Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (rí muʼnigajmaa)  |  Abril tsiguʼ 2016

 HISTORIA NDRÍGÓO XA̱BU̱

Ninindxu̱ún monjas mu xúgi̱ ni̱ndxu̱ún a̱ngiu̱lú

Ninindxu̱ún monjas mu xúgi̱ ni̱ndxu̱ún a̱ngiu̱lú

NIʼNI má mba̱yu̱ʼ tsiguʼ, giʼtioʼ nindxaʼwájmun niʼthúunʼ: “Ní xárathu̱nʼ. Tsíyóóʼ gádxuun ga̱jma̱a̱ numuu religión ndrígáʼ. Asndu nandoʼ gáxi̱ʼ índo̱ narathúnʼ. ¡Tsíyóóʼ gáyáaʼ nditháan!”. Maski ajndu gúʼdoo má 91 tsiguʼ, xóó narmáʼáan a̱jkiu̱nʼ rí niʼthúunʼ. Ra̱ʼkhá tháán nigawúnʼ dí niʼthí. Mú xó má eʼthí Eclesiastés 7:8, “itháan májánʼ índo̱ naguámbáa ki xóo índo̱ nagi̱ʼdu̱u̱” (Felisa).

Felisa: Ndiju̱u̱n náa España náa mbá guʼwíin bi̱ ni̱ndxu̱ún católico. Mbá gu̱wa̱ʼ ijtsi̱i̱n bi̱ ku̱ñu̱u̱nxu ninindxu̱ún ndxajkun o niñajunʼ náa guʼwá ndxajkun. Mbáa rí ikhiin ninindxu̱u̱ primo ndrígóo ru̱dúʼ ga̱jma̱a̱ niʼsngáa náa mbá escuela católica. Índo̱ nikháñu, papa Juan Pablo II niʼthí rí ninindxu̱u̱ májáánʼ xa̱bu̱ ga̱jma̱a̱ ma̱ndoo mbiʼyamajkuíí. Mbá guʼwáanʼxu nini̱ndxu̱xu̱ʼ migínáanʼ. Anu̱ʼ niñajunʼ náa mbá fábrica ndrígóo ajua̱nʼ ga̱jma̱a̱ ru̱dúʼ niñajunʼ náa xaná. Ikhúúnʼ ninindxu̱ʼ bi̱ giʼnii náa mbá migiñinʼ e̱ji̱n.

Índo̱ ikhúúnʼ gúʼdoo 12 tsiguʼ, nigi̱ʼdu̱u̱ mbá guerra náa España. Nda̱wa̱á rí nijngoo, Xa̱bu̱ Ñajunʼ nixuda̱ʼ anu̱ʼ náa guʼwá e̱jua̱nʼ ga̱jma̱a̱ numuu ku̱ma̱ dí gíʼdoo náa política. Ru̱dúʼ niʼniuu mingíjyúuʼ maxniʼtsuxu xúgiáanʼ. Ikha jngó nikuʼmiin ajtsíin guaʼthi̱nʼ náa mbá convento dí rígá náa xuajen Bilbao. Ikhí, Araceli, Lauri ga̱jma̱a̱ Ramoni maguaʼdáá má xúʼko̱ rí mu̱phu̱.

Araceli: Índo̱ nixuʼmáanʼxu náa mbá convento, ikhúúnʼ gúʼdoo 14 tsiguʼ, Lauri nigiʼdoo 12 ga̱jma̱a̱ Ramoni nigiʼdoo 10. Ikhí monjas nituxu rí muni kaʼwi̱i̱. A̱jma̱ tsiguʼ nda̱wa̱á nixuʼmáanʼxu náa mbá convento rí itháan mba̱a̱ náa Zaragoza, náa nuña̱wu̱u̱n xa̱bu̱ guanii. Ndiyóoʼ muni kaʼwi̱i̱xu cocina ga̱jma̱a̱ ra̱ʼkhá tháán niʼni néʼnguxu, ma̱ngaa ndiʼñíinʼxu wéñuʼ bi̱ kuwa náa guʼwúxu.

Felisa: Índo̱ guaʼthi̱nʼ nigún náa Zaragoza, ru̱dúʼ ga̱jma̱a̱ amuʼ nixuʼmún maʼgá gajmíi̱nʼ guaʼthi̱nʼ náa convento. Amuʼ ninindxu̱u̱ ndxajkun. Ikhaa ga̱jma̱a̱ ru̱dúʼ nindúún rí xambáxuʼ ga̱jmu̱ʼ mbáa dxámá bi̱ nindoo kaʼyoʼ. Niniguʼ maxtáá nguáthá  mbiʼi náa mbá convento, numuu rí nindoʼ ka̱yo̱o̱ Dios. Nijkhá misa xúgíʼ mbiʼi ga̱jma̱a̱ asndu nindoʼ mani̱ndxu̱ʼ misionera, xóo mbáa primo ndrígóʼ bi̱ xtáa náa África.

Ñawun xti̱yaaʼ: Covento ndrígóo Zaragoza (España). Ñawun májáánʼ: Biblia Nacar-Colunga

Náa convento táxtáá májánʼ numuu rí na̱nguá endoo mani xóo rí nindxa̱ʼwa̱mínáʼ. Monjas na̱nguá nithu̱nʼ maʼgá i̱mba̱ xuajen mu mani ñajunʼ Dios xóo ikhúúnʼ nindoʼ. Ikha jngó mbá tsiguʼ nda̱wa̱á nitangu̱u̱n náa goʼwóoʼ mu mañewu̱u̱n amuʼ, bi̱ ninindxu̱u̱ ndxajkun. Ikhúúnʼ nini ñajunʼ rí ndayóoʼ náa guʼwáá, ga̱jma̱a̱ xúgíʼ wakhííʼ nunixu rosario. Niniguʼ wéñuʼ mani ratoo ri̱ʼi̱ rí majmaa náa guʼwá ndxajkun ga̱jma̱a̱ mariʼkhu̱u̱ xtíñún xándú ma̱ngaa santos.

Araceli: Mu maʼgánú mani̱ndxu̱ʼ monja ndiyóoʼ mani mbaʼa voto kiejunʼ. Ginii nini náa Zaragoza. Mú nda̱wa̱á monjas niriʼkhuáanʼxu. Lauri ni̱jkha̱ náa convento dí rígá náa Valencia, Ramoni niguanúu náa Zaragoza, ga̱jma̱a̱ ikhúúnʼ ni̱jkhá náa Madrid. Ikhí nini rí maʼni raga̱jma̱ votos mu mani̱ndxu̱ʼ monja. Náa convento ndrígóo Madrid naguanún mbaʼin bi̱ nunigajmaa ma̱ngaa xa̱bu̱ guanii, ikha jngó rígá wéñuʼ ñajunʼ. Ikhúúnʼ niñajunʼ náa hospital ndrígóo convento.

Nákha xóó tsínindxu̱ʼ monja, nikumuʼ rí magúxnuu wéñuʼ ga̱jma̱a̱ rí manigajmaa Biblia. Mú rí nixtáá náa convento niʼni maxtáá gíná wéñuʼ. Ikhí na̱nguá eraxnuxu Biblia ga̱jma̱a̱ tsetaxu ga̱jma̱a̱ numuu Dios o Jesús. Nijmañuʼ lájuíin latín, ninigajmaa xóo nikuwa católicos bi̱ ninindxu̱ún santos ga̱jma̱a̱ ndiyamájkhu María. Mú rí itháan ninixu ninindxu̱u̱ rí muñajunʼxu.

Ra̱ʼkhá tháán nixmiéjunʼ wéñuʼ. Nindxa̱ʼwa̱mínáʼ rí gíʼmaa mada̱ʼ mbújkha̱a̱ mu mambáñun bi̱ kuwa náa guʼwóoʼ raʼkháa rí mañajunʼ náa convento mú eʼwíínʼ maguaʼdáá itháan mbújkha̱a̱. Ikha jngó nitamíjná ga̱jmu̱ʼ a̱ʼgu̱ bi̱ kayá edxu̱u̱ ga̱jma̱a̱ ni̱thu̱u̱n rí nandoʼ maʼgáaʼ. Ikhaa niruguarúʼún náa mbá celda nikumu̱u̱ rí xúʼko̱ mariʼkhu̱u̱ xóo endxa̱ʼo̱o̱ edxu̱ʼ.

Monjas niniñuʼ magajnáaʼ, mú índo̱ ndiyáá rí xóó nandoʼ maʼgáaʼ niruguarúʼún mbu̱júu̱ʼ. Nini xúʼko̱ mbá ajtsú ikhoo. Ikhú nithu̱nʼ rí ma̱ndoo maʼgáaʼ á mu naniraʼmáʼ rígi̱: “Maʼgáaʼ numuu rí nandoʼ mani ñajunʼ Satanás raʼkháa Dios”. Tándoo gánimboʼ. Ikhúúnʼ nindoʼ maʼgáaʼ, mú nditháan xániraʼmáʼ xúʼko̱ káʼnii. Ikha jngó ni̱thu̱u̱n rí nandoʼ matamíjná ga̱jmu̱ʼ ndxajkun. Ni̱thu̱u̱n xúgíʼ, ga̱jma̱a̱ ikhaa ndiyáaʼ mbá permiso ndrígóo obispo mu matangaán náa convento ndrígóo Zaragoza. Ikhí nixtáá nguátha igu̱nʼ asndu índo̱ niniñuʼ maʼgáaʼ. Mú nda̱wa̱á, Lauri ga̱jma̱a̱ Ramoni mangiin niniñanʼ convento.

 MBÁ LIBRO NARKUIJÑAʼXU

Felisa

Felisa: Nda̱wa̱á ninujúnʼ ga̱jma̱a̱ ni̱jkhá gáxtáá náa xuajen Cantabria ndrígóo España. Ikhí ni̱jkhá xóó misa xúgíʼ xmáná. Mbá domingo, ndxajkun niriyaʼ libro La verdad que lleva a vida eterna. Nikiʼnáa wéñuʼ, niʼthúxu á mu rí mbáa rí ikháanʼxu gíʼdoo libro rúʼko̱ muxna̱a̱xu ikhaa o muʼdaʼxu náa náska.

Ikhúúnʼ na̱nguá gúʼdóʼ libro rúʼko̱ mu nindoʼ magúʼdoo mbóʼ. Nguáthá mbiʼi nda̱wa̱á, a̱jmi̱i̱n gu̱ʼu̱ bi̱ nutaraʼa numuu Jeobá niguáʼnu náa guʼwóoʼ ga̱jma̱a̱ nixnuʼ libro. Nigúxnuu má mbruʼun rúʼko̱. Índo̱ gu̱ʼu̱ nitangi̱i̱n, nithi rí musngóoʼ ga̱jma̱a̱ numuu Biblia, ga̱jma̱a̱ ikhúúnʼ ni̱thu̱u̱n rí ma̱ndoo.

Libro La verdad

Ikhúúnʼ nandoʼ mani má xúʼko̱ rí nandoo Dios. Ikha jngó índo̱ nijmañuʼ ga̱jma̱a̱ numuu Jeobá, ra̱ʼkhá tháán nindoʼ ka̱yo̱o̱. Nindoʼ mathu̱u̱n xúgínʼ xa̱bu̱ ga̱jma̱a̱ numuu ikhaa. Nijngúnʼ iyááʼ nákha tsiguʼ 1973. Mámbá índo̱ nandoo, nataruʼun bi̱ ka̱ñu̱u̱n. Mú xúgínʼ nuthu̱nʼ dí na̱nguá e̱yo̱o̱ rí etha, mú itháan ndxájuʼ Araceli.

Araceli: Numuu dí ra̱ʼkhá tháán nini gínuun náa convento, nikiʼnún wéñuʼ ga̱jma̱a̱ taʼndoʼ gáyóo religión ndrígóʼ. Maski ajndu xúʼko̱, na̱jkhá má xúʼko̱ misa mámbá domingo ga̱jma̱a̱ nani rosario xúgíʼ mbiʼi. Mú xóó nandoʼ makro̱ʼo̱ʼ rí naʼthí náa Biblia, ga̱jma̱a̱ nindo̱ʼo̱o̱ Dios rí mambáyuʼ. Mbá mbiʼi, Felisa niʼthúunʼ ga̱jma̱a̱ numuu rí xtáa rajmañuu. Mú ikhúúnʼ tániguʼ rí niʼthí. Ra̱ʼkhá tháán edxuu rí asndu nikumuʼ rí na̱nguá eʼyoo rí eʼni.

Araceli

Nda̱wa̱á nitangaán náa Madrid mú mañajunʼ. Ikhí ninujúnʼ. Mba̱yu̱ʼ tsiguʼ nda̱wa̱á ndi̱yo̱o̱ rí xa̱bu̱ bi̱ nagún má xúʼko̱ náa guʼwá ndxajkun, na̱nguá kuwa xóo niʼsngáa Jesús. Ikha jngó niniʼñúʼ ra̱jkhá náa guʼwá ndxajkun ga̱jma̱a̱ niniñuʼ rathu̱u̱n ndxajkun rí nini. Niniʼñúʼ raku̱mu̱ʼ ka̱ñu̱u̱n santos ga̱jma̱a̱ rí mikháán náa aguʼ. Asndu nixidíin xúgínʼ xándú bi̱ nigúʼdiin. Mú na̱nguá e̱yo̱o̱ á mu xtáá rani̱ dí májánʼ, mú nani numuu rí nigawúnʼ wéñuʼ. Na̱thu̱u̱n Dios: “Nandoʼ maniʼníinʼ, ¡atambáyuʼ!”. Narmáʼáan a̱jkiu̱nʼ rí bi̱ nutaráʼa numuu Jeobá nidi̱i̱ xkrugua ndrígóʼ mbaʼa nuthu, mú nditháan tarmbáʼtoo. Nánguá ku̱mu̱ʼ ka̱yo̱o̱ nimbá religión.

 Lauri nixtáa náa Francia, Ramoni náa España. Mijngii rí tsiguʼ 1980 ikhiin nigi̱ʼdi̱i̱ runigajmaa Biblia gajmiún bi̱ nutaraʼa numuu Jeobá. Ikhúúnʼ nikumuʼ rí kúwi̱i̱n ikhaa kayuʼ xó má Felisa ga̱jma̱a̱ rí kuwa runiduwiinʼ. Nda̱wa̱á nimbáxuʼ ga̱jmu̱ʼ mbáa bi̱ xtáa mijngii náa goʼwóoʼ bi̱ mbiʼyuu Angelines, ma̱ngaa nindxu̱u̱ bi̱ nataráʼa numuu Jeobá. Mbaʼa nuthu, ikhaa ga̱jma̱a̱ ajmbio̱o̱ niraxuʼ á mu nandoʼ majmañuʼ dí na̱ʼkha̱ raʼthí náa Biblia. Ikhúúnʼ ni̱thu̱u̱n rí tsíyóóʼ gáyóo religión. Mú ikhiin ndiyáá rí naxmiéjunʼ eʼni Biblia. Ni̱jkha̱nú mbá mbiʼi rí ni̱thu̱u̱n rí manigajmaa gajmíi̱nʼ i̱ndó á mu ma̱ndoo majmuʼ Biblia ndrígóʼ, rí mbiʼyuu Nácar-Colunga.

BIBLIA NAʼNI RÍ MAKUWÁANʼXU JNDUʼ

Felisa: Índo̱ nijngúnʼ iyááʼ nákha tsiguʼ 1973, nikúwi̱i̱n mbá 70 bi̱ nutaráʼa numuu Jeobá náa Santander, náa capital ndrígóo Cantabria. Náa xuajen rúʼko̱ rígá mbaʼa wéñuʼ xuajen ma̱jkha̱ʼ. Mu mutarúʼunxu xúgínʼ xa̱bu̱, ndiyóoʼ mu̱ʼguáxu ga̱jma̱a̱ autobús mitsínguánʼ. Nda̱wa̱á ni̱jkuáxu̱ ga̱jma̱a̱ carro.

Xúgíʼ tsiguʼ rígi̱ nisngúún mbaʼin wéñuʼ xa̱bu̱ ga̱jma̱a̱ numuu Biblia. Mbaʼin rí ikhiin ninindxu̱ún católicos, ga̱jma̱a̱ mbá 11 niguáʼnu nijngún iyááʼ. Ndiyóoʼ maʼngo̱o̱ wéñuʼ a̱jkiu̱nʼ. Xó má nigíʼnuʼ ikhúúnʼ, ndiyóoʼ mbiʼi mu mbuyáá rí kuwa runi mbá dí raʼkhí. Ikhúúnʼ ndi̱yo̱o̱ rí i̱ndó Biblia ga̱jma̱a̱ xi̱ʼ kaʼwu ma̱ndoo mambáyúu mbáa mariʼkuminaʼ ga̱jma̱a̱ makro̱ʼo̱o̱ rí gajkhun (Heb. 4:12). Ajmbioʼ ninindxu̱u̱ policía ga̱jma̱a̱ nijngúun iyááʼ tsiguʼ 1979. Ga̱jma̱a̱ ru̱dúʼ nigíʼdu̱u̱ ranigajmaa Biblia nákha inuu makhañúu.

Araceli: Índo̱ nigíʼdu̱u̱ ranigajmaa Biblia gajmíi̱nʼ Testigos, tánimboʼ ka̱ñu̱u̱n. Mú nda̱wa̱á ninimboʼ numuu rí nunimbaníí rí nusngáa. Fe rí nigúʼdoo náa Jeobá ga̱jma̱a̱ náa Biblia niʼni itháan gujkhuʼ ga̱jma̱a̱ nixtáá itháan gagi. Tikhun bi̱ kuwa mijngii náa xtáá ndiyáá rí niriʼkuminaʼ ga̱jma̱a̱ nithu̱nʼ: “Araceli, ayuʼ má xúʼko̱ náa kamba̱a̱ rí nitraʼwíí”.

Narmáʼáan a̱jkiu̱nʼ rí ikhúúnʼ ni̱thu̱u̱n Jeobá: “Núma̱aʼ numuu rí na̱nguá nitatsíñúnʼ ga̱jma̱a̱ nitani̱ rí mbaʼa nuthu maxkamaa rí ndaʼyaaʼ: Rí phú gajkhun ga̱jma̱a̱ numuu Biblia”. Ma̱ngaa, nindo̱ʼo̱o̱ Felisa rí maʼni mba̱a̱ a̱jkiu̱nʼ kaʼyoʼ ga̱jma̱a̱ numuu rí ni̱thu̱u̱n. Asndu nákha ikhú nánguá gi̱ʼdu̱xu, rí xúgi̱ naniguxu mutamíjna̱ ga̱jma̱a̱ numuu Biblia. Nijngúnʼ iyááʼ nákha tsiguʼ 1989, índo̱ gúʼdoo 61 tsiguʼ.

Felisa: Rí xúgi̱ gúʼdoo 91 tsiguʼ ga̱jma̱a̱ ni̱ndxu̱ʼ a̱ʼgú xuáʼa̱. Nánguá eʼngoʼ mani xóo nakha ginii, mú nagúxnuu Biblia xúgíʼ mbiʼi. Ga̱jma̱a̱ naniminaʼ maʼgá má xúʼko̱ reunión ma̱ngaa nagájnuʼ gátaráʼa.

Araceli: Naniguʼ mathu̱u̱n ga̱jma̱a̱ numuu Jeobá ndxajkun ga̱jma̱a̱ monja, mbáa numuu rí ikhúúnʼ ninindxu̱ʼ monja. Nitamíjna̱ májánʼ wéñuʼ gajmíi̱nʼ mbaʼin rí ikhiin. Mbaʼin nindrigú libro ga̱jma̱a̱ revista. Narmáʼáan a̱jkiu̱nʼ eʼne mbáa ndxajkun bi̱ ni̱thu̱u̱n mbaʼa ikhoo. Mbá mbiʼi niʼthúunʼ rí naʼnimbo̱o̱ xúgíʼ rí na̱thu̱u̱n. Mú niʼthúunʼ: “Náa gáʼgá ikhúúnʼ rí nikiu̱u̱n má rá. Ndiéjunʼ guthi eʼwíínʼ ndxajkun ga̱jma̱a̱ bi̱ kuwa náa guʼwóoʼ rá.” Ikhúúnʼ ni̱thu̱u̱n: “Mú ndiéjunʼ gáʼthi Dios rá.” Ndi̱yo̱o̱ rí nixtáa gíná índo̱ ndiʼyoo rí ikhúúnʼ natha rí gajkhun. Mú mbáa ikhaa nimiñuu mariʼkuminaʼ.

Nditháan xambumuʼ mbiʼi rí ajmbioʼ niʼthúunʼ rí nandoo maʼga̱ náa guʼwá nagimbáanʼ ga̱jma̱á ni̱ndxu̱ʼ. Nigiʼdoo itháan rí 80 tsiguʼ índo̱ ni̱jkha̱ timbá aʼphu̱ reunión, ga̱jma̱a̱ nda̱wa̱á nánguá nindáti̱go̱o̱ nimbá. Niʼnigajmaa̱ Biblia ga̱jma̱a̱ nigíʼdu̱u̱ raʼtáraʼa. Gúʼdoo mbaʼa rí naʼni marmáʼáan a̱jkiu̱nʼ índo̱ rí ni̱jkuáxu gutaraʼa mbóó. Nikháñu a̱jma̱ igu̱nʼ nákha xóó tséjngúun iyááʼ.

Felisa: Índo̱ nigíʼdu̱u̱ rani̱ ñajunʼ Jeobá, ajtsíin guaʼthi̱i̱n nikiʼníin. Mú nda̱wa̱á ikhiin mangiin ninindxu̱ún xa̱bi̱i̱ Jeobá. Rígi̱ ninindxu̱u̱ rí itháan májánʼ rí nigíʼnuʼ xúgíʼ mbiʼi rí nixtáá. Rí xúgíʼ nandoo nakuwaanʼxu mbóó ga̱jma̱a̱ mutaxu numuu Dios ndrígúxu̱ ma̱ngaa numuu Ajngá rawunʼ. Asndu ndiʼkhún nandoo nduyamajkuííxu Jeobá mbá jnduʼ. *

^ párr. 29 Ramoni gíʼdoo 83 tsiguʼ, Felisa 91 ga̱jma̱a̱ Araceli 87. Nájtsíin kuwa runi xóó ñajunʼ Jeobá ga̱jma̱a̱ gagi. Lauri nikháñu jmbu náa Jeobá nákha tsiguʼ 1990.