Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (edición de estudio)  |  Enero tsiguʼ 2017

“Rígi̱ araxná ngaun xa̱bu̱ bi̱ ni̱ndxu̱ún jmbiin”

“Rígi̱ araxná ngaun xa̱bu̱ bi̱ ni̱ndxu̱ún jmbiin”

“Rígi̱ araxná ngaun xa̱bu̱ bi̱ ni̱ndxu̱ún jmbiin, bi̱, kiʼniratiin májánʼ mu musngúún eʼwíínʼ” (2 TIMOTEO 2:2).

AJMÚÚ 123 GA̱JMA̱A̱ 53

1, 2. Ndiéjunʼ endxaʼwamíjna̱ mbaʼin xa̱bu̱ ga̱jma̱a̱ numuu ñajunʼ dí guáʼdáá rá.

MBAʼIN xa̱bu̱ nundxa̱ʼwa̱míjna̱ dí ñajunʼ dí guáʼdáá naʼni maguaʼdáá itháan numún o na̱nguá. Náa tikhu xuajen, índo̱ dí ndiʼkhún eniʼnumijná nuraximíjna̱ xú káʼnii ñajunʼ guáʼdáá.

2 Índo̱ náa Biblia naʼthí ga̱jma̱a̱ numún tikhun xa̱bu̱, nguáná naʼthí ga̱jma̱a̱ numuu ñajunʼ dí niguáʼdáá. Mbá xkri̱da, naʼthí dí Mateo nindxu̱u̱ mbáa bi̱ naruma mbújkha̱a̱ náa guʼwá ñajunʼ, ga̱jma̱a̱ Simón naʼni mújúnʼ xtá ga̱jma̱a̱ dí Lucas nindxu̱u̱ mbáa bi̱ naʼni thana (Col. 4:14; Mat. 10:3; Hech. 10:6). Ma̱ngaa Biblia naʼthí ga̱jma̱a̱ numuu ñajunʼ dí niguáʼdáá xa̱bu̱ bi̱ nuni ñajuunʼ Jeobá. Gundxaʼwamíjna̱ ga̱jma̱a̱ numuu rey David, gaʼyee Elías ga̱jma̱a̱ apóstol Pablo. Xa̱bu̱ bugi̱ ndiyáá dí gíʼdoo numuu ñajunʼ dí nixnúún Dios. Xúʼko̱ ma mangáanʼ gíʼmaa mbuʼyáá dí gíʼdoo numuu asndu káʼnii ñajunʼ dí gúʼni náa Jeobá.

3. Náa numuu dí a̱ngiu̱lú bi̱ guanuu gíʼmaa muniratiin bi̱ itháan jiáma rá. (Atayáá timbá xtiʼkhu.)

3 Ikháanʼ bi̱ nidxulú xa̱bi̱i̱ Dios kuwáanʼ gagi numuu ñajunʼ dí kuaʼdáá ga̱jma̱a̱ nduʼyáá dí gíʼdoo numuu. Mbaʼánʼ dí ikháanʼ  nanigulúʼ ñajunʼ dí kuaʼdáá dí asndu nandulúʼ muʼni xúgíʼ mbiʼi dí gákuwáanʼ. Índo̱ naniáanʼ nánguá eʼngo̱o̱ gúʼni xóo nákha ginii (Ecl. 1:4). Rígi̱ naʼni dí maʼniulú mingíjyúuʼ tikhu ñajunʼ dí nuʼni ikháanʼ bi̱ ni̱ndxu̱lú xa̱bi̱i̱ Jeobá. Náa numuu rá. Numuu rí na̱jkha̱ raja dí miʼtáraʼa ga̱jma̱a̱ xuajñu Dios najmuu tecnología dí itháan nuxi̱ʼ mu magún ku̱ñu̱u̱n ajngáa dí májánʼ náa xúgínʼ xa̱bu̱. Mú nguáná a̱ngiu̱lú bi̱ wanuu naʼniún miʼskhoo majmañún i̱ʼwáʼ ñajunʼ nuxi̱ʼ (Luc. 5:39). Nduʼyáá májánʼ dí índo̱ nanújngoo tsiguʼ xa̱bu̱ nánguá guáʼdáá ikhaa tsiakii xóo nákha ginii (Prov. 20:29). Ikha jngó májánʼ gáʼni dí a̱ngiu̱lú bi̱ wanuu musngúún bi̱ itháan jiáma xóo muni itháan ñajunʼ (atraxnuu Salmo 71:18). *

4. Náa numuu naʼniún mingíjyúuʼ tikhun mu muniñaʼ ñajunʼ dí guáʼdáá rá. (Atayáá náa kúgumaʼá “ Numuu rí naʼniulú mingíjyúuʼ muxnún eʼwíínʼ ñajunʼ”.)

4 A̱ngiu̱lú bi̱ guáʼdáá mbá ñajunʼ mba̱a̱, naʼniún mingíjyúuʼ muniñaʼ ñajunʼ náa ñawúunʼ bi̱ itháan jiáma (atayáá náa kúgumaʼá “Ndiéjunʼ eyoo gáʼthúu̱n”). Mbáa makuwá gíná índo̱ mundxaʼwamíjna̱ dí matígu̱u̱n ñajunʼ dí ra̱ʼkhá tháán nanigu̱nʼ muni. Mbáa magawúnʼ índo̱ gúyáá dí eʼwíinʼ gúni ñajunʼ dí ikhiin nduyáá dí nindxu̱u̱ kiejunʼ. Mbáa makumún dí xagájnuu májánʼ ñajunʼ á mu ikhiin na̱nguá kuwa mu mbuyáá. O mbáa nakumu̱ún dí na̱nguá kuaʼdáá mbiʼi mu muniratiin eʼwíinʼ. Mú ma̱ngaa bi̱ itháan jiáma, gíʼmaa maʼngo̱o̱ a̱jkiu̱ún á mu na̱nguá edrigú itháan ñajunʼ.

5. Náa biʼyaa graxe̱ gúʼyáá náa artículo rígi̱ rá.

5 Mú, ndíjkha dí gíʼdoo wéñuʼ numuu dí a̱ngiu̱lú bi̱ itháan wanuu mumbañún bi̱ itháan jiáma maguaʼdáá itháan ñajunʼ rá. Xú káʼnii gándoo gumbañúún xá. (2 Tim. 2:2.) Ga̱jma̱a̱ náa numuu dí bi̱ itháan jiáma gíʼmaa mani májánʼ a̱jkiún ga̱jma̱a̱ maʼndún majmañún índo̱ nuñajunʼ gajmiún bi̱ itháan guanii rá. Ginii mbuʼyáá xú káʼnii nimbáyúu rey David a̱ʼdióo mu maʼnimbánuu mbá ñajunʼ dí gíʼdoo wéñuʼ numuu.

DAVID NIMBÁYÚU SALOMÓN

6. Ndiéjunʼ dí ninigu̱u̱ʼ maʼni rey David, mú ndiéjunʼ niʼthúu̱n Jeobá xá.

6 David nindúún muxiyáa mbayuuʼ tsiguʼ ga̱jma̱a̱ ni̱jkha̱ raxkaʼwuminaʼ náa mbaʼa xuajen. Índo̱ nigíʼdu̱u̱ raʼthá ñajunʼ, ni̱jkha̱ gáxtáa náa mbá guʼwá májánʼ. Ikha jngó niʼthúu̱n gaʼyee Natán: “Ikhúúnʼ xtáá náa guʼwá rí kiʼni ga̱jma̱a̱ cedro mú e̱jna̱ rí nimbánuu ndrígóo Jeobá kraʼa náa agoo xtíin”. David nindoo ga̱jma̱a̱ xúgíʼ a̱jkiu̱u̱n maʼni mbá guʼwá dí mitsaan wéñuʼ mu mani̱ndxu̱u̱ templo ndrígóo Jeobá. Ikhú Natán niʼthúu̱n David: “Atani, xúgíʼ dí gíwanʼ náa awúu̱n a̱jkia̱nʼ, numuu rí Dios bi̱ gajkuwin xtáa ga̱jma̱á ni̱ndxa̱ʼ”. Mú Jeobá na̱nguá endxa̱ʼwáminaʼ xóo gaʼyee Natán. Ikha jngó nikuʼmaa mu maʼthúu̱n David: “Ikháánʼ xátani guʼwá náa maxtáá”. Gajkhun má dí Jeobá niʼthúu̱n David dí maʼni tsajkurámaaʼ má xúʼko̱, mú niʼthúu̱n dí mbáa a̱ʼdióo mani̱ndxu̱u̱ bi̱ maʼni templo. Xú káʼnii nikumu̱u̱ David rá. (1 Crón. 17:1-4, 8, 11, 12; 29:1.)

7. Xú káʼnii nisngájma David dí ndiʼyamajkuu awan dí niríyaʼ Jeobá maʼni rá.

7 Numuu dí David niniguʼ maʼni templo ndrígóo Jeobá, mbáa ikhaa nixtáa gíná índo̱ nitháán dí xáʼni. Maski ajndu xúʼko̱, niyambáá ga̱jma̱a̱ káxi̱ a̱jkiu̱u̱n náa ñajunʼ dí gajkuáa ñawúunʼ a̱ʼdióo bi̱ mbiʼyuu Salomón. Niyambáá mu magajnúu awan xóo muñajunʼ xa̱bu̱ ga̱jma̱a̱ niyambáá mu  mbaʼyaʼ ixi̱, ajua̱nʼ, cobre, plata ga̱jma̱a̱ oro. David táxmiéjunʼ tsáa gagruigú gamajkhu ga̱jma̱a̱ numuu templo, xó má ni̱jkha̱nú nigumbiʼyuu templo ndrígóo Salomón. Ikhaa nixnúu tsiakii a̱ʼdióo índo̱ niʼthúu̱n: “Gaxtáa Jeobá ga̱jma̱á ni̱ndxa̱ʼ, ga̱jma̱a̱ magajnúu májánʼ rí matani ga̱jma̱a̱ matani goʼwóo Jeobá Dios ndrígáʼ, xó má niʼthí ikhaa ga̱jma̱a̱ numaʼ” (1 Crón. 22:11, 14-16).

8. Ndíjkha ma̱ndoo mandxaʼwáminaʼ David dí Salomón na̱nguá xtáa xawii mu maʼni templo, mú ndiéjunʼ niʼni xá.

8 (Atraxnuu 1 Crónicas 22:5). * Mbáa ma̱ndoo maʼga̱nú mandxa̱ʼóo edxu̱u̱ David dí Salomón na̱nguá xtáa xawii mu mayéʼga edxuu náa mbá ñajunʼ dí gíʼdoo wéñuʼ numuu. Ikhaa nindoo dí guʼwá mani̱ndxu̱u̱ mitsaan wéñuʼ, mú Salomón ndiʼkhún nindxu̱u̱ mbá dxámá ga̱jma̱a̱ xóo na̱nguá ejmañuu májánʼ. Maski ajndu xúʼko̱ ndaʼyoo dí Jeobá má gámbáyúu Salomón mu maʼni ñajunʼ dí kiejunʼ rígi̱. Ikha jngó niʼni xúgíʼ xó má niʼngo̱o̱ mu mambáyúu a̱ʼdióo náa ñajunʼ dí phú mba̱a̱ rígi̱.

GAKUWÁANʼ GAGI ÍNDO̱ NUʼSNGÚÚN EʼWÍÍNʼ

Nadxulú índo̱ nduʼyáá dí a̱ngiu̱lú bi̱ itháan jiáma naguáʼdáá itháan ñajunʼ. (Atayáá kutriga̱ 9.)

9. Náa biʼyaa xkri̱da ma̱ndoo mambáñún a̱ngiu̱lú bi̱ guanii índo̱ eʼwíínʼ guni ñajúnʼ ndrígu̱ún xá.

9 A̱ngiu̱lú bi̱ guanii na̱nguá gíʼmaa makuwá gíná índo̱ eniñanʼ mbáa bi̱ itháan dxámá mu maʼni ñajunʼ ndrígu̱ún. Xúgiáanʼ nduʼyáá dí xúgi̱ itháan gíʼdoo numuu muʼni ñajunʼ dí Jeobá nixnáxulú. Ikha jngó ndayóoʼ maguma ratiin a̱ngiu̱lú bi̱ itháan jiáma. Gundxaʼwamíjna̱ ga̱jma̱a̱ numuu mbá xkri̱da. Mbáa ada̱ ndaʼyoo xóo ejkha̱ kayóo carro anu̱u̱. Índo̱ ikhaa na̱jkha̱ rakhi̱i̱ anu̱u̱ naʼthúu̱n xóo maʼga̱ kayóo carro. Nda̱wa̱á naríyaʼ licencia ga̱jma̱a̱ nagíʼdu̱u̱ na̱jkha̱ kayóo ma̱ngaa. Asndu má  xúʼko̱ anu̱u̱ xóó naxnúu xtágabu. Rígá mbiʼi dí nambáyúu anu̱u̱ maʼga̱ kayóo carro. Mú índo̱ anu̱u̱ nakhi̱i̱, ikhaa najngruigo̱o̱ kayóo itháan. Lá tsénigu̱ʼ anu̱u̱ ga̱jma̱a̱ numuu rígi̱ xá. Na̱nguá. Ikha xtáa gagi numuu rí na̱jkha̱ kayáa asndu náa má. Xúʼko̱ má kayuʼ, a̱ngiu̱lú bi̱ guanii nadxún índo̱ nduyáá dí a̱ngiu̱lú bi̱ itháan jiáma bi̱ niniratiin nundrigú itháan ñajunʼ.

10. Ndiéjunʼ endxa̱ʼwáminaʼ Moisés ga̱jma̱a̱ numuu dí magruigú gamajkhu ga̱jma̱a̱ dí maʼtáñajunʼ rá.

10 Gíʼdoo dí muñeumijnálu mu xákiʼnáanʼ índo̱ eʼwíínʼ nundrigú ñajunʼ. Moisés niniñuʼ mbá májánʼ xkri̱da. Guʼyáá xú káʼnii niʼni a̱jkiu̱ún índo̱ eʼwíínʼ xa̱bekha bi̱ Israel ninimi̱jna̱ xóo gaʼyee (atraxnuu Números 11:26-29). * Josué nindoo maxprígún, mú Moisés niʼthúún: “Nakiʼnán ga̱jma̱a̱ numuʼ ráʼ. Na̱nguá, ¡ikhúúnʼ nandoʼ rí xúgínʼ xa̱bu̱ xuajen mani̱ndxu̱ún gaʼyee, numuu rí Jeobá maʼni rí marigu náa ikhiin xi̱ʼ kaʼwu!”. Moisés ndaʼyoo dí Jeobá naxnúu ikha mbá xúgínʼ. Ikhaa na̱nguá nindoo xúgíʼ gamajkuu ga̱jma̱a̱ dí i̱ndó ikhaa maʼtáñajunʼ. Ikha nindoo dí xúgínʼ xa̱bi̱i̱ Dios mani̱ndxu̱ún gaʼyee. Ikháanʼ rá. Lá nadxulú índo̱ eʼwíinʼ nundrigú ñajunʼ ráʼ.

11. Ndiéjunʼ niʼthí mbáa ndxájulú bi̱ niniñuʼ dí imba̱a̱ maʼni ñajunʼ ndrígóo xá.

11 Mbaʼin a̱ngiu̱lú nini ñajunʼ Jeobá mba̱yu̱ʼ tsiguʼ ga̱jma̱a̱ xúgíʼ tsiakii ndrígu̱ún. Ikhiin niʼniratiin a̱ngiu̱lú bi̱ itháan jiáma mu maguaʼdáá itháan ñajunʼ. Guʼyáá xkri̱da ndrígóo ndxájulú bi̱ mbiʼyuu Peter. Niʼni káxi̱ ñajunʼ Jeobá mbá 74 tsiguʼ, mbá 35 nixtáa niñajunʼ náa mbá sucursal ndrígóo Europa. Mba̱yu̱ʼ tsiguʼ, Peter niyéjkha̱ edxu̱u̱ náa Departamento ndrígóo Servicio. Mú ñajunʼ ndrígóo nixná mbá ndxájulú bi̱ itháan dxámá bi̱ mbiʼyuu Paul. Peter niʼnirataa Paul. Lá nixtáa gíná Peter dí niriʼkhui̱i̱ xáʼ. Na̱nguá. Ikha niʼthí: “Nadxuʼ dí nagumaratiin eʼwíínʼ a̱ngiu̱lú mu maguaʼdáá itháan ñajunʼ ga̱jma̱a̱ dí kuwa runi májánʼ”.

GANGAJULÚʼ KUʼÑÚÚN BI̱ GUANUU

12. Ndiéjunʼ eʼsngúlúʼ xkri̱da ndrígóo Rehoboam rá.

12 Índo̱ nikháñuu rey Salomón, a̱ʼdióo bi̱ mbiʼyuu Rehoboam ni̱jkha̱nú ninindxu̱u̱ rey. Rehoboam nindoo mbaʼyoo xú káʼnii  maʼni ñajunʼ nuxi̱ʼ dí nikána, ikha jngó nindu̱ʼu̱u̱n xtágabu tikhun xa̱bu̱ wanuu. Mú na̱nguá niʼnimbánuu dí nitháán. Itháan niʼnimbánuu xtágabu dí nitháán jiáma bi̱ nikhi̱i̱ gajmíi̱n. Mú ra̱májánʼ dí nirígá nda̱wa̱á (2 Crón. 10:6-11, 19). Ndiéjunʼ eʼsngulú xkridoo xá. Dí itháan májánʼ mundu̱ʼu̱u̱n xtágabu bi̱ itháan guanuu ga̱jma̱a̱ bi̱ najmañún itháan ki xóo ikháánʼ. Ma̱ngaa gíʼmaa muʼdxun dí gúthi ga̱jma̱a̱ gamajkhu. Gajkhun má, rígi̱ na̱nguá eyoo gáʼthi dí bi̱ itháan jiáma gíʼmaa muni ikha kayuʼ xó má eguma nákha ginii. Mú na̱nguá gíʼmaa mundxaʼwamíjna̱ nacha̱ dí xagájnuu májánʼ á mu nuni xó má eni xa̱bu̱ guanuu.

13. Ndiéjunʼ gíʼmaa muni a̱ngiu̱lú bi̱ itháan jiáma índo̱ nuñajunʼ gajmiún a̱ngiu̱lú bi̱ itháan wanii rá.

13 Nguáná a̱ngiu̱lú jiáma guáʼdáá ñajunʼ dí magún ruyaxi ñajunʼ dí nuni a̱ngiu̱lú bi̱ itháan guanuu bi̱ nakru̱ʼu̱u̱n itháan. Májánʼ gáʼni rí a̱ngiu̱lú jiáma majmañún náa a̱ngiu̱lú guanuu. Lá narmáʼáan a̱jkiu̱lú eʼni Paul, bi̱ niʼthá ga̱jma̱a̱ numuu náa kutriga̱ 11 rá. Índo̱ nigruigú ñajunʼ ndrígóo Peter dí mayéʼga edxu̱u̱ náa mbá departamento ndrígóo Betel, niʼthí: “Naríyaʼ mbiʼi mu mathu̱u̱n Peter rí maxnúʼ xtágabu, ga̱jma̱a̱ na̱thu̱u̱n eʼwíínʼ a̱ngiu̱lú dí muni ikháá má”.

Pablo niríyaʼ mbiʼi mú maʼsngóo Timoteo, ga̱jma̱a̱ Timoteo nijmañuu májánʼ

14. Ndiéjunʼ eʼsngulú dí xóo kaʼnii niñajunʼ Timoteo ga̱jma̱a̱ apóstol Pablo rá.

14 Timoteo nidxuu itháan chíʼgíʼ ki xóo apóstol Pablo, mu nájmi̱i̱n niñajunʼ mbóo mba̱yu̱ʼ tsiguʼ (atraxnuu Filipenses 2:20-22). * Mbá míʼtsú, Pablo niʼthún cristianos bi̱ kuwa náa xuajen Corinto: “Nakuʼmáa Timoteo, numuu rí ikhaa nindxu̱u̱ a̱ʼdióoʼ bi̱ nandoʼ ka̱yo̱o̱ ga̱jma̱a̱ nindxu̱u̱ jmbii náa Jesucristo ga̱jma̱a̱ ikhaa maʼtála mu marmáʼáan a̱jkia̱la xóo nisngáa ga̱jma̱a̱ xóo niʼsngáa Jesús, xó má ikhúúnʼ xtáá rasngáa náa mbá xúgíʼ congregación” (1 Cor. 4:17). Ajngáa rígi̱ nasngájma dí Pablo ga̱jma̱a̱ Timoteo numbayumíjná índo̱ nuñajunʼ mbóó. Pablo niríyaʼ mbiʼi mu masngóo Timoteo “xóo niʼsngáa Jesús”, ga̱jma̱a̱ Timoteo niʼni tsiakimínáʼ mu majmañuu májánʼ. Pablo nindoo kaʼyoo wéñuʼ Timoteo ga̱jma̱a̱ ndiʼyoo dí ikhaa mañawu̱u̱n a̱ngiu̱lú bi̱ kuwa náa Corinto. Bi̱ kuya̱ edxu̱u̱ ma̱ndoo mbuyaridáá xkri̱da ndrígóo Pablo índo̱ guniratiin eʼwíínʼ a̱ngiu̱lú mu muyégun edxu̱u̱ náa congregación.

MÁMBÁA DÍ IKHÁANʼ GÍʼDOO MBÁ ÑAJUNʼ DÍ GÍʼDOO NUMUU

15. Xóó káʼnii embáyulú Romanos 12:3-5 índo̱ nuraʼníí mbá dí naxtiʼkhuu rá

15 Kuwáanʼ mbóo mbiʼi dí xátanga̱a̱ marigá. Xuajñu Jeobá dí rígá náa ku̱ba̱ʼ mbaʼa enii xóo ejkha̱ raʼni mba̱a̱. Rígi̱ eyoo gáʼthi dí awan maʼgá raxtiʼkhuu má xúʼko̱, ga̱jma̱a̱ tikhuaʼ maʼniulú mingíjyúuʼ muʼnimbaníí. Ndiéjunʼ gándoo muʼni rá. Xundxa̱ʼwa̱míjna̱ i̱ndó ga̱jma̱a̱ numulúʼ ikháanʼ, iwáá májánʼ dí manindxu̱lúʼ xa̱bu̱ guabaaʼ ga̱jma̱a̱ guʼgíʼ edxu̱lúʼ dí muʼni ñajunʼ ndrígóo Reino. Á mu nuʼni rígi̱, makuwáanʼ mbá jnduʼ. Náa mbá carta, Pablo nithúún cristianos bi̱ nikúwi̱i̱n náa xuajin  Roma: “Nathu̱u̱n mámbáa rí ikháanʼla rí xándxaʼwáminaʼ i̱ndó ga̱jma̱a̱ numuu ikhaa”. Nda̱wa̱á Pablo niʼthí rí xúgíʼ rí gíʼdoo mbá xuwiʼ gíʼdoo mbá ñajúnʼ dí naʼni, xúʼko̱ mambáa bi̱ kuwáanʼ náa congregación guáʼdáá mbá ñajúnʼ dí muʼni (Rom. 12:3-5).

Xúgiáanʼ bi̱ ni̱ndxu̱lú xa̱bi̱i̱ Jeobá nandulúʼ mumbayíí Reino ga̱jma̱a̱ muʼnimbánii rí naxtandu̱ʼu̱lú

16. Ndiéjunʼ gíʼmaa muʼni mámbáa dí ikháanʼ mu makuwáanʼ tsímáá ga̱jma̱a̱ makuwáanʼ mbá jnduʼ náa awúu̱n xuajñunʼ Dios rá.

16 Xúgiáanʼ bi̱ ni̱ndxu̱lú xa̱bi̱i̱ Jeobá nandulúʼ mumbayíí Reino ga̱jma̱a̱ muʼni xúgíʼ dí nda̱yo̱o̱. A̱ngiu̱lú bi̱ guanii ma̱ndoo muniratiin a̱ngiu̱lú bi̱ itháan jiáma. Bi̱ itháan jiáma ma̱ndoo muni mbaʼa ñajunʼ xó má gíʼmaa ga̱jma̱a̱ gamajkhu. Ga̱jma̱a̱ a̱ngiu̱lú bi̱ ninigu̱nʼ nuxnáa numaʼ rí guʼñún numbañún maski ajndu naxtiʼkhuu xóo nakuwa. Xí xúʼko̱ e̱ni̱, nduyaridáá xkri̱da ndrígóo Priscila, mbáa cristiana jmbii bi̱ nimbáyúu má xúʼko̱ ajmbio̱o̱ bi̱ nigumbiʼyuu Áquila (Hech. 18:2).

17. Náa numuu niʼniratiin Jesús discípulos ndrígóo rá.

17 Jesús niniguʼ maʼniratiin má xúʼko̱ iʼwíínʼ, ikha jngó niniñulú xkri̱da rí itháan májánʼ. Ikhaa ndiʼyoo rí eʼwíínʼ gíʼmaa muni ñajunʼ rí niʼnii. Gajkhun má, ikhaa ndiʼyoo rí discípulos ndrígóo ni̱ndxu̱ún xa̱bu̱ aʼkhá. Mú ikhaa ndiʼyoo májánʼ rí magún gutaraʼa mbaʼa xuajin rí ikhaa táʼngo̱o̱ gáʼga (Juan 14:12). Jesús niʼniratiin májánʼ discípulos ndrígóo mu mutaraʼa asndu náa, ga̱jma̱a̱ ninimbánii ñajunʼ rígi̱ (Col. 1:23).

18. a) Dí ñajunʼ gúʼni nda̱wa̱á rá. b) Dí ñajunʼ kuaʼdáá xúgi̱ rá.

18 Nda̱wa̱á, rí Jesús nikháñu, Jeobá niʼniga̱bi̱i̱ ga̱jma̱a̱ nixnúu itháan ñajunʼ. Ma̱ngaa, niʼgíʼ “náa xúgínʼ xa̱bu̱ ñajunʼ ga̱jma̱a̱ tsiakii ga̱jma̱a̱ bi̱ kaʼyoo maʼtáñajunʼ” (Efes. 1:19-21). Á mu nakháñulú jmbu náa Jeobá nákha xóó tséʼkha̱ Armagedón, matangáanʼ makuwáanʼ mbu̱júu̱ náa numbaaʼ nuxi̱ʼ ga̱jma̱a̱ maguaʼdáá wéñuʼ ñajunʼ mitsaan rí muʼni. Mú xúgi̱ guáʼdáá mbá ñajunʼ mitsaan rí muʼtáruʼun xa̱bu̱ ga̱jma̱a̱ muʼni ñajunʼ Dios. Ikha jngó tséʼniuu má xí ni̱ndxu̱lú jiáma o xa̱bu̱ guanii, “gaguaʼdáá má xúʼko̱ rí muni náa ñajunʼ ndrígóo Señor” (1 Cor. 15:58).

^ párr. 3 Salmo 71:18: “Ga̱jma̱a̱ rí xúgi̱ rí nikiu̱u̱n ga̱jma̱a̱ ngiʼxóʼ, oh Dios, xátatsiʼñúnʼ, asndu índo̱ gátá ga̱jma̱a̱ numuu ñawáanʼ náa eʼwíínʼ; xúgínʼ bi̱ gáguwáʼ, ga̱jma̱a̱ numuu tsiakii rí xtaʼdáá”.

^ párr. 8 1 Crónicas 22:5: “Ga̱jma̱a̱ David niʼthí: “A̱ʼdióoʼ Salomón xóó nindxu̱u̱ mbáa dxámá ga̱jma̱a̱ xóó tsíjma̱ñuu, goʼwóo Jeobá gíʼmaa maʼni mitsaan wéñuʼ ga̱jma̱a̱ majmaʼnuʼ náa xúgíʼ xuajen numuu dí ra̱ʼkhá tháán mitsaan. Ikha jngó maniratoo”. Ikhú David niʼniratoo mbaʼa rí majmaa nákha xóó tsikháñuu”.

^ párr. 10 Números 11:26-29: “Nikuwa a̱jmi̱i̱n xa̱bekha bi̱ niguanún náa campamento. Mbáa nigumbiʼyuu Eldad, ga̱jma̱a̱ imba̱a̱ nigumbiʼyuu Medad. Ga̱jma̱a̱ xi̱ʼ kaʼwu nirigu náa ikhiin, numuu rí mbiʼñún mangiin nigumaraʼmáʼ mu táguun náa guʼwá xtíin. Ikha jngó nigi̱ʼdi̱i̱ nini xóo gaʼyee náa campamento. Ga̱jma̱a̱ mbáa dxámá ni̱jkha̱ ragáyúu mu maʼthúu̱n Moisés: “¡Eldad ga̱jma̱a̱ Medad kuwa runi xóo gaʼyee náa campamento!”. Ikhú Josué a̱ʼdióo Nun, bi̱ nambáyúu Moisés asndu nákha dxámá, niriʼña ga̱jma̱a̱ niʼthí: “¡Tátá, Moisés, atrikhún!”. Mú, Moisés niʼthúu̱n: “Nakiʼnán ga̱jma̱a̱ numuʼ ráʼ. Na̱nguá, ¡ikhúúnʼ nandoʼ rí xúgínʼ xa̱bu̱ xuajen mani̱ndxu̱ún gaʼyee, numuu rí Jeobá maʼni rí marigu náa ikhiin xi̱ʼ kaʼwu!”.”

^ párr. 14 Filipenses 2:20-22: “Numuu rí na̱nguá gúʼdaa imba̱a̱ xóo ikhaa, bi̱ gajkhun naxmiéjunʼ kaʼyala. Numuu rí eʼwíínʼ i̱ndó nduyááʼ rí nandún ikhiin, raʼkháa rí nandoo Cristo Jesús. Mú ikháanʼla ndu̱ya̱a̱ má rí ikhaa nixnáximinaʼ, xó má mbáa ada̱ ga̱jma̱a̱ anu̱u̱ niñajunʼ ga̱jma̱á ni̱ndxu̱ʼ mu maʼga̱ rajoo ajngáa rí májánʼ”.