Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (rí muʼnigajmaa)  |  Enero tsiguʼ 2017

Gangajulú regalo rí muraʼwíí dí muʼni

Gangajulú regalo rí muraʼwíí dí muʼni

“Náa rígá espíritu ndrígóo Jeobá, na̱nguá kaxtuʼwájmáanʼ” (2 CORINTIOS 3:17).

AJMÚÚ 62 GA̱JMA̱A̱ 65

1, 2. a) Ndiéjunʼ ethi tikhun xa̱bu̱ ga̱jma̱a̱ numuu rí muraʼwíí rí muni rá. b) Ndiéjunʼ eʼsngáa náa Biblia ga̱jma̱a̱ numuu rí nuraʼwíí rí nuʼni rá. c) Xú káʼnii graxe̱ guriʼña̱a̱ náa artículo rígi̱ rá.

MBÁA a̱ʼgu̱ bi̱ ndiyóoʼ maraʼwíí rí maʼni niʼthúu̱n mbáa bi̱ nambáxu̱u̱ ga̱jma̱a̱: “Xátani rí mandxa̱ʼo̱o̱ edxu̱ʼ, i̱ndó arathúnʼ rí mani. Itháan ragákhi̱i̱”. Ikhaa nandoo muthán rí maʼni ki xóo mandxa̱ʼóo edxu̱u̱ o maraʼwíí rí maʼni, rí nindxu̱u̱ mbá regalo kiejunʼ ndrígóo Dios. Ikháanʼlu rá. Lá nanigulúʼ muraʼwíí rí muʼni o nandulúʼ rí eʼwíínʼ muraʼwíí rí muʼni ráʼ. Ndiéjunʼ endxaʼwamíjna̱ ga̱jma̱a̱ rí ikháanʼ guraʼwíí rá.

2 Xa̱bu̱ mixtiʼkhu xóo endxaʼwamíjna̱ ga̱jma̱a̱ numuu rí muraʼwíí muni. Tikhun nuthi dí rígi̱ nda̱a̱ numuu rí Dios má niraʼwíí rí muʼni. Eʼwíínʼ nuthi rí i̱ndó ma̱ndoo muraʼwíí á mu ma̱ndoo muʼni xúgíʼ rí eyulú. Mú náa Biblia naʼsngúlú rí Jeobá niʼniáanʼ mu ma̱ndoo mundxaʼwáá edxu̱lúʼ ga̱jma̱a̱ rí ma̱ndoo muraʼwíí muʼni rí májánʼ  (atraxnuu Josué 24:15). * Ma̱ngaa, náa Biblia nariʼña̱a̱ graxe̱ rígi̱: Lá nartumuu rí ma̱ndoo muraʼwíí muʼni ráʼ. Xú káʼnii gándoo guraʼwíí rí muʼni rá. Xú káʼnii esngajmá ga̱jma̱a̱ rí nuraʼwíí muʼni rí nandulúʼ kuʼyáá Jeobá rá. Xú káʼnii esngajmá rí nduʼyamajkuíí rí nuraʼwíí muni eʼwíínʼ rá. Náa artículo rígi̱ guriʼña̱a̱ graxe̱ rí tima gi̱jyooʼ.

NDIÉJUNʼ EJMAÑULÚ GA̱JMA̱A̱ NUMUU JEOBÁ MA̱NGAA JESÚS RÁ.

3. Xú káʼnii ejmuu Jeobá xúgíʼ rí naraʼwíí maʼni xá.

3 I̱ndó Jeobá ma̱ndoo maraʼwíí xúgíʼ rí eyoo maʼni, mu ma̱ndoo majmañulúʼ wéñuʼ xú káʼnii eraʼwíí rí maʼni. Mbá xkri̱da, Jeobá nijmuu rígi̱ mu maraʼwíí xuajen Israel xóo ‹xuajñu kiejunʼ› (Deut. 7:6-8). Niraʼwíí rígi̱ numuu rí nindoo maʼnimbánuu rí nikudaminaʼ náa Abrahán bi̱ nimbáxu̱u̱ ga̱jma̱a̱ (Gén. 22:15-18). Ma̱ngaa, Jeobá najmuu rígi̱ májánʼ wéñuʼ ga̱jma̱a̱ rí nandoo kaʼyulú. Xúʼko̱ nisngájma índo̱ nixprígún israelitas bi̱ túnimbu̱ún. Índo̱ ikhiin nitanga̱a̱ a̱jkiu̱ún Jeobá nisngájma rí nindoo kaʼñún ga̱jma̱a̱ nigáwiinʼ a̱jkiu̱u̱n. Ikhaa niʼthí: “Mani mba̱a̱ a̱jkiu̱nʼ dí raʼkhí rí nini ikhiin. Náa a̱jkiu̱nʼ gagájnuu rí nandoʼ ka̱ñu̱u̱n” (Os. 14:4). Xó má eʼyáá, Jeobá najmuu rígi̱ mu mambáñun eʼwíínʼ. ¡Nindxu̱u̱ mbá májánʼ xkri̱da náa ikháanʼ!

4, 5. a) Tsáa ninindxu̱u̱ timbáa bi̱ nigruigú rí ma̱ndoo maraʼwíí rí maʼni ga̱jma̱a̱ xóo nijmuu xá. b) Xú káʼnii graxe̱ gíʼmaa muʼni xúgiáanʼ rá.

4 Jeobá niraʼwíí maʼnii ángeles ga̱jma̱a̱ xa̱bu̱ numbaaʼ rí ma̱ndoo muraʼwíí rí muni. Timbáa bi̱ niʼnii Dios ninindxu̱u̱ Jesús, ikhaa nigumaa xó má kaʼnii Dios. Ikhaa ginii nigruigú rí maraʼwíí maʼni (Col. 1:15). Xú káʼnii nijmuu Jesús rígi̱ rá. Nákha xóó tséʼkha̱ náa tsu̱du̱u̱ Ku̱ba̱ʼ, niraʼwíí mani̱ndxu̱u̱ jmbii náa Dios ga̱jma̱a̱ xámbáyuu Satanás ma̱ngaa rí naʼni. Ga̱jma̱a̱ índo̱ ni̱ʼkha̱ náa tsu̱du̱u̱ Ku̱ba̱ʼ niʼni gaʼduunʼ tsáʼkhá ndrígóo Satanás (Mat. 4:10). Ma̱ngaa, mbruʼun rí inuu makhañúu niʼthá kháñuu Anu̱u̱ ga̱jma̱a̱ niʼthúu̱n rí nandoo maʼni rí nandoo ikhaa. Niʼthúu̱n: “Tateʼ, xi nandaʼ. Atane ri maxayaminuʼ ri naʼka mbayaminuʼ; maxaʼne xo ri nandoʼ Ikun, indo xo ri nandaʼ Ikan gaʼne” (Luc. 22:42). Lá ma̱ndoo xa̱bu̱ numbaaʼ mbuyaridáá Jesús ga̱jma̱a̱ muraʼwíí mbuyamajkuíí Jeobá ga̱jma̱a̱ muni rí nandoo xáʼ.

5 Xúʼko̱, ma̱ndoo mbuʼyaridáá Jesús numuu rí mangáanʼ ni̱ndxu̱lú e̱ji̱i̱n Dios (Gén. 1:26). Mú ikháanʼ na̱nguá xóo muraʼwíí xúgíʼ xó má eʼni Jeobá. Náa Biblia naʼthí rí niʼni martumuu rí ma̱ndoo muraʼwíí ga̱jma̱a̱ nandoo muʼnimbaníí. Mbá xkri̱da, gu̱ʼu̱ gíʼmaa mbuyamajkún ajmbiún ga̱jma̱a̱ e̱ji̱i̱n gíʼmaa mbuyamajkún anu̱ún (Efes. 5:22; 6:1). Ikha jngó xúgiáanʼ gíʼmaa muraximíjna̱: “Lá ndayamajkhuu awan rí  Dios nigíʼ ga̱jma̱a̱ numuu rí maraʼwíí ráʼ.” Rí xóo guriʼña̱a̱ maʼga̱ kaguáanʼ makuwáanʼ kámuu.

RÍ MAJMAÑAAʼ GA̱JMA̱A̱ RÍ XAJMAÑAAʼ MATRAʼWÍÍ

6. Ga̱jma̱ʼ mbá xkri̱da mu maratha náa numuu rí ndayóoʼ mbá awan mu marigá náa martumulú.

6 Numuu rí nartumuu rí ma̱ndoo muraʼwíí, lá ma̱ndoo muʼthá rí ma̱ndoo muraʼwíí rí phú nandulúʼ ráʼ. Xúʼko̱ kaʼnii. Náa numuu. Numuu dí rúʼko̱ nañewu̱nlú. Guʼyáá mbá xkri̱da. Gundxaʼwamíjna̱ rí nandulúʼ muʼguá náa mbá xuajen mitsínguánʼ ga̱jma̱a̱ náa carretera nda̱a̱ xtángoo ndrígóo tránsito. Xa̱bu̱ nagún asndu náa má eñún ga̱jma̱a̱ nagañún xó má eñún. Lá mu̱ʼgua̱ tsímáá ráʼ. Na̱nguá. Xkri̱da rígi̱ nasngájma rí ndayúlú rí marigá mbá awan náa martumulú mu muraʼwíí rí muʼni. Guʼyáá tikhuu xkri̱da ndrígóo Biblia rí nasngájma rí awan rí nigíʼ Jeobá nambáyulúʼ.

7. a) Arathá xú káʼnii mixtiʼkhuii Adán náa xujkhúʼ. b) Xú káʼnii nijmuu májánʼ Adán rí niraʼwíí maʼni xá.

7 Timbáa xa̱bu̱ bi̱ niʼnii Jeobá ninindxu̱u̱ Adán. Jeobá niniñuʼ rí ikhaa maraʼwíí, xó má niʼni gajmíi̱n ángeles. Mú táxnúún xujkhúʼ awan rígi̱. Xú káʼnii nijmuu Adán rígi̱ rá. Nigruigú ñajunʼ rí maxná mbiʼñún xujkhúʼ. Náa Biblia naʼthí rí Dios ni̱jkha̱ kagu̱u̱n náa Adán mu mbaʼñún ga̱jma̱a̱ maxnún mbiʼñún rí kaʼñún. Jeobá tariʼkhu̱u̱ nimbáa mbiʼyuu xujkhúʼ rí nixná mbiʼñún Adán. Ikhaa ndiʼyamajkhuu rí niraʼwíí Adán (Gén. 2:19).

8. Ndiéjunʼ rí niraʼwíí maʼni Adán, ga̱jma̱a̱ káʼnii nirígá rá.

8 Jeobá nixnúu Adán ñajunʼ rí maʼni̱i̱ mitsaan Ku̱ba̱ʼ. Dios niʼthí: “Gaguaʼdíin e̱jña̱la, gaʼni mbaʼánʼ, gakuwáanʼ náa xúgíʼ tsu̱du̱u̱ ku̱ba̱ʼ ga̱jma̱a̱ gutañájunʼ, ga̱jma̱a̱ guñewu̱u̱n egi̱ʼ bi̱ kuwa náa lamáa ga̱jma̱a̱ xujkhúʼ bi̱ nagún mekhuíí ga̱jma̱a̱ xúgínʼ xujkhúʼ bi̱ nubañimi̱jna̱ náa inuu ku̱ba̱ʼ” (Gén. 1:28). Mú Adán niraʼwíí rí xáʼyamajkhuu awan rí nigíʼ Jeobá. Ikha jngó ni̱ʼkhu̱ xndú dí ragíʼmaa mikhu. Numuu rí Adán na̱nguá nijmuu májánʼ rí maraʼwíí rí maʼni, xa̱bu̱ numíniinʼ asndu nákha wajyúúʼ (Rom. 5:12). Garmáʼáan a̱jkiu̱lú rí nirígá ga̱jma̱a̱ numuu rí niraʼwíí maʼni Adán. Rúʼko̱ maxkaxáanʼ muraʼwíí rí májánʼ ga̱jma̱a̱ mbuʼyamajkuíí awan rí nigíʼ Jeobá.

9. Ndiéjunʼ niniñúnʼ Jeobá muni israelitas, ga̱jma̱a̱ ndiéjunʼ nithi muni ikhiin xá.

9 Xúgiáanʼ niʼdaʼ aʼkhá ga̱jma̱a̱ rí nakháñulú rí Adán ga̱jma̱a̱ Eva niniñaʼ. Mú xóó ma̱ndoo muraʼwíí rí muʼni. Rígi̱ nduʼyáá rí xú káʼnii niʼni Jeobá gajmíi̱n xa̱bu̱ Israel. Ikhaa niniñúnʼ rí israelitas muraʼwíí á mu nandún mani̱ndxu̱ún xuajñu kiejunʼ o na̱nguá (Éx. 19:3-6). Ikhiin niriʼña rí nandún ga̱jma̱a̱ rí mbuyamajkuíí awan rí ikhaa nigíʼ. Nithi muni rígi̱: “Xúgíʼ rí Jeobá niʼthí nanduxu munimbánii” (Éx. 19:8). Mú gíná niʼni nda̱wa̱á numuu rí túnimbaníí ajngún. Xkri̱da ndrígu̱ún naʼsngúlú mbá ikhaa rí gíʼdoo wéñuʼ numuu. Xú káʼnii nindxu̱u̱ rá. Rí gíʼmaa mangajulú má  xúʼko̱ numuu rí nandoo muraʼwíí rí muʼni, makuwáanʼ mijngii náa Jeobá ga̱jma̱a̱ muʼnimbaníí xtángoo ndrígóo (1 Cor. 10:11).

10. Xkáʼnii xkri̱da rí na̱ʼkha̱ náa capítulo 11 ndrígóo Hebreos nasngájma rí xa̱bu̱ aʼkhá ma̱ndoo muraʼwíí mbuʼyamajkuíí Jeobá rá. (Atayáá timbá xtiʼkhu.)

10 Náa capítulo 11 náa carta ndrígóo Hebreos naʼthí ga̱jma̱a̱ numún mbá 16 xa̱bekha ga̱jma̱a̱ gu̱ʼu̱ bi̱ ninindxu̱ún jmbiin bi̱ niraʼwíí mbuyamajkuíí awan rí nigíʼ Jeobá. Ga̱jma̱a̱ numuu rí niraʼwíí rí májánʼ nindrigú mbaʼa rí májánʼ ga̱jma̱a̱ rí makuwá tsímáá nda̱wa̱á. Mbá xkri̱da, Noé nigiʼdoo mbá fe mba̱a̱ ga̱jma̱a̱ niraʼwíí maʼnimbánuu ikha ndrígóo Dios mu maʼni mbá arca ga̱jma̱a̱ maʼni káwíin bi̱ kuwa náa goʼwóo ma̱ngaa bi̱ gákuwá nda̱wa̱á (Heb. 11:7). Abrahán ga̱jma̱a̱ Sara ninimbu̱ún kuyáá Dios ga̱jma̱a̱ xúgíʼ a̱jkiu̱ún ga̱jma̱a̱ nigún náa ku̱ba̱ʼ rí ikhaa nikudaminaʼ maxnún. Nda̱wa̱á nindoo “matangi̱ín” náa xuajen Ur, mu tambumún rí nikudaminaʼ maʼni Dios nda̱wa̱á. Náa Biblia naʼthí rí ikhiin nini mbá tsiakii mu “muxkamaa náa mbóo rí itháan májánʼ” (Heb. 11:8, 9, 13, 15, 16). Moisés niraʼwíí maʼni gaʼduunʼ xúgíʼ rí gíʼdoo numuu náa Egipto ga̱jma̱a̱ “niraʼwíí rí majmagínáa ga̱jma̱a̱ xuajñu Dios ki xóo rí maʼni gagiminaʼ ga̱jma̱a̱ aʼkhá rí maʼni” (Heb. 11:24-26). Guʼyaridáá fe ndrígu̱ún xa̱bi̱i̱ Dios ga̱jma̱a̱ gusngajmá rí nangajulú rí nandoo nuraʼwíí rí muʼni mu muʼni rí nandoo Dios.

11. a) Ndiéjunʼ rí gíʼdoo numuu gaguaʼdáá á mu nuraʼwíí muʼni rí májánʼ rá. b) Ndiéjunʼ exkaxáanʼ muraʼwíí rí májánʼ rá.

11 Mbáa itháan ra̱mingíjyúuʼ gáʼni rí imba̱a̱ xa̱bu̱ garaʼwíí rí muʼni. Mú á mu nuʼni xúʼko̱, mandátigulú rí gíʼdoo wéñuʼ numuu. Ndiéjunʼ nindxu̱u̱ rá. Náa Biblia naʼthí rígi̱ náa Deuteronomio 30:19, 20 (atraxnuu). * Náa versículo 19 naʼthí rí Dios nigruiga̱ mbaʼa ikha muni israelitas. Ga̱jma̱a̱ náa versículo 20 naʼthí rí guraʼwíí muʼni musngájma náa Jeobá nguáthá eñún kuyáá. Mangáanʼ ma̱ndoo muraʼwíí muʼni ñajunʼ Jeobá. Á mu nuʼni ma̱ndoo muraʼwíí mbuʼyamajkuíí Jeobá ga̱jma̱a̱ musngajmáá rí nandulúʼ kuʼyáá wéñuʼ.

XÚRAʼWÍÍ MUʼNI DÍ RA̱MÁJÁNʼ

12. Ndiéjunʼ rí guraʼwíí muʼni rá.

12 Gundxaʼwamíjna̱ rí nuxnáá mbá regalo rí gíʼdoo wéñuʼ numuu mbáa bi̱ nambáxulúʼ gajmiúlú. Xú káʼnii gakumulú á mu nadaʼ náa náska o majmuu mu maʼni gawúunʼ eʼwíínʼ xá. Lá ragájkhun rí magawúnlú ráʼ. Numuu rí Jeobá nixnúlú rí ma̱ndoo muraʼwíí rí muʼni, ikhaa nagawúnʼ índo̱ ndaʼyoo rí tikhun xa̱bu̱ nuraʼwíí muni rí májánʼ o  nuni gawúunʼ eʼwíínʼ. Náa Biblia naʼthí rí náa “iwáá mbiʼi” xa̱bu̱ xúxna̱a̱ núma̱aʼ (2 Tim. 3:1, 2). Mú ikháanʼ tsíyulú muʼni xúʼko̱ kaʼnii. Mú xú káʼnii gándoo gusngajmá rí nuxnáa núma̱aʼ numuu rí Jeobá naniñulú muraʼwíí rá. Ga̱jma̱a̱ xú káʼnii gándoo gajmulú májánʼ regalo rí nixnúlú xá.

13. Xú káʼnii gándoo gajmulú májánʼ rí muraʼwíí rí muʼni rá.

13 Xúgiáanʼ ma̱ndoo muraʼwíin tsíin gambáxulúʼ gajmiúlú, xú káʼnii xtíin gaguʼwúnlú ga̱jma̱a̱ xú káʼnii guʼniratamijná, ga̱jma̱a̱ xú káʼnii gajmulú mbiʼi ndrígúlú. Mú gíʼmaa muñewa̱a̱n rí xúraʼwíí muʼni rí tsénigu̱ʼ Dios o muʼni rí nuni xa̱bu̱ numbaaʼ (atraxnuu 1 Pedro 2:16). * Xájmulú rígi̱ mu muʼni dí ra̱májánʼ, gajmulú rígi̱ mu muʼni rí “maʼga̱ gamajkhu náa Dios” (1 Cor. 10:31; Gál. 5:13).

14. Náa numuu gíʼmaa makumulúʼ kuʼyáá Jeobá índo̱ guraʼwíí rí muʼni rá.

14 Jeobá naʼthúlúʼ: “Ikhúúnʼ, Jeobá, ni̱ndxu̱ʼ Dios ndrígáʼ, bi̱ naʼsngáaʼ xú káʼnii mambáyaʼ ikháánʼ, bi̱ naʼtháanʼ náa kamba̱a̱ gíʼmaa majngruigaʼ” (Is. 48:17). Á mu nakumulú kuʼyáá Jeobá, mbuʼyamajkuíí awan rí nigíʼ ga̱jma̱a̱ muraʼwíí muʼni rí májánʼ. Manindxu̱lúʼ xa̱bu̱ guabáanʼ á mu nduʼyáá rí xa̱bu̱ numbaaʼ “na̱nguá kaʼyoo  maʼtañajuminaʼ. Asndu má rakaʼyoo maʼthí xú káʼnii maxtáa” (Jer. 10:23). Ni Adán ni má israelitas bi̱ túni rí jmbu táʼnduun guyamajkuíí awan rí nigíʼ Jeobá. Rí phú nini, ‹nikumu̱ún i̱ndó dí na̱ʼkha̱ náa edxu̱ún ikhiin›. Xúʼyaridúún. Gakumulú kuʼyáá Jeobá ga̱jma̱a̱ xúgíʼ a̱jkiu̱lú ki xóo rí makumulúʼ kuʼyamijná (Prov. 3:5).

GÍʼMAA MBUʼYAMAJKUÍÍ RÍ ERAʼWÍÍ MUNI EʼWÍÍNʼ

15. Ndiéjunʼ eʼsngúlúʼ ikha rí na̱ʼkha̱ náa Gálatas 6:5 rá.

15 Ma̱ngaa gíʼmaa mbuʼyamajkuíí rí eʼwíínʼ eraʼwíí muni. Náa numuu rá. Numuu rí xúgiáanʼ ma̱ndoo muraʼwíí rí muʼni. Ikha jngó mani̱ndxu̱u̱ mixtiʼkhu rí guraʼwíí muni eʼwíínʼ cristianos. Rígi̱ ma̱ndoo maʼni náa rí nuni ga̱jma̱a̱ xóo eyamajkuíí Dios. Garmáʼáan a̱jkiu̱lú ikha rí na̱ʼkha̱ náa Gálatas 6:5 (atraxnuu). * Ikha rígi̱ naʼsngúlú rí mámbáa cristiano kaʼyoo rí garaʼwíí maʼni. Á mu na̱jkua̱nú nakru̱ʼu̱lú rígi̱, mbuʼyamajkuíí rí guraʼwíí muni eʼwíínʼ.

Ikháanʼ ma̱ndoo muraʼwíí rí muʼni, mú gíʼmaa mbuʼyamajkuíí rí eraʼwíí muni eʼwíínʼ. (Atayáá kutriga̱ 15.)

16, 17. a) Náa numuu rí ninindxu̱u̱ mbá xkujndu rí muraʼwíí muni a̱ngiu̱lú Corinto rá. b) Xú káʼnii nimbáñun Pablo cristianos bugi̱ rá. c) Ndiéjunʼ ikha eʼsngúlúʼ rá.

16 Guʼyáá mbá xkri̱da rí na̱ʼkha̱ náa Biblia rí nasngájma náa numuu gíʼmáanʼ mbuʼyamajkuíí rí eraʼwíí muni a̱ngiu̱lú. Cristianos bi̱ nikuwa náa Corinto na̱nguá nimbánuun á mu ma̱ndoo mu̱phu̱ o xúphu̱ xuwiʼ rí nuxnaxi̱ náa xándú ga̱jma̱a̱ rí nda̱wa̱á naxtango̱jo̱o̱ náa xuáá. Tikhun nda̱a̱ rí eʼniún á mu naʼphu̱ xuwiʼ rúʼko̱, numuu rí ndiyáá rí xándú nda̱a̱ rí ni̱ndxu̱ún. Mú bi̱ ndiyamajkhún xándú nákha ginii nákha xóó tsénindxu̱ún cristianos nindxa̱ʼwa̱míjna̱ rí ikháá má nindxu̱u̱ rí mu̱phu̱ xuwiʼ ga̱jma̱a̱ rí mbuyamajkún (1 Cor. 8:4, 7). Xkujndu rígi̱ ninindxu̱u̱ mba̱a̱ wéñuʼ rí asndu ma̱ndoo markuájinʼ a̱ngiu̱lú náa congregación. Ndiéjunʼ niʼni Pablo mu mambáñun a̱ngiu̱lú bugi̱ munimbaníí xkujndu rígi̱ rá.

17 Timbá, Pablo niʼni marmáʼáan a̱jkiu̱ún cristianos bi̱ nikuwa náa Corinto rí ganitsu xáʼni rí mambáxu̱u̱n itháan májánʼ gajmiún Dios (1 Cor. 8:8). Ma̱ngaa, niʼthún rí maski ajndu ikhiin ma̱ndoo muraʼwíí rí muni, gíʼmaa muñewa̱a̱n rí xúni̱ gawúunʼ bi̱ gua̱bi̱nʼ (1 Cor. 8:9). Nda̱wa̱á niʼthún bi̱ gua̱bi̱nʼ rí xúti numún bi̱ niraʼwíí mu̱phu̱ xuwiʼ rúʼko̱ (1 Cor. 10:25, 29, 30). Xó má eʼyáá, rígi̱ nigiʼdoo wéñuʼ numuu náa rí ndiyamajkuíí Dios, ga̱jma̱a̱ mámbáa cristiano ndiyóoʼ maraʼwíí ndiéjunʼ gáʼni. Lá ragíʼmaa mbuʼyamajkuíí rí eraʼwíí muni a̱ngiu̱lú náa rí xóo ragíʼdoo wéñuʼ numuu ráʼ. (1 Cor. 10:32, 33.)

18. Xú káʼnii esngajmá rí nangajulú regalo rí nikhánulú rá.

18 Jeobá nimínaaʼ rí muraʼwíí muʼni rí eyulú (2 Cor. 3:17). Gangajulú regalo rígi̱ rí naniñulú musngajmá á mu nandulúʼ kuʼyáá Jeobá. Guraʼwíí muʼni rí mbaʼyamajkuu Dios ga̱jma̱a̱ mbuyamajkuíí rí eraʼwíí muni eʼwíínʼ. Xúʼko̱ gusngajmá rí nangajulú regalo rí nixnúlú Jeobá.

^ párr. 2 Josué 24:15: “Á mu dí raʼkhí eya̱a̱lá dí muni ñajunʼ Jeobá, guraʼwíí xúgi̱ tsáa eyalá muni ñajunʼ, á mu dios bi̱ nini ñajunʼ wajin xiʼñála nákhi wajyúúʼ bi̱ nikuwa náa ridoo Mañu, o á mu dios ndrígu̱ún amorreo bi̱ kuwa náa ku̱ba̱ʼ dí kuwáanʼla xúgi̱. Mú ikhúúnʼ gajmíi̱nʼ bi̱ kúwi̱i̱n náa goʼwóoʼ, munixu ñajunʼ Jeobá”.

^ párr. 11 Deuteronomio 30:19, 20: “Naʼgíʼ mekhu ga̱jma̱a̱ ku̱ba̱ʼ xóo testigos náa ikháanʼla xúgi̱, rí niʼgíʼ náa ikháánʼ vida ga̱jma̱a̱ rí makhañáaʼ, rí maguma tsajkurámáánʼ ga̱jma̱a̱ majuiʼtátsriguin; ga̱jma̱a̱ gíʼmaa mataʼyááʼ vida mu ma̱ndoo maraxtaa xóó, ikháánʼ gajmiáanʼ e̱jña̱ʼ, rí maʼnda̱ʼ xtayáá Jeobá Dios ndrígáʼ, matadxun aʼwóo ga̱jma̱a̱ mi̱dxu̱ʼ kanuu náa ikhaa; numuu rí ikhaa nindxu̱u̱ vida ndrígáʼ ga̱jma̱a̱ numuu ikhaa maraxtaa mba̱yu̱ʼ mbiʼi náa tsu̱du̱u̱ ku̱ba̱ʼ rí Jeobá niʼthún maxnún xiʼñáʼ Abrahán, Isaac ga̱jma̱a̱ Jacob”.

^ párr. 13 1 Pedro 2:16: “Gani̱ndxa̱la xóo xa̱bu̱ bi̱ na̱nguá kaxtuʼwájmiin, gajmala rígi̱ raʼkháa mu muruguáá dí raʼkhí, gajmala mu mani̱ndxa̱la esclavos ndrígóo Dios”.

^ párr. 15 Gálatas 6:5: “Numuu dí mámbáa kaʼyoo maʼnimbánuu ñajunʼ rí kaʼyoo”.