Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo  |  Mayo tsiguʼ 2015

Graxe̱ rí nuni bi̱ nuraxnuu

Graxe̱ rí nuni bi̱ nuraxnuu

Tsáa nindxu̱u̱ Gog ndrígóo Magog bi̱ naʼthí náa libro ndrígóo Ezequiel rá.

Mba̱yu̱ʼ tsiguʼ, náa i̱yu̱lúʼ niʼthí rí índo̱ Biblia najmuu mbiʼi Gog ndrígóo Magog, nandoo gáʼthúu̱n Satanás nda̱wa̱á rí nixriguíi náa tsu̱du̱u̱ Ku̱ba̱ʼ. Náa numuu rí xúʼko̱ niʼthí rá. Numuu rí náa libro ndrígóo Revelación naʼthí rí Satanás magíʼ maʼni gámbíin xúgínʼ xa̱bi̱i̱ Jeobá náa xúgíʼ numbaaʼ (Revelación 12:1-17). Ikha jngó nikru̱ʼu̱xu rí Gog nindxu̱u̱ imbo̱o̱ mbiʼyuu Satanás.

Mú rígi̱ maxtiʼkhu̱u̱. Guʼyáá náa numuu. Timbá, índo̱ Biblia naʼthí rí maguma gámbáa Gog, naʼthí rí Jeobá maʼni rí muphi̱i̱ xujkhú xnaʼ ga̱jma̱a̱ xujkhú xáná (Ezequiel 39:4). Ma̱ngaa naʼthí rí Jeobá maxnúu mbaaʼ “miʼdi̱i̱ náa Israel” (Ezequiel 39:11). Mú Satanás nindxu̱u̱ mbáa espíritu, ikha jngó xándoo muphi̱i̱ xujkhúʼ ní má xándoo majuiʼdi̱i̱ gi̱jyooʼ náa tsu̱du̱u̱ Ku̱ba̱ʼ. Ma̱ngaa náa Biblia naʼthí kaʼwu rí Satanás mudama̱ʼa̱a̱n náa iñáʼ mbá 1,000 tsiguʼ. Ikha jngó ikhaa xákhúu nimbáa xujkhúʼ ní xajuiʼdi̱i̱ (Revelación 20:1, 2).

Raga̱jma̱, náa Biblia naʼthí índo̱ mambáa mbá 1,000 tsiguʼ Satanás magajnáa náa iñá mbiiʼ ga̱jma̱a̱ “maʼninduwiinʼ xuajin mba̱ʼu̱ dí rígá náa mbájndi tsu̱du̱u̱ ku̱ba̱ʼ, Gog ga̱jma̱a̱ Magog, mu magímbíin náa guerra” (Revelación 20:8). Á mu Satanás nindxu̱u̱ Gog, rúʼko̱ eyoo gáʼthi rí maʼni nduwaminaʼ ikhaa. Ga̱jma̱a̱ xándoo marigá rígi̱. Ikha jngó índo̱ libro rí na̱ʼkha̱ náa Biblia xóo Ezequiel ga̱jma̱a̱ Revelación naʼthí ga̱jma̱a̱ numuu Gog, tsíyoo gáʼthúu̱n Satanás.

Ikha jngó, tsáa ñajunʼ Gog ndrígóo Magog rá. Mú mbuʼyáá gíʼmaa rí muʼnigajmaa Biblia ma̱ngaa tsáa gágíʼ maʼni gámbáa xuajñu Dios. Náa Biblia naʼthí rí Gog ndrígóo Magog magíʼ maʼni xkujndu, ma̱ngaa ‹rey bi̱ na̱ʼkha̱ náa norte› ga̱jma̱a̱ xúgínʼ ‹reyes bi̱ kuwa náa tsu̱du̱u̱ ku̱ba̱ʼ› (Ezequiel 38:2, 10-13; Daniel 11:40, 44, 45; Revelación 17:14; 19:19). Nakujmaa dí rígi̱ xáʼni mixtiʼkhu, káaʼ má naxtiʼkhuu mbiʼyuu. Náa numuu eʼthá rígi̱ rá. Numuu rí náa Biblia naʼthí rí xúgíʼ xuajen mba̱ʼu̱ muyambáá náa xkujndu rígi̱, ikhú gági̱ʼdu̱u̱ guerra rí mbiʼyuu Armagedón (Revelación 16:14, 16).

Á mu nduʼyáá xúgíʼ versículos rígi̱ rí naʼthí ga̱jma̱a̱ numuu xkujndu rí iwáá kayuʼ náa mugíʼ muni gámbáa xuajñu Dios, nakru̱ʼu̱lú rí Gog  ndrígóo Magog raʼkháa Satanás. Gog ndrígóo Magog nindxu̱u̱ mbá grupo náa mbaʼa xuajen mba̱ʼu̱. Lá mayéʼga edxu̱u̱ náa iwáá xkujndu rígi̱ ‹rey bi̱ na̱ʼkha̱ náa norte› ráʼ. Tséʼyáá májánʼ xú phú gáʼni. Mú, mbáa maʼni xúʼko̱ kaʼnii numuu rí Jeobá niʼthúu̱n Gog: “Mi̱dxa̱ʼ náa xtaa, asndu mitsínguánʼ kayuʼ náa norte, ikháánʼ gajmiáanʼ mbaʼa xuajin, xúgínʼ tramiunʼ wáyú, mbá asamblea mba̱a̱, asndu mbá ejército mba̱a̱” (Ezequiel 38:6, 15).

Gaʼyee Daniel niʼthí mbá rí nambriguii ga̱jma̱a̱ numuu rey bi̱ na̱ʼkha̱ náa norte: “Ajngáa rí na̱ʼkha̱ náa nagájnuu a̱jkha̱ʼ ga̱jma̱a̱ náa norte maʼni rí maxkájkiu̱u̱n, ga̱jma̱a̱ makiʼnáa wéñuʼ índo̱ gagájnuu mu maʼni gámbíin mbaʼin wéñuʼ. Ga̱jma̱a̱ matsi̱ji̱ palacio náa majñuʼ lamáa ga̱jma̱a̱ kúbá rí nigumaratáá; ga̱jma̱a̱ ikhaa mambáa, ga̱jma̱a̱ nda̱wa̱a̱ tsáa gámbáyúu” (Daniel 11:44, 45). Rí niʼthí Daniel nambriguii ga̱jma̱a̱ rí niʼthí Ezequiel numuu Gog (Ezequiel 38:8-12, 16).

Ndiéjunʼ garigá nda̱wa̱á kayuʼ índo̱ gúgíʼ muni gámbáa xuajñu Dios rá. Daniel 12:1 naʼthí: “Ga̱jma̱a̱ mbiʼi rúʼko̱ Miguel mawiji̱, Xa̱bu̱ Ñajunʼ wíji̱ ga̱jma̱a̱ numuu xuajñanʼ”. Ga̱jma̱a̱ naʼthí xóó “Ga̱jma̱a̱ marigá mbiʼi rí marigá wéñuʼ gamiéjunʼ dí nimbá miʼtsú xóó tsírígá, ikhú ni̱jkha̱nú niʼni mbá xuajen mba̱a̱”. Rígi̱ nandoo gáʼthúu̱n índo̱ marigá majphú mba̱a̱ gaʼkhu. Nda̱wa̱á kayuʼ, Daniel 12:1 naʼthí rí xuajñu Dios “makáwíin, xúgínʼ bi̱ nigumaraʼmáʼ mbiʼñún náa libro”. Ndiéjunʼ eyoo gáʼthúu̱n versículo rígi̱ rá. Rí Jesucristo, bi̱ “wíji̱” xóo rey asndu nákha tsiguʼ 1914, maxmínaʼ mu mambáyulúʼ índo̱ gáʼni Armagedón. Revelación 19:11-21 naʼthí ikhaa má kayuʼ dí gáʼni Jesucristo nda̱wa̱á dí gárígá xkujndu rí iwáá kayuʼ.

Mú, tsáa lá nindxu̱u̱ Gog ga̱jma̱a̱ Magog bi̱ naʼthí náa Revelación 20:8 rá. Ni̱ndxu̱ún xúgínʼ xa̱bu̱ bi̱ xáʼndun gúyáá Jeobá ga̱jma̱a̱ mugíʼ muni gámbíin xa̱bi̱i̱ índo̱ gárígá prueba rí iwáá kayuʼ índo̱ gámbáa 1,000 tsiguʼ. Xa̱bu̱ bugi̱ maguiñunʼ kuyáá xuajñu Dios xó má Gog ndrígóo Magog. Mú Dios maʼni gámbíin xóo gáʼnii gámbáa Gog ndrígóo Magog náa Armagedón (Revelación 19:20, 21; 20:9). Ikha jngó náa Biblia naxná mbiʼyuu Gog ga̱jma̱a̱ Magog xúgínʼ bi̱ xúnimbu̱ún náa Dios índo̱ gámbáa 1,000 tsiguʼ.

Bi̱ nutaráʼaxu numuu Jeobá nanduxuʼ munigajmaa wéñuʼ Biblia. Ikha jngó kuwáanʼxu xawii mu makru̱ʼu̱xu tsáa ganindxu̱u̱ ‹rey bi̱ na̱ʼkha̱ náa norte› nda̱wa̱á. Asndu tsáa má gáya edxu̱u̱ náa xuajen mba̱ʼu̱ mu muni gámbáanʼ, rígá a̱jma̱ rí nduʼyáá májánʼ. Timbá, rí Gog ndrígóo Magog gajmíi̱n xa̱bi̱i̱ xáʼngu̱u̱n ga̱jma̱a̱ maguma gámbíin. Raga̱jma̱, dí rey ndrígúlú maʼni káwáanʼ ga̱jma̱a̱ maniñulú makuwáanʼ náa numbaaʼ nuxi̱ʼ náa marigá tsímáá ma̱ngaa ní xámiñulu (Revelación 7:14-17).