Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (rí muʼnigajmaa)  |  Junio tsiguʼ 2017

Gusngajmá rí Jeobá kaʼyoo maʼtáñajunʼ

Gusngajmá rí Jeobá kaʼyoo maʼtáñajunʼ

“Jeobá, mínaʼ ikháánʼ, kaʼyaʼ rí matrigú gloria, gamajkhu ga̱jma̱a̱ tsiakii, numuu rí ikháánʼ nitani xúgíʼ dí rígá” (REV. 4:11).

AJMÚÚ 112 GA̱JMA̱A̱ 133

1, 2. Ndiéjunʼ gáʼni rí makuwáanʼ gajkhun rá. (Atayáá timbá xtiʼkhu.)

XÓO má ndiʼyáá náa artículo rí ninújngoo, Gixa̱a̱ naʼthí rí Jeobá rakáʼyoo maʼtáñajunʼ náa numbaaʼ ga̱jma̱a̱ rí xa̱bu̱ numbaaʼ makuwá itháan májánʼ á mu ikhiin etañajumijná. Mú lá gajkhun rúʼko̱ ráʼ. Gundxaʼwamíjna̱ rí bi̱ nuraʼwíí mutañajumijná makuwá kámuu mbiʼi. Lá itháan májánʼ gakuwa á mu ikhiin gutañajumijná ki xóo rí maʼtáñajúúnʼ Dios xáʼ. Lá naku̱ma̱ʼ ikháánʼ rí maraxtaa itháan gagi á mu ma̱ndoo matani asndu ndiéjunʼ má rí eyaʼ ga̱jma̱a̱ ma̱ngaa maraxtaa kámuu mbiʼi ráʼ.

2 Nimbáa xándoo gáriʼña̱a̱ ga̱jma̱a̱ numaʼ. Xúgiáanʼ gíʼmaa mundxaʼwamíjna̱ májánʼ rígi̱. Ragíʼmaa mundxaʼwamíjna̱ a̱jma̱ nuthu rí Dios kaʼyoo maʼtáñajunʼ ga̱jma̱a̱ rí ikhaa maʼtáñajunʼ májánʼ ma̱ngaa rí kaʼyoo mumbáyii. Náa Biblia naxnúlú mbaʼa numuu rí ma̱ndoo makuwáanʼ gajkhun ga̱jma̱a̱ numuu rígi̱. Mbá xkri̱da, guʼyáá rí naʼthí ga̱jma̱a̱ numuu rí Jeobá kaʼyoo maʼtáñajunʼ numuu rí ikhaa niʼni xúgíʼ dí rígá.

JEOBÁ KAʼYOO MAʼTÁÑAJUNʼ

3. Náa numuu rí Jeobá nindxu̱u̱ bi̱ mbáwíi bi̱ kaʼyoo maʼtáñajunʼ rá.

3 Jeobá nindxu̱u̱ mbáwíi bi̱ kaʼyoo maʼtáñajunʼ, numuu rí nindxu̱u̱ Dios bi̱ gíʼdoo xúgíʼ tsiakii ga̱jma̱a̱ bi̱ Niʼniáanʼ (1 Crón. 29:11; Hech. 4:24). Náa mbá visión, bi̱ 144,000 bi̱ mutañajunʼ  gajmiún Cristo nuthi: “Jeobá, mínaʼ ikháánʼ, kaʼyaʼ rí matrigú gloria, gamajkhu ga̱jma̱a̱ tsiakii, numuu rí ikháánʼ nitani xúgíʼ dí rígá, ga̱jma̱a̱ numaʼ ikháánʼ nindoo niguma xúgíʼ” (Rev. 4:11). Jeobá niʼni xúgíʼ, ikha jngó kaʼyoo maʼtáñajúúnʼ xa̱bu̱ numbaaʼ ga̱jma̱a̱ ángeles.

4. Náa numuu rí muxuxímíjná náa rí Jeobá kaʼyoo maʼtáñajunʼ nindxu̱u̱ mbá dí ra̱májánʼ rí nuraʼwíí muʼni rá.

4 Satanás rakáʼyoo maʼtáñajunʼ náa numbaaʼ numuu rí nimbá nda̱a̱ rí niʼni. Índo̱ ikhaa gajmíi̱n timbíi̱n xa̱bu̱ táʼnduun rí Jeobá maʼtáñajúúnʼ, nini mbaʼumíjna̱ (Jer. 10:23). Gajkhun má rí ma̱ndoo muraʼwíí rí muni ga̱jma̱a̱ ma̱ndoo muraʼwíí rí muniñaʼ Dios, mú, lá kaʼñúún rí muni xáʼ. Na̱nguá. Rígi̱ naniñulú muraʼwíí rí muʼni xúgíʼ mbiʼi, mú rakáʼyulú muxuxímíjná náa bi̱ Niʼniáanʼ. Nakujmaa kaʼwu rí muʼni mbaʼumíjna̱ náa inuu Jeobá nindxu̱u̱ mbá dí ra̱májánʼ rí nuraʼwíí muʼni. Xa̱bu̱ numbaaʼ ndayúlú rí Dios maʼtáñajunlú.

5. Náa numuu nduʼyáá májánʼ rí jmbu nindxu̱u̱ rí naraʼwíí maʼni Dios rá.

5 Rígá i̱mba̱ numuu rí Jeobá kaʼyoo maʼtáñajunʼ: Ikha naʼtáñajunʼ ga̱jma̱a̱ jmbu káxi̱. Ikhaa mínaʼ eʼthí: “Ikhúúnʼ ni̱ndxu̱ʼ Jeobá, Bi̱ tsétumuu ngajua ndrígóo, rí jmbu ga̱jma̱a̱ bi̱ naʼtáñajunʼ májánʼ náa ku̱ba̱ʼ; numuu dí rígi̱ naniguʼ wéñuʼ” (Jer. 9:24). Náa ikhaa e̱ʼkha̱ rí jmbu. Tséyóoʼ mbayáaʼ nimbá xtángoo rí nini xa̱bu̱ aʼkhá mu maraʼwíí rí nindxu̱u̱ jmbu. Ga̱jma̱a̱ xtángoo rí kiʼniraʼmáʼ rí nixnúún xa̱bu̱ na̱ʼkha̱ náa rí jmbu káxi̱ ndrígóo. Náa Biblia naʼthí: “Rí jmbu ga̱jma̱a̱ rí májánʼ rígá náa naratá ñájunʼ ikháánʼ [Jeobá]”. Ikha jngó nduʼyáá gajkhun rí xúgíʼ xtángoo ndrígóo, ikha ga̱jma̱a̱ rí naraʼwíí maʼni nindxu̱u̱ jmbu (Sal. 89:14; 119:128). Mú, Satanás, naʼthí dí ra̱májánʼ eʼtáñajunʼ Jeobá, mu ikhaa tséʼngo̱o̱ gáʼni rí náa numbaaʼ marigá má xúʼko̱ dí jmbu.

6. Náa numuu rí Jeobá kaʼyoo maʼtáñajunʼ náa numbaaʼ rá.

6 I̱mba̱ numuu rí Jeobá kaʼyoo maʼtáñajunʼ xúgíʼ numbaaʼ numuu rí ikhaa gíʼdoo ku̱ma̱ ga̱jma̱a̱ najmañuu wéñuʼ rí ndayóoʼ mu mañewu̱u̱n xúgíʼ numbaaʼ. Gundxaʼwamíjna̱ ga̱jma̱a̱ numuu tsiakii rí nixnúu A̱ʼdióo mu maʼni thanún xa̱bu̱ rí nimbáa xa̱bu̱ thana tséʼngo̱o̱ maʼni thanún (Mat. 4:23, 24; Mar. 5:25-29). Rí niʼni Jesús, Dios táʼyoo rí nindxu̱u̱ mbá milagro, bi̱ ndaʼyoo xú káʼnii ñajunʼ xuyulúʼ ga̱jma̱a̱ maʼngo̱o̱ maʼni thanulúʼ. Ma̱ngaa gíʼdoo ku̱ma̱ rí ndayóoʼ mu maʼnigabiín bi̱ nikháñun ga̱jma̱a̱ maʼni rí xárígá gamiéjunʼ.

7. Náa numuu rí ku̱ma̱ ndrígóo Jeobá nindxu̱u̱ itháan mba̱a̱ ki xóo ku̱ma̱ ndrígóo Satanás rá.

7 Numbaaʼ rí naʼtáñajunʼ Satanás ndayáʼ má xúʼko̱ xú káʼnii maʼni gámbáa xúgíʼ xkujndu rí narígá náa mámbá xuajen ga̱jma̱a̱ náa xúgíʼ numbaaʼ. I̱ndó Jeobá najmañuu ma̱ʼkha̱ kayóo rí tsímáá náa numbaaʼ (Is. 2:3, 4; 54:13). Á mu ikháanʼ nduʼyáaʼ ku̱ma̱ ga̱jma̱a̱ rí najmañuu Dios itháan gundxaʼwáá edxu̱lúʼ xóo nindxa̱ʼóo edxu̱u̱ Pablo, bi̱ niʼthí: “¡Dios ra̱ʼkhá tháán gíʼdoo, ga̱jma̱a̱ gíʼdoo wéñuʼ edxu̱u̱ ga̱jma̱a̱ ra̱ʼkhá tháán gíʼdoo ku̱ma̱! ¡Nditháan xáʼngaʼ gákruaʼaʼ rí naʼni, ma̱ngaa nditháan xáʼngaʼ gátaxkamaa kambo̱o̱!” (Rom. 11:33).

RÍ NAʼTÁÑAJUNʼ JEOBÁ ITHÁAN MÁJÁNʼ

8. Rí xóo eʼtáñajunʼ Dios, ndiéjunʼ rí phú itháan nanigua̱ʼ ikháánʼ rá.

8 Náa Biblia raʼkháa i̱ndó nasngájma rí kaʼyoo maʼtáñajunʼ. Ma̱ngaa naʼthí rí xóo eʼtáñajunʼ nindxu̱u̱ itháan májánʼ. Mbóo nindxu̱u̱ rí naʼtáñajunʼ ga̱jma̱a̱ ngajua. Nanigulúʼ xóo eʼtáñajunlú. Ikhaa “naʼni mba̱a̱ a̱jkiu̱u̱n, ga̱jma̱a̱ nagáwiinʼ a̱jkiu̱u̱n, na̱nguá kiʼnáa nacha̱ ga̱jma̱a̱ ra̱ʼkhá tháán eyoo kaʼyulúʼ ga̱jma̱a̱ gajkuwiin” (Éx. 34:6). Ndaʼyamajkhún xa̱bu̱ numbaaʼ xó má kaʼyoo. Nañewu̱nlú itháan ki xóo rí nuñeumíjna̱  ikháanʼ. Raʼkháa xóo niʼthí Satanás, Jeobá nandoo maxnún rí májánʼ xa̱bi̱i̱ bi̱ ni̱ndxu̱ún jmbiin. Asndu nixnáa a̱ʼdióo bi̱ nandoo kaʼyoo mu ma̱ndoo makuwáanʼ kámuu mbiʼi (atraxnuu Salmo 84:11 * ga̱jma̱a̱ Romanos 8:32). *

9. Xú káʼnii eʼyáá rí Dios naxmiéjunʼ kaʼyoo mámbáa rí ikháanʼ rá.

9 Jeobá naxmiéjunʼ kaʼyoo xuajñu xóo grupo, mú ma̱ngaa naxmiéjunʼ kaʼyoo mámbáa xa̱bu̱. Gundxaʼwamíjna̱ ga̱jma̱a̱ numuu xkri̱da dí nirígá nákha mbiʼi rí nikuwa jueces náa Israel. Mbá ajtsú ciento tsiguʼ Jeobá nijmiuu jueces mu maʼni káwíin israelitas náa majñúnʼ xa̱bu̱ sia̱nʼ. Náa mbiʼi rí nirígá wéñuʼ xkujndu, ikhaa niyaxu̱u̱ Rut, mbáa a̱ʼgu̱ bi̱ raʼkháa israelita mu ikhaa niʼni mbaʼa rí gakhi̱i̱ mu maxtáa náa xuajñu Jeobá. Ikhaa niʼni tsajkurámááʼ ga̱jma̱a̱ nixniúu mbáa ajmbio̱o̱ ga̱jma̱a̱ mbáa a̱ʼdióo. Ma̱ngaa, índo̱ gátuxi̱i̱, Rut mbaʼyoo rí náa a̱ʼdióo ni̱ʼkha̱ Mesías. Ga̱jma̱a̱ mbaʼyoo rí náa Biblia nigumaraʼmáʼ rí niʼni ma̱ngaa rí mbá libro kayá mbiʼyuu. Lá natatsaʼwáminaʼ xú káʼnii gákumu̱u̱ xáʼ. (Rut 4:13; Mat. 1:5, 16.)

10. Rí naʼtáñajunʼ Jeobá, lá nda̱a̱ nimbá rí maniñulú muʼni ráʼ. Arathá.

10 Jeobá na̱nguá nindxu̱u̱ mbáa Xa̱bu̱ Ñajunʼ bi̱ naʼniún xa̱bu̱ xó má eyoo ikhaa ga̱jma̱a̱ na̱nguá nindxu̱u̱ gujkhuʼ a̱jkiu̱u̱n. Xa̱bu̱ bi̱ naʼtáñajúnʼ na̱nguá ni̱ndxu̱ún esclavos ga̱jma̱a̱ nakuwa gagi (2 Cor. 3:17). David niʼthí ajngáa rígi̱: “Náa xtáa rígá rí gíʼdoo wéñuʼ numuu ga̱jma̱a̱ rí nambiʼi Tsiakii ga̱jma̱a̱ gagi rígá náa xtáa” (1 Crón. 16:7, 27). Ga̱jma̱a̱ mbáa salmista bi̱ nigumbiʼyuu Etán niʼthí: “Tsímáá kuwa xa̱bu̱ bi̱ nuninuʼ gitsawaskha gagi. Oh Jeobá, jngruigu̱u̱n náa agiuʼ inaʼ. Náa mbiʼyaaʼ makuwá gagi xúgíʼ mbiʼi, ga̱jma̱a̱ náa rí jmbu matayamajkhún” (Sal. 89:15, 16).

11. Ndiéjunʼ gándoo muʼni mu mbuʼyáá rí xóo eʼtáñajunʼ Dios nindxu̱u̱ itháan májánʼ rá.

11 Á mu itháan gundxaʼwamíjna̱ rí Jeobá májánʼ a̱jkiu̱u̱n, itháan májánʼ gúʼyáá rí ikhaa naʼtáñajunʼ májánʼ. Makumulúʼ xóo salmista bi̱ niʼthí: “Mbóo mbiʼi náa rexa̱a̱ʼ nindxu̱u̱ itháan májánʼ ki xóo mbá mil i̱mba̱ níʼkhá” (Sal. 84:10). Nda̱a̱ imbo̱ʼ xóo rí ma̱ndoo maʼni. Jeobá niʼniáanʼ, ikha jngó ndaʼyoo ndiéjunʼ eyúlú mu makuwáanʼ gagi ga̱jma̱a̱ naxnúlú ga̱jma̱a̱ xúgíʼ a̱jkiu̱u̱n. Asndu káʼnii má rí gandu̱ʼu̱lú nindxu̱u̱ rí mambáyulúʼ, ga̱jma̱a̱ rí muʼnimbulúʼ maʼni rí makuwáanʼ tsímáá, maski ajndu maʼniulú gakhi̱i̱ muʼni tikhu (atraxnuu Isaías 48:17). *

12. Xú káʼnii phú numuu rí mumbayíí Jeobá rí ikhaa maʼtáñajunlú rá.

12 Náa Biblia naʼthí rí nda̱wa̱á rí Cristo gáʼtañajunʼ mbá Mil tsiguʼ, tikhun xa̱bu̱ xáʼndun rí Jeobá maʼtáñajunʼ (Rev. 20:7, 8). Náa numuu gúní xúʼko̱ kaʼnii xá. Numuu rí Satanás, bi̱ magajnáa náa guʼwá e̱jua̱nʼ, magíʼ maʼni rí xa̱bu̱ maʼndún kuyamijná i̱ndó ikhiin, xó má eguʼwun eʼni, numuu rí nandoo maʼni nduwiinʼ. Mbáa magíiʼ maʼni rí xa̱bu̱ makumún rí ma̱ndoo makuwa kámuu mbiʼi rí xáʼyóoʼ munimbu̱ún kuyáá Jeobá. Mú rígi̱ xándoo marigá. Mú gíʼmaa muraximíjna̱ á mu manigulúʼ nduwaʼ rúʼko̱. Á mu nandulúʼ kuʼyáá Jeobá ga̱jma̱a̱ nuʼni ñajunʼ numuu rí ikhaa májánʼ a̱jkiu̱u̱n ma̱ngaa numuu rí ikhaa nindxu̱u̱ Dios bi̱ itháan mba̱a̱ bi̱ xtáa mekhuíí, maguiyulúʼ kuʼyáá nduwaʼ ndrígóo Satanás. Maʼndulú makuwáanʼ  má xúʼko̱ náa rí naʼtáñajunʼ Dios, rí ikhaa kaʼyoo ga̱jma̱a̱ nindxu̱u̱ májánʼ.

GUMBAYÍÍ MÁ XÚʼKO̱ DIOS RÍ IKHAA KAʼYOO MAʼTÁÑAJUNʼ

13. Xú káʼnii kagujtuminaʼ rí mbuʼyaridáá Dios ga̱jma̱a̱ mumbayíí rí ikhaa kaʼyoo maʼtáñajunʼ xá.

13 Xó má ndiʼyáá, rí Jeobá kaʼyoo maʼtáñajunʼ, ma̱ngaa xóo naʼtáñajunʼ nindxu̱u̱ itháan májánʼ. Ikha jngó xáʼyoo mundxaʼwáá a̱jma̱ nuthu edxu̱lúʼ rí mbaʼyoo mumbayíí rí ikhaa kaʼyoo maʼtáñajunʼ. Numbaʼyíí nuʼni xó má eʼngo̱o̱ mu muʼni rí jmbu ga̱jma̱a̱ muʼni má xúʼko̱ ñajunʼ. Ma̱ngaa muʼni xó má eniguʼ ikhaa. Xúʼko̱ raʼkháa i̱ndó mumbayíí rí itháan májánʼ eʼtáñajunlú, rí ma̱ngaa nusngájma rí nandulúʼ kuʼyáá xóo eʼtáñajunʼ (atraxnuu Efesios 5:1, 2). *

14. Xú káʼnii gándoo guyaridáá Jeobá bi̱ kuya̱ edxu̱u̱ ga̱jma̱a̱ bi̱ nuxna ikha náa mbá guʼwíin rá.

14 Náa Biblia naʼsngúlú rí Jeobá naʼtáñajunʼ ga̱jma̱a̱ ngajua. Ikha jngó, bi̱ kuya̱ edxu̱u̱ náa mbá guʼwá bi̱ nandún kuyáá rí ikhaa maʼtáñajunʼ xutsudi̱i̱n eʼwíínʼ o asndu muni rí xóo ikhiin kaʼñún mutañajunʼ. Rí phú muni, mbuyaridáá Jeobá. Xúʼko̱ niʼni Pablo, bi̱ ndiʼyáridoo Dios ga̱jma̱a̱ A̱ʼdióo (1 Cor. 11:1). Tatiyuʼ ni tatsudíín eʼwíínʼ mu muni rí jmbu, rí phú niʼni nixkaxi̱i̱n muni ga̱jma̱a̱ ngajua (Rom. 12:1; Efes. 4:1; Filem. 8-10). Xúʼko̱ eʼni Jeobá. Ga̱jma̱a̱ xúʼko̱ gíʼmaa muni bi̱ nandún kuyáá ga̱jma̱a̱ bi̱ numbayíí rí ikhaa maʼtáñajunʼ.

15. Náa numuu rí mbuʼyamajkuíí awan náa xuajñu Dios masngájma rí nandulúʼ rí Dios maʼtáñajunʼ rá.

15 Xú káʼnii imbo̱ʼ rí xóo numbayíí Xa̱bu̱ Ñajunʼ ndrígóo Dios rá. Rí muñajunʼ ga̱jma̱a̱ mbuʼyamajkún bi̱ ikhaa nigruigi̱i̱n mu mutañajunʼ. Muyambáá náa awan rí nikhánulú náa xuajñu Dios maski ajndu  tsikru̱ʼu̱lú májánʼ o tsíyulú marigá xúʼko̱ kaʼnii. Rígi̱ nindxu̱u̱ mixtiʼkhu rí xóo nuni náa numbaaʼ, mú xúgi̱ kaʼnii eguma náa naʼtáñajunʼ Dios (Efes. 5:22, 23; 6:1-3; Heb. 13:17). Á mu nuʼnimbulúʼ, mambáyulúʼ, numuu rí Jeobá nandoo makuwáanʼ itháan májánʼ.

16. Xú káʼnii eraʼwíí rí muni bi̱ nduyáá rí Jeobá kaʼyoo maʼtáñajunʼ rá.

16 Rí nuraʼwíí muʼni ma̱ngaa nasngájma á mu nuyambáá rí Dios maʼtáñajunʼ o na̱nguá. Ikhaa tseʼthúlú rí gíʼmaa muʼni náa mámbá rí eyulú muʼni. Ikhaa i̱ndó naʼthúlúʼ ndiéjunʼ endxa̱ʼwáminaʼ. Mbá xkri̱da, tsexnúlú mbá lista rí xú káʼnii xtíin rí gúʼgíʼ, ikhaa naʼthúlúʼ rí nandoo rí xtíñúlú mani̱ndxu̱u̱ májánʼ ga̱jma̱a̱ rí kaʼyoo mugíʼ cristianos (1 Tim. 2:9, 10). Ma̱ngaa tsíyoo rí eʼwíínʼ majngrádiinʼ ga̱jma̱a̱ rí gúʼni ga̱jma̱a̱ rí xáʼni gawúunʼ rí guraʼwíí muʼni (1 Cor. 10:31-33). Nusngájma rí nanigulúʼ xóo eʼtáñajunʼ ga̱jma̱a̱ numbayíí índo̱ nuraʼwíí muʼni xóo eyoo ikhaa raʼkháa rí nandulúʼ ikháanʼ.

Guʼyamajkuíí rí Jeobá kaʼyoo maʼtáñajunʼ índo̱ guraʼwíí rí muʼni ga̱jma̱a̱ náa guʼwúlú. (Atayáá kutriga̱ 16 asndu 18.)

17, 18. Arathá tikhuaʼ rí xú káʼnii bi̱ nidamijná ma̱ndoo muyambáá rí Jeobá maʼtáñajunʼ.

17 Guʼyáá xú káʼnii bi̱ nidamijná ma̱ndoo muyambáá rí xóo eʼtáñajunʼ Jeobá. Tikhun xa̱bu̱ gajmii, índo̱ kuwa mbóó nanindxu̱u̱ itháan gakhi̱i̱ ki xóo rí nindxa̱ʼwa̱míjna̱. Ndiéjunʼ gándoo gúni xá. Ma̱ndoo mundxaʼwamíjna̱ xú káʼnii Dios niʼniún xa̱bu̱ Israel. Ikhaa ndiʼyoo rí ninindxu̱u̱ xóo ajmbio̱o̱ xuajen rúʼko̱ (Is. 54:5; 62:4). Rígi̱ ninindxu̱u̱ mbá “matrimonio” mingíjyúuʼ wéñuʼ. Mú, Jeobá tágaaʼ nacha̱. Mbaʼa miʼtsú niʼni mba̱a̱ a̱jkiún kaʼñún israelitas ga̱jma̱a̱ ninindxu̱u̱ jmbii náa rí nikudaminaʼ maʼni ga̱jma̱a̱ numún ikhiin (atraxnuu Salmo 106:43-45). * Lá ragájkhun rí xóo nandoo kaʼyulú Jeobá naʼni muxuʼmamijná náa ikhaa xáʼ.

18 Cristianos bi̱ nidamijná bi̱ nandún kuyáá Jeobá nugíʼ nduyaridáá. Tségíʼ muniñamijna̱á ga̱jma̱a̱ mbá dí ragíʼdoo numuu rí tséʼkha̱ náa Biblia. Nakru̱ʼu̱u̱n rí Jeobá niruwi̱i̱n ga̱jma̱a̱ nandoo rí makuwá má xúʼko̱. Xó má naʼthí náa Santas Escrituras, i̱ndó á mu mbáa rí ikhiin nakudaminaʼ aʼkhá ga̱jma̱a̱ imba̱a̱ ma̱ndoo muniñami̱jna̱a̱ ga̱jma̱a̱ munigu̱nʼ mbu̱júu̱ (Mat. 19:5, 6, 9). Á mu nuni mbá tsiakimijna mu muñewa̱a̱n rí nidamijná, kuwa ruyambáá mu maʼtáñajunʼ Jeobá.

19. Ndiéjunʼ gáʼyóóʼ muʼni índo̱ gakiéʼkulú rá.

19 Numuu rí ñajunlú xa̱bu̱ aʼkhá, marigá mbiʼi rí muʼni gawíínʼ Jeobá. Ikhaa ndaʼyoo rígi̱, mú nikunguanʼ A̱ʼdióo mu maʼtsiwáanʼ numuu rí nandoo kaʼyulú. Ikha jngó gíʼmaa munda̱ʼa̱a̱ Jeobá rí maʼni mba̱a̱ a̱jkiu̱u̱n kaʼyulú índo̱ gakiéʼkulú (1 Juan 2:1, 2). Xaxmiéjunlú wéñuʼ ga̱jma̱a̱ numuu rí nakiéʼkulu; guʼnimíjna̱ majmañulúʼ ga̱jma̱a̱ rí nikiéʼkulu. Á mu nuxuʼmámíjná náa Dios, ikhaa maʼni mba̱a̱ a̱jkiu̱u̱n kaʼyulú ga̱jma̱a̱ mambáyulúʼ maʼni̱i̱ náa nigawúnlú ma̱ngaa rí maʼngulú muraʼníí rí gáʼkha̱ nda̱wa̱á (Sal. 103:3).

20. Náa numuu rí gíʼmaa muyambáá rí Jeobá maʼtáñajunʼ rá.

20 Jeobá maʼtáñajúúnʼ xúgínʼ xa̱bu̱ náa numbaaʼ nuxi̱ʼ, ga̱jma̱a̱ xúgiáanʼ majmañulúʼ kambo̱o̱ rí nindxu̱u̱ jmbu (Is. 11:9). Mú kuwáanʼ rajmañulú ga̱jma̱a̱ numuu ikhaa. Ga̱jma̱a̱ najngiyuu itháan índo̱ nimbáa xáʼthi rí Jeobá rakáʼyoo maʼtáñajunʼ. Rí xúgi̱ ma̱ndoo muyambáá rí ikhaa maʼtáñajunʼ índo̱ nuʼnimbulúʼ, nuʼni ñajunʼ má xúʼko̱ ga̱jma̱a̱ nuʼnimi̱jna̱ xó má eyoo mu mbuʼyaridáá náa xúgíʼ rí nuʼni.

[Mbaʼa nota]

^ párr. 8 Salmo 84:11: “Numuu rí Jeobá Dios nindxu̱u̱ xóo a̱jkha̱ʼ ga̱jma̱a̱ escudo; ikhaa nayambáá ga̱jma̱a̱ naxná gloria. Jeobá xariya kaʼñúnʼ rí májánʼ bi̱ nuni rí jmbu”.

^ párr. 8 Romanos 8:32: “Numuu rí táʼni mba̱a̱ a̱jkiu̱u̱n kaʼyoo A̱ʼdióo, rí asndu nixnáxi̱i̱ ga̱jma̱a̱ numuu xúgiáanʼ, náa numuu rí xáxnulú ga̱jma̱a̱ numuu ikhaa xúgíʼ i̱ʼwáʼ xá.

^ párr. 11 Isaías 48:17: “Rígi̱ nindxu̱u̱ rí niʼthí Jeobá, bi̱ Niʼtsiriñanʼ, bi̱ nindxu̱u̱ Santo náa xuajin Israel: “Ikhúúnʼ, Jeobá, ni̱ndxu̱ʼ Dios ndrígáʼ, bi̱ naʼsngáaʼ xú káʼnii mambáyaʼ ikháánʼ, bi̱ naʼtháanʼ náa kamba̱a̱ gíʼmaa majngruigaʼ”.

^ párr. 13 Efesios 5:1, 2: “Ikha jngó, guyaridáá Dios, xóo e̱ji̱i̱n bi̱ nandoo kaʼyala, ga̱jma̱a̱ gajngruigala má xúʼko̱ ga̱jma̱a̱ ngajua, xó má Cristo nindoo kaʼyala ma̱ngaa nixnáximinaʼ ga̱jma̱a̱ numala xóo tsigijñaʼ náa Dios, mbá rí ndataun wéñuʼ”.

^ párr. 17 Salmo 106:43-45: “Mbaʼa nuthu niʼni káwíin, mú ikhiin nixuximi̱jna̱ ga̱jma̱a̱ túnimbu̱ún, ga̱jma̱a̱ makuwa náa majñu̱ʼ aʼkhún. Ga̱jma̱a̱ ikhaa ndaʼyoo índo̱ numíniiʼ ga̱jma̱a̱ índo̱ rí ikhiin nundxa̱ʼwa̱ rí mambáñun. Ma̱ngaa narmáʼáan a̱jkiu̱u̱n ga̱jma̱a̱ numuu rí nimbánuu gajmíi̱n ga̱jma̱a̱ nigáwiinʼ a̱jkiu̱u̱n kaʼñún numuu rí nindoo kaʼñún má xúʼko̱”.