Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo  |  Diciembre tsiguʼ 2014

 RÍ KAYÁ EDXU̱U̱ NÁA INUU I̱YI̱I̱ʼ | MA̱NDOO MARAXTAA MIJNGII NÁA DIOS

Lá natani rí Dios na̱nda̱ʼa̱ʼ ráʼ.

Lá natani rí Dios na̱nda̱ʼa̱ʼ ráʼ.

“I̱ndó arathúnʼ rí gáʼndaʼ mani.” Mbáa xáratha̱a̱n rígi̱ mbáa bi̱ tsítatsiʼniiʼ o bi̱ ndiʼkhún tatsiniiʼ. Mú xáʼniaʼ mingíjyúuʼ maratha̱a̱n rígi̱ mbáa bi̱ nambáxa̱ʼ májánʼ ga̱jma̱ʼ. Bi̱ nambáxu̱u̱n májánʼ numbayúmíjná kanikhiin.

Náa Biblia nasngájma rí Jeobá naʼni má xúʼko̱ rí ndaʼyoo rí maʼni makuwa gagi xa̱bi̱i̱ bi̱ kuwa jmbu. Mbá xkri̱da, rey David, bi̱ nimbáxu̱u̱ májánʼ ga̱jma̱a̱ Dios, niʼthí rígi̱: “Mbaʼa rí nitani̱ ikháánʼ mínaʼ, oh Jeobá Dios ndrígóʼ, náa xúgíʼ rí mitsaan wéñuʼ nitani̱ ga̱jma̱a̱ rí natatsaʼwáá edxa̱ʼ ga̱jma̱a̱ numuxu. [...] Ni̱jkha̱nú ninindxu̱u̱ mbaʼa wéñuʼ rí ikhúúnʼ xándoo gáthá” (Salmo 40:5). Maski ajndu xúʼko̱ Jeobá naʼniún rí májánʼ xúgínʼ asndu bi̱ tsiniʼniiʼ, ikhaa “na’nimati ri naxna’lo mo’po, jame na’ni ri ma’dxu akian’lo” (Hechos 14:17).

Ikháanʼlu nuʼni ga̱jma̱a̱ xúgíʼ a̱jkiu̱lúʼ mbá dí ndayóoʼ mbáa bi̱ nandulúʼ kuʼyáá o nduʼyamajkuíí

Jeobá naniguʼ maʼni rí makuwa májánʼ eʼwíínʼ, ikha jngó bi̱ nandún mambaxúún gajmiún ikhaa muni rí Jeobá ‹maxtáa gagi a̱jkiu̱u̱n› (Proverbios 27:11). Mú ndiéjunʼ gándoo muʼni mu maʼdxuu Dios rá. Náa Biblia nariʼña̱a̱: “Xabumaʼla [...] ri muʼni ri mejanʼ ri muxnu ri cuaʼda naʼ su ndaʼ, numu riguiʼ ñajunʼ maŋga xuri siguejñaʼ ri naniguʼ Dios muʼni” (Hebreos 13:16). Lá nandoo gáʼthi rí índo̱ nataniu̱u̱n rí májánʼ eʼwíínʼ o índo̱ naraxnúún rí xtaʼdáá i̱ndó rúʼko̱ eyóoʼ mu matani rí naniguʼ Jeobá ráʼ.

“Á mu nda̱a̱ fe xándoo muʼni rí naniguʼ Dios”, eʼthí náa Biblia (Hebreos 11:6). Nda̱wa̱á rí “Abraham necume caʼyo [Jeobá]” ikhú “neʼni mbiʼjiu midiu Dios” (Santiago 2:23). Jesucristo niʼthí rí gíʼdoo numuu ‹muguaʼdáá fe náa Dios› ga̱jma̱a̱ xúʼko̱ makuwáanʼ májánʼ náa majñu̱nʼ (Juan 14:1). Xú káʼnii gándoo muguaʼdáá fe náa Dios rá. Lá ma̱ngaa Dios nakuʼmaminaʼ náa ikháanʼ ráʼ. Ikháánʼ ma̱ndoo matagíʼdi̱i̱ matanigajmaa Ajngá rawunʼ Dios. Xúʼko̱ ikháánʼ mi̱dxu̱ʼ rajmañaʼ itháan ‹rí nandoo ikhaa› ga̱jma̱a̱ índo̱ gídxúʼ raraʼdáá mbá ku̱ma̱ káxi̱ ga̱jma̱a̱ numuu Jeobá mataʼgíiʼ matanimbánii xtángoo ndrígóo rí xtaa rajmañaʼ, xúʼko̱ gáʼga ra̱ja̱a̱ fe rí xtaʼdáá náa ikhaa ga̱jma̱a̱ ikhaa makuʼmaminaʼ itháan mijngii náa ikháánʼ (Colosenses 1:9, 10).