Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo  |  Febrero tsiguʼ 2015

Ganindxu̱lú xa̱bu̱ gua̱ba̱ʼ ga̱jma̱a̱ gagáwiinʼ a̱jkiu̱lú xó má Jesús

Ganindxu̱lú xa̱bu̱ gua̱ba̱ʼ ga̱jma̱a̱ gagáwiinʼ a̱jkiu̱lú xó má Jesús

“Cristo maŋga neguiʼnuguinu jma numaʼlu, Ica ñajunʼ ri xcaridaʼlu xuri neguiʼnu Ica xuʼcui jaʼni guiʼmaʼlu muguiʼni maŋganʼlu.” (1 PEDRO 2:21)

1. Ndíjkha rí mbuʼyaridáá Jesús naʼni mu̱ʼgua̱ kanuu itháán mijngii náa Jeobá rá.

ÍNDO̱ nandulúʼ kuʼyáá mbáa, nandulúʼ mbuʼyaridáá xú káʼnii nindxu̱u̱. Xa̱bu̱ bi̱ itháan májánʼ bi̱ ma̱ndoo mbuʼyaridáá nindxu̱u̱ Jesús. Náa numuu rá. Ikhaa niʼthí: “Tsi ndiʼyeʼ, ndiʼyo Ana manga” (Juan 14:9). Jesús niʼthí rígi̱ numuu rí ikhaa ndiʼyaridoo májánʼ wéñuʼ xú káʼnii nindxu̱u̱ Jeobá. Índo̱ najmañulúʼ xú káʼnii nindxu̱u̱ Jesús, ma̱ngaa najmañulúʼ xú káʼnii nindxu̱u̱ Jeobá. Ikha jngó índo̱ nduʼyaridáá Jesús, na̱jkua̱ kanuu itháan mijngii náa Jeobá bi̱ itháan gíʼdoo numuu náa xúgíʼ tsu̱du̱u̱ numbaaʼ. ¡Ra̱ʼkhá tháán májánʼ nindxu̱u̱ rígi̱!

2, 3. a) Náa numuu rí náa Biblia naʼthí ga̱jma̱a̱ numuu rí xú káʼnii nixtáa Jesús rá. b) Ndiéjunʼ gíʼthu̱u̱n Jeobá muʼni rá. c) Ndiéjunʼ gúʼyáá náa artículo rígi̱ ga̱jma̱a̱ náa imbo̱o̱ artículo rá.

2 Náa Biblia naʼthí ga̱jma̱a̱ numuu rí xú káʼnii nixtáa Jesús. Náa numuu rá. Numuu rí Jeobá nandoo rí muniʼnííʼ májánʼ wéñuʼ Jesús mu xúʼko̱ mbuʼyaridáá (atraxnuu 1 Pedro 2:21). Náa Biblia naʼthí rí gíʼmaa mu̱ʼgua̱ ki̱dxu̱ʼ Jesús. Ndiéjunʼ eyoo gáʼthúu̱n rúʼko̱ rá. Rí gíʼmaa mbuʼyaridáá xúgíʼ rí niʼni Jesús. Mú ikhaa ninindxu̱u̱ mbáa bi̱ tágiʼdoo  aʼkhá. Ma̱ngaa Jeobá tsénda̱ʼa̱ rí mbuʼyaridáá Jesús xó má gíʼmaa maʼni. Mú Jeobá gíʼthu̱u̱n rí mbuʼyaridáá Jesús xó má rí naʼngulú nuʼni.

3 Guʼyáá tikhu xú káʼnii xa̱bu̱ ninindxu̱u̱ Jesús rí gíʼmaa mbuʼyaridáá. Náa artículo rígi̱ mbuyáá xú káʼnii Jesús ninindxu̱u̱ mbáa xa̱bu̱ gua̱ba̱ʼ ga̱jma̱a̱ rí nigáwínʼ a̱jkiu̱u̱n. Náa imbo̱o̱ artículo gúʼyáá rí támiñuu ga̱jma̱a̱ rí ndaʼyoo maraʼwíí májánʼ rí maʼni. Muriʼña̱a̱ ajtsú graxe̱ ga̱jma̱a̱ numuu rígi̱: Ndiéjunʼ eyoo gáʼthúu̱n rá. Xú káʼnii nisngájma Jesús rá. Ga̱jma̱a̱ xú káʼnii gándoo gusngájma ikháanʼ rá.

JESÚS NINDXU̱U̱ XA̱BU̱ GUA̱BA̱ʼ

4. Ndiéjunʼ eyoo gáʼthúu̱n rí manindxa̱ʼ xa̱bu̱ gua̱ba̱ʼ rá.

4 Xa̱bu̱ bi̱ nuni mbaʼumi̱jna̱ nundxa̱ʼwa̱a̱ edxu̱ún rí xa̱bu̱ gua̱biinʼ namiñun. Lá gajkhun rígi̱ rá. Na̱nguá. Mú manindxa̱ʼ xa̱bu̱ gua̱ba̱ʼ ndayóoʼ rí manindxa̱ʼ migújkuínʼ ga̱jma̱a̱ rí xámiñaʼ. Ndiéjunʼ eyoo gáʼthúu̱n rí manindxa̱ʼ xa̱bu̱ gua̱ba̱ʼ rá. Rígi̱ nandoo gáʼthúu̱n rí xátani mbamínáʼ. Mú manindxu̱lúʼ xa̱bu̱ gua̱ba̱ʼ, ginii gíʼmaa mbuʼyáá xú káʼnii nindxu̱lúʼ. Mbá xkri̱da, mbá diccionario ndrígóo Biblia naʼthí rí manindxa̱ʼ xa̱bu̱ gua̱ba̱ʼ, nandoo gáʼthúu̱n rí natayáá rí na̱nguá xtaʼdáá numaʼ náa inuu Dios. Ma̱ngaa, á mu ni̱ndxu̱lú xa̱bu̱ gua̱ba̱ʼ xundxaʼwamíjna̱ rí nduʼyáá itháan ki xóo iʼwíínʼ (Rom. 12:3; Filip. 2:3). Ni̱ndxu̱lú xa̱bu̱ aʼkhá ga̱jma̱a̱ nguáná naʼniulú mingíjyúuʼ manindxu̱lúʼ xa̱bu̱ gua̱ba̱ʼ. Mú ma̱ndoo muʼni. Ndayóoʼ mundxaʼwáá edxu̱lúʼ rí Jeobá nindxu̱u̱ bi̱ itháan mba̱a̱ ga̱jma̱a̱ náa xkri̱da ndrígóo Jesús.

Á mu ni̱ndxu̱lú xa̱bu̱ gua̱ba̱ʼ xundxaʼwa̱míjna̱ rí nduʼyáá itháan ki xóo iʼwíínʼ

5, 6. a) Tsáa nindxu̱u̱ arcángel Miguel rá. b) Xú káʼnii nisngájma Miguel rí nindxu̱u̱ xa̱bu̱ gua̱ba̱ʼ rá.

5 A̱ʼdióo Dios ninindxu̱u̱ má xúʼko̱ xa̱bu̱ gua̱ba̱ʼ. Índo̱ ninindxu̱u̱ mbáa ángel bi̱ gíʼdoo tsiakii mekhuíí, ninindxu̱u̱ xa̱bu̱ gua̱ba̱ʼ. Ma̱ngaa índo̱ nixtáa náa tsu̱du̱u̱ Ku̱ba̱ʼ, xóo xa̱bu̱ bi̱ tágiʼdoo aʼkhá. Xú káʼnii nisngájma rí ninindxu̱u̱ xa̱bu̱ gua̱ba̱ʼ xá. Guʼyáá tikhuu xti’khu.

6 Jesús nisngájma rí ninindxu̱u̱ xa̱bu̱ gua̱ba̱ʼ ga̱jma̱a̱ rí xú káʼnii nindxu̱u̱ ikhaa. Nákha xóó tséʼkha̱ náa tsu̱du̱u̱ Ku̱ba̱ʼ, ikhaa ninindxu̱u̱ mbáa arcángel, rí nandoo gáʼthúu̱n, bi̱ naʼtáñajúúnʼ mbaʼin ángeles. Ga̱jma̱a̱ náa Biblia naxná mbiʼyuu Miguel. Náa i̱yi̱i̱ʼ ndrígóo Judas naʼthí rí mbá miʼtsú Miguel ga̱jma̱a̱ Satanás kuwa rutamijná gakhii (atraxnuu Judas 9). Náa numuu rá. Jeobá niʼdi̱i̱ Moisés náa nimbáa xa̱bu̱ xáʼngo̱o̱ gaxkamaa (Deut. 34:5, 6). Mú Satanás nindoo maʼga̱ kayóo xuyuʼ Moisés, mbáa mu maʼni rí israelitas mbuyamajkuíí. Mbá libro naʼthí rí mbáa Jesús niʼthúu̱n Satanás rí na̱nguá kaʼyoo maʼga̱ kayóo xuyuʼ Moisés. Maski ajndu Jesús támiñuu índo̱ nitsijii Satanás, ikhaa ninindxu̱u̱ xa̱bu̱ gua̱ba̱ʼ ga̱jma̱a̱ niniñuʼ rí Jeobá maxprígúu. Náa numuu rá. Numuu rí ndaʼyoo rí i̱ndó Jeobá kaʼyoo maxprígúu.

Jesús ninindxu̱u̱ xa̱bu̱ gua̱ba̱ʼ ga̱jma̱a̱ niʼnimbo̱o̱ xúgíʼ rí niʼthúu̱n Jeobá. ¡Asndu niniñaminaʼ rí muxiyáa!

7. a) Xú káʼnii nisngájma Jesús rí ninindxu̱u̱ xa̱bu̱ gua̱ba̱ʼ ga̱jma̱a̱ rí niʼthí xá. b) Xú káʼnii nisngájma Jesús rí ninindxu̱u̱ xa̱bu̱ gua̱ba̱ʼ ga̱jma̱a̱ rí niʼni xá.

7 Índo̱ Jesús nixtáa náa tsu̱du̱u̱ Ku̱ba̱ʼ, nisngájma rí nindxu̱u̱ xa̱bu̱ gua̱ba̱ʼ ga̱jma̱a̱ rí xú káʼnii niʼthí. Ikhaa tándoo rí mbuyamajkuíí xa̱bu̱. Jesús nindoo rí xúgíʼ gamajkhu maʼga̱ náa Jeobá (Mar. 10:17, 18; Juan 7:16). Ma̱ngaa, táʼthúu̱n xa̱bi̱i̱ mbá rí maʼni gawúunʼ o maʼniún asndu xóo raguáʼdáá numún. Ikhaa ndiʼyamajkhún ga̱jma̱a̱ niʼthún rí nindxu̱u̱ májánʼ a̱jkiu̱u̱n. Xúʼko̱ nisngájma rí nindoo kaʼñúún (Luc. 22:31, 32; Juan 1:47). Ma̱ngaa Jesús nisngájma rí nindxu̱u̱ xa̱bu̱ gua̱ba̱ʼ ga̱jma̱a̱ rí niʼni. Niraʼwíí maxtáa xóo mbáa xa̱bu̱ bi̱ na̱nguá gíʼdoo wéñuʼ (Mat. 8:20). Ga̱jma̱a̱ nindoo maʼni ñajunʼ rí nimbáa tándoo  gáʼni (Juan 13:3-15). Ma̱ngaa niʼnimbo̱o̱ (atraxnuu Filipenses 2:5-8). Xa̱bu̱ bi̱ nuni mbaʼumi̱jna̱ tsinigunʼ rí munimbu̱ún kuñún iʼwíínʼ. Mú Jesús tánindxu̱u̱ xúʼko̱ kaʼnii. Ninindxu̱u̱ xa̱bu̱ gua̱ba̱ʼ ga̱jma̱a̱ niʼnimbo̱o̱ xúgíʼ rí niʼthúu̱n Jeobá. ¡Asndu niniñaminaʼ rí muxiyáa! Naguanúu kaʼwu rí Jesús ninindxu̱u̱ ‹gua̱ba̱ʼ a̱jkiu̱u̱n› (Mat. 11:29).

GANINDXU̱LÚ XA̱BU̱ GUA̱BA̱ʼ XÓ MÁ JESÚS

8, 9. Xú káʼnii esngajmá rí ni̱ndxu̱lú xa̱bu̱ gua̱ba̱ʼ rá.

8 Xú káʼnii gándoo guʼyaridáá rí xóo nindxu̱u̱ Jesús rá. Á mu ni̱ndxu̱lú xa̱bu̱ gua̱ba̱ʼ, nduʼyáá rí rakáʼyulú muʼtá numún iʼwíínʼ xa̱bu̱. Ikha jngó tséʼni rígi̱ ga̱jma̱a̱ tsendxa̱ʼwáá edxu̱lúʼ dí ra̱májánʼ náa ikhiin (Luc. 6:37; Sant. 4:12). Ma̱ngaa tséʼyáá rí itháan kuaʼdáá numulúʼ ikháanʼ náa iʼwíínʼ, numuu rí itháan ejmañuluʼ o kuaʼdáá itháan ñajunʼ rí xóo ikhiin (Ecl. 7:16). Bi̱ kuya̱ edxu̱u̱ bi̱ ni̱ndxu̱ún xa̱bu̱ gua̱binʼ na̱nguá eku̱mún rí najmañún itháan ki xóo iʼwíínʼ a̱ngiu̱lú. Rí phú naku̱mún rí iʼwíínʼ a̱ngiu̱lú itháan guáʼdáá numún ki xóo ikhiin (Luc. 9:48; Filip. 2:3).

9 Guʼyáá rí nigíʼnuu ndxájulú bi̱ nagumbiʼyuu Walter Thorn. Nákha tsiguʼ 1894, ikhaa nigíʼdu̱u̱ niñajunʼ xóo superintendente viajante. Mba̱yu̱ʼ tsiguʼ nda̱wa̱á, nixuʼmaa mañewu̱u̱n xtílá náa mbá mbaaʼ ndrígu̱ún bi̱ nuʼtáraʼa numuu Jeobá dí rígá náa xuajen Nueva York. Índo̱ nindxa̱ʼwáminaʼ rí ikhaa kaʼyoo maʼni mbá ñajunʼ rí itháan gíʼdoo numuu ki xóo rí mañewu̱u̱n xtílá, ikhaa naʼthíminaʼ: “Atadxawíín yujndaʼ, lá natanimbamínaʼ rá.” (Atraxnuu Isaías 40:15.) ¡Ninindxu̱u̱ mbáa xa̱bu̱ gua̱ba̱ʼ!

10. a) Xú káʼnii esngajmá rí ni̱ndxu̱lú xa̱bu̱ gua̱ba̱ʼ ga̱jma̱a̱ rí xú káʼnii eʼthá rá. b) Xú káʼnii esngajmá rí ni̱ndxu̱lú xa̱bu̱ gua̱ba̱ʼ ga̱jma̱a̱ rí kuwáanʼ ru̱ʼni̱ rá.

10 Á mu ni̱ndxu̱lú xa̱bu̱ gua̱ba̱ʼ, ma̱ngaa musngajmá ga̱jma̱a̱ rí eʼthá (Luc. 6:45). Índo̱ nuʼtámijna gajmiúlú a̱ngiu̱lú, tséʼyáá rí gíʼdoo numuu rí niʼngu̱lú niʼni o mbá rí niʼni májánʼ wéñuʼ (Pro. 27:2). Rí nuʼni, nuʼthúún rí májánʼ ni̱ndxu̱u̱ rí kuwa runi ga̱jma̱a̱ rí kuaʼdáá mbá a̱jkiu̱lú májánʼ (Pro. 15:23). Ma̱ngaa nusngajmá rí ni̱ndxu̱lú xa̱bu̱ gua̱ba̱ʼ ga̱jma̱a̱ rí kuwáanʼ ru̱ʼni̱. Tseni rí majmaʼniáanʼ o maguaʼdáá numulúʼ náa numbaaʼ rígi̱. Nuraʼwíí manindxu̱lúʼ xa̱bu̱ bi̱ ragíʼdoo wéñuʼ mu ma̱ndoo muʼni itháan ñajunʼ Jeobá. Asndu nuʼni ñajunʼ náa tseʼdaʼ wéñuʼ mbújkha̱a̱ (1 Tim. 6:6, 8). Ga̱jma̱a̱ náa xúgíʼ rígi̱ nusngájma rí ni̱ndxu̱lú xa̱bu̱ gua̱ba̱ʼ á mu nuʼnimbulúʼ. Ikha jngó nuʼnimbulúʼ kuʼñúún bi̱ kuya̱ edxu̱u̱ náa nagimbáanʼ ga̱jma̱a̱ náa organización (Heb. 13:17).

JESÚS NINDXU̱U̱ MBÁ BI̱ NAGÁWIINʼ A̱JKIU̱U̱N

11. Ndiéjunʼ eyoo gáʼthúu̱n rí magáwiinʼ a̱jkia̱nʼ rá.

11 Ndiéjunʼ eyoo gáʼthúu̱n rí magáwiinʼ a̱jkia̱nʼ rá. Á mu rí nagáwiinʼ a̱jkiu̱lúʼ, nandulúʼ kuʼñúún xa̱bu̱ ga̱jma̱a̱ naxmiéjunlú kuʼñúún. Ma̱ngaa rígi̱ nambriguii ga̱jma̱a̱ rí manindxa̱ʼ xa̱bu̱ gua̱ba̱ʼ ga̱jma̱a̱ rí maʼngo̱o̱ a̱jkia̱nʼ. Náa Biblia naʼthí rí Jeobá ga̱jma̱a̱ Jesús nusngajma rí ‹phú nigáwiinʼ a̱jkiu̱ún ga̱jma̱a̱ naʼni wéñuʼ a̱jkiu̱ún› (Luc. 1:78; 2 Cor. 1:3; Filip. 1:8). Mbá libro naʼthí, índo̱ Biblia naʼthí rí magáwíinʼ a̱jkia̱nʼ tsíyoo gáʼthúu̱n i̱ndó rí ma̱ta̱ya̱a̱ rí xú káʼnii numíniiʼ xa̱bu̱. Libro rígi̱ naʼthí rí magáwíinʼ a̱jkia̱nʼ naʼni rí maxmiéjuanʼ xtañún iʼwíínʼ ga̱jma̱a̱ matambáñun. Ikha jngó, á mu nagáwiinʼ a̱jkiu̱lú, muʼni tsiakimijna mumbañún iʼwíínʼ mu makuwá májánʼ.

12. a) Xú káʼnii nisngájma Jesús ga̱jma̱a̱ numuu rí nikumu̱u̱ rá. b) Xú káʼnii nisngájma Jesús rí nindxu̱u̱ mbáa bi̱ nigáwiinʼ a̱jkiu̱u̱n ga̱jma̱a̱ náa xúgíʼ rí niʼni xá.

 12 Xú káʼnii nisngájma Jesús rí nindxu̱u̱ mbáa bi̱ nigáwiinʼ a̱jkiu̱u̱n rá. Guʼyáá ajtsú enii. Timbá, nisngájma káʼnii nikumu̱u̱. Índo̱ ndiʼyoo María bi̱ nambáxu̱u̱ ga̱jma̱a̱, mangiin rí iʼwíínʼ kuwa rumbiyaʼ ga̱jma̱a̱ numuu rí nikháñu Lázaro, Jesús nimbiyaʼ gajmíi̱n (atraxnuu Juan 11:32-35). Náa Biblia ma̱ngaa naʼthí rí Jesús nigáwiinʼ a̱jkiu̱u̱n kaʼñúún mbá nguáthi̱i̱n xa̱bu̱ bi̱ nigún gúyáá náa xtáa (Mar. 6:34). Raga̱jma̱, Jesús nisngájma rí nigáwiinʼ a̱jkiu̱ún ga̱jma̱a̱ xúgíʼ rí niʼni. Rí nigáwiinʼ a̱jkiu̱u̱n nixkaxi̱i̱ maʼnigabi̱i̱ a̱ʼdióo mbáa a̱ʼgú xuáʼa̱ ma̱ngaa má Lázaro (Luc. 7:11-15; Juan 11:38-44). Rúʼko̱ niʼni rí Lázaro ma̱ndoo maʼga̱a̱ mekhuíí nda̱wa̱á. Ga̱jma̱a̱ índo̱ mbá nguáthi̱i̱n xa̱bu̱ nigún gúyáá náa xtáa, nigáwiinʼ a̱jkiu̱u̱n kaʼñúún “aʼkue ri mbaʼa ini ri niguiʼdu niʼsjngun”. Rígi̱ niʼni rí muriʼkhumijná bi̱ nidxawíín ga̱jma̱a̱ rí niʼthí. Xó má ndiʼyáá, rí nigáwiinʼ a̱jkiu̱u̱n Jesús nigiʼdoo itháan numuu ki xóo rí nikumu̱u̱. Rígi̱ nixkaxi̱i̱ mu mambáñún xa̱bu̱ bi̱ nda̱ñúnʼ (Mat. 15:32-38; 20:29-34; Mar. 1:40-42).

13. Xú káʼnii nisngájma Jesús rí nigáwiinʼ a̱jkiu̱u̱n kaʼñúún xa̱bu̱ ga̱jma̱a̱ rí xóo niʼthúún xá. (Atayáá timbá xtiʼkhu.)

13 Rí ragajtsú enii rí xú káʼnii Jesús nisngájma rí nigáwiinʼ a̱jkiu̱u̱n kaʼñúún xa̱bu̱ ninindxu̱u̱ rí xú káʼnii nithúún. Rígi̱ niʼni rí maʼthúún ga̱jma̱a̱ májánʼ eʼwíínʼ, mu itháan náa xa̱bu̱ bi̱ numíniiʼ ga̱jma̱a̱ numún iʼwíínʼ. Ga̱jma̱a̱ numuu Jesús, Mateo niʼthí ajngáa rígi̱ rí niʼtáriyaʼ gaʼyee Isaías: “Xaxmigaʼ nimbá diin rí nijmigaʼ má; ga̱jma̱a̱ mbá mecha ndrígóo lino rí nakha agiuʼ” (Is. 42:3; Mat. 12:20). Ndiéjunʼ eyoo gáʼthúu̱n ajngáa rígi̱ rá. Rí Jesús táʼni gínáa nimbáa xa̱bu̱. Índo̱ niʼthí niʼni rí makuwa májánʼ iʼwíínʼ xa̱bu̱. Ma̱ngaa, niʼtáráʼa mbá ajngáa rí maʼni̱i̱ a̱jkiu̱ún xa̱bu̱ bi̱ ‹kuwa gíná wéñuʼ› (Is. 61:1). Ikhaa niʼni maʼni a̱jkiu̱ún xa̱bu̱ bi̱ numíniiʼ (Mat. 11:28-30). Ma̱ngaa nithúún xa̱bi̱i̱ ndrígóo rí Jeobá naxmiéjúnʼ kaʼñúún, asndu xa̱bu̱ bi̱ na̱nguá guáʼdáá numún náa iʼwíínʼ xa̱bu̱ (Mat. 18:12-14; Luc. 12:6, 7).

GAGÁWIINʼ A̱JKIU̱LÚ XÓ MÁ JESÚS

14. Xú káʼnii gándoo gusngajmá rí nagáwiinʼ a̱jkiu̱lúʼ rá.

14 Á mu nandulúʼ muʼni xóo niʼni Jesús, musngájma ga̱jma̱a̱ rí nakumu̱lú. Mbáa naʼniulú mingíjyúuʼ musngájma rí nandulúʼ kuʼñúún iʼwíínʼ, mú náa Biblia naʼthí rí gíʼmaa muʼnimi̱jna̱ mu muʼnimbánii. Rígi̱ nindxu̱u̱ rí gíʼmaa maguaʼdáá bi̱ ni̱ndxu̱lú cristianos (atraxnuu Colosenses 3:9, 10 ga̱jma̱a̱ 12). Xú káʼnii gándoo gusngajmá rí nandulúʼ kuʼñúún iʼwíínʼ rá. Náa Biblia naʼthí rí gíʼmaa muʼthúún rí naxmiéjunlú kuʼñúún (2 Cor. 6:11-13). Gíʼmaa muʼdxawíín májánʼ índo̱ mbáa naʼthúlúʼ xú káʼnii xtáa ga̱jma̱a̱ rí naʼni maxmiéjunʼ (Sant. 1:19). Ga̱jma̱a̱ gíʼmaa muraximíjna̱:  “Á mu ikhúúnʼ xtáá xúʼko̱ káʼnii, xú káʼnii gaku̱mu̱ʼ rá. Ndiéjunʼ gáʼyóoʼ rá.” (1 Ped. 3:8.)

15. Ndiéjunʼ gándoo muʼni mu mumbañún xa̱bu̱ bi̱ numíniʼ o náa a̱ngiu̱lú bi̱ nikháñun a̱ngiu̱ún rá.

15 Ma̱ngaa nusngájma rí nagáwiinʼ a̱jkiu̱lú ga̱jma̱a̱ numuu rí xóo nuʼni. Rí nagáwiinʼ a̱jkiu̱lú maxkaxa̱ánʼ mumbañún iʼwíínʼ xa̱bu̱, mu itháan náa xa̱bu̱ bi̱ numíniʼ o náa a̱ngiu̱lú bi̱ nikháñun a̱ngiu̱ún. Xú káʼnii gándoo gumbañúún xá. Romanos 12:15 naʼthí: “Gumbiyaʼ gajmiála xa̱bu̱ bi̱ numbiyaʼ”. Mbaʼa nuthu, xa̱bu̱ ndayóoʼ rí mumbañún mu maʼni̱i̱ a̱jkiu̱ún, raʼkháa rí muʼthúún xú káʼnii gunimbánii xkujndu ndrígu̱ún. Ndayóoʼ rí mbáa maxmiéjunʼ kaʼñúún ga̱jma̱a̱ rí maʼdxun rí gúthi. Mbáa ndxájulú a̱ʼgu̱ niʼthí rí índo̱ nikháñu a̱ʼdióo a̱ngiu̱lú nigún gúyáá náa goʼwóo nimbiyaʼ ga̱jma̱á ni̱ndxu̱u̱. Ikhaa naxnáa núma̱aʼ wéñuʼ numuu rí nixnáá tsiakii. Imbo̱o̱ rí xóo musngájma rí nagáwiinʼ a̱jkiu̱lú índo̱ nuʼni mbá rí mixtambáñun iʼwíínʼ. Mbáa maʼni rí mbáa a̱ʼgú xuáʼa̱ ndayóoʼ rí maguma̱a̱ májánʼ goʼwóo. O mbáa ndxájulú nikhi̱i̱ ndayóoʼ rí magún ku̱ya̱a̱ náa reunión, náa maʼtáraʼa o náa médico. Ma̱ndoo mumbañún wéñuʼ iʼwíínʼ á mu nuʼni rí nda̱ñúnʼ ikhiin (1 Juan 3:17, 18). Mú rí itháan gíʼdoo numuu, rí musngájma rí nagáwiinʼ a̱jkiu̱lú náa iʼwíínʼ dí muʼtáraʼa itháan xó má eʼngulú. Rúʼko̱ nindxu̱u̱ rí itháan májánʼ muʼni mu mumbañún xa̱bu̱ bi̱ májánʼ a̱jkiu̱ún.

Lá naxmiéjunlú kuʼñúún gajkhun a̱ngiu̱lú bi̱ ni̱ndxu̱ún xa̱bi̱i̱ Jeobá ráʼ. (Atayáá kutriga̱ 15)

16. Ndiéjunʼ gándoo gúʼthún bi̱ kuwa gíná wéñuʼ rá.

16 Nusngajmá rí nagáwiinʼ a̱jkiu̱lú ga̱jma̱a̱ ajngáa rí nuʼthá. Náa Biblia naʼthí rí mumbañún bi̱ kuwa gíná wéñuʼ (1 Tes. 5:14). Ndiéjunʼ gándoo gúʼthún xá. Ma̱ndoo muʼthúún rí naxmiéjunlú kuʼñúún. Ma̱ngaa rí ni̱ndxu̱ún míjínʼ xa̱bu̱ ga̱jma̱a̱ rí májánʼ nindxu̱u̱ ñajunʼ rí kuwa runi. Ma̱ndoo muʼni magiwa̱nʼ a̱jkiu̱ún rí á mu ikhiin kuwa náa congregación, nindxu̱u̱ numuu rí Jeobá nandoo kaʼñúún (Juan 6:44). Ma̱ndoo muʼthúún rí Jeobá naxmiéjunʼ kaʼñúún wéñuʼ xa̱bi̱i̱ bi̱ numíniʼ ga̱jma̱a̱ bi̱ kuwa gíná (Sal. 34:18). Ajngáa rí nagájnuu náa a̱jkiu̱lú ma̱ndoo mambáñún wéñuʼ bi̱ nda̱ñúnʼ rí mixtambáñun (Pro. 16:24).

17, 18. a) Xú káʼnii eyoo Jeobá muniu̱u̱n a̱ngiu̱lú bi̱ kuya̱ edxu̱u̱ rá. b) Ndiéjunʼ gúʼyáá náa imbo̱o̱ artículo rá.

17 Jeobá nandoo rí bi̱ kuya̱ edxu̱u̱ magáwiinʼ a̱jkiu̱ún kuñún a̱ngiu̱lú (Hech. 20:28, 29). Bi̱ kuya̱ edxu̱u̱ gíʼmaa rí musngúún ga̱jma̱a̱ muxnún tsiakii (Is. 32:1, 2; 1 Ped. 5:2-4). Ikhiin tséxnun mbá xtángoo rí gíʼmaa munimbánii. Ma̱ngaa tseni rí muñajunʼ itháan rí ikhiin xáʼngu̱u̱n gúni. Rí phú nandún bi̱ kuya̱ edxu̱u̱ rí a̱ngiu̱lú makuwá tsímáá. Nduyáá má rí ikhiin nandún kuyáá Jeobá ga̱jma̱a̱ nuni rí naʼngu̱u̱n mu mbuyamajkuíí ikhaa (Mat. 22:37).

18 Rí mundxaʼwamíjna̱ rí Jesús ninindxu̱u̱ xa̱bu̱ gua̱ba̱ʼ ga̱jma̱a̱ rí nigáwiinʼ a̱jkiu̱u̱n rígi̱ gaxkaxa̱ánʼ mbuʼyaridáá xkri̱da ndrígóo. Náa imbo̱o̱ artículo mbuʼyáá xú káʼnii gándoo manindxu̱lúʼ mbáa xa̱bu̱ bi̱ tsímiñuu ga̱jma̱a̱ rí majmañulúʼ muraʼwíí muʼni rí májánʼ xó má Jesús.