Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (rí muʼnigajmaa)  |  Junio tsiguʼ 2017

Jeobá naʼni maʼni̱i̱ a̱jkiu̱lú náa xúgíʼ tsáʼkhá

Jeobá naʼni maʼni̱i̱ a̱jkiu̱lú náa xúgíʼ tsáʼkhá

“Dios bi̱ naʼni̱i̱ a̱jkiu̱lú [...] naʼni̱i̱ a̱jkiu̱lú náa xúgíʼ gamiéjunʼ rí kuaʼdáá” (2 COR. 1:3, 4).

AJMÚÚ 38 GA̱JMA̱A̱ 56

1, 2. Xú káʼnii eʼni̱i̱ a̱jkiu̱lú Jeobá, ga̱jma̱a̱ ndiéjunʼ eʼthúlú náa Ajngá rawunʼ xá.

MBÁA ndxájulú dxámá, bi̱ muxna mbiʼí Eduardo, niʼthúu̱n Stephen, mbáa bi̱ kayá edxu̱u̱ bi̱ nikhi̱i̱ má, dí rígá mbá rí naxmiéjunʼ. Nindxa̱ʼwáminaʼ ga̱jma̱a̱ numuu rí naʼthí náa 1 Corintios 7:28 rí bi̱ gúnigunʼ “maguaʼdáá xkujndu”. Ikha jngó niraxu̱u̱ Stephen, bi̱ ndiyáa má a̱ʼgiu̱u̱, ndiéjunʼ nindxu̱u̱ “xkujndu” rúʼko̱ ga̱jma̱a̱ xú káʼnii gáraʼnuu á mu mbóo mbiʼi gánigúnʼ. Nákha xóó tsiriʼña̱a̱, Stephen niʼthúu̱n rí mandxaʼwáminaʼ rí niʼnirámáʼ apóstol Pablo, rí Jeobá nindxu̱u̱ “Dios bi̱ naʼni̱i̱ a̱jkiu̱lú, bi̱ naʼni̱i̱ a̱jkiu̱lú náa xúgíʼ gamiéjunʼ rí kuaʼdáá” (2 Cor. 1:3, 4).

2 Nduʼyáá rí Jeobá nindxu̱u̱ mbáa Anu̱lú bi̱ nandoo kaʼyulú bi̱ naʼni̱i̱ a̱jkiu̱lú índo̱ kuaʼdáá xkujndu. Mbáa ikháánʼ narmáʼáan a̱jkia̱nʼ xú káʼnii nixnáʼ ikha ga̱jma̱a̱ nimbáyaʼ mbaʼa nuthu, mbáa náa Ajngá rawunʼ. Nduʼyáá gajkhun rí ikhaa nandoo rí makuwáanʼ májánʼ, xó má nindoo makuwá  xa̱bi̱i̱ nákha wajyúúʼ (atraxnuu Jeremías 29:11, 12). *

3. Xú káʼnii graxe̱ guriʼña̱a̱ rá.

3 Xó má náa i̱ʼwáʼ, á mu nduʼyáá náa numuu nuraʼníí tsáʼkhá ga̱jma̱a̱ xkujndu náa niʼdamijná o náa guʼwúlú, xáʼniulu mingíjyúuʼ muraʼníí. Mú, ndiéjunʼ gáʼni rí “maguaʼdáá xkujndu” rí niʼthí Pablo rá. Xú káʼnii xkri̱da dí nirígá nakha wajyúúʼ ga̱jma̱a̱ rí narígá mbiʼi xúgi̱ ma̱ndoo maʼni̱i̱ a̱jkiu̱lú índo̱ ndayúlú rá. Rí mbuʼyáá xú káʼnii naxtiʼña̱a̱ mambáyulúʼ muraʼníí.

“MAGUAʼDÁÁ XKUJNDU” BI̱ GAJMII

4, 5. Arathá tikhu rí maʼni “maguaʼdáá xkujndu”.

4 Índo̱ Dios niruwi̱i̱n timbíi̱n xa̱bu̱, niʼthí: “Xa̱biya̱ maniñuʼ anu̱u̱ ga̱jma̱a̱ ru̱dúu̱ gíʼdoo rí maxtáa ga̱jma̱a̱ a̱ʼgiu̱u̱ ma̱ngoo maguanu mani̱ndxu̱ún mbóó xuwiʼ” (Gén. 2:24). Mú, numuu rí ni̱ndxu̱lú xa̱bu̱ aʼkhá, marigá xkujndu índo̱ guʼdamijná ga̱jma̱a̱ índo̱ gakuwáanʼ wájíʼ (Rom. 3:23). Rí xúgi̱ xa̱biya̱ mayéʼga edxu̱u̱ xóo eʼni anu̱u̱, numuu rí Dios nigíʼ ikhaa mu mayéʼga edxu̱u̱ náa a̱ʼgiu̱u̱ (1 Cor. 11:3). Mbáa maʼniún mingíjyúuʼ muni rígi̱. Ga̱jma̱a̱ mbáa tikhun gu̱ʼu̱ maʼniún miʼskhaa munimbu̱ún rí nuthi ajmbiún, numuu dí raʼkháa anu̱ún muthún rí muni. Ma̱ngaa narígá xkujndu gajmiún bi̱ kuñún, rígi̱ narígá náa bi̱ ndiʼkhún nidamijná.

5 Naxmiéjunʼ itháan índo̱ a̱ʼgu̱ naʼthúu̱n ajmbio̱o̱ rí maguaʼdáá ada̱. Maski ajndu rígi̱ naʼni maʼdxúún wéñuʼ, mu ma̱ngaa naʼni maxmiéjunʼ. Maski ajndu nadxúún, naxmiéjúnʼ rí marigá nandii índo̱ kagu̱ ewan ada̱ o nda̱wa̱á a̱ʼgu̱. Ma̱ngaa majmúún wéñuʼ mbújkha̱a̱ xúgi̱ ga̱jma̱a̱ nda̱wa̱á. Mú raʼkháa i̱ndó rúʼko̱. Ru̱dúu̱ ada̱ mbaʼyóoʼ mba̱yu̱ʼ mbiʼi mu mañewu̱u̱n ada̱. Ga̱jma̱a̱ anu̱u̱ ada̱ ma̱ngaa magiʼdoo i̱ʼwáʼ ñajunʼ, numuu gíʼdoo rí mbaʼyoo rí maguaʼdáá rí nda̱ñúnʼ bi̱ kuwa náa goʼwóo. Ikha jngó bi̱ nidamijná xáguáʼdáá wéñuʼ mbiʼi mu makuwá mbóó ikhiin xóo nákha ginii.

6-8. Xú káʼnii ekumún tikhun bi̱ nandún muguaʼdiin e̱ji̱n mú tsíyoo rá.

6 Tikhun bi̱ nidamijná nuraʼníí imbo̱o̱ xkujndu: Na̱nguá guáʼdiin e̱ji̱n maski ajndu nandún wéñuʼ. Ní má rí munigu̱nʼ, ní má rí muguaʼdiin e̱ji̱n xáʼni rí xaxmiéjunʼ, mú á mu nandún maguaʼdiin e̱ji̱n ga̱jma̱a̱ á mu tsíyoo maʼni rí maguaʼdáá xkujndu. Tikhun gu̱ʼu̱ ra̱ʼkhá tháán exmiéjunʼ numuu na̱nguá xóo maguaʼdiin e̱ji̱n (Prov. 13:12). Nákha wajyúúʼ, rí xándoo maraʼdiin e̱ji̱n nindxu̱u̱ ma̱jti̱ʼ wéñuʼ. Raquel, a̱ʼgiu̱u̱ Jacob, nixtáa gíná wéñuʼ índo̱ ndiʼyoo rí ndxájuu gíʼdiin e̱ji̱n mu ikhaa na̱nguá (Gén. 30:1, 2). Tikhun misioneros bi̱ nuyambáá náa i̱ʼwáʼ xuajen náa xa̱bu̱ naguáʼdiin mbaʼin e̱jñún nuraxu̱u̱n náa numuu rí tseguaʼdaa nimbáa ada̱. Maski ajndu ikhiin nuthúún náa numuu, nguáná nuriʼña̱a̱: “¡Migínáanʼ wéñuʼ! Mutajkáan ga̱jma̱a̱ numala”.

7 Guʼyáá rí nigíʼnuu mbáa ndxájulú bi̱ xtáa náa Inglaterra bi̱ tagiʼdiin e̱ji̱n maski ajndu ikhaa nindoo magiʼdiin. Índo̱ ni̱jkha̱nú tsiguʼ rí ní xándoo magiʼdiin e̱ji̱n, nixtáa gíná wéñuʼ, numuu rí ndiʼyoo rí xambánuu rí nandoo ikhaa náa numbaaʼ rígi̱. Ikha jngó ikhaa ga̱jma̱a̱ ajmbio̱o̱ nindúún muni mbaja̱a̱ imba̱a̱ ada̱. Mú ikhaa ni̱jkha̱nú: “Nixtáa gíná wéñuʼ rí asndu xóo nikháñu mbáa. Ndiʼyoo rí na̱nguá nindxu̱u̱ ikháá rí maraʼdaa mbáa ada̱ ki xóo matatsimba̱ja̱a̱ imba̱a̱ ada̱ bi̱ raʼkháa a̱ʼdiáaʼ”.

8 Gajkhun má rí náa Biblia naʼthí rí  cristiana “maguma kríyaʼ numuu rí nagiʼdiin e̱ji̱n” (1 Tim. 2:15). Mú ajngáa rígi̱ tsíyoo gáʼthi rí á mu naraʼdiin ma̱ndoo maʼni rí maraxtaa kámuu mbiʼi, nandoo gáʼthi rí a̱ʼgu̱ bi̱ nagiʼdiin e̱ji̱n ga̱jma̱a̱ gíʼdoo mbá guʼwá mañewu̱u̱n ma̱ndoo maʼni gaʼduunʼ xtujtaa xúʼko̱ xájngruigo̱o̱ raʼthí ga̱jma̱a̱ numuu xkujndu ndrígu̱ún eʼwíínʼ. Mú magiʼdoo xkujndu ga̱jma̱a̱ bi̱ ndiyáa ga̱jma̱a̱ náa goʼwóo.

Xú káʼnii gaʼngulú muraʼníí índo̱ nakháñuu mbáa bi̱ kuʼyáá rá.(Atayáá kutriga̱ 9 ga̱jma̱a̱ 12.)

9. Ndiéjunʼ tsáʼkhá rí mingíjyúuʼ wéñuʼ eraʼníí tikhun xa̱bu̱ rá.

9 Índo̱ nundxa̱ʼwa̱míjna̱ xkujndu rí ma̱ndoo muguaʼdáá bi̱ nidamijná, rígá mbóo rí na̱nguá e̱ʼkha̱ náa edxu̱lúʼ: Índo̱ nakháñuu mbáa bi̱ ndiyáa. Gamiéjunʼ rígi̱ nimbáa tsígiʼtu̱u̱n magíʼnuu náa numbaaʼ rígi̱. Cristianos nunimbu̱ún rí nikudaminaʼ Jesús rí magabiín xa̱bu̱, mbá ajngáa májánʼ rí naʼni̱i̱ a̱jkiu̱u̱n bi̱ niguanúu mbáwíi (Juan 5:28, 29). Rígi̱ nindxu̱u̱ imbo̱o̱ xóo Anu̱lú bi̱ nandoo kaʼyulú naʼni̱i̱ a̱jkiu̱lú ma̱ngaa nambáñun ga̱jma̱a̱ Ajngóo bi̱ kuwa ruraʼníí xkujndu gakhi̱i̱. Guʼyáá xú káʼnii niʼni̱i̱ a̱jkiu̱ún tikhun xa̱bi̱i̱ Dios ga̱jma̱a̱ ajngóo ma̱ngaa xú káʼnii nimbáñun rígi̱.

XÚ KÁʼNII GATAXKAMAA RÍ MAʼNI̱I̱ A̱JKIA̱Nʼ

10. Ndiéjunʼ niʼni rí maʼni̱i̱ a̱jkiu̱u̱n Ana rá. (Atayáá timbá xtiʼkhu.)

10 Ana, a̱ʼgiu̱u̱ Elqaná bi̱ nindoo kaʼyoo wéñuʼ, niraʼnuu mbá tsáʼkhá gakhi̱i̱: Na̱nguá xóo magiʼdiin e̱ji̱n, mú Peniná, imba̱a̱ a̱ʼgiu̱u̱ Elqaná nandoo nagiʼdiin (atraxnuu 1 Samuel 1:4-7). * Tsiguʼ tsiguʼ, Ana ndiyóoʼ maʼngo̱o̱ xóo enduʼwajmaa Peniná, ga̱jma̱a̱ rígi̱ naʼni maxtáa gíná wéñuʼ. Ndiéjunʼ niʼni maʼni̱i̱ a̱jkiu̱ún xá. Náa Biblia naʼthí rí “xtáa raʼtájkháan mba̱yu̱ʼ náa inuu Jeobá” mu maʼthúu̱n xkujndu ndrígóo. Ikhaa nigíʼthu̱u̱n rí Dios mariʼña̱a̱ rí niʼtájkáan. Ikhú, “nánguá nisngájma rí nixmiéjunʼ” (1 Sam. 1:12, 17, 18). Ndiʼyoo gajkhun rí Jeobá maxnúu mbáa ada̱ o mbayáaʼ imbo̱ʼ xóo maʼni̱i̱ a̱jkiu̱u̱n.

11. Xú káʼnii eyambáá rí muʼtájkáan rá.

11 Muraʼníí má xúʼko̱ tsáʼkhá xúgi̱ rí ni̱ndxu̱lú xa̱bu̱ aʼkhá ga̱jma̱a̱ rí kuwáanʼ náa numbaaʼ rí naʼtáñajunʼ Satanás (1 Juan 5:19). Mú nduʼyáá rí “Dios bi̱ naʼni̱i̱ a̱jkiu̱lú” ma̱ndoo mambáyulúʼ. Ikhaa ma̱ndoo mambáyulúʼ índo̱ guraʼníí gamiéjunʼ, xóo má Ana, nuʼtháán ga̱jma̱a̱ xúgíʼ a̱jkiu̱lú. Xó má niʼni ikhaa, gíʼdoo rí muʼni itháan ki xóo mbóó muʼtháán xkujndu ndrígúlú; gíʼmaa muʼtháán xú kaʼnii phú kumulú ga̱jma̱a̱ muʼtákáñii asndu náa a̱jkiu̱lú, rí mambáyulúʼ (Filip. 4:6, 7).

12. Náa numuu nixtáa tsímáá Ana rá.

12 Ma̱ndoo muxkamaa náa maʼni̱i̱ a̱jkiu̱lú á mu tsiguaʼdiin e̱ji̱n o gíná wéñuʼ kuwáanʼ rí nikháñuu mbáa ndxájulú. Garmáʼáan a̱jkiu̱lú kuʼyáá mbáa a̱ʼgu̱ bi̱ naʼthí dí marigá nákha nixtáa Jesús, ikhaa ma̱ngaa nigumbiʼyuu Ana. Káaʼ mbá juwan tsiguʼ nixtáa ga̱jma̱a̱ ajmbio̱o̱ índo̱ niguanátigo̱o̱, ga̱jma̱a̱ náa Biblia tséʼthi rí ikhaa nigiʼdiin e̱ji̱n. Índo̱ nigiʼdoo 84 tsiguʼ, “jamba miʼtsu guideʼ naʼ aun guʼhua dxakun, mbiʼi mbruʼhuin ijma naʼ inu Señor ri naʼni tsakun, jame ndayamiʼki” (Luc. 2:37). Rí niʼni maʼni̱i̱ a̱jkiu̱u̱n Ana ga̱jma̱a̱ rí niʼni maxtáa tsímáá rí mbaʼyamajkuu Jeobá.

13. Araxná mbá xkri̱da rí xú káʼnii gándoo mumbayúlú bi̱ nambáxulúʼ gajmiúlú.

13 Ma̱ngaa ma̱ndoo muni̱i̱ a̱jkiu̱lú  a̱ngiu̱lú bi̱ nambáxulúʼ gajmiúlú bi̱ kuwa náa congregación (Prov. 18:24). Guʼyáá mbá xkri̱da. Paula nixtáa gíná wéñuʼ índo̱ ru̱dúu̱ niniñuʼ rí gajkhun. Rígi̱ niʼniuu mingíjyúuʼ numuu rí káaʼ witsu tsiguʼ gíʼdoo. Mú Ann nimbáyúu wéñuʼ, mbáa precursora bi̱ xtáa náa congregación nixmiéjunʼ kaʼyoo rí ikhaa mambaxúu májánʼ ga̱jma̱a̱ Dios. Paula naʼthí: “Maski ajndu na̱nguá ka̱yo̱o̱ Ann, rí nindoo kaʼyoʼ ga̱jma̱a̱ rí nixmiéjunʼ kaʼyoʼ nimbáyuʼ wéñuʼ”. Ga̱jma̱a̱ xóó niʼthí: “Rígi̱ niyambáá mu mani má xúʼko̱ ñajunʼ Jeobá”. Ru̱dúu̱ ni̱ʼkha̱a̱ náa congregación, rúʼko̱ niʼni maxtáa gagi Paula, Ann ma̱ngaa xtáa gagi numuu rí nimbáyúu Paula rí xániñuʼ raʼni ñajunʼ Jeobá.

14. Xú káʼnii embáyulú dí muʼni rí maʼni̱i̱ a̱jkiu̱ún eʼwíínʼ rá.

14 Índo̱ nusngajmá rí nandulúʼ kuʼñúún eʼwíínʼ ga̱jma̱a̱ rí phú naxmiéjunlú kuʼñúún eʼwíínʼ, naʼni káwáanʼ náa ku̱ma̱ dí ra̱májánʼ. Mbaʼin a̱ngiu̱lú bi̱ ninujunʼ o na̱nguá, nduyáá rí gíʼmaa mumbayíí Dios mu mutaraʼa ajngáa rí májánʼ rí naʼni makuwá tsímáá. Meta ndrígu̱ún nindxu̱u̱ rí muni mba̱a̱ Dios ga̱jma̱a̱ muni rí naniguʼ ikhaa. Tikhun nduyáá rí mutaraʼa nindxu̱u̱ xóo mbá tana rí maʼni̱i̱ a̱jkiu̱ún. Rí magún kuñu̱u̱n ajngáa rí májánʼ náa xa̱bu̱ nusngajma rí naxmiéjunʼ kuñún. Ga̱jma̱a̱ á mu naxmiéjunʼ kuʼñúún a̱ngiu̱lú, nuʼni rí makuwáanʼ mbá nduʼ náa congregación (Filip. 2:4). Rígi̱ rí niʼni apóstol  Pablo. Niñewu̱u̱n a̱ngiu̱lú bi̱ nikuwa náa Tesalónica xóo eʼni mbáa “náná” ga̱jma̱a̱ niʼni rí maʼni̱i̱ a̱jkiu̱ún xóo anu̱u̱ espiritual (atraxnuu 1 Tesalonicenses 2:7, 11, 12). *

MUMBÁÑUN BI̱ KUWA NÁA GUʼWÚLÚ

15. Tsíin phú kaʼñún musngúún e̱ji̱n rá.

15 Ma̱ngaa gíʼdoo numuu mundxaʼwamíjna̱ ga̱jma̱a̱ numuu xóo muʼni maʼni̱i̱ a̱jkiu̱ún ga̱jma̱a̱ mumbáñun bi̱ kuwa náa guʼwúlú. Nguáná, a̱ngiu̱lú bi̱ xóó na̱nguá kuwa mba̱yu̱ʼ náa rí gajkhun nutháán bi̱ najmañuu itháan mu musngúún e̱jñún rí gajkhun o asndu munigajmaa Biblia gajmiún. Náa Escrituras naʼthí rí anu̱ún kaʼñún musngúún e̱jñún (Prov. 23:22; Efes. 6:1-4). Ga̱jma̱a̱ xóó kaʼñún maski ajndu nguáná nda̱ñúnʼ rí mixtambáñun, ma̱ngaa rígi̱ ikhiin nuxna̱a̱ núma̱aʼ. Ikha jngó, ndayóoʼ rí mutamijná gajmiún e̱jñún ga̱jma̱a̱ muniʼnunʼ májánʼ.

16. Ndiéjunʼ gáʼyóóʼ marmáʼáan a̱jkiu̱lú índo̱ gunduʼulú rí mumbáyii mbáa ada̱ rá.

16 Á mu mbáa xa̱bu̱ naʼthúlúʼ rí muʼnigajmaa Biblia gajmiúlú a̱ʼdióo, gíʼmaa marmáʼáan a̱jkiu̱lú dí raʼkháa ikháanʼ gíʼmaa muʼni ñajunʼ rí ikhaa kaʼyoo maʼni. Mbáa asndu mundu̱ʼu̱lú rí muʼsngáá a̱ʼdióo mbáa bi̱ tsíyoo maʼnigajmaa Biblia. Á mu narígá rígi̱, gíʼdoo rí mbuʼyáá rí mumbáñuun e̱ji̱n raʼkháa rígi̱ naguajtáanʼ manindxu̱lúʼ anu̱u̱ o ru̱dúu̱. Ma̱ngaa májánʼ gáʼni rí muʼnigajmaa náa guʼwún ikhiin ga̱jma̱a̱ rí makuwá anún ikhí o mbáa cristiano bi̱ itháan nikhi̱i̱ o náa pa̱jnu̱. Xúʼko̱, xakumu̱ún dí raʼkhí eʼwíínʼ. Mbáa nda̱wa̱á anún e̱ji̱n munimbánii ñajunʼ rúʼko̱, xó má Jeobá eʼtáñajunʼ.

17. Xú káʼnii gándoo e̱ji̱n muni maʼni̱i̱ a̱jkiu̱ún bi̱ kuwa náa guʼwún rá.

17 Jiáma bi̱ nijmañún maʼndún kuyáá Jeobá ga̱jma̱a̱ munimbu̱ún kuyáá, naʼni̱i̱ a̱jkiu̱ún anún índo̱ nduyamajkhún, nuyambáá ga̱jma̱a̱ mbújkha̱a̱ o ga̱jma̱a̱ i̱ʼwáʼ ga̱jma̱a̱ nuyambáá mu xúgínʼ bi̱ kuwa mbá guʼwíin mambaxúún gajmiún Dios. Lamec, mbáa bi̱ ni̱ʼkha̱ náa Set bi̱ nixtáa nákha xóó tséʼkha̱ ruʼwa mbiiʼ, ndiʼyamajkuu Jeobá. Ikhaa niʼtáriyaʼ rí maʼni Noé: “Bugi̱ bi̱ maʼni rí maʼni̱i̱ a̱jkiu̱lú náa ñajunʼ ndrígúlú ga̱jma̱a̱ rí na̱ʼkhu̱ ñawúnlú numuu rí Jeobá niʼtátsrigúu ku̱ba̱ʼ rígi̱”. Ajngóo nimbánuu índo̱ Dios niyenga níjni rí niʼtátsrigúu ku̱ba̱ʼ (Gén. 5:29; 8:21). Rí mbiʼi xúgi̱, e̱ji̱n bi̱ nduyamajkuíí má xúʼko̱ Jeobá naʼni maʼni̱i̱ a̱jkiu̱ún bi̱ kuwa náa guʼwún. Ma̱ndoo mumbañún bi̱ nandún kuñún maʼngu̱u̱n muraʼníí tsáʼkhá ga̱jma̱a̱ makáwíin náa inuu maguma gámbáa, rí maʼni itháan mba̱a̱ ki xóo Ruʼwa mbiiʼ.

18. Ndiéjunʼ gambáyulú maʼngulú maski ajndu muraʼníí xkujndu rá.

18 Rí mbiʼi xúgi̱, mbaʼin wéñuʼ xa̱bu̱ naʼni̱i̱ a̱jkiu̱ún índo̱ nutajkháan, nundxa̱ʼwa̱a̱ edxu̱ún ga̱jma̱a̱ numuu xkri̱da rí na̱ʼkha̱ náa Biblia ga̱jma̱a̱ nduyááʼ mambaxúún gajmiún eʼwíínʼ xa̱bi̱i̱ Dios (atraxnuu Salmo 145:18, 19). * Nduʼyáá rí mbáwíi Jeobá ma̱ndoo maʼni rí maʼni̱i̱ a̱jkiu̱lú kámuu, ga̱jma̱a̱ rúʼko̱ ma̱ndoo mambáyulúʼ maʼngulú muraʼníí asndu káʼnii tsáʼkhá o gamiéjunʼ, xó má xúgi̱ ga̱jma̱a̱ nda̱wa̱á.

[Mbaʼa nota]

^ párr. 2 Jeremías 29:11, 12: “Numuu rí i̱ndó ikhúúnʼ eyo̱o̱ rí endxaʼwamínáʼ ga̱jma̱á numala —eʼthí Jeobá—, nandxaʼwamínáʼ rí májánʼ, raʼkháa dí ra̱májánʼ, mu makuwáanʼ májánʼ nda̱wa̱á ga̱jma̱a̱ makánala mbá rí wíji̱ ma̱ʼkha̱. Ikháanʼ mundxa̱ʼwo̱ʼ ga̱jma̱a̱ mutakháñuʼ, ga̱jma̱a̱ ikhúúnʼ madxawanlaʼ”.

^ párr. 10 1 Samuel 1:4-7: “Ni̱jkha̱nú mbóo mbiʼi rí Elqaná nixnáxi̱ tsigijñaʼ, ga̱jma̱a̱ nixnúu rí kaʼyoo Peniná bi̱ nindxu̱u̱ a̱ʼgiu̱u̱, ga̱jma̱a̱ xúgínʼ e̱ji̱i̱n ikhaa; Mú Ana káaʼ nixnúu mbóo. Mú ikhaa nindxu̱u̱ bi̱ phú nandoo kaʼyoo, ga̱jma̱a̱ Jeobá má niʼni rí xagíʼdiin e̱ji̱n. Ma̱ngaa a̱ʼgú ga̱jma̱a̱, natsíjmaa má xúʼko̱ mu maʼni rí maxmiéjúnʼ numuu rí Jeobá niʼni rí xagíʼdiin e̱ji̱n. Ga̱jma̱a̱ rígi̱ naʼni mámbá tsiguʼ, mámbá rí Ana natsimuu náa goʼwóo Jeobá. A̱ʼgú ga̱jma̱a̱ natsíjmaa wéñuʼ rí asndu naʼniuu mambiyaʼ ga̱jma̱a̱ rí asndu tsekuiʼtsu”.

^ párr. 14 1 Tesalonicenses 2:7, 11, 12: “Rí phú ninixu, nini̱ndxu̱xu̱ʼ xa̱bu̱ májánʼ náa ikháanʼla, xóo mbáa náná naʼnimbanuu e̱ji̱i̱n ga̱jma̱a̱ nandoo kaʼñúún. Ikháanʼ ndu̱ya̱a̱ májánʼ, dí xóo eʼni mbáa xa̱bu̱ gajmíi̱n e̱ji̱i̱n, ikháanʼxu nuxpriguala, nuxnala tsiakii ga̱jma̱a̱ nuthala rí ndiya̱a̱xu, mu majngruigala májánʼ náa inuu Dios, bi̱ nandxa̱ʼwála náa reino ndrígóo ga̱jma̱a̱ gloria”.

^ párr. 18 Salmo 145:18, 19: “Jeobá xtáa mijngii náa xúgínʼ xa̱bu̱ bi̱ nutakáñii, náa xúgínʼ xa̱bu̱ bi̱ nutháán rí gajkhun. Maʼnimbánuu rí nandún xa̱bu̱ bi̱ nuni ñajunʼ ikhaa, ga̱jma̱a̱ maʼdxaun índo̱ gutakháñii rí mambáñun, ma̱ngaa maʼni káwíin”.