Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (rí muʼnigajmaa)  |  Abril tsiguʼ 2016

Jeobá nandoo kaʼñún bi̱ guáʼdáá fe náa ikhaa

Jeobá nandoo kaʼñún bi̱ guáʼdáá fe náa ikhaa

“Guyaridún bi̱ guáʼdáá fe ga̱jma̱a̱ bi̱ naʼngo̱o̱ a̱jkiu̱ún mu makhánun rí Dios nikudaminaʼ maxnún” (HEBREOS 6:12).

AJMÚÚ 86 GA̱JMA̱A̱ 54

1, 2. Xú káʼnii gaʼkhu rí niraʼnuu Jefté ga̱jma̱a̱ wáxioo rá.

MBÁA xa̱biya̱ naguta̱nga̱a̱ náa goʼwóo nda̱wa̱á rí niʼngo̱o̱ náa nixmínaʼ. Índo̱ ndiʼyoo wáxioo, nidxuu wéñuʼ rí asndu nigájnuu gagruiguíi ga̱jma̱a̱ ajmúú ma̱ngaa gisian. Mú anu̱u̱ niʼni mbá rí niʼniuu tsiánguá. Nixkuʼtu xtíñuu mu masngájma rí xtáa gíná wéñuʼ ga̱jma̱a̱ nda̱wa̱á nindxa̱ʼwá: “¡Ay, a̱ʼdióoʼ!”. Niʼthúu̱n rí ikhaa nixná ajngóo náa Jeobá. Ga̱jma̱a̱ numuu rúʼko̱, ikhaa xándoo manújunʼ ní xándoo magiʼdiin e̱ji̱i̱n. Xú káʼnii niriʼña ikhaa xá. Nacha̱ niʼthúu̱n anu̱u̱ rí ndayóoʼ maʼnimbánuu rí niʼthí. Rí xú niriʼña dxáʼgú bugi̱ nisngájma rí ndaʼyoo rí Jeobá nimbá miʼtsú xándo̱ʼo̱o̱ mbá dí ra̱májánʼ (Juec. 11:34-37). Índo̱ xa̱biya̱ ndiʼyoo rí wáxioo gíʼdoo wéñuʼ fe, nidxuu wéñuʼ. Ndiʼyoo rí Jeobá maʼdxuu wéñuʼ ga̱jma̱a̱ numuu rí májánʼ niʼni wáxioo.

2 Xa̱biya̱ bugi̱ nigumbiʼyuu Jefté. Ikhaa ga̱jma̱a̱ wáxioo nikumu̱ún kuyáá káxi̱ Jeobá ga̱jma̱a̱ xú nini. Asndu índo̱ niraʼníí rí mingíjyúuʼ wéñuʼ nisngajma rí niguáʼdáá fe. Nindúún rí Jeobá maʼni tsajkurámiinʼ, ikha jngó nindúún muni asndu ndiéjunʼ má rí gáʼyóóʼ.

3. Ndiéjunʼ eʼsngúlúʼ xkridoo Jefté ga̱jma̱a̱ wáxioo rá.

 3 Nguáná naʼni miʼskhoo muguaʼdáá mbá fe gujkhuʼ náa Jeobá. Á mu nandulúʼ muguaʼdáá má xúʼko̱, gíʼmáanʼ muʼni tsiakimijna wéñuʼ (Judas 3). Ikha jngó, náa artículo rígi̱ maʼni marmáʼáan a̱jkiu̱lú xkridoo Jefté ga̱jma̱a̱ wáxioo. Xú káʼnii nisngajma rí niguáʼdáá fe asndu índo̱ niraʼníí xkujndu xá.

NIGUÁʼDÁÁ MBÁ FE GUJKHUʼ MASKI AJNDU NIRIGÁ DÍ RA̱MÁJÁNʼ

4, 5. a) Ndiéjunʼ rí ndiyóoʼ muni israelitas índo̱ gátu̱ʼu̱u̱n náa Ku̱ba̱ʼ rí Jeobá niʼthí maxnún xá. b) Xó má eʼthí náa Salmo 106, ndiéjunʼ niguaʼnii israelitas numuu rí túnimbu̱ún xá.

4 Jefté ga̱jma̱a̱ wáxioo ndiyáá xúgíʼ mbiʼi dí ra̱májánʼ rí nirígá ga̱jma̱a̱ numuu rí israelitas túnimbu̱ún náa Jeobá. Itháan maʼni 300 tsiguʼ ginii, Dios nikunguinʼ israelitas rí muradíin xa̱bu̱ bi̱ kuwa náa Ku̱ba̱ʼ rí Jeobá niʼthí maxnún bi̱ nduyamajkhún dios bi̱ ragájkhun. Mú ikhiin túnimbu̱ún (Deut. 7:1-4). Mbaʼin nigi̱ʼdi̱i̱ ndiyamajkhún dios bi̱ ragájkhun ga̱jma̱a̱ nubúnʼ gajmiún eʼwíínʼ, xó má nini xa̱bu̱ Canáan náa Ku̱ba̱ʼ rí Jeobá niʼthí maxnún (atraxnuu Salmo 106:34-39). *

5 Numuu rí ikhiin túnimbu̱ún, Dios tañewu̱u̱n israelitas náa xa̱bu̱ sia̱nʼ (Juec. 2:1-3, 11-15; Sal. 106:40-43). Ninindxu̱u̱ mingíjyúuʼ náa xa̱bu̱ bi̱ kuwa mbá guʼwíin, bi̱ nindúún kuyáá Jeobá, rí musngajma fe náa mbiʼi mingíjyúuʼ rúʼko̱. Mú náa Biblia naʼthí rí tikhun israelitas nigímijna muni rí Jeobá maxtáa gagi. Tikhun ninindxu̱ún Jefté ga̱jma̱a̱ wáxioo, xó má Elqaná, Ana ga̱jma̱a̱ Samuel (1 Sam. 1:20-28; 2:26).

6. a) Ndiéjunʼ erígá náa numbaaʼ rígi̱ rá. b) Ndiéjunʼ gugimi̱jna̱ muʼni rá.

6 Rí mbiʼi xúgi̱, mbaʼin xa̱bu̱ nuni xóo nini xa̱bu̱ náa Canaán. Ra̱ʼkhá tháán nandún mubúnʼ gajmiún eʼwíínʼ, muni dí ra̱májánʼ ga̱jma̱a̱ muguaʼdáá mbújkha̱a̱. Mú Jeobá naʼthúlúʼ rí muñeumíjna̱. Ikhaa nandoo mañewu̱nlú náa dí ra̱májánʼ, xó má nindoo mañewu̱u̱n israelitas. Lá majmañulúʼ ga̱jma̱a̱ numuu rí nikiéʼkhun israelitas rá. (1 Cor. 10:6-11.) Guʼnimijna̱ mu xuʼyaridúún xa̱bu̱ numbaaʼ (Rom. 12:2).

JEFTÉ NIGIʼDOO MBÁ FE GUJKHUʼ MASKI AJNDU TÁʼNDUUN GÚYÁÁ

7. a) Xú káʼnii nini̱i̱ Jefté a̱ngui̱i̱n ga̱jma̱a̱ bi̱ kuya̱ edxu̱u̱ náa Israel rá. b) Ndiéjunʼ niʼni Jefté rá.

7 Mbiʼi rí nixtáa Jefté, israelitas nimíniʼ náa ñawúunʼ xa̱bu̱ sia̱nʼ numuu rí túnimbu̱ún kuyáá Jeobá (Juec. 10:7, 8). Ma̱ngaa Jefté nigiʼdoo xkujndu gajmíi̱n a̱ngui̱i̱n ga̱jma̱a̱ bi̱ kuya̱ edxu̱u̱ náa Israel. A̱ngui̱i̱n Jefté niguiñunʼ kuyáá ga̱jma̱a̱ nixíñu̱u̱n kuyáá. Asndu nitsudaa magajnúu náa ku̱ba̱ʼ rí kaʼyoo (Juec. 11:1-3). Mú Jefté tániñuʼ maʼni gawúunʼ rí nini israelitas. Xú káʼnii eʼyáá rá. Numuu rí índo̱ bi̱ kuya̱ edxu̱u̱ náa israel nitakháñii rí mambáñun, ikhaa nimbáñun ga̱jma̱a̱ xúgíʼ a̱jkiu̱u̱n (Juec. 11:4-11). Náa numuu niʼni xúʼko̱ xá.

8, 9. a) Xú káʼnii ikha ndrígóo xtángoo Moisés nimbáyúu Jefté rá. b) Ndiéjunʼ rí nigiʼdoo itháan numuu náa Jefté rá.

8 Jefté nijmañuu nixmínaʼ májánʼ. Ma̱ngaa naninuʼ májánʼ historia ndrígóo Israel ga̱jma̱a̱ xtángoo ndrígóo Moisés.  Índo̱ nindxa̱ʼwáminaʼ xú káʼnii Jeobá niʼni ga̱jma̱a̱ xuajñu, nijmañuu ndiéjunʼ rí nindxu̱u̱ májánʼ ga̱jma̱a̱ dí ra̱májánʼ (Juec. 11:12-27). Ga̱jma̱a̱ xúgíʼ mbiʼi rí nixtáa nijmuu ikha rúʼko̱ mu maraʼwíí rí maʼni. Ikhaa ndaʼyoo rí Jeobá tsíyoo rí xa̱bi̱i̱ magutrígíin muniu̱u̱n dí ra̱májánʼ, ikhaa nandoo rí maʼndún kuyamijná. Ma̱ngaa, náa xtángoo nijmañuu xú káʼnii gíʼmaa maʼniún eʼwíínʼ, asndu bi̱ tsíñún gúyáá (atraxnuu Éxodo 23:5 * ga̱jma̱a̱ Levítico 19:17, 18). *

9 Mbáa rí nimbáyúu ma̱ngaa Jefté ninindxu̱u̱ xkri̱da ndrígóo José. Mbáa ndiʼyoo rí José nigáwiinʼ a̱jkiu̱u̱n kaʼñún a̱ngui̱i̱n maski ajndu niwiñunʼ kuyáá (Gén. 37:4; 45:4, 5). Mbáa Jefté nindxa̱ʼwáminaʼ náa xkri̱da rígi̱, ga̱jma̱a̱ rúʼko̱ nimbáyúu mu maʼni xó má eyoo Jeobá. Mbáa Jefté nimínuuʼ wéñuʼ ga̱jma̱a̱ numuu rí nini̱i̱ a̱ngui̱i̱n. Mú taxmiéjunʼ wéñuʼ ga̱jma̱a̱ numuu rí nikumu̱u̱. Ikhaa ndiʼyoo rí itháan gíʼdoo numuu rí mañewu̱u̱n mbiʼyuu Jeobá ga̱jma̱a̱ xuajñu (Juec. 11:9). Jefté nindoo masngájma fe náa Jeobá. Ikha jngó Dios niʼni tsajkurámááʼ ikhaa ga̱jma̱a̱ xuajñu (Heb. 11:32, 33).

Maski ajndu magaunlú, xúniʼñáʼ ruʼni ñajunʼ Jeobá

10. Xú káʼnii embáyulú rí naʼthí náa Biblia mu muʼni rí nandoo Dios rá.

10 Xú káʼnii gándoo guʼyaridáá xkridoo Jefté rá. Gundxa̱ʼwámi̱jna̱ rígi̱: Ndiéjunʼ guʼni á mu mbáa ndxájulú naʼni gawúnlú o nakumulú rí naʼniulú mbá dí ra̱májánʼ rá. Gíʼma muʼni xóo Jefté ga̱jma̱a̱ majmulúʼ ikha ndrígóo Biblia mu muraʼwíí rí muʼni. Maski ajndu magaunlú, xúniʼñáʼ ruʼni ñajunʼ Jeobá. Xúniʼñáʼ rí mu̱ʼgua̱ reunión ga̱jma̱a̱ rí makuwáanʼ kambáxulú náa congregación. Rí gíʼmaa muʼni, guʼnimbulúʼ kuʼyáá Jeobá. Rígi̱ gambáyulú muraʼníí xkujndu mingíjyúuʼ ga̱jma̱a̱ muʼgíʼ mbá májánʼ xkri̱da mbuyáá eʼwíínʼ (Rom. 12:20, 21; Col. 3:13).

TSIGIJÑAʼ RÍ NASNGAJMA RÍ KUAʼDÁÁ MBÁ FE GUJKHUʼ

11, 12. a) Ndiéjunʼ rí nikudaminaʼ maʼni Jefté rá. b) Ndiéjunʼ gáʼyóóʼ maʼni mu maʼnimbánuu rí niʼthí xá.

11 Jefté ndiʼyoo rí ndayóoʼ rí Dios mambáyúu mu maʼni káwíin israelitas náa ñawúunʼ xa̱bu̱ sia̱nʼ. Ikha jngó nikudaminaʼ náa Jeobá (atayáá kúgumaʼá “Ndiéjunʼ eyoo gáʼthúu̱n”). Niʼthúu̱n rí á mu naʼngo̱o̱ nadaʼ, maxnáxi̱i̱ xóo “tsigijñaʼ” timbáa xa̱bu̱ bi̱ gagájnuu gáraʼnuu índo̱ gátanga̱a̱ náa goʼwóo (Juec. 11:30, 31). Ndiéjunʼ nindoo gáʼthi xá.

12 Jefté tándoo gáʼthi rí maxíyáa timbáa xa̱bu̱ bi̱ gagajnuu garaʼnuu. Xú káʼnii eʼyáá rá. Numuu rí ikhaa ndaʼyoo rí Jeobá tsíyoo gáʼyoo rí muxnaxi̱i̱n xa̱bu̱ numbaaʼ xóo tsigijñaʼ (Deut. 18:9, 10). Nákha mbiʼi ndrígu̱ún israelitas, mbá tsigijñaʼ ninindxu̱u̱ mbá regalo kiejunʼ rí naxnáxu̱u̱ mbáa Jeobá (atayáá  náa kúgumaʼá “Ndiéjunʼ eyoo gáʼthúu̱n”). Ikha jngó, rí nindoo gáʼthi Jefté rí maxnúu Jeobá mbáa bi̱ mañajunʼ náa tabernáculo kámuu mbiʼi. Jeobá nigruigú rí niʼthúu̱n maxnúu Jefté ga̱jma̱a̱ nimbáyúu mu maʼni gámbíin xa̱bu̱ sia̱nʼ (Juec. 11:32, 33). Mú, tsáa gaxnáxi̱i̱ Jefté xóo tsigijñaʼ náa Dios rá.

13, 14. Ndiéjunʼ eʼsngúlúʼ Jueces 11:35 ga̱jma̱a̱ numuu fe ndrígóo Jefté rá.

13 Xó má ndiʼyáá náa timbá kutriga̱, timbáa xa̱bu̱ bi̱ nigájnuu gáraʼnuu Jefté ninindxu̱u̱ bi̱ mbáwíi wáxioo, bi̱ nandoo kaʼyoo wéñuʼ. Ndiéjunʼ gáʼni Jefté rá. Lá maʼnimbánuu rí nikudaminaʼ maxnúu Jeobá ráʼ. Lá maxnáxi̱i̱ wáxioo mu maʼni ñajunʼ náa tabernáculo xúgíʼ mbiʼi rí gáxtáa xáʼ.

14 Náa xkujndu rígi̱, Jefté niʼni xó má nijmañuu náa xtángoo Dios. Mbáa nirmáʼáan a̱jkiu̱u̱n rí náa xtángoo niʼthún israelitas rí gíʼmiin muxnáá Jeobá rí itháan májánʼ rí guáʼdáá (Éx. 23:19). Mbáa ma̱ngaa nirmáʼáan a̱jkiu̱u̱n rí á mu mbáa naxnáxi̱ ajngóo náa Jeobá, náa xtángoo naʼthí: “Ragíʼmaa manújngorámuʼ ajngóo. Xó má nigájnuu náa rawunʼ, gíʼmaa maʼni” (Núm. 30:2). Ikha jngó Jefté gíʼmaa maʼni xó má Ana, mbáa bi̱ nixtáa ikháá má tiempo xóo ikhaa. Jefté gíʼmaa maʼnimbánuu rí nikudaminaʼ maʼni maski ajndu ndiʼyoo rí nindxu̱u̱ mingíjyúuʼ náa ikhaa ga̱jma̱a̱ náa wáxioo. Numuu rí wáxioo maʼni ñajunʼ náa tabernáculo asndu kámuu mbiʼi, xanújunʼ ni má xagiʼdiin e̱ji̱n. Ikha jngó ní xáxtáa imba̱a̱ bi̱ mayéʼga mbiʼyuu Jefté ga̱jma̱a̱ bi̱ magu̱u̱ mbayuuʼ (Juec. 11:34). Maski ajndu xúʼko̱, Jefté niʼthí: “Nimbáʼtoo rawunʼ náa Jeobá, ga̱jma̱a̱ nánguá xóo maniskidiminaʼ” (Juec. 11:35). Ajngáa rígi̱ naʼsngúlúʼ rí Jefté nigiʼdoo mbá fe mba̱a̱ wéñuʼ. Jeobá nigruigú tsigijñaʼ rí mba̱a̱ wéñuʼ rí niʼni ga̱jma̱a̱ niʼni tsajkurámááʼ. Lá muguaʼdáá ikháanʼ mbá fe mba̱a̱ xó má Jefté ráʼ.

15. a) Ndiéjunʼ nixuʼdámi̱jna̱ muʼni índo̱ nixnaxímíjná náa Jeobá rá. b) Xú káʼnii gándoo gusngajmá rí kuaʼdáá mbá fe xóo Jefté rá.

 15 Índo̱ nixnaxími̱jna̱ náa Jeobá, niʼtháán rí itháan gagiʼdoo numuu muʼni rí nandoo ikhaa. Ndiʼyáá rí nguáná maʼni mingíjyúuʼ. Mú xú káʼnii eʼni índo̱ Jeobá na̱ndu̱ʼu̱lú muʼni mbá rí tsénigulú rá. Á mu kuaʼdáá mbá fe xóo rí nigiʼdoo Jefté, musngájma rí nuʼnimbaníí rí nixuʼdámi̱jna̱ muʼni náa Jeobá ma̱ngaa muʼnimbulúʼ ga̱jma̱a̱ xúgíʼ a̱jkiu̱lú. Nduʼyáá rí itháan mba̱a̱ gánindxu̱u̱ rí Jeobá maʼni tsajkurámáánʼ ki xóo tsigijñaʼ rí muxnaxí ikháanʼ (Mal. 3:10). Ndiéjunʼ nirígá ga̱jma̱a̱ numuu wáxioo Jefté rá. Xú káʼnii nikumu̱u̱ índo̱ niʼdxuun rí nikudaminaʼ anu̱u̱ rá.

Xú káʼnii gándoo gusngajmá mbá fe xóo rí nigiʼdoo Jefté ga̱jma̱a̱ wáxioo rá. (Atayáá náa kutriga̱ 16 ga̱jma̱a̱ 17)

16. Ndiéjunʼ niʼni wáxioo Jefté índo̱ niʼdxuun rí nikudaminaʼ maʼni anu̱u̱ xá. (Atayáá timbá xtiʼkhu.)

16 Rí xú Jefté nixná ajngóo náa Jeobá ninindxu̱u̱ mixtiʼkhu rí xóo niʼni Ana. Ana nikudaminaʼ rí maxnáa a̱ʼdióo mu maʼni ñajunʼ náa tabernáculo xóo nazareo (1 Sam. 1:11) (atayáá kúgumaʼá “Ndiéjunʼ eyoo gáʼthúu̱n”). Bi̱ ñajúnʼ nazareos ma̱ndoo munigu̱nʼ ga̱jma̱a̱ muguaʼdiin e̱ji̱nʼ. Mú wáxioo Jefté xándoo maʼni rúʼko̱, numuu rí anu̱u̱ maxnáxi̱i̱ káxi̱ xóo “tsigijñaʼ” (Juec. 11:37-40). Gundxa̱ʼwámi̱jna̱ rígi̱: Ikhaa nindxu̱u̱ wáxioo mbáa xa̱bu̱ ede̱ náa Israel, ikha jngó ma̱ndoo manújunʼ ga̱jma̱a̱ mbáa dxámá bi̱ itháan májánʼ. Mú ikhaa ní xáʼni rúʼko̱, ikhaa mani̱ndxu̱u̱ mbáa xa̱bi̱i̱ Dios náa tabernáculo. Xú káʼnii niʼni xá. Niʼthúu̱n anu̱u̱ mbá rí nisngájma rí itháan gíʼdoo numuu maʼni ñajunʼ Dios: “Atani ga̱jma̱á ni̱ndxu̱ʼ xó má niratá” (Juec. 11:36). Mu maʼni ñajunʼ Jeobá dxáʼgú bugi̱ niʼni gaʼduunʼ rí nandoo maʼni, rí manújunʼ ga̱jma̱a̱ magiʼdiin e̱ji̱n. Xú káʼnii gándoo mbuʼyaridáá rí májánʼ niʼni xá.

Wáxioo Jefté niʼni gaʼduunʼ rí nandoo maʼni, rí manújunʼ ga̱jma̱a̱ magiʼdiin e̱ji̱n mu maʼni ñajunʼ Jeobá

17. a) Ndiéjunʼ gándoo muʼni mu mbuʼyaridáá fe ndrígóo Jefté ga̱jma̱a̱ wáxioo rá. b) Náa numuu rí naxnaʼ tsiakii ajngáa rí na̱ʼkha̱ náa Hebreos 6:10-12 rá.

17 Xú káʼnii gándoo mbuʼyaridáá fe ndrígóo Jefté ga̱jma̱a̱ wáxioo rá. Rí mbiʼi xúgi̱, mbaʼin jiáma o wa̱ʼxa̱ʼ bi̱ ni̱ndxu̱ún xa̱bi̱i̱ Jeobá tsínigu̱nʼ nacha̱ o tseguaʼdiin e̱ji̱n. Náa numuu rá. Numuu  rí nandún muni itháan ñajunʼ Jeobá. Mangiin mbaʼin a̱ngiu̱lú bi̱ guanii tsekuwa wéñuʼ gajmiún e̱jñún o e̱jín xíñunʼ. Náa numuu rá. Numuu rí nandún muxnáá Jeobá mbiʼi ga̱jma̱a̱ tsiakii ndrígu̱ún. Tikhun nuyambáá maguma guʼwá náa magimbíin. Eʼwíínʼ nagún Náa Najuiʼsngúún bi̱ nutaraʼa numuu Jeobá ga̱jma̱a̱ nagún náa mbá congregación náa ndayóoʼ miʼtáraʼa itháan. Ga̱jma̱a̱ eʼwíínʼ nuriyaʼ awan mu mutaraʼa itháan índo̱ inuu marigá Conmemoración. Jeobá xambumuu kaʼyoo xúgíʼ tsigijñaʼ rí nuxnáxi̱ a̱ngiu̱lú numuu rí nandún kuyáá ikhaa (atraxnuu Hebreos 6:10-12). * Ikháánʼ rá. Lá nandaʼ matani asndu xúgíʼ rí eyóoʼ mu matani itháan ñajunʼ Jeobá ráʼ.

NDIÉJUNʼ NIJMAÑULÚ RÁ.

18, 19. a) Ndiéjunʼ nijmañulúʼ ga̱jma̱a̱ numuu Jefté ma̱ngaa náa wáxioo rá. b) Xú káʼnii gándoo guʼyaridúún xá.

18 Mbaʼa rí najmañulúʼ ga̱jma̱a̱ numuu xkridoo Jefté ga̱jma̱a̱ wáxioo. Mbá xkri̱da, Jefté niniñuʼ rí Jeobá maxnúu ikha índo̱ niraʼwíí rí maʼni. Niʼniminaʼ maniñuʼ níjni xúgíʼ dí ra̱májánʼ rí nini xa̱bu̱ bi̱ nikuwa ikhú. Nisngájma rí nigiʼdoo fe índo̱ eʼwíínʼ nini̱i̱ dí raʼkhí. Ga̱jma̱a̱ índo̱ tikhun túnimbu̱ún náa Dios, ikhaa ga̱jma̱a̱ wáxioo nisngajma rí niguáʼdáá mbá fe gujkhuʼ. Jeobá niʼni tsajkurámááʼ Jefté ga̱jma̱a̱ wáxioo numuu xúgíʼ rí nini. Ma̱ngaa, nijmuu xkri̱da ndrígu̱ún mu mambáñún eʼwíínʼ muni ñajunʼ.

19 Náa Biblia naʼthí: “Guyaridún bi̱ guáʼdáá fe ga̱jma̱a̱ bi̱ naʼngo̱o̱ a̱jkiu̱ún mu makhánun rí Dios nikudaminaʼ maxnún” (Heb. 6:12). Ikha jngó, guʼyaridáá má xúʼko̱ xkridoo Jefté ga̱jma̱a̱ wáxioo ma̱ngaa gusngajmá má xúʼko̱ mbá fe gujkhuʼ. Garmáʼáan a̱jkiu̱lú rí Jeobá nandoo kaʼñún bi̱ guáʼdáá fe náa ikhaa.

^ párr. 4 Salmo 106:34-39: “Túni gámbáa xuajen, xó má Jeobá niʼthún muni. Ga̱jma̱a̱ nigi̱ʼdi̱i̱ nindawami̱jna̱ gajmiún xa̱bu̱ numbaaʼ, ikhú nijmañún rí nuni ikhiin. Ga̱jma̱a̱ xóó ndiyamajkhún xándú ndrígu̱ún, ga̱jma̱a̱ rígi̱ ni̱jkha̱nú ninindxu̱u̱ mbá tsáʼkhá náa ikhiin. Ga̱jma̱a̱ nuxnaxi̱i̱n e̱jñún xóo tsigijñaʼ náa xa̱bu̱ wéñiʼ. Nixidíí eʼdiún bi̱ nda̱a̱ aʼkhún, eʼdiún e̱jñún, bi̱ nixnaxi̱i̱n náa xándú bi̱ kuwa náa Canaán; ga̱jma̱a̱ ku̱ba̱ʼ niguma tsagáá rí nigadíí wéñuʼ eʼdi. Ga̱jma̱a̱ nini tsagamijná ga̱jma̱a̱ numuu rí nini; ikhiin nuthi mu i̱mba̱ rí eni”.

^ párr. 8 Éxodo 23:5: “Á mu ikháánʼ nitayáá mbáa burru ndrígóo mbáa bi̱ nawiyuʼ kaʼyaʼ bi̱ nixpátriga̱a̱ ga̱jma̱a̱ rí kagu, ragíʼmaa matatsiʼñáʼ ga̱jma̱ midxuuʼ. Gíʼmaa matambáyii xujkhúʼ”.

^ párr. 8 Levítico 19:17, 18: “Ragíʼmaa mawiyaʼ xtayáá ndxájuaʼ náa awúu̱n a̱jkia̱nʼ. Gíʼmaa mataxpríguii ndxájuaʼ, mu xáda mangáán aʼkhúun. Ragíʼmaa magutrígáanʼ matani̱i̱ xó má niʼniaʼ ragíʼmaa makiʼnán xtañún xa̱bu̱ bi̱ kuwa náa xuajñanʼ; ga̱jma̱a̱ gíʼmaa maʼnda̱ʼ xtayáá xa̱bu̱ numbaaʼ ga̱jma̱ʼ. Ikhúúnʼ ni̱ndxu̱ʼ Jeobá”.

^ párr. 17 Hebreos 6:10-12: “Dios na̱nguá ni̱ndxu̱u̱ ra̱májáánʼ mu mambumuu ñajunʼ rí nunila ga̱jma̱a̱ rí nisngajmá rí nanga̱jua̱la ku̱ya̱a̱ mbiʼyuu índo̱ nini ñajunʼ, ma̱ngaa rí nuni má xúʼko̱ ñajúnʼ santos. Mú nanduxuʼ rí mámbáa rí ikháanʼ muñajunʼ gakhi̱i̱ xó má enila asndu nákha ginii mu maʼni káxi̱ a̱jkia̱la náa rí marigá nda̱wa̱á kayuʼ, mu xaʼskala, rí gíʼmaa muni, guyaridún bi̱ guáʼdáá fe ga̱jma̱a̱ bi̱ naʼngo̱o̱ a̱jkiu̱ún mu makhánun rí Dios nikudaminaʼ maxnún”.