Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo  |  Junio tsiguʼ 2015

Cristo ñajunʼ “siaquiyu Dios”

Cristo ñajunʼ “siaquiyu Dios”

“Cristo ñajunʼ siaquiyu Dios.” (1 CORINTIOS 1:24)

1. Náa numuu rí Pablo niʼthí “Cristo ñajunʼ siaquiyu Dios” rá.

ÍNDO̱ Jesús nixtáa náa tsu̱du̱u̱ Ku̱ba̱ʼ, niʼni mbaʼa milagros rí naʼniaʼ tsiánguá. Á mu nuraxnuu náa Biblia ga̱jma̱a̱ numuu milagros rúʼko̱, fe ndrígúlú maʼni itháan gujkhuʼ (Mat. 9:35; Luc. 9:11). Jesús nindoo maʼni milagro rúʼko̱ numuu rí Jeobá nixnúu tsiakii. Ikha jngó apóstol Pablo niʼthí rí “Cristo ñajunʼ siaquiyu Dios” (1 Cor. 1:24). Mú ndiéjunʼ eʼsngúlúʼ milagro rí niʼni Jesús rá.

2. Ndiéjunʼ eʼsngúlúʼ milagros dí niʼni Jesús rá.

2 Milagros rí niʼni Jesús mbaʼa rí eʼsngúlúʼ (Hech. 2:22). Mbá xkri̱da, nduʼyáá dí índo̱ ikhaa gáxtáa raʼtáñajunʼ mbá 1,000 tsiguʼ, Jesús maʼni mbaʼa milagros rí mambáñun mbaʼin xa̱bu̱ bi̱ gakuwa náa tsu̱du̱u̱ Ku̱ba̱ʼ. Ma̱ngaa milagros rí niʼni Jesús nambáyulúʼ muniʼnííʼ itháan Jeobá ga̱jma̱a̱ mbuʼyáá xú káʼnii xa̱bu̱ nindxu̱u̱. Náa artículo gúʼthá ga̱jma̱a̱ numuu ajtsú milagros rí niʼni Jesús ma̱ngaa xú káʼnii gándoo gambáyulú xúgi̱ ga̱jma̱a̱ nda̱wa̱á.

MBÁ MILAGRO RÍ NAʼSNGÚLÚʼ MU MUXNÁ RÍ KUAʼDÁÁ

3. a) Ndiéjunʼ nirígá náa nidamijná xa̱bu̱ náa xuajen Caná rá. b) Lá kaʼyoo Jesús maʼni milagro rígi̱ ráʼ.

3 Jesús niʼni timbá milagro náa nidamijná xa̱bu̱ náa xuajen Caná. Mú, tsiánguá náa numuu rí nda̱a̱ mba̱ji̱nʼ vino náa ndxa̱a̱. Rígi̱ mani̱ndxu̱u̱  ma̱jti̱ʼ wéñuʼ náa inún novios, numuu rí ikhiin gíʼmaa mbuyáá ndiéjunʼ tígo̱o̱ mu̱phu̱ o muwa̱a̱n bi̱ niguwaʼ. Ikhú María nindo̱ʼo̱o̱ Jesús rí mambáñun novios. Náa numuu rá. Ikhaa ndaʼyoo rí kiʼtáriyaʼ ga̱jma̱a̱ numuu Jesús ma̱ngaa ndiʼyoo rí ikhaa muxna mbiʼí “Ade Dios Tsi Mapu-Mba” (Luc. 1:30-32; 2:52). Mbáa ikhaa ndiʼyoo rí Jesús ma̱ndoo mambáñun. Rí phú gajkhun rí María ga̱jma̱a̱ Jesús nindúún mumbañún novios. Ikha jngó, Jesús nirtaxi̱i̱ mbá 380 litros (100 galones) iyaʼ mu maʼni̱i̱ vino dí itháan májánʼ (atraxnuu Juan 2:3, 6-11). Jesús rakáʼyoo maʼni milagro rúʼko̱, mú ikhaa niʼni numuu rí nixmiéjunʼ kaʼñúún xa̱bu̱. Ikhaa ndiʼyáridoo Jeobá, bi̱ naxná rí gíʼdoo.

Jesús niʼthí rí gíʼmaa maguʼunlú muʼniu̱u̱n rí májánʼ eʼwíínʼ

4, 5. a) Ndiéjunʼ eʼsngúlúʼ milagro ndrígóo iyaʼ ga̱jma̱a̱ vino rá. b) Ndiéjunʼ guguaʼthi̱i̱n ikháanʼ nda̱wa̱á rá.

4 Ga̱jma̱a̱ tsiakii ndrígóo Jeobá, Jesús nirtaxi̱i̱ iyaʼ vino rí itháan májánʼ. Niʼni mba̱ji̱nʼ vino mu muwa̱a̱n mbaʼin xa̱bu̱. Milagro rígi̱ naʼsngúlúʼ rí Jeobá ga̱jma̱a̱ Jesús nuxna rí guáʼdáá ga̱jma̱a̱ gajkhun naxmiéjunʼ kuyulúʼ. Ma̱ngaa, rí Jeobá maxnún wéñuʼ ganitsu mbá xúgínʼ xa̱bu̱ náa Ku̱ba̱ʼ mitsaan (atraxnuu Isaías 25:6). *

5 Gundxaʼwáá edxu̱lúʼ ga̱jma̱a̱ numuu rúʼko̱. Índo̱ gakuwáanʼ náa Ku̱ba̱ʼ mitsaan, Jeobá mbaʼyoo rí maguaʼdáá xúgíʼ rí ndayúlú. Xúgiáanʼ maguaʼdáá mbá guʼwá mitsaan ga̱jma̱a̱ ganitsu rí májánʼ. Índo̱ nundxa̱ʼwa̱míjna̱ ga̱jma̱a̱ xúgíʼ rí májánʼ rí Jeobá maxnúlúʼ, nuxnáa wéñuʼ núma̱aʼ.

Guʼyaridáá Jesús ga̱jma̱a̱ gajmulú tiempo ndrígúlú mu mumbañún eʼwíínʼ (Atayáá kutriga̱ 6)

6. a) Náa numuu rí Jesús nijmuu tsiakii ndrígóo rá. b) Xú káʼnii gándoo guʼyaridáá rí niʼni Jesús rá.

6 Jesús tájmuu tsiakii ndrígóo mu mambáyuminaʼ ikhaa. Mbá xkri̱da, ndiéjunʼ niʼni Jesús índo̱ Gixa̱a̱ nindo̱ʼo̱o̱ rí martaxi̱i̱ itsí pan xá. Ikhaa niʼni gaʼduunʼ (Mat. 4:2-4). Jesús nijmuu tsiakii ndrígóo mu maʼniún rí májánʼ eʼwíínʼ. Xú káʼnii gándoo mbuʼyaridáá rí niʼni xá. Jesús niʼthí rí maguʼunlu muʼniu̱u̱n rí májánʼ eʼwíínʼ (Luc. 6:38). Ndiéjunʼ gándoo muʼni ga̱jma̱a̱ numún ikhiin xá. Ma̱ndoo muʼthúún maguwaʼ guphiʼtsu náa guʼwúlú. Ma̱ngaa muʼtámíjná gajmiúlú nda̱wa̱á rí niguámbá reunión, o muʼdxawíín mbáa ndxájulú bi̱ maxná discurso ndrígóo. Mbáa ma̱ndoo mumbáñuun bi̱ kuwa rajmañún mutaraʼa. Índo̱ nuxná rí kuaʼdáá ga̱jma̱a̱ numbáñun eʼwíínʼ, kuwaanʼ ruʼyaridáá Jesús.

XÚGÍNʼ NIPHIʼTSU GA̱JMA̱A̱ NIGIʼMÚN

7. Ndiéjunʼ gárígá má xúʼko̱ náa numbaaʼ ndrígóo Satanás rá.

7 Rí mbiʼi xúgi̱ kuwa mbaʼin xa̱bu̱ bi̱ migíníi náa numbaaʼ. Mú xkujndu rígi̱ rígá asndu nákha wajyúúʼ. Jeobá niʼthún xa̱bu̱ israelitas:  “Makuwá má xúʼko̱ xa̱bu̱ bi̱ migíníi náa tsu̱du̱u̱ ku̱ba̱ʼ” (Deut. 15:11). Ga̱jma̱a̱ mba̱yu̱ʼ tsiguʼ nda̱wa̱á, Jesús niʼthí: “Jamba miʼtsu majuhua gajmiaʼla xabo tsi guini” (Mat. 26:11). Lá nindoo gáʼthi rí makuwa má xúʼko̱ xa̱bu̱ gíníi náa tsu̱du̱u̱ Ku̱ba̱ʼ ráʼ. Na̱nguá. Ikhaa nindoo gáʼthi rí makuwa má xúʼko̱ xa̱bu̱ gíníi náa numbaaʼ ndrígóo Satanás. Mú náa Ku̱ba̱ʼ mitsaan maʼni mixtiʼkhu wéñuʼ. Ikhí marigá ganitsu mu̱phu̱ xúgínʼ ga̱jma̱a̱ nimbáa ní xáʼni xa̱bu̱ gínáa.

8, 9. a) Náa numuu rí Jesús niʼni milagro ndrígóo pan ga̱jma̱a̱ e̱gi̱ʼ rá. b) Ndiéjunʼ ku̱ma̱ʼ ikháánʼ índo̱ natatsaʼwáá edxa̱ʼ ga̱jma̱a̱ numuu milagro rígi̱ rá.

8 Salmo 145:16 naʼthí rí Jeobá nambaʼtoo ñawúunʼ ga̱jma̱a̱ naxnún xa̱bu̱ xúgíʼ rí nda̱ñúnʼ. Índo̱ Jesús nixtáa náa tsu̱du̱u̱ Ku̱ba̱ʼ, ndiʼyáridoo Anu̱u̱ ga̱jma̱a̱ nixnúún mbaʼin xa̱bu̱ rí nda̱ñúnʼ. Mú táʼni mu masngájma rí ikhaa gíʼdoo wéñuʼ tsiakii. Niʼni numuu rí gajkhun nixmiéjunʼ kaʼñúún. Mbá xkri̱da, guʼyáá rí naʼthí náa Mateo 14:14-21 (atraxnuu). Mbaʼin xa̱bu̱ náa mbaʼa xuajen nigún rajkúún gajmiún Jesús (Mat. 14:13). Índo̱ nikína, discípulos ndiyáá rí xa̱bu̱ néʼngu̱u̱n ga̱jma̱a̱ naxkidxu̱u̱n. Ikha jngó nitháán Jesús rí maʼthúún xa̱bu̱ rí magúun ga̱jma̱a̱ magún gutsi rí mu̱phu̱. Ndiéjunʼ niʼni Jesús rá.

9 Jesús nixniʼtsun mbaʼin wéñuʼ xa̱bu̱ ga̱jma̱a̱ káaʼ i̱ndó witsu pan ga̱jma̱a̱ a̱jmi̱i̱n e̱gi̱ʼ. Náa numuu niʼni milagro rígi̱ xá. Numuu rí nindoo kaʼñúún xa̱bu̱ ga̱jma̱a̱ nixmiéjunʼ kaʼñúún. Ga̱jma̱a̱ nixnúún wéñuʼ ganitsu, numuu rí náa Biblia naʼthí rí xúgínʼ nipiʼtsu asndu náa nigiʼmún. Ganitsu rúʼko̱ nixnúún tsiakii mu matangi̱ín náa guʼwún (Luc. 9:10-17). Nirígá wéñuʼ ganitsu rí asndu nijtíí gu̱wa̱ʼ ijma̱ xtu̱ʼ rí nipídunʼ.

10. Ndiéjunʼ garigá nacha̱ ga̱jma̱a̱ numuu tsingíná rá.

10 Ga̱jma̱a̱ numún Xa̱bu̱ Ñajunʼ bi̱ ra̱míjínʼ, mbaʼin wéñuʼ xa̱bu̱ migíníi. Asndu tikhun xa̱bi̱i̱ Jeobá na̱nguá guáʼdáá wéñuʼ ganitsu. Mú Dios naʼngo̱o̱ ga̱jma̱a̱ nandoo maxnún xúgínʼ xa̱bu̱ rí nda̱ñúnʼ mú makuwá má xúʼko̱. Ikhaa nakudaminaʼ maʼni gámbáa tsingíná (atraxnuu Salmo 72:16). * Nacha̱ má, bi̱ nunimbu̱ún kuyáá Jeobá makuwá náa numbaaʼ náa nimbáa ní xáʼni dí ra̱májánʼ ga̱jma̱a̱ ní xákúwi̱i̱n xa̱bu̱ gíníi.

Ga̱jma̱a̱ milagros rí niʼni Jesús nisngájma rí nandoo majmuu tsiakii ndrígóo mu mambáyulúʼ

11. a) Náa numuu nduʼyáá májánʼ rí nacha̱ má Cristo majmuu tsiakii ndrígóo mu mambáñún xúgínʼ xa̱bu̱ rá. b) Ga̱jma̱a̱, ndiéjunʼ gíʼmaa muʼni rá.

11 Índo̱ Jesús nixtáa náa tsu̱du̱u̱ Ku̱ba̱ʼ, niʼni milagro mbá ajtsú tsiguʼ tikhu náa mbá chíʼgíʼ Ku̱ba̱ʼ (Mat. 15:24). Mú rí xúgi̱ nindxu̱u̱ rey ga̱jma̱a̱ índo̱ gáʼtañajunʼ mbá 1,000 tsiguʼ ma̱ndoo mayambáá náa xúgíʼ tsu̱du̱u̱ Ku̱ba̱ʼ (Sal. 72:8). Ga̱jma̱a̱ milagros rí niʼni, Jesús nisngájma rí nandoo majmuu tsiakii ndrígóo mu mambáyulúʼ. Ikha jngó nduʼyáá májánʼ rí nacha̱ má gáʼni. Índo̱ nundxa̱ʼwa̱míjna̱ ga̱jma̱a̱ numuu rúʼko̱, nandulúʼ majmulúʼ mbiʼi ga̱jma̱a̱ tsiakii ndrígúlú mu mumbañún eʼwíínʼ (Sal. 45:1; 49:3). Mú ikháanʼlu, tséjmáanʼ guʼni milagros. Mú ma̱ndoo muʼthúún xa̱bu̱ rí májánʼ rí nakudaminaʼ maʼni Dios rí na̱ʼkha̱ raʼthí náa Biblia. Rúʼko̱ rí kaʼyulúʼ muʼni (Rom. 1:14, 15).

JEOBÁ GA̱JMA̱A̱ JESÚS NAʼNGU̱U̱N NUTSI̱JI̱I̱ GAMIÉJUNʼ

12. Náa numuu nduʼyáá májánʼ rí Jesús nakro̱ʼo̱o̱ xú nindxu̱u̱ Ku̱ba̱ʼ rá.

12 Náa Biblia naʼthí rí índo̱ Dios niʼni Ku̱ba̱ʼ, Jesús nixtáa náa níjniúu xóo “mbáa bi̱ nañajunʼ  májánʼ wéñuʼ” (Prov. 8:22, 30, 31; Col. 1:15-17). Ikha jngó Jesús nikro̱ʼo̱o̱ májánʼ xóo eñajunʼ Ku̱ba̱ʼ ga̱jma̱a̱ ndaʼyoo xú kaʼnii matsi̱ji̱i̱ mbá gamiéjunʼ xóo rí naʼni giñánʼ ga̱jma̱a̱ lamáa.

Índo̱ natatsaʼwáminaʼ náa numuu rí Jesús niʼni milagros, ndiéjunʼ rí naʼniaʼ tsiánguá rá. (Atayáá kutriga̱ 13 ga̱jma̱a̱ 14)

13, 14. Araxná mbá xkri̱da dí nasngájma rí Jesús naʼngo̱o̱ natsi̱ji̱i̱ gamiéjunʼ.

13 Índo̱ Jesús nixtáa náa tsu̱du̱u̱ Ku̱ba̱ʼ, nisngájma dí ma̱ndoo matsi̱ji̱i̱ mbá gamiéjunʼ. Mbá xkri̱da, mbá miʼtsú nijmuu tsiakii ndrígóo Dios mu matsi̱ji̱i̱ mbá “guiña” rí gakhi̱i̱ (atraxnuu Marcos 4:37-39). Mbáa xa̱bu̱ bi̱ ndaʼyoo niʼthí rí ninindxu̱u̱ mbá ruʼwambiiʼ ga̱jma̱a̱ du̱u̱n skuniʼ, giñánʼ gakhi̱i̱ wéñuʼ, nindxa̱ʼwa̱ a̱jkhu̱u̱n ma̱ngaa nixnúu wéñuʼ ruʼwa. Nindxu̱u̱ mbá ruʼwambiiʼ rí naʼni gámbóo xúgíʼ. Apóstol Mateo ma̱ngaa niʼthí ga̱jma̱a̱ numuu ruʼwambiiʼ rígi̱ (Mat. 8:24).

14 Atatsaʼwáminaʼ xóo nirígá rígi̱. Iyaʼ nasmbujmuu náa barca, ga̱jma̱a̱ iyaʼ nato̱ʼo̱o̱ nangi eʼni. Giñánʼ nawáán wéñuʼ ga̱jma̱a̱ barca ra̱ʼkhá tháán eʼba̱a̱n. Maski asndu xúʼko̱, Jesús naʼgu numuu rí néʼngo̱o̱ wéñuʼ. Mú discípulos namiñun mbanda̱ʼkho. Ikha jngó nixkajui̱i̱ ga̱jma̱a̱ nitháán rí makhañún (Mat. 8:25). Ndiéjunʼ niʼni Jesús rá. Nitu̱xu̱u̱ ga̱jma̱a̱ niʼthúu̱n giñánʼ ga̱jma̱a̱ lamáa: “Hui gaʼne” (Mar. 4:39). ¡Ga̱jma̱a̱ ikhú niwi̱ji̱i̱! Nakujmaa kaʼwu rí Jesús naʼngo̱o̱ natsi̱ji̱i̱ gamiéjunʼ.

15. Náa numuu eʼyáá rí Jeobá naʼngo̱o̱ natsi̱ji̱i̱ gamiéjunʼ rá.

15 Jeobá nindxu̱u̱ bi̱ nixnúu Cristo tsiakii mu maʼngo̱o̱ matsi̱ji̱i̱ gamiéjunʼ. Ikha jngó nduʼyáá májánʼ rí Jeobá ma̱ngaa maʼngo̱o̱ matsi̱ji̱i̱. Mbá  xkri̱da, nákha xóó tséʼni Ruʼwambiiʼ niʼthúu̱n: “Numuu rí índo̱ gáʼni juwan mbiʼi ikhúúnʼ mani rí maxnúu ruʼwa náa tsu̱du̱u̱ ku̱ba̱ʼ a̱jma̱ skiñúʼ mbiʼi ga̱jma̱a̱ a̱jma̱ skiñúʼ mbruʼun” (Gén. 7:4). Ma̱ngaa náa Éxodo 14:21 naʼthí rí Dios nijmuu “mbá giñánʼ gakhi̱i̱ rí na̱ʼkha̱ náa nagájnuu a̱jkha̱ʼ” mú maʼni rí lamáa maʼni̱i̱ a̱jma̱. Ga̱jma̱a̱ Jonás 1:4 naʼthí rí imbo̱o̱ miʼtsu niʼni rí marigá “mbá ruʼwambiiʼ náa lamáa”. Naʼni rí xaxmiénjunʼlú índo̱ nuʼdxawíín rí náa ku̱ba̱ʼ mitsaan Dios maʼngo̱o̱ matsi̱ji̱i̱ gamiéjunʼ.

16. Náa numuu rí naʼni̱i̱ a̱jkiu̱lú índo̱ nduʼyáá rí Jeobá ga̱jma̱a̱ Jesús nutsi̱ji̱i̱ gamiéjunʼ rá.

16 Náa numuu rí naʼni̱i̱ a̱jkiu̱lú índo̱ nduʼyáá rí Jeobá ga̱jma̱a̱ Jesús naʼngu̱u̱n nutsi̱ji̱i̱ gamiéjunʼ rá. Numuu rí nduʼyáá rí índo̱ Jesús gáʼtañajunʼ mbá 1,000 tsiguʼ ní xárígá ruʼwambiiʼ, rí najmida volcán ga̱jma̱a̱ gaʼxma. Xámiñulu dí marigá gamiéjunʼ xóo rígi̱, numuu rí Jeobá mambáñun xúgínʼ xa̱bu̱ numbaaʼ (Rev. 21:3, 4). Nduʼyáá májánʼ rí Cristo majmuu siakiyu̱u̱ Dios mu matsi̱ji̱i̱ gamiéjunʼ.

ATAYARIDÁÁ DIOS GA̱JMA̱A̱ CRISTO

17. Xóo gándoo mbuʼyaridáá Dios ga̱jma̱a̱ Cristo rá.

17 Xú gándoo guʼyaridáá Dios ga̱jma̱a̱ Cristo rá. Ikháanʼ xájmáanʼ muʼni milagros, mú ma̱ndoo muʼni rí naʼthí náa Proverbios 3:27 (atraxnuu). * Índo̱ a̱ngiu̱lú numíniiʼ, ma̱ndoo muxnún rí nda̱ñúnʼ ga̱jma̱a̱ muxnún tsiakii (Prov. 17:17). Mbiʼi rí ma̱ndoo matani rígi̱ nindxu̱u̱ índo̱ narígá gamiéjunʼ. Mbá xkri̱da, nda̱wa̱á índo̱ nijngoo giñánʼ mbiiʼ, goʼwóo mbáa ndxájulú a̱ʼgú xuáʼa̱ niguámbáa. Índo̱ a̱ngiu̱lú nimbayíí, ikhaa niʼthí rí nadxuu wéñuʼ rí nindxu̱u̱ xa̱bi̱i̱ Jeobá, raʼkháa i̱ndó ga̱jma̱a̱ numuu rí nikhánaa, ma̱ngaa numuu rí nixnáá tsiakii. Xúʼko̱ má kayuʼ nigíʼnuu mbáa ndxájulú bi̱ xóó tsenújúnʼ. Ikhaa naxmiéjunʼ wéñuʼ numuu rí mbá ruʼwambiiʼ niʼni gámbóo goʼwóo. Mú a̱ngiu̱lú niguwáʼ nimbayíí mu muni̱i̱ goʼwóo. Ikhaa niʼthí rí nda̱a̱ ajngáa mu maʼthí rí nikumu̱u̱. Ikhú niʼthí: “Núma̱aʼ Jeobá”. Xúgiáanʼ nuxnáa núma̱aʼ rí kuaʼdiin a̱ngiu̱lú bi̱ naxmiéjunʼ kuyulúʼ. Mú itháan nuxnáa núma̱aʼ Jeobá ga̱jma̱a̱ Jesucristo bi̱ nuñewu̱nlú.

18. Índo̱ natatsaʼwáminaʼ náa numuu rí Jesús niʼni milagros, ndiéjunʼ rí naʼniaʼ tsiánguá rá.

18 Índo̱ Jesús nixtáa náa tsu̱du̱u̱ Ku̱ba̱ʼ, nisngájma rí ñajunʼ “siaquiyu Dios”. Mú asndu nditháan táʼni milagros mu mbuyamajkuíí ikhaa o mambáyuminaʼ. Ikhaa niʼni má xúʼko̱ numuu rí nindoo kaʼñúún xa̱bu̱ ga̱jma̱a̱ nindoo mambáñun. Náa imbo̱o̱ artículo muʼthá itháan ga̱jma̱a̱ numuu rúʼko̱.

^ párr. 4 Isaías 25:6: “Náa kúbá rígi̱, Jeobá bi̱ gíʼdiin mbaʼin ejército maxnún xúgíʼ xuajin, mbá ganitsu miʼtsí ga̱jma̱a̱ vino rí májánʼ wéñuʼ, ganitsu miʼtsí ri gíʼdoo wéñuʼ gájtsúu ga̱jma̱a̱ vino rí nitsuwáʼ”.

^ párr. 10 Salmo 72:16: “Maʼga̱nú marigá wéñuʼ ganitsu náa tsu̱du̱u̱ ku̱ba̱ʼ; ra̱ʼkhá tháán garigá ganitsu náa inu kúbá. Maxná xndúu xóo rí najma̱a̱ náa Líbano, ga̱jma̱a̱ xa̱bu̱ bi̱ kuwa náa xuajin manindxu̱ún mbaʼin xó má iná dí rígá náa tsu̱du̱u̱ ku̱ba̱ʼ”.

^ párr. 17 Proverbios 3:27: “Ataniu̱u̱n rí májánʼ xúgínʼ, á mu naʼngo̱o̱ natambáñun”.