Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo  |  Abril tsiguʼ 2015

Ga̱ku̱ma̱ʼ xtayáá má xúʼko̱ Jeobá

Ga̱ku̱ma̱ʼ xtayáá má xúʼko̱ Jeobá

“Gakumaʼ xtayáá ikhaa xúgíʼ mbiʼi, oh xuajin.” (SALMO 62:8)

1-3. Náa numuu Pablo ndiʼyoo májánʼ rí ma̱ndoo maku̱mu̱u̱ kaʼyoo Jeobá rá. (Atayáá timbá xti’khu.)

CRISTIANOS bi̱ nikuwa Roma nákha siglo timbá nikuwa mbiʼi gakhi̱i̱ wéñuʼ. Romanos nixkúún ga̱jma̱a̱ nini gíníin mbanda̱ʼkho. Nitsudiin rí niwiñunʼ kuñún xa̱bu̱ ga̱jma̱a̱ rí nitsikha̱a̱ xuajin. Nirugui̱i̱n mbaʼin cristianos, ga̱jma̱a̱ tikhun nigún kudiin muphu̱u̱n xujkhú xáná. Tikhun nidujmiin náa ixi̱ ga̱jma̱a̱ nitsikhi̱i̱n mbiʼñún mu mambiʼi rí mbruʼun náa xuajen. Cristianos ndiyáá dí asndu tsáa ma̱ndoo magíʼnuu rígi̱.

2 Ikhú índo̱ niʼni mbiʼi mingíjyúuʼ, romanos nirugua̱a̱ apóstol Pablo. Mbáa ikhaa niraximínáʼ á mu iʼwíínʼ cristianos mumbayíí. Náa numuu rá. Numuu rí mbá miʼtsú ikhaa nigiʼdoo mbá xkujndu mba̱a̱ ga̱jma̱a̱ nimbáa tambáyúu. Mú Pablo niʼthí rí Jeobá nimbáyúu ga̱jma̱a̱ nijmiuu Jesús ma̱ngaa nixnúu tsiakii rí ndiyóoʼ. Asndu niʼthí rí nigumakríyaaʼ ‹náa rawunʼ león› (2 Tim. 4:16, 17). *

3 Pablo nirmáʼáan a̱jkiu̱u̱n xú káʼnii Jeobá nimbáyúu nákha ginii, ikha jngó ndiʼyoo májánʼ rí ma̱ndoo maku̱mu̱u̱ kaʼyoo. Ga̱jma̱a̱ rí Jeobá  maxnúu tsiakii mu maʼngo̱o̱ maraʼnuu xkujndu rúʼko̱ ga̱jma̱a̱ i̱ʼwáʼ rí gáraʼnuu nda̱wa̱á. Ndiʼyoo májánʼ rí asndu niʼthí dí Señor maʼni kríyaaʼ náa xúgíʼ dí ra̱májánʼ rí gagiʼnuu (2 Tim. 4:18). Ndiʼyoo gajkhun rí Jeobá ga̱jma̱a̱ Jesús mumbayíí má xúʼko̱ maski ajndu a̱ngui̱i̱n xándoo gumbayíí.

ATAYÁÁ XKUJNDU XÓO MBÁ RÍ MAMBÁYAʼ MAKUMAʼ XTAYÁÁ JEOBÁ

4, 5. a) Tsáa gándoo gambáyuluʼ má xúʼko̱ rá. b) Xú káʼnii gándoo ikháánʼ mambaxáʼ itháan májánʼ ga̱jma̱ʼ Jeobá rá.

4 Lá niraʼdáá ikháánʼ mbá xkujndu rí gakhii wéñuʼ ga̱jma̱a̱ nikumaʼ rí mbáwiin xtaa ráʼ. Mbáa nánguá niraʼdáá ñajunʼ o niraʼdáá xkujndu náa escuela. Mbáa niraʼdáá mbá nandii o imbo̱o̱ xkujndu gakhii. Mbáa niraxtaa gíná wéñuʼ numuu rí nimbáa tambáyaaʼ. Mbáa tikhu xkujndu ni̱ndxu̱u̱ mingíjyúuʼ wéñuʼ rí xa̱bu̱ numbaaʼ tséʼngu̱u̱n gunimbánii. Ndiéjunʼ gándoo gátani rá. Náa Biblia naʼtulúʼ rí gakumulú kuʼyáá Jeobá (Prov. 3:5, 6). Lá gajkhun ma̱ndoo makumulúʼ kuʼyáá xáʼ. ¡Ma̱ndoo! Náa Biblia na̱ʼkha̱ mbaʼa historias rí naʼni mbuʼyáá rí gajkhun Jeobá nambáñun xa̱bi̱i̱.

Á mu xtaʼdáá mbá xkujndu atayáá xóo mbá náa rí ma̱ndoo maku̱ma̱ʼ xtayáá Jeobá asndu káxi̱ a̱jkia̱nʼ

5 Á mu ikháánʼ xtaʼdáá mbá xkujndu ga̱jma̱a̱ nimbáa tsimbáyaaʼ, xaxmiéjuanʼ. Atani xó má niʼni Pablo ga̱jma̱a̱ atayáá xkujndu xóo mbá náa rí ma̱ndoo maku̱ma̱ʼ xtayáá Jeobá asndu káxi̱ a̱jkia̱nʼ. Ma̱ngaa atayáá xkujndu xó mbá rí mambáyaʼ ma̱ta̱ya̱a̱ ikháánʼ mínaʼ xú káʼnii Jeobá nañewanʼ. Rúʼko̱ gáʼni rí maku̱ma̱ʼ xtayáá itháan Jeobá ga̱jma̱a̱ mambaxáʼ itháan májánʼ ga̱jma̱ʼ.

ÍNDO̱ JEOBÁ TSÍRIʼÑA̱A̱ NACHA̱ RÍ NUʼTÁJKÁAN

6. Náa numuu rí mingíjyúuʼ ni̱ndxu̱u̱ rí makumulúʼ kuʼyáá Jeobá índo̱ kuaʼdáá mbá xkujndu gakhii rá.

6 Atatsaʼwáminaʼ rí ikháánʼ xtaʼdáá mbá xkujndu mingíjyúuʼ ga̱jma̱a̱ ra̱ʼkhá tháán exmiéjuanʼ. Nitani̱ má xúgíʼ mu matanimbánii ga̱jma̱a̱ nitanda̱ʼa̱a̱ Jeobá rí mambáyaʼ. Á mu xúʼko̱, xaxmiéjuanʼ ga̱jma̱a̱ ga̱ku̱ma̱ʼ rí Dios mambáyaʼ (atraxnuu Salmo 62:8 ga̱jma̱a̱ 1 Pedro 5:7). Á mu gajkhun nandaʼ mambaxáʼ májánʼ ga̱jma̱ʼ Jeobá, gíʼdoo numuu rí majmañaaʼ maku̱ma̱ʼ xtayáá ikhaa. Maski asndu mingíjyúuʼ ni̱ndxu̱u̱. Náa numuu rá. Mbá numuu ni̱ndxu̱u̱ rí Jeobá tsériʼña̱a̱ nacha̱ rí nuʼtájkáan (Sal. 13:1, 2; 74:10; 89:46; 90:13; Hab. 1:2).

Jeobá nandoo kaʼyulúʼ xóo mbáa anu̱lú ga̱jma̱a̱ ndaʼyoo rí eyúluʼ

7. Náa numuu rí Jeobá tsériʼña̱a̱ mbá nacha̱ rí nuʼtájkáan rá.

7 Náa numuu rí Jeobá tsériʼña̱a̱ nacha̱ rí nuʼtájkáan rá. Mú makru̱ʼu̱lú, garmáʼáan a̱jkiu̱lúʼ rí náa Biblia naʼthí rí Jeobá ni̱ndxu̱u̱ Anu̱lú ga̱jma̱a̱ ikháanʼ ni̱ndxu̱lú e̱ji̱i̱n (Sal. 103:13). Xa̱bu̱ tséxnún e̱jñún xúgíʼ rí nundu̱ʼu̱u̱n. Ga̱jma̱a̱ índo̱ rígá rí nuxnún, tséxnún nacha̱. Ma̱ngaa, e̱ji̱n nguáná rígá mbá rí nunda̱ʼa̱ mú nda̱wa̱á nánguá eñún. Xa̱bu̱ ma̱ngaa nduyáá rí gambáñun e̱jñún ga̱jma̱a̱ rí na̱nguá. Á mu xa̱bu̱ nuxnún e̱jñún xúgíʼ rí nundu̱ʼu̱u̱n, ikhiin mani̱ndxu̱ún xóo yumbáá ndrígu̱ún. Mú xa̱bu̱ nduyáá ndiéjunʼ eñún e̱jñún ga̱jma̱a̱ nguáná gúxnúún rí nda̱ñúnʼ. Xúʼko̱ má kayuʼ eʼni Jeobá. Ikhaa nandoo kaʼyulúʼ wéñuʼ, ndaʼyoo rí eyúluʼ ga̱jma̱a̱ nguáná ganindxu̱u̱ itháan májánʼ rí maxnúlúʼ. Ikha jngó ndayóoʼ rí majmañulúʼ muguaʼthi̱i̱n ga̱jma̱a̱ mbuʼyáá xú káʼnii Jeobá gáriʼña̱a̱ (mataxkamaa mbá ku̱ma̱ rí nagujtuminaʼ náa Isaías 29:16 ga̱jma̱a̱ 45:9).

8. Ndiéjunʼ eʼthúlú Jeobá rá.

 8 Ma̱ngaa garmáʼáan a̱jkia̱nʼ rí Jeobá ndaʼyoo rí gáʼngo̱o̱ maraʼnuu mámbáa (Sal. 103:14). Ikhaa naxnulu má xúʼko̱ tsiakii rí nda̱yúlúʼ. Nguáná nundxa̱ʼwáá edxu̱lúʼ rí nánguá eʼngúlú itháan. Mú Jeobá naʼthúlúʼ á mu mbá xkujndu ni̱ndxu̱u̱ mingíjyúuʼ wéñuʼ ikhaa gambáyuluʼ mu maʼngulú muraʼníí (atraxnuu 1 Corintios 10:13). Nduʼyáá májánʼ rí Jeobá ndaʼyoo ndiéjunʼ rí maʼngulú muraʼníí ga̱jma̱a̱ rúʼko̱ naʼni rí xaxmiéjunlú.

9. Á mu Jeobá tsériʼña̱a̱ nacha̱ rí naratájkáan, ndiéjunʼ gíʼmaa matani̱i̱ rá.

9 Á mu Jeobá tsériʼña̱a̱ nacha̱ rí naratájkáan, araʼthi̱i̱n. Garmáʼáan a̱jkia̱nʼ rí ikhaa nandoo mambáyulúʼ, mú nagiʼthu̱u̱n nguáná ganindxu̱u̱ itháan májánʼ mariʼña̱a̱. Náa Biblia naʼthí rí Jeobá gíʼthu̱u̱n rí mambáyulúʼ mu masngájma rí májánʼ a̱jkiu̱u̱n, numuu rí ikhaa ni̱ndxu̱u̱ jmbii. Ga̱jma̱a̱ naʼthí rí bi̱ nakumún kuyáá kuwa tsímáá (Is. 30:18).

ÍNDO̱ KUAʼDÁÁ XKUJNDU GAKHII WÉÑUʼ

10-12. a) Náa numuu rí mingíjyúuʼ wéñuʼ matiewa̱a̱n mbáa bi̱ xtayáá á mu naʼniuu nandii rá. b) Índo̱ kuaʼdáá mbá xkujndu ga̱jma̱a̱ nakumulú kuʼyáá Jeobá, xú káʼnii embáxulú gajmiúlú xá. Atagíʼ mbá xkri̱da.

10 Náa kutriga̱ a̱jma̱ niʼthá rí Pablo nigumakríyaaʼ ‹náa rawunʼ león› (2 Tim. 4:17). Á mu ikháánʼ mangáán nitamíniʼ ga̱jma̱a̱ numuu mbá xkujndu gakhii wéñuʼ ma̱ngaa naku̱ma̱ʼ xóo nikumu̱u̱ Pablo, ndiéjunʼ gíʼmaa matani rá. Gíʼdoo wéñuʼ numuu rí maku̱ma̱ʼ xtayáá Jeobá. Mbá xkri̱da, lá xtaa ratiewa̱a̱n mbáa bi̱ xtayáá bi̱ gíʼdoo mbá nandii ráʼ. Mbáa nitanda̱ʼa̱a̱ Jeobá rí maxnáʼ tsiakii ga̱jma̱a̱ matraʼwíí májánʼ rí matani. * Xaxmiéjuanʼ, numuu rí natayáá rí Jeobá ndaʼyoo rí xtaa ratagíʼnii. Natayáá rí ikhaa gámbayaʼ ma̱ngaa ga̱jma̱a̱ manindxa̱ʼ jmbii (Sal. 32:8).

Ga̱ku̱ma̱ʼ rí Jeobá maxnáʼ tsiakii mu manindxa̱ʼ jmbii ga̱jma̱a̱ rí matanimbaʼ

11 Mú nguáná maku̱ma̱ʼ rí Jeobá na̱nguá xtáa rambáyaʼ. Mbáa médicos tsémbanun xú káʼnii gúni tanáá bi̱ xtayáá. O mbáa niraʼthi̱i̱n rí a̱ngia̱nʼ muxnaʼ tsiakii, mú ikhiin nuni marigá itháan xkujndu. Ikhú mbaʼyóoʼ rí matanda̱ʼa̱a̱ wéñuʼ tsiakii Jeobá ga̱jma̱a̱ ataxuʼmaminaʼ má xúʼko̱ náa ikhaa (atraxnuu 1 Samuel 30:3, 6). Nda̱wa̱á, índo̱ gakruaʼaʼ xú káʼnii nimbáyaʼ Jeobá, ikhú mambaxáʼ itháan májánʼ ga̱jma̱ʼ.

12 Guʼyáá xkri̱da ndrígóo mbáa ndxájulú bi̱ nagumbiʼyuu Linda. * Ikhaa niñewu̱u̱n anu̱u̱ ga̱jma̱a̱ ru̱dúu̱ mba̱yu̱ʼ mbiʼi nákha xóó tsikháñun. Naʼthí rí ajmbio̱o̱, ndxájuu ga̱jma̱a̱ ikhaa mbaʼa nuthu na̱nguá ndiyáá rí muni. Nguáná nikumún rí xáʼngu̱u̱n itháan. Mú rí mbiʼi xúgi̱ nduyáá májánʼ rí Jeobá nimbáñun mu maʼngu̱u̱n. Ikhaa ndaʼyoo májánʼ dí Jeobá nixnúún tsiakii rí ndiñúnʼ, mu itháan índo̱ nánguá eyáá xú káʼnii gunimbánii xkujndu.

13. Xú káʼnii nimbáyúu ndxájulú Rosa rí nikumu̱u̱ kaʼyoo Jeobá rá.

13 Á mu nakumulú kuʼyáá káxi̱ Jeobá, ikhaa mambáyulúʼ maʼngulú índo̱ guraʼníí gamiéjunʼ dí gakhii wéñuʼ. Rúʼko̱ ni̱ndxu̱u̱ rí nigíʼnuu mbáa ndxájulú bi̱ nagumbiʼyuu Rosa. Ajmbio̱o̱ na̱nguá ni̱ndxu̱u̱ mbáa xa̱bi̱i̱ Jeobá ga̱jma̱a̱ xtáa randa̱ʼa̱a̱ divorcio. Ikhú má mbiʼi rúʼko̱ ndxájuʼ ndiʼyoo rí gíʼdoo mbá nandii mbiiʼ wéñuʼ. Ga̱jma̱a̱ nguáthá gu̱nʼ nda̱wa̱á nikháñu a̱ʼgiu̱u̱ ndxájuu. Xúgíʼ rígi̱ ndiʼyoo gakhii wéñuʼ Rosa. Índo̱ ni̱jkha̱ raʼni̱i̱ a̱jkiu̱u̱n, ikhaa ninindxu̱u̱ precursora regular. Mú ikhú nikháñu ru̱dúu̱, ndiéjunʼ nimbáyúu maʼngo̱o̱ xúgíʼ rúʼko̱ xá. Rí maʼtájkáan xúgíʼ mbiʼi náa  Jeobá, mu maʼthúu̱n rí eyoo maʼni maski ajndu na̱nguá gíʼdoo wéñuʼ numuu. Ikhaa naʼthí rí nimbáxu̱u̱ májánʼ ga̱jma̱a̱ Jeobá. Ma̱ngaa naʼthí rí nijmañuu maku̱mu̱u̱ kaʼyoo ki xóo rí maku̱mu̱u̱ kaʼyaminaʼ ikhaa o náa iʼwíínʼ xa̱bu̱. Rosa nikumu̱u̱ rí gajkhun Jeobá xtáa rambáyúu, numuu rí xúgíʼ rí ndayóoʼ ikhaa nagiʼdoo. Nikumu̱u̱ rí xtáa rañajunʼ mijngii ga̱jma̱a̱ Jeobá.

Xkujndu dí rígá náa guʼwúlú ma̱ndoo masngájma á mu nandulúʼ kuʼyáá wéñuʼ Jeobá (Atayáá kutriga̱ 14 asndu 16)

14. Xú káʼnii gámbáyaʼ Jeobá á mu naguma expulsar mbáa bi̱ xtayáá rá.

14 Guʼtá ga̱jma̱a̱ numuu imbo̱o̱ xkujndu rí gakhii wéñuʼ. Mbáa nigumaa expulsar mbáa bi̱ xtayáá náa congregación. Ikháánʼ natayáá rí náa Biblia naʼthí dí ragíʼmaa muʼthámijna gajmiúlú (1 Cor. 5:11; 2 Juan 10). Mú ikháánʼ nandaʼ xtayáá wéñuʼ, mbáa maku̱ma̱ʼ dí mingíjyúuʼ wéñuʼ matanimbaníí rúʼko̱. Xú káʼnii gándoo gámbayaʼ Jeobá rá. Ikhaa maxnáʼ tsiakii rí nda̱yáaʼ mu manindxa̱ʼ jmbii ga̱jma̱a̱ rí matanimbaʼ. Ga̱ku̱ma̱ʼ xtayáá Jeobá ga̱jma̱a̱ atayáá rúʼko̱ xóo mbá rí mambáyaʼ mu mataxuʼmáminaʼ itháan náa ikhaa.

15. Ndíjkha rí Adán táʼnimbo̱o̱ kaʼyoo Jeobá rá.

15 Ma̱ndoo muʼni mbríguii rígi̱ ga̱jma̱a̱ rí niʼni Adán. Ndíjkha rí ni̱ʼkhu̱ xndúu ixi̱ rí nixnúu Eva xá. Lá nikumu̱u̱ rí ma̱ndoo mikhu ga̱jma̱a̱ maxtáa má xúʼko̱ xáʼ. Na̱nguá, ‹Adán tágumanduwaʼ› (1 Tim. 2:14). Ndíjkha rí niʼnimbo̱o̱ kaʼyoo a̱ʼgiu̱u̱ ki xóo Jeobá rá. Numuu rí nindoo kaʼyoo itháan a̱ʼgiu̱u̱ ki xóo Jeobá (Gén. 3:6, 17). Ndiéjunʼ ejmañulú ga̱jma̱a̱ numuu rígi̱ rá.

16. Tsáa gíʼmaa maʼndulú kuʼyáá itháan ga̱jma̱a̱ náa numuu rá.

16 Rí niʼni Adán naʼsngúlúʼ rí gíʼmaa maʼndulú kuʼyáá itháan Jeobá ki xóo imba̱a̱ xa̱bu̱ (atraxnuu Mateo 22:37, 38). Náa numuu rá. Numuu dí rúʼko̱ mambáñun itháan bi̱ kuʼñúún, maski ajndu ni̱ndxu̱ún o na̱nguá xa̱bi̱i̱ Jeobá. Ikha jngó ataniminaʼ maʼnda̱ʼ xtayáá itháan Jeobá ma̱ngaa  mámbá mbiʼi ga̱ku̱ma̱ʼ xtayáá. Á mu najmáaʼ eʼni mbáa bi̱ xtayáá bi̱ nigumaa expulsar, aratháán Jeobá xú káʼnii ku̱ma̱ʼ (Rom. 12:12; Filip. 4:6, 7). * Maski ajndu xtáa gíná wéñuʼ, atayáá xkujndu rígi̱ xóo mbá rí mambáyaʼ mambaxáʼ itháan májánʼ ga̱jma̱ʼ Jeobá. Xúʼko̱ gándoo ga̱ku̱ma̱ʼ xtayáá ikhaa ga̱jma̱a̱ á mu ikháánʼ natatsimbaaʼ xtayáá xúgíʼ rí natani magajnúu itháan májánʼ.

NDIÉJUNʼ GÍʼMAA MATANI ÍNDO̱ XTAA RARAʼTHI̱I̱N RÁ.

Á mu nuʼtáraʼa má xúʼko̱, musngájma rí nakumulú kuʼyáá Jeobá (Atayáá kutriga̱ 17)

17. Á mu nuʼtáraʼa má xúʼko̱, ndiéjunʼ guguaʼthi̱i̱n rá.

17 Ndíjkha rí Jeobá niʼnikríyaaʼ Pablo ‹náa rawunʼ león› rá. Pablo niʼthí rí mu ma̱ndoo maʼtáraʼa má xúʼko̱ ga̱jma̱a̱ mambóo ñajunʼ rí Dios nixnúu (2 Tim. 4:17). Ma̱ngaa Jeobá nixnúlú mbá ñajunʼ rí muʼtáraʼa. Ikhaa ndaʼyulú xóo bi̱ nañajunʼ gajmiúlú (1 Cor. 3:9; 1 Tes. 2:4). Á mu nuʼtáraʼa má xúʼko̱, nduʼyáá májánʼ rí Jeobá maxnúlúʼ xúgíʼ rí nda̱yúlúʼ (Mat. 6:33). Ma̱ngaa, xáʼniulu mingíjyúuʼ muguaʼthi̱i̱n rí ikhaa mariʼña̱a̱ rí nuʼtájkáan.

18. Ndiéjunʼ gándoo gúʼni mu mambáxulúʼ májánʼ gajmiúlú Jeobá ga̱jma̱a̱ makumulúʼ kuʼyáá itháan xá.

18 Ataniminaʼ rí xúgíʼ mbiʼi mambaxáʼ itháan májánʼ ga̱jma̱ʼ Jeobá. Índo̱ gáraʼdáá mbá xkujndu gakhii, atayáá xóo mbá rí mambáyaʼ mataxuʼmáminaʼ náa Jeobá. Atraxnuu ga̱jma̱a̱ atanigajmaa̱ Biblia ma̱ngaa atríyaʼ mbiʼi mu matatsaʼwa̱a̱ edxa̱ʼ rí nitraxnuu. Xátatsiʼñáanʼ raratájkáan ga̱jma̱a̱ atani má xúʼko̱ ñajunʼ Jeobá. Á mu natani xúgíʼ rígi̱, ma̱ndoo ma̱ta̱ya̱a̱ gajkhun rí Jeobá mambáyaʼ ga̱jma̱a̱ xkujndu rí xtaʼdáá xúgi̱ ma̱ngaa rí gáraʼdáá nda̱wa̱á.

^ párr. 2 Mbáa Pablo nindoo gáʼthi rí ni̱ndxu̱u̱ mbáa león gajkhun o i̱mba̱ xkujndu gakhii.

^ párr. 10 Náa revistas ndrígúlú rígá tikhu artículos rí nambáñun xa̱bu̱ bi̱ nandoo káñuun ga̱jma̱a̱ bi̱ nuñewu̱u̱n. Mataxkamaa tikhu artículos rígi̱ náa ¡Despertad! 8 ñajunʼ gu̱nʼ febrero tsiguʼ 1994, 8 ñajunʼ gu̱nʼ febrero tsiguʼ 1997, 22 ñajunʼ gu̱nʼ mayo tsiguʼ 2000 ga̱jma̱a̱ 22 ñajunʼ gu̱nʼ enero tsiguʼ 2001.

^ párr. 12 Nixtiʼkhu̱u̱ mbiʼñún.

^ párr. 16 Náa revistas ndrígúlú na̱ʼkha̱ tikhu artículos rí nambáñun bi̱ guáʼdiin a̱ngiu̱ún expulsados. Mataxkamaa tikhu artículos náa La Atalaya 1 ñajunʼ gu̱nʼ septiembre tsiguʼ 2006, ináa 17 asndu 21, ga̱jma̱a̱ náa 15 ñajunʼ gu̱nʼ enero tsiguʼ 2007, ináa 17 asndu 20.