Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo  |  Agosto tsiguʼ 2015

Lá kuwáanʼ xawii mu makuwáanʼ náa Ku̱ba̱ʼ mitsaan ráʼ.

Lá kuwáanʼ xawii mu makuwáanʼ náa Ku̱ba̱ʼ mitsaan ráʼ.

“Guni ñajunʼ rí májánʼ [...] mu muguaʼdáá vida rí phú nindxu̱u̱ gajkhun.” (1 TIMOTEO 6:18, 19)

AJMÚÚ 125 GA̱JMA̱A̱ 40

1, 2. a) Ndiéjunʼ gániguaʼ matani náa Ku̱ba̱ʼ mitsaan rá. (Atayáá timbá xtiʼkhu.) b) Ndiéjunʼ gáʼni makuwáanʼ itháan gagi náa Ku̱ba̱ʼ mitsaan rá.

APÓSTOL Pablo niʼthí rí gíʼmaa muʼnimi̱jna̱ asndu xó má eʼngulú mu makhánulúʼ rí makuwáanʼ kámuu mbiʼi (atraxnuu 1 Timoteo 6:12, 19). * Mbaʼin xa̱bi̱i̱ Dios makuwá kámuu mbiʼi náa Ku̱ba̱ʼ mitsaan. Á mu dí xúʼko̱, mbáa mangáán nandaʼ maraxtaa ikhí. Lá natatsaʼwáminaʼ xú gáʼni rí matuxa̱ʼ mámbá miʼcha̱, gagi, nánguá eʼniaʼ nandii ga̱jma̱a̱ xtaa tsímáá ráʼ. (Is. 35:5, 6.) Atatsaʼwáminaʼ dí ra̱ʼkhá tháán májánʼ gáʼni rí maraxtaa gajmiáanʼ bi̱ kuwa náa guʼwáaʼ ma̱ngaa bi̱ nambáxa̱ʼ gajmiáanʼ, mangiin bi̱ matuxi̱ín (Juan 5:28, 29; Hech. 24:15). Ma̱ngaa maraʼdáá mbiʼi mu majmañaaʼ i̱ʼwáʼ dí rígá. Mbá xkri̱da, ma̱ndoo majmañaaʼ itháan ga̱jma̱a̱ numuu ciencia, matadi̱i̱ mbá ajmúú o matani guʼwáaʼ.

2 Mú marigá i̱ʼwáʼ rí maʼniuluʼ makuwaanʼ itháan gagi. Xú káʼnii nindxu̱u̱ rá. Mbá rí ikhaa nindxu̱u̱ rí xúgínʼ xa̱bu̱ mbuyamajkuíí  mbiʼyuu Jeobá ga̱jma̱a̱ munimbu̱ún kuyáá i̱ndó ikhaa (Mat. 6:9, 10). Imbo̱o̱, rí Ku̱ba̱ʼ majtíin xa̱bu̱ jmbiin, xó má nindoo Jeobá. Ma̱ngaa, mañúú mañúú gáʼga rámbáa aʼkhá ga̱jma̱a̱ rí nambáxulúʼ gajmiúlú Dios maʼga̱ raʼni itháan gujkhuʼ (Sal. 73:28; Sant. 4:8).

3. Náa numuu rí gíʼmáanʼ muʼniratamijná xúgi̱ rá.

3 Nduʼyáá gajkhun rí Jeobá maʼni rí mambanúu xúgíʼ rígi̱. Náa numuu rá. Numuu rí náa Biblia naʼthí rí “Dios tsi mba xugui ri mago maʼne” (Mat. 19:25, 26). Pablo niʼthí rí gíʼmaa muni xúgíʼ rí gáʼngo̱o̱ mu makhánulúʼ rí makuwáanʼ kámuu mbiʼi. Ikha jngó gíʼmaa musngajmá rí xóo kuwáanʼ rí nuʼnimbulúʼ rí fin ma̱ʼkha̱ asndu náa má mbi̱ʼi̱i̱. Á mu nandulúʼ makuwáanʼ náa Ku̱ba̱ʼ nuxi̱ʼ ndayóoʼ muʼniratamijná xúgi̱ mu makuwáanʼ ikhí. Guʼyáá xú káʼnii gándoo guʼniratamijná.

XÚ KÁʼNII GUʼNIRATAMIJNÁ RÁ.

4. Araxná mbá xkri̱da rí nasngájma xú káʼnii gándoo guʼniratamijná mu makuwáanʼ náa Ku̱ba̱ʼ mitsaan.

4 Xú káʼnii gándoo muʼniratamijná xúgi̱ mu makuwáanʼ náa Ku̱ba̱ʼ mitsaan rá. Atatsaʼwáminaʼ náa xkri̱da rígi̱. Índo̱ mbáa maʼga̱ gáxtáa i̱mba̱ níʼkhá, xú káʼnii enirataminaʼ xá. Maʼgíʼ maʼni rí asndu xóo xtáa má ikhí. Mbáa magíʼdu̱u̱ majmañuu maʼthí ajngáa rí nuthi ga̱jma̱a̱ maʼga̱ raninuʼ xóo kuwa xa̱bu̱ ikhí. Asndu ma̱ndoo mikhu ganitsu dí rígá ikhí. Xúʼko̱ má kayuʼ ma̱ndoo muʼniratamijná mu makuwáanʼ náa Ku̱ba̱ʼ mitsaan, muʼni xúgíʼ asndu xóo kuwáanʼ má ikhí. Guʼyáá tikhuu rí ma̱ndoo muʼni.

5, 6. Náa numuu rí ndayóoʼ maguʼunlú muʼnimbulúʼ asndu nákha xúgi̱ náa xuajñu Jeobá rá.

5 Kuwáanʼ náa mbá numbaaʼ náa nuni rí nandoo Gixa̱a̱. Mbá xkri̱da, mbaʼin xa̱bu̱ nakumu̱ún dí ragíʼmaa munimbu̱ún kuyáá Dios ga̱jma̱a̱ mámbáa ma̱ndoo maʼni rí eyoo. Ndiéjunʼ e̱jkha̱nú erígá rá. Rí xa̱bu̱ numíniʼ wéñuʼ ga̱jma̱a̱ na̱nguá kuwa tsímáá (Jer. 10:23). Mú ikháanʼ nduʼyáá rí Jeobá nindxu̱u̱ mbáa Xa̱bu̱ Ñajunʼ bi̱ nandoo kaʼyulúʼ. Ikha jngó nuʼnimbulúʼ kuʼyáá. Ga̱jma̱a̱ náa Ku̱ba̱ʼ mitsaan makuwáanʼ itháan májánʼ numuu rí xúgínʼ xa̱bu̱ munimbu̱ún kuyáá Dios.

6 Á mu nandulúʼ makuwáanʼ náa Ku̱ba̱ʼ mitsaan, ndayóoʼ maguʼunlú muʼnimbulúʼ asndu nákha xúgi̱ náa xuajñu Jeobá. Náa numuu rá. Numuu rí náa Ku̱ba̱ʼ mitsaan mundrígúlú mbaʼa ikha mu muʼni̱i̱ mitsaan Ku̱ba̱ʼ ga̱jma̱a̱ rí mumbáñuun xa̱bu̱ bi̱ gátuxi̱ín mu majmañún ga̱jma̱a̱ numuu Jeobá. Marigá wéñuʼ ñajunʼ muʼnilú. Ikha jngó gíʼmaa muraxi̱mi̱jna̱: “Á mu xuajñu Jeobá nando̱ʼo̱ʼ mani mbá rí tsínigu̱ʼ, lá manimbooʼ ga̱jma̱a̱ mani ñajunʼ asndu xúgíʼ a̱jkiu̱nʼ ráʼ.”

7, 8. a) Náa numuu rí gíʼmaa maguʼunlú xúgi̱ muyambáá ga̱jma̱a̱ xúgíʼ a̱jkiu̱lú náa xuajñu Jeobá rá. b) Ndiéjunʼ nixtandu̱ʼu̱u̱n tikhun a̱ngiu̱lú rá. c) Ndiéjunʼ gákumulúʼ náa Ku̱ba̱ʼ mitsaan rá.

 7 Mu muʼniratamijná makuwáanʼ náa Ku̱ba̱ʼ mitsaan, ndayóoʼ majmañulúʼ makuwáanʼ gagi ga̱jma̱a̱ asndu xú káʼnii ñajunʼ rí gakhánulú muʼni ga̱jma̱a̱ muyambáá. Mbá xkri̱da, índo̱ xuajñu Jeobá naxnúlú muʼni mbá ñajunʼ i̱mba̱ níʼkhá, nuʼnimi̱jna̱ muyambáá ga̱jma̱a̱ makuwáanʼ gagi. Á mu naguʼunlú muyambáá náa xuajñu Jeobá rí xúgi̱, xáʼniulu mingíjyúuʼ náa Ku̱ba̱ʼ mitsaan (atraxnuu Hebreos 13:17). Gundxaʼwamíjna̱ rí niguaʼnii israelitas índo̱ niguáʼnu náa Ku̱ba̱ʼ rí Dios niʼthí maxnún. Tándoo muraʼwíí náa makuwá. Nijuiʼtháán mámbáa náa minaʼ gáxtáa (Núm. 26:52-56; Jos. 14:1, 2). Xúʼko̱ kayuʼ, mbáa índo̱ gáʼni̱i̱ Ku̱ba̱ʼ mitsaan xándoo muraʼwíí náa gakuwáanʼ. Mú á mu nijmañulúʼ muyambáá náa xuajñu Jeobá, makuwáanʼ gagi rí muʼni ñajunʼ ikhaa tséʼniuu asndu náa má gakuwáanʼ.

8 Ra̱ʼkhá tháán mba̱a̱ gamajkhu rí muʼni ñajunʼ Dios náa Ku̱ba̱ʼ mitsaan náa maʼtáñajunʼ Xa̱bu̱ Ñajunʼ ndrígóo. Ikha jngó guyambáá ga̱jma̱a̱ xúgíʼ a̱jkiu̱lú asndu nákha xúgi̱ náa xuajñu Jeobá. Mú mbáa nguáná mundu̱ʼu̱lu muʼni ñajunʼ i̱mba̱ níʼkhá. Mbá xkri̱da, tikhun a̱ngiu̱lú bi̱ niñajunʼ náa sucursal ndrígóo Estados Unidos nindu̱ʼu̱u̱n rí muyambáá i̱mba̱ níʼkhá. Ga̱jma̱a̱ tikhun superintendentes viajantes nindu̱ʼu̱u̱n rí muyambáá xóo precursores especiales numuu rí ni̱ndxu̱ún xa̱bu̱ wanii o imbo̱o̱ numuu. Xúgínʼ a̱ngiu̱lú bugi̱ nanigu̱nʼ rí kuwa runi ga̱jma̱a̱ Jeobá naʼni tsajkurámíínʼ wéñuʼ. Á mu mangáanʼ nandulúʼ makuwáanʼ gagi ga̱jma̱a̱ rí Jeobá maʼni tsajkurámáánʼ, ndiéjunʼ gándoo muʼni rá. Munda̱ʼa̱a̱ rí mambáyulúʼ Jeobá, muʼni xúgíʼ rí eyoo mu muʼni ñajunʼ ndrígóo ga̱jma̱a̱ makuwáanʼ gagi asndu xú káʼnii ñajunʼ rí gakhánulú (atraxnuu Proverbios 10:22). * Á mu náa Ku̱ba̱ʼ mitsaan mbá níʼkhá náa eyulú makuwáanʼ, mu i̱mba̱ níʼkhá náa eʼtúlú organización ndrígóo Jeobá rá. Mbáa xaxmiéjunlú náa gakuwáanʼ o ñajunʼ rí guguaʼdáálu. Muxnáa núma̱aʼ wéñuʼ Jeobá numuu rí naniñulú makuwáanʼ náa Ku̱ba̱ʼ mitsaan (Neh. 8:10).

9, 10. a) Náa numuu rí mbaʼyóoʼ maʼngo̱o̱ a̱jkiu̱lú náa Ku̱ba̱ʼ mitsaan rá. b) Xú káʼnii gándoo gusngajmá xúgi̱ rí naʼngo̱o̱ a̱jkiu̱lú rá.

9 Mbáa náa Ku̱ba̱ʼ mitsaan mbaʼyóoʼ maʼngo̱o̱ a̱jkiu̱lú. Mbá xkri̱da, mbáa mbuʼyáá rí kuwa gagi eʼwíínʼ índo̱ gatuxi̱ín bi̱ kuñún ga̱jma̱a̱ bi̱ nambáxu̱u̱n májánʼ gajmiún. Mú mbáa mbaʼyóoʼ rí ikháanʼ muguaʼthi̱i̱n mu magabiín a̱ngiu̱lú bi̱ nikháñun. Á mu naguaʼníí rúʼko̱, lá  makuwáanʼ gagi gajmiúlú eʼwíínʼ ga̱jma̱a̱ maʼngo̱o̱ a̱jkiu̱lú ráʼ. (Rom. 12:15.) Á mu rí xúgi̱ naguaʼti̱i̱n rí Jeobá maʼnimbánuu rí nikudaminaʼ, ma̱ngaa muguaʼthi̱i̱n nda̱wa̱á (Ecl. 7:8).

10 Ma̱ngaa ma̱ndoo muʼniratamijná mu makuwáanʼ náa Ku̱ba̱ʼ mitsaan á mu naʼngo̱o̱ a̱jkiu̱lú índo̱ náa i̱yu̱lúʼ rígá rí nixtiʼkhuu ga̱jma̱a̱ numuu kiʼsngáa rí na̱ʼkha̱ náa Biblia. Lá nuʼnigajmaa májánʼ wéñuʼ kiʼsngáa nuxi̱ʼ rígi̱ ráʼ. Lá naʼngo̱o̱ a̱jkiu̱lú íwndo̱ tsíkru̱ʼu̱lú xúgíʼ ráʼ. Á mu naʼngo̱o̱ a̱jkiu̱lú rí xúgi̱, náa Ku̱ba̱ʼ mitsaan xáʼniulu mingíjyúuʼ maʼngo̱o̱ a̱jkiu̱lú índo̱ Jeobá gáxnulú nuxi̱ʼ ikha (Prov. 4:18; Juan 16:12).

11. Náa numuu rí gíʼmaa majmañulúʼ muʼni mba̱a̱ a̱jkiu̱lú asndu nákha xúgi̱ rá.

11 Rí muʼni mba̱a̱ a̱jkiu̱lú kuʼñúún eʼwíínʼ maʼniratáanʼ mu makuwáanʼ náa Ku̱ba̱ʼ mitsaan. Índo̱ gáxtáa raʼtáñajunʼ mbá 1,000 tsiguʼ Cristo, mañúú mañúú gáʼga randáti̱ga̱a̱ aʼkhá náa ikháanʼ, asndu náa bi̱ magabiín (Hech. 24:15). Lá majmañulúʼ muʼni mba̱a̱ a̱jkiu̱lú kuʼñúún ga̱jma̱a̱ musngajma rí nandulúʼ kuʼñúún eʼwíínʼ índo̱ gakiéʼkhún rá. Á mu najmañulúʼ xúgi̱ muʼni mba̱a̱ a̱jkiu̱lú, xáʼniulu mingíjyúuʼ mambáxulúʼ májánʼ gajmiúlú eʼwíínʼ náa Ku̱ba̱ʼ mitsaan (atraxnuu Colosenses 3:12-14). *

12. Ndíjkha rí ndayóoʼ musngajmá xú káʼnii nindxu̱u̱ Jeobá rí xúgi̱ rá.

12 Náa Ku̱ba̱ʼ mitsaan mbaʼyóoʼ musngájma xú káʼnii nindxu̱u̱ Jeobá rí xtáa raʼsngúlú xúgi̱. Náa numuu rá. Numuu rí náa Ku̱ba̱ʼ mitsaan xáguáʼdáá xúgíʼ rí nandulúʼ. Mbáa mbaʼyóoʼ muguaʼthi̱i̱n mu muguaʼdáá tikhuu rí nandulúʼ. Mbaʼyóoʼ makuwáanʼ gagi ga̱jma̱a̱ muxnáa núma̱aʼ asndu xú káʼnii má kuwáanʼ. Á mu nusngajmá xúgíʼ rígi̱ asndu nákha xúgi̱, musngájma rí kuwáanʼ ruʼniratamijná mu makuwáanʼ náa Ku̱ba̱ʼ mitsaan ga̱jma̱a̱ rí nandulúʼ makuwáanʼ mbá numbaaʼ náa xúgínʼ gunimbu̱ún kuyáá Jeobá (Heb. 2:5; 11:1).

GUʼGÍʼ MUʼNI ÑAJUNʼ JEOBÁ

Aratáraʼa ga̱jma̱a̱ xúgíʼ a̱jkia̱nʼ

13. Ndiéjunʼ rí magiʼdoo itháan numuu náa ikháanʼ náa Ku̱ba̱ʼ mitsaan rá.

13 Náa Ku̱ba̱ʼ mitsaan muguaʼdáá xúgíʼ rí gáʼyulúʼ mu makuwáanʼ gagi. Mú rí itháan gáʼni makuwáanʼ tsímáá rí nambáxulúʼ gajmiúlú Jeobá (Mat. 5:3). Rí muʼni ñajunʼ Jeobá magiʼdoo itháan numuu náa ikháanʼ ma̱ngaa muʼni ga̱jma̱a̱ gagi (Sal. 37:4). Ikha jngó, á mu nandulúʼ muʼniratamijná mu makuwáanʼ náa Ku̱ba̱ʼ mitsaan, gíʼmaa magiʼdoo itháan numuu rí muʼni ñajunʼ Jeobá xúgi̱ (atraxnuu Mateo 6:19-21).

14. Káʼnii metas gándoo muʼgíʼ muni jiáma ga̱jma̱a̱ wa̱ʼxa̱ʼ rá.

14 Xú gándoo makuwáanʼ itháan gagi índo̱ gakuwáanʼ ruʼni ñajunʼ Jeobá rá. Mbá nindxu̱u̱ rí muʼgíʼ metas. Á mu dxámá ni̱ndxa̱ʼ o dxáʼgú atatsaʼwáminaʼ xú káʼnii gándoo matani itháan ñajunʼ Dios. Mbáa ma̱ndoo mataʼgíʼ meta rí matani káxi̱ ñajunʼ Jeobá. Náa i̱yu̱lúʼ ma̱ndoo mataxkamaa mbaʼa enii xóo gándoo matani. * Ma̱ngaa ma̱ndoo maratamíjná gajmiáanʼ a̱ngiu̱lú bi̱ nini káxi̱ ñajunʼ Jeobá mbaʼa tsiguʼ. Á mu najmaʼ vida ndrígáʼ mu matani ñajunʼ Jeobá, majmañaaʼ mbaʼa rí mambáyaʼ matanirataminaʼ mu maraxtaa náa Ku̱ba̱ʼ mitsaan.

Araʼdáá metas

15. Ndiéjunʼ i̱ʼwáʼ metas ma̱ndoo muʼgíʼ muʼni rá.

15 Xúgiáanʼ ma̱ndoo muʼgíʼ metas mu muʼni itháan májánʼ ñajunʼ Dios. Mbá xkri̱da, ma̱ndoo majmañulúʼ nuxi̱ʼ xú káʼnii gándoo muʼtáraʼa. Ma̱ngaa ma̱ndoo mundxaʼwáá e̱dxu̱luʼ xú káʼnii gándoo muʼnimbánii xtágabu rí na̱ʼkha̱ náa Biblia. Ga̱jma̱a̱ muʼgíʼ muraxnuu itháan gakhi̱i̱, ga̱jma̱a̱ rí muʼthá náa reunión  o ñajunʼ rí nikhánulú muʼni. Garmáʼáan a̱jkiu̱lú rí á mu nuʼgíʼ metas mambáyulúʼ muʼni ñajunʼ Dios ga̱jma̱a̱ gagi ma̱ngaa muʼniratamijná mu makuwáanʼ náa Ku̱ba̱ʼ mitsaan.

MU MARAXTAA ITHÁAN MÁJÁNʼ

Araxnáa núma̱aʼ Jeobá ga̱jma̱a̱ numuu xúgíʼ rí naxnúlú

16. Náa numuu eʼyáá rí muʼni ñajunʼ Jeobá naʼni rí makuwáanʼ itháan májánʼ rá.

16 Á mu najmulú mbiʼi ndrígúlú mu muʼniratamijná mu makuwáanʼ náa Ku̱ba̱ʼ mitsaan, lá nuʼnimbáti̱ga̱ rí makuwáanʼ itháan májánʼ rí mbiʼi xúgi̱ ráʼ. Na̱nguá. Rí muʼni ñajunʼ Jeobá nindxu̱u̱ itháan májánʼ xú makuwáanʼ. Na̱nguá eʼni ñajunʼ Jeobá numuu rí mbáa natsudáanʼ o mu makáwáanʼ índo̱ gáʼkha̱ fin ndrígóo numbaaʼ rígi̱. Rí muʼni ñajunʼ Dios ga̱jma̱a̱ rí mambáxulúʼ gajmiúlú nambáyulúʼ makuwáanʼ itháan májánʼ ga̱jma̱a̱ naʼni makuwáanʼ itháan tsímáá. Xúʼko̱ niʼniáanʼ Jeobá. Rí nandoo kaʼyulúʼ ga̱jma̱a̱ ikha ndrígóo nindxu̱u̱ itháan májánʼ ki xóo i̱ʼwáʼ (atraxnuu Salmo 63:1-3). * Á mu nuʼni ñajunʼ Jeobá ga̱jma̱a̱ xúgíʼ a̱jkiu̱lú, makuwáanʼ itháan gagi. Bi̱ nini ñajunʼ Jeobá mba̱yu̱ʼ tsiguʼ nduyáá rí itháan májánʼ majmulúʼ mbiʼi ndrígúlú mu muʼni ñajunʼ ikhaa (Sal. 1:1-3; Is. 58:13, 14).

Atayáaʼ ikha rí na̱ʼkha̱ náa Biblia

17. Arathá á mu náa Ku̱ba̱ʼ mitsaan ma̱ndoo muʼni gagimijnáa o mbuʼyáaxulúʼ.

17 Lá ma̱ndoo muʼni gagimijná ga̱jma̱a̱ mbuʼyáaxuluʼ náa Ku̱ba̱ʼ mitsaan ráʼ. Xúʼko̱, numuu rí Jeobá niʼniáanʼ mu maʼndulú muʼni gagimijná. Ga̱jma̱a̱ ikhaa naʼthúlúʼ rí maʼni mu makuwáanʼ gagi (Sal. 145:16; Ecl. 2:24). Mú garmáʼáan a̱jkiu̱lú rí kuwáanʼ gagi índo̱ nduʼyáá rí gíʼdoo itháan numuu rí mambaxúlúʼ gajmiúlú Jeobá. Ikha jngó náa Ku̱ba̱ʼ mitsaan ma̱ndoo mbuʼyáaxulúʼ ga̱jma̱a̱ muʼni gagimijnáa, mú itháan gíʼdoo numuu rí muʼni ñajunʼ Jeobá. Ikha jngó, gakuwáanʼ má xúʼko̱ asndu nákha xúgi̱ ga̱jma̱a̱ guʼgíʼ muxnáa núma̱aʼ ga̱jma̱a̱ numuu xúgíʼ rí nundrígú numuu rí nuʼni ñajunʼ Dios (Mat. 6:33).

18. Xú káʼnii esngajmá rí nagumaratáanʼ mu makuwáanʼ náa Ku̱ba̱ʼ mitsaan rá.

18 Asndu tsekumulú xú káʼnii gakuwáanʼ náa Ku̱ba̱ʼ mitsaan. Gusngájma rí nandulúʼ makuwáanʼ ikhú índo̱ guʼniratamijná asndu nákha xúgi̱. Xú káʼnii gúʼni rá. Rí musngajmá rí ni̱ndxu̱lú xóo Jeobá ga̱jma̱a̱ dí muʼtáraʼa ga̱jma̱a̱ xúgíʼ a̱jkiu̱lú. Ganigulú muʼni ñajunʼ Jeobá ga̱jma̱a̱ xúgíʼ tsiakii ndrígúlú. Nduʼyáá gajkhun rí náa Ku̱ba̱ʼ mitsaan Jeobá maʼnimbánuu xúgíʼ rí nikudaminaʼ maʼni. Ikha jngó gakuwáanʼ xúgi̱ asndu xóo kuwáanʼ má ikhí.

^ párr. 1 1 Timoteo 6:12, 19: “Araxnámíjná mu maʼngaaʼ náa fe, atrajtun xa̱ʼ rí maraxtaa kámuu mbiʼi náa nitatsaʼwáʼ ga̱jma̱a̱ niratáraʼa pa̱jnu̱ rí májánʼ náa inún mbaʼin xa̱bu̱. Guʼgua̱ raguaʼdáá rí gíʼdoo wéñuʼ numuu rí ma̱ndoo majmulú nda̱wa̱á, mu muguaʼdáá vida rí phú nindxu̱u̱ gajkhun”.

^ párr. 8 Proverbios 10:22: “Rí maʼni tsajkurámáánʼ Jeobá... rúʼko̱ rí naʼni muguaʼdáá, ga̱jma̱a̱ tséʼni muguaʼdáá gaʼkhu”.

^ párr. 11 Colosenses 3:12-14: “Xóo e̱ji̱i̱n Dios, mikaʼwáanʼ bi̱ nandoʼ kayala, aguaʼdáá rí nandala kuyamíjna̱ numuu rí nagáwiinʼ a̱jkia̱la gani̱ndxa̱la xa̱bu̱ bi̱ májánʼ a̱jkiu̱u̱n, xunimbami̱jna̱, gani̱ndxa̱la xa̱bu̱ guabáanʼ wéñuʼ ga̱jma̱a̱ gaʼngo̱o̱ a̱jkia̱la. Gaʼngo̱o̱ a̱jkia̱la kuyamíjna̱ ga̱jma̱a̱ guni mba̱a̱ a̱jkia̱la kuyamíjna̱ má xúʼko̱ á mu mbáa naxiéʼkhá ga̱jma̱a̱ numuu imba̱a̱. Xó má Jeobá niʼni mba̱a̱ a̱jkiu̱u̱n kaʼyalá má xúʼko̱, xúʼko̱ má gúni mangáanʼ. Mú, ga̱jma̱a̱ xúgíʼ dí i̱ʼwáʼ, gíʼmaa maʼndala ku̱ñu̱u̱n xúgínʼ, numuu dí rúʼko̱ naruwáanʼla májánʼ wéñuʼ”.

^ párr. 14 Atraxnuu volumen 2 ndrígóo libro Los jóvenes preguntan, ináa 311 asndu 318.

^ párr. 16 Salmo 63:1-3: “Oh Dios, ikháánʼ ni̱ndxa̱ʼ Dios ndrígóʼ; ndaʼñáanʼ má xúʼko̱. Ikhúúnʼ nakandawuʼ náa ikháánʼ. Nakamíndúʼ numuu rí nagua̱ʼa̱ kayaʼ náa mbá ku̱ba̱ʼ mixooʼ ga̱jma̱a̱ nijndoʼ, náa nda̱a̱ iyaʼ. Xúʼko̱ eyaaʼ náa rí phú mikaʼwu wéñuʼ, índo̱ nda̱yo̱o̱ tsiakii ndrígáʼ ga̱jma̱a̱ gloria ndrígáʼ. Numuu rí májánʼ a̱jkia̱nʼ nindxu̱u̱ itháan májánʼ ki xóo rí makuwáanʼ, rawunʼ gáʼni mba̱a̱n”.