Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo  |  Agosto tsiguʼ 2015

 HISTORIA NDRÍGÓO XA̱BU̱

Jeobá naxnúʼ itháan ki xóo rí kaʼyoʼ

Jeobá naxnúʼ itháan ki xóo rí kaʼyoʼ

Ikhúúnʼ nindoʼ mani rí nandún muni jiáma bi̱ guáʼdáá 17 tsigúnʼ. Niniguʼ wéñuʼ maxtáá gajmíi̱nʼ bi̱ nambáxuʼ májánʼ, maʼgá inuu iyaʼ ga̱jma̱a̱ matsíin fútbol. Mú mbá wakhííʼ nixtiʼkhuu mbá kayuʼ vida ndrígóʼ. Nigúʼdoo mbá gamiéjunʼ ga̱jma̱a̱ moto, rúʼko̱ niʼni rí ní xándoo mabañimínaʼ mbá xúgíʼ. Naʼni mbá 30 tsiguʼ rí nigíʼnuʼ rúʼko̱, asndu nákha ikhú ka̱bo̱ʼ náa xiyauʼ.

Ndi̱ju̱u̱n náa xuajin Alicante rí kaʼyoo España, níjniúu lamáa Mediterráneo. Náa goʼwóoʼ nirígá wéñuʼ xkujndu, ikha jngó nagájnuʼ na̱jkhá náa calle xúgíʼ mbiʼi. Mijngii goʼwóoʼ rígá mbá taller náa nuni májáánʼ llanta ga̱jma̱a̱ nimbáxuʼ májánʼ ga̱jmu̱ʼ José María, mbáa bi̱ nañajunʼ ikhí. Ikhaa májánʼ wéñuʼ a̱jkiu̱u̱n ga̱jma̱a̱ nixmiéjunʼ wéñuʼ kaʼyoʼ rí náa goʼwóoʼ tseni xúʼko̱. Maski ajndu ikhaa gíʼdoo mbá skíñúʼ tsiguʼ itháan ki xóo ikhúúnʼ, índo̱ nigúʼdoo gamiéjunʼ ikhaa ninindxu̱u̱ xóo ndxájuʼ bi̱ phú nimbáxuʼ májánʼ ga̱jmu̱ʼ.

José María naʼnigajmaa Biblia gajmíi̱n bi̱ nutaraʼa numuu Jeobá. Ga̱jma̱a̱ nakujmaa kaʼwu rí niniguʼ rí xtáa rajmañuu numuu rí mbaʼa nutu niʼthúunʼ ga̱jma̱a̱ numuu rúʼko̱. Maski ajndu nadxawun jma gamajkhu mú tsínigu̱ʼ rí eʼthúnʼ. Ikhúúnʼ ni̱ndxu̱ʼ dxámá ga̱jma̱a̱ rígá i̱ʼwáʼ rí nanigu̱ʼ. Mú, maxtiʼkhuu vida ndrígóʼ mbá nacha̱.

GAMIÉJUNʼ

Tsénigu̱ʼ mata ga̱jma̱a̱ numuu gamiéjunʼ rí nigúʼdoo; i̱ndó mata rí tandxa̱ʼo̱o̱ májánʼ edxu̱ʼ ga̱jma̱a̱ ninindxu̱ʼ mbáa skágunʼ. Mbá mbiʼi, vida ndrígóʼ nixtiʼkhuu wéñuʼ. Ginii ninindxu̱ʼ mbáa dxámá bi̱ nigiʼdoo wéñuʼ tsiakii nda̱wa̱á kaʼmuʼ náa mbá xiyoo náa hospital rí asndu nánguá eyoo mabañimínáʼ. Niʼniuʼ mingíjyúuʼ wéñuʼ manimboʼ rí xtáá ragiʼnuʼ. Naraximínáʼ má xúʼko̱ náa numuu rí xóó xtáá.

José María ni̱ʼkha̱ gáʼyóoʼ ga̱jma̱a̱ mbá nacha̱ nindu̱ʼu̱u̱n bi̱ nutaraʼa numuu Jeobá mbá congregación dí rígá mijngii náa hospital rí maguwáʼ gúyoʼ. Rí niguwáʼ gúyoʼ má xúʼko̱ nirkawo náa a̱jkiu̱nʼ. Índo̱ nigájnáʼ náa niñewunʼ wéñuʼ, mbá nacha̱ nigíʼdu̱u̱ ninigajmaa Biblia. Nijmañuʼ rí gajkhun náa numuu rí xa̱bu̱ numíniʼ ga̱jma̱a̱ nakháñun, ga̱jma̱a̱ náa numuu rí Dios naniñuʼ marigá dí ra̱májánʼ. Ma̱ngaa nigúxnuu rí maʼni Dios nda̱wa̱á, rí náa Ku̱ba̱ʼ majtíin xa̱bu̱ jmbiin ga̱jma̱a̱ “nimbáa xa̱bu̱ xáʼthi: ‹Nandoo káñúʼ›” (Isaías 33:24). Timbá miʼtsú ndi̱yo̱o̱ rí májánʼ nindxu̱u̱ rí marigá nda̱wa̱á.

Índo̱ nigájnaʼ náa hospital, ninigajmaa itháan Biblia. Asndu nindoo ni̱jkhá náa nagimbíi̱n bi̱ nutaraʼa numuu Jeobá ga̱jma̱a̱ ni̱jkhá gataráʼa náa mbá silla de ruedas. Mbiʼi 5 ñajunʼ gu̱nʼ noviembre tsiguʼ 1988, índo̱ nigúʼdoo 20 tsiguʼ, nijngúnʼ iyááʼ náa mbá tina kiejunʼ. Jeobá nimbáyuʼ mu mandxa̱ʼo̱o̱ edxu̱ʼ rí májánʼ. Xú káʼnii gasngajmúu rí naxna̱a̱ núma̱aʼ xá.

 NAÑEJUNʼ MÁ XÚʼKO̱ MASKI AJNDU NÁNGUÁ EYOO MABAÑIMÍNÁʼ

Na̱nguá xú maniʼñúʼ rí nimbá marikhoʼ rí mani ñajunʼ Jeobá; nindoʼ mani asndu xó má eʼngoʼ (1 Timoteo 4:15). Ginii niʼniuʼ mingíjyúuʼ, numuu rí bi̱ kuwa náa goʼwóoʼ na̱nguá ninigu̱nʼ religión nuxi̱ʼ rí gúʼdoo. Mú xa̱bi̱i̱ Jeobá, a̱ngui̱nʼ bi̱ mbóó fe gajmíi̱nʼ, nimbayúʼ. Nini mbá tsiakii mu xándati̱go̱ʼ nimbá reunión ga̱jma̱a̱ magajnúʼ gátaráʼa.

Mú nda̱wa̱á ni̱jkha̱ rakujmaa itháan rí ndayóoʼ mixtiewunʼ mbiʼíí mbruʼun. Ndiʼyáaʼ wéñuʼ asndu náa nixkamaa mbá guʼwá náa kuwa bi̱ na̱nguá eyoo gumbañimi̱jna̱ dí rígá xuajin Valencia, naʼni mbá 160 kilómetros náa norte ndrígóo Alicante. Asndu nákha ikhú, ikhí nindxu̱u̱ goʼwóoʼ.

Maski ajndu ka̱bo̱ʼ náa xiyoo, nimbá tsírikhoʼ mathu̱u̱n eʼwíínʼ xa̱bu̱ ga̱jma̱a̱ numuu fe ndrígóʼ

Maski ajndu na̱nguá xóo matu̱xu̱ʼ náa xiyauʼ, nandxa̱ʼo̱o̱ edxu̱ʼ mani má xúʼko̱ ñajunʼ Jeobá. Ga̱jma̱a̱ mbújkha̱a̱ rí naxtambáyuʼ numuu rí xóo xtáá ga̱jma̱a̱ i̱ʼwáʼ rí naxtambáyuʼ nitsi mbá computadora rí nitsiji náa níjniúu xiyauʼ. Ma̱ngaa nitsi mbá celular. Mámbá miʼcha̱, mbáa bi̱ nañajunʼ ikhí naskámuu computadora ga̱jma̱a̱ celular. Nani mañajunʼ computadora ga̱jma̱a̱ mbá ajua̱nʼ rí nani maba̱a̱n ga̱jma̱a̱ tambuʼ, ga̱jma̱a̱ nakujmbíi letra náa teclado ma̱ngaa números náa celular ga̱jma̱a̱ mbá varilla rí nakuʼdáʼ rawunʼ.

Ga̱jma̱a̱ mbá varilla nakujmbíi números ndrígóo teléfono

Xú káʼnii embáyuʼ ajua̱nʼ rígi̱ rá. Nandoo mato̱ʼo̱ʼ náa Internet jw.org ga̱jma̱a̱ náa BIBLIOTECA EN LÍNEA Watchtower. Rígi̱ nambáyuʼ wéñuʼ. Xúgíʼ mbiʼi nato̱ʼo̱ʼ mbaʼa horas mu manigajmaa i̱yi̱i̱ʼ dí rígá ikhí, ga̱jma̱a̱ xúʼko̱ nandoo najmañuʼ itháan numuu Dios ma̱ngaa xú káʼnii nindxu̱u̱ ikhaa. Índo̱ naku̱mu̱ʼ rí xtáá mbaun ga̱jma̱a̱ rí naniguabaminaʼ, naxkamaa mbá artículo náa Internet rí nambáyuʼ mu maʼni̱i̱ a̱jkiu̱nʼ.

Ma̱ngaa, ga̱jma̱a̱ numuu computadora nandoo nadxun reunión rí kuaʼdááxu ikháanʼ. Rúʼko̱ nambáyuʼ raʼkháa i̱ndó madxun ma̱ngaa mata rí nijmañuʼ, matajkáan, maxna discurso asndu magúxnuu náa a̱ngiu̱lú Bi̱ Nayejngoo; xúgíʼ rúʼko̱ nani asndu náa guʼwá rí xtáá. Maski ajndu nánguá eyoo gáʼgá náa nagimbáanʼ, mú naku̱mu̱ʼ rí xtáá náa congregación.

Celular ga̱jma̱a̱ computadora nambáyuʼ mataráʼa má xúʼko̱. Maski ajndu na̱nguá eyoo maʼgá mámbá guʼwá xó má eni eʼwíínʼ a̱ngui̱nʼ, mu nataráʼa má xúʼko̱. Ga̱jma̱a̱ ajua̱nʼ rígi̱ nandoo nathu̱u̱n eʼwíínʼ ga̱jma̱a̱ numuu fe ndrígóʼ. Ra̱ʼkhá tháán eniguʼ mataruʼun xa̱bu̱ náa celular rí asndu bi̱ kuya̱ edxu̱u̱ náa congregación nuniñuʼ rí maríyaʼ awan xú káʼnii miʼtáraʼa ga̱jma̱a̱ celular. Náa awan rígi̱ nuyambáá eʼwíínʼ bi̱ kuwa náa congregación bi̱ na̱nguá xóo magajnún náa guʼwún.

Nasngáa ga̱jma̱a̱ numuu Biblia

 Ra̱ʼkhá tháán edxuʼ rí naguwáʼ mbaʼin gúyoʼ. Xúgíʼ mbiʼi naguwáʼ bi̱ nambáxuʼ gajmíi̱nʼ, naguwáʼ gajmiún bi̱ kuñún ga̱jma̱a̱ bi̱ nuniʼnuʼ bi̱ nandún majmañún ga̱jma̱a̱ numuu Biblia. Nuthu̱nʼ má xúʼko̱ rí ikhúúnʼ mata ga̱jma̱a̱ numuu Biblia. Nguáná, bi̱ kuwa náa mbá guʼwíin naguwáʼ gúyoʼ mu maxtáá mangúún índo̱ nunigajmaa Biblia. Naniguʼ wéñuʼ rí e̱ji̱n mutrigi̱i̱n náa xiyauʼ ga̱jma̱a̱ muthu̱nʼ náa numuu rí nandún kuyáá Jeobá.

Nanigu̱ʼ wéñuʼ manigajmaa Biblia gajmíi̱nʼ “bi̱ kuwa mbá guʼwíin”

Nadxuʼ wéñuʼ rí naguwáʼ gúyoʼ mbaʼin ga̱jma̱a̱ rí náa guʼwá xtáá nakuwa má xúʼko̱ xa̱bu̱. Asndu náa eguwáʼ gúyoʼ bi̱ nambáxuʼ gajmíi̱nʼ. Rígi̱ naʼniún asndu tsiánguá mbaʼin xa̱bu̱ bi̱ nuñajunʼ náa xtáá. Xúgíʼ mbiʼi naxna̱a̱ núma̱aʼ Jeobá numuu rí naniñuʼ maxtáá náa xuajñu náa nandún kuyamíjna̱ wéñuʼ.

“AʼKUE̱ E̱JKHÁ RANIMINAʼ”

Índo̱ mbáa naraxu̱ʼ xú káʼnii xtáá, nariʼñuu: “¡Aʼkue̱ e̱jkhá raniminaʼ!”. Mú raʼkháa i̱ndó ikhúúnʼ xtáá raniminaʼ ga̱jma̱a̱ xkujndu. Tséʼniuu má xú káʼnii kuwáanʼ o xkujndu dí nuraʼníí, xúgiáanʼ bi̱ ni̱ndxu̱lú cristianos nuʼni tsiakimijna mu xúniʼñáʼ fe ndrígúlú (1 Timoteo 6:12). Ndiéjunʼ embáyuʼ mu maʼngoʼ xúgíʼ tsiguʼ rígi̱ rá. Xúgíʼ mbiʼi natakáñuu Jeobá mu maxna̱a̱ núma̱aʼ numuu rí vida ndrígóʼ magiʼdoo numuu. Naʼgíʼ nani má xúʼko̱ ñajunʼ Dios, mu magúʼthu̱u̱n rí nakudaminaʼ maʼni nda̱wa̱á.

José María

Nandxa̱ʼwa̱mínáʼ má xúʼko̱ ga̱jma̱a̱ numuu Ku̱ba̱ʼ mitsaan ga̱jma̱a̱ rí magayúʼ ma̱ngaa rí makixu̱ún mbu̱júu̱ʼ. Nguáná nani xnduʼwá ga̱jmu̱ʼ José María, bi̱ nambáxuʼ májánʼ ga̱jmu̱ʼ bi̱ nigiʼdoo poliomielitis. Naraxu̱u̱ tsáa gáʼngo̱o̱ á mu nugayúxuʼ. Ikhaa nariʼñuʼ: “Tséʼniuu má tsáa gáʼngo̱o̱. Rí itháan gíʼdoo numuu rí nájmáanʼ ma̱ndoo magayúlúʼ náa Ku̱ba̱ʼ mitsaan”.

Naʼniuʼ mingíjyúuʼ manimbooʼ xóo xtáá. Na̱jkhánúʼ nda̱yo̱o̱ dí raʼkhí nini nákhi dxámá ga̱jma̱a̱ rígi̱ naʼniuʼ mingíjyúuʼ maxtáá rí xúgi̱. Naxna̱a̱ núma̱aʼ Jeobá numuu rí tániñuʼ. Naxnúʼ... mbaʼin wéñuʼ a̱ngiu̱lú, rí maʼndoʼ maxtáá xóó, rí maxtáá gagi índo̱ nambáñun eʼwíínʼ ga̱jma̱a̱ rí maxtáá májánʼ wéñuʼ nda̱wa̱á. Á mu mbaʼyóoʼ mata xú káʼnii ku̱mu̱ʼ, mata rí Jeobá nixnúʼ itháan ki xóo rí kaʼyoʼ magruígú.