Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo  |  Marzo tsiguʼ 2015

Lá maʼngaaʼ maraxtaa xawii ráʼ.

Lá maʼngaaʼ maraxtaa xawii ráʼ.

“Gajuhuala xahui, tia tsiyala na mbiʼi jame ni na hora.” (MATEO 25:13)

1, 2. a) Ndiéjunʼ niʼthí Jesús rí marigá índo̱ gaʼni iwáá mbiʼi rá. b) Ndiéjunʼ gúʼyáá náa artículo rígi̱ rá.

JESÚS gíiʼ gajmíi̱n apóstoles Pedro, Andrés, Santiago ga̱jma̱a̱ Juan náa kúbá rí mbiʼyuu Olivos, náa nakujmaa templo ndrígóo Jerusalén. Ikhú nigíʼdu̱u̱ niʼthún rí garigá índo̱ gaʼni iwáá mbiʼi náa numbaaʼ xkawiʼ rígi̱, índo̱ ganindxu̱u̱ rey náa Reino ndrígóo Dios. Jesús niʼthún rí mbiʼi rúʼko̱ maxtáa mbáa “ñumba tsi jmbi, tsi majan indxaʼhuaminaʼ” bi̱ mariʼkuriyaʼ náa tsu̱du̱u̱ Ku̱ba̱ʼ. Ñumba bugi̱ magiʼdoo ñajunʼ rí muxna ganitsu rí na̱ʼkha̱ náa Dios náa cristianos índo̱ gáʼñúnʼ (Mat. 24:45-47).

2 Nda̱wa̱á Jesús niʼthún mbá historia ga̱jma̱a̱ numún gu̱wi̱nʼ wa̱ʼxa̱ʼ bi̱ xóó tsínuju̱nʼ (atraxnuu Mateo 25:1-13). Náa artículo rígi̱ gúʼthá ga̱jma̱a̱ numuu historia rígi̱ ma̱ngaa mbuʼyáá ajtsú enii. Timbá, ndiéjunʼ nindoo gáʼsngáa Jesús náa historia rígi̱ rá. Raga̱jma̱, xú káʼnii enimbaníí rígi̱ bi̱ kaxtaʼwíin bi̱ ni̱ndxu̱ún jmbiin rá. Ga̱jma̱a̱ ndiéjunʼ rí gakhánun xá. Ragajtsú, xú gándoo gambáyuluʼ xúgiáanʼ rí mbiʼi xúgi̱ rá.

 NDIÉJUNʼ NINDOO GÁʼSNGÁA JESÚS RÁ.

3. a) Tsiguʼ rí ninújngoo, xú káʼnii esngáa i̱yu̱lúʼ historia ndrígu̱ún gu̱wi̱nʼ wa̱ʼxa̱ʼ bi̱ xóó tsínuju̱nʼ rá. b) Índo̱ nuʼgíiʼ wéñuʼ edxu̱lúʼ mbuʼyáá xóo dí ragíʼdoo wéñuʼ numuu, ndiéjunʼ gárígá rá.

3 Náa artículo rí ndiʼyáá ginii nijmañulúʼ rí tsiguʼ rí ninújngoo, ñumbáá tsí jmbii niriʼkhuu xú káʼnii eʼsngáa tikhu historia rí na̱ʼkha̱ náa Biblia. Nákha ginii niʼthí ndiéjunʼ eyoo gáʼthi mámbá historia. Mú rí xúgi̱ naʼthí rí mambáyulúʼ náa mámbá historia. Mbá xkri̱da, gundxaʼwamíjna̱ náa historia ndrígu̱ún gu̱wi̱nʼ wa̱ʼxa̱ʼ bi̱ xóó tsínuju̱nʼ. Nakha wajyúúʼ naʼthí ndiéjunʼ eyoo gáʼthúu̱n mámbá rí na̱ʼkha̱ náa historia, xóo lámparas, aceite ga̱jma̱a̱ mbaʼa ru̱jtu̱. Mú, índo̱ nuʼgíiʼ wéñuʼ edxu̱lúʼ mbuʼyáá xóo dí ragíʼdoo wéñuʼ numuu, mbáa mandáti̱ga̱ ikha rí gíʼdoo numuu. Ikha jngó náa artículo rígi̱ gúʼyáá ndiéjunʼ gáʼsngúlú.

Wa̱ʼxa̱ʼ bi̱ xóó tsínuju̱nʼ ndiyóoʼ makuwá xawii ga̱jma̱a̱ makamuu lámpara ndrígu̱ún índo̱ gáʼkha̱nú novio

4. a) Tsáa lá nindxu̱u̱ novio, ga̱jma̱a̱ xú káʼnii eʼyáá rá. b) Tsíin ni̱ndxu̱ún wa̱ʼxa̱ʼ bi̱ xóó tsínuju̱nʼ, ga̱jma̱a̱ xú káʼnii eʼyáá rá.

4 Mú mbuʼyáá ndiéjunʼ nindoo gáʼsngáa Jesús, ginii ndayóoʼ mbuʼyáá tsíin lá ni̱ndxu̱ún bi̱ naʼthí ga̱jma̱á numún náa historia rígi̱. Tsáa lá nindxu̱u̱ novio rá. Jesús. Xú káʼnii eʼyáá rá. Mbóo mbiʼi ikhaa niʼthí rí nindxu̱u̱ xóo mbáa novio (Luc. 5:34, 35). Tsíin lá ni̱ndxu̱ún wa̱ʼxa̱ʼ bi̱ xóó tsínuju̱nʼ rá. Ni̱ndxu̱ún “iʼhuinʼ mugu”, xóo muʼthá, cristianos bi̱ kaxtaʼwíin. Xú káʼnii eʼyáá rá. Numuu rí imbo̱o̱ mbiʼi, Jesús niʼthí rí bi̱ kaxtaʼwíin mani̱ndxu̱ún xóo xa̱bu̱ bi̱ kuda lámparas rí nakamuu numuu rí guáʼthi̱i̱n mata̱nga̱a̱ novio náa ninigúnʼ (Luc. 12:32, 35, 36). Ga̱jma̱a̱ rúʼko̱ naʼni marmáʼáan a̱jkiu̱lú rí gíʼmaa muni wa̱ʼxa̱ʼ bi̱ naʼthí ga̱jma̱a̱ numún náa historia. Ikhiin ndiyóoʼ makuwá xawii ga̱jma̱a̱ lámparas rí nakamuu índo̱ gáʼkha̱núu novio. Mangiin Pablo ga̱jma̱a̱ Juan nithi rí bi̱ kaxtaʼwíin ni̱ndxu̱ún xóo wa̱ʼxa̱ʼ bi̱ xóó tsínuju̱nʼ (2 Cor. 11:2; Rev. 14:4). Xúgíʼ rígi̱ nambáyulúʼ mbuʼyáá rí phú nindoo maʼsngáa Jesús ga̱jma̱a̱ historia ndrígu̱ún gu̱wi̱nʼ wa̱ʼxa̱ʼ bi̱ xóó tsínuju̱nʼ rígi̱ mambáñun bi̱ kaxtaʼwíin.

5. a) Nguáná gambánuu historia ndrígu̱ún mbá gu̱wi̱nʼ wa̱ʼxa̱ʼ bi̱ xóó tsínuju̱nʼ rá. b) Xú káʼnii eʼyáá rá.

5 Nguáná gambanúu historia ndrígu̱ún gu̱wi̱nʼ wa̱ʼxa̱ʼ bi̱ xóó tsínuju̱nʼ rá. Nambánuu rí naʼni iwáá mbiʼi. Xú káʼnii eʼyáá rá. Guʼyáá. Índo̱ na̱jkha̱ rámbá historia, Jesús niʼthí rí novio “niʼka” (Mat. 25:10). Náa La Atalaya 15 ñajunʼ gu̱nʼ julio tsiguʼ 2013 ndiʼyáá rí kiʼtáriyaʼ náa Mateo 24 ga̱jma̱a̱ 25 naʼthí migiñuʼ nuthu índo̱ gáʼkha̱a̱ Jesús. Ga̱jma̱a̱ ndiʼyáá rí Jesús ma̱ʼkha̱núu índo̱ garigá majphú mba̱a̱ gaʼkhu índo̱ gánda̱ʼa̱a̱ numún xa̱bu̱ ga̱jma̱a̱ maʼni gámbáa numbaaʼ xkawiʼ rígi̱. Ikha jngó nakru̱ʼu̱lú historia ndrígu̱ún mbá gu̱wi̱nʼ wa̱ʼxa̱ʼ bi̱ xóó tsínuju̱nʼ rí nambánuu índo̱ gáʼni iwáá mbiʼi, mú Jesús ma̱ʼkha̱a̱ índo̱ garigá majphú mba̱a̱ gaʼkhu.

6. Ndiéjunʼ nindoo gáʼsngáa Jesús náa historia rígi̱ rá.

6 Ndiéjunʼ nindoo gáʼsngáa Jesús náa historia rígi̱ rá. Mu ma̱ndoo mbuʼyáá, guʼyáá xú káʼnii eʼthí ginii ga̱jma̱a̱ rí naʼthí nda̱wa̱á. Náa capítulo 24 ndrígóo Mateo, Jesús niʼthí ga̱jma̱a̱ numuu ñumbáá tsí jmbii, tsí májánʼ indxaʼwaminaʼ, ikhiin ni̱ndxu̱ún mbá nguáthi̱i̱n bi̱ kaxtaʼwíin bi̱ nuxnún ikha cristianos índo̱ gáʼni iwáá mbiʼi. Náa historia ndrígu̱ún mbá gu̱wi̱nʼ wa̱ʼxa̱ʼ bi̱ xóó tsínuju̱nʼ, Jesús nindoo maʼsngáa ikhaa má kayúʼ xóo rígi̱. Mú ikha rígi̱ nindoo maʼsngúún xúgínʼ bi̱ kaxtaʼwíin bi̱ gakuwa náa gáʼni iwáá mbiʼi. Ga̱jma̱a̱ ndiéjunʼ eʼsngáa rígi̱ rá. Rí xúgínʼ ikhiin gíʼmaa makuwá xawii á mu tsíñún mujmaxiyáa rí  ma̱ndoo magúun mekhuíí (Mat. 25:13). Xú káʼnii enimbaníí bi̱ kaxtaʼwíin ikha rígi̱ rá. Guʼyáá.

XÚ KÁʼNII ENIMBANÍÍ IKHA RÍGI̱ BI̱ KAXTAʼWÍIN RÁ.

7, 8. a) Náa numuu rí nikuwa xawii wa̱ʼxa̱ʼ bi̱ nindxa̱ʼwa̱a̱ májánʼ edxu̱ún rá. b) Xú káʼnii niniratamijná bi̱ kaxtaʼwíin rá.

7 Náa historia rígi̱, Jesús niʼthí rí witsuun wa̱ʼxa̱ʼ bi̱ xóó tsínuju̱nʼ ninindxu̱ún ‹bi̱ túndxa̱ʼwa̱a̱ májánʼ edxu̱ún›. Niʼthún xúʼko̱ kaʼnii numuu rí na̱nguá kuwa xawii índo̱ ni̱ʼkha̱núu novio. Jesús ma̱ngaa niʼthí rí imbá witsuun wa̱ʼxa̱ʼ ‹bi̱ májánʼ e̱ndxa̱ʼwa̱míjna̱›. Xúʼko̱ nixná mbiʼñún numuu rí nikuwa xawii. Mú, náa numuu rí nikuwa xawii xá. Rígá a̱jma̱ numuu. Rí timbá nindxu̱u̱ numuu rí niniratami̱jná, ga̱jma̱a̱ dí raga̱jma̱ nindxu̱u̱ rí nikuwa xawii. Xúgínʼ ikhiin ndiyóoʼ makuwá xawii ga̱jma̱a̱ makamuu lámpara ndrígu̱ún kañiʼ mbruʼun. Wa̱ʼxa̱ʼ bi̱ májánʼ e̱ndxa̱ʼwa̱míjna̱ niniratami̱jná rí niyegun xóó itháan aceite, mú bi̱ túndxa̱ʼwa̱a̱ májánʼ edxu̱ún na̱nguá. Xú káʼnii niniratami̱jná bi̱ kaxtaʼwíin bi̱ ni̱ndxu̱ún jmbiin índo̱ gáʼkha̱núu Jesús rá.

8 Bi̱ kaxtaʼwíin niniratamijná mu muni rí Jeobá niʼtañajúnʼ asndu índo̱ gártumuu mbiʼi. Xú káʼnii niniratamijná xá. Timbá, nduyáá rí á mu muni ñajunʼ Jeobá ndayóoʼ muniñaʼ mbaʼa rí guáʼdáá, mu rígi̱ nuni asndu kámbá a̱jkiu̱ún. Raga̱jma̱, nuthi rí muguajún jmbu asndu índo̱ gártumuu mbiʼi, numuu rí nandún kuyáá Jeobá ga̱jma̱a̱ Jesús. Ragajtsú, na̱nguá eñún muguaʼdáá wéñuʼ mbújkha̱a̱, tsebunʼ gajmiún eʼwíínʼ ni má tsíñún kuyamijná i̱ndó ikhiin xó má eni xa̱bu̱ numbaaʼ. Bi̱ kaxtaʼwíin ni̱ndxu̱ún xóo wa̱ʼxa̱ʼ bi̱ nundxa̱ʼwa̱a̱ májánʼ edxu̱ún bi̱ nikuwa xawii ga̱jma̱a̱ nakamuu lámpara ndrígu̱ún. Mangiin kuwa xawii ga̱jma̱a̱ nuguaʼthi̱i̱n novio, maski ajndu xóo ndajyúuʼ kujmaa (Filip. 2:15).

Jesús niʼthúu̱n bi̱ kaxtaʼwíin rí makuwá jmbu

9. a) Ndiéjunʼ niʼthún Jesús bi̱ kaxtaʼwíin bi̱ kuwa mbiʼi xúgi̱ rá. b) Xú káʼnii eriʼña̱a̱ aʼwá rígi̱: “¡Guejio iʼka tsi inu xta manigun!” bi̱ kaxtaʼwíin rá. (Atayáá mbu̱júu̱ nota.)

9 I̱mba̱ numuu rí wa̱ʼxa̱ʼ bi̱ xóó tsínuju̱nʼ bi̱ nindxa̱ʼwa̱a̱ májánʼ edxu̱ún nikuwa xawii numuu rí niguaʼthi̱i̱n. Náa numuu rí Jesús niʼthí rí mbá gu̱wi̱nʼ wa̱ʼxa̱ʼ ninuʼ índo̱ ndiyáá rí novio ndijyúuʼ rá. Niʼthún bi̱ kaxtaʼwíin bi̱ kuwa mbiʼi xúgi̱ rí á mu tseguaʼthi̱i̱n novio o tsekuwa xawii maguanu munuʼ. Jesús ni̱jkha̱nú ndiʼyoo rí maski ajndu mbáa nandoo maxtáa xawii marigá i̱ʼwáʼ rí gamíi maʼni jnga̱a̱. Ikha jngó, bi̱ kaxtaʼwíin bi̱ ni̱ndxu̱ún jmbiin nini mbá tsiakii mu makuwá xawii. Xú káʼnii eni xá. Garmáʼáan a̱jkiu̱lúʼ rí náa historia, Jesús niʼthí rí wa̱ʼxa̱ʼ bi̱ xóó tsínuju̱nʼ nudxawíín aʼwá rígi̱: “¡Guejio iʼka tsi inu xta manigun!”. Mbá gu̱wi̱nʼ niriʼña, mú i̱ndó bi̱ nindxa̱ʼwa̱míjna̱ májánʼ nikuwa xawii (Mat. 25:5, 6; 26:41). Xúʼko̱ má kayuʼ, bi̱ kaxtaʼwíin bi̱ ni̱ndxu̱ún jmbiin nuriʼña̱a̱ aʼwá, rí xúgi̱ rí kuwáanʼ iwáá mbiʼi: “¡Guejio iʼka tsi inu xta manigun!”. Ga̱jma̱a̱ xú káʼnii niriʼña̱a̱ xá. Nduyáá kaʼwu rí Jesús inuu maʼga̱nú ga̱jma̱a̱ kuwa xawii índo̱ gáʼkha̱nú. * Guʼtá xúgi̱ ga̱jma̱a̱ náa námbáa historia, rí naʼthí ga̱jma̱a̱ numuu mbá mbiʼi kiejunʼ.

BI̱ NUNDXA̱ʼWA̱A̱ MÁJÁNʼ EDXU̱ÚN MARÍGÁ RÍ MAKHÁNÚN BI̱ NA̱NGUÁ, MUNDRIGÚ CASTIGO

10. Ndiéjunʼ gándoo muraxi̱mi̱jna̱ ga̱jma̱a̱ numuu rí nitamijná gu̱wi̱nʼ wa̱ʼxa̱ʼ bi̱ xóó tsínujunʼ rá.

10 Bi̱ tsíndxa̱ʼwa̱a̱ májánʼ edxu̱ún nundu̱ʼu̱u̱n aceite wa̱ʼxa̱ʼ bi̱ nundxa̱ʼwa̱a̱ májánʼ edxu̱ún mu majmúún náa lámpara ndrígu̱ún. Mú bi̱  nundxa̱ʼwa̱a̱ májánʼ edxu̱ún tsíñún gumbañúún (atraxnuu Mateo 25:8, 9). Mu mbáa rígi̱ nandoo gáʼthún rí marigá índo̱ inu ma̱ʼkha̱a̱ Jesús, rí gártumuu mbiʼi dí marigá majphú mba̱a̱ gaʼkhu. Mbáa nuraximíjna̱: “Náa numuu rí bi̱ kaxtaʼwíin bi̱ ni̱ndxu̱ún jmbii xáʼndun mumbañún iʼwíínʼ ráʼ.” Mu makru̱ʼu̱lú rígi̱, ndayóoʼ marmáʼáan a̱jkiu̱lú rí ikhú bi̱ kaxtaʼwíin nikhánún sello rí iwáá kayuʼ.

11. a) Ndiéjunʼ gárígá índo̱ inuu ma̱ʼkha̱nú majphú mba̱a̱ gaʼkhu rá. b) Índo̱ wa̱ʼxa̱ʼ bi̱ xóó tsínuju̱nʼ bi̱ nundxa̱ʼwa̱a̱ májánʼ edxu̱ún nutún eʼwíínʼ rí magún gutsi aceite, ndiéjunʼ rí eñún guthun xáʼ.

11 Inuu magi̱ʼdu̱u̱ marigá majphú mba̱a̱ gaʼkhu, xúgínʼ bi̱ kaxtaʼwíin bi̱ ni̱ndxu̱ún jmbiin náa tsu̱du̱u̱ Ku̱ba̱ʼ mudrigú sello rí iwáá kayuʼ (Rev. 7:1-4). Rúʼko̱ nasngájma rí phú magúun mekhuíí. Mú, ndiéjunʼ gugíʼnin bi̱ xakuwa xawii ga̱jma̱a̱ ní xánindxu̱ún jmbiin nákha xóó tsírígá majphú mba̱a̱ gaʼkhu rá. Rí nánguá gundrigú sello. Índo̱ gági̱ʼdu̱u̱ majphú mba̱a̱ gaʼkhu ga̱jma̱a̱ mbuyáá xú káʼnii gámbáa religión dí ragájkhun, bi̱ taguajun jmbu maguanún tsiánguá. Mbáa ikhú gakru̱ʼu̱u̱n rí nánguá kuwa xawii índo̱ gáʼkha̱nú Jesús. Á mu mbiʼi rúʼko̱ gúnda̱ʼa̱ rí mixtambáñún, ndiéjunʼ gárígá rá. Náa historia ndrígu̱ún bi̱ mbá gu̱wi̱nʼ wa̱ʼxa̱ʼ bi̱ xóó tsínuju̱nʼ gáriʼña̱a̱. Bi̱ nundxa̱ʼwa̱a̱ májánʼ edxu̱ún tsíñún muxnún aceite bi̱ tsíndxa̱ʼwa̱a̱ májánʼ edxu̱ún ga̱jma̱a̱ nutún rí magún gútsi. Mú niʼni má tikhu nduʼun má, ní nda̱wa̱a̱ tsáa egujua̱. Rí phú nindúún mutún, rí nándáa rí muni.

12. a) Índo̱ marigá majphú mba̱a̱ gaʼkhu, ndiéjunʼ gugíʼniin bi̱ kaxtaʼwíin bi̱ xánindxu̱ún jmbiin nákha xóó tséndrigú sello rí iwáá kayuʼ rá. b) Ndiéjunʼ gáʼni Jesús gajmíi̱n bi̱ mani̱ndxu̱ún xóo wa̱ʼxa̱ʼ bi̱ tsíndxa̱ʼwa̱a̱ májánʼ edxu̱ún rá.

12 Índo̱ ni̱ʼkha̱nú majphú mba̱a̱ gaʼkhu, ndiéjunʼ gúgiʼnii bi̱ kaxtaʼwíin bi̱ xáguajun jmbu rá. Bi̱ kaxtaʼwíin bi̱ ninindxu̱ún jmbiin xándoo mumbañún. Numuu rí nitumuu mbiʼi. Mugíʼnin ikháá má kayuʼ xóo rí nigíʼniin wa̱ʼxa̱ʼ bi̱ túndxa̱ʼwa̱a̱ májánʼ edxu̱ún bi̱ nigún gútsi aceite: “Niʼka tsi inu xta manigunʼ, xoma tsi juhua-ma namañu nituʼun gajmi tsi inu xta manigun naʼ ndxa tsigun, aʼkue ri nijugua xkrugua”. Índo̱ Jesús gáʼkha̱núu náa iwáá mbiʼi náa marigá majphú mba̱a̱ gaʼkhu, magimbíin bi̱ kaxtaʼwíin bi̱ ni̱ndxu̱ún jmbiin náa mekhuíí (Mat. 24:31; 25:10; Juan 14:1-3; 1 Tes. 4:17). Mú xándoo gáʼñun bi̱ ni̱ndxu̱ún xóo wa̱ʼxa̱ʼ bi̱ tséndxa̱ʼwa̱a̱ májánʼ edxu̱ún. Mbáa ikhiin muthán: “¡Señor, señor, atrambaʼta mataʼaʼxoʼ!”. Mú Jesús maʼthúún xó má niʼthún iʼwíínʼ xa̱bu̱ bi̱ túni rí jmbu: “Gako ri natanʼla, ri tsininuhuanʼla” (Mat. 7:21-23; 25:11, 12).

Mámbáa bi̱ kixtiyáaʼ gíʼmaa maraʼwíí á mu maxtáa xawii o ní xánindxu̱u̱ jmbii

13. a) Náa numuu eʼyáá rí Jesús na̱nguá nindoo gáʼthi rí mbaʼin bi̱ kaxtaʼwíin xáguajun jmbu rá. b) Náa numuu nandoo nuʼthá rí náa historia rígi̱ nasngájma rí Jesús ndaʼyoo rí bi̱ kaxtaʼwíin mani̱ndxu̱ún jmbiin rá. (Atayáá timbá xtiʼkhu.)

13 Lá nindoo gáʼthi Jesús rí mbaʼin bi̱ kaxtaʼwíin xúni̱ rí jmbu ga̱jma̱a̱ mbaʼyóoʼ mariʼkuwíin xáʼ. Na̱nguá. Mu makru̱ʼu̱lú náa numuu, gundxa̱ʼwáá edxu̱lúʼ rí eʼthí náa capítulo 24 ndrígóo Mateo. Índo̱ Jesús niʼthúu̱n ñumbáá tsí jmbii rí xánindxu̱u̱ mbáa ñumbáá bi̱ naʼni dí ra̱májánʼ, táʼthi rí xúʼko̱ kaʼnii garigá. I̱ndó xtáa raʼtáruʼun. Historia náa naʼthí ga̱jma̱a̱ numún gu̱wi̱nʼ wa̱ʼxa̱ʼ bi̱ xóó tsínuju̱nʼ narígá ikháá má kayuʼ xóo rígi̱. Jesús xtáa raʼthún bi̱ kaxtaʼwíin. Xó má witsuun wa̱ʼxa̱ʼ bi̱ xóó tsínuju̱nʼ nindxa̱ʼwa̱a̱ májánʼ edxu̱ún ga̱jma̱a̱ witsuun bi̱ na̱nguá, mámbáa bi̱ kaxtaʼwíin gíʼmaa maraʼwíí á mu maxtáa xawii o xánindxu̱u̱ xa̱bu̱ jmbii. Ikhaa má kayuʼ niʼthún Pablo a̱ngui̱i̱n bi̱ kaxtaʼwíin (atraxnuu Hebreos 6:4-9; mataxkamaa mbá ku̱ma̱ rí nagujtuminaʼ  ga̱jma̱a̱ Deuteronomio 30:19). Apóstol niʼthún mbájmbu, mú ma̱ngaa niʼthún rí ndaʼyoo rí muguajún jmbu. Rí niʼthí Jesús náa historia ndrígu̱ún gu̱wi̱nʼ wa̱ʼxa̱ʼ bi̱ xóó tsínuju̱nʼ nasngájma rí ma̱ngaa Jesús ndaʼyoo rí maguajún jmbu bi̱ kaxtaʼwíin. Ndaʼyoo rí mámbáa rí ikhiin ma̱ndoo maguajún jmbu ga̱jma̱a̱ marigá rí makhánun.

XÚ KÁʼNII GÁNDOO GAMBAÑUN RÍGI̱ “IʼHUINʼ MUGU” RÁ.

14. Náa numuu rí ma̱ndoo mambáñun mangiin “iʼhuinʼ mugu” náa historia rí niʼthí Jesús rá.

14 Historia rí niʼthí Jesús naʼsngúlúʼ mbá ikha dí ra̱mingíjyúuʼ: Rí gíʼma makuwa xawii. Maski ajndu historia rígi̱ na̱jkha̱ inún bi̱ kaxtaʼwíin, mangiin “iʼhuinʼ mugu” ma̱ndoo mambáñun (Juan 10:16). Náa numuu rá. Numuu rí Jesús niʼthí: “Ri nitanʼla ikanʼla, ika-ma itun mba xuguinʼ xabo: Gajuhuala xahui” (Mar. 13:37). Jesús gíʼthu̱u̱n rí xúgínʼ cristianos muniratamijná ga̱jma̱a̱ makuwá xawii. Ga̱jma̱a̱ xúgínʼ ikhiin ma̱ndoo mbuyaridáá xkri̱da ndrígu̱ún bi̱ kaxtaʼwíin ga̱jma̱a̱ muni rí magiʼdoo itháan numuu rí mutaraʼa. Ma̱ngaa garmáʼáan a̱jkiu̱lú rí wa̱ʼxa̱ʼ bi̱ xóó tsínuju̱nʼ bi̱ túndxa̱ʼwa̱a̱ májánʼ edxu̱ún nindu̱ʼu̱u̱n aceite wa̱ʼxa̱ʼ bi̱ nundxa̱ʼwa̱a̱ májánʼ edxu̱ún. Xánindxu̱lú xóo bi̱ túndxa̱ʼwa̱a̱ májánʼ edxu̱ún. Xúguaʼthi̱i̱n rí iʼwíínʼ xa̱bu̱ mani̱ndxu̱ún jmbiin ga̱jma̱á numulúʼ, muniratamijná ga̱jma̱á numulúʼ o makuwa xawii ga̱jma̱á numulúʼ. I̱ndó ikháanʼ ma̱ndoo muʼni xúgíʼ rígi̱. Jesús ma̱ʼkha̱ nacha̱ gánda̱ʼa̱a̱ cuenta náa xúgínʼ xa̱bu̱, ga̱jma̱a̱ mámbáa tsáa gaxnáxi̱i̱ cuenta. Ikha jngó, guʼyáá májánʼ á mu kuwáanʼ xawii.

Garmáʼáan a̱jkiu̱lú rí nimbáa ma̱ndoo mani̱ndxu̱u̱ jmbii ga̱jma̱á numulúʼ o maxtáa xawii ga̱jma̱á numulúʼ

15. Náa numuu rí nadxulú wéñuʼ xúgiáanʼ bi̱ ni̱ndxu̱lú cristianos índo̱ nuʼdxawíín rí Jesús manigúnʼ ga̱jma̱a̱ novia ndrígóo rá.

15 Xúgiáanʼ bi̱ ni̱ndxu̱lú cristianos nadxulú wéñuʼ ga̱jma̱a̱ numuu gitsigúnʼ rí niʼthí Jesús náa historia ndrígóo. Índo̱ gámbáa Armagedón, bi̱ kaxtaʼwíin mani̱ndxu̱ún novia ndrígóo Cristo mekhuíí (Rev. 19:7-9). Ga̱jma̱a̱ bi̱ gakuwa náa tsu̱du̱u̱ Ku̱ba̱ʼ mambáñun mangiin. Náa numuu rá. Numuu dí rígi̱ naʼni mbuyáá rí maxtáa mbáa Xa̱bu̱ Ñajunʼ jmbii. Ikha jngó, á mu ni̱ndxu̱lú bi̱ kaxtaʼwíin o na̱nguá, guʼni tsiakimijna mu makuwáanʼ xawii ga̱jma̱a̱ muʼniratamijná. Xúʼko̱ gándoo gákuwáanʼ tsímáá nda̱wa̱á náa rí Jeobá nikudaminaʼ maxnúlúʼ.

^ párr. 9 Náa historia, ginii mbáa nákha nandxaʼwá rí novio xtáa ikhí, ga̱jma̱a̱ nanújngoo mbiʼi asndu índo̱ novio na̱ʼkha̱nú (Mat. 25:6, 10). Ndiéjunʼ eʼsngúlúʼ rígi̱ rá. Náa iwáá mbiʼi rígi̱, bi̱ kaxtaʼwíin nakuwa xawii, ga̱jma̱a̱ niguánu nikru̱ʼu̱u̱n rí marigá índo̱ gáʼkha̱a̱ Jesús. Ikha jngó niguánu nikru̱ʼu̱u̱n rí Jesús xtáa ma gi̱i̱ xóo rey náa Reino ndrígóo Dios. Mú gíʼmaa makuwá xawii má xúʼko̱ asndu índo̱ gáʼkha̱nú.