Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo  |  Julio tsiguʼ 2015

 RÍ KAYÁ EDXU̱U̱ NÁA INUU I̱YI̱I̱ʼ | XÚ KÁʼNII GÁTANI MU XAXMIÉJUANʼ WÉÑUʼ RÁ.

Gamiéjunʼ: Náa xúgíʼ numbaaʼ

Gamiéjunʼ: Náa xúgíʼ numbaaʼ

“Ni̱jkhá gátsi ganitsu, mú i̱ndó galletas nixkamaa, ¡ga̱jma̱a̱ minumuu itháan ki xóo rí kaʼyoo! Imbá néjtsuu, xúgíʼ náa naxtango̱jo̱o̱ mijchú.” (Paul, Zimbabue)

“Ajmbioʼ mbá mbiʼi niʼthúunʼ rí maniñuxu. Niku̱mu̱ʼ rí ní xáʼngo̱ʼ itháan. Ndiéjunʼ gaguáʼnii e̱jñu̱xu rá.” (Janet, Estados Unidos)

“Índo̱ nagíʼdu̱u̱ nawáán sirenas, nagayúʼ náa mambáyuminaʼ ga̱jma̱a̱ na̱bo̱ʼ mbayííʼ índo̱ najmida. Nagúʼwun xóó nda̱wa̱á rí nijngoo xúgíʼ.” (Alona, Israel)

Mbiʼi rí kuwáanʼ rígá wéñuʼ gamiéjunʼ. Nindxu̱u̱ “mbiʼi gakhi̱i̱ ga̱jma̱a̱ naʼni mingíjyúuʼ makuwáanʼ” (2 Timoteo 3:1). Mbaʼin xa̱bu̱ naxmiéjunʼ ga̱jma̱a̱ numuu mbújkha̱ʼ, guerras, nandii ga̱jma̱a̱ tsingíná rí na̱ʼkha̱ náa xa̱bu̱ o i̱ʼwáʼ gamiéjunʼ. Ma̱ngaa rígá i̱ʼwáʼ rí naʼni maxmiéjúnʼ xa̱bu̱. Kuwa tikhun bi̱ namiñun rí médico maʼthúún rí guáʼdáá cáncer. Iʼwíínʼ naxmiéjúnʼ xú káʼnii gakuwa e̱jñún ga̱jma̱a̱ e̱jín xíñúnʼ nda̱wa̱á.

Tséʼniulú tsiánguá rí maxmiéjunʼlú ga̱jma̱a̱ numuu rígi̱. Mbáa asndu naxmiéjunlú índo̱ muʼni mbá examen, índo̱ muʼthá inún mbaʼin xa̱bu̱ o índo̱ mbuʼyáaʼ mbá ñajunʼ. Rí mamiñulúʼ nambáyulúʼ mu muñeumíjna̱. Mú á mu naxmiéjunlú wéñuʼ, ma̱ndoo maʼni gawúnlú. Mbá estudio rí niguma náa itháan rí 68,000 xa̱bu̱ nasngájma rí maxmiéjunʼlú naʼni rí makhañúlúʼ itháan nacha̱. Ikha jngó Jesús niraxi̱: “¿Tsala tsi ikanʼla mago xo magaja imba lajuin numu ri maxnaminaʼ-güeño gaʼko-ra?”. Mú, á mu rí maxmiéjunʼlú wéñuʼ xáʼni rí makuwáanʼ itháan. Ikha jngó, ma̱ngaa niʼthí: “Maxuxnamijna-güeñaʼla gaʼko” (Mateo 6:25, 27). Lá ma̱ndoo matani rí xaxmiéjuanʼ ráʼ.

Mu xaxmiéjunlú mbaʼyóoʼ muʼni tikhuu rí mambáyulúʼ. Ma̱ngaa, gíʼmaa munda̱ʼa̱a̱ Dios rí mambáyulúʼ ga̱jma̱a̱ makumulúʼ náa rí nikudaminaʼ maʼni ikhaa nda̱wa̱á. Rí xúgi̱ mbuʼyáá xú káʼnii nimbáñun Paul, Janet ga̱jma̱a̱ Alona mu xaxmiéjúnʼ wéñuʼ. Rígi̱ mambáyulúʼ mangáanʼ, maski asndu xúgi̱ na̱nguá kuaʼdáá mbá xkujndu mingíjyúuʼ, mú mbáa nda̱wa̱á maguaʼdáá rígi̱.