Atambaʼtaa mu matraxnuu

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

Atraʼwíí ajngáa me̱ʼpha̱a̱

 RÍ KAYÁ EDXU̱U̱ NÁA INUU I̱YI̱I̱ʼ | XÚ KÁʼNII GÁTANI MU XAXMIÉJUANʼ WÉÑUʼ RÁ.

Gamiéjunʼ ga̱jma̱a̱ numuu gamíi

Gamiéjunʼ ga̱jma̱a̱ numuu gamíi

Alona naʼthí: “Índo̱ nadxun nawáán sirena, na̱ki̱xi̱i̱ wéñuʼ a̱jkiu̱nʼ ga̱jma̱a̱ ikhú nagayúʼ náa mayambáminaʼ. Mú asndu ikhí namíñúʼ xóó. Itháan índo̱ na̱nguá xtáá náa goʼwóoʼ, náa nda̱a̱ rí mambáyuminaʼ. Mbá mbiʼi na̱jkhá náa calle índo̱ niwáán sirena. Ikhú nigíʼdu̱u̱ nimbiyaʼ ga̱jma̱a̱ nánguá eyoo mba̱ya̱ xu̱ʼ. Ninújngoo mba̱yu̱ʼ hora índo̱ niʼni̱i̱ a̱jkiu̱nʼ. Ikhú sirena nigíʼdu̱u̱ niwáán mbu̱júu̱”.

Alona

Raʼkháa i̱ndó namiñun xa̱bu̱ náa narígá guerra. Mbá xkri̱da, índo̱ nuʼdxuun rí mbáa bi̱ kuʼyáá o mbáa bi̱ nambáxulúʼ gajmiúlú gíʼdoo mbá nandii mbiiʼ rígi̱ naʼni maxmiéjunʼlú wéñuʼ. Eʼwíínʼ naxmiéjunʼ ga̱jma̱a̱ numuu dí gárígá nda̱wa̱á; mbáa nuraximi̱jna̱: “Xú káʼnii gakuwa e̱jñu̱luʼ ga̱jma̱a̱ e̱jín xíñulú nda̱wa̱á rá. Lá marigá guerra, contaminación ga̱jma̱a̱ nandii ráʼ.” Ndiéjunʼ gándoo gúʼni ga̱jma̱a̱ gamiéjunʼ rígi̱ rá.

Náa Biblia naʼthí: “Xa̱bu̱ bi̱ nandxa̱ʼóo edxu̱u̱ bi̱ ndiʼyoo gamiéjunʼ narkaʼuminaʼ” (Proverbios 27:12). Nindxu̱u̱ mbá xtágabu rí mayambáá wéñuʼ rí mbiʼi xúgi̱, lá ragájkhun ráʼ. Xó má rí nuʼgíiʼ nuñeumíjna̱ ma̱ndoo muñewa̱a̱n rí e̱ndxa̱ʼwáá edxu̱lúʼ ga̱jma̱a̱ rí naku̱mu̱lú. Películas ga̱jma̱a̱ rí nagájnuu náa televisión náa nuxmijná wéñuʼ xa̱bu̱, asndu náa noticias rí migamíi wéñuʼ naʼni maxmiéjunʼlú itháan mangiin e̱jñu̱luʼ. Rí ma xúʼdxun rígi̱ o xúʼyáá raʼkháa mu xúguaʼnii nimbá, nandoo gáʼthi rí nuñeumíjna̱lu. Dios táʼni edxu̱lúʼ mu mundxaʼwamíjna̱ mbaʼa rí xambáyulú, niʼni rí ma̱ndoo mundxaʼwáá edxu̱lúʼ rí mikaʼwu,  rí gajkhun ga̱jma̱a̱ rí jmbu ma̱ngaa rí májánʼ. Á mu nuʼni xúʼko̱ kaʼnii “Dios su naxna ri hui” maʼni rí makuwa tsímáá (Filipenses 4:8, 9).

RÍ MUʼTÁJKÁAN GÍʼDOO WÉÑUʼ NUMUU

Ndiʼyáá má rí fe gajkhun nambáyulúʼ mu xaxmiéjunlú wéñuʼ. Náa Biblia naʼthí rí índo̱ gúraʼníí xkujndu xúniʼñáʼ ruʼtákañii Dios (1 Pedro 4:7). Ma̱ndoo muʼtákáñii rí mambáyulúʼ ga̱jma̱a̱ maxnúlúʼ ku̱ma̱ ga̱jma̱a̱ rí xámiñulu mu muʼni rí kaʼyoo, nduʼyáá rí ikhaa maʼdxaunlú ‹asndu ndiéjunʼ má rí gúnda̱ʼa̱a̱› (1 Juan 5:15).

Ga̱jma̱a̱ ajmbio̱o̱, Avi

Náa Biblia naʼthúlúʼ rí “tsi naʼtañajun naʼ numba rigueʼ” nindxu̱u̱ Satanás, raʼkháa Dios (Juan 12:31; 1 Juan 5:19). Jesús niʼthí gajkhun índo̱ niʼthí ga̱jma̱a̱ numuu Gixa̱a̱, ikhaa niʼsngúlúʼ munda̱ʼa̱: “Atsijahuiñaʼxoʼ naʼ inu” bi̱ ra̱májáánʼ (Mateo 6:13). Rí muʼtájkáan ma̱ndoo mambáyulúʼ makuwáanʼ tsímáá náa numbaaʼ rí xtáa raʼtáñajunʼ Satanás. Alona naʼthí: “Índo̱ nagi̱ʼdu̱u̱ nawáán sirenas na̱ndo̱ʼo̱o̱ Dios rí mambáyuʼ maxtáá tsímáá. Ma̱ngaa, ajmbioʼ naʼtároʼoʼ ga̱jma̱a̱ nutájkáanxu. Rúʼko̱ naʼni rí maʼni̱i̱ a̱jkiu̱nʼ”. Ikha jngó náa Biblia naʼthí: “Jeobá xtáa mijngii náa xúgínʼ xa̱bu̱ bi̱ nutakáñii”, xúʼko̱ kaʼnii, bi̱ phú gajkhun nunda̱ʼa̱ rí mambáñún (Salmo 145:18).

LÁ RÍGÁ RÍ MUGUAʼTHI̱I̱N NDA̱WA̱Á RÁʼ.

Náa discurso rí nixná náa Kúbá, Jesús niʼsngúún xa̱bi̱i̱ rí munda̱ʼa̱ índo̱ gutajkháan: “Ga̱ʼkha̱ reino ndrígáʼ” (Mateo 6:10). Reino ndrígóo Dios maʼni gámbáa xúgíʼ rí naʼni maguaʼdáá gamiéjunʼ. Jesucristo, nindxu̱u̱ “Xa̱bu̱ Ñajunʼ bi̱ naʼni marigá rí Tsímáá” bi̱ Dios má nigíʼ, ikhaa maʼni “gámbáa guerra asndu náa námbáa ku̱ba̱ʼ” (Isaías 9:6; Salmo 46:9). Dios “maʼthún dí raʼkhí nini mbaʼa xuajin [...]. Nimbá xuajin ní xuradímijna ga̱jma̱a̱ chídí, asndu ní xagun náa guerra”. Ma̱ngaa, “ní xáxtáa nimbáa bi̱ maʼnimiñun” (Miqueas 4:3, 4). Bi̱ kuwala náa mbá guʼwáanʼ “munila guʼwá, ga̱jma̱a̱ makuwáanʼla ikhí; mudula ixi̱ uva ga̱jma̱a̱ muphula xndúu” (Isaías 65:21). Ma̱ngaa, “nimbáa xa̱bu̱ xáʼthi: ‹Nandoo káñúʼ›” (Isaías 33:24).

Mú, maski asndu nguáthá má eñawumíjna̱lu, nguáná narígá “gamiéjunʼ rí na̱nguá kuaʼti̱i̱n” mbáa mu kuwáanʼ náa rakáʼyoo makuwáanʼ (Eclesiastés 9:11). Ma̱ngaa xó má narígá, mbaʼin xa̱bu̱ bi̱ nda̱a̱ aʼkhún nakháñun ga̱jma̱a̱ numuu guerras, náa nuxmijná o ga̱jma̱a̱ numuu mbá nandii. Mú, lá nindxu̱u̱ májánʼ rígi̱ ráʼ.

Mbaʼin wéñuʼ xa̱bu̱ nikháñun, mú i̱ndó Dios eʼyoo nguáthi̱i̱n ga̱jma̱a̱ ikhaa markabi̱ín. Mú rí mbiʼi xúgi̱ kuwa ruya̱a̱ xúnʼ náa ñawúunʼ Jeobá asndu índo̱ gáʼga̱nú mbiʼi “rí xúgínʼ bi̱ kajtiin náa iñá wa̱jinʼ” mudxawíín aʼwóo Jesús ga̱jma̱a̱ ikhú matuxi̱i̱n (Juan 5:28, 29). Ga̱jma̱a̱ numuu rígi̱ rí kuaʼti̱i̱n nda̱wa̱á, náa Biblia nasngájma rí nindxu̱u̱ xóo mbá ancla náa awúu̱n a̱jkiu̱lú dí rígá xa̱ʼ (Hebreos 6:19). Ga̱jma̱a̱ Dios nisngájmun prueba “mba xuguin’ xabo” índo̱ nikuxi̱i̱ Jesucristo (Hechos 17:31).

Rí mbiʼi xúgi̱ asndu bi̱ nunimi̱jna̱ muni ñajunʼ Dios naguaʼnii gamiéjunʼ. Rí nimbáyúu Paul, Janet ga̱jma̱a̱ Alona mu xaxmiéjunʼ, nindxu̱u̱ rí munda̱ʼa̱a̱ Dios rí mambáñun índo̱ nutajkháan ga̱jma̱a̱ munimbu̱ún rí eʼthí Dios mani nda̱wa̱á. Xúʼko̱ má gúguaʼnii mangáanʼ numuu rí náa Biblia naʼthí: “Dios bi̱ naʼni muguaʼthi̱i̱n gáʼni rí makuwáanʼ gagi ga̱jma̱a̱ tsímáá” (Romanos 15:13). ▪