“Guxna̱a̱ núma̱aʼ Jeobá, numuu rí ikhaa nindxu̱u̱ májáánʼ.” (SALMO 106:1)

1. Náa numuu rí ndayóoʼ muxnáa núma̱aʼ Jeobá rá.

NUMUU rí náa Jeobá e̱ʼkha̱ “xogiʼ ri mejanʼ cami caxi ri huaxnaʼlu”, ikhaa kaʼyoo muxnáa núma̱aʼ (Sant. 1:17). Xóo mbáa Báxtúu bi̱ májánʼ a̱jkiu̱u̱n, ndaʼyoo rí nda̱yúlúʼ xúgíʼ mbiʼi ga̱jma̱a̱ xúgíʼ rí na̱ʼkha̱ náa ikhaa (Sal. 23:1-3). Ikhaa nasngájma rí nindxu̱u̱ bi̱ “naʼni káwáanʼ ga̱jma̱a̱ naxnulu tsiakii”, mú itháan índo̱ kuaʼdáálú gamiéjunʼ (Sal. 46:1). Ikha jngó kuwáanʼ xóo salmista bi̱ niʼnirámáʼ: “Guxna̱a̱ núma̱aʼ Jeobá, numuu rí ikhaa nindxu̱u̱ májáánʼ; rí májánʼ a̱jkiu̱u̱n ndajyúuʼ kámuu mbiʼi” (Sal. 106:1).

Texto rí kaʼyoo tsiguʼ 2015 nindxu̱u̱ Salmo 106:1:“Guxna̱a̱ núma̱aʼ Jeobá, numuu rí ikhaa nindxu̱u̱ májáánʼ”

2, 3. a) Ndíjkha rí gíʼmáanʼ mbuʼyamajkuíí rí naguma tsajkurámáánʼ rá. b) Xú káʼnii graxe̱ gúʼyáá náa artículo rígi̱ rá.

2 Ndíjkha rí gíʼdoo wéñuʼ numuu mbuʼyáá á mu nuxnáa núma̱aʼ rá. Numuu rí xóo nijuiʼtáriyaʼ, rí iwáá mbiʼi rí kuwáanʼ xa̱bu̱ xúxnáa núma̱aʼ (2 Tim. 3:2). Mbaʼin tséyamajkuíí rí naguma tsajkurámiinʼ. Mbaʼin xa̱bu̱ bi̱ nunimbu̱ún rí nduyáá náa televisión ga̱jma̱a̱ náa radio, na̱nguá edxúún ga̱jma̱a̱ rí guáʼdáá, ma̱ngaa nduyáaʼ muguaʼdáá itháan. Asndu mangáanʼ ma̱ndoo muguaʼnii xúʼko̱ kaʼnii. Xó má niguaʼnii israelitas, mangáanʼ asndu xúxnáa núma̱aʼ ga̱jma̱a̱ ní xángajulú rí nambáxulúʼ gajmiúlú Jeobá ma̱ngaa índo̱ naʼni tsajkurámáánʼ (Sal. 106:7, 11-13).

 3 Gundxaʼwamíjna̱ dí gárígá índo̱ gúraʼní xkujndu rí gakhi̱i̱ wéñuʼ. Ra̱mingíjyúuʼ gáʼni rí ikhú maxmiéjunʼlú wéñuʼ ga̱jma̱a̱ ní xúʼyáá índo̱ naʼni tsajkurámáánʼ (Sal. 116:3). Xú káʼnii gúʼni mu maʼndulú muxnáa núma̱aʼ rá. Ndiéjunʼ gambáyulú mu mundxaʼwáá edxulú rí májánʼ índo̱ guraʼníí xkujndu rá. Guʼyáá.

RA̱ʼKHÁ THÁÁN MBAʼA RÍ NAʼNI JEOBÁ

4. Xú káʼnii gíʼmaa muʼni mu maʼndulú muxnáa núma̱aʼ rá.

4 Mu maʼndulú muxnáa núma̱aʼ, ndayóoʼ mundxaʼwamíjna̱ náa xúgíʼ rí niʼni Jeobá ga̱jma̱a̱ numulúʼ. Ndayóoʼ mundxaʼwáá edxulú rí ikhaa májánʼ a̱jkiu̱u̱n ma̱ngaa nasngájma rí nandoo kaʼyulúʼ wéñuʼ. Índo̱ salmista niʼni xúʼko̱ kaʼnii, niguanúu tsiánguá ga̱jma̱a̱ xúgíʼ rí niʼni Jeobá (atraxnuu Salmo 40:5 ga̱jma̱a̱ 107:43).

5. Xú káʼnii embáyuluʼ xkridoo apóstol Pablo maʼndulú muxnáa núma̱aʼ rá.

5 Xkri̱da ndrígóo apóstol Pablo nambáyulúʼ rí muxnáa núma̱aʼ. Nakujmaa rí ikhaa nandxa̱ʼwáminaʼ ga̱jma̱a̱ numuu rí niguma tsajkurámáʼ, numuu rí ikhaa naxnáa núma̱aʼ Dios má xúʼko̱ ga̱jma̱a̱ xúgíʼ a̱jkiu̱u̱n. Ndiʼyoo rí ikhaa ‹niʼtátsagoo mbiʼyuu Dios ga̱jma̱a̱ nixkúún ma̱ngaa niʼni gíníin›. Ikhaa nixnáa núma̱aʼ, maski ajndu táʼni rí májánʼ nákha ginii, mú Jeobá ga̱jma̱a̱ Jesús nigáwiinʼ a̱jkiu̱ún kuyáá ga̱jma̱a̱ nixnáá maʼni mbá ñajunʼ (atraxnuu 1 Timoteo 1:12-14). Ga̱jma̱a̱ Pablo nindoo kaʼñúún a̱ngui̱i̱n, mbaʼa nuthu nixnáa núma̱aʼ Jeobá numuu rí ninindxu̱ún míjínʼ xa̱bu̱ ga̱jma̱a̱ ñajunʼ rí niʼni (Filip. 1:3-5, 7; 1 Tes. 1:2, 3). Índo̱ niraʼnuu xkujndu, núkhu exnáa núma̱aʼ Jeobá ga̱jma̱a̱ xúgíʼ rí nuni a̱ngui̱i̱n ga̱jma̱a̱ numuu (Hech. 28:15; 2 Cor. 7:5-7). Tséʼniulú tsiánguá rí Pablo niʼthún cristianos: “Uxnala sinumala Dios. [...] Uni ajmu gagui naʼ inu Dios ri nagajnu naʼ aʼcunʼla, cami uni ajmu ri ajŋgo Dios ri riga naʼ yiʼ salmos” (Col. 3:15-17).

NDIÉJUNʼ GAMBÁYULUʼ MU MUXNÁA NÚMA̱Aʼ RÁ.

6. Ndiéjunʼ rí itháan naraxnáa núma̱aʼ ikháánʼ Jeobá rá.

6 Xú káʼnii gándoo guʼyaridáá xkridoo Pablo rá. Rí mundxaʼwamíjna̱ rí Jeobá niʼni ga̱jma̱a̱ numuu mámbáa dí ikháanʼ (Sal. 116:12). Á mu nuraxulú ndiéjunʼ rí májánʼ nindrígulú náa ikhaa, ndiéjunʼ guriʼña̱a̱ rá. Lá muʼtá rí nambáxulúʼ gajmiúlú Jeobá ráʼ. Lá mundxaʼwamíjna̱ ga̱jma̱a̱ numuu Cristo rí nixnáximinaʼ makhañúu ga̱jma̱a̱ rí naʼni mba̱a̱ a̱jkiu̱u̱n numuu aʼkhúlúʼ ráʼ. Lá muʼtá ga̱jma̱a̱ numún a̱ngiu̱lú bi̱  numbayúlú índo̱ kuaʼdáálu gamiéjunʼ ráʼ. Mbáa asndu muʼtá ga̱jma̱a̱ numuu a̱ʼgiu̱lú o ajmbiulú, mangiin e̱jñu̱lú... xáʼngo̱o̱ gúʼthá xúgíʼ. Á mu nuríyaʼ awan mu mundxaʼwamíjna̱ ga̱jma̱a̱ numuu rí naʼni tsajkurámáánʼ, rígi̱ maʼniulúʼ muxnáa núma̱aʼ Jeobá. Ikhú maxkaxáanʼ muxnáa núma̱aʼ xúgíʼ mbiʼi rí gakuwáanʼ (atraxnuu Salmo 92:1, 2).

Guʼtájkáan mu muxnáa núma̱aʼ Dios ga̱jma̱a̱ rí naxnulu, xó má niʼni Ana ga̱jma̱a̱ Ezequías

7. a) Ndíjkha rí gíʼmaa muxnáa núma̱aʼ Jeobá índo̱ nuʼtájkáan rá. b) Ndiéjunʼ gambáyuluʼ índo̱ guʼtájkáan mu muxnáa núma̱aʼ Jeobá rá.

7 Índo̱ nakru̱ʼu̱lú májánʼ ga̱jma̱a̱ índo̱ gíwanʼ náa awúu̱n a̱jkiu̱lú xúgíʼ rí májánʼ rí nikhánulú, naʼniulú muxnáa núma̱aʼ Jeobá índo̱ nuʼtájkáan (Sal. 95:2; 100:4, 5). Mbaʼin i̱ndó nutháán mu munda̱ʼa̱a̱ rí eñúnʼ. Mú ikháanʼ nduʼyáá rí xtáa gagi Jeobá índo̱ nuxnáa núma̱aʼ ga̱jma̱a̱ rí kuaʼdáá. Náa Biblia naʼthí dí rúʼko̱ nini mbaʼin xa̱bu̱, xó má Ana ga̱jma̱a̱ Ezequías (1 Sam. 2:1-10; Is. 38:9-20). Guʼyaridáá xkri̱da ndrígu̱ún ga̱jma̱a̱ guxnáa núma̱aʼ ga̱jma̱a̱ rí naʼni náa ikháanʼ (1 Tes. 5:17, 18). Rúʼko̱ mambáyulúʼ wéñuʼ, maxnúlú itháan tsiakii, maʼndulú kuʼyáá itháan Jeobá ga̱jma̱a̱ mambaxúlúʼ itháan májánʼ gajmiúlú ikhaa (Sant. 4:8).

Ndiéjunʼ rí itháan naraxnáa núma̱aʼ ikháánʼ Jeobá rá. (Atayáá kutriga̱ 6 ga̱jma̱a̱ 7)

8. Xú káʼnii gándoo gandati̱gu̱lú rí mbuʼyamajkuíí xúgíʼ rí Jeobá eʼni ga̱jma̱a̱ numulúʼ rá.

8 Náa numuu rí gíʼmaa muwewa̱a̱n rí mbuʼyamajkuíí má xúʼko̱ rí Jeobá nindxu̱u̱ májánʼ a̱jkiu̱u̱n rá. Numuu rí ni̱ndxu̱lú xa̱bu̱ aʼkhá ikha jngó tsexnáa núma̱aʼ. Gundxaʼwamíjna̱ ga̱jma̱a̱ numuu Adán ma̱ngaa Eva timbíi̱n xa̱bu̱, ikhiin nikuwa náa ku̱ba̱ʼ mitsaan ga̱jma̱a̱ nda̱a̱ rí eñúnʼ ma̱ngaa rí makuwá kámuu mbiʼi (Gén. 1:28). Mú ikhiin tángaju̱u̱n; nindúún muguaʼdáá itháan. Rígi̱ niʼni rí mandáti̱gu̱u̱n xúgíʼ (Gén. 3:6, 7, 17-19). Xa̱bu̱ tsexna̱a̱ núma̱aʼ, ga̱jma̱a̱ mbáa rúʼko̱ maʼni rí xúʼyáá xúgíʼ rí Jeobá exnúlú. Asndu ní xúʼyáá rí gíʼdoo numuu rí nambáxulúʼ gajmiúlú, xangajulú rí kuwáanʼ náa mbá xuajin dí rígá náa xúgíʼ numbaaʼ ga̱jma̱a̱ makuwáanʼ náa numbaaʼ rígi̱ rí inuu má mambáa (1 Juan 2:15-17). Mu muʼnigaʼduunʼ tsáʼkhá rúʼko̱, gíʼmaa mundxaʼwami̱jna̱ ga̱jma̱a̱ numuu rí naguma tsajkurámáánʼ ga̱jma̱a̱ muxnáa núma̱aʼ Jeobá rí kuwáanʼ náa xuajñu (atraxnuu Salmo 27:4).

Á mu nundxa̱ʼwa̱míjna̱ náa rí májánʼ rí naxnulu Jeobá, maʼni̱i̱ a̱jkiu̱lú ga̱jma̱a̱ maxnúlúʼ tsiakii mu maʼngulú muraʼníí xúgíʼ

ÍNDO̱ KUAʼDÁÁ XKUJNDU

9. Ndíjkha rí májánʼ mundxaʼwamíjna̱ ga̱jma̱a̱ numuu rí naguma tsajkurámáánʼ índo̱ gúraʼní tsáʼkhá gakhii rá.

9 Rí muxnáa núma̱aʼ mambáyulúʼ muraʼníí tsáʼkhá dí mingíjyúuʼ wéñuʼ. Índo̱ gúraʼní xkujndu xóo rí xa̱bu̱ bi̱ ndiʼyáa maʼni nduwáanʼ, mbá nandii gakhi̱i̱, índo̱ nakháñuu mbáa bi̱ kuʼyáá o índo̱ narígá gamiéjunʼ, makumulúʼ rí xáʼngulú gúraʼní. Mbiʼi rúʼko̱, rí mundxaʼwamíjna̱ ga̱jma̱a̱ numuu rí naguma tsajkurámáánʼ maxnúlúʼ tsiakii. Guʼyáá tikhu rí niguaʼnii a̱ngiu̱lú.

10. Xú káʼnii embáyúu Irina rí mandxaʼwáminaʼ xúgíʼ mbiʼi rí Jeobá naʼni tsajkurámááʼ xá.

10 Irina * nindxu̱u̱ mbáa precursora regular bi̱  xtáa náa Norteamérica. Ajmbio̱o̱ bi̱ niyéjkha̱ edxu̱u̱ náa nagimbáanʼ niʼni nduwaʼ ga̱jma̱a̱ niniñuʼ ikhaa gajmíi̱n ajtsíin e̱ji̱i̱n. Ndiéjunʼ nimbáyúu maʼni má xúʼko̱ ñajunʼ Jeobá rá. Ikhaa naʼthí: “Naxna̱a̱ núma̱aʼ Jeobá numuu rí nañewunʼ ga̱jma̱a̱ naxmiéjunʼ kaʼyoʼ. Índo̱ nandxa̱ʼo̱o̱ edxu̱ʼ xúgíʼ mbiʼi rí xú káʼnii ikhaa naʼni tsajkurámúúnʼ, ikhú nda̱yo̱o̱ dí ra̱ʼkhá tháán májánʼ rí gúʼdaa mbáa Anu̱ʼ bi̱ naniniunʼ ga̱jma̱a̱ nañewunʼ. Nda̱yo̱o̱ rí ikhaa xániñuʼ nditháan”. Maski ajndu ikhaa gíʼdoo wéñuʼ gaʼkhu, Irina tséjmúu. Rúʼko̱ nambáyúu ga̱jma̱a̱ nambáñun eʼwíínʼ.

11. Ndiéjunʼ nimbáyúu Kyung-sook mu maraʼnuu mbá nandii gakhii rá.

11 Mbáa ndxájulú bi̱ xtáa náa Asia, nagumbiʼyuu Kyung-sook, ikhaa nindxu̱u̱ precursora ga̱jma̱a̱ ajmbio̱o̱ itháan rí 20 tsiguʼ. Mbá nacha̱, nitháán rí ikhaa gíʼdoo cáncer náa xtíjtiu̱u̱ ga̱jma̱a̱ nándáa rí maguma ma̱ngaa nitháán rí maxtáa xóó ajtsú o majun igu̱nʼ. Maski ajndu niraʼnuu mbaʼa tsáʼkhá, ikhaa na̱nguá nigiʼdoo nandii. Ikhaa naʼthí: “Índo̱ nidxuun rí gúʼdoo nandii, ra̱ʼkhá tháán nigawúnʼ wéñuʼ. Niku̱mu̱ʼ rí nándáa rí mani ga̱jma̱a̱ nimíñuʼ wéñuʼ”. Ndiéjunʼ nimbáyúu maraʼnuu rígi̱ xá. Ikhaa naʼthí: “Mámbá mbruʼun nákha xóó tségú natsimuʼ náa tsu̱du̱u̱ guʼwá mu matajkáan. Ikhú natha gakhi̱i̱ mu maxna̱a̱ núma̱aʼ ga̱jma̱a̱ numuu mbá witsu rí májánʼ rí nigíʼnuu mbiʼi rúʼko̱. Rúʼko̱ naʼni rí xaxmiéjunʼ ga̱jma̱a̱ naxkaxu̱u̱n mathu̱u̱n Jeobá rí nandoʼ ka̱yo̱o̱”. Xú káʼnii embáyúu rí naʼtájkáan xá. Naʼthí: “Rí xúgi̱ nda̱yo̱o̱ rí Jeobá nambáyulúʼ índo̱ nuraʼníí rí mingíjyúuʼ ga̱jma̱a̱ itháan má naguma tsajkurámáánʼ ki xóo rí muguaʼdáá xkujndu”.

Ga̱jma̱a̱ giʼtio̱o̱ John, bi̱ ma̱ngaa nikríyaʼ (Atayáá kutriga̱ 13)

12. Ndiéjunʼ embáyúu Jason mu xáxtáa gíná rí nikháñu a̱ʼgiu̱u̱ xá.

12 Jason, bi̱ xtáa rañajunʼ náa sucursal dí rígá náa África ga̱jma̱a̱ naʼni itháan rí mbá 30 tsiguʼ rí xtáa raʼni má xúʼko̱ ñajunʼ Jeobá, ikhaa naʼthí: “A̱ʼgiu̱ʼ nikháñu nákha juwan tsiguʼ. Índo̱ nandxa̱ʼo̱o̱ edxu̱ʼ rí xú káʼnii ikhaa nimínuuʼ wéñuʼ ga̱jma̱a̱ numuu cáncer naku̱mu̱ʼ rí asndu xóo naguambarigu̱u̱n”. Ndiéjunʼ exnúu tsiakii mu maraʼnuu gaʼkhu rígi̱ xá. Ikhaa naʼthí: “Mbóo mbiʼi niku̱ma̱ʼ mbá rí gagi rí nigíʼnuxu nájmáanʼ. Ni̱xna̱a̱ núma̱aʼ Jeobá rí niku̱ma̱ʼ rígi̱ ga̱jma̱a̱ niʼni rí maxtáá tsímáá. Asndu ikhú nánguá eniʼñúʼ raxna̱a̱ núma̱aʼ xúgíʼ mbiʼi rí májánʼ dí nigíʼnuxuʼ. ¡Rígi̱ nimbáyuʼ wéñuʼ mariʼkhu̱u̱ ku̱ma̱ ndrígóʼ! Maski ajndu xóó nagawúnʼ rí ikhaa nikháñu, naxna̱a̱ núma̱aʼ Jeobá numuu rí nixtáá tsímáá  ga̱jmu̱ʼ a̱ʼgiu̱ʼ ga̱jma̱a̱ rí nixtáá ga̱jmu̱ʼ mbáa xa̱bu̱ bi̱ nindoo kaʼyoo wéñuʼ Jeobá”.

“Naxna̱a̱ núma̱aʼ numuu rí gúʼdaa Jeobá.” (Sheryl)

13. Ndiéjunʼ nimbáyúu Sheryl mu maraʼnuu rí nikháñun bi̱ kuwa náa goʼwóo xá.

13 Sheryl ndiʼkhún gíʼdoo 13 tsiguʼ índo̱ xuajin Filipinas niguma gámbáa ga̱jma̱a̱ numuu ruʼwambiiʼ rí nigumbiʼyuu Haiyan, índo̱ na̱jkha̱ mámbáa tsiguʼ 2013. Ikhaa niʼnimbáti̱ga̱ xúgíʼ. Ikhaa naʼthí: “Niguámbáa goʼwóoʼ ga̱jma̱a̱ niguámbíin bi̱ kuwa náa goʼwóoʼ”. Anu̱u̱, ru̱dúu̱ gajmíi̱n ajtsíin a̱ngui̱i̱n nikháñun índo̱ nixnúu wéñuʼ ruʼwa. Ndiéjunʼ nimbáyúu maraʼnuu gaʼkhu rígi̱ ga̱jma̱a̱ rí xaxmiéjunʼ xá. Rí maxnáa núma̱aʼ ga̱jma̱a̱ mbaʼyoo má xúʼko̱ índo̱ naguma tsajkurámááʼ. Ikhaa niʼthí: “Ndi̱yo̱o̱ xúgíʼ rí niʼni xuajñu Jeobá mu mambáyuxuʼ ga̱jma̱a̱ maxnúxu tsiakii. Nda̱yo̱o̱ rí náa xúgíʼ numbaaʼ kúwi̱i̱n a̱ngiu̱lú bi̱ nutajkáan ga̱jma̱a̱ numuʼ”. Ma̱ngaa niʼthí: “Naxna̱a̱ núma̱aʼ numuu rí gúʼdaa Jeobá. Ikhaa naxnúlú má xúʼko̱ rí nda̱yúlúʼ”. Xúʼko̱, rí mbuʼyáá dí naguma tsajkurámáánʼ mambáyulúʼ mu xákuwaanʼ gíná. Rí muxnáa núma̱aʼ mambáyulúʼ muraʼníí xúgíʼ rí gáʼkha̱nú inulú (Efes. 5:20; atraxnuu Filipenses 4:6, 7).

MAʼDXUʼ NÁA JEOBÁ

14. Ndiéjunʼ kuaʼthi̱i̱nlú ikháanʼ marigá nda̱wa̱á rá. (Atayáá timbá xtiʼkhu.)

14 Asndu nákha wajyúúʼ, índo̱ Jeobá naʼni tsajkurámiinʼ xa̱bi̱i̱ naʼni rí makuwa gagi. Mbá xkri̱da, índo̱ israelitas nikáwíin náa faraón gajmíi̱n xa̱bi̱i̱ náa lamáa Maña̱ʼ, nikuwa gagi rí asndu nini ajmúú muni mba̱a̱ ga̱jma̱a̱ muxna̱a̱ núma̱aʼ Jeobá (Éx. 15:1-21). Rí mbiʼi xúgi̱, Dios naʼni rí muguaʼthi̱i̱n mbá rí mitsaan. Nakudaminaʼ rí ikhaa nacha̱ maʼni gámbáa xúgíʼ rí naʼniulú makuwáanʼ gíná (Sal. 37:9-11; Is. 25:8; 33:24). Gundxaʼwamíjna̱ xú káʼnii gaku̱mu̱lú índo̱ Jeobá gaʼni gámbíin xúgínʼ bi̱ guáʼdáá sia̱nʼ náa ikhaa ga̱jma̱a̱ magruiguánʼ náa nuxi̱ʼ numbaaʼ náa marigá rí tsímáá ga̱jma̱a̱ rí jmbu. ¡Ikhú muguaʼdáá mbaʼa numuu mu muxnáa núma̱aʼ! (Rev. 20:1-3; 21:3, 4.)

Dios naʼni rí muguaʼthi̱i̱n mbá rí mitsaan: Ikhaa nacha̱ maʼni gámbáa xúgíʼ rí naʼniulú makuwáanʼ gíná

15. Ndiéjunʼ gíʼmaa muʼni tsiguʼ 2015 rá.

15 Kuaʼti̱i̱n rí maʼni tsajkurámáánʼ wéñuʼ Jeobá tsiguʼ 2015. Mbáa ma̱ngaa muraʼníí tikhuu tsáʼkhá. Mú ga̱ʼkha̱ rí gáʼkha̱, nduʼyáá rí Jeobá xániñulú nditháan (Deut. 31:8; Sal. 9:9, 10). Ikhaa maxnúlúʼ xúgíʼ rí eyúluʼ mu makuwáanʼ jmbu. Ikha jngó, guʼyaridáá rí niʼni gaʼyee Habacuc, bi̱ niʼthí: “Maski ajndu ixu̱u̱ higo xáxná riʼyu̱u̱, ga̱jma̱a̱ xárígá xndúu náa ixu̱u̱ uva; maski ajndu xárígá aceituna, ga̱jma̱a̱ mbaaʼ xájma̱a̱ ganitsu; ga̱jma̱a̱ mugu̱ xakuwa náa gúláa, mangiin xede̱ xakuwa náa gúláa; mú ikhúúnʼ, gajkhun rí ma̱ʼdxu̱ʼ náa Jeobá; gajkhun rí maxtáá gagi náa Dios bi̱ maʼni kríñunʼ” (Hab. 3:17, 18). Índo̱ gundxaʼwamíjna̱ guxnáa núma̱aʼ ga̱jma̱a̱ numuu xúgíʼ rí naguma tsajkurámáánʼ ma̱ngaa guʼni rí eʼthúlú texto rí kaʼyoo tsiguʼ 2015: “Guxna̱a̱ núma̱aʼ Jeobá, numuu rí ikhaa nindxu̱u̱ májáánʼ” (Sal. 106:1).

Mbáa ma̱ngaa muraʼníí tikhuu tsáʼkhá, mú ga̱ʼkha̱ rí gáʼkha̱, nduʼyáá rí Jeobá xániñulú nditháan

^ párr. 10 Nixtiʼkhu̱u̱ mbiʼñún