Atambaʼtaa mu matraxnuu

Anújngaaʼ náa imbo̱o̱ ináa

Ayuʼ náa naʼthí rí xú káʼnii nindxu̱u̱ ináa

Bi̱ nutaraʼa numuu Jeobá

me̱ʼpha̱a̱

Bi̱ Nayejngoo (rí muʼnigajmaa)  |  Noviembre tsiguʼ 2016

Kuwaanʼ organizados ruʼnimbaníí ikha ndrígóo Dios náa libro ndrígóo

Kuwaanʼ organizados ruʼnimbaníí ikha ndrígóo Dios náa libro ndrígóo

“Mínaʼ Jeobá nigiʼdoo wéñuʼ edxu̱u̱ índo̱ niʼni Ku̱ba̱ʼ. Ga̱jma̱a̱ nindxa̱ʼóo májánʼ edxu̱u̱ índo̱ nigíʼ mekhu” (PROVERBIOS 3:19).

AJMÚÚ 105 GA̱JMA̱A̱ 107

1, 2. a) Ndiéjunʼ ethi tikhun xa̱bu̱ rí Dios gíʼdoo mbá organización rá. b) Ndiéjunʼ gúʼyáá náa artículo rígi̱ rá.

TIKHUN xa̱bu̱ nuthi rí mu mbuyamajkuíí Dios tseyóoʼ mbá organización rí maxnulú ikha. Nuthi rí i̱ndó ndayóoʼ mambáxulúʼ gajmiúlú ikhaa. Lá gajkhun rúʼko̱ ráʼ.

2 Náa artículo rígi̱ guʼyáá rí Jeobá naʼni xúgíʼ xóo kaʼyoo ga̱jma̱a̱ naxná ikha náa xuajñu (atayáá kúgumaʼá “Ndiéjunʼ eyoo gáʼthúu̱n”). Ma̱ngaa mbuʼyáá ndiéjunʼ rí gíʼmaa muʼni índo̱ xuajñu Jeobá naʼthúlúʼ rí muʼni (1 Cor. 14:33, 40). Náa timbá siglo, cristianos nunimbánii rí naʼthí náa Escrituras. Ga̱jma̱a̱ numuu rígi̱ nitaraʼa ajngáa ndrígóo Reino náa mbaʼa xuajen. Rí mbiʼi xúgi̱ ikháanʼ nuniʼñáʼ rí Biblia maxnúlú ikha ga̱jma̱a̱ nuʼnimbulú ikha rí naxnúlú xuajñu Dios. Ikha jngó nandoo nuʼtáraʼa ajngáa ndrígóo Reino náa xúgíʼ tsu̱du̱u̱ Ku̱ba̱ʼ. Ma̱ngaa nuʼni rí congregación marigá mikaʼwu, mbá kambáxu̱u̱n ga̱jma̱a̱ tsímáá.

JEOBÁ NANIGU RÍ MARIGÁ AWAN

3. Xú káʼnii eʼyáá rí Dios naʼni rí kaʼyoo rá.

3 Índo̱ nundxaʼwamíjna̱ náa xúgíʼ rí Jeobá niʼni, nduʼyáá kaʼwu rí ikhaa nindxu̱u̱ mbáa Dios bi̱ naʼni rí kaʼyoo.  Proverbios 3:19 naʼthí rí ikhaa niʼni Ku̱ba̱ʼ numuu rí “nigiʼdoo wéñuʼ edxu̱u̱” ga̱jma̱a̱ “nindxa̱ʼóo májánʼ edxu̱u̱ índo̱ nigíʼ mekhu”. Mú tséʼyáá wéñuʼ ga̱jma̱a̱ numuu rí niʼni wíi Dios. Ikha jngó Biblia naʼthí rí i̱ndó “chíʼgíʼ nindxu̱u̱ rí nuʼdxawíín ga̱jma̱a̱ numuu ikhaa” (Job 26:14). Maski ajndu chíʼgíʼ rí nduʼyáá ga̱jma̱a̱ numuu numbaaʼ nambáyulú mbuʼyáá kaʼwu dí rígá náa rí kaʼyoo (Sal. 8:3, 4). Gundxaʼwamíjna̱ ga̱jma̱a̱ numuu mbaʼin wéñuʼ a̱ʼgua̱a̱n bi̱ nagún rijmaa xó má kaʼyoo. Ma̱ngaa gundxaʼwámijna̱ xú káʼnii planetas dí rígá nagún mbájndi náa gíiʼ A̱jkha̱ʼ. Narígá rígi̱ numuu rí Jeobá nindoo maʼni xúʼko̱. Rí mundxaʼwamíjna̱ rí Jeobá nigidoo wéñuʼ edxu̱u̱ índo̱ niʼni mekhu ga̱jma̱a̱ Ku̱ba̱ʼ naxkaxáanʼ muʼni mba̱a̱, mbuʼyamajkhuíí ga̱jma̱a̱ muguajún jmbu náa ikhaa (Sal. 136:1, 5-9).

4. Náa numuu rí científicos tsejmañún guriʼña̱a̱ mbaʼa graxe̱ rí gíʼdoo wéñuʼ numuu rá.

4 Científicos najmañún mbaʼa wéñuʼ ga̱jma̱a̱ numuu Ku̱ba̱ʼ ma̱ngaa numbaaʼ. Ga̱jma̱a̱ numuu rígi̱ rí makuwáanʼ tséʼni mingíjyúuʼ wéñuʼ. Mú ikhiin tséʼngu̱u̱n gúriʼña̱a̱ graxe̱ rí gíʼdoo wéñuʼ numuu. Mbá xkri̱da, tséjmañún muthi xú káʼnii phú nigíʼdu̱u̱ nirígá numbaaʼ ga̱jma̱a̱ náa numuu dí rígá vida náa numbaaʼ. Ga̱jma̱a̱ mbaʼin xa̱bu̱ tsejmañún muthi náa numuu rí xa̱bu̱ numbaaʼ tsíñún makhañún (Ecl. 3:11). Náa numuu rí mbaʼin xa̱bu̱ tsejmañún muriʼña̱a̱ graxe̱ rígi̱ rá. Mbá numuu nindxu̱u̱ rí mbaʼin científicos ga̱jma̱a̱ eʼwíínʼ xa̱bu̱ nuthi rí Dios na̱nguá xtáa ma̱ngaa nusngáa ga̱jma̱a̱ numuu evolución. Mú Dios nariʼña̱a̱ náa Biblia, libro ndrígóo.

5. Xú káʼnii xkri̱da nasngájma rí xugiáanʼ najmulú xtángoo ndrígóo numbaaʼ rá.

5 Jeobá niʼni xúgíʼ xtángoo ndrígóo numbaaʼ ga̱jma̱a̱ tsixtiʼkhuu. Electricistas, plomeros, ingenieros, pilotos, cirujanos ga̱jma̱a̱ eʼwíínʼ xa̱bu̱ najmún xtángoo rígi̱ mu muni ñajunʼ ndrígu̱ún. Mbá xkri̱da, cirujanos nduyáá náa gándoo guxkamaa a̱jkiu̱u̱n mbáa xa̱bu̱. Náa numuu rá. Numuu rí xúgínʼ nduyáá náa guxkamaa a̱jkiu̱ún bi̱ nunitanún. Náa numuu rá. Numuu rí xúgiáanʼ guáʼdáá a̱jkiu̱lú náa mbóo níʼkhóo. Ga̱jma̱a̱ xúgiáanʼ nduʼyáá rí á mu mbáa xa̱bu̱ nakixi̱i̱ náa mitsidaanʼ majpátriguíi ga̱jma̱a̱ gamíi rí makhañúu. Náa numuu rá. Ga̱jma̱a̱ numuu xtángoo ndrígóo gravedad. Ikha jngó á mu nandulú makuwáanʼ xóó, gíʼmáanʼ mbuʼyamajkuíí xtángoo ndrígóo numbaaʼ.

RÍ DIOS NIʼNI ORGANIZAR

6. Náa numuu naʼni mundxaʼwáá edxu̱lúʼ rí Jeobá nandoo rí xuajñu mbuyamajkuíí xó má kaʼyoo rá.

6 Jeobá niʼni numbaaʼ xóo kaʼyoo. Ikha jngó naʼniulú mundxaʼwáá edxu̱lú rí ikhaa nandoo rí xuajñu mbuyamajkuíí xó má kaʼyoo. Jeobá nixnúlú Biblia mu maʼsngúlú xú káʼnii gíʼmaa mbuʼyamajkuíí. Makuwáanʼ tsímáá i̱ndó á mu nuʼnimbaníí ikha rí naxnúlú Jeobá ga̱jma̱a̱ xuajñu.

7. Ndiéjunʼ ejmañuluʼ rí xú káʼnii kiʼniraʼmáʼ Biblia rá.

7 Biblia nindxu̱u̱ mbá regalo kiejunʼ ndrígóo Dios Tikhun xa̱bu̱ bi̱ nduyáá nuthi rí Biblia nindxu̱u̱ mbá jndu libros ndrígu̱ún judíos ga̱jma̱a̱ cristianos rí tsimbánii rí naʼthí. Mú Dios niʼthí tsíin gúniraʼmáʼ Biblia, nguáná gúni ga̱jma̱a̱ ndiéjunʼ gúniraʼmáʼ. Ikha jngó xúgíʼ libros ikháá má eʼthí ga̱jma̱a̱ nambáyulú makru̱ʼu̱lú rí nandoo maʼsngúlú Dios. Rí Génesis asndu Revelación, Biblia nasngájmulú rí ma̱ʼkha̱ mbáa “tsígáʼ” bi̱ maʼni̱i̱  mbá Ku̱ba̱ʼ mitsaan mbu̱júu̱. Naʼsngúlú rí “tsígaʼ” rígi̱ nindxu̱u̱ Jesucristo ga̱jma̱a̱ dí Reino ndrígóo masngájma rí Jeobá kaʼyoo maʼtáñajunlú (atraxnuu Génesis 3:15; * Mateo 6:10 ga̱jma̱a̱ Revelación 11:15). *

8. Ndiéjunʼ esngájma rí israelitas nikuwá organizados májánʼ wéñuʼ rá.

8 Dios ma̱ngaa niʼni organizar májánʼ wéñuʼ xuajen Israel. Xú káʼnii niʼni xá. Ga̱jma̱a̱ Xtángoo rí nixnúu. Mbá xkri̱da, nikuwa gu̱ʼu̱ bi̱ “nuyambáá xó má kaʼyoo náa riejuun tabernáculo” (Éx. 38:8). Dios ma̱ngaa nixnún ikha xú káʼnii magún kuñu̱u̱n campamento ga̱jma̱a̱ tabernáculo xó má kaʼyoo. Nda̱wa̱á, rey David niʼniún organizar ndxajkun ga̱jma̱a̱ levitas ga̱jma̱a̱ numuu ñajunʼ rí muni náa templo (1 Crón. 23:1-6; 24:1-3). Índo̱ israelitas ninimbu̱ún kuyáá Jeobá, ikhaa naʼni tsajkurámiinʼ. Nakúwa xó má kaʼyoo, tsímáá ga̱jma̱a̱ mbá kambáxu̱u̱n (Deut. 11:26, 27; 28:1-14).

9. Xú káʼnii nikuwa organizados congregación nákha siglo timbá rá.

9 Ma̱ngaa congregación dí nirígá siglo timbá nikuwa organizado. Nákha ikhú nikuwa mbá nguéjmi̱i̱n xa̱bekha bi̱ nixná ikha náa congregación. Nákha ginii i̱ndó apóstoles kuwa ikhí. Mú nda̱wa̱á niwi̱i̱n eʼwíínʼ cristianos bi̱ kuya̱ edxu̱u̱ (Hech. 6:1-6; 15:6). Jeobá niʼni rí xa̱bu̱ bi̱ nuxna ikha ga̱jma̱a̱ cristianos bi̱ numbañún muniraʼmáʼ cartas náa na̱ʼkha̱ ikha ga̱jma̱a̱ xtágabu mu maʼga̱ náa inuu congregación (1 Tim. 3:1-13; Tito 1:5-9). Xú káʼnii nimbáñun congregación rí munimbaníí rí nuthún bi̱ nuxna ikha rá.

10. Ndiéjunʼ nirígá náa congregación nákha timbá siglo índo̱ ninimbáníí rí nithún bi̱ nuxna ikha rá. (Atayáá timbá xtiʼkhu.)

10 (Atraxnuu Hechos 16:4, 5). Nákha siglo timbá, tikhun a̱ngiu̱lú nagún náa congregación mu mutún rí niraʼwíí muni “apóstol, gajma xabo huanu tsi juhua naʼ Jerusalén”. Numuu rí congregación ninimbánii ikha rí nixna, ikhiin “nijanu tsiake tsi naguimbun ri magua’da fe, jame mbamba tsitsi ika ra’ne mba’in”. Xú káʼnii gándoo guʼyaridúún náa congregación xá.

LÁ NUʼNIMBÁNÍÍ IKHAA RÍ NAKANULÚ RÁʼ.

11. Ndiéjunʼ gíʼmaa muni a̱ngiu̱lú índo̱ nundrigú mbá ikha rá.

11 Bi̱ nindxu̱ún Comité ndrígóo Sucursal, superintendentes de circuito, siervos ministeriales ga̱jma̱a̱ bi̱ kuya̱ edxu̱u̱ gíʼmaa munimbu̱ún ikha ndrígóo xuajñu Dios. Náa Biblia naʼthí rí xúgiáanʼ gíʼmaa muʼnimbulúʼ kuʼñúún bi̱ kuya̱ edxu̱u̱ (Deut. 30:16; Heb. 13:7, 17). Á mu nuguajún jmbu náa Jeobá, muʼnimbulú ga̱jma̱a̱ xúxieʼkhá náa ikha rí gundrigúlú. Tsiyulú manindxulú xóo Diótrefes, bi̱ táʼyamajkhún bi̱ kuya̱ edxu̱u̱ náa congregación (atraxnuu 3 Juan 9, 10). * Índo̱ nuʼnimbánii ikha, nuyambáá mu marigá  tsímáá ga̱jma̱a̱ makuwá mbá kambáxu̱u̱n náa congregación. Ikha jngó guraximíjna̱: “Lá nambáñun a̱ngiu̱lú mu muguajún jmbu náa Jeobá ráʼ. Lá nanimboʼ mbá nacha̱ ikha rí naxná xuajñu Dios ráʼ.”

12. Xú káʼnii edrigi̱i̱n bi̱ kuya̱ edxu̱u̱ ga̱jma̱a̱ siervos ministeriales rá.

12 Xíkhoo, Cuerpo Gobernante niriʼkhu̱u̱ xóo magruigi̱i̱n bi̱ kuya̱ edxu̱u̱ ga̱jma̱a̱ siervos ministeriales náa congregación. La Atalaya niʼthí rí cuerpo gobernante nákha timbá siglo nixnáxu̱u̱n ñajunʼ superintendentes viajantes mu magruigi̱i̱n bi̱ kuya̱ edxu̱u̱ ga̱jma̱a̱ siervos ministeriales (atayáá náa sección “Preguntas de los lectores” náa La Atalaya 15 ñajunʼ gu̱nʼ noviembre tsiguʼ 2014). Ikha jngó superintendentes de circuito nigi̱ʼdi̱i̱ nindrigi̱i̱n gu̱nʼ septiembre tsiguʼ 2014. Índo̱ bi̱ kuya̱ edxu̱u̱ nuthi rí mbáa ndxájulú ma̱ndoo mayéʼga edxu̱u̱ o manindxu̱u̱ siervo ministerial, superintendente de circuito nagíʼ maniniʼ ndxájulú ga̱jma̱a̱ bi̱ kuwa náa goʼwóo. Ikha jngó mbáa magajnúu maʼtáraʼa ga̱jma̱a̱ ndxájulú (1 Tim. 3:4, 5). Nda̱wa̱á, superintendente de circuito nawi̱i̱n gajmíi̱n bi̱ kuya̱ edxu̱u̱. Mbá jnduʼ natangi̱i̱n nduyáá tsumáá versículos náa naʼthí rí ndayóoʼ munimbaníí bi̱ kuya̱ edxu̱u̱ ga̱jma̱a̱ siervos ministeriales (1 Tim. 3:1-10, 12, 13; 1 Ped. 5:1-3).

Bi̱ kuya̱ edxu̱u̱ numbayúlú ga̱jma̱a̱ Biblia numuu rí nandún muñewa̱a̱n congregación

13. Xú káʼnii esngajmá rí numbaʼñúún bi̱ kuya̱ edxu̱u̱ rá.

13 Bi̱ kuya̱ edxu̱u̱ numbayúlú ga̱jma̱a̱ Biblia numuu rí nandún muñewa̱a̱n congregación. Gíʼmaa mumbañún ga̱jma̱a̱ muʼniñámíjná muxnulú ikha, numuu dí rígi̱ mambáyulúʼ (1 Tim. 6:3). Nákha siglo timbá, tikhun cristianos kuwa “runi dí rakáʼyoo”. Tsíñun guñajunʼ ga̱jma̱a̱ nuxudamijna̱ náa rakáʼñun. Bi̱ kuya̱ edxu̱u̱ nigíʼ muxprigún, mú ikhiin táʼndun muriʼkumijná. Pablo niʼthún bi̱ kuwa náa congregación rúʼko̱ xú káʼnii gíʼmaa muni̱i̱ mbáa bi̱ naʼni xúʼko̱ kaʼnii. Niʼthún: “Gusngajmáa xa̱bu̱ bugi̱” ga̱jma̱a̱ “ní xambáxala gajmiála”. A̱ngiu̱lú ragíʼmaa mambáxún gajmiún xa̱bu̱ bugi̱, mú ragíʼmaa muni̱i̱ xóo mbáa xa̱bu̱ sia̱nʼ (2 Tes. 3:11-15). Rí mbiʼi xúgi̱, bi̱ kuya̱ edxu̱u̱ nunimijna̱ mumbañún cristianos bi̱ tsénimbu̱ún xtángoo ndrígóo Dios. Mbá xkri̱da, muʼgíʼ muxnáá xtágabu bi̱ najngruigo̱o̱ ga̱jma̱a̱ mbáa bi̱ tséʼni ñajunʼ Jeobá (1 Cor. 7:39). Ga̱jma̱a̱ á mu ndxájulú tsíyoo gáriʼkuminaʼ rá. Bi̱ kuya̱ edxu̱u̱ mbáa muxna mbá discurso náa naʼthí dí rúʼko̱ ma̱ndoo maʼni rí mutanumáá congregación. Á mu bi̱ kuya̱ edxu̱u̱ guxna mbá discurso xúʼko̱ kaʼnii náa congregación ndrígulú, ndiéjunʼ gúʼni rá. Á mu nuniʼnííʼ ndxájulú, ní xambáxulú gajmiúlú. Mu xúʼko̱ ma̱ndoo mumbayíí mbaʼyoo rí xtáa raʼni gachíminaʼ ga̱jma̱a̱ rí tsénigu̱ʼ Jeobá. Mbáa ndxájulú magíʼ mariʼkuminaʼ [1] (atayáá nota rí na̱ʼkha̱ náa námbá artículo).

GAGUAʼDÁÁ CONGREGACIÓN KAʼWU, MBÁ JNDUʼ GA̱JMA̱A̱ TSÍMÁÁ

14. Xú káʼnii gándoo muyambáá mu maʼni kaʼwu náa congregación rá.

14 Ajngá rawunʼ Dios naʼthí ndiéjunʼ gíʼmaa muʼni mu xarigá dí xkawiiʼ náa  congregación. Gundxa̱ʼwámi̱jna̱ dí nirígá náa xuajen Corinto. Pablo nindoo kaʼñún wéñuʼ a̱ngiu̱lú bi̱ nikuwa ikhí. Ikhaa má niʼsngúún mbaʼin rí gajkhun ga̱jma̱a̱ numuu Biblia (1 Cor. 1:1, 2). Ikha jngó gundxa̱ʼwámi̱jna̱ xú kaʼnii nikumu̱u̱ índo̱ ndiʼyoo rí mbáa xa̱biya̱ nakudaminaʼ aʼkhá ga̱jma̱a̱ congregación naniñuʼ maʼni. Pablo nixnúún ikha rígi̱ bi̱ kuya̱ edxu̱u̱: “Guxnaxíi xa̱bu̱ buʼko̱ náa Satanás”. Ikhiin ndiyóoʼ muni̱i̱ expulsar xa̱biya̱ bugi̱ náa congregación (1 Cor. 5:1, 5-7, 12). Rí mbiʼi xúgi̱, bi̱ kuya̱ edxu̱u̱ ma̱ndoo muni̱i̱ expulsar mbáa á mu tsítanga̱a̱ a̱jkiu̱u̱n numuu dí ra̱májánʼ rí naʼni. Á mu nuʼniu̱u̱n bi̱ nigájni̱i̱n rexa̱a̱ xó má eʼthí Biblia, muyambáá mu maʼni kaʼwu náa congregación (atayáá kúgumaʼá “Ndiéjunʼ eyoo gáʼthúu̱n”). Mbáa ma̱ngaa mumbáñuun mu mata̱nga̱a̱ a̱jkiu̱ún ga̱jma̱a̱ mbuyáaʼ rí Jeobá maʼni mba̱a̱ a̱jkiu̱u̱n kaʼñún.

15. Xú káʼnii gúʼni mu makuwáanʼ tsímáá ga̱jma̱a̱ mbá kambáxulú náa congregación rá.

15 Náa congregación ndrígóo Corinto nirígá i̱mba̱ xkujndu. Tikhun nigún kudiin a̱ngiu̱ún náa Xa̱bu̱ Ñajunʼ. Pablo niraxu̱u̱n: “Náa numuu tsiniʼñámíjná mu muniala dí ra̱májánʼ xá.” (1 Cor. 6:1-8.) Rí mbiʼi xúgi̱, tikhun a̱ngiu̱lú nuni negocios gajmiún eʼwíínʼ a̱ngiu̱lú ga̱jma̱a̱ nandáti̱gu̱u̱n mbújkha̱a̱ o nakumu̱ún rí a̱ngiu̱lú nininduwiinʼ. Ikha jngó nagún kudiin náa Xa̱bu̱ Ñajunʼ. Á mu xúʼko̱ erígá, mbáa xa̱bu̱ muta numáá Jeobá ga̱jma̱a̱ xuajñu. Ma̱ngaa ma̱ndoo maʼni marigá xkujndu náa congregación. Náa Ajngá rawunʼ Dios naʼthí rí gíʼmaa makuwaanʼ tsímáá gajmiúlú a̱ngiu̱lú, maski ajndu mandáti̱gu̱lú mbújkha̱a̱. [2] Jesús niʼsngáa xú káʼnii gunimbánii xkujndu gakhi̱i̱ (atraxnuu Mateo 5:23, 24 ga̱jma̱a̱ 18:15-17). Guʼnimbulúʼ xtágabu ndrígóo. Xúʼko̱ makuwáanʼ tsímáá ga̱jma̱a̱ mbá kambáxulú náa congregación.

16. Náa numuu rí kuwa mbá kambáxu̱u̱n xa̱bi̱i̱ Dios rá.

16 Náa Biblia naʼthí: “¡Atayáá! Ra̱ʼkhá tháán májánʼ ga̱jma̱a̱ mitsaan rí a̱ngiu̱lú makuwa mbá kambáxu̱u̱n” (Sal. 133:1). Bi̱ israelitas nikuwa organizados ga̱jma̱a̱ mbá jnduʼ índo̱ ninimbu̱ún kuyáá Jeobá. Dios niʼthí xú káʼnii gakuwa xa̱bi̱i̱ nda̱wa̱á: “Mbá jnduʼ gagruígíin, xóo mugu̱ náa gúláa” (Miq. 2:12). Jeobá ma̱ngaa niʼtáriyaʼ rí xa̱bi̱i̱ muni ñajunʼ mbá kambáxu̱u̱n numuu rí majmañún rí gajkhun numuu Biblia. Ikhaa niʼthí: “Maxnu̱u̱ xuajin mbá ajngáa mikaʼwu, mu xúgínʼ ikhiin mugríga̱a̱ wéñuʼ mbiʼyuu Jeobá, mu xúgínʼ gúyamajkhuʼ mbá kambáxu̱u̱n’” (Sof. 3:9). Lá ragájkhun rí nadxulú wéñuʼ numuu rí nandoo nduʼyamajkuíí Jeobá mbá kambáxulú ráʼ.

Bi̱ kuya̱ edxu̱u̱ mumbayíí xa̱bu̱ bi̱ “gakiéʼkhúun”. (Atayáá kutriga̱ 17.)

17. Ndiéjunʼ gíʼmaa muni bi̱ kuya̱ edxu̱u̱ á mu bi̱ xtáa náa congregación nakudaminaʼ aʼkhá rá.

17 Á mu mbáa nakudaminaʼ mbá aʼkhá mba̱a̱, bi̱ kuya̱ edxu̱u̱ muxpriguíí nacha̱  ga̱jma̱a̱ ajngáa gua̱ba̱ʼ. Ikhiin nduyáá rí Jeobá nandoo rí muñewa̱a̱n congregación náa dí ra̱májánʼ. Mu xúʼko̱ maʼni kaʼwu ga̱jma̱a̱ makuwá mbá kambáxu̱u̱n (Prov. 15:3). Pablo nindoo kaʼñún wéñuʼ a̱ngiu̱lú bi̱ kuwa náa Corinto. Ikha jngó nixprígún índo̱ ndiyóoʼ. Rígi̱ niʼnirámáʼ náa timbá carta. Ga̱jma̱a̱ bi̱ kuya̱ edxu̱u̱ náa Corinto ninimbaníí mbá nacha̱ xtágabu ndrígóo Pablo. Xú káʼnii eʼyáá rá. Numuu rí nguáthá gu̱nʼ nda̱wa̱á, Pablo niʼthún rí májánʼ nini índo̱ niʼnirámáʼ i̱mba̱ carta. Ikha jngó á mu mbáa ndxájulú “gakiéʼkhúun ga̱jma̱a̱ nákha ikhaa xóó tséjkha̱nú mbaʼyoo”, bi̱ kuya̱ edxu̱u̱ gíʼmaa muxpriguíí ga̱jma̱a̱ májánʼ (Gál. 6:1).

18. a) Náa numuu ninindxu̱u̱ májánʼ rí cristianos munimbaníí ikha ndrígóo Ajngáa rawunʼ Dios rá. b) Ndiéjunʼ gúʼyáá náa i̱mba̱ artículo rá.

18 Numuu rí cristianos bi̱ nikuwa nakha siglo timbá niniñami̱jna̱ maxnún ikha Ajngá rawunʼ Dios, congregación nirígá rí kaʼwu, mbá kambáxu̱u̱n ga̱jma̱a̱ tsímáá (1 Cor. 1:10; Efes. 4:11-13; 1 Ped. 3:8). Ga̱jma̱a̱ numuu rígi̱, a̱ngiu̱lú nindoo nitaraʼa ajngáa rí májánʼ ‹náa xúgíʼ rí niguma náa agoo mekhu› (Col. 1:23). Rí mbiʼi xúgi̱ xa̱bi̱i̱ Dios kuwa mbá jnduʼ ga̱jma̱a̱ kambáxu̱u̱n, ga̱jma̱a̱ nuʼtáraʼa ajngáa rí májánʼ náa xúgíʼ tsu̱du̱u̱ Ku̱ba̱ʼ. Náa i̱mba̱ artículo gúʼyáá itháán rí nasngájma dí i̱ndó nandulúʼ mbuʼyamajkuíí wéñuʼ Jeobá bi̱ kaʼyoo maʼtáñajunʼ ga̱jma̱a̱ muʼnimbulúʼ ikha rí na̱ʼkha̱ náa Biblia (Sal. 71:15, 16).

^ [1] (kutriga̱ 13): Atayáá libro Organizados para hacer la voluntad de Jehová, ináa 134 asndu 136.

^ [2] (kutriga̱ 15): Atayáá libro “Guni rí Dios ma̱ndoo kaʼyala”, ináa 223, timbá nota. Ikhí mataxkamaa itháan ga̱jma̱a̱ numuu índo̱ mbáa cristiano nandoo makruiga̱a̱ imba̱a̱.

^ párr. 7 Génesis 3:15: “Mani rí ikháánʼ ga̱jma̱ʼ a̱ʼgu̱ muguaʼdáála sia̱nʼ, bi̱ gáguwáʼ náa ikháánʼ ga̱jma̱a̱ bi̱ gáguwáʼ náa ikhaa muguaʼdáála sia̱nʼ. Ikhaa makujmbi̱i̱ náa edxa̱ʼ ma̱ngoo ikháánʼ matanigawíínʼ náa níxtuun rajkúu”.

^ párr. 7 Revelación 11:15: “Ikhaa bi̱ maʼni juwiin ángel niʼdu̱u̱ trompeta. Ikhú niwáán náa mekhu aʼwá gakhi̱i̱, náa nuthi: Reino ndrígóo numbaaʼ ni̱jkha̱nú ninindxu̱u̱ Reino ndrígóo Tátá ga̱jma̱a̱ Cristo, ga̱jma̱a̱ ikhaa maʼtáñajunʼ kámuu mbiʼi”.

^ párr. 11 3 Juan 9: “Rígá rí niniraʼmáʼ náa congregación, mú Diótrefes, bi̱ naniguʼ maʼga̱ ginii náa ikhiin, tsegruigú nimbá rí na̱ʼkha̱ náa ikháanʼxu ga̱jma̱a̱ gamajkhu. Ikha jngó, á mu na̱jkhá, mani marmáʼáan a̱jkiu̱u̱n rí xtáa raʼni, naʼthí ga̱jma̱a̱ numuxu ga̱jma̱a̱ ajngáa xkawiʼ. Ma̱ngaa, tsédxuu ga̱jma̱a̱ numuu rígi̱, ga̱jma̱a̱ tsegruiguíin ga̱jma̱a̱ gamajkhu a̱ngiu̱lú, ga̱jma̱a̱ bi̱ nandún mundrigúun ikhaa narikhún ga̱jma̱a̱ naxkawíin náa congregación”.