Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (edición de estudio)  |  Octubre tsiguʼ 2017

Ndiéjunʼ ikha ejmañulú ga̱jma̱a̱ numuu visión ndrígóo Zacarías

Ndiéjunʼ ikha ejmañulú ga̱jma̱a̱ numuu visión ndrígóo Zacarías

“Gatangaánʼ náa ikhúúnʼ [...], ga̱jma̱a̱ ikhúúnʼ matangu̱ún náa ikháanʼla” (ZAC. 1:3).

AJMÚÚ 89 GA̱JMA̱A̱ 86

1-3. a) Xú káʼnii rígá náa xuajñu Dios índo̱ Zacarías nigíʼdu̱u̱ niʼtáriyaʼ dí marigá nda̱wa̱á rá. b) Náa numuu rí Jeobá nindo̱ʼo̱o̱ xuajñu mú mata̱nga̱a̱ náa ikhaa xá.

MBÁ rollo dí na̱jkha̱ rijma̱a̱, mbáa a̱ʼgu̱ gíwanʼ náa mbá xtu̱ʼ ga̱jma̱a̱ a̱jmi̱i̱n gu̱ʼu̱ guáʼdáá xniúnʼ xóo mbáa cigüeña bi̱ na̱jkha̱ ratuxu̱u̱ ga̱jma̱a̱ giñánʼ. Nuxkamaa xtiʼkhu mitsaan rígi̱ náa libro ndrígóo gaʼyee Zacarías (Zac. 5:1, 7-9). Náa numuu rí Jeobá niʼni rí gaʼyee mbaʼyoo visión rígi̱ rá. Xú káʼnii embáyulú visión rígi̱ dí mbiʼi xúgi̱ rá.

2 Nákha tsiguʼ 537 tsiguʼ ginii ninindxu̱u̱ mbá tsiguʼ gagi náa xuajñu Jeobá. Numuu rí nigún kudiin náa Babilonia mbá ajtsú skíñúʼ gu̱wa̱ʼ tsiguʼ, mú rí xúgi̱ niniñu̱nʼ. Nákha ginii, bi̱ israelitas nidxún wéñuʼ rí ma̱ndoo matangi̱ín náa Jerusalén mu muni̱i̱ mbu̱júu̱ʼ templo ga̱jma̱a̱ rí ikhí mbuyamajkuíí Dios. Mbá tsiguʼ nda̱wa̱á, nákha 536, nitsiji rajkúu templo. Náa Biblia naʼthí rí xa̱bu̱ ra̱ʼkhá tháán nidxún rí asndu “nindxa̱ʼwa̱ gakhi̱i̱ wéñuʼ, rí aʼwún niwáán asndu mitsínguánʼ” (Esd. 3:10-13). Mú, xa̱bu̱ sia̱nʼ bi̱ tsíñún gúyáá dí gajkhun nigíʼdi̱i̱ nikiʼníin ga̱jma̱a̱ numuu rí niguma̱a̱ mbu̱júu̱ templo. Bi̱ israelitas nikáguabiinʼ  ga̱jma̱a̱ numuu xkujndu dí asndu niniñaaʼ ruñajunʼ. Nigi̱ʼdi̱i̱ nini guʼwún ga̱jma̱a̱ nini májánʼ ku̱ba̱ʼ mu mudu. Gu̱wa̱ʼ imajun tsiguʼ nda̱wa̱á rí nigi̱ʼdi̱i̱ nitsiji rajkúu templo, niniñaaʼ ruñajunʼ. Jeobá ndiyóoʼ maʼni rí marmáʼáan a̱jkiu̱ún bi̱ israelitas rí muniña̱nʼ runi ginii rí nandún ikhiin ga̱jma̱a̱ rí matangi̱i̱n náa ikhaa mu mbuyamajkuíí ga̱jma̱a̱ xúgíʼ a̱jkiu̱ún ga̱jma̱a̱ gagi.

3 Ikha jngó nákha tsiguʼ 520 Jeobá nikuʼmaa gaʼyee Zacarías mu maʼni marmáʼáan a̱jkiu̱ún xa̱bu̱ xuajen náa numuu rí niʼni káwíin náa Babilonia. Mbiʼyuu Zacarías nandoo gáʼthúu̱n “Jeobá naʼni marmáʼáan a̱jkiu̱lú”. Mbáa rígi̱ niʼni rí marmáʼáan a̱jkiu̱ún bi̱ israelitas mbá rí gíʼdoo wéñuʼ numuu: Maski asndu ikhiin nimbumún rí Jeobá niʼni ga̱jma̱a̱ numún, mu ikhaa támbumuu kaʼñún (atraxnuu Zacarías 1:3, 4). * Dios niʼthún rí mambáñún muni mbu̱júu̱ náa mbuyamajkuíí. Mú ma̱ngaa niʼthúún rí i̱ndó magruigú rí mbuyamajkuíí á mu nuni ga̱jma̱a̱ xúgíʼ a̱jkiu̱ún. Guʼyáá xú káʼnii Jeobá nijmuu rí maʼni majun ga̱jma̱a̱ juwan visión ndrígóo Zacarías mu maxkajxi̱i̱n mbuyamajkuíí ga̱jma̱a̱ ndiéjunʼ gándoo gajmañulú ikháanʼ rí mbiʼi xúgi̱.

JEOBÁ NAXNÚN CASTIGO BI̱ NUNI KUʼWÁʼ

4. a) Ndiéjunʼ ndiʼyoo Zacarías náa juwan visión rá. b) Ndiéjunʼ eyoo gáʼthúu̱n rí kiʼniraʼmáʼ náa nájma̱ níʼkhóo rollo rá. (Atayáá xtiʼkhu número 1.)

4 Náa capítulo 5 náa libro ndrígóo Zacarías nagíʼdu̱u̱ naʼthí ga̱jma̱a̱ numuu mbá visión rí mixtiʼkhu wéñuʼ (atraxnuu Zacarías 5:1, 2). * Gaʼyee ndaʼyoo mbá rollo rí na̱jkha̱ rijma̱a̱ ga̱jma̱a̱ naʼni xóo mbá 9 ga̱jma̱a̱ 4,5 metros rí mbaaʼ. Kambaʼta, xóo muʼthá, rígá xawii mu magixnuu. Ajngáa kiʼniraʼmáʼ náa nájma̱ níʼkhóo (Zac. 5:3). Naguʼwún muniraʼmáʼ náa mbóó níʼkhóo. Mú rí nigumaraʼmáʼ náa nájma̱ níʼkhóo nandoo gáʼthúu̱n rí gíʼdoo wéñuʼ numuu. Nindxu̱u̱ mbá ajngáa rí najuiʼthá ndiéjunʼ mugíʼnin.

Cristianos nuni gaʼduunʼ xúgíʼ enii tsikuwaʼ. (Atayáá kutriga̱ 5 asndu 7).

5, 6. Xú káʼnii eʼyoo Jeobá xúgíʼ enii tsikuwaʼ rá.

5 (Atraxnuu Zacarías 5:3, 4). * Xúgiáanʼ mbaʼyóoʼ muxnáxi̱i̱ cuenta náa inuu Dios ga̱jma̱a̱ numuu rí nuʼni. Ga̱jma̱a̱ bi̱ na̱jkua̱ kuʼyúlú mbiʼyuu kuaʼdáá mbá ñajunʼ kiejunʼ. Bi̱ nandulúʼ kuʼyáá Dios nduʼyáá rí xúgíʼ enii tsikuwaʼ naʼni tsagoo mbiʼyuu rí nindxu̱u̱ kaʼwu (Prov. 30:8, 9). Tikhun xa̱bu̱ nundxa̱ʼwa̱míjna̱ rí májánʼ má nindxu̱u̱ rí muʼni kuʼwáʼ á mu rígá mbá májánʼ numuu. Mú, rí phú gajkhun, bi̱ naʼni kúwáʼ nasngájma rí itháan gíʼdoo numuu rí mbayáaʼ magiʼdoo ki xóo Jeobá, mbiʼyuu ga̱jma̱a̱ xtángoo ndrígóo.

6 Guʼyáá rí Zacarías 5:3, 4 naʼthí rí kiʼtátsrigu “mato̱ʼo̱o̱ náa goʼwóo kuʼwáʼ”, maguanúu ikhí ga̱jma̱a̱ maʼni gámbáa. Rígi̱ eyoo gáʼthi rí Jeobá ma̱ndoo maʼni rí makujmaa pa̱jnu̱ ga̱jma̱a̱ manda̱ʼa̱a̱ cuenta asndu xú káʼnii má aʼkhá rí nikudaminaʼ mbáa xa̱bi̱i̱. Maxtáa mbáa bi̱ maʼngo̱o̱ markaʼwu múʼúun náa Xa̱bu̱ Ñajunʼ, jefe ndrígóo, bi̱ kuya̱ edxu̱u̱ o náa anu̱u̱ rí niʼni. Mú xáʼngo̱o̱ garkaʼwu múʼúun náa inuu Dios, bi̱ naʼthí rí xúgíʼ tsikuwaʼ makujmaa (Heb. 4:13). Xa̱bi̱i̱ Dios nadxulú wéñuʼ rí kuwáanʼlu gajmiúlú xa̱bu̱ bi̱ nunimíjna̱ mu xúni̱ kuʼwáʼ “náa xúgíʼ” (Heb. 13:18).

7. Ndiéjunʼ eʼsngúlúʼ visión ndrígóo Zacarías ga̱jma̱a̱ numuu rollo rí na̱jkha̱ rijma̱a̱ rá.

7 Jeobá naʼni gawúunʼ asndu xú káʼnii má enii  tsikuwaʼ. Xa̱bi̱i̱ Dios nduʼyáá rí gíʼdoo wéñuʼ numuu muniʼnííʼ ga̱jma̱a̱ muʼnimbulúʼ xtángoo ndrígóo, ga̱jma̱a̱ makuwáanʼ xóo rí muʼni mba̱a̱ mbiʼyuu. Xúʼko̱, xumíniiʼ náa castigo rí ma̱ʼkha̱ kayóo Dios náa xa̱bu̱ bi̱ tsíñún gúnimbu̱ún xtángoo ndrígóo.

GUʼNIMBANÍÍ AJNGÚLÚ “MÁMBÁ MBIʼI”

8-10. a) Ndiéjunʼ nindxu̱u̱ mbá juramento rá. b) Xú káʼnii juramento rí táʼyamajkuu Sedequías rá.

8 Nda̱wa̱á, ajngáa ndrígóo rollo naʼthúún xa̱bu̱ bi̱ nuriyaʼ mbiʼyuu Dios índo̱ nuthi minduwaʼ (Zac. 5:4). Mbá juramento ma̱ndoo mani̱ndxu̱u̱ mbá ajngáa náa nuthi rí gajkhun nindxu̱u̱ rí najuiʼthá xóo mbá ajngáa rí marigá o xarigá.

9 Rí muʼni mbá juramento ga̱jma̱a̱ mbiʼyuu Jeobá na̱nguá nindxu̱u̱ mbá gitsíin. Guʼyáá rí nigíʼnuu Sedequías, bi̱ imbawíí rey bi̱ niʼtáñajunʼ náa Jerusalén. Niríyaʼ mbiʼyuu Jeobá índo̱ niʼthí rí maʼnimbo̱o̱ kaʼyoo Xa̱bu̱ Ñajunʼ ndrígóo Babilonia. Mú “tániguʼ juramento” ga̱jma̱a̱ “táʼnimbánuu ajngóo”. Rí nirígá nda̱wa̱á, Dios niʼthí rí makhañúu náa Babilonia (Ezeq. 17:16).

10 Jeobá nigi̱ʼthu̱u̱n rí Sedequías mbaʼyámajkuu juramento rí niʼni ga̱jma̱a̱ mbiʼyuu Dios (2 Crón. 36:13). Mú, rey bugi̱ táʼnimbánuu ajngóo ga̱jma̱a̱ nindo̱ʼo̱o̱ Egipto rí mambáyúu mu maʼni kríyaminaʼ rí xútañajuíínʼ babilonios. Mú rúʼko̱ nda̱a̱ rí niyambáá (Ezeq. 17:11-15, 17, 18).

11, 12. a) Xú káʼnii nindxu̱u̱ voto rí itháan gíʼdoo numuu rí ma̱ndoo muʼni rá. b) Xú káʼnii embáyúu náa vida ndrígúlú rí nixnaxímíjná náa Jeobá rá.

11 Jeobá ma̱ngaa naʼdxun índo̱ nuxná ajngúlú o mbá rí nuʼthá muʼni ikháanʼ. Ikhaa tseʼyoo xóo mbá gitsíin. Ga̱jma̱a̱ ndayóoʼ mbuʼyamajkuíí mu ikhaa maʼndoo kaʼyulú (Sal. 76:11). Rí muxnaxímíjná muʼni ñajunʼ Dios nindxu̱u̱ mbá rí gíʼdoo wéñuʼ numuu. Índo̱ nuxnaxí vida ndrígúlú náa Jeobá, nuʼtháán rí muʼni ñajunʼ ikhaa tséʼniuu má rí garigá náa vida ndrígúlú.

12 Xú káʼnii eʼnimbaníí ajngúlú rí nixnaxímíjná rá. Rí xóo eʼni índo̱ nuraʼníí tsáʼkhá, tséʼniuu á mu  nindxu̱u̱ mba̱a̱ o chíʼgíʼ, masngájma á mu nduʼyáá rí gíʼdoo numuu rí nuxuʼdámíjná rí muʼni ñajunʼ Jeobá “mámbá mbiʼi” (Sal. 61:8). Mbá xkri̱da, á mu mbáa náa nuñajunʼ o náa escuela nasngájma rí naniguʼ eʼnilu, lá nuʼni gaʼduunʼ rí naʼthí ga̱jma̱a̱ nusngajmá rí nandulúʼ muʼnimbulúʼ rí naʼthí Jeobá ráʼ. (Prov. 23:26.) O á mu i̱ndó ikháanʼ ni̱ndxu̱lú xa̱bi̱i̱ Dios náa guʼwúlú, lá nunda̱ʼa̱ rí mambáyulúʼ mu musngajmá rí ni̱ndxu̱lú cristianos ráʼ. Asndu xú káʼnii má xkujndu rí guraʼníí, lá nuʼtákáñii Jeobá xúgíʼ mbiʼi mu muxnáa núma̱aʼ numuu rí nandoo kaʼyulú ga̱jma̱a̱ rí naxnúlú ikha ndrígóo xáʼ. Lá nuríyaʼ mbiʼi mu muraxnuu Biblia mbéjtsi ráʼ. Índo̱ nixnaxímíjná náa Dios niʼtháán rí muʼni xúgíʼ rígi̱. Rí muʼnimbánii rí nixnaxímíjná nandoo gáʼthi rí ndayóoʼ muʼnimbulúʼ. Á mu nuxnáá rí májánʼ índo̱ nuʼni ñajuunʼ ndrígóo, nusngajmáá rí nandulúʼ kuʼyáá ga̱jma̱a̱ nixnaxímíjná gajkhun náa ikhaa. Nuʼni ñajunʼ Jeobá numuu rí nandulúʼ muʼni, raʼkháa i̱ndó numuu rí eʼwíínʼ nutulú rí xúʼko̱ gíʼmaa muʼni. Rí muʼnimbánii rí niʼthá muʼni mani̱ndxu̱u̱ májánʼ náa ikháanʼ numuu rí Dios nikudaminaʼ mbá rí mitsaan wéñuʼ nda̱wa̱á náa xa̱bu̱ bi̱ wájun jmbu (Deut. 10:12, 13).

13. Ndiéjunʼ ejmañulú ga̱jma̱a̱ numuu majun visión rí ndiʼyoo Zacarías rá.

13 Majun visión rí ndiʼyoo Zacarías mambáyulúʼ mbuʼyáá rí bi̱ nandulúʼ kuʼyáá Jeobá ragíʼmaa muʼni kuʼwáʼ ga̱jma̱a̱ muʼnimbaníí rí nuʼthá muʼni. Ma̱ngaa najmañulúʼ rí Dios támbumuu kaʼñún israelitas maski ajndu ikhiin nikiéʼkhun. Ikhaa ndiʼyoo rí kuwa náa tapu̱ún xa̱bu̱ sia̱nʼ ikha jngó numíniiʼ wéñuʼ. Jeobá naʼnimbánuu rí naʼthí, ga̱jma̱a̱ xúʼko̱ naxnúlú mbá xkri̱da rí xú káʼnii gíʼmaa muʼni. Ma̱ngaa, nduʼyáá rí ikhaa mambáyulúʼ mu muʼnimbánii rí nuʼthá. Mbá rí xóo nambáyulúʼ nindxu̱u̱ índo̱ naʼthúlúʼ rí muguaʼthi̱i̱n nda̱wa̱á rí maguma gámbáa dí ra̱májánʼ wéñuʼ dí rígá náa tsu̱du̱u̱ Ku̱ba̱ʼ. Imbo̱o̱ visión ndrígóo Zacarías naʼthúlúʼ gajkhun rí mambanúu rí marigá nda̱wa̱á.

NAGÚN KU̱ÑU̱U̱N DÍ RA̱MÁJÁNʼ “NÁA KAʼYOO”

14, 15. a) Ndiéjunʼ eʼyoo Zacarías náa rí maʼni juwan visión rá. (Atayáá xtiʼkhu número 2.) b) Ndiéjunʼ eyoo gáʼthúu̱n a̱ʼgu̱ bi̱ kua̱ʼa̱a̱n náa awúu̱n xtu̱ʼ rá. c) Náa numuu ángel naruguamáʼáan a̱ʼgu̱ náa xtu̱ʼ rá.

14 Nda̱wa̱á rí ndiʼyoo visión ndrígóo rollo, mbáa ángel niʼthúu̱n Zacarías: “Atayáá rí xtáa ragájnuu”. Ndiéjunʼ eʼyoo gaʼyee náa juwan visión rá. Ndiʼyoo rí nikujmaa mbá “efá rí nagiéwan”, xóo muʼthá, mbá xtu̱ʼ rí najmaa mu muñewan mbá efá (atraxnuu Zacarías 5:5-8). * Xtu̱ʼ rígi̱ gíʼdoo “xo̱o̱ [...] ndijndi rí kiʼni ga̱jma̱a̱ plomo”. Índo̱ nurigúu xo̱o̱, Zacarías nayexima̱ʼa̱ rí “gíʼ mbáa a̱ʼgu̱ náa awúu̱n xtu̱ʼ”. Ángel naʼthúu̱n rí nindxu̱u̱ “dí ra̱májánʼ wéñuʼ”, o dí raʼkhí. Gundxaʼwamíjna̱ rí gaʼyee bugi̱ asndu nimíñuu índo̱ ndiʼyoo rí a̱ʼgu̱ bugi̱ naʼniminaʼ magajnúu. Mú ángel núkhu ekumáʼ mbu̱júu̱ ga̱jma̱a̱ narúguáa xtu̱ʼ ga̱jma̱a̱ xo̱o̱ rí mikewun wéñuʼ. Ndiéjunʼ eyoo gáʼthúu̱n xúgíʼ rígi̱ rá.

15 Náa visión rígi̱ nasngájma rí Jeobá tséʼngo̱o̱ rí marigá nditháan dí raʼkhí náa xuajñu. Á mu ndaʼyoo mbá dí raʼkhí, naʼni gámbóo mbá nacha̱ (1 Cor. 5:13). Ángel nasngájma rígi̱ índo̱ narígu nacha̱ xo̱o̱ rí kiʼni ga̱jma̱a̱ plomo náa xtu̱ʼ.

Jeobá niʼni xúgíʼ rí kaʼyoo mu náa xuajñu marigá má xúʼko̱ rí kaʼwu. (Atayáá kutriga̱ 16 asndu 18).

16. a) Ndiéjunʼ eʼyoo Zacarías rí nigíʼnuu xtu̱ʼ rá. (Atayáá xtiʼkhu número 3.) b) Náa egún ku̱ñu̱u̱n xtu̱ʼ gu̱ʼu̱ bi̱ guáʼdáá xniunʼ rá.

16 Nda̱wa̱á nakujmiin a̱jmi̱i̱n gu̱ʼu̱ bi̱ guáʼdáá xniúnʼ rí gíʼdoo wéñuʼ tsiakii xóo cigüeña (atraxnuu Zacarías 5:9-11). * Gu̱ʼu̱ bugi̱  ni̱ndxu̱ún mixtiʼkuiin wéñuʼ ki xóo a̱ʼgu̱ bi̱ nagumbiʼyuu bi̱ “ra̱májánʼ wéñuʼ” bi̱ gíwanʼ náa awúu̱n xtu̱ʼ. Zacarías ndaʼyoo rí nuxuxi ga̱jma̱a̱ nagún ku̱ñu̱u̱n ga̱jma̱a̱ xniúnʼ rí gíʼdoo wéñuʼ tsiakii. Náa egún ku̱ya̱a̱ a̱ʼgu̱ bugi̱ xá. Náa “ku̱ba̱ʼ Sinar” o Babilonia. Náa numuu egún ku̱ya̱a̱ ikhí xá.

17, 18. a) Náa numuu rí Sinar nindxu̱u̱ “náa kaʼyoo” dí “ra̱májánʼ wéñuʼ” rá. b) Ndiéjunʼ gúʼni ga̱jma̱a̱ numuu dí raʼkhí rá.

17 Zacarías gajmíi̱n israelitas bi̱ nikuwa ikhú, Sinar o Babilonia ninindxu̱u̱ mbá náa ma̱ndoo magún ku̱ñu̱u̱n “dí ra̱májánʼ wéñuʼ”. Ikhiin nikuwa náa xuajen xkawiʼ rúʼko̱ ga̱jma̱a̱ náa nduyamajkhún xándú ga̱jma̱a̱ mámbá mbiʼi ndiyóoʼ muñeumíjna̱ wéñuʼ ga̱jma̱a̱ numuu xúgíʼ rí xkawiʼ. Ikha jngó nduyáá rí ikhí rígá dí ra̱májánʼ wéñuʼ. Visión rígi̱ niʼni rí maxnún tsiakii, numuu rí Jeobá nisngájma rí magiʼdoo kaʼwu rí mbuyamajkuíí.   

18 Visión rígi̱ ma̱ngaa niʼni marmáʼáan a̱jkiu̱ún bi̱ judíos rí ikhiin mbaʼyóoʼ rí xúniñaʼ rí marigá rí tsaga náa rí mbuyamajkuíí Dios. Dí ra̱májánʼ ragíʼmaa marigá náa xuajñu Jeobá. Ikhaa ni̱ʼkha̱ kaguáanʼ náa xuajñu rí mikaʼwu, náa nduʼyáá rí nandoo kaʼyulú ga̱jma̱a̱ nañewu̱nlú. Mú ikháanʼ kaʼyulú muyambáá rí marigá má xúʼko̱ rí mikaʼwu. Lá naxkaxáanʼ muʼni rá. Nda̱a̱ náa marigá dí raʼkhí náa paraíso rí na̱ʼkha̱ náa Dios.

MBÁ XUAJEN KAʼWU NAʼNI MBA̱A̱ JEOBÁ

19. Xú káʼnii gándoo gambáyulú ikháanʼ visión rí ndiʼyoo Zacarías rá.

19 Visión majun ga̱jma̱a̱ juwan rí ndiʼyoo Zacarías nindxu̱u̱ mbá rí niʼthún bi̱ tséni rí májánʼ. Ma̱ngaa naʼni marmáʼáan a̱jkiu̱lú rí Jeobá tséniguʼ nditháan dí ra̱májánʼ. Ga̱jma̱a̱ visión rígi̱, Jeobá naʼni mbuʼyáá rí á mu nuʼnimi̱jna̱ muʼni rí nandoo ikhaa xágiʼnulú dí ra̱májánʼ. Ikhaa mañewu̱nlú ga̱jma̱a̱ maʼni tsajkurámáánʼ. Ga̱jma̱a̱ nduʼyáá májánʼ rí ikhaa má gambáyulú mu muʼnimíjna̱ manindxu̱lúʼ mikaʼwáanʼ náa numbaaʼ rígi̱ dí ra̱májánʼ wéñuʼ. Mú náa numuu nduʼyáá májánʼ rí mbuʼyamajkuíí má xúʼko̱ Jeobá rá. Xú káʼnii eʼyáá rí Jeobá mañewu̱u̱n xuajñu xúgi̱ rí inuu marigá majphú mba̱a̱ gaʼkhu rá. Náa imbo̱o̱ artículo muriʼña̱a̱ graxe̱ rígi̱.

^ párr. 3 Zacarías 1:3, 4: ““Ga̱jma̱a̱ gíʼmaa rí marathu̱u̱n: ‹Rígi̱ rí niʼthí Jeobá bi̱ gíʼdiin mbaʼin ejército: “‹Gatangaánʼ náa ikhúúnʼ, eʼthí Jeobá bi̱ gíʼdiin mbaʼin ejército, ga̱jma̱a̱ ikhúúnʼ matangu̱ún náa ikháanʼla›, eʼthí Jeobá bi̱ gíʼdiin mbaʼin ejército”›. “‹Xanindxala xóo ana̱la bi̱ gaʼyee nithún: “Rígi̱ nindxu̱u̱ rí niʼthí Jeobá bi̱ gíʼdiin mbaʼin ejércitos: ‹Gunitsingumijnala, mbá péñu, náa kambala dí ra̱májánʼ ga̱jma̱a̱ dí ra̱májánʼ rí nunila›”›. “‹Mú ikhiin na̱nguá ninimbaníí ga̱jma̱a̱ túdxawíín rí ni̱thu̱u̱n”, eʼthí Jeobá”.

^ párr. 4 Zacarías 5:1, 2: “Ikhú niyexi mbu̱júu̱ ga̱jma̱a̱ ndi̱yo̱o̱ mbá rollo rí na̱jkha̱ rijma̱a̱. Ikha jngó niʼthúnʼ: “Ndiéjunʼ tayáá”. Ikhú niriʼña: “Nda̱yo̱o̱ mbá rollo rí na̱jkha̱ rijma̱a̱, ga̱jma̱a̱ rí mbaaʼ naʼni mbá skíñúʼ itsu̱ gúʼxáʼ, ga̱jma̱a̱ rí ma̱ja̱nʼ mbá gu̱wa̱ʼ itsu̱ gúʼxáʼ””.

^ párr. 5 Zacarías 5:3, 4: “Ikhú niʼthúunʼ: “Rígi̱ nindxu̱u̱ dí ra̱májánʼ rí nagájnuu náa xúgíʼ tsu̱du̱u̱ ku̱ba̱ʼ, numuu rí bi̱ naʼni kuʼwáʼ xó má kiʼniraʼmáʼ náa mbá níjniúu, na̱nguá egruigú castigo; ga̱jma̱a̱ bi̱ naʼni mbá juramento, xó má kiʼniraʼmáʼ náa i̱mba̱ níjniúu, na̱nguá egruigú castigo. ‹Ga̱jma̱a̱ makuʼmáa, eʼthí Jeobá bi̱ gíʼdiin mbaʼin ejércitos, ga̱jma̱a̱ mato̱ʼo̱o̱ náa goʼwóo kuʼwáʼ ga̱jma̱a̱ náa goʼwóo bi̱ najmuu mbiʼyuuʼ mu maʼthí mbá juramento dí ragájkhun; ga̱jma̱a̱ maguanúu náa guʼwá rúʼko̱ ga̱jma̱a̱ maʼni gámbáa, ga̱jma̱a̱ ixi̱ ga̱jma̱a̱ itsí›””.

^ párr. 14 Zacarías 5:5-8: “Ikhú ángel bi̱ naʼtámíjná ga̱jma̱a̱ ni̱ndxu̱ʼ nigájnuu ga̱jma̱a̱ niʼthúnʼ: “Mbá péñu, atayáá rí xtáa ragájnuu”. Ikhú: “Ndiéjunʼ nindxu̱u̱ rá.” Ikhú ikhaa niʼthí: “Rígi̱ nindxu̱u̱ efá rí nagiéwan rí xtáa ragájnuu”. Ga̱jma̱a̱ niʼthí: “Xúgi̱ kaʼniún ikhiin náa xúgíʼ tsu̱du̱u̱ ku̱ba̱ʼ”. Ga̱jma̱a̱ ndi̱yo̱o̱ xo̱o̱ xtu̱ʼ ndijndi rí kiʼni ga̱jma̱a̱ plomo rí nigixi; ga̱jma̱a̱ ikhí gíʼ mbáa a̱ʼgu̱ náa awúu̱n xtu̱ʼ. Ga̱jma̱a̱ ikhaa niʼthí: “Rígi̱ nindxu̱u̱ dí ra̱májánʼ wéñuʼ”. Ga̱jma̱a̱ nikumáʼ mbu̱júu̱ náa xtu̱ʼ ga̱jma̱a̱ nda̱wa̱á nirugoo ga̱jma̱a̱ xo̱o̱ mikewun rí kiʼni ga̱jma̱a̱ plomo náa rawunʼ xtu̱ʼ”.

^ párr. 16 Zacarías 5:9-11: “Ikhú ndiyaraʼan ga̱jma̱a̱ ndi̱yo̱o̱ rí naguwáʼ náa ikhúúnʼ a̱jmi̱i̱n gu̱ʼu̱, ga̱jma̱a̱ ikhiin nagún náa inuu giñánʼ. Ga̱jma̱a̱ xniúnʼ nindxu̱u̱ xóo xniunʼ cigüeña. Ga̱jma̱a̱ nixuxi̱ efá náa ku̱ba̱ʼ asndu náa mekhu. Ikhú niraxu̱u̱ ángel bi̱ xtáa raʼtámíjná ga̱jma̱á ni̱ndxu̱ʼ: “Náa egún ku̱ñu̱u̱n efá xá.” Ikhú ikhaa niʼthúunʼ: “Mu mani mbá guʼwá náa ku̱ba̱ʼ Sinar; ga̱jma̱a̱ índo̱ garigá xawii, ga̱jma̱a̱ ikhí gaguanúu náa kaʼyoo””.