Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (rí muʼnigajmaa)  |  Abril tsiguʼ 2016

Gaʼngulú muraʼníí xúgíʼ

Gaʼngulú muraʼníí xúgíʼ

“Mú á mu naʼngala nuraʼníí xúgíʼ, ñajunʼ rí nunila mani̱ndxu̱u̱ káxi̱, ikha jngó á mu káxi̱ xúgíʼ, nda̱a̱ rí gáʼyaláʼ” (SANTIAGO 1:4).

AJMÚÚ 135 GA̱JMA̱A̱ 139

1, 2. a) Ndiéjunʼ eʼsngúlúʼ xkridoo Gedeón gajmíi̱n 300 xa̱bi̱i̱ rá. (Atayáá timbá xtiʼkhu.) b) Xó má eʼthí Lucas 21:19, ndíjkha rí gíʼdoo wéñuʼ numuu rí maʼngulú rá.

GEDEÓN bi̱ ninindxu̱u̱ juez gajmíi̱n soldado ndrígio̱o̱ kuwa ruxmijná phú gakhi̱i̱ wéñuʼ ga̱jma̱a̱ néʼngu̱u̱n. Kañiʼ mbruʼun egún ruxkhún xa̱bu̱ bi̱ sia̱nʼ náa mbá 32 kilómetros. Ndiéjunʼ nirígá nda̱wa̱á rá. Náa Biblia naʼthí: “Ni̱jkha̱nú mbiʼi rí Gedeón ni̱jkha̱nú náa Jordán, ga̱jma̱a̱ nikidaa, ikhaa gajmíi̱n mbá ajtsú ciento xa̱bekha bi̱ xtáa gajmíi̱n, néʼngu̱u̱n”. Mú xóó tséʼngu̱u̱n náa nuxmijná, numuu rí kuwa xóó mbá 15,000 soldados bi̱ sia̱nʼ. Xa̱bu̱ bugi̱ nini gíníi israelitas mba̱yu̱ʼ tsiguʼ. Ikha jngó Gedeón gajmíi̱n xa̱bi̱i̱ na̱nguá xóo makanajkhúnʼ. Ikha jngó nigún ruxkhún xa̱bu̱ sia̱nʼ asndu náa niradíin (Juec. 7:22; 8:4, 10, 28).

2 Mangáanʼ kuwáanʼ ruxmijná gakhi̱i̱ wéñuʼ ga̱jma̱a̱ naʼni néʼngulú. Bi̱ sia̱nʼ gajmiúlú nindxu̱u̱ Satanás ga̱jma̱a̱ numbaaʼ ndrígóo ma̱ngaa rí ni̱ndxu̱lú xa̱bu̱ aʼkhá. Tikuáanʼ kuwáanʼ má mba̱yu̱ʼ ruxmijná gajmiúlú. Niʼngulú má mbaʼa nuthu numuu rí Jeobá má nambáyulúʼ. Mú xóó tséʼngulú náa guerra. Mbáa nguáná néʼngulú guxmíjná o rí nuguaʼthi̱i̱n mambáa numbaaʼ  rígi̱ dí ra̱májánʼ wéñuʼ. Jesús niʼthí rí índo̱ gáʼni iwáá mbiʼi muguaʼdáálu wéñuʼ xkujndu ga̱jma̱a̱ muxkhulú xa̱bu̱. Mú ma̱ngaa niʼthí rí á mu naʼngulú ma̱ndoo muʼdáʼ náa guerra (atraxnuu Lucas 21:19). Ndiéjunʼ eyoo gáʼthúu̱n rí maʼngulú rá. Ndiéjunʼ gambáyulú mu maʼngulú rá. Ndiéjunʼ gándoo gájmañúlúʼ náa bi̱ niʼngu̱u̱n rá. Ga̱jma̱a̱ xú káʼnii gándoo gúʼni dí ‹maʼngulú muraʼníí xúgíʼ› rá. (Sant. 1:4.)

NDIÉJUNʼ EYOO GÁʼTHÚU̱N RÍ MAʼNGULÚ RÁ.

3. Ndiéjunʼ eyoo gáʼthúu̱n rí maʼngaʼ rá.

3 Náa Biblia, rí maʼngulú raʼkháa i̱ndó nandoo gáʼthúu̱n muʼni níjni mbá xkujndu o rí maʼngulú muraʼníí mbá xkujndu gakhi̱i̱. Ma̱ngaa nandoo gáʼthúu̱n rí xú káʼnii endxa̱ʼwámi̱jna̱ o nakumulú ga̱jma̱a̱ numuu mbá xkujndu. Rí maʼngulú nandoo gáʼthúu̱n rí xámiñulu, manindxu̱lúʼ xa̱bu̱ jmbii ga̱jma̱a̱ maʼngo̱o̱ a̱jkiu̱lú. Mbá libro naʼthí rí maʼngulú nandoo gáʼthúu̱n rí muguaʼdáá mbá fe gujkhuʼ ga̱jma̱a̱ rí xakanajkhulu índo̱ nuraʼníí xkujndu. Nandoo gáʼthúu̱n rí muguajún jmbu asndu índo̱ nuraʼníí xkujndu rí itháan mingíjyúuʼ. Ga̱jma̱a̱ nuʼni rí xkujndu mani̱ndxu̱u̱ májánʼ ma̱ngaa tsindxa̱ʼwa̱míjna̱ i̱ndó náa gaʼkhu rí kuaʼdáá, nundxa̱ʼwa̱míjna̱ rí garígá nda̱wa̱á.

4. Ndíjkha rí nuʼthá rí maʼndulú kuʼyamíjna̱ naʼni rí maʼngulú rá.

4 Rí nandulúʼ kuyamíjna̱ naʼni rí maʼngulú (atraxnuu 1 Corintios 13:4, 7). * Náa numuu eʼthá rígi̱ rá. Mbá xkri̱da, rí nandulúʼ kuʼyáá Jeobá naʼni rí maʼngulú xúgíʼ rí naniñuʼ ikhaa marigá (Luc. 22:41, 42). Rí nandulúʼ kuʼñúún a̱ngiu̱lú nambáyulúʼ mu maʼngulú rí nakiéʼkhun (1 Ped. 4:8). Ga̱jma̱a̱ rí nandulúʼ kuʼyáá ajmbiulú o aʼgiu̱lú mambáyulúʼ maʼngulú muraʼníí xkujndu rí guáʼdáá asndu bi̱ nandún kuyamíjna̱ wéñuʼ. Ma̱ngaa rúʼko̱ naʼni rí maʼndulú kuʼyáá itháan bi̱ ndiʼyáaʼlu (1 Cor. 7:28).

NDIÉJUNʼ GÁMBÁYULÚ MU MAʼNGULÚ RÁ.

5. Náa numuu rí Jeobá ma̱ndoo mambáyulúʼ mu maʼngulú rá.

5 Munda̱ʼa̱a̱ Jeobá rí maxnúlúʼ tsiakii. Náa Biblia naʼthí rí Jeobá naʼni rí ‹maʼngulú ga̱jma̱a̱ naʼni maʼni̱i̱ a̱jkiu̱lú› (Rom. 15:5). Ikhaa phú ma̱ndoo mambáyulúʼ mu maʼngulú. Náa numuu rá. Numuu rí i̱ndó ikhaa nakro̱ʼo̱o̱ rí kuwáanʼ raguaʼnii, rí nakumulú ga̱jma̱a̱ xú káʼnii nikuwáanʼ nákha ginii. Ikha jngó ikhaa eʼyoo rí phú ndayúlú mu maʼngulú. Náa Biblia naʼthí rí Dios maʼnimbánuu “rí nandún xa̱bu̱ bi̱ nuni ñajunʼ ikhaa, ga̱jma̱a̱ maʼdxawun índo̱ gutakáñii rí mambáñun, ma̱ngaa maʼni káwíin” (Sal. 145:19). Mú xú káʼnii eriʼña̱a̱ Dios índo̱ nunda̱ʼa̱a̱ rí maxnúlúʼ tsiakii mu maʼngulú rá.

6. Índo̱ nuraʼníí mbá tsáʼkhá, xú káʼnii eʼnimbánuu Jeobá ajngóo rí mambáyulúʼ rá.

6 Á mu nunda̱ʼa̱a̱ Jeobá rí mambáyulúʼ mu maʼngulú, ikhaa nakudaminaʼ maʼnimbánuu (atraxnuu 1 Corintios 10:13). * Xú káʼnii eʼni xá. Nguáná, naʼni gámbóo  xkujndu. Mú mbaʼa nuthu nambáyulúʼ índo̱ naxnúlú tsiakii mu maʼngulú ga̱jma̱a̱ gagi ma̱ngaa rí maʼngo̱o̱ a̱jkiu̱lú (Col. 1:11). Ma̱ngaa, Jeobá ndaʼyoo májánʼ á mu tséʼniulu nandii, á mu nundxa̱ʼwáá májánʼ edxu̱lúʼ ga̱jma̱a̱ ndaʼyoo asndu náa ma̱ndoo muʼni, ikhaa nditháan xániñuʼ rí mbá xkujndu maʼni gakhi̱i̱ wéñuʼ rí asndu xáʼngulú muguajún jmbu.

7. Arathá ga̱jma̱a̱ mbá xkri̱da ndíjkha rí ndayóoʼ mu̱ʼphu̱ májánʼ ganitsu mu maʼngulú rá.

7 Guʼni itháan gujkhuʼ fe ndrígúlú ga̱jma̱a̱ ganitsu rí na̱ʼkha̱ náa Dios. Ndíjkha rí gíʼdoo wéñuʼ numuu rí mu̱ʼphu̱ májánʼ ganitsu rí na̱ʼkha̱ náa Dios rá. Guʼgíiʼ mbá xkri̱da. Mu mbáa xa̱bu̱ matsimuu náa kúbá Everest ndayóoʼ makuiʼtsu xúgíʼ mbiʼi ajtsú nuthu itháan ki xóo rí naguʼun na̱ʼkhu̱. Á mu nandoo maʼngo̱o̱ ga̱jma̱a̱ matsimuu asndu inuu, ndayóoʼ mikhu xúgíʼ rí naʼngo̱o̱. Xúʼko̱ má nindxu̱u̱, á mu nandulúʼ maʼngulú asndu índo̱ gáʼkha̱ fin, ndayóoʼ mu̱ʼphu̱ májánʼ ganitsu rí na̱ʼkha̱ náa Dios. Ndayóoʼ muríyaʼ mbiʼi mu muʼnigajmaa ndajkuáanʼ ga̱jma̱a̱ rí mu̱ʼgua̱ má xúʼko̱ náa reunión. Xúʼko̱ maguaʼdáá mbá fe gujkhuʼ (Juan 6:27).

8, 9. a) Xó má eʼthí náa Job 2:4, 5, ndiéjunʼ ekujmaa índo̱ nuraʼníí mbá xkujndu rá. b) Ndiéjunʼ gándoo gundxaʼwamíjna̱ mbiʼi rúʼko̱ rá.

8 Garmáʼáan a̱jkiu̱lú rí gíʼmaa manindxu̱lúʼ jmbii náa Dios. Índo̱ nuraʼníí xkujndu numíniiʼ wéñuʼ. Mú garmáʼáan a̱jkiu̱lú rí ma̱ngaa naʼni makujmaa rí á mu ni̱ndxu̱lú jmbii náa Dios. Satanás tsíyoo rí Jeobá maʼtáñajunʼ náa numbaaʼ. Ikhaa niʼni gawúunʼ Jeobá índo̱ niʼthí rí i̱ndó nuʼni ñajunʼ Dios numuu rí naxnúlú rí májánʼ. Nákha nixtáa Job, Satanás niʼthí: “Xúgíʼ rí gíʼdoo xa̱biya̱ maxná mu ma̱ndoo makríyaʼ”. Ga̱jma̱a̱ nda̱wa̱á niʼthí rí á mu Dios naʼni gínáa Job, Job xáwi̱ji̱ jmbu náa Dios (Job 2:4, 5). Mba̱yu̱ʼ tsiguʼ nda̱wa̱á, índo̱ Satanás nixkriyaʼ mekhuíí, nakruigi̱i̱n má xúʼko̱ xa̱bi̱i̱ Dios (Rev. 12:10). Ga̱jma̱a̱ rí mbiʼi xúgi̱, xóó naʼthí rí xa̱bu̱ numbaaʼ i̱ndó nuʼni ñajunʼ Dios numuu rí naxnúlú mbaʼa rí májánʼ. Ikhaa nandoo rí muʼni gaʼduunʼ rí maʼtáñajunʼ Dios ga̱jma̱a̱ rí muniʼñáaʼ ruʼni ñajunʼ. Ikha jngó índo̱ gúraʼní mbá xkujndu, garmáʼáan a̱jkiu̱lú rí xóo gúʼni masngájma á mu numbayíí Jeobá xó mbáa bi̱ kaʼyoo maʼtáñajunʼ numbaaʼ.

9 Mbiʼi rúʼko̱ ma̱ndoo mundxaʼwamíjna̱ rígi̱. Mbá níjniúu xtáa Satanás gajmíi̱n xa̱bu̱ wéñiʼ, kuwa ruyulú ga̱jma̱a̱ nuthi rí xáʼngulú. I̱mba̱ níjniúu xtáa Jeobá, Jesucristo bi̱ nindxu̱u̱ rey ndrígúlú, bi̱ kaxtaʼwíin bi̱ nigabi̱i̱n má ga̱jma̱a̱ mbaʼin wéñuʼ ángeles. Ikhiin mangiin nduyulú, mú nuxnulú tsiakii mu xakanájkhulú. Nadxún rí ni̱ndxu̱lú jmbii náa Jeobá ga̱jma̱a̱ rí naʼngulú má xúʼko̱ maski ajndu mbaʼa dí eraʼníí. Ikhú Jeobá naʼthúlúʼ: “A̱ʼdióoʼ, gani̱ndxa̱ʼ mbáa xa̱bu̱ bi̱ ndaʼyoo, atani rí maxtáa gagi a̱jkiu̱nʼ, mu ma̱ndoo mathu̱u̱n bi̱ nanduʼwajmun” (Prov. 27:11).

10. Xú káʼnii eʼyaridáá Jesús índo̱ nuraʼníí xkujndu rá.

10 Gundxaʼwamíjna̱ ndiéjunʼ rí májánʼ gakhánulú. Atatsaʼwáminaʼ rí nadxuʼ mitsínguánʼ ga̱jma̱a̱ ndayóoʼ manújngaʼ náa mbá túnel mbaaʼ wéñuʼ. Mikríná wéñuʼ xúgíʼ. Mú ikháánʼ natayáá rí á mu nadxuʼ má xúʼko̱, magajnáʼ  ga̱jma̱a̱ ma̱ta̱ya̱a̱ aguʼ mbu̱júu̱. Xúʼko̱ má nindxu̱u̱ rí makuwáanʼlu. Mbáa nguáná nuraʼníí rí mingíjyúuʼ wéñuʼ ga̱jma̱a̱ ra̱ʼkhá tháán exmiéjunlú. Mbáa asndu Jesús nikumu̱u̱ xúʼko̱ kaʼnii. Índo̱ nidujmaa náa ixi̱ mu muxi̱ya̱a̱, nini ma̱jti̱ʼ ga̱jma̱a̱ nini gínáa wéñuʼ. Mbáa ikhú rí nimínuuʼ itháan. Ndiéjunʼ rí nimbáyúu mu maʼngo̱o̱ xá. Náa Biblia naʼthí rí ‹nikána gagi› (Heb. 12:2, 3). Xóo muʼthá, Jesús ndiʼyoo rí makhánúu rí májánʼ á mu naʼngo̱o̱, itháan numuu rí mambáyúu maʼni kaʼwu̱u̱ mbiʼyuu Dios ga̱jma̱a̱ masngájma rí ikhaa kaʼyoo maʼtáñajunʼ. Ndaʼyoo rí tsáʼkhá mambáa mú, rí makhánáá mekhuíí mbajyúuʼ kámuu mbiʼi. Índo̱ guraʼníí xkujndu gakhi̱i̱ wéñuʼ ma̱ndoo mbuʼyaridáá Jesús. Xú káʼnii rá. Rí mundxaʼwamíjna̱ rí makhánulúʼ rí májánʼ á mu naʼngulú ga̱jma̱a̱ garmáʼáan a̱jkiu̱lú rí xkujndu mambáa.

BI̱ NIʼNGU̱U̱N

11. Náa numuu rí májánʼ muniʼnúʼ bi̱ niʼngu̱u̱n rá.

11 Mbaʼin xa̱bi̱i̱ Dios niʼngu̱u̱n xó má ikháanʼ. Nákha mbiʼi rí nixtáa apóstol Pedro, mbaʼin cristianos niʼngu̱u̱n mbaʼa tsáʼkhá ndrígóo Satanás. Ikha jngó Pedro niʼthí: “Añajún jti̱i̱n náa ikhaa, atani gujkhuʼ fe ndrígáʼ, natayáá má rí xúʼko̱ kuwa rumíninʼ a̱ngia̱nʼ náa mbájndi numbaaʼ” (1 Ped. 5:9). Ikha jngó májánʼ rí muniʼnúʼ bi̱ niʼngu̱u̱n. Náa numuu rá. Numuu dí rúʼko̱ mambáyulúʼ mu muguajún jmbu ga̱jma̱a̱ Jeobá maʼni tsajkurámáánʼ (Sant. 5:11). Guʼyáá xkri̱da ndrígu̱ún tikhun xa̱bi̱i̱ Dios bi̱ niʼngu̱u̱n [1] (atayáá nota rí na̱ʼkha̱ náa námbá artículo).

12. Ndiéjunʼ ejmañulú náa xkri̱da ndrígu̱ún querubines rá.

12 Querubines. Ángeles bugi̱ guáʼdáá wéñuʼ numún. Índo̱ Adán ga̱jma̱a̱ Eva nixudami̱jna̱ aʼkhá, Jeobá nixnúún tikhun querubines mbá ñajunʼ muni náa tsudu̱u̱ Ku̱ba̱ʼ rí ninindxu̱u̱ mixtiʼkhu ki xóo rí niguáʼdáá mekhuíí. Xkri̱da ndrígu̱ún naʼsngúlúʼ rí gíʼmaa maʼngulú índo̱ nundrígú mbá ñajunʼ rí mingíjyúuʼ. Náa Biblia naʼthí rí “Edén rí naguanúu xígií náa nagájnuu a̱jkha̱ʼ” ikhí Jeobá niʼni makuwá querubines “ga̱jma̱a̱ mbá chídí rí gíʼdoo a̱jma̱ rawunʼ náa rí nagutuaʼan má xúʼko̱ mu marugo kamba̱a̱ rí na̱jkha̱ náa ixi̱ rí maʼni maxtáa mbáa xa̱bu̱” (Gén. 3:24) [2] (atayáá nota rí na̱ʼkha̱ náa námbá artículo). Náa Biblia tséʼthi rí querubines nixieʼkhá o nithi rí ikhiin guáʼdáá numún rí xándoo muni ñajunʼ rúʼko̱. Ma̱ngaa tséʼthi rí ikhiin niskhún o niniñaʼ ñajunʼ ndrígu̱ún. Rí phú nini, ikhiin niguanún náa ñajunʼ ndrígu̱ún asndu índo̱ niguámbá. Mbáa  nikuwa ikhí itháan rí 1,600 tsiguʼ, asndu índo̱ ni̱ʼkha̱ Ruʼwambiiʼ.

13. Ndiéjunʼ nimbáyúu Job mu maʼngo̱o̱ xúgíʼ tsingíná rá.

13 Job bi̱ niwi̱ji̱ jmbu. Mbáa nguáná nuʼni guabamijná numuu rí mbáa bi̱ nambáxulúʼ gajmiúlú o bi̱ kuʼyáá niʼthúlú mbá rí niʼni gawúnlú. O mbáa nandoo kháñulú wéñuʼ o numíniʼ numuu rí nikháñu mbáa bi̱ nandulúʼ kuʼyáá. Mú tséʼniuu má rí naguaʼnii, xkridoo Job ma̱ndoo maxnúlúʼ tsiakii (Job 1:18, 19; 2:7, 9; 19:1-3). Job táʼyoo náa numuu rí nda̱a̱ tsu̱ma̱ nigíʼnuu dí ra̱májánʼ. Mú takagua̱ba̱ʼ. Ndiéjunʼ rí nimbáyúu Job mu maʼngo̱o̱ rá. Timbá, rí nindoo kaʼyoo Jeobá ga̱jma̱a̱ maʼni rí naniguʼ (Job 1:1). Ikhaa nindoo maʼni rí naniguʼ Jeobá índo̱ xtáa májánʼ ga̱jma̱a̱ índo̱ na̱nguá. Raga̱jma̱, rí Jeobá niʼthúu̱n xúgíʼ rí niʼni mu marmáʼáan a̱jkiu̱u̱n rí ikhaa gíʼdoo wéñuʼ tsiakii. Rígi̱ niʼni rí Job maʼga̱nú mbaʼyoo gajkhun rí Jeobá marígúu tsingíná índo̱ phú gáʼyóoʼ (Job 42:1, 2). Xúʼko̱ má niʼni. Jeobá nirígúu rí naʼni mamínuʼ Job ga̱jma̱a̱ nixnúu itháan ki xóo rí nindáti̱go̱o̱. Ga̱jma̱a̱ Job nixtáa tsímáá mbiʼi rí xóó nixtáa (Job 42:10, 17).

14. Xó má eʼthí náa 2 Corintios 1:6, xú káʼnii nimbáñun eʼwíínʼ rí niʼngo̱o̱ Pablo rá.

14 Apóstol Pablo. Mbáa tikuáanʼ mumiʼnííʼ o asndu muxkulú numuu rí nuʼni ñajunʼ Jeobá. O á mu ni̱ndxu̱lú bi̱ kuya̱ edxu̱u̱ o superintendentes ndrígóo circuito, mbáa naxmiéjunlú wéñuʼ numuu rí kuaʼdáá wéñuʼ ñajunʼ rí gíʼmaa muʼni. Á mu xúʼko̱, xkridoo Pablo ma̱ndoo mambáyulúʼ. Ikhaa nimínuuʼ índo̱ nixkháá wéñuʼ. Ma̱ngaa nixmiéjunʼ wéñuʼ kaʼñún a̱ngiu̱lú (2 Cor. 11:23-29). Mú takagua̱ba̱ʼ nditháan, xkri̱da májánʼ rí niniñuʼ nimbáñun eʼwíínʼ a̱ngiu̱lú mu maʼngu̱u̱n (atraxnuu 2 Corintios 1:6). * Á mu  naʼngulú, xkri̱da ndrígúlú ma̱ngaa mambáñún eʼwíínʼ a̱ngiu̱lú.

LÁ MAʼNGULÚ MURAʼNÍÍ XÚGÍʼ RÁʼ.

15, 16. a) Ndiéjunʼ nindxu̱u̱ “ñajunʼ” rí gíʼmaa maʼni káxi̱ rá. b) Arathá ga̱jma̱a̱ xkri̱da rí xú káʼnii rí naʼngulú maʼni rí mani̱ndxu̱u̱ káxi̱ ñajunʼ rí nuʼni rá.

15 Jeobá niʼni rí discípulo Santiago maʼnirámáʼ ajngáa rígi̱: “Mú á mu naʼngala nuraʼníí xúgíʼ, ñajunʼ rí nunila mani̱ndxu̱u̱ káxi̱, ikha jngó á mu káxi̱ xúgíʼ, nda̱a̱ rí gáʼyaláʼ” (Sant. 1:4). Xó má eʼyáá, Santiago niʼthí rí á mu naʼngulú maʼni náa ikháanʼ mbá “ñajunʼ”. Ndiéjunʼ nindxu̱u̱ ñajunʼ rúʼko̱ rá. Rí maʼngulú nambáyulúʼ manindxu̱lúʼ “káxi̱”, xóo muʼthá, itháan májáánʼ cristianos. Mú xú káʼnii eʼni rí maʼngulú mbá “ñajunʼ” rá. Índo̱ kuaʼdáá mbá xkujndu, mbáa nduʼyáá rí ndayóoʼ maʼngo̱o̱ itháan a̱jkiu̱lú, muxnáa núma̱aʼ itháan o rí maʼndulú kuʼñúún itháan eʼwíínʼ. Índo̱ naʼngulú, najmañulú nusngajmá itháan rígi̱ ga̱jma̱a̱ nani̱ndxu̱lú itháan májáánʼ cristiano. Xúʼko̱ nuniʼñáʼ rí mani̱ndxu̱u̱ káxi̱ ñajunʼ rí eʼni.

Á mu naʼngulú índo̱ gaguaʼdáá xkujndu, manindxu̱lúʼ itháán májáánʼ cristianos. (Atayáá kutriga̱ 15 ga̱jma̱a̱ 16.)

16 Numuu rí naʼngulú nambáyulúʼ manindxu̱lúʼ itháan májánʼ cristianos, xúʼyáaʼ makáwáanʼ náa mbá xkujndu rí asndu xúʼni̱mbu̱lúʼ náa Dios. Guʼgíiʼ a̱jma̱ xkri̱da. Á mu kuwáanʼ ruʼnimijna ga̱jma̱a̱ mbá ku̱ma̱ dí ra̱májánʼ, gunda̱ʼa̱a̱ Jeobá rí muʼni gaʼduunʼ ku̱ma̱ dí ra̱májánʼ mu xakiéʼkulú. O gundxaʼwamíjna̱ rí kuaʼdaa mbáa bi̱ kuʼyáá bi̱ tsíyoo manindxu̱lúʼ xa̱bi̱i̱ Jeobá. Guʼni má xúʼko̱ ñajunʼ Jeobá ki xóo makaguabáanʼ. Rúʼko̱ mambáyulúʼ makumulúʼ kuʼyáá itháan. Xambumulú rí á mu nandulúʼ rí Jeobá maʼndoo kaʼyulúʼ, gíʼmaa rí maʼngulú (Rom. 5:3-5; Sant. 1:12).

17, 18. a) Arathá ga̱jma̱a̱ mbá xkri̱da rí gíʼdoo numuu maʼngaaʼ asndu índo̱ gáʼkha̱nú fin. b) Rí xúgi̱ rí kuwáanʼ mijngii náa fin, ndiéjunʼ rí nduʼyáá májánʼ rá.

17 Gíʼdoo wéñuʼ numuu rí maʼngulú asndu índo̱ gártumuu mbiʼi, raʼkháa i̱ndó nguáthá mbiʼi. Gundxaʼwáá edxu̱lúʼ rí mbá barco na̱jkha̱ rarmáʼáan. Á mu rí bi̱ nagún náa barco nandún makáwíin, gíʼmaa magún asndu náa rawunʼ iyaʼ rí asndu nditháan xúʼni̱ guabamijná. Xúʼko̱ má kayuʼ, á mu nandulúʼ makuwáanʼ náa Ku̱ba̱ʼ mitsaan, gíʼmaa maʼngulú asndu índo̱ gáʼkha̱nú fin rí xúʼni̱ guabamijná nditháan. Gíʼmaa muʼthá xó má niʼthí apóstol Pablo: ‹Xákawabáanʼxu› (2 Cor. 4:1, 16).

18 Xó má Pablo, nduʼyáá májánʼ rí Jeobá mambáyulúʼ maʼngulú asndu índo̱ gáʼkha̱nú fin. Pablo niʼnirámáʼ: “Kuwáanʼ raʼngulú káxi̱ ga̱jma̱a̱ numuu bi̱ nindoo kaʼyulúʼ. Numuu rí nda̱yo̱o̱ gajkhun rí ní makhañúlúʼ, ni rí mbuʼya, ni ángeles, ni xa̱bu̱ ñajunʼ, ni má dí rígá xúgi̱, ni má dí marigá nda̱wa̱á, ni tsiakii, ni rí mitsidanʼ, ni rí mi̱jnu̱ʼ, ni i̱mba̱ rí niguma ma̱ndoo matsingunʼ náa rí nandoo kaʼyulúʼ Dios dí rígá náa Cristo Jesús, Señor ndrígúlú” (Rom. 8:37-39). Nguáná má naʼni néʼngulú. Mú gíʼmaa mbuʼyaridáá Gedeón gajmíi̱n mbá 300 xa̱bi̱i̱. Ikhiin niʼni néʼngu̱u̱n, mú túni guabamijná (Juec. 8:4). Lá matayaridúún ikháánʼ xáʼ.

^ [1] (kutriga̱ 11): Ma̱ngaa mambáyulúʼ mbuʼyáá xkri̱da ndrígu̱ún xa̱bi̱i̱ Dios bi̱ naʼngu̱u̱n rí mbiʼi xúgi̱. Mbá xkri̱da, ma̱ndoo muraxnuu informes ndrígu̱ún a̱ngiu̱lú bi̱ kuwa náa Etiopía, Malaui ga̱jma̱a̱ Rusia náa Anuarios tsiguʼ 1992, 1999 ga̱jma̱a̱ 2008.

^ [2] (kutriga̱ 12): Biblia tséʼthi nguáthi̱i̱n querubines nijmiuu Dios mu muni ñajunʼ rígi̱.

^ párr. 4 1 Corintios 13:4, 7: “Rí maʼndulú kuʼñúún eʼwíínʼ gáʼni rí maʼngulú xúgíʼ ga̱jma̱a̱ muʼni rí májánʼ. Rí maʼndulú kuʼñúún eʼwíínʼ maʼni rí xaxígulúʼ, xúʼnimba̱mi̱jna̱, xúxuximíjna. Xúgíʼ naʼngo̱o̱ a̱jkiu̱u̱n, xúgíʼ naniʼmbo̱o̱, xúgíʼ nagiʼtu̱u̱n ga̱jma̱a̱ xúgíʼ naʼngo̱o̱ naraʼnuu”.

^ párr. 6 1 Corintios 10:13: “Nimbá tsáʼkhá rí na̱ʼkha̱nú náa inala, xánindxu̱u̱ mixtiʼkhu ki xóo rí nuraʼníí xa̱bu̱. Mú Dios nindxu̱u̱ jmbii ga̱jma̱a̱ ikhaa xániñuʼ ma̱ʼkha̱ tsáʼkhá rí xáʼngala gúraʼní, índo̱ gáʼkha̱nú tsáʼkhá ma̱ngaa mambáyala mu maʼngala muraʼníí”.

^ párr. 14 2 Corintios 1:6: “Rí xúgi̱ á mu nuraʼníí xkujndu, nindxu̱u̱ mu maxnála tsiakii ga̱jma̱a̱ mu maʼni káwáanʼ; á mu na̱jkha̱ raʼni̱i̱ a̱jkiu̱lú, nindxu̱u̱ mu maxnála tsiakii, mu mambáyala maʼngalá muraʼníí tsingíná rí ikháanʼ mangáanʼ nuraʼnííxu”.