú mbá mbiʼi nigíʼ maʼnigajmaa xú káʼnii nixtáa David, nijmuu Biblia ga̱jma̱a̱ libro Perspicacia. Náa numuu rí David rá. Numuu rí ma̱ngaa nigiʼdoo xkujndu gajmíi̱n eʼwíínʼ xa̱bi̱i̱ Dios. Mbá xkri̱da, rey Saúl nigíiʼ maxíyáa. Imbo̱o̱ miʼtsu, tikhun israelitas nindúún muxiyáa ga̱jma̱a̱ itsí. Ga̱jma̱a̱ mbá mbiʼi asndu a̱ʼgiu̱u̱ ninduʼwájmaa (1 Sam. 19:9-11; 30:1-6; 2 Sam. 6:14-22). Maski ajndu xúgíʼ rí nigíʼnuu, David nindoo kaʼyoo má xúʼko̱ Jeobá ga̱jma̱a̱ nikumu̱u̱ kaʼyoo ikhaa. Ma̱ngaa nigáwínʼ a̱jkiu̱u̱n kaʼñúnʼ wéñuʼ eʼwíínʼ xa̱bu̱. Rí niʼnigajmaa̱ Uwe, nimbáyúu mbaʼyoo rí ndayóoʼ mbaʼyáridoo David ga̱jma̱a̱ mariʼkhu̱u̱ xóo endxa̱ʼwáminaʼ ga̱jma̱a̱ numuu rí nakiéʼkún a̱ngiu̱lú. Ma̱ngaa nikro̱ʼo̱o̱ rí ndayóoʼ majmañuu maʼni mba̱a̱ a̱jkiu̱u̱n kaʼñúún a̱ngiu̱lú ga̱jma̱a̱ mayambáá mu makuwá mbá kambáxu̱u̱n náa congregación. Lá ragájkhun rí xúgiáanʼ gíʼmáanʼ mbuʼyaridáá ndxájulú bugi̱ ráʼ.

GAMBÁXULÚʼ GAJMIÚLÚ BI̱ NI̱NDXU̱ÚN JMBIIN NÁA JEOBÁ

14. Tsíin niraʼwíin Jesús mu mambaxúu gajmíi̱n xá.

14 Jesucristo ninindxu̱u̱ májáánʼ xa̱bu̱ gajmíi̱n xúgínʼ. Niʼngo̱o̱ niʼni rí xúgínʼ maʼndún mambaxúún gajmiún ikhaa, tséʼniuu á mu ni̱ndxu̱ún xa̱bekha o gu̱ʼu̱, e̱ji̱n o xa̱bu̱ wanii. Maski ajndu xúʼko̱ ikhaa tambáxu̱u̱ ga̱jma̱a̱ asndu tsáa. Mbá miʼtsú ikhaa niʼthún xa̱bi̱i̱: “Ikanʼla ñajuanʼla migüiʼ, xi tsitsiji runila ri natañajuanʼla” (Juan 15:14). Jesús niraʼwíin bi̱ mambaxúu gajmíi̱n i̱ndó bi̱ nandún kuyáá ikhaa ga̱jma̱a̱ Jeobá, bi̱ ni̱ndxu̱ún jmbiin. Gíʼdoo wéñuʼ numuu rí mangáanʼ muraʼwíin i̱ndó bi̱ phú nandún kuyáá Jeobá xóo bi̱ mambaxúlúʼ gajmiúlú. Náa numuu rá.

15. Náa numuu rí májánʼ rí jiáma ga̱jma̱a̱ wa̱ʼxa̱ʼ mambaxúún gajmiún cristianos bi̱ nundxa̱ʼwa̱a̱ májánʼ edxu̱ún rá.

15 Xndú taun naʼgo̱o̱ itháan májánʼ índo̱  naʼni mijkha. Rí nandulúʼ kuʼyamijná náa congregación nindxu̱u̱ xóo mijkha rúʼko̱. Náa numuu rá. Numuu rí nambáyulúʼ manindxu̱lúʼ cristiano bi̱ nandxa̱ʼóo májánʼ edxu̱u̱. Mbá xkri̱da, á mu ni̱ndxa̱ʼ mbáa dxámá o dxáʼgú, lá natayáá má rí gátani ga̱jma̱a̱ vida ndrígáʼ ráʼ. Á mu nandaʼ matraʼwíí matani rí májánʼ, atayáaʼ matambaxáʼ gajmiáanʼ a̱ngiu̱lú bi̱ niʼníí kuwa runi ñajunʼ Jeobá ga̱jma̱a̱ nuyambáá mu makuwa mbá kambáxu̱u̱n náa congregación. Ikhiin niraʼníí mbaʼa enii xkujndu ga̱jma̱a̱ mumbayáaʼ matraʼwíí xú gáraxtaa itháan májánʼ. Á mu natríyaʼ mbiʼi mu matambaxáʼ gajmiáanʼ, mumbayáaʼ matraʼwíí matani rí májánʼ ga̱jma̱a̱ manindxa̱ʼ mbáa cristiano bi̱ nandxa̱ʼóo májánʼ edxu̱u̱ (atraxnuu Hebreos 5:14).

16. Xú káʼnii nimbayíí Helga a̱ngiu̱lú wanii nákha dxáʼgú xá.

16 Mbáa xa̱bi̱i̱ Jeobá bi̱ mbiʼyuu Helga narmáʼáan a̱jkiu̱u̱n rí índo̱ inuu mambóo escuela, mbaʼin bi̱ nagún náa escuela nuthi ga̱jma̱a̱ numuu metas ndrígu̱ún. Mbaʼin nuthi rí nandún magún náa universidad ga̱jma̱a̱ munigajmaa mbá carrera májánʼ. Mú Helga nigíminaʼ mandu̱ʼu̱u̱n xtágabu a̱ngiu̱lú bi̱ nundxa̱ʼwa̱a̱ májánʼ edxu̱ún náa congregación. Mbaʼin itháan wanuu ki xóo ikhaa. Helga naʼthí rí nimbayíí wéñuʼ ga̱jma̱a̱ nixnáá tsiakii mu maʼni káxi̱ ñajunʼ Dios. Ga̱jma̱a̱ numuu xtágabu rúʼko̱ ninindxu̱u̱ precursora mbá witsu tsiguʼ. Ninújngoo má mba̱yu̱ʼ tsiguʼ asndu nákha ikhú, mú Helga tségawiinʼ a̱jkiu̱u̱n rí nákhi dxáʼgú niʼni ñajunʼ Jeobá.

17, 18. Á mu nandulúʼ muʼni ñajunʼ Jeobá, ndiéjunʼ gíʼmáanʼ muʼni rá.

17 Á mu nduʼyaridáá Jesús, manindxu̱lúʼ mbáa cristiano bi̱ nandxa̱ʼóo májánʼ edxu̱u̱. Ma̱ngaa mambáxulúʼ itháan májánʼ gajmiúlú Jeobá ga̱jma̱a̱ rígi̱ maxkaxáanʼ muʼni ñajunʼ. Xúʼko̱ ma̱ndoo muʼni itháan ñajunʼ Jeobá. Jesús niʼthún xa̱bi̱i̱: “Xkuaʼni gambiʼi aguaʼla naʼ inu xabo, numu ri mbuya ri majan inila, ikajngo muni mba Tatiaʼla tsi xta mikui” (Mat. 5:16).

18 Xó má eʼyáá, cristianos bi̱ nundxa̱ʼwa̱a̱ májánʼ edxu̱ún nuyambáá wéñuʼ náa congregación. Ma̱ngaa, rí naʼni makujmiin mixtiʼkhuin nindxu̱u̱ rí najmún ku̱ma̱ ndrígu̱ún. Xú káʼnii embáyuluʼ májánʼ ku̱ma̱ ndrígúlú muraʼwíí muʼni rí májánʼ rá. Xú káʼnii esngajmá rí nduʼyamajkuíí rí ekumún eʼwíínʼ rá. Mbuʼyáá náa imbo̱o̱ artículo.

^ párr. 6 Mbá xkri̱da, mbáa mixtandu̱ʼu̱u̱n a̱ngiu̱lú bi̱ guanii rí muniñaʼ tikhuu ñajunʼ rí guáʼdáá mu muni a̱ngiu̱lú jiáma. Gíʼmaa rí a̱ngiu̱lú guanii mumbañún a̱ngiu̱lú jiáma.

^ párr. 10 Efesios 4:22-24: “Ikháanʼ gíʼmaa muniʼñáaʼ runi rí enila nákha ginii xóo dí ra̱májánʼ rí nunila ga̱jma̱a̱ rí naʼni gachúu numuu rí nagua̱ʼa̱ dí ragájkhun; mú gíʼmaa muriʼkhumijnála ga̱jma̱a̱ tsiakii ndrígóo edxa̱la, ga̱jma̱a̱ gíʼmaa muriʼkhumijnála dí xóo xa̱bu̱ ni̱ndxa̱la rí niguma xó má eyoo Dios rí jmbu ga̱jma̱a̱ rí gajkhun”.