Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo  |  Julio tsiguʼ 2015

Lá natayáá má ráʼ.

Lá natayáá má ráʼ.

Xú káʼnii ninindxu̱u̱ molinos rí nijmaa nákha wajyúúʼ rá.

Náa guʼún xa̱bu̱ bi̱ nikuwa nákha wajyúúʼ niguáʼdáá mbá molino mu muni harina. Molino rígi̱ nijmún gu̱ʼu̱ náa xúgíʼ guʼwá o bi̱ niñajunʼ ikhí. Rí nawáán índo̱ nu̱nu̱ nasngájma rí xóo nikuwa xa̱bu̱ nákha wajyúúʼ (Éxodo 11:5; Jeremías 25:10).

Nixkamaa tikhuu xtiʼkhu ga̱jma̱a̱ estatuillas náa Egipto dí nirígá nákha wajyúúʼ rí nasngájma xú káʼnii niñajunʼ ga̱jma̱a̱ molino rúʼko̱. Nindxu̱u̱ mbá tsi̱nu̱ náa nugrigu rí mu̱nu̱ ga̱jma̱a̱ mbá tsíndoʼ. Xa̱bu̱ nasmbáti̱go̱o̱ náa inuu tsi̱nu̱ ikhú nagujtun tsíndoʼ ga̱jma̱a̱ nájma̱ ñawúunʼ ikhú nagíʼdu̱u̱ na̱ʼnu̱. Mbá libro naʼthí rí tsíndoʼ naʼni a̱jma̱ o a̱jkhu̱ kilo rí mikiwun. Á mu nuxnáá mbáa ga̱jma̱a̱ rígi̱, makhañúu (Jueces 9:50-54).

Molinos gíʼdoo wéñuʼ numuu mu makuwá mbá guʼwíin. Ikha jngó, náa Biblia naʼthí: “Nimbáa ragíʼmaa maguanúu ga̱jma̱a̱ tsi̱nu̱ ni má tsíndoʼ á mu nixnatiʼña mbújkha̱a̱, numuu rí nindxu̱u̱ vida ndrígóo xa̱bu̱ rí xtáa raguanúu ga̱jma̱a̱” (Deuteronomio 24:6).

Ndiéjunʼ eyoo gáʼthúu̱n rí Jesucristo xtáa náa tso̱xto̱o̱ Anu̱u̱ rá.

Náa Biblia naʼthí rí Jesucristo “xtáa náa tso̱xto̱o̱” Anu̱u̱ (Juan 1:18). Ajngáa rígi̱ nandoo gáʼthúu̱n rí Jesús ga̱jma̱a̱ Anu̱u̱ kuwa mijngii ga̱jma̱a̱ nambáxu̱u̱n májánʼ wéñuʼ. Rígi̱ nikumu̱u̱ náa costumbre ndrígu̱ún judíos índo̱ nuphiʼtsu.

Nákha mbiʼi ndrígóo Jesús, judíos nubúnʼ náa xtíin rí katriga̱ náa mbájndi mesa mijmbaaʼ. Mámbáa xa̱bu̱ nabóoʼ náa inuu mesa, nabá níjniún ga̱jma̱a̱ juaʼwíi rajkúún, ga̱jma̱a̱ ñawún xti̱ñu̱nʼ grígu náa mbá xtíin gua̱ba̱ʼ. Xúʼko̱ naʼni rí ñawún mújúnʼ majmúún. Mbá libro naʼthí: “Índo̱ nubúnʼ xúʼko̱ kaʼnii, edxu̱u̱ mbáa xa̱biya̱ naguanúu mijngii náa tso̱xto̱o̱ xa̱bu̱ bi̱ gíʼ náa ñawúunʼ xti̱yu̱ʼ”. Ikha jngó nijuiʼthá rí mbáa xa̱bu̱ “xtáa náa tso̱xto̱o̱” imba̱a̱ xa̱bu̱.

Rí mataba̱ʼ náa inuu xa̱bu̱ bi̱ kayá edxu̱u̱ náa mbá guʼwíin o bi̱ kayá edxu̱u̱ náa mbá ndxa̱a̱ nindxu̱u̱ mbá gamajkhu mba̱a̱. Ikha jngó, náa iwáá ganitsuwañu ndrígóo Jesús gajmíi̱n xa̱bi̱i̱, bi̱ nigi̱ʼi̱ níjniúu Jesús ninindxu̱u̱ apóstol Juan, discípulo bi̱ “naʼne akuin Jesús-jaʼyo”. Náa Biblia naʼthí rí Juan nijngamaa “náa tso̱xto̱o̱” Jesús mu maʼniuu mbá graxe̱ (Juan 13:23-25; 21:20).