Atambaʼtaa mu matraxnuu

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

Atraʼwíí ajngáa me̱ʼpha̱a̱

Mixtiʼkun ni̱ndxu̱ún bi̱ nuni ñajunʼ Jeobá ki xóo eʼwíínʼ

Mixtiʼkun ni̱ndxu̱ún bi̱ nuni ñajunʼ Jeobá ki xóo eʼwíínʼ

“Ikháanʼla mbu̱ya̱a̱ [...] rí mixtiʼkuii mbáa bi̱ naʼni rí jmbu ga̱jma̱a̱ mbáa bi̱ naʼni dí ra̱májánʼ” (MAL. 3:18).

AJMÚÚ 127 GA̱JMA̱A̱ 101

1, 2. Náa numuu rí gíʼmaa muñeumíjna̱ wéñuʼ xa̱bi̱i̱ Dios rí mbiʼi xúgi̱ rá. (Atayáá timbá xtiʼkhu.)

MBAʼIN doctores ga̱jma̱a̱ enfermeras nuni thanún bi̱ numíniiʼ ga̱jma̱a̱ mbá nandii rí na̱jkha̱roʼoo. Nuni ga̱jma̱a̱ numuu rí nandún mumbañún. Mú á mu tsíñún maʼniún mangiin gíʼmaa muñeumíjna̱. Ikhaa má kayuʼ, mbaʼin xa̱bi̱i̱ Jeobá kuwáanʼ ruñajunʼ gajmiúlú xa̱bu̱ bi̱ mixtiʼkhu xóo ni̱ndxu̱ún ga̱jma̱a̱ mixtiʼkhu cualidad guáʼdáá xóo rí gíʼdoo Dios. Á mu tsíyulú maguánʼ gíʼmaa muñeumíjna̱ tsu̱ma̱ wéñuʼ.

2 Náa iwáá mbiʼi rígi̱, xa̱bu̱ na̱nguá eyamajkuíí xtángoo ndrígóo Dios náa rí májánʼ o dí ra̱májánʼ. Náa raga̱jma̱ i̱yi̱i̱ʼ ndrígóo Timoteo, apóstol Pablo niʼthí xú káʼnii gánindxu̱ún xa̱bu̱ bi̱ nirájñumi̱jna̱ náa Dios. Itháan gakujmaa xóo xa̱bu̱ ni̱ndxu̱ún índo̱ gáʼga ratumuu mbiʼi ndrígóo numbaaʼ rígi̱ (atraxnuu 2 Timoteo 3:2-5). * Ga̱jma̱a̱ maski ajndu rígi̱ tsénigulú, ma̱ndoo mundxaʼwami̱jna̱,  muʼthá ga̱jma̱a̱ muʼni xóo rí nuni xa̱bu̱ bi̱ kuwa mbájndi (Prov. 13:20). Ikha jngó náa artículo rígi̱ mbuʼyáá rí mixtiʼkun gánindxu̱ún xa̱bu̱ rí gáʼni iwáá mbiʼi ga̱jma̱a̱ xóo xa̱bu̱ ni̱ndxu̱ún xa̱bi̱i̱ Dios. Ma̱ngaa mbuʼyáá ndiéjunʼ gúʼni mu xúʼni̱ dí ra̱májánʼ xóo eni xa̱bu̱ ga̱jma̱a̱ mumbáñún eʼwíínʼ xa̱bu̱ muniʼniiʼ Dios.

3. Tsíin gusngajma rí na̱ʼkha̱ raʼthí náa 2 Timoteo 3:2-5 rá.

3 Xó má ndiʼyáá, apóstol Pablo niʼthí rí gáʼni iwáá mbiʼi maʼni “mbiʼi gakhi̱i̱ ga̱jma̱a̱ maʼni mingíjyúuʼ makuwáanʼ”. Nda̱wa̱á niʼthí mbá 19 enii dí ra̱májánʼ rí majmaʼnuʼ mbiʼi xúgi̱. Náa Romanos 1:29-31 rígá mbá lista ikhaa kayúʼ xóo rígi̱, mú náa carta ndrígóo Timoteo kagu̱ ajngáa rí na̱nguá e̱ʼkha̱ náa Escrituras Griegas Cristianas. Náa iwáá lista rígi̱, Pablo nigíʼdu̱u̱ raʼthí “Numuu rí xa̱bu̱”. Ga̱jma̱a̱ ajngáa rígi̱, nandoo gáʼthúu̱n xa̱bekha ga̱jma̱a̱ gu̱ʼu̱, numuu rí xúgínʼ ma̱ndoo musngajmá cualidad dí ra̱májánʼ. Mú raʼkháa xúgínʼ xa̱bu̱ gánindxu̱ún xúʼko̱ kaʼnii. Cristianos gajkhun mani̱ndxu̱ún mixtiʼkuiin wéñuʼ (atraxnuu Malaquías 3:18). *

MIXTIʼKHU XÓO EʼYAMIJNÁ

4. Xú káʼnii ni̱ndxu̱ún xa̱bu̱ bi̱ ra̱ʼkhá tháán enimbaʼumíjna̱ rá.

4 Nda̱wa̱á rí niʼthí rí mbaʼin xa̱bu̱ maʼndún kuyamijná i̱ndó ikhiin ga̱jma̱a̱ manigunʼ wéñuʼ mbújkha̱a̱, Pablo niʼthí xóó rí mbaʼin majñekún ga̱jma̱a̱ muxuximijna, ma̱ngaa ra̱ʼkhá tháán gunimbamijna. Xa̱bu̱ bugi̱ nakumu̱ún rí guáʼdáá itháan numún ga̱jma̱a̱ numuu rí najmañún nuni, rí xóo kujmiin, mbújkha̱a̱ o rí xóo najmaʼnunʼ, ga̱jma̱a̱ ra̱ʼkhá tháán eñún rí mbiʼyamajkún. Mbáa bi̱ najmañuu niʼthí xú káʼnii nindxu̱u̱ bi̱ naʼnimbamínaʼ: “Náa a̱jkiu̱u̱n rígá mbá chíʼgíʼ altar náa nasmbátigo̱o̱ ikhaa”. Kuwa tikhun bi̱ nuthi rí muʼni mbaʼumíjna̱ nindxu̱u̱ xkawiiʼ wéñuʼ rí asndu xa̱bu̱ bi̱ naʼnimbamínaʼ tsínigu̱ʼ índo̱ ndaʼñún rí eʼwíínʼ xa̱bu̱ nuni mbaʼumíjna̱.

5. Ndiéjunʼ niguaʼnii tikhun xa̱bi̱i̱ Dios bi̱ nikuwa jmbu rá.

5 Nakujmaa májánʼ rí Jeobá tsínigu̱ʼ nditháan rí muʼni mbaʼumíjna̱. Náa Biblia naʼthí, rí nawiyuʼ kaʼñúún “bi̱ nuxuximi̱jna̱” (Prov. 6:16, 17). Rí muʼni mbaʼumíjna̱ naʼni marájñulú náa Dios (Sal. 10:4). Ga̱jma̱a̱ xúʼko̱ nindxu̱u̱ Gixa̱a̱ (1 Tim. 3:6). Phú gíná ninindxu̱u̱ rí tikhun xa̱bi̱i̱ Dios bi̱ niguájun jmbu nini mbaʼumíjna̱. Mbáa dí ikha ninindxu̱u̱ Uzías. Rey bugi̱ bi̱ niʼtáñajunʼ náa judá nixtáa jmbu náa Dios mba̱yu̱ʼ tsiguʼ, mú náa Biblia naʼthí: “Índo̱ nigiʼdoo tsiakii, a̱jkiu̱u̱n nacha̱ nikuximinaʼ ga̱jma̱a̱ rúʼko̱ niʼni gachíi, ikha jngó niʼni dí ra̱májánʼ náa Jeobá Dios ndrígóo ga̱jma̱a̱ nito̱ʼo̱o̱ náa templo ndrígóo Jeobá mu matsikhá incienso náa altar ndrígóo incienso”. Tsigu’ nda̱wa̱á, rey Ezequías ma̱ngaa niʼnimbamínáʼ, mu táʼni kámuu (2 Crón. 26:16; 32:25, 26).

6. a) Náa numuu rí David ma̱ndoo maʼnimbamínaʼ rá. b) Ndiéjunʼ nimbáyúu mu mani̱ndxu̱u̱ xa̱bu̱ guabaaʼ xá.

6 Tikhun nuni mbaʼumíjna̱ ga̱jma̱a̱ numuu rí xóo májánʼ ekujmiin, rí xóo ejmaʼnunʼ, rí xóo najmañún nudi̱i̱, rí xóo guáʼdáá tsiakii o numuu rí eʼwíínʼ nduyamajkhún. David nigiʼdoo xúgíʼ rígi̱, mú ikhaa ninindxu̱u̱ má xúʼko̱ xa̱bu̱ guabaaʼ. Mbá xkri̱da, índo̱ nixíyáa Goliat, rey Saúl niʼthúu̱n rí ma̱ndoo mbayáa wáxioo. Mú David niriʼña̱a̱: “Tsáa ni̱ndxu̱ʼ ikhúúnʼ ga̱jma̱a̱ tsíin ni̱ndxu̱ún bi̱ ka̱ñu̱u̱n, a̱ngui̱i̱n anu̱ʼ, náa Israel, mu ikhúúnʼ maʼgánú mani̱ndxu̱ʼ nigiúnʼ rey rá.” (1 Sam. 18:18.) Ndiéjunʼ nimbáyúu David mu mani̱ndxu̱u̱ má xúʼko̱ xa̱bu̱ guabaaʼ rá. Rí mbaʼyoo, rí á mu nigiʼdoo cualidades ga̱jma̱a̱ rí nijmañuu ma̱ngaa ñajunʼ rí nigiʼdoo, xúgíʼ rígi̱ nigruigú numuu rí Dios nindxu̱u̱ mbáa xa̱bu̱ guabaaʼ náa ikhaa (Sal. 113:5-8). Ikhaa nikro̱ʼo̱o̱  rí xúgíʼ rí májánʼ rí nigiʼdoo nixnúu Jeobá (atayáá ma̱ngaa náa 1 Corintios 4:7).

7. Ndiéjunʼ gambáyulú manindxu̱lúʼ xa̱bu̱ guabáanʼ rá.

7 Rí mbiʼi xúgi̱, bi̱ ni̱ndxu̱lú xa̱bi̱i̱ Jeobá nuʼnimi̱jna̱ mu manindxu̱lúʼ xa̱bu̱ guabaaʼ xó má David. Naʼniulú tsiánguá índo̱ nduʼyáá rí Jeobá nindxu̱u̱ mbáa xa̱bu̱ guabaaʼ maski ajndu nindxu̱u̱ xa̱bu̱ bi̱ itháan mba̱a̱ náa xúgíʼ numbaaʼ (Sal. 18:35). Nuʼgíʼ nuʼnimbánii xtágabu ndrígóo Dios: “Aguaʼdáá rí nandala kuyamíjna̱ numuu rí nagáwiinʼ a̱jkia̱la gani̱ndxa̱la xa̱bu̱ bi̱ májánʼ a̱jkiu̱u̱n, xunimbami̱jna̱, gani̱ndxa̱la xa̱bu̱ guabáanʼ wéñuʼ ga̱jma̱a̱ gaʼngo̱o̱ a̱jkia̱la” (Col. 3:12). Ma̱ngaa nduʼyáá rí xa̱bu̱ bi̱ nasngájma ngajua ‹tseʼnimbamínaʼ, tsekuximinaʼ› (1 Cor. 13:4). Ga̱jma̱a̱ narmáʼáan a̱jkiu̱lú rí xó má xa̱bekha “maguanu munimbu̱ún ga̱jma̱a̱ numuu rí xóo kuwa runi guʼñún”, xa̱bu̱ nandoo naguwáʼ kanuu náa Jeobá índo̱ nduyáá rí xa̱bi̱i̱ ni̱ndxu̱ún xa̱bu̱ gua̱bi̱nʼ (1 Ped. 3:1).

MIXTIʼKHU RÍ XÓO EʼNIU̱U̱N EʼWÍÍNʼ

8. a) Xú káʼnii eyáá tikhun rí e̱ji̱n na̱nguá enimbu̱ún kuñún anu̱ún xá. b) Ndiéjunʼ eʼthúún muni náa Escrituras e̱ji̱n rá.

8 Pablo ma̱ngaa niʼthí xú káʼnii gagumiin xa̱bu̱ náa iwáá mbiʼi. Mbá xkri̱da, niʼthí rí e̱ji̱n xúnimbu̱ún kuñún anu̱ún. Mbiʼi rí kuwáanʼ xúgi̱, libros, películas ga̱jma̱a̱ programa rí na̱ʼkha̱ náa televisón nuni makujmaa rí na̱nguá má ra̱májánʼ. Mú índo̱ mbáa tséʼnimbo̱o̱ naʼni gachúu mbá rí gíʼdoo wéñuʼ numuu, nindxu̱u̱ bi̱ kuwa náa mbá guʼwíin. Rígi̱ niguánu nikru̱ʼu̱u̱n asndu nákha wajyúúʼ. Náa Grecia rí nirígá nákha wajyúúʼ, á mu mbáa xa̱biya̱ naxnúu anu̱u̱, ní xakhánúu mbaʼa rí kaʼyoo magruigú. Ga̱jma̱a̱ náa xtángoo ndrígóo Roma naʼthí rí maraxna̱a̱ ana̱ʼ ninindxu̱u̱ xóo rí mataxíyáa mbáa xa̱bu̱. Náa Escrituras Hebreas xó má náa Escrituras Griegas Cristianas naʼtáñajúnʼ e̱ji̱n rí mbuyamajkún anu̱ún (Éx. 20:12; Efes. 6:1-3).

9. Ndiéjunʼ gambáñun jiáma mu munimbu̱ún kuñún anu̱ún xá.

9 Ndiéjunʼ gíʼmaa muni e̱ji̱n mu xágui̱i̱n xi̱ʼ rí xúnimbu̱ún rí mbiʼi xúgi̱ xá. Rí mundxaʼwamíjna̱ rí anu̱ún nini ga̱jma̱a̱ numún. Ma̱ngaa á mu nakru̱ʼu̱u̱n rí Dios, Anu̱lú xúgiáanʼ ikháanʼ, nandoo rí muʼnimbulúʼ, muxna̱a̱ núma̱aʼ. Índo̱ jiáma ga̱jma̱a̱ wa̱ʼxa̱ʼ nuthi rí májánʼ ga̱jma̱a̱ numún anu̱ún numbañún eʼwíínʼ mu mbuyamajkún anu̱ún. Gajkhun má rí á mu xa̱bu̱ buanii na̱nguá endún kuñún e̱jñún, mbáa rígi̱ maʼniún mingíjyúuʼ munimbu̱ún ga̱jma̱a̱ xúgíʼ a̱jkiu̱ún. Mú á mu e̱ji̱n nduyáá rí anu̱ún gajkhun nandún kuñún, maʼndún muni rí nanigu̱nʼ maski ajndu nguáná maʼniún mingíjyúuʼ munimbu̱ún. Mbáa dxámá bi̱ mbiʼyuu Austin naʼthí: “Gajkhun má rí nguáná nindoʼ mani dí ra̱májánʼ, mú anu̱ʼ nugíʼ xtángoo rí ma̱ndoo mani, nithu̱nʼ náa numuu rí nugíʼ ga̱jma̱a̱ nutamijná má xúʼko̱ ga̱jma̱á ni̱ndxu̱ʼ. Xúgíʼ rígi̱ nimbáyuʼ mu manimbo̱ʼ. Ndi̱yo̱o̱ rí ikhiin nixmiéjunʼ kuyoʼ ga̱jma̱a̱ rúʼko̱ niʼni rí manimbo̱ʼ ka̱ñu̱u̱n itháan”.

10, 11. a) Ndiéjunʼ dí ra̱májánʼ eni xa̱bu̱ nasngájma rí na̱nguá eñún kuñún eʼwíínʼ rá. b) Asndu nguáthá gáʼnduun kuñún a̱ngiu̱ún bi̱ ni̱ndxu̱ún cristianos rá.

10 Pablo niʼthí i̱ʼwáʼ dí ra̱májánʼ rí nasngájma rí mbaʼin na̱nguá eñún kuñún eʼwíínʼ. Nda̱wa̱á rí niʼthí rí e̱ji̱n “xúnimbúu̱n kuñún anún”, niʼthí rí asndu núma̱aʼ xúxnáa, xúʼko̱ ni̱ndxu̱ún bi̱ tséxnáa núma̱aʼ ga̱jma̱a̱ rí májánʼ rí nuni eʼwíínʼ ga̱jma̱a̱ numún. Mbaʼin mangiin xúni rí jmbu ga̱jma̱a̱ xaʼndún gunimbaníí xkujndu, xóo muʼthá, xáʼndun mambaxíin gajmiún eʼwíínʼ. Mutinumáá Dios ga̱jma̱a̱ muninduwiinʼ eʼwíínʼ numuu rí muthi ajngáa rí maʼni gawúunʼ eʼwíínʼ o rí tsejmaa. Ma̱ngaa munitsudúún eʼwíínʼ. *

11 Maski ajndu xa̱bu̱ tsisngajma ngajua, bi̱ nduyamajkuíí Jeobá nusngajma ngajua náa  eʼwíínʼ xa̱bu̱. Rígi̱ nuni má xúʼko̱. Jesús niʼthí rí kiʼtáñajunʼ dí itháan gíʼdoo numuu náa xtángoo ndrígóo Moises ninindxu̱u̱ rí maʼndún kuyáá Dios ga̱jma̱a̱ rí maʼni raga̱jma̱ nindxu̱u̱ rí maʼnda̱ʼ xtañún eʼwíínʼ xa̱bu̱. Ngajua rígi̱ nagumbiʼyuu agápe (Mat. 22:37-39). Ma̱ngaa niʼthí rí cristianos gajkhun majmaʼnuʼ ga̱jma̱a̱ numuu rí nandún kuyamijná kanikhiin (atraxnuu Juan 13:34, 35). Asndu maguanu maʼndún kuñún bi̱ sia̱nʼ gajmiún (Mat. 5:43, 44).

12. Xú káʼnii nisngájma Jesús rí nindoo kaʼñún xa̱bu̱ rá.

12 Jesús nisngájma rí nindoo kaʼñún wéñuʼ xa̱bu̱. Ni̱jkha̱ mámbá xuajen raʼtáraʼa ga̱jma̱a̱ numuu ajngáa rí májánʼ ndrígóo Reino. Niʼni tanún bi̱ tsikruigu̱u̱n, guʼxuʼ, bi̱ guáʼdáá lepra ga̱jma̱a̱ bi̱ tsédxuun, asndu niʼnigabi̱ín bi̱ nikháñun (Luc. 7:22). Asndu nixnáxi̱ vida ndrígóo ga̱jma̱a̱ numún xúgínʼ xa̱bu̱ numbaaʼ, maski ajndu mbaʼin niguiñunʼ kuyáá. Nisngájma kaʼwu ngajua rí nigiʼdoo náa anu̱u̱. Rí mbiʼi xúgi̱ bi̱ nutaraʼa numuu Jeobá náa xúgíʼ numbaaʼ nduyaridáá Jesús ga̱jma̱a̱ nandún kuñún a̱ngiu̱ún.

13. Ndiéjunʼ garigá á mu nusngájma rí nandulúʼ kuʼñúún eʼwíínʼ rá.

13 Ngajua rí gusngajmá maʼga̱nú maʼni rí xa̱bu̱ maʼndún muniʼniiʼ Anu̱lú bi̱ xtáa mekhuíí. Mbá xkri̱da, mbáa xa̱bu̱ bi̱ nixtáa náa mbá asamblea rí ajtsú mbiʼi náa Tailandia ni̱jkha̱níi a̱jkiu̱u̱n índo̱ ndiʼyoo rí nandún kuyamijná kanikhiin. Índo̱ niguta̱nga̱a̱ náa goʼwóo, ninda̱ʼa̱ rí musngáá ga̱jma̱a̱ numuu Biblia a̱jma̱ aʼphu̱ rí mbá xmáná. Niʼtáruʼun xúgínʼ bi̱ kaʼñún, ga̱jma̱a̱ índo̱ niʼni majun igu̱nʼ nda̱wa̱á rí nijngoo asamblea ninújngoo gaguxnuu Biblia náa Guʼwá nagimbáanʼ. Á mu nandulúʼ mbuʼyáá á mu nandulúʼ kuʼñúún eʼwíínʼ, guraximíjna̱: “Lá nani mbá tsiakii mu mambáñún eʼwíínʼ bi̱ kuwa náa goʼwóoʼ, náa congregación ga̱jma̱a̱ náa nataráʼa ráʼ. Lá nagíminaʼ mbañu̱u̱n xó má eʼñún Jeobá xáʼ.”

IÑA̱ʼ GA̱JMA̱A̱ E̱JÍN MÚGÚ

14, 15. a) Xú káʼnii gánindxu̱ún xóo xujkhúʼ mbaʼin xa̱bu̱ rá. b) Ndiéjunʼ rí niriʼkumijná tikhun xa̱bu̱ rá.

14 Náa iwáá mbiʼi, xa̱bu̱ muni dí ra̱májánʼ náa gíʼmaa mutsingumijna ikháanʼ. Mbá xkri̱da, mbaʼin bi̱ na̱nguá eniʼniiʼ Dios xaguaʼdáá  ngajua rí májánʼ. Náa i̱ʼwáʼ rí nijuiʼtájuíi naʼthí rí “maguiñunʼ kuyáá dí májánʼ” o rí maguáʼdáá “sia̱nʼ náa xúgíʼ rí májánʼ”. Mani̱ndxu̱ún xa̱bu̱ bi̱ xúñewa̱a̱n rí muni ga̱jma̱a̱ manindxu̱ún xóo xujkhú xáná. Ga̱jma̱a̱ tikhun xudxun rí marathu̱u̱n, mbáa ajngáa rí náa griego nandoo gáʼthúu̱n bi̱ tsixprigúmíjná ga̱jma̱a̱ tsíndxa̱ʼwa̱a̱ edxu̱ún rí garigá nda̱wa̱á ga̱jma̱a̱ numuu rí nuni.

15 Xúgi̱ xtáa rambánuu rí niʼtáriyaʼ náa Biblia rí mbaʼin xa̱bu̱ bi̱ najmangunʼ xóo xujkhúʼ maguanu muriʼkhumijná xóo ni̱ndxu̱ún (atraxnuu Isaías 11:6, 7). * Náa kiʼtáriyaʼ rígi̱ naʼthí rí xujkhú xáná xóo iña̱ʼ ga̱jma̱a̱ león makuwá tsímáá ga̱jma̱a̱ xujkhúʼ karaʼdiin xóo mugu̱ ga̱jma̱a̱ aʼdá xédé. Ga̱jma̱a̱ rí tsímáá marigá náa xúgíʼ numbaaʼ, “numuu rí náa ku̱ba̱ʼ marigá wéñuʼ ku̱ma̱ ndrígóo Jeobá xó má iyaʼ kajníʼ náa lamáa” (Is. 11:9). Xujkhúʼ xándoo majmañún ga̱jma̱a̱ numuu Jeobá, ikha jngó ajngáa rígi̱ nandoo gáʼthúu̱n rí xóo guriʼkumijná xa̱bu̱.

Ikha rí na̱ʼkha̱ náa Biblia ma̱ndoo mariʼkhu̱u̱ vida ndrígu̱ún xa̱bu̱. (Atayáá kutriga̱ 16).

16. Xú káʼnii nimbáñun Biblia muriʼkhumijná tikhun xa̱bu̱ rá.

16 Kuwa mbaʼin xa̱bu̱ bi̱ nákha ginii najmangu̱nʼ xóo iña̱ʼ, mú rí xúgi̱ kuwa tsímáá gajmiún a̱ngiu̱ún. Ma̱ndoo muraxnuu tikhu historias náa “Biblia niriʼkhu̱u̱ rí xóo makuwá”, rí na̱ʼkha̱ náa jw.org. Bi̱ niguánu niniʼniiʼ ga̱jma̱a̱ bi̱ nuni ñajunʼ Jeobá na̱nguá ni̱ndxu̱ún xóo bi̱ nakujmaa rí nduyamajkuíí Dios mu xáguaʼdáá tsiakii ndrígóo Dios. Bugi̱ nuthi rí nduyamajkuíí Dios, mú ga̱jma̱a̱ rí nuni nusngajma dí raʼkháa xúʼko̱ nindxu̱u̱. Tikhun xa̱bi̱i̱ Jeobá bi̱ nijmangunʼ wéñuʼ niguánu “niriʼkhumijná dí xóo ninindxu̱ún rí niguma xó má eyoo Dios rí jmbu ga̱jma̱a̱ rí gajkhun” (Efes. 4:23, 24). Índo̱ ni̱jkha̱ rajmañún ga̱jma̱a̱ numuu Dios, xa̱bu̱ nakru̱ʼu̱u̱n rí ndayóoʼ munimbu̱ún ikha ndrígóo Jeobá. Rígi̱ nambáñun mu muriʼkhumijná rí nunimbu̱ún, rí xóo endxa̱ʼwa̱a̱ edxu̱ún ga̱jma̱a̱ rí nuni. Mingíjyúuʼ muriʼkhumijná, mú ma̱ndoo muʼni ga̱jma̱a̱ numuu xi̱ʼ kaʼwu ndrígóo Dios numuu rí ikhaa nambáñun bi̱ nandún muni ñajunʼ Dios ga̱jma̱a̱ xúgíʼ a̱jkiu̱ún.

“XAMBÁXÁAʼ GAJMIÁANʼ IKHIIN”

17. Xú káʼnii gándoo gúʼni mu xúʼni̱ rí nuni eʼwíínʼ rá.

17 Na̱jkha̱ rakujmaa itháan xóo mixtiʼkun nindxu̱u̱ bi̱ nuni ñajunʼ Dios ga̱jma̱a̱ bi̱ na̱nguá. Bi̱ nuʼni ñajunʼ gíʼmaa muñeumíjna̱ wéñuʼ mu xúʼni xóo nuni ikhiin. Nandulúʼ muʼnimbulúʼ xtágabu ndrígóo Jeobá rí xambáxulú gajmiúlú xa̱bu̱ bi̱ nuni xóo e̱ʼkha̱ raʼthí náa 2 Timoteo 3:2-5. Gajkhun má rí xándoo muniʼñáʼ ruʼthún, numuu rí mbóó eñajunʼ gajmiúlú, náa escuela o kuwáanʼ gajmiúlú. Rí ma̱ndoo muʼni rí xundxaʼwáá edxu̱lúʼ o muʼni rí ikhiin eni. Xú káʼnii gándoo gúʼni rá. Gíʼmaa mambaxúlúʼ má xúʼko̱ gajmiúlú Jeobá índo̱ nuʼnigajmaa Biblia ga̱jma̱a̱ rí muraʼwíin bi̱ mambaxúlúʼ gajmiúlú bi̱ nandún muni ñajunʼ ikhaa.

18. Xú káʼnii gambáñun eʼwíínʼ rí nuʼthá ga̱jma̱a̱ rí nuʼni rá.

18 Ma̱ngaa gíʼmaa muʼni mbá tsiakii mu mumbáñuun xa̱bu̱ ga̱jma̱a̱ numuu ajngá rawunʼ Dios. Guʼyááʼ náa ma̱ndoo muʼtáraʼa ga̱jma̱a̱ gunda̱ʼa̱a̱ Jeobá rí mambáyulúʼ muʼthá rí jmbu índo̱ kaʼyoo. Guʼthúún xa̱bu̱ rí ni̱ndxu̱lú bi̱ nutaraʼa numuu Jeobá. Á mu nuʼni rí májánʼ, xúʼko̱ maʼga̱ gamajkhu náa Dios, raʼkháa náa ikháanʼ. Nijuiʼsngúlú “muniʼñáʼ ruʼni dí xkawiʼ ga̱jma̱a̱ rí nagua̱ʼa̱ muʼni ga̱jma̱a̱ makuwáanʼ májánʼ ga̱jma̱a̱ jmbu ga̱jma̱a̱ rí maʼndulú kuʼyáá Dios náa tapo̱o̱ dí rígá náa numbaaʼ rígi̱” (Tito 2:11-14). Á mu nduʼyaridáá Jeobá ga̱jma̱a̱ á mu nuʼnimbulúʼ, xa̱bu̱ mbuyáá ga̱jma̱a̱ mbáa tikhun muthi: “Nanduxu muʼguá ga̱jma̱á nindxa̱laʼ, numuu rí nidxáwinxu rí Dios xtáa gajmiála” (Zac. 8:23).

^ párr. 2 2 Timoteo 3:2-5: “Numuu rí xa̱bu̱ maʼndún kuyamijná i̱ndó ikhiin, manigunʼ wéñuʼ mbújkha̱a̱, majñekún, muxuximijna, mutinumáá Dios, xúnimbúu̱n kuñún anún, asndu núma̱aʼ xúxnáa, xúni rí jmbu, xáʼndun kuñún a̱ngiu̱ún, xaʼndún gunimbaníí xkujndu, munitsudúún eʼwíínʼ, xúñewa̱a̱n rí muni, manindxu̱ún xóo xujkhú xáná, xáʼndun guni rí májánʼ, muninduwiinʼ eʼwíínʼ, xudxun rí marathu̱u̱n, ra̱ʼkhá tháán gunimbamijna, itháan maʼndún muni rí nanigunʼ ikhiin ki xóo rí nandoo Dios, makujmaa rí nduyamajkhuíí Dios mu xáguaʼdáá tsiakii ndrígóo Dios; xambáxáaʼ gajmiáanʼ ikhiin”.

^ párr. 3 Malaquías 3:18: “Ga̱jma̱a̱ ikháanʼla mbu̱ya̱a̱ mbu̱júu̱ rí mixtiʼkuii mbáa bi̱ naʼni rí jmbu ga̱jma̱a̱ mbáa bi̱ naʼni dí ra̱májánʼ, mbáa bi̱ naʼni ñajunʼ Dios ga̱jma̱a̱ bi̱ xóó tséʼni ñajunʼ”.

^ párr. 10 Náa ajngáa griego rí najuiʼtájuíi xóo “calumniador” o “mbáa bi̱ naʼthí rí minduwaʼ ga̱jma̱a̱ numún eʼwíínʼ” nindxu̱u̱ diábolos. Náa Biblia najmuu ajngáa rígi̱ xóo título ndrígóo Satanás, bi̱ xkawiiʼ bi̱ niʼni tsu̱du̱u̱ Dios.

^ párr. 15 Isaías 11:6, 7: “Ga̱jma̱a̱ iñaʼ maxtáa ga̱jma̱a̱ aʼdá múgú, ga̱jma̱a̱ leopardo mabóoʼ mbóó ga̱jma̱a̱ aʼdá tsújtóon, ga̱jma̱a̱ aʼdá xédé ga̱jma̱a̱ león lájuíin ga̱jma̱a̱ xujkhúʼ bi̱ nakuiʼtsu májánʼ makuwá mbóó xúgínʼ; ga̱jma̱a̱ mbáa dxámá chíʼgíʼ mañawu̱u̱n. Ga̱jma̱a̱ xédé e̱ʼgú ga̱jma̱a̱ osa mapiʼtsu mbóó; xó má e̱jñún mubúúnʼ mbóó. Ga̱jma̱a̱ asndu león mekho raxa xó má eʼni mbáa xede̱”.