Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo  |  Junio tsiguʼ 2015

Ndiéjunʼ ikha eʼsngúlúʼ padrenuestro rá. (Raga̱jma̱ níʼkhóo)

Ndiéjunʼ ikha eʼsngúlúʼ padrenuestro rá. (Raga̱jma̱ níʼkhóo)

“Dios su xta mecui ndaʼyo ñujunʼ ri ndayaʼla.” (MATEO 6:8)

1-3. Náa numuu rí mbáa ndxájulú ndiʼyoo májánʼ rí Jeobá niriʼña̱a̱ rí niʼtájkáan rá.

LANA nindxu̱u̱ mbá precursora regular bi̱ ni̱jkha̱ náa Alemania tsiguʼ 2012. Nimbá miʼtsú xámbumuu dí nigíʼnuu ikhí índo̱ nitanga̱a̱. Ikhaa naʼthí rí Jeobá niriʼña̱a̱ a̱jma̱ aʼphu̱ rí niʼtájkáan. Timbá índo̱ ikhaa na̱jkha̱ náa aeropuerto. Xtáa ra̱jkha̱ náa tren índo̱ nindo̱ʼo̱o̱ Jeobá rí mambáyúu mu maxkamaa mbáa xa̱bu̱ bi̱ maʼtároʼoo. Índo̱ ni̱jkha̱nú náa aeropuerto, niʼdxuun dí avión náa magajnúu maʼga̱ magajnúu asndu imbo̱o̱ mbiʼi. Nindo̱ʼo̱o̱ Jeobá rí mambáyúu numuu rí nánguá gíʼdoo mbújkha̱a̱ ga̱jma̱a̱ nda̱a̱ náa maguanúu migu. Rígi̱ ninindxu̱u̱ raga̱jma̱ rí niʼtájkáan.

2 Índo̱ niguámbóo niʼtájkáan, mbáa niʼthúu̱n: “Lana, ndiéjunʼ tani gi̱jyooʼ rá.” Nindxu̱u̱ mbáa bi̱ niʼnigajmaa ga̱jma̱a̱ náa escuela, ikhaa na̱jkha̱ náa Sudáfrica. Ru̱dúu̱ ga̱jma̱a̱ xíñuuʼ nigún gútangawíí. Índo̱ Lana niʼthún xkujndu rí gíʼdoo, ikhiin nitháán rí ma̱ndoo maguanúu náa guʼwún. Ma̱ngaa, niraxi̱i̱ ga̱jma̱a̱ numuu mbaʼa rí ikhaa naʼnimbo̱o̱ ma̱ngaa rí naʼtáraʼa xúgíʼ mbiʼi.

3 I̱mba̱ néjtsuu, Lana niriʼña̱a̱ i̱ʼwáʼ graxe̱ ga̱jma̱a̱ numuu Biblia. Ga̱jma̱a̱ nákha xóo tséjkha̱a̱ xuajñu niʼnirámáʼ mbiʼñún mu iʼwíínʼ a̱ngiu̱lú magún gúñún. Rí mbiʼi xúgi̱ nindxu̱u̱ xóó precursora  ga̱jma̱a̱ ndaʼyoo gajkhun rí Jeobá niriʼña̱a̱ rí naʼtájkáan (Sal. 65:2).

4. Ndiéjunʼ gúʼyáá náa artículo rígi̱ rá.

4 Índo̱ kuaʼdáá xkujndu, núkhu eʼtháán Jeobá. Ikhaa naʼdxawunlú ga̱jma̱a̱ nadxuu índo̱ nambáyulúʼ (Sal. 34:15; Prov. 15:8). Mú Jesús niʼsngúlúʼ náa padrenuestro dí rígá i̱ʼwáʼ rí itháán gíʼdoo numuu dí muʼtájkáan má xúʼko̱. Náa artículo rígi̱ gúʼyáá a̱jkhu̱ rí naʼthí náa padrenuestro ga̱jma̱a̱ xú káʼnii rígi̱ nambáyulúʼ makuwaanʼ jmbu náa Dios (atraxnuu Mateo 6:11-13).

“ARAXNAʼXOʼ XUGUIʼ GUMA RI NDAʼYO MOPOXOʼ XUGUIʼ”

5, 6. Náa numuu rí ndayóoʼ munda̱ʼa̱ rí mu̱ʼphu̱lú maski asndu kuaʼdáá wéñuʼ ganitsu rá.

5 Jesús táʼsngúlú rí muʼthá “araxnúʼ xúgi̱ rí miʼkhu”. Ikhaa niʼsngúlúʼ muʼthá ‹araxnúxu xúgi̱ rí muphúxu›. Gúʼyáá xú eʼni mbáa superintendente ndrígóo circuito náa África bi̱ nagumbiʼyuu Victor. Ikhaa naʼthí: “Naxna̱a̱ núma̱a̱ Jeobá numuu rí tsixmiéjunʼxu ga̱jma̱a̱ numuu rí muphúxu o rí miʼni numáá guʼwá náa kuwaanʼxu. A̱ngiu̱xu numbayúxuʼ ga̱jma̱a̱ numuu xúgíʼ rígi̱. Mú na̱ndo̱ʼo̱o̱ Dios rí mambáñun a̱ngiu̱lú muraʼníí xkujndu dí rígá náa numbaaʼ ga̱jma̱a̱ numuu mbújkha̱a̱”.

6 Mbáa ikháánʼ kuaʼdáá wéñuʼ rí mu̱ʼphu̱lú, mú mbaʼin a̱ngiu̱lú migíníi. Ga̱jma̱a̱ eʼwíínʼ naguaʼnii tsingíná. Gíʼmaa muʼtájkáan ga̱jma̱a̱ numún ikhiin, mú ma̱ndoo muʼni tikhuu rí mambáñún. Mbá xkri̱da, ma̱ndoo muxnún rí kuaʼdáá, ma̱ngaa ma̱ndoo muxná mbújkha̱a̱ mu majmaa náa ñajunʼ ndrígúlú rí naguma náa xúgíʼ numbaaʼ. Nduʼyáá rí mbújkha̱a̱ rí nuxnálú nambáñun a̱ngiu̱lú bi̱ nda̱ñúnʼ (1 Juan 3:17).

7. Ndiéjunʼ xkri̱da nixnúlú Jesús mu maʼsngulúʼ rí xaxmiéjunʼlu wéñuʼ ga̱jma̱a̱ numuu xúgíʼ rí ndayúlú rá.

7 Nda̱wa̱á rí niʼsngáa padrenuestro, Jesús nixná mbá xkri̱da mu maʼsngulúʼ rí xaxmiéjunʼlú wéñuʼ ga̱jma̱a̱ numuu rí ndayúlú mú makuwáanʼ. Ikhaa niʼthí dí ri̱ʼi̱ dí rígá náa xaná tsixmiéjunʼ mu makhánuun rí nda̱ñúnʼ numuu rí  Jeobá má nañewu̱u̱n. Xúʼko̱ má mangáanʼ ragíʼmaa maxmiéjunʼlú rí xú káʼnii gakhánulú rí mbaʼyúlú nda̱wa̱á (Mat. 6:30-34). Gíʼmaa maʼdxulú ga̱jma̱a̱ rí kuaʼdáá mámbá mbiʼi. Mbá xkri̱da, ma̱ndoo munda̱ʼa̱a̱lú Dios náa ma̱ndoo makuwáanʼ, mbá ñajunʼ náa ma̱ndoo makhánulú rí mu̱ʼphu̱ ga̱jma̱a̱ rí mambáyulúʼ muraʼwíí májánʼ rí gúʼni índo̱ naʼniulú nandii. Ma̱ngaa rí xúgi̱, rígá mbá dí gíʼdoo wéñuʼ numuu rí gíʼmaa muʼtájkáan. Ndiéjunʼ nindxu̱u̱ rá.

8. Ndiéjunʼ eʼni marmáʼáan a̱jkiu̱lú ajngáa ‹araxnúxu xúgi̱ rí muphúxu› rá.

8 Ajngáa ‹araxnúxu xúgi̱ rí muphúxu› naʼni marmáʼáan a̱jkiu̱lú rí gíʼmaa munda̱ʼa̱a̱ Jeobá rí maʼsngulúʼ má xúʼko̱ ga̱jma̱a̱ mambáyulúʼ mu mambáxu̱u̱ gajmiúlú. Náa numuu rí nuʼthá rígi̱ rá. Numuu rí ma̱ngaa Jesús niʼthí: “Raka indo pan mago maxta gajma xabo, ri mago-ma maxta gajma mbamba ajnga ri nagriyo raun Dios manga” (Mat. 4:4).

“ATSIMBA AKIANʼ-XTAYAʼXOʼ NUMU GUEDXAHUAʼXOʼ”

9. Náa numuu nuʼthá dí aʼkhá nindxu̱u̱ xóo gidxóó rá.

9 Náa tsajkhun padrenuestro, Jesús niʼthí: “Atsimba akianʼ-xtayaʼxoʼ numu guedxahuaʼxoʼ”. Ma̱ngaa imbo̱o̱ miʼtsú niʼthí: “Atane mba akianʼ-xtaya aʼkanʼxoʼ” (Mat. 6:12; Luc. 11:4). Ikhaa niʼthí ajngáa rígi̱ numuu rí aʼkhá nindxu̱u̱ xóo gidxóó. Nákha tsiguʼ 1952, revista rígi̱ niʼthí rí ikháanʼ gíʼmaa maʼndulú kuʼyáá Dios ga̱jma̱a̱ muʼnimbulúʼ kuʼyáá. Índo̱ nuxuʼdámíjná aʼkhá, tséxnáá rí gíʼmaa muxnáá. Ikha jngó, gíʼmáanʼ náa inuu ikhaa. Náa revista niʼthí rí á mu Jeobá nandoo, ikhaa ní xambáxu̱u̱ ga̱jma̱á ni̱ndxu̱lú. Ma̱ngaa niʼthí xóó: “Aʼkhá nindxu̱u̱ rí tsíyulú kuʼyáá Dios” (1 Juan 5:3).

10. a) Náa numuu rí nandoo naʼni mba̱a̱ a̱jkiu̱u̱n kaʼyulúʼ Jeobá rá. b) Xú káʼnii kumulú ga̱jma̱a̱ rí niʼni Jeobá ga̱jma̱a̱ numulúʼ rá.

10 Ndayúlú rí Jeobá maʼni mba̱a̱ a̱jkiu̱u̱n kaʼyulúʼ xúgíʼ mbiʼi. Ikhaa ma̱ndoo maʼni mba̱a̱ a̱jkiu̱u̱n kaʼyulúʼ numuu rí Jesús nikháñu ga̱jma̱a̱ numulúʼ nákha 2,000 tsiguʼ tsudií. Gíʼmaa muxnáa núma̱aʼ Jeobá numuu rí nixnúlú regalo rígi̱ rí gíʼdoo wéñuʼ numuu. Á mu Jesús tákhañu ga̱jma̱a̱ numulúʼ, xándoo gaguma káwáanʼ náa aʼkhá ga̱jma̱a̱ náa rí nakháñulú (atraxnuu Salmo 49:7-9 * ga̱jma̱a̱ 1 Pedro 1:18, 19). Ajngáa “Atsimba akianʼ-xtayaʼxoʼ numu guedxahuaʼxoʼ” naʼni marmáʼáan a̱jkiu̱lú rí mangiin nda̱ñúnʼ tsigijñaʼ ndrígóo Jesús. Nakujmaa kaʼwu rí Jeobá ma̱ngaa nandoo rí mundxaʼwáá edxu̱lúʼ ga̱jma̱a̱ numún ma̱ngaa xú káʼnii embáxulú gajmiúlú ikhaa. Mbá rí ma̱ndoo muʼni nindxu̱u̱ rí muʼni mba̱a̱ a̱jkiu̱lú kuʼñúún índo̱ nuni gawúnlú. Itháan nindxu̱u̱ aʼkhá dí ragíʼdoo wéñuʼ numuu. Índo̱ nuʼni mba̱a̱ a̱jkiu̱lú kuʼñúún a̱ngiu̱lú, nusngájma rí nandulúʼ kuʼñúún ga̱jma̱a̱ nuxnáa núma̱aʼ Jeobá rí ikhaa naʼni mba̱a̱ a̱jkiu̱u̱n kaʼyulúʼ (Col. 3:13).

11. Ndíjkha rí gíʼmaa muʼni mba̱a̱ a̱jkiu̱lú kuʼñúún eʼwíínʼ rá.

11 Numuu rí ñajunlú xa̱bu̱ aʼkhá, mbáa nguáná maʼni mingíjyúuʼ muʼni mba̱a̱ a̱jkiu̱lú kuʼyáá mbáa ndxájulú (Lev. 19:18). Ma̱ngaa á mu nuʼthúún eʼwíínʼ rí niʼniulúʼ ndxájulú, mbáa asndu mumbayulúʼ ga̱jma̱a̱ muniñaʼ rutháán ndxájulú. Ga̱jma̱a̱ rúʼko̱ gáʼni dí xárígá tsímáá náa congregación. Á mu xúʼko̱ rígá ga̱jma̱a̱ na̱nguá eʼni nditháan mu muʼnimbánii, musngájma rí na̱nguá exnáa núma̱aʼ rí Jesús nikháñu ga̱jma̱á numulúʼ (Mat. 18:35). Ga̱jma̱a̱ á mu tséʼni mba̱a̱ a̱jkiu̱lú kuʼñúún eʼwíínʼ Jeobá xáʼni mba̱a̱ a̱jkiu̱u̱n kaʼyulúʼ (atraxnuu Mateo 6:14, 15). Ikha jngó, á mu nandulúʼ rí Jeobá maʼni mba̱a̱ a̱jkiu̱u̱n kaʼyulúʼ, ragíʼmaa muxuʼdámíjná aʼkhá nimbá miʼtsú (1 Juan 3:4, 6).

Á mu nandaʼ rí Dios maʼni mba̱a̱ a̱jkiu̱u̱n kaʼyaʼ, ikháánʼ gíʼmaa matani mba̱a̱ a̱jkia̱nʼ xtañún eʼwíínʼ (Atayáá kutriga̱ 11)

 “MAXATATSIʼÑAʼXOʼ RI MUNDXAʼHUAMIJNAXOʼ RI MUNIXOʼ RI RAMAJAN”

12, 13. a) Ndiéjunʼ nigíʼnuu Jesús nda̱wa̱á rí nijngúun iyááʼ rá. b) Náa numuu dí ragíʼmaa muxná aʼkhúún iʼwíínʼ á mu ikháanʼ tséʼngulú gúraʼní mbá dí ra̱májánʼ rá. c) Ndiéjunʼ nisngájma Jesús rí niʼnimbo̱o̱ kaʼyoo má xúʼko̱ Dios rá.

12 Náa padrenuestro, Jesús niʼthí: “Maxatatsiʼñaʼxoʼ ri mundxaʼhuamijnaxoʼ ri munixoʼ ri ramajan”. Rígi̱ naʼni marmáʼáan a̱jkiu̱lú rí nigíʼnuu Jesús nda̱wa̱á rí nijngúun iyááʼ. Jeobá niniñuʼ rí Gixa̱a̱ maʼni “ri mandxaʼhuamineʼ ri ramajan” (Mat. 4:1; 6:13). Ndíjkha rí niniñuʼ marigá rúʼko̱ xá. Numuu rí Adán ga̱jma̱a̱ Eva taʼndun kuyáá Dios xóo mbáa Xa̱bu̱ Ñajunʼ ga̱jma̱a̱ ndiyóoʼ maxtiʼña̱a̱ tikhuu graxe̱: Lá Jeobá táʼnii káxi̱ xa̱bu̱ ráʼ. Lá ma̱ndoo mbáa xa̱bu̱ bi̱ nda̱a̱ aʼkhá mawiji̱ jmbu índo̱ na̱ʼkha̱nú dí ra̱májánʼ náa inuu ráʼ. Lá makuwá itháan májánʼ xa̱bu̱ numbaaʼ á mu mutañajumijná xó má nindoo gáʼthi Gixa̱a̱ ráʼ. (Gén. 3:4, 5.) Jeobá nikuʼmaa Jesús mu mariʼña̱a̱ graxe̱ rígi̱. Mú graxe̱ rígi̱ maxtiʼña̱a̱ nda̱wa̱á. Ikhú xúgínʼ bi̱ kuwa mekhuíí ga̱jma̱a̱ náa Ku̱ba̱ʼ mbuyáá rí Jeobá bi̱ maʼtáñajunʼ májánʼ.

13 Jeobá ñajunʼ bi̱ na̱nguá gíʼdoo aʼkhá, ikha jngó ikhaa tségiʼ dí ra̱májánʼ náa inuu nimbáa. Satanás bi̱ phú naʼni rúʼko̱ (Mat. 4:3). Mú ikháanʼ ni̱ndxu̱lú bi̱ nuraʼwíí á mu maʼngulú muraʼníí dí ra̱májánʼ o na̱nguá (atraxnuu Santiago 1:13-15). * Gundxa̱ʼwámi̱jna̱ ga̱jma̱a̱ numuu Jesús. Ndiéjunʼ niʼni ikhaa índo̱ Satanás nigíʼ mbá dí ra̱májánʼ náa inuu rá. Mbá nacha̱ niʼni gaʼduunʼ ga̱jma̱a̱ niʼthúu̱n rí na̱ʼkha̱ raʼthí náa Ajngá rawunʼ Dios. Jesús niraʼwíí mani̱ndxu̱u̱ jmbii náa Jeobá. Mú Satanás takanajkoʼ. Nigi̱ʼthu̱u̱n imbo̱o̱ mbiʼi mu mata̱nga̱a̱ magíʼ dí ra̱májánʼ mbu̱júu̱ (Luc. 4:13). Maski ajndu xúʼko̱, Jesús niʼnimbo̱o̱ má xúʼko̱ náa Dios. Xúʼko̱ nisngájma rí mbáa xa̱bu̱ bi̱ ragíʼdoo aʼkhá ma̱ndoo mani̱ndxu̱u̱ jmbii náa Jeobá ma̱ngaa asndu mbiʼi rí mingíjyúuʼ wéñuʼ. Mú Satanás nagrui̱ga̱ má xúʼko̱ dí ra̱májánʼ rí mbiʼi xúgi̱ mu xúʼnimbulú náa Jeobá.

14. Ndiéjunʼ eyóoʼ muʼni á mu nandulúʼ muraʼníí dí ra̱májánʼ rá.

 14 Graxe̱ rí nikumu̱u̱ índo̱ Adán ga̱jma̱a̱ Eva táʼnduun gúyáá Dios xóo mbáa Xa̱bu̱ Ñajunʼ xóó ndayóoʼ mambanúu. Ikha jngó Jeobá xóó naniñuʼ rí Satanás magruiga̱ dí ra̱májánʼ. Mú, garmáʼáan a̱jkiu̱lú rí Dios tsegruiga̱ dí ra̱májánʼ. Ikhaa naku̱mu̱u̱ kaʼyulúʼ ga̱jma̱a̱ nambáyulúʼ. Mú tséʼniulú tsiakii mu muʼnimbulúʼ náa ikhaa. Naniñulú muraʼwíí á mu manindxu̱lúʼ jmbii náa ikhaa o na̱nguá. Ndiéjunʼ gíʼmaa muʼni á mu nandulúʼ muraʼníí dí ra̱májánʼ rá. Rí manindxu̱lúʼ mbáa bi̱ nambáxu̱u̱ májánʼ ga̱jma̱a̱ Jeobá ma̱ngaa muʼtájkáan má xúʼko̱ rí mambáyulúʼ. Xú káʼnii gáriʼñulú xá. Guʼyáá.

Gambaxáʼ májánʼ ga̱jma̱ʼ Jeobá ma̱ngaa aratáraʼa ga̱jma̱a̱ xúgíʼ a̱jkia̱nʼ (Atayáá kutriga̱ 15)

15, 16. a) Náa biʼyáá nindxu̱u̱ tikhuu dí ra̱májánʼ rí gíʼmaa muʼni gaʼduunʼ rá. b) Á mu najngutíguáanʼ náa mbá dí ra̱májánʼ, tsáa gíʼdoo aʼkhúun rá.

15 Jeobá najmuu xi̱ʼ kaʼwu ndrígóo mu mambáyulúʼ muʼni gaʼduunʼ dí ra̱májánʼ rí nagrui̱ga̱ Satanás. Ma̱ngaa najmuu Biblia ga̱jma̱a̱ congregación mu maʼtámu̱ʼu̱lú dí rígá wéñuʼ gamíi. Mbá xkri̱da, naxnúlú xtágabu rí xájmulú xúgíʼ tsiakii ndrígúlú, mbiʼi ga̱jma̱a̱ mbújkha̱a̱ náa rí tséʼyulú. Guʼyáá xóo eni xa̱bi̱i̱ Jeobá bi̱ nagumbiʼñún Espen ga̱jma̱a̱ Janne. Ikhiin kuwa náa Europa náa rí guáʼdáá wéñuʼ. Mba̱yu̱ʼ tsiguʼ ikhiin niñajunʼ xóo precursor náa mbá xuajin náa ndayóoʼ mutaraʼa. Mú xúgi̱ guáʼdiin a̱jmi̱i̱n e̱ji̱n ga̱jma̱a̱ nánguá xóo mani̱ndxu̱ún precursor. Ikhaa naʼthí: “Nunda̱ʼa̱a̱ má xúʼko̱ Jeobá rí mambáyuxuʼ mu xajpatríguáanʼ náa dí ra̱májánʼ rí xúgi̱ rí nánguá xóo muñajunʼ wéñuʼ náa ñajunʼ Jeobá. Nunda̱ʼa̱a̱ rí mambáyuxuʼ mu mambáxuxuʼ májánʼ gajmiúxu̱ ikhaa ga̱jma̱a̱ rí mutaráʼa ga̱jma̱a̱ xúgíʼ a̱jkiu̱xuʼ”.

16 Imbo̱o̱ dí ra̱májánʼ rí gíʼmaa muʼni gaʼduunʼ nindxu̱u̱ pornografía. Tikhun nduyáá pornografía numuu rí tseni gaʼduunʼ ku̱ma̱ dí ra̱májánʼ. Ikha jngó á mu najngutíguáanʼ náa tsáʼkhá, ragíʼmaa muxná aʼkhúun Satanás o numbaaʼ ndrígóo. Náa numuu rá. Numuu rí ikhiin xándoo gúniulu tsiakii mu muʼni dí ra̱májánʼ. Mú mbaʼin a̱ngiu̱lú niʼngu̱u̱n nini gaʼduunʼ tsáʼkhá rígi̱. Ikha jngó mangáanʼ maʼngulú (1 Cor. 10:12, 13).

“ATSIJAHUIÑAʼXOʼ NAʼ INU RI RAMAJAN”

17. a) Xú káʼnii esngajmá rí nandulúʼ rí Jeobá mañewu̱nlú náa Satanás rá. b) Ndiéjunʼ gáʼni Jeobá mbá nacha̱ rá.

17 Índo̱ nuʼthá “atsijahuiñaʼxoʼ naʼ inu ri ramajan”, nunda̱ʼa̱a̱ Jeobá rí mañewu̱nlú náa Satanás. Xú káʼnii esngájma rí nandulúʼ mañewu̱nlú xá. Rí xánindxu̱lú ‹náa numbaaʼ rígi̱› ní má xáʼndulú kuʼyáá numbaaʼ “ni má [dí rígá] náa numbaaʼ” (Juan 15:19; 1 Juan 2:15-17). Inuu má, Jeobá marúguaraʼaa Satanás ga̱jma̱a̱ maʼni gámbáa numbaaʼ rígi̱ rí xkawiiʼ wéñuʼ. Mú gíʼmaa marmáʼáan a̱jkiu̱lú rí Satanás nakiʼnáa wéñuʼ numuu rí ndaʼyoo rí nánguá gíʼdoo mba̱yu̱ʼ mbiʼi. Asndu má ndiéjunʼ gáʼni mu muniʼñáaʼ ruʼni ñajunʼ Jeobá. Ikha jngó, gíʼmaa munda̱ʼa̱a̱ má xúʼko̱ Dios rí mañewu̱nlú náa Satanás (Rev. 12:12, 17).

18. Á mu nandulúʼ makuwa náa mbá numbaaʼ náa nda̱wa̱a̱ Satanás, ndiéjunʼ gíʼmaa muʼni rá.

18 Á mu nandulúʼ makuwáanʼ náa numbaaʼ náa nda̱wa̱a̱ Satanás, ndayóoʼ makuwáanʼ xóo eʼthí padrenuestro. Xú káʼnii rá. Munda̱ʼa̱a̱ Dios rí ma̱ʼkha̱ Reino ndrígóo, rí maguma kaʼwi̱i̱ mbiʼyuu ga̱jma̱a̱ rí maguma rí nandoo náa Ku̱ba̱ʼ rígi̱. Gakumulú náa ikhaa xúgíʼ mbiʼi numuu rí ikhaa maxnúlúʼ xúgíʼ rí ndayúlú mu makuwá ga̱jma̱a̱ mu manindxu̱lúʼ jmbii náa ikhaa.

^ párr. 10 Salmo 79:7-9: “Nimbáa dí ikhiin xándoo maʼnikríyaʼ mbáa ndxájuu, asndu xándoo maʼni numuu náa Dios mu maʼnikríyaʼ (xándoo miʼni numáá ga̱jma̱a̱ mbújkha̱a̱ mbáa xa̱bu̱ mu xakháñu); ga̱jma̱a̱ xándoo miʼni numáá ga̱jma̱a̱ mbújkha̱a̱ mu maxtáa kámuu mbiʼi”.

^ párr. 13 Santiago 1:13-15: “Ríʼdo̱o̱ eʼkha̱nú dí ra̱májánʼ, nimbáa xáʼthi: “Dios egrui̱ga̱ dí ra̱májánʼ náa inuʼ”. Numuu rí Dios tsekuʼma dí ra̱májánʼ, ni má tsígrui̱ga̱ dí ra̱májánʼ náa inu nimbáa. Mú, mámbáa naʼni xó má rí nagua̱ʼa̱ maʼni ga̱jma̱a̱ dí ra̱májánʼ dí naniguʼ. Ikhú rí nagua̱ʼa̱ maʼni, ndajoo wéñuʼ, ikhú narígá aʼkhá; ma̱ngaa índo̱ naguma aʼkhá, narígá rí nakháñulú”.