Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (rí muʼnigajmaa)  |  Febrero tsiguʼ 2017

Rí nijuiʼtsiwáanʼ nindxu̱u̱ mbá regalo ndrígóo Anu̱lú

Rí nijuiʼtsiwáanʼ nindxu̱u̱ mbá regalo ndrígóo Anu̱lú

“Xúgíʼ regalo májánʼ ga̱jma̱a̱ xúgíʼ rí jmbu na̱ʼkha̱ [...] náa Anu̱lú” (SANTIAGO 1:17).

AJMÚÚ 148 GA̱JMA̱A̱ 109

1. Ndiéjunʼ rí májánʼ gakhánulú ga̱jma̱a̱ numuu rí nijuiʼtsiwáanʼ ráʼ.

RÍ JESUCRISTO nixnáximinaʼ naʼni rí ma̱ndoo maguma tsajkhuramánʼ wéñuʼ. Mbá xkri̱da, naʼni rí xúgínʼ e̱ji̱i̱n Adán tsí nanigu̱nʼ rí májánʼ maʼga̱nú mbiʼi rí maguánu mani̱ndxu̱ún e̱ji̱i̱n Dios (atayáá kúgumaʼá “Ndiéjunʼ eyoo gáʼthúu̱n”). Rí nijuiʼtsiwáanʼ ma̱ngaa naʼni dí makuwáanʼlu gagi kámuu mbiʼi. Mú raʼkháa i̱ndó rúʼko̱ eyoo gáʼthúu̱n. Kagujtuminaʼ ga̱jma̱a̱ i̱ʼwáʼ rí gíʼdoo wéñuʼ numuu náa mekhuíí ga̱jma̱a̱ náa Ku̱ba̱ʼ (Heb. 1:8, 9).

2. a) Ndiéjunʼ rí gíʼdoo numuu mambanúu mekhuíí ga̱jma̱a̱ náa Ku̱ba̱ʼ niʼthí Jesús rá. (Atayáá timbá xtiʼkhu.) b) Ndiéjunʼ gúʼyáá náa artículo rígi̱ rá.

2 A̱jma̱ tsiguʼ rí xóó tsikháñuu Jesús, ikhaa niʼsngúún discípulos xú káʼnii gutajkáan. Niʼthí: “Anu̱xu bi̱ xtaa mekhuíí, gaguma kaʼwi̱i̱ mbiʼyaʼ. Ga̱ʼkha̱ reino ndrígáʼ. Gambanúu xóo rí nandaʼ ikháánʼ, xóo má rí nambánuu mekhuíí, xúʼkhue̱ má gámbanuu mbayííʼ gi̱jyooʼ ma̱ngaa” (Mat. 6:9, 10). Náa artículo rígi̱ mbuʼyáá ajtsú enii rí nambánii ga̱jma̱a̱ rí nijuiʼtsiwáanʼ: 1) rí maguma kaʼwi̱i̱ mbiʼyuu Jeobá, 2) numuu Reino ndrígóo Dios ma̱ngaa 3) mambanúu rí nandoo Dios.

 “GAGUMA KAʼWI̱I̱ MBIʼYAʼ”

3. a) Ndiéjunʼ eyoo gáʼthúu̱n mbiʼyuu Dios rá. b) Xú káʼnii niʼni gachúu Satanás mbiʼyuu Jeobá rá.

3 Timbá rí ninda̱ʼa̱ Jesús náa tsajkhun rí padrenuestro nindxu̱u̱ rí maguma kaʼwi̱i̱ mbiʼyuu Dios. Xóo muʼthá, ninda̱ʼa̱ rí mbuyamajkuíí mbiʼyuu Dios numuu rí nindxu̱u̱ kaʼwu. Mbiʼyuu nandoo gáʼthúu̱n xóo nindxu̱u̱ ga̱jma̱a̱ xóo xa̱bu̱ ñajunʼ. Ikhaa nindxu̱u̱ mbáa bi̱ itháan gíʼdoo tsiakii ga̱jma̱a̱ jmbii náa xúgíʼ numbaaʼ. Jesús nixná mbiʼyuu Jeobá “Ana tsan Kaʼhuin” (Juan 17:11). Numuu rí Jeobá nindxu̱u̱ kaʼwii, ikha jngó xúgíʼ rí naʼni nindxu̱u̱ kaʼwu, asndu xtángoo ndrígóo. Mú náa Edén, Satanás niʼthí rí Dios na̱nguá kaʼyoo maxnún xtángoo ndrígóo xa̱bu̱ xuajen. Niʼthí nduwaʼ numuu Jeobá ga̱jma̱a̱ niʼni gachúu mbiʼyuu Dios (Gén. 3:1-5).

4. Xú káʼnii niʼni kaʼwi̱i̱ mbiʼyuu Dios Jesús rá.

4 Mú mixtiʼkhu niʼni Jesús ki xóo Satanás, Jesús nindoo kaʼyoo mbiʼyuu Jeobá. Ikha jngó niʼni xúgíʼ rí niʼngo̱o̱ mu maʼni kaʼwi̱i̱ mbiʼyuu (Juan 17:25, 26). Xú káʼnii niʼni kaʼwi̱i̱ xá. Ga̱jma̱a̱ rí niʼni ma̱ngaa rí niʼsngáa. Xúgi̱ kaʼnii Jesús nimbáñun eʼwíínʼ mu mbuyáá rí xtángoo ndrígóo Jeobá nindxu̱u̱ jmbu ga̱jma̱a̱ xúgíʼ rí na̱ndu̱ʼu̱lú Dios nindxu̱u̱ mu makuwáanʼ májánʼ (atraxnuu Salmo 40:8-10). * Jesús niwi̱ji̱ jmbu maski ajndu Satanás niʼni mamínuʼ wéñuʼ índo̱ nikháñuu. Ikhaa nisngájma rí mbáa xa̱bu̱ bi̱ ragíʼdoo aʼkhá ma̱ndoo maʼnimbo̱o̱ kaʼyoo Jeobá.

5. Xú káʼnii guʼni kaʼwi̱i̱ mbiʼyuu Jeobá rá.

5 Xú káʼnii gusngajma ikháanʼ rí nandulúʼ kuʼyáá mbiʼyuu Jeobá rá. Ga̱jma̱a̱ rí nuʼnilú. Jeobá gíʼthúu̱n rí manindxu̱lúʼ kaʼwáanʼ (atraxnuu 1 Pedro 1:15, 16). * Ikha jngó nuʼni mba̱a̱ i̱ndó ikhaa ga̱jma̱a̱ nuʼnimbulúʼ kuʼyáá ga̱jma̱a̱ xúgíʼ a̱jkiu̱lú. Asndu índo̱ nuxkulú, nuʼnimi̱jna̱ makuwáanʼ xó má eʼsngúlúʼ Jeobá. Índo̱ nuʼnimbulúʼ xtángoo ndrígóo, nuxnáá gamajkhu mbiʼyuu (Mat. 5:14-16). Ma̱ngaa, nusngajmá rí xtángoo ndrígóo nindxu̱u̱ májánʼ ga̱jma̱a̱ rí Satanás nindxu̱u̱ minduwaʼ. Gajkhun má, nakiéʼkulú numuu rí ñajunlú xa̱bu̱ aʼkhá. Mú natanga̱a̱ a̱jkiu̱lú ga̱jma̱a̱ nuʼnimi̱jna̱ xúʼni̱ xúgíʼ rí maʼni gachúu mbiʼyuu Jeobá (Sal. 79:9).

6. Náa numuu rí Jeobá ma̱ndoo maʼthúlú rí ni̱ndxu̱lú jmbii maski ajndu ñajunlú xa̱bu̱ aʼkhá rá.

6 Tséʼniuu á mu ni̱ndxu̱lú bi̱ kaxtaʼwáanʼ o bi̱ eʼwíínʼ mugu̱, Jeobá naʼni mba̱a̱ a̱jkiu̱u̱n kaʼyulú á mu kuaʼdáá fe náa rí niʼtsiwáanʼ. Ikhaa naniñuʼ mbuyamajkuíí bi̱ nixnaximi̱jna̱ náa ikhaa. Naʼthúún rí ni̱ndxu̱ún jmbiin cristianos bi̱ kaxtaʼwíin ga̱jma̱a̱ nagruiguíin xóo e̱ji̱i̱n. Ma̱ngaa naʼthúún rí ni̱ndxu̱ún jmbiin bi̱ kaʼñún náa eʼwíínʼ mugu̱ ga̱jma̱a̱ nambáxu̱u̱ gajmíi̱n (Juan 10:16; Rom. 5:1, 2; Sant. 2:21-25). Numuu rí nijuiʼtsiwáanʼ, xúgi̱ ma̱ndoo mambáxulúʼ májánʼ gajmiúlú Anu̱lú ga̱jma̱a̱ muʼni kaʼwi̱i̱ mbiʼyuu.

“GA̱ʼKHA̱ REINO NDRÍGÁʼ”

7. Ndiéjunʼ rí májánʼ gáʼni Reino ndrígóo Dios rá.

7 Náa tsajkhun padrenuestro, Jesús niʼthí: “Ga̱ʼkha̱ reino ndrígáʼ”. Xú káʼnii embánii rí nijuiʼtsiwáanʼ ga̱jma̱a̱ Reino rá. Nduʼyáá rí náa Reino ndrígóo Dios, Jesús maʼtáñajunʼ gajmíi̱n bi̱ 144,000 xa̱bu̱ bi̱ kaxtaʼwíin. Rí nijuiʼtsiwáanʼ naʼni rí xa̱bu̱ ma̱ndoo matuxi̱ín  mu makuwá mekhuíí (Rev. 5:9, 10; 14:1). Ikhí mani̱ndxu̱ún reyes ga̱jma̱a̱ ndxajkun, ga̱jma̱a̱ mutañajunʼ náa Ku̱ba̱ʼ gajmiún Jesús mbá 1,000 tsiguʼ. Ikhú Dios majmiuu Xa̱bu̱ Ñajunʼ ndrígóo mú maʼni̱i̱ mitsaan Ku̱ba̱ʼ ga̱jma̱a̱ mambáñún xúgínʼ xa̱bu̱ mu mani̱ndxu̱ún jmbiin. Ikhú xa̱bi̱i̱ Jeobá bi̱ kuwa mekhuíí ga̱jma̱a̱ náa Ku̱ba̱ʼ mani̱ndxu̱ún mbá guʼwíin (Rev. 5:13; 20:6). Jesús maxíyáa Satanás ga̱jma̱a̱ maʼni gámbóo xúgíʼ xkujndu rí naʼni marigá (Gén. 3:15).

8. a) Xú káʼnii nimbáñun Jesús discípulos ndrígóo mu mbuyáá rí Reino ndrígóo Dios gíʼdoo numuu rá. b) Xú káʼnii esngájma rí numbáyii Reino rá.

8 Jesús nimbáñun discípulos makru̱ʼu̱u̱n rí Reino ndrígóo Dios phú gíʼdoo numuu. Xú káʼnii niʼni xá. Índo̱ nijngúun iyááʼ nacha̱ nigíʼdu̱u̱ niʼtáraʼa “ajnga ri majan nuxiʼ ri naʼtañajun Dios” asndu náa (Luc. 4:43). Ma̱ngaa niʼthún discípulos ndrígóo rí gíʼmaa magún “asndu náa wámbari̱go̱o̱ ku̱ba̱ʼ” mu mutaraʼa numuu ikhaa (Hech. 1:6-8). Rí mbiʼi xúgi̱, índo̱ nuʼtáraʼa naʼni rí xa̱bu̱ majmañún ga̱jma̱a̱ numuu rí nijuiʼtsiʼwáanʼ ga̱jma̱a̱ makuwá náa naʼtáñajunʼ Reino ndrígóo Dios. Ikháanʼ nusngájma rí naguajúnlu jmbu náa Reino índo̱ numbañún bi̱ kaxtaʼwíin mu mutaraʼa ajngáa rí májánʼ náa xúgíʼ numbaaʼ (Mat. 24:14; 25:40).

“GAMBANÚU XÓO RÍ NANDAʼ IKHÁÁNʼ”

9. Xú káʼnii eʼyáá rí Dios maʼni mbanuu rí nandoo maʼni náa xa̱bu̱ rá.

9 Náa tsajkhun padrenuestro, Jesús ma̱ngaa niʼthí: “Gambanúu xóo rí nandaʼ ikháánʼ”. Ndiéjunʼ nindoo gáʼthi xá. Índo̱ Jeobá naʼthí mbá dí marigá, nambánuu (Is. 55:11). Rí Satanás táʼnimbo̱o̱ táʼni rí Jeobá mariʼkhu̱u̱ rí nandoo maʼni. Ndiéjunʼ rí nindoo Dios maʼni náa tsu̱du̱u̱ Ku̱ba̱ʼ rá. Rí e̱ji̱i̱n Adán ga̱jma̱a̱ Eva bi̱ xaguaʼdáá aʼkhá majtíin náa tsu̱du̱u̱ Ku̱ba̱ʼ (Gén. 1:28). Á mu Adán ga̱jma̱a̱ Eva nikháñun ga̱jma̱a̱ táguaʼdiin e̱jñún, xambánuu rí nindoo Dios rí majtíin e̱ji̱i̱n náa tsu̱du̱u̱ Ku̱ba̱ʼ. Ikha jngó Jeobá niniñúnʼ maguaʼdiin e̱ji̱i̱n. Rí nijuiʼtsiwáanʼ naxnún bi̱ nusngajma fe rí ma̱ndoo mani̱ndxu̱ún jmbiin ga̱jma̱a̱ rí makuwá kámuu. Jeobá nandoo kaʼyulú ga̱jma̱a̱ nandoo rí makuwáanʼ tsímáá xó má nindoo asndu nákha ginii.

10. Xú káʼnii gambáñun bi̱ nikháñun rí nijuiʼtsiwáanʼ rá.

10 Mbaʼin wéñuʼ xa̱bu̱ nikhánún rí asndu túniʼniiʼ Jeobá. Ndiéjunʼ guguaʼnii ikhiin xá. Numuu rí Dios nandoo rí xa̱bu̱ makuwá, ikhaa maʼnigabi̱ín xa̱bu̱. Rígi̱ marigá ga̱jma̱a̱ numuu rí nijuiʼtsiwáanʼ. Índo̱ gatuxi̱ín, ma̱ndoo majmañún ga̱jma̱a̱ numuu Jeobá ma̱ngaa makuwá kámuu mbiʼi (Hech. 24:15). Numuu rí Jeobá niʼnii xa̱bu̱, ikhaa mani̱ndxu̱u̱ Anu̱ún xúgínʼ xa̱bu̱ bi̱ gatuxi̱ín (Sal. 36:9). Ikha jngó Jesús niʼthí náa padrenuestro rí Jeobá nindxu̱u̱ Anu̱lú bi̱ “xta mikui” (Mat. 6:9). Jeobá nixnúu ñajunʼ Jesús rí makuxi̱ín bi̱ nikháñun. Ikha jngó Jesús niʼthí: “Ikun ini ri mbuya xabo tsi nijañu, jame indo-ma Ikun ixna ri ndaʼya” (Juan 6:40, 44; 11:25).

11. Ndiéjunʼ ekudaminaʼ Dios náa “mbaʼin xa̱bu̱” rá.

11 Jesús ma̱ngaa niʼthí: “Numu ri asjndo tsa tsi naʼne ri nando Dios, tsuʼkue ñajun dxiyoʼ, dxagüiʼ, naneʼ” (Mar. 3:35). Rí nandoo Dios nindxu̱u̱ rí xa̱bu̱ bi̱ kuwa náa xúgíʼ xuajen, raza ga̱jma̱a̱ bi̱ nuthi i̱ʼwáʼ ajngáa mbuyamajkuíí. Náa Biblia naʼthí rí ni̱ndxu̱ún “mbaʼin xa̱bu̱, dí asndu nimbáa xa̱bu̱ tséʼngo̱o̱ gaguxnuu”. Ikhiin guáʼdáá fe náa tsigijñaʼ ga̱jma̱a̱ nandún munimbu̱ún kuyáá Dios. Ma̱ngaa nuni mba̱a̱ ga̱jma̱a̱ nuthi: “Náa Dios gíʼmáanʼ rí niguma káwáanʼ, bi̱ gíiʼ náa trono ga̱jma̱a̱ Aʼdá múgú” (Rev. 7:9, 10).

12. Ndiéjunʼ eʼsngúlúʼ tsajkhun padrenuestro ga̱jma̱a̱ numuu rí nikudaminaʼ Jeobá náa xa̱bu̱ rá.

 12 Padrenuestro naʼsngúlú mbaʼa ga̱jma̱a̱ numuu Jeobá ma̱ngaa rí maʼni numún xa̱bu̱ numbaaʼ. Timbá, najmañulúʼ rí gíʼmaa muʼni xúgíʼ rí naʼngulú mu maguma kaʼwii mbiʼyuu Dios ga̱jma̱a̱ rí mbuʼyamajkuíí (Is. 8:13). Rí nijuiʼtsiwáanʼ naʼni rí ma̱ndoo makáwáanʼ ga̱jma̱a̱ ndayamajkhuu mbiʼyuu Dios. Asndu mbiʼyuu Jesús nandoo gáʼthúu̱n “Jeobá nindxu̱u̱ bi̱ Naʼni káwíin”. Raga̱jma̱, najmañulúʼ rí Jeobá majmuu Reino ndrígóo mu xa̱bu̱ bi̱ nunimbún ma̱ndoo mambáñún rí nijuiʼtsiwáanʼ. Ga̱jma̱a̱ ragajtsú, najmañulúʼ rí nimbá xándoo marikhoo mu maʼni rí nandoo Jeobá (Sal. 135:6; Is. 46:9, 10).

GUXNÁA NÚMA̱Aʼ RÍ NIJUITSIʼWÁANʼ

13. Náa numuu rí najngúlú iyááʼ rá.

13 Mbá xóo ma̱ndoo musngájma rí nuxnáa núma̱aʼ rí nijuiʼtsiwáanʼ, nindxu̱u̱ rí muxnáximijna náa Jeobá. Xúʼko̱ nusngajmá rí kuaʼdáá fe náa rí nijuiʼtsiwáanʼ ga̱jma̱a̱ rí ‹kaʼyulú náa Jeobá› (Rom. 14:8). Ma̱ngaa índo̱ najngúlú iyaʼ nunda̱ʼa̱a̱ ikhaa rí maxnúlúʼ mbá ‹ku̱ma̱ májánʼ› (1 Ped. 3:21). Ga̱jma̱a̱ Dios nariʼña̱a̱ índo̱ naʼni tsájkuramanʼ ga̱jma̱a̱ numuu rí nijuiʼtsiwáanʼ. Ikha jngó nduʼyáá gajkhun rí ikhaa maxnúlúʼ xúgíʼ rí nikudaminaʼ (Rom. 8:32).

Xú káʼnii esngájma rí nduʼyamajkuíí rí nijuiʼtsiwáanʼ rá. (Atayáá kutriga̱ 13 ga̱jma̱a̱ 14.)

14. Náa numuu naʼthúlúʼ Dios rí gaʼndulúʼ kuʼñúún eʼwíínʼ rá.

14 Jeobá naʼni xúgíʼ numuu rí nandoo kaʼyulú. Ikhaa nandoo rí bi̱ nduyamajkuíí mbuʼyaridáá ikhaa ga̱jma̱a̱ rí maʼndún kuyamijná (1 Juan 4:8-11). Índo̱ nandulúʼ kuʼñúún xa̱bu̱ nusngajmá rí nandulúʼ manindxu̱lúʼ e̱ji̱i̱n ‹Anu̱lú bi̱ xtáá mekhuíí› (Mat. 5:43-48). Náa Biblia, xtángoo rí itháan gíʼdoo numuu nindxu̱u̱ rí maʼndulú kuʼyáá Jeobá. Mú raga̱jma̱ rí gíʼdoo numuu nindxu̱u̱ rí maʼndulú kuʼñúún eʼwíínʼ (Mat. 22:37-40). Mbá rí xóo musngajma rí nandulúʼ kuʼñúún xa̱bu̱ nindxu̱u̱ rí muʼthúún ga̱jma̱a̱ numuu ajngáa májánʼ ndrígóo Reino. Á mu nuʼnimbulúʼ xtángoo ndrígóo Dios rí maʼndulú kuʼñúún eʼwíínʼ mu itháán a̱ngiu̱lú, ikhú rí nandulúʼ kuʼyáá ikhaa maʼni itháan májánʼ (1 Juan 4:12, 20).

NAGUMA TSAJKURÁMÁÁNʼ NUMUU RÍ NIJUIʼTSIWÁANʼ

15. a) Xú káʼnii eʼni tsajkurámáánʼ Jeobá rí mbiʼi xúgi̱ rá. b) Xú káʼnii gaguma tsajkurámáánʼ nda̱wa̱á rá.

15 Jeobá naʼthúlúʼ rí ma̱ndoo maʼnijngudi̱i̱  aʼkhúlúʼ á mu kuaʼdáá fe náa rí nijuiʼtsiwáanʼ. Rígi̱ nandoo gáʼthúu̱n rí ma̱ndoo maʼnijngudi̱i̱ mbá kayuʼ (atraxnuu Hechos 3:19-21). Xó má ndiʼyáá nángii, rí nijuiʼtsiwáanʼ nandoo naʼni rí Jeobá maʼthúún tikhun xa̱bu̱ mani̱ndxu̱ún xóo e̱ji̱i̱n mu makuwá mekhuíí. Ikhiin ni̱ndxu̱ún bi̱ kaxtaʼwíin (Rom. 8:15-17). Ma̱ngaa Jeobá naʼthúu̱n cristianos bi̱ ni̱ndxu̱ún “eʼwíínʼ mugu̱” rí mani̱ndxu̱ún e̱ji̱i̱n náa tsu̱du̱u̱ Ku̱ba̱ʼ. Índo̱ gánindxu̱ún xa̱bu̱ jmbiin, mbaʼyóoʼ muraʼníí iwáá tsáʼkhá. Á mu naguajún jmbuu náa Jeobá, ikhaa magruiguíin mu mangiin mani̱ndxu̱ún e̱ji̱i̱n (Rom. 8:20, 21; Rev. 20:7-9). Jeobá maʼndoo kaʼñún má xúʼko̱ xúgínʼ e̱ji̱i̱n. Ga̱jma̱a̱ numuu rí nijuiʼtsiwáanʼ, mudrigú má xúʼko̱ rí májánʼ asndu kámuu (Heb. 9:12). Jeobá nixnúlú regalo rí gíʼdoo wéñuʼ numuu rígi̱ ga̱jma̱a̱ nimbáa xándoo maríyaaʼ kaʼyulú.

16. Xú káʼnii eʼni káwáanʼ rí nijuiʼtsiwáanʼ rá.

16 Á mu natanga̱a̱ a̱jkiu̱lú náa dí ra̱májánʼ niʼnilú, Gixa̱a̱ xándoo maʼni nimbá mu marikhoo rí xánindxu̱lú e̱ji̱i̱n Jeobá. Jesús nixnáximinaʼ makhañúu káaʼ mbá miʼtsú. Rígi̱ nandoo gáʼthúu̱n rí ni xátanga̱a̱ maʼtsiwáanʼ (Heb. 9:24-26). Adán niʼni rí makhañúlúʼ, mú rí nixnáximinaʼ Jesús naʼni rí ma̱ndoo makuwáanʼ kámuu mbiʼi. Rí nijuiʼtsiwáanʼ ma̱ndoo maʼni káwáanʼ náa numbaaʼ ndrígóo Satanás ga̱jma̱a̱ náa gamíi rí makhañúlúʼ (Heb. 2:14, 15).

17. Xú káʼnii kumulú índo̱ nundxa̱ʼwáá edxu̱lúʼ rí Jeobá nandoo kaʼyulú wéñuʼ rá.

17 Nduʼyáá gajkhun rí mambanúu má xúʼko̱ dí nikudaminaʼ maʼni Jeobá. Xó má xtángoo rí nigíʼ ikhaa náa xúgíʼ rí niʼni tsixtiʼkhuu, Jeobá ma̱ngaa xariʼkhuminaʼ nditháan. Ikhaa xániñulú nditháan (Mal. 3:6). Raʼkháa i̱ndó naxnúlú vida ma̱ngaa nandoo kaʼyulú. “Ga̱jma̱a̱ ikháanʼ ni̱jkuánú niniʼnuʼ ga̱jma̱a̱ niʼnimbulú rí Dios nandoo kaʼyulú. Dios nandoo kaʼñún xúgínʼ” (1 Juan 4:16). Numuu rí Jeobá naʼnimbánuu rí nakudaminaʼ, Ku̱ba̱ʼ maʼni̱i̱ mitsaan wéñuʼ. Xúgínʼ xa̱bu̱ mbuyaridáá Jeobá ga̱jma̱a̱ maʼndún kuyamijná. Ikhú xúgínʼ xa̱bi̱i̱ Dios bi̱ kuwa mekhuíí ga̱jma̱a̱ náa Ku̱ba̱ʼ mbuyamajkuíí ga̱jma̱a̱ muthi: “Rí maguma tsajkurámaaʼ, maguma mba̱a̱, bi̱ gíʼdoo ku̱ma̱, bi̱ mixnáa núma̱aʼ, mbiʼyamajkuíí ga̱jma̱a̱ bi̱ gíʼdoo tsiakii ganindxu̱u̱ Dios ndrígúlú asndu kámuu mbiʼi. Xúʼko̱ gaʼne” (Rev. 7:12).

[Mbaʼa nota]

^ párr. 4 Salmo 40:8-10: “Dios ndrígóʼ, nanigu̱ʼ wéñuʼ mani rí nandaʼ ikháánʼ, ga̱jma̱a̱ xtángoo ndrígáʼ gíwanʼ náa a̱jkiu̱nʼ. Nataráʼa náa congregación rí mba̱a̱ ajngáa májánʼ rí nindxu̱u̱ jmbu. ¡Atayáá! Tsirugoo rawunʼ. Oh Jeobá, ikháánʼ natayáá májánʼ má rúʼko̱. Tarkaʼwu náa a̱jkiu̱nʼ rí ikháánʼ natani rí jmbu. Nataráʼa rí ikháánʼ tsitatsíñuxu ga̱jma̱a̱ rí natani káwáanʼxu. Tarkaʼwu náa congregación rí mba̱a̱ rí ikháánʼ nandaʼ xtayuxuʼ má xúʼko̱ ga̱jma̱a̱ rí ikháánʼ natani rí gajkhun”.

^ párr. 5 1 Pedro 1:15, 16: “Xó má Mikaʼwii wéñuʼ nindxu̱u̱ bi̱ nandxaʼwála, ganindxalaʼ mikaʼwáan wéñuʼ náa xúgíʼ rí nuni̱, numuu rí kiʼniráʼmáʼ: “Gíʼmáanʼ manindxala mikaʼwáanʼ wéñuʼ, numuu rí ikhúúnʼ ni̱ndxu̱ʼ mikaʼwún wéñuʼ”.