Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (rí muʼnigajmaa)  |  Diciembre tsiguʼ 2017

Lá náa Jacob ni̱ʼkha̱ Mesías, numuu rí niʼtsi náa Esaú rí mani̱ndxu̱u̱ aʼdá giʼnii ráʼ.

Graxe̱ rí nuni bi̱ nuraxnuu

Graxe̱ rí nuni bi̱ nuraxnuu

Nákha mbiʼi ndrígu̱ún Israel, lá ndayóoʼ mani̱ndxu̱u̱ aʼdá giʼnii mbáa mu náa ikhaa ma̱ʼkha̱ Mesías ráʼ.

Xúʼko̱ nitaxu ga̱jma̱a̱ numuu rígi̱. Rígi̱ asndu xóo nambánii ga̱jma̱a̱ rí naʼthí náa Hebreos 12:16, náa nuraxnuu rí Esaú tángajo̱o̱ kaʼyoo “rí mitsáʼkháan” ga̱jma̱a̱ “niʼni gaʼduunʼ rí mani̱ndxu̱u̱ aʼdá giʼnii ga̱jma̱a̱ numuu mbá ganitsu” rí niʼtsi náa Jacob. Ajngáa rígi̱ asndu xóo nisngájma rí índo̱ Jacob nikhánúu “rí mani̱ndxu̱u̱ aʼdá giʼnii”, náa ikhaa ma̱ndoo ma̱ʼkha̱ Mesías (Mat. 1:2, 16; Luc. 3:23, 34).

Mú índo̱ nduʼyáá tikhuu rí na̱ʼkha̱ raʼthí náa Biblia, nduʼyáá rí táyóoʼ mani̱ndxu̱ún e̱jín giʼnii mu náa ikhiin ma̱ʼkha̱ Mesías. Guʼyáá tikhuu rí nasngájma rígi̱:

Aʼdá giʼnii ndrígóo Jacob (Israel) ninindxu̱u̱ Rubén, bi̱ nigiʼdaa ga̱jma̱a̱ Lea. Nda̱wa̱á, timbáa a̱ʼdióo Jacob bi̱ nigiʼdaa ga̱jma̱a̱ Raquel bi̱ nindoo kaʼyoo wéñuʼ, ninindxu̱u̱ José. Índo̱ Rubén nikudaminaʼ aʼkhá, José ninindxu̱u̱ aʼdá giʼnii (Gén. 29:31-35; 30:22-25; 35:22-26; 49:22-26; 1 Crón. 5:1, 2). Maski ajndu Mesías táʼkha̱ náa Rubén, ni má náa José, mú ni̱ʼkha̱ náa Judá, bi̱ maʼni a̱jkhu̱u̱n e̱ji̱i̱n Jacob bi̱ nigiʼdaa ga̱jma̱a̱ Lea (Gén. 49:10).

 Náa Lucas 3:32, naʼthí ga̱jma̱a̱ numún witsuun xa̱bu̱ náa ni̱ʼkha̱ Mesías. Xóo xúgínʼ ikhiin ninindxu̱ún e̱jín giʼnuu. Boaz ninindxu̱u̱ anu̱u̱ Obed ga̱jma̱a̱ bugi̱ ninindxu̱u̱ anu̱u̱ Jesé (Rut 4:17, 20-22; 1 Crón. 2:10-12).

Imba̱a̱ bi̱ náa ni̱ʼkha̱ Mesías ninindxu̱u̱ David. Mú ikhaa tánindxu̱u̱ aʼdá giʼnii ndrígóo Jesé, ninindxu̱u̱ bi̱ maʼni migíñunʼ e̱ji̱i̱n, ikhaa nindxu̱u̱ bi̱ iwáá giʼtha (1 Sam. 16:10, 11; 17:12; Mat. 1:5, 6). Ga̱jma̱a̱ xúʼko̱ má kayuʼ rígá náa Salomón, ma̱ngaa na̱nguá nindxu̱u̱ aʼdá giʼnii ndrígóo David (2 Sam. 3:2-5).

Rígi̱ tsíyoo gáʼthúu̱n rí nda̱a̱ numuu rí mani̱ndxu̱u̱ aʼdá giʼnii. Timbáa aʼdá giʼnii bi̱ kuwa náa mbá guʼwíin nduyamajkuíí itháan ga̱jma̱a̱ ikhaa kayá edxu̱u̱ náa a̱ngui̱i̱n. Ma̱ngaa ninindxu̱u̱ bi̱ nagu̱u̱ a̱jma̱ nuthu itháan ki xóo a̱ngui̱i̱n (Gén. 43:33; Deut. 21:17; Jos. 17:1).

Mú rí mani̱ndxu̱u̱ aʼdá giʼnii ma̱ndoo makrújnga̱a̱ náa imba̱a̱ ada̱. Mbá xkri̱da, índo̱ Abrahán niʼthúu̱n rí maʼga̱a̱ Ismael, ikhú Isaac ni̱jkha̱nú ninindxu̱u̱ aʼdá giʼnii. Ga̱jma̱a̱ xó má niʼthá nákha ginii, Rubén nánguá ninindxu̱u̱ aʼdá giʼnii, ninindxu̱u̱ José.

Gagutangáanʼ nákhi náa Hebreos 12:16, náa apóstol Pablo niʼnirámáʼ: “Rí xáxtáa nimbáa bi̱ naʼni aʼkhá, nimbáa bi̱ tséʼyamajkhuu rí mitsáʼkháan xó má ninindxu̱u̱ Esaú, rí niʼni gaʼduunʼ rí mani̱ndxu̱u̱ aʼdá giʼnii ga̱jma̱a̱ numuu mbá ganitsu”. Ndiéjunʼ nindoo maʼtáriyaʼ xá.

Apóstol na̱nguá xtáa raʼthí náa gáʼkha̱ Mesías. Ginii niʼthún cristianos rí “guni̱i̱ jmbu kamba̱a̱” náa ma̱ndoo magún, mu ikhiin mundrigú “rí májánʼ rí na̱ʼkha̱ náa Dios”, á mu tséni xúʼko̱ majpátrigúun náa aʼkhá (Heb. 12:12-16). Á mu nuxuda̱mi̱jna̱ náa aʼkhá rúʼko̱, mani̱ndxu̱ún xóo Esaú, bi̱ tángajo̱o̱ “rí mitsáʼkháan” ga̱jma̱a̱ niraʼwíí rí “xkawiiʼ” (Kingdom Interlinear).

Esaú nixtáa nákha nikuwa xa̱bu̱ bi̱ kuya̱ edxu̱u̱ náa xuajen, ga̱jma̱a̱ mbáa nguáná asndu nandoo muxnaxi̱ tsigijñaʼ (Gén. 8:20, 21; 12:7, 8; Job 1:4, 5). Mú ga̱jma̱a̱ numuu rí nundxa̱ʼwa̱míjna̱ xóo eyoo xuñúnʼ, niʼni gaʼduunʼ xúgíʼ rí gajkuáa ñawúunʼ maʼni xóo mbáa aʼdá giʼnii náa mbá xúbá náa gajkuáa lentejas. Mbáa nindoo maʼni gaʼduunʼ tsingíná rí nijuiʼtáriyáʼ rí muraʼníí bi̱ gaguwáʼ náa Abrahán (Gén. 15:13). Esaú ma̱ngaa nisngájma rí itháan niniguʼ rí xkawiiʼ, xóo muʼthá, rí táʼyamajkhuu xúgíʼ rí nindxu̱u̱ mitsáʼkháan, índo̱ ninigúnʼ gajmíi̱n a̱jmi̱i̱n gu̱ʼu̱ kaníí, rí niʼni magawúunʼ anu̱u̱ ga̱jma̱a̱ ru̱dúu̱ (Gén. 26:34, 35). Ninindxu̱u̱ mixtiʼkuii wéñuʼ Jacob, bi̱ ndiyáaʼ manigúnʼ ga̱jma̱a̱ mbáa a̱ʼgu̱ bi̱ ndaʼyamajkuu Dios bi̱ gajkhun (Gén. 28:6, 7; 29:10-12, 18).

Ikha jngó, ndiéjunʼ ejkua̱nú exkamaa rá. Nguáná tikhun ninindxu̱ún e̱jín giʼnuu náa ni̱ʼkha̱ Mesías, mu raʼkháa xúgínʼ. Judíos ndiyáá rígi̱ ga̱jma̱a̱ túthi dí ragájkhun nindxu̱u̱. Mbá xkri̱da, ndiyáá rí Cristo ma̱ʼkha̱ náa David, a̱ʼdióo Jesé bi̱ giʼta kayuʼ (Mat. 22:42).