Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo  |  Junio tsiguʼ 2015

Jesús nindoo kaʼñúún xa̱bu̱

Jesús nindoo kaʼñúún xa̱bu̱

“Nandoʼ ka̱ñu̱u̱n wéñuʼ e̱jñún xa̱bu̱.” (PROVERBIOS 8:31)

1, 2. Xú káʼnii nisngájma Jesús rí nandoo kaʼñúún wéñuʼ xa̱bu̱ numbaaʼ rá.

NÁA capítulo 8 ndrígóo Proverbios najuiʼthá ga̱jma̱a̱ numuu sabiduría xóo mbáa xa̱bu̱. Gi̱jyooʼ sabiduría nandoo gáʼthúu̱n Jesús nákha xóó tséʼkha̱ náa tsu̱du̱u̱ Ku̱ba̱ʼ. Ikhí naʼthí rí índo̱ Dios niʼni xúgíʼ dí rígá, Jesús nixtáa náa níjniúu xóo “mbáa bi̱ nañajunʼ májánʼ wéñuʼ”. Ikhaa niniguʼ wéñuʼ índo̱ Dios xtáa raʼni mekhu ga̱jma̱a̱ Ku̱ba̱ʼ. Mú náa xúgíʼ rí niʼni Dios, Jesús nindoo kaʼñúún itháan xa̱bu̱ numbaaʼ (Prov. 8:22-31).

2 Xú káʼnii nisngájma Jesús rí nandoo kaʼyoo wéñuʼ Dios ga̱jma̱a̱ xa̱bu̱ numbaaʼ rá. Nisngájma índo̱ nindoo ma̱ʼkha̱ náa tsu̱du̱u̱ Ku̱ba̱ʼ mu maxnáximinaʼ ga̱jma̱a̱ maʼni káwáanʼ náa  aʼkhá ma̱ngaa náa rí nakháñulú (Mat. 20:28; Filip. 2:5-8). Ga̱jma̱a̱ índo̱ nixtáa náa tsu̱du̱u̱ Ku̱ba̱ʼ, nikhánaa tsiakii ndrígóo Dios mu maʼni milagros. Ga̱jma̱a̱ numuu milagro rígi̱ nisngájma rí nandoo kaʼyulúʼ ma̱ngaa rí májánʼ wéñuʼ gáʼni ga̱jma̱a̱ numulúʼ.

3. Ndiéjunʼ gúʼthá náa artículo rígi̱ rá.

3 Índo̱ Jesús nixtáa náa tsu̱du̱u̱ Ku̱ba̱ʼ, ma̱ngaa niʼthún xa̱bu̱ ga̱jma̱a̱ numuu Reino ndrígóo Dios (Luc. 4:43). Ikhaa ndaʼyoo rí Xa̱bu̱ Ñajunʼ bugi̱ maʼni kaʼwi̱i̱ mbiʼyuu Dios ga̱jma̱a̱ maʼnimbánuu xkujndu dí narígá náa numbaaʼ kámuu mbiʼi. Ga̱jma̱a̱ milagros rí niʼni nákha xóó naʼtáraʼa, nisngájma rí nandoo kaʼñúún xa̱bu̱. Xúgíʼ rígi̱ gíʼdoo numuu náa ikháanʼ. Ndíjkha rá. Numuu rí milagro rí niʼni naʼni rí muguaʼthi̱i̱n dí marigá nda̱wa̱á. Náa artículo rígi̱ gúʼthá ga̱jma̱a̱ numuu a̱jkhu̱ milagros ndrígóo Jesús.

“NANDOʼ. GAʼNE KAʼHUIN”

4. Ndiéjunʼ niʼni Jesús índo̱ niraʼnuu mbáa xa̱bu̱ bi̱ gíʼdoo lepra rá.

4 Índo̱ Jesús xtáa raʼtáraʼa, ni̱jkha̱ náa Galilea. Ikhí nixkamaa mbáa xa̱biya̱ bi̱ namínuʼ ga̱jma̱a̱ mbá nandii rí nagumbiʼyuu lepra (Mar. 1:39, 40). Xa̱biya̱ bugi̱ ra̱ʼkhá tháán eʼniuu nandii rí médico Lucas niʼthí rí “naʼga eʼne nandi ri mbiʼyu lepra” (Luc. 5:12). Náa Biblia naʼthí rí índo̱ xa̱biya̱ ndiʼyoo Jesús, nismbáti̱go̱o̱ ga̱jma̱a̱ niʼthúu̱n: “Señor, mago matane kaʼun xi nandaʼ”. Ikhaa ndiʼyoo rí Jesús ma̱ndoo maʼni thanuu. Náa numuu rá. Numuu rí xa̱bu̱ ede̱ bi̱ ni̱ndxu̱ún judíos tsíñún gúñuun bi̱ guáʼdáá lepra. Ga̱jma̱a̱ mbáa xa̱bu̱ bugi̱ nichíi ga̱jma̱a̱ numuu lepra. Ndiéjunʼ niʼni Jesús rá. Lá niʼni xó má nini xa̱bu̱ ede̱ ráʼ. Ndiéjunʼ gátani ikháánʼ rá.

5. Ndiéjunʼ nikumu̱u̱ Jesús ga̱jma̱a̱ numuu xa̱bu̱ bi̱ gíʼdoo lepra rá.

5 Xtángoo ndrígóo Moisés niʼthí rí á mu mbáa xa̱bu̱ bi̱ gíʼdoo lepra nakuʼmaminaʼ náa eʼwíínʼ xa̱bu̱, ndayóoʼ maʼthúún rí gíʼdoo nandii. Mú, nakujmaa rí xa̱bu̱ bugi̱ táʼni xúʼko̱ (Lev. 13:43-46). Lá nikiʼnáa Jesús ráʼ. Na̱nguá. Rí phú niʼni nixmiéjunʼ kaʼyoo ga̱jma̱a̱ nindoo mambáyúu. Numuu rí nigáwiinʼ a̱jkiu̱u̱n, niʼni mbá rí nimbáa táʼni: Nixkajmaa xa̱bu̱. Nda̱wa̱á niʼthúu̱n: “Nandoʼ. Gaʼne kaʼhuin”. Ga̱jma̱a̱ núkhu niguámbáa lepra (Luc. 5:13). Jeobá nixnúu Jesús tsiakii ndrígóo mu maʼni milagro rígi̱ ga̱jma̱a̱ masngájma dí ra̱ʼkhá tháán eyoo kaʼñúún xa̱bu̱ (Luc. 5:17).

6. a) Ndiéjunʼ rí gíʼdoo numuu náa milagros rí niʼni Jesús rá. b) Ndiéjunʼ eʼsngúlúʼ milagros rí niʼni Jesús rá.

6 Ga̱jma̱a̱ numuu tsiakii ndrígóo Dios, Jesús niʼni mbaʼa milagros rí na̱nguá niguaʼti̱i̱n mbuyáá. Raʼkháa i̱ndó niʼni thanún xa̱bu̱ bi̱ guáʼdáá lepra ma̱ngaa niʼni thanún eʼwíínʼ xa̱bu̱ bi̱ guáʼdáá i̱ʼwáʼ nandii. Náa Biblia naʼthí rí xa̱bu̱ niguanún tsiánguá índo̱ ndiyáá rí xa̱bu̱ bi̱ tsíyoo gúthi nuthi xó má “tsi mixndu ñau niʼni jañi ñau, xoma tsi indi nakun, niʼni nakun, xoma tsi tsifrigun, nafrigun” (Mat. 15:31). Rí mbiʼi xúgi̱ médicos nguáná nda̱ñúnʼ rí mbáa xa̱bu̱ maxná mbá chíʼgíʼ xuyuʼ mu muni thanáá imba̱a̱ xa̱bu̱. Mú Jesús táyóoʼ maʼni rúʼko̱. Ikhaa nindoo maʼni thanún asndu ndiéjunʼ má nandii guáʼdáá. Asndu nindoo niʼni thanún mitsinguánʼ xa̱bu̱ (Juan 4:46-54). Ndiéjunʼ eʼsngúlúʼ rígi̱ rá. Rí rey Jesucristo maʼngo̱o̱ ga̱jma̱a̱ nandoo maʼni gámbáa kámuu mbiʼi  xúgíʼ nandii. Índo̱ nduʼyáá xú káʼnii Jesús niʼni gajmíi̱n xa̱bu̱ nduʼyáá májánʼ rí náa ku̱ba̱ʼ mitsaan “ikhaa magawínʼ a̱jkiu̱u̱n kaʼyoo xa̱bu̱ gua̱ba̱ʼ ga̱jma̱a̱ xa̱bu̱ gínáa” (Sal. 72:13). Nduʼyáá rí ikhaa majphú nandoo maʼni thanún xúgínʼ bi̱ numíniiʼ.

“ARRAXUNʼ, AYA XIAHUAʼ, AYUʼ”

7, 8. Ndiéjunʼ niʼni Jesús ginii nákha xóó tséjkha̱ náa pila rí najmaʼnuʼ wéñuʼ rá.

7 Nguáthá igu̱nʼ nda̱wa̱á, Jesús nigájnuu náa Galilea mu maʼga̱ náa Judea mu maʼtáraʼa itháan. Mbaʼin wéñuʼ xa̱bu̱ nidxawíín ga̱jma̱a̱ ndiyáá rí nandoo kaʼñúún wéñuʼ. Jesús niʼni maʼni̱i̱ a̱jkiu̱ún bi̱ numíniiʼ ga̱jma̱a̱ niʼthún dí rígá mbá rí muguaʼti̱i̱n nda̱wa̱á (Is. 61:1, 2; Luc. 4:18-21).

8 Gu̱nʼ nisán, Jesús nigájnuu ni̱jkha̱ náa Jerusalén mu maʼni ndxa̱a̱ Pascua ndrígu̱ún judíos. Mbaʼin wéñuʼ xa̱bu̱ nagún náa ndxa̱a̱ rígi̱. Jesús ni̱jkha̱ náa mbá pila rí najmaʼnuʼ wéñuʼ náa xuajin rí gíʼ náa norte ndrígóo templo. Ikhí nixkamaa mbáa xa̱bu̱ kabóoʼ náa mbá xiyoo numuu rí tsíyoo gáʼga.

9, 10. a) Náa numuu rí xa̱bu̱ nigún náa pila dí rígá náa Jerusalén rá. b) Ndiéjunʼ niʼni Jesús náa pila rá. (Atayáá timbá xtiʼkhu.) c) Ndiéjunʼ ejmañuluʼ ga̱jma̱a̱ numuu milagro rígi̱ rá.

9 Náa pila rúʼko̱ nagún mbaʼin xa̱bu̱. Náa numuu rá. Numuu rí nikumu̱ún rí á mu nuna índo̱ iyaʼ naʼba̱a̱n, maʼni̱i̱ a̱jkiu̱ún mbá nacha̱. Atatsaʼwáminaʼ dí xtáa rarígá ikhí, rí mbaʼin xa̱bu̱ nandún maguma thanún nacha̱. Mú Jesús tágiʼdoo aʼkhá, ikha jngó táyóoʼ má magumaa thanáá. Mú, náa numuu rí ni̱jkha̱ ikhí xá. Numuu rí nindoo kaʼñúún xa̱bu̱. Ikhí nixkamaa xa̱bu̱ bi̱ tséjkha̱. Nandoo káñuu má xúʼko̱ asndu nákha xóó tséxtáa Jesús náa tsu̱du̱u̱ Ku̱ba̱ʼ (atraxnuu Juan 5:5-9).

Jesús ndiñíinʼ xa̱bu̱ bi̱ ndayóoʼ mixtambáñuun

10 Jesús niraxu̱u̱ xa̱bu̱ á mu nandoo magumaa thanáá. Ikhaa niriʼña̱a̱ ga̱jma̱a̱ ngíná rí nandoo mu na̱nguá xóo numuu rí nda̱wa̱a̱ tsáa mambáyúu majngúun náa pila. Ikhú Jesús niʼthúu̱n maʼni mbá dí rakáʼnii maguma. Niʼthúu̱n rí matuxu̱u̱, mayéxi̱i̱ xiyoo ga̱jma̱a̱ maʼga̱ najkúu. ¡Xúʼko̱ niʼni xa̱bu̱! Milagro rígi̱ naʼni mundxaʼwamíjna̱lu rí maʼni Jesús náa Ku̱ba̱ʼ mitsaan. Mú ma̱ngaa naʼsngúlúʼ rí Jesús nandoo kaʼñúún wéñuʼ xa̱bu̱. Ikhaa ni̱jkha̱ náa pila numuu rí ndiñíinʼ xa̱bu̱ bi̱ ndayóoʼ mixtambáñuun. Ikháanʼ ndayóoʼ mbuʼyaridáá ga̱jma̱a̱ mbuʼñíinʼ xa̱bu̱ bi̱ kuwa rumíniʼ ga̱jma̱a̱ numuu dí ra̱májánʼ dí rígá náa numbaaʼ.

“AʼDEʼ, NUMU RI XTAʼDA FE IKAJNGO NIGUMAMANDAN”

11. Xú káʼnii eʼyáá rí Jesús nindoo kaʼñúún xa̱bu̱ bi̱ niʼniún nandii rá.

11 (Atraxnuu Marcos 5:25-34.) Nixtáa mbáa a̱ʼgu̱ bi̱ niʼni mbá 12 tsiguʼ rí nigiʼdoo mbá nandii xkawiʼ. Ikhaa nijmuu xúgíʼ  mbújkho̱o̱ náa mbaʼin médicos, mú itháan eʼniuu nandii mámbá mbiʼi. Nandii niʼni rí xáxtáa májánʼ ga̱jma̱a̱ nánguá nindoo mbaʼyamajkuu Dios, numuu rí xtángoo ndrígóo Moisés niʼthí rí gu̱ʼu̱ bi̱ guáʼdáá nandii rúʼko̱ xándoo murugua̱a̱ nimbáa (Lev. 15:19, 25) Mbá mbiʼi nánguá eʼyoo rí maʼni, ikhú ninújngorámuʼ Xtángoo. Ni̱jkha̱ gáʼyoo Jesús náa kuwa mbaʼin xa̱bu̱ ikhú nixkajma xtíñuu. ¡Ga̱jma̱a̱ a̱ʼgu̱ niʼni̱i̱ a̱jkiu̱u̱n! Jesús nikumu̱u̱ rí nigájnuu tsiakii náa ikhaa, ikha jngó nigutangayii ga̱jma̱a̱ niraxi̱ tsáa nixkajmaa. Asndu naguáʼaan a̱ʼgu̱ nismbátigo̱o̱ ga̱jma̱a̱ niʼthúu̱n rí niʼni. Jesús ndiʼyoo rí Jeobá niʼni thanuu a̱ʼgu̱ bugi̱. Ikha jngó niʼthúu̱n: “Aʼdeʼ, numu ri xtaʼda fe ikajngo nigumamandan” nda̱wa̱á niʼthúu̱n rí maʼga̱a̱ tsímáá. Xúʼko̱, Jesús nindoo kaʼñúún xa̱bu̱ bi̱ guáʼdáá nandii.

Ga̱jma̱a̱ milagros rí niʼni Jesús nasngájma rí ikhaa naxmiéjunʼ kaʼyulúʼ ga̱jma̱a̱ xkujndu rí kuaʼdáá (Atayáá kutriga̱ 11 ga̱jma̱a̱ 12)

12. a) Xó má rí ndiʼyáá, ndiéjunʼ tatsaʼwáminaʼ ga̱jma̱a̱ numuu Jesús rá. b) Ndiéjunʼ xkri̱da rí májánʼ niniñuʼ Jesús rá.

12 Naʼni̱i̱ a̱jkiu̱lú índo̱ nduʼyáá rí Jesús nandoo kaʼñúún wéñuʼ xa̱bu̱ numbaaʼ, itháan náa xa̱bu̱ bi̱ nandoo káñuun. ¡Mú mixtiʼkuii wéñuʼ nindxu̱u̱ Satanás! Ikhaa nandoo muʼnimbulúʼ rí raguáʼdáá nditháan numulúʼ ga̱jma̱a̱ rí nimbáa tsíyoo kaʼyulúʼ. Milagros rí niʼni Jesús nasngájma rí ikhaa naxmiéjunʼ kaʼyulúʼ ga̱jma̱a̱ xkujndu rí kuaʼdáá. Ma̱ndoo muxnáa núma̱aʼ numuu rí kuaʼdaa mbáa rey ga̱jma̱a̱ ndxajkun bi̱ nandoo kaʼyulúʼ wéñuʼ (Heb. 4:15). Á mu na̱nguá eyoo káñulú, mbáa maʼniulú mingíjyúuʼ makru̱ʼu̱lú rí ekumún bi̱ nandoo káñuun má xúʼko̱. Mú ma̱ndoo muʼni xó má niʼni Jesús. Maski ajndu ikhaa táʼndoo káñuu, nikro̱ʼo̱o̱ rí niguaʼnii bi̱ nindoo káñuun ga̱jma̱a̱ nigáwiinʼ a̱jkiu̱u̱n kaʼñúún (1 Ped. 3:8). ¡Guʼyaridáá má xúʼko̱ xkri̱da ndrígóo!

“LÁZARO, AGAJNAʼ”

13. Ndiéjunʼ eʼsngúlúʼ ga̱jma̱a̱ numuu Jesús rí Lázaro nigabi̱i̱ rá.

13 Jesús nigawúnʼ wéñuʼ índo̱ ndiʼyoo rí  eʼwíínʼ numíniʼ. Mbá xkri̱da, índo̱ Lázaro bi̱ nambáxu̱u̱ ga̱jma̱a̱ nikháñu, nixtáa gíná wéñuʼ índo̱ ndiʼyoo rí numíniʼ bi̱ kuwa náa goʼwóo ga̱jma̱a̱ bi̱ nambáxu̱u̱ gajmíi̱n (atraxnuu Juan 11:33-36). Ikhaa ndiʼyoo rí magabi̱i̱ Lázaro, maski ajndu xúʼko̱ ikhaa nimbiyaʼ. Na̱nguá niti̱yu̱ʼ índo̱ nisngájma pa̱jnu̱ rí nikumu̱u̱. Nindoo kaʼyoo wéñuʼ Lázaro gajmíi̱n bi̱ kuwa náa goʼwóo rí asndu nijmuu tsiakii ndrígóo Dios mu maʼni rí mbaʼya mbu̱júu̱ bi̱ nambáxu̱u̱ ga̱jma̱a̱ (Juan 11:43, 44).

14, 15. a) Ndiéjunʼ esngájma rí Jeobá nandoo maʼni gámbáa xúgíʼ rí naʼni mumiʼníʼ rá. b) Ndiéjunʼ nindoo gáʼthi Jesús índo̱ niʼthí “bi̱ kajtiin náa iñá wa̱jinʼ” rá.

14 Náa Biblia naʼthí rí Jesús nindxu̱u̱ xóo Anu̱u̱ (Heb. 1:3). Ikha jngó milagros ndrígóo Jesús nasngájma rí Dios nandoo maʼni gámbáa xúgíʼ rí naʼni mumiʼníʼ xóo nandii, gaʼkhu ga̱jma̱a̱ rí nakháñulú. Inuu má Jeobá ga̱jma̱a̱ Jesús maʼnigabi̱ín mbaʼin wéñuʼ xa̱bu̱. Jesús niʼthí rí magabiín xúgínʼ “bi̱ kajtiin náa iñá wa̱jinʼ” (Juan 5:28, 29).

15 Ndiéjunʼ nindoo gáʼthi Jesús índo̱ niʼthí ga̱jma̱a̱ numún “bi̱ kajtiin náa iñá wa̱jinʼ” rá. Ajngáa rígi̱ nandoo gáʼthúu̱n rí marmáʼáan a̱jkiu̱u̱n kaʼñúún xa̱bu̱ bi̱ nikháñun. Xú káʼnii rá. Náa texto rígi̱ Jesús niʼthí ma̱ngaa ga̱jma̱a̱ numuu ku̱ma̱ ndrígóo Dios. Rí Jeobá ma̱ndoo marmáʼáan a̱jkiu̱u̱n kaʼñúún xa̱bu̱ bi̱ nikháñun, asndu xú káʼnii ni̱ndxu̱ún (Is. 40:26). Ga̱jma̱a̱ raʼkháa i̱ndó najmaa narmáʼáan a̱jkiu̱u̱n, ma̱ngaa nandoo marmáʼáan a̱jkiu̱u̱n kaʼñúún. Xa̱bu̱ bi̱ ni̱ga̱bi̱ín bi̱ na̱ʼkha̱ raʼthí ga̱jma̱a̱ numún náa Biblia nindxu̱u̱ mbá xkri̱da kaʼwu xú káʼnii gárígá nda̱wa̱á náa Ku̱ba̱ʼ mitsaan rí naʼthí maʼni Jeobá.

NDIÉJUNʼ EʼSNGÚLÚʼ MILAGRO NDRÍGÓO JESÚS RÁ.

16. Xú káʼnii milagros gúyáá xa̱bi̱i̱ Dios rá.

16 Á mu nuʼnimbulúʼ má xúʼko̱ náa Dios, ma̱ndoo makáwáanʼ índo̱ gáʼni Armagedón. Rígi̱ mani̱ndxu̱u̱ milagro rí itháan mba̱a̱ rí marigá. Nda̱wa̱á rí gájngoo rígi̱ mbuʼyáá itháan mbaʼa milagros. Xúgínʼ xa̱bu̱ numbaaʼ ní xáguaʼdáá aʼkhá (Is. 33:24; 35:5, 6; Rev. 21:4). Ní xájmuun lentes, bastón, muletas ga̱jma̱a̱ silla de ruedas ni má audífonos. Ga̱jma̱a̱ tsiakii ndrígóo Jeobá maʼni rí bi̱ gakáwíin náa Armagedón mani̱ndxu̱ún gújkuínʼ ga̱jma̱a̱ xáʼniun nandii. Ga̱jma̱a̱ mbaʼñúunʼ rígi̱, numuu rí ikhiin muñajunʼ mu muni̱i̱ mitsaan Ku̱ba̱ʼ (Sal. 115:16).

17, 18. a) Ndíjkha rí niʼni milagros Jesús rá. b) Náa numuu rí nandulúʼ muʼni rí ndayóoʼ mu makuwáanʼ náa Ku̱ba̱ʼ mitsaan rá.

17 Índo̱ nuraxnuu ga̱jma̱a̱ numuu milagro ndrígóo Jesús, naxnúlú tsiakii numuu rí nduʼyáá rí ní xáʼniulu nandii (Rev. 7:9). Milagros rígi̱ nasngájma rí Jesús nandoo kaʼyulúʼ wéñuʼ (Juan 10:11; 15:12, 13). Rí nigáwiinʼ a̱jkiu̱u̱n Jesús ma̱ngaa nisngájma rí Jeobá nandoo kaʼñúún xa̱bi̱i̱.

18 Náa numbaaʼ rígi̱ nakháñun wéñuʼ xa̱bu̱, guáʼdáá gaʼkhu ga̱jma̱a̱ kuwa tsingíná (Rom. 8:22). Ikha jngó ndayúlú Ku̱ba̱ʼ mitsaan. Malaquías 4:2 naxnúlú mbuʼyáá rí ikhí makuwáanʼ gagi numuu rí xándoo káñulú ga̱jma̱a̱ xúguaʼdáá aʼkhá. Índo̱ nundxaʼwamíjná rígi̱ naʼni rí muxnáa núma̱aʼ Jeobá ga̱jma̱a̱ nakumulú rí gajkhun maʼni rí nikudaminaʼ. Ikha jngó nandulúʼ muʼni rí ndayóoʼ mu makuwáanʼ náa Ku̱ba̱ʼ mitsaan. Nadxulú índo̱ nduʼyáá rí milagros ndrígóo Jesús nindxu̱u̱ mbá xkri̱da májánʼ rí gakhánulú índo̱ ikhaa gáʼtañajunʼ.