Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (rí muʼnigajmaa)  |  Abril tsiguʼ 2016

Muguajún jmbu náa Jeobá raʼkháa náa numbaaʼ rígi̱

Muguajún jmbu náa Jeobá raʼkháa náa numbaaʼ rígi̱

“Guxnala Dios ri drigo-ma Dios” (MATEO 22:21).

AJMÚÚ 33 GA̱JMA̱A̱ 137

1. Xú káʼnii gándoo muʼnimbulúʼ kuʼyáá Dios ga̱jma̱a̱ Xa̱bu̱ Ñajunʼ rá.

NÁA Biblia naʼsngáa rí gíʼmaa muʼnimbulúʼ kuʼñúún Xa̱bu̱ Ñajunʼ. Mú ma̱ngaa naʼsngáa rí gíʼmaa muʼnimbulúʼ kuʼyáá má xúʼko̱ Dios (Hech. 5:29; Tito 3:1). Xú káʼnii gándoo muʼni rígi̱ rá. Náa Biblia na̱ʼkha̱ mbá ikha rí ma̱ndoo mambáyulúʼ. Jesús niʼthí: “Guxnala César ri drigo-ma César, jame guxnala Dios ri drigo-ma Dios” (Mat. 22:21) [1] (atayáá nota rí na̱ʼkha̱ náa námbá artículo). Xú káʼnii exnáá “César ri drigo-ma César” rá. Índo̱ nuʼnimbulúʼ xtángoo ndrígóo Xa̱bu̱ Ñajunʼ, índo̱ nduʼyamajkhún ga̱jma̱a̱ índo̱ nuʼni numáá impuestos (Rom. 13:7). Mú, á mu Xa̱bu̱ Ñajunʼ nuthulú muʼni mbá rí tsénigu̱ʼ Dios rá. Ikhú rí tséʼnimbulú. Mú, nduʼyamajkhún má xúʼko̱.

2. Ndiéjunʼ eyoo gáʼthúu̱n rí xúxuʼdámíjná náa política rá.

2 Mbá rí xóo ma̱ndoo muʼni numáá “Dios ri drigo-ma Dios” nindxu̱u̱ rí xúxuʼdámíjná náa política. Nandoo gáʼthúu̱n rí tsejkualú kidxuuʼ nimbáa político (Is. 2:4). Xú káʼnii esngajmálú rígi̱ rá. Índo̱ nuʼnimbulúʼ kuʼñúún Xa̱bu̱ Ñajunʼ, numuu  rí nduʼyáá rí Jeobá naniñúnʼ makuwá. Ma̱ngaa tséʼni nimbá rí maʼni makujmaa rí xuajñulú nindxu̱u̱ itháan májánʼ (Rom. 13:1, 2). Nditháan tséʼni rí muriʼkhui̱i̱ mbáa Xa̱bu̱ Ñajunʼ ni má tséʼthuun rí muni político. Ma̱ngaa tséʼni votar ni má tsenindxu̱lú político.

3. Náa numuu rí gíʼmaa muguajún jmbu rá.

3 Náa numuu rí Dios nandoo rí muʼni rí jmbu rá. Rígá ajtsú numuu. Timbá, numuu rí nduʼyaridáá Jesús. Ikhaa niʼthí: “Raʼka xabi numba ñajunʼ Ikun”. Ikha jngó nimbá miʼtsú takudaminaʼ náa política ni má táʼga náa guerra (Juan 6:15; 17:16). Raga̱jma̱, gíʼmaa muguajún jmbu numuu rí i̱ndó numbaʼyíí Reino ndrígóo Dios. Á mu numbayíí mbáa Xa̱bu̱ Ñajunʼ, xú káʼnii gándoo gúʼthán mbáa xa̱bu̱ rí i̱ndó Xa̱bu̱ Ñajunʼ ndrígóo Dios maʼnimbánuu xkujndu ndrígúlú rá. Ragajtsú, gíʼmaa muguajúnlú jmbu numuu rí xúʼko̱ kuwáanʼ mbá kambáxulú gajmiúlú a̱ngiu̱lú náa xúgíʼ numbaaʼ. Religión dí ragájkhun naʼni markuájinʼ xa̱bu̱ numuu rí nuxuda̱mi̱jna̱ náa política (1 Ped. 2:17).

4. a) Xú káʼnii eʼyáá rí nda̱wa̱á maʼni itháan mingíjyúuʼ muguajún jmbu rá. b) Xú káʼnii gíʼmaa muʼniratamijná xúgi̱ mu muguajún jmbu rá.

4 Mbáa kuwáanʼ náa xuajin náa xa̱bu̱ tseguaʼthi̱i̱n rí mumbayíí mbáa político. Mú índo̱ na̱jkha̱ rajngiyuu mbiʼi rí mambáa numbaaʼ ndrígóo Satanás, maʼni itháan mingíjyúuʼ muguajún jmbu. Xó má eʼthí náa 2 Timoteo 3:3, 4, xa̱bu̱ rí mbiʼi xúgi̱ tsedxawíín ga̱jma̱a̱ “xaʼndún gunimbaníí xkujndu”. Ga̱jma̱a̱ mámbá mbiʼi murkuajimíjná itháan. Ma̱ngaa mbáa maxtiʼkhuu nacha̱ rí nuni políticos asndu xú káʼnii xuajin. Rígi̱ nirígá má náa tikhuu xuajen, ga̱jma̱a̱ a̱ngiu̱lú nuraʼníí xkujndu gakhii wéñuʼ. Ikha jngó ndayóoʼ muʼniratamijná xúgi̱ mu muguajún jmbu asndu náa xkujndu rí itháan mingíjyúuʼ. Guʼyáá a̱jkhu̱ enii rí ma̱ndoo muʼni mu muʼniratamijná.

GUʼÑÚN XA̱BU̱ ÑAJUNʼ XÓO EʼÑÚN JEOBÁ

5. Xú káʼnii eʼñún Jeobá Xa̱bu̱ Ñajunʼ rá.

5 Mbá rí mambáyulúʼ muʼniratamijná xúgi̱ mu muguajún jmbu nindxu̱u̱ rí mbuʼñún Xa̱bu̱ Ñajunʼ xóo eʼñún Jeobá. Ikha tsegruiguíin Xa̱bu̱ Ñajunʼ bugi̱ numuu rí índo̱ niʼnii xa̱bu̱ numbaaʼ, táʼniuu mu mutañajúún’ eʼwíínʼ (Jer. 10:23). Mú Jeobá ndaʼñún xúgínʼ xa̱bu̱ xóo mbá guʼwíin. Mú Xa̱bu̱ Ñajunʼ nurkuajinʼ xa̱bu̱ índo̱ nuthi rí xuajñún nindxu̱u̱ itháan májánʼ. Ga̱jma̱a̱ maski ajndu tikhun Xa̱bu̱ Ñajunʼ nugímijna muni rí májánʼ, tséʼngu̱u̱n gunimbaníí xúgíʼ xkujndu ndrígúlú. Ma̱ngaa, ikhiin ñajúnʼ xa̱bu̱ sia̱nʼ náa Reino ndrígóo Dios, bi̱ nigíʼdu̱u̱ niʼtáñajunʼ tsiguʼ 1914. Inuu má, Xa̱bu̱ Ñajunʼ ndrígóo Dios maʼni gámbíin xúgínʼ Xa̱bu̱ Ñajunʼ bi̱ kuwa náa numbaaʼ rígi̱ (atraxnuu Salmo 2:2, 9). *

6. Xú káʼnii gíʼmaa muʼniu̱u̱n Xa̱bu̱ Ñajunʼ rá.

6 Dios naniñúnʼ rí Xa̱bu̱ Ñajunʼ makuwá numuu rí nuyambáá mu makuwá tsímáá xa̱bu̱ ga̱jma̱a̱ marigá mbá májánʼ awan. Rígi̱ nambáyulúʼ mu muʼtáraʼa ajngáa ndrígóo Reino (Rom. 13:3, 4). Jeobá asndu naʼthúlúʼ rí muʼtájkáan ga̱jma̱a̱ numún Xa̱bu̱ Ñajunʼ, mu ma̱ndoo  mbuʼyamajkuíí tsímáá (1 Tim. 2:1, 2). Á mu mbáa naʼniulú dí raʼkhí, ma̱ndoo munda̱ʼa̱a̱ Xa̱bu̱ Ñajunʼ rí mambáyulúʼ, xó má niʼni apóstol Pablo (Hech. 25:11). Ga̱jma̱a̱ maski ajndu náa Biblia naʼthí rí Satanás xtáa raʼtáñajúúnʼ Xa̱bu̱ Ñajunʼ, mú tséʼthi rí ikhaa xtáa raʼtáñajunʼ mámbáa (Luc. 4:5, 6). Ikha jngó ragíʼmaa muʼthá rí Satanás xtáa raʼtáñajunʼ mbáa xa̱bu̱ bi̱ nañajunʼ náa Xa̱bu̱ Ñajunʼ. Náa Biblia naʼthí dí ragíʼmaa muʼthá dí ra̱májánʼ ga̱jma̱a̱ numún Xa̱bu̱ Ñajunʼ ní má rí xuʼyamajkhún (Tito 3:1, 2).

7. Ndiéjunʼ dí ragíʼmaa mundxaʼwamíjna̱ rá.

7 Numuu rí nandulúʼ muʼnimbulúʼ kuʼyáá Dios, nani̱ndxu̱lú jmbii ga̱jma̱a̱ na̱nguá embaʼyíí nimbáa político o mbá grupo político. Rígi̱ ma̱ndoo maʼni mingíjyúuʼ, itháan á mu rí ku̱ma̱ ndrígu̱ún o mbá rí nandún muni ma̱ndoo mambáyulúʼ. Mbá xkri̱da, gundxaʼwamíjna̱ rí náa kuwáanʼ xa̱bu̱ nánguá enimbu̱ún kuyáá Xa̱bu̱ Ñajunʼ numuu rí niʼni mumíniiʼ wéñuʼ. Mbáa ma̱ngaa Xa̱bu̱ Ñajunʼ buʼko̱ niʼni gíníi xa̱bi̱i̱ Jeobá. Ndiéjunʼ gúʼni rá. Ikháanʼ xumbaʼñún. Mú, lá náa awúu̱n a̱jkiu̱lú maʼndulú rí ikhiin maʼngu̱u̱n xáʼ. (Efes. 2:2.) Á mu nandulúʼ muguajún jmbu, gíʼmaa muñewa̱a̱n rí nuʼthá ga̱jma̱a̱ rí nuʼni. Mú ma̱ngaa gíʼdoo wéñuʼ numuu rí xúndxaʼwamíjna̱ rí mbáa rí ikhiin ndaʼyoo rí eʼni o rí nindxu̱u̱ itháan májáánʼ ki xóo imba̱a̱.

GANINDXULÚ WIPIÁANʼ MA̱NGAA BI̱ NDA̱A̱ AʼKHÚUN

8. Nguáná ganindxu̱u̱ mingíjyúuʼ muguajún jmbu, mú xú káʼnii gándoo maʼni wipiáanʼ mú ma̱ngaa rí xáguáʼdáá aʼkhúlúʼ rá.

8 Raga̱jma̱ enii rí xóo muʼniratamijná mu muguajún jmbu nindxu̱u̱ rí manindxu̱lúʼ ‹wipiáanʼlu xóo wipiin abuʼ› mú ma̱ngaa xóo ‹palomas bi̱ nda̱a̱ aʼkhúún› (atraxnuu Mateo 10:16, 17). Xú káʼnii gándoo gáʼni wipiáanʼlu rá. Gundxa̱ʼwámi̱jna̱ náa xkujndu mingíjyúuʼ rí ma̱ndoo muraʼníí. Mú xú káʼnii gándoo muʼni rí xáguáʼdáá aʼkhúlúʼ rá. Rí muguajún jmbu náa xkujndu rí mingíjyúuʼ. Guʼyáá tikhuu rígi̱ ga̱jma̱a̱ rí mambáyulúʼ mu muguajún jmbu.

9. Xú káʼnii gándoo muñewa̱a̱n rí nuʼthúún eʼwíínʼ rá.

9 Índo̱ nuʼtámíjná gajmiúlú eʼwíínʼ xa̱bu̱. Gíʼmaa muñeumíjna̱ wéñuʼ índo̱ xa̱bu̱ nugíʼdi̱i̱

nuthi ga̱jma̱a̱ numuu política. Mbá xkri̱da, á mu kuwáanʼ ruʼtámíjná gajmiúlú mbáa xa̱bu̱ ga̱jma̱a̱ numuu Reino ndrígóo Dios, ragíʼmaa muʼthán rí nuyambáá o na̱nguá rí naku̱mu̱u̱ mbáa xa̱bu̱ ede̱ o mbá partido político. Ga̱jma̱a̱ á mu mbáa nandoo maʼthí ga̱jma̱a̱ numuu awan rí nuriyaʼ xa̱bu̱ mu munimbaníí xkujndu rí narígá náa numbaaʼ rá. Gajmulú Biblia mu musngajmáá rí Reino ndrígóo Dios maʼnimbánuu xkujndu rúʼko̱ kámuu mbiʼi. Ga̱jma̱a̱ á mu nandoo maʼthí ga̱jma̱a̱ numuu rí nugrájki̱i̱n e̱jñún gu̱ʼu̱ o rí nudamijná kanikhiin gu̱ʼu̱ o xa̱bekha rá. Gíʼmaa muʼthán rí naʼsngáa náa Biblia ga̱jma̱a̱ xú káʼnii nuniʼñáanʼ rí maxnúlúʼ ikha. Ga̱jma̱a̱ á mu naʼthí rí ndayóoʼ majngudi̱i̱ o maxtiʼkhuu mbá xtángoo rá. Xúʼthá nditháan ga̱jma̱a̱ numuu rúʼko̱ ni má xúʼni̱ rí xa̱bu̱ mariʼkhu̱u̱ rí naku̱mu̱u̱.

10. Ndiéjunʼ rí gíʼmaa muʼni mu xundxaʼwáá edxu̱lúʼ xóo rí nagájnuu náa noticias rá.

10 Índo̱ nuraxnuu o nuʼdxawíín noticias. Nguáná, tikhuu periódicos ga̱jma̱a̱ noticias nambáyúu wéñuʼ mbá organización  o mbá partido político. Rígi̱ narígá itháan náa xuajen náa Xa̱bu̱ Ñajunʼ naʼtáñajunʼ náa nagájnuu noticias. Á mu náa nagájnuu noticias o mbáa periodista nambáyúu mbáa político, gíʼmaa muñeumíjna̱ rí xundxaʼwáá edxu̱lúʼ mangáanʼ xúʼko̱ kaʼnii. Mbá xkri̱da, gíʼmaa muraximíjnálu: “Lá naniguʼ madxaun rí naʼthí mbáa periodista numuu rí ikháá má endxa̱ʼo̱o̱ edxu̱ʼ ga̱jma̱a̱ numuu política ráʼ.” Á mu nandulúʼ muguajún jmbu, xúʼyáá ní má xuraxnuu noticias nángi eʼni rí nambáyúu mbáa político. Guʼyáaʼ mbá periodico o náa nuxna noticia bi̱ tsembáyúu mbáa político. Ga̱jma̱a̱ índo̱ gúʼyáá o guraxnuu noticias, garmáʼáan a̱jkiu̱lú má xúʼko̱ rí naʼsngáa náa Biblia (2 Tim. 1:13).

11. Xú káʼnii gándoo gáʼni mbújkha̱a̱ rí xuguajún jmbu rá.

11 Á mu ikháanʼ nduʼyáá rí gíʼdoo wéñuʼ numuu rí kuaʼdáá. Á mu nduʼyáá rí gíʼdoo wéñuʼ numuu mbújkha̱a̱ ga̱jma̱a̱ i̱ʼwáʼ, maʼniulú itháan mingíjyúuʼ muguajún jmbu. Guʼyáá mbá xkri̱da. Náa xuajin Malaui, nda̱wa̱á rí tsiguʼ 1970 mbaʼin xa̱bi̱i̱ Jeobá ndiyóoʼ muniñaʼ xúgíʼ rí guáʼdáá numuu rí táʼnduun gumbayíí mbáa partido político. Mú mbáa ndxájulú bi̱ mbiʼyuu Ruth naʼthí rí tikhun táʼnduun guniñaʼ rí guáʼdáá. Maski ajndu nigún gumbayúmíjná náa nigún eʼwíínʼ xa̱bi̱i̱ Jeobá, nda̱wa̱á nimbañúún políticos mu ma̱ndoo matangi̱i̱n náa guʼwún. Mú mbaʼin xa̱bi̱i̱ Dios niguájun jmbu maski ajndu táguáʼdáá wéñuʼ mbújkha̱a̱ o ninimbáti̱ga̱ xúgíʼ rí niguáʼdáá (Heb. 10:34).

12, 13. a) Xú káʼnii eʼñún Jeobá xúgínʼ xa̱bu̱ rá. b) Ndiéjunʼ gándoo gúʼni mu xúʼnimbaʼumíjna̱ ga̱jma̱a̱ numuu xuajñulú rá.

12 Á mu nuʼnimbaʼumíjna̱ ga̱jma̱a̱ numuu xuajñulú o xóo kuwáanʼ. Náa numbaaʼ nduʼyáá rí xa̱bu̱ nunimbaʼumíjna̱ ga̱jma̱a̱ numuu xuajñún, raza, o xóo kúwi̱i̱n. Mú Jeobá tsindxaʼwáminaʼ rí mbáa xa̱bu̱ o mbá grupo xa̱bu̱ ni̱ndxu̱ún itháan míjínʼ ki xóo eʼwíínʼ. Ikhaa ndaʼyoo rí xúgínʼ mbeʼthíín. Gajkhun má rí Dios niʼniáanʼ mixtiʼkuáanʼ. Ga̱jma̱a̱ ikháanʼ nanigulúʼ rí ni̱ndxu̱lú mixtiʼkuáanʼ. Jeobá tsíyoo muʼni gaʼduunʼ xuajñulú o xóo kuwáanʼ. Mú ma̱ngaa tsíyoo rí mundxaʼwamíjna̱ rí ni̱ndxu̱lú itháan májánʼ ki xóo eʼwíínʼ (Rom. 10:12).

13 Nditháan ragíʼmaa muʼnimbaʼumíjna̱ rí xuajñulú nindxu̱u̱ itháan májánʼ ki xóo i̱ʼwáʼ. Á mu xúʼko̱ kumulúʼ, maʼniulú itháan mingíjyúuʼ muguajún jmbu. Rúʼko̱ nirígá nákha nikuwa timbíi̱n cristianos. Tikhun cristianos bi̱ ni̱ndxu̱ún hebreos nini gíníi gu̱ʼú xuáʼa̱ bi̱ ni̱ndxu̱ún griegas (Hech. 6:1). Xú káʼnii gándoo gúʼyáá á mu nuʼnimbaʼumíjna̱ rá. Gundxaʼwamíjna̱lú: “Ndiéjunʼ eni índo̱ mbáa ndxájulú bi̱ na̱ʼkha̱ náa imbo̱o̱ xuajin naxnúʼ mbá ikha rá. Lá nani gaʼduunʼ numuu rí nandxaʼwamínaʼ rí náa xuajñuʼ nunixu itháan májánʼ ráʼ.” Á mu nundxaʼwamíjna̱ rúʼko̱, garmáʼáan a̱jkiu̱lú rí náa Biblia naʼthí rí ndayóoʼ manindxu̱lúʼ xa̱bu̱ gua̱ba̱ʼ ga̱jma̱a̱ rí eʼwíínʼ itháan guáʼdáá numún ki xóo ikháanʼ (Filip. 2:3).

GUNDA̱ʼA̱A̱ JEOBÁ RÍ MAMBÁYULÚ

14. a) Xú káʼnii gándoo gambáyulú rí muʼtájkáan rá. b) Araxná mbá xkri̱da rí na̱ʼkha̱ náa Biblia náa nasngájma tsiakii rí gíʼdoo rí muʼtájkáan.

14 Rí maʼni ajtsú, rí mambáyulúʼ muguajún jmbu nindxu̱u̱ rí mumbáyumíjná náa Jeobá. Rí muʼtájkáan mambáyulúʼ  wéñuʼ. Mbá xkri̱da, ma̱ndoo munda̱ʼa̱a̱ Dios xi̱ʼ kaʼwu ndrígóo, rí ma̱ndoo mambáyulúʼ mu maʼngo̱o̱ a̱jkiu̱lú ga̱jma̱a̱ muñewa̱a̱n rí muʼni. Rígi̱ mambáyulúʼ á mu Xa̱bu̱ Ñajunʼ naʼni mbá dí ra̱májánʼ. Ma̱ngaa ma̱ndoo munda̱ʼa̱a̱ Dios rí maxnúlúʼ ku̱ma̱ mu mbuʼyáá nguáná rí ndayóoʼ muguajún jmbu ga̱jma̱a̱ tsiakii mu muʼni rí májánʼ (Sant. 1:5). Mbáa á mu ni̱ndxu̱lú jmbii náa Dios muxuʼdáanʼ náa guʼwá e̱jua̱nʼ o muxnulu i̱mba̱ castigo. Á mu naguaʼniilú rígi̱, gunda̱ʼa̱a̱ Jeobá rí maxnúlúʼ tsiakii mu muʼthá kaʼwu náa numuu rí nuguajún jmbu. Gakumulú kuʼyáá Jeobá rí ikhaa má gambáyulú mu maʼngulú. Ma̱ndoo mbuʼyáá mbá xkri̱da rí nasngájma tsiakii rí gíʼdoo rí muʼtájkáan náa Hechos 4:27-31 (atraxnuu).

15. Xú káʼnii gándoo gambáyulú Biblia mu muguajún jmbu rá. (Atayáá kúgumaʼá “ Ajngá rawunʼ Dios nimbáñun muguajún jmbu”).

15 Jeobá nixnúlú Biblia mú maxnúlúʼ tsiakii. Rígá versículos rí ma̱ndoo mambáyulúʼ muguajún jmbu. Ma̱ndoo mundxaʼwamíjna̱lú ga̱jma̱a̱ numuu rígi̱ ga̱jma̱a̱ muʼgíʼ mugídaʼ edxu̱lúʼ á mu rí mbá miʼtsú ní xúguáʼdáá Biblia. Biblia ma̱ngaa ma̱ndoo maxnúlúʼ tsiakii mu muguaʼthi̱i̱n rí Dios nakudaminaʼ maʼni nda̱wa̱á. Ndayúlú rígi̱ mu maʼngulú índo̱ xa̱bu̱ guxkulú (Rom. 8:25). Guraʼwíí versículos rí naʼthí ga̱jma̱a̱ numuu numbaaʼ nuxi̱ʼ ga̱jma̱a̱ gundxaʼwamíjna̱ rí nandulúʼ muʼni ikhí.

GUNDXAʼWAMÍJNA̱ NÁA XKRIDÚN XA̱BI̱I̱ DIOS BI̱ NIGUÁJUN JMBU

16, 17. Xú káʼnii embáyulú xkri̱da ndrígu̱ún xa̱bi̱i̱ Dios bi̱ niguájun jmbu rá. (Atayáá timbá xtiʼkhu.)

16 Rí maʼni a̱jkhu̱ enii rí mambáyulúʼ muʼniratamijná mu muguajún jmbu nindxu̱u̱ rí mundxaʼwáá edxu̱lúʼ náa xkridúún xa̱bi̱i̱ Dios bi̱ niguájun jmbu. Nákha wajyúúʼ, mbaʼin támiñún ga̱jma̱a̱ niraʼwíí muni rí májánʼ rí nimbáñun muguajún jmbu. Mbá xkri̱da, Sadrac, Mesac ga̱jma̱a̱ Abednego ninigaʼduunʼ mbuyamajkuíí mbáa xándú bi̱ nindoo gáʼthúu̱n mbáa Xa̱bu̱ Ñajunʼ ndrígóo Babilonia (atraxnuu Daniel 3:16-18). * Rí mbiʼi xúgi̱, historia rígi̱ nambáñun mbaʼin xa̱bi̱i̱ Dios mu xámiñun ga̱jma̱a̱ munigaʼduunʼ rí xúraxi̱i̱ bandera ndrígóo xuajñún. Gundxaʼwamíjna̱ ma̱ngaa náa xkri̱da ndrígóo Jesús. Ikhaa takudaminaʼ náa política ni má náa i̱ʼwáʼ xkujndu rí maʼni markuájinʼ xa̱bu̱. Ndiʼyoo rí  xkri̱da májánʼ ndrígóo mambáñun xa̱bi̱i̱. Ikha jngó nixnúún tsiakii ga̱jma̱a̱ niʼthún: “Ikun niʼngoʼ naʼ numba rigueʼ” (Juan 16:33).

17 Rí mbiʼi xúgi̱, mbaʼin xa̱bi̱i̱ Jeobá naguáju̱n jmbu. Tikhun nini gíníi, nixudiinʼ guʼwá e̱jua̱nʼ o asndu niradíin numuu rí ninindxu̱ún jmbiin náa Jeobá. Xkridúún nambáyulúʼ mu xámiñulu. Mbáa ndxájulú bi̱ xtáa náa Turquía niʼthí: “Franz Reiter ninindxu̱u̱ mbáa dxámá bi̱ nixiyáa numuu rí táʼndoo maxtáa náa ejército ndrígóo Hitler. Carta rí niʼnirámáʼ náa inuu ru̱dúu̱ nákha inuu makhañúu nasngájma rí fe ga̱jma̱a̱ rí nikumu̱u̱ kaʼyoo Jeobá ninindxu̱u̱ mba̱a̱ wéñuʼ. Ikhúúnʼ nandoʼ mbayaridoo á mu maʼga̱nú mbiʼi magíʼnuu xúʼko̱” [2] (atayáá nota rí na̱ʼkha̱ náa námbá artículo).

18, 19. a) Xú káʼnii gándoo gumbayúlú a̱ngiu̱lú bi̱ kuwa náa congregación mu muguajún jmbu rá. b) Ndiéjunʼ gátani asndu nákha xúgi̱ rá.

18 A̱ngiu̱lú ma̱ndoo mumbayulúʼ mu muguajún jmbu. Á mu kuwáanʼ ruraʼníí mbá xkujndu mingíjyúuʼ, guʼthúún a̱ngiu̱lú bi̱ kuya̱ edxu̱u̱. Ikhiin ma̱ndoo muxnulu xtágabu májánʼ rí na̱ʼkha̱ náa Biblia. Ma̱ngaa á mu eʼwíínʼ a̱ngiu̱lú náa congregación nduyáá rí kuwáanʼ raguáʼnii, mangiin ma̱ndoo muxnulu tsiakii. Ma̱ndoo muʼthúún rí mutajkáan ga̱jma̱a̱ numulúʼ. Mú mangáanʼ ma̱ndoo muxnún tsiakii a̱ngiu̱lú ma̱ngaa muʼtájkáan ga̱jma̱a̱ numún (Mat. 7:12). Náa ináa ndrígóo Internet jw.org kama mbá lista ndrígu̱ún a̱ngiu̱lú bi̱ kuwa náa guʼwá e̱jua̱nʼ. Ma̱ndoo muxkamaa náa artículo “Testigos de Jehová presos por sus creencias (por países)”, náa agoo PRENSA > ASUNTOS LEGALES. Guraʼwíí tikhuu mbiʼñún a̱ngiu̱lú ga̱jma̱a̱ gunda̱ʼa̱a̱ Jeobá mu xámiñún ga̱jma̱a̱ rí maguajún jmbu (Efes. 6:18-20).

19 Índo̱ itháan mijngii gíʼ fin ndrígóo numbaaʼ, mbáa Xa̱bu̱ Ñajunʼ mutsudáanʼlú itháan mu mumbáyii mbáa político. Ikha jngó gíʼdoo wéñuʼ numuu rí muʼniratamijná mu muguajún jmbu náa Jeobá raʼkháa náa numbaaʼ rí naʼni markuájinʼ xa̱bu̱.

^ [1] (kutriga̱ 1): Nákha mbiʼi rí nixtáa Jesús, césar ninindxu̱u̱ mbáa Xa̱bu̱ Ñajunʼ bi̱ itháan nigiʼdoo tsiakii náa numbaaʼ. Ikha jngó índo̱ Jesús niʼthí ga̱jma̱a̱ numuu césar, nindoo gáʼthi ga̱jma̱a̱ numún Xa̱bu̱ Ñajunʼ.

^ [2] (kutriga̱ 17): Atayáá libro Los testigos de Jehová, proclamadores del Reino de Dios, ináa 662, ga̱jma̱a̱ ma̱ngaa náa kúgumaʼá “Murió para la gloria de Dios” náa libro El Reino de Dios ya está gobernando, ináa 150.

^ párr. 5 Salmo 2:2, 9: “Reyes bi̱ kuwa náa tsu̱du̱u̱ ku̱ba̱ʼ naguáju̱n, ga̱jma̱a̱ xa̱bu̱ ñajunʼ nagimbíi̱n xúgínʼ mu muni gajmiún Jeobá ga̱jma̱a̱ bi̱ ikhaa má ndiyáaʼ. Mataniu̱n kujku ga̱jma̱a̱ ixi̱ ajua̱nʼ ga̱jma̱a̱ matadinʼ mbayíiʼ xóo daan ku̱ba̱ʼ”.

^ párr. 16 Daniel 3:16-18: “Sadrac, Mesac ga̱jma̱a̱ Abednego niriʼña̱a̱ ga̱jma̱a̱ nitháán rey: “Oh Nabucodonosor, na̱nguá eyóoʼ muriʼña̱a̱ ga̱jma̱a̱ numuu rígi̱. Á mu rí Dios bi̱ nuni ñajunʼxu ma̱ndoo maʼni káwáanʼxu náa horno rí mijkha wéñuʼ, oh rey ga̱jma̱a̱ maʼni káwáanʼxu náa ñawáanʼ. Mú á mu na̱nguá, atayáá májánʼ, oh rey, rí tseni ñajunʼxu dios ndrígáʼ, ga̱jma̱a̱ xúyamajkuííxu xándú bi̱ ki̱ʼni̱i̱ ga̱jma̱a̱ oro bi̱ ikháánʼ nitatsijii”.”